The Electronic Text Corpus of Sumerian Literature

ETCSLtransliteration : c.2.2.2

The lament for Urim

1.	tur₃-ra-na muš₃ mi-ni-in-ga amaš-a-na lil₂-e (Cited in OB catalogue from Nibru, at Philadelphia, 0.2.01, line 32; OB catalogue in the Louvre, 0.2.02, line 26; OB catalogue from Urim (U2), 0.2.04, line 44)
2.	am-e tur₃-ra-na muš₃ mi-ni-in-ga amaš-a-na lil₂-e
3.	u₃-mu-un kur-kur-ra-ke₄ muš₃ mi-ni-in-ga amaš-a-na lil₂-e
4.	^dmu-ul-lil₂-le eš₃-e nibru^ki-a muš₃ mi-ni-in-ga amaš-a-na lil₂-e
5.	dam-a-ni ^dnin-lil₂-le muš₃ mi-ni-in-ga amaš-a-na lil₂-e
6.	^dnin-lil₂-le e₂-bi ki-ur₃-ra muš₃ mi-ni-in-ga amaš-a-na lil₂-e
7.	nin keš₃^ki-a-ke₄ muš₃ mi-ni-in-ga amaš-a-na lil₂-e
8.	ga-ša-an-maḫ-e e₂-bi keš₃^ki-a muš₃ mi-ni-in-ga amaš-a-na lil₂-e
9.	mu-lu i₃-si-in^ki-na-ke₄ muš₃ mi-ni-in-ga amaš-a-na lil₂-e
10.	ga-ša-an-i₃-si-in^ki-na-ke₄ eš₃ e₂-gal-maḫ-a muš₃ mi-ni-in-ga /amaš\-a-na lil₂-e
11.	nin ki unug^ki-ga-ke₄ muš₃ mi-ni-in-ga [amaš]-a-na lil₂-e
12.	ga-ša-an-an-na-ke₄ e₂-bi ki unug^ki-ga muš₃ mi-ni-in-ga amaš-a-na [lil₂]-e
13.	^dnanna urim₂^ki-ma muš₃ mi-ni-in-ga amaš-a-na [lil₂]-e
14.	^dsuen-e e₂-kiš-nu-ĝal₂-la muš₃ mi-ni-in-ga amaš-a-na lil₂-e
15.	dam-a-ni ga-ša-an-gal-e muš₃ mi-ni-in-ga amaš-a-na lil₂-e
16.	ga-ša-an-gal-e agrun-kug-ga-na muš₃ mi-ni-in-ga amaš-a-na lil₂-e
17.	am uru₂-ze₂-ba^ki-ke₄ muš₃ mi-ni-in-ga amaš-a-na lil₂-e
18.	^dam-an-ki-ke₄ e₂-bi uru₂-ze₂-ba^ki-ke₄ muš₃ mi-ni-in-ga amaš-a-na lil₂-e
	{
	(1 ms. adds 1 line:)
18A.	ga-ša-an-X-[…] e₂-ba la-ra-ag^ki-a muš₃ mi-ni-in-ga amaš-a-na lil₂-e
	}
19.	^dšara e₂-maḫ-a muš₃ mi-ni-in-ga amaš-a-na lil₂-e
20.	^dud-saḫar-ra e₂-bi umma^ki-a muš₃ mi-ni-in-ga amaš-a-na lil₂-e
21.	^dba-u₂ uru₂-kug-ga muš₃ mi-ni-in-ga amaš-a-na lil₂-e
22.	a dug₄-ga ama₅-na muš₃ mi-ni-in-ga amaš-a-na lil₂-e
23.	dumu-a-ni ^dab-ba-u₂ muš₃ mi-ni-in-ga amaš-a-na lil₂-e
24.	^dab-ba-u₂ ma-gu₂-en-na-ke₄ muš₃ mi-ni-in-ga amaš-a-na lil₂-e
25.	^dlamma e₂ kug-ke₄ muš₃ mi-ni-in-ga amaš-a-na lil₂-e
26.	^dlamma-e e₂-tar-sir₂-sir₂-ra muš₃ mi-ni-in-ga amaš-a-na lil₂-e
27.	um-ma lagaš^ki-ke₄ muš₃ mi-ni-in-ga amaš-a-na lil₂-e
28.	^dma-ze₂-ze₂-be₂ e₂-bi lagaš^ki-ke₄ muš₃ mi-ni-in-ga amaš-a-na lil₂-e
29.	mu-lu niĝin₆^ki-ke₄ muš₃ mi-ni-in-ga amaš-a-na lil₂-e
30.	ga-ša-an gu-la e₂-bi sirara₃^ki muš₃ mi-ni-in-ga amaš-a-na lil₂-e
31.	mu-lu ki-nir-ša-ba^ki-ke₄ muš₃ mi-ni-in-ga amaš-a-na lil₂-e
32.	^ddumu-zid-abzu e₂-bi ki-nir-ša-ba^ki-ke₄ muš₃ mi-ni-in-ga amaš-a-na lil₂-e
33.	mu-lu gu₂-ab-ba^ki-ke₄ muš₃ mi-ni-in-ga amaš-a-na lil₂-e
34.	ga-ša-an-mar-ki-ke₄ eš₃ gu₂-ab-ba^ki-ke₄ muš₃ mi-ni-in-ga amaš-a-na lil₂-e
35.	ki-ru-gu₂ 1-kam-ma-am₃

36.	amaš-a-na lil₂-e ba-ni-in-ĝar i-si-iš-bi mu-un-kuš₂-u₃
37.	ab₂ gu₃-zu ^e₂tur₃-ra nu-mu-un-ĝal₂ tur₃ nun nu-ul
38.	ĝiš-gi₄-ĝal₂-bi-im

39.	uru₂ a-še-er gig-ga a-še-er-zu ĝar-ra
40.	a-še-er-zu gig-ga-am₃ uru₂ a-še-er-zu ĝar-ra
41.	uru₂ zid gul-la-na a-še-er-bi gig-ga-am₃
42.	urim₂ zid gul-la-na a-še-er gig-ga a-še-er-zu ĝar-ra
43.	a-še-er-zu gig-ga-am₃ uru₂ a-še-er-zu ĝar-ra
44.	urim₂^ki gul-la-na a-še-er-bi gig-ga
45.	a-še-er-zu gig-ga ga-ša-an-zu mu-lu er₂-re en₃-še₃ mu-un-kuš₂-u₃
46.	a-še-er-zu gig-ga ^dnanna mu-lu er₂-re en₃-še₃ mu-un-kuš₂-u₃
47.	še-eb urim₂^ki-ma a-še-er gig-ga-am₃ a-še-er-zu ĝar-ra
48.	e₂-kiš-nu-ĝal₂ a-še-er-zu gig-ga-am₃ a-še-er-zu ĝar-ra
49.	eš₃ agrun-kug a-še-er gig-ga-am₃ a-še-er-zu ĝar-ra
50.	ki-ur₃ ki gal a-še-er gig-ga-am₃ a-še-er-zu ĝar-ra
51.	eš₃ nibru^ki uru₂ a-še-er gig-ga-am₃ a-še-er-zu ĝar-ra
52.	še-eb e₂-kur-ra a-še-er gig-ga-am₃ a-še-er-zu ĝar-ra
53.	ĝa₂-ĝiš-šu₂-a a-še-er gig-ga-am₃ a-še-er-zu ĝar-ra
54.	ub-šu-unken-na a-še-er gig-ga-am₃ a-še-er-zu ĝar-ra
55.	še-eb uru₂-kug-ga a-še-er gig-ga-am₃ a-še-er-zu ĝar-ra
56.	e₂-tar-sir₂-sir₂ a-še-er gig-ga-am₃ a-še-er-zu ĝar-ra
57.	ma-gu₂-en-na a-še-er gig-ga-am₃ a-še-er-zu ĝar-ra
58.	še-eb i₃-si-in^ki-na a-še-er gig-ga-am₃ a-še-er-zu ĝar-ra
59.	eš₃ e₂-gal-maḫ a-še-er gig-ga-am₃ a-še-er-zu ĝar-ra
60.	še-eb ki unug^ki-ga a-še-er gig-ga-am₃ a-še-er-zu ĝar-ra
61.	še-eb uru₂-ze₂-ba^ki-ke₄ a-še-er gig-ga-am₃ a-še-er-zu ĝar-ra
62.	a-še-er-zu gig-ga-am₃ ga-ša-an-zu mu-lu er₂-re en₃-še₃ mu-un-kuš₂-u₃
63.	a-še-er-zu gig-ga-am₃ ^dnanna mu-lu er₂-re en₃-še₃ mu-un-kuš₂-u₃
64.	uru₂ mu-zu i₃-ĝal₂ za-e ba-e-da-gul-e
65.	uru₂ bad₃-zu i₃-il₂ kalam-zu ba-e-da-til
66.	uru₂-ĝu₁₀ u₈ zid-gin₇ sila₄-zu ba-e-da-tar
67.	urim₂^ki ud₅ zid-gin₇ maš₂-zu ba-e-da-til
68.	uru₂ ĝarza-zu im-me-de₃-kur₂-ra
69.	me-zu me kur₂-ra šu bal ba-ni-ib-ak
70.	a-še-er-zu gig-ga-am₃ ga-ša-an-zu mu-lu er₂-re en₃-še₃ mu-un-kuš₂-u₃
71.	a-še-er-zu gig-ga-am₃ ^dnanna mu-lu er₂-re en₃-še₃ mu-un-kuš₂-u₃
72.	ki-ru-gu₂ 2-kam-ma-am₃

73.	uru₂ zid gul-la-na a-še-er-bi gig-ga-am₃
74.	urim₂^ki gul-la-na a-še-er-bi gig-ga-am₃
75.	ĝiš-gi₄-ĝal₂-bi-im

76.	nin lu₂ e₂ ḫul-a-ta uru₂-ni er₂-re ba-an-di-ni-ib-ĝar
77.	^dnanna lu₂ kalam ba-an-da-til-la
78.	urim₂^ki-e a-nir-ra bar ba-da-an-tab
79.	munus zid nin uru₂^ki-ni-še₃ kuš₂-u₃-de₃
80.	^dnin-gal kalam-ma-ni-še₃ u₃ nu-ku-ku-de₃
81.	e-ne-ra nam uru₂-na mu-na-te er₂ gig i₃-še₈-še₈
82.	nin-ra nam e₂-a-na mu-na-te er₂ gig i₃-še₈-še₈
83.	nam uru₂ ḫul-a-na mu-na-te er₂ gig i₃-še₈-še₈
84.	nam e₂ ḫul-a-na mu-na-te a-nir gig-ga-bi im-da-ra-da-ĝa₂-ĝa₂
85.	munus-e ad-a-ni balaĝ er₂-ra ki al-ĝar-ra-ba
86.	i-lu ma sig₉-ga tur-tur-bi ni₂-te-na mi-ni-ib-be₂
87.	ud-da ma-al-ma-al-la i-si-iš-bi ma-la₂-la₂
88.	ud-da na-aĝ₂-bi-še₃ sumur-sumur-a-ĝu₁₀-ne
89.	lu₂ nu-nus-ĝen ud-da ma-al-ma-al-la
90.	ud-da ma-al-ma-al-la i-si-iš-bi ma-la₂-la₂
91.	ud-da ud gig-ga ma-ra-ma-al-ma-al-la
92.	me-e ud-bi-še₃ zaraḫ ḫe₂-em-ši-ak
93.	ud-da a₂-bi-še₃ ba-ra-ba-ra-e₃-en
94.	ud tur-bi-še₃ bal-ĝu₁₀ ud sag₉-ga bal-ĝu₁₀ ud sag₉-ga i-bi₂ ba-ra-bi₂-in-du₈-a
95.	ĝi₆-še₃ a-še-er gig ma-ra-ma-al-ma-al-la
96.	me-e ĝi₆-bi-še₃ zaraḫ ḫe₂-em-ši-ak
97.	ĝi₆ a₂-bi ba-ra-ba-ra-e₃-en
98.	ud uru₂-gin₇ gul-lu-ba ni₂-bi ḫa-ma-la₂-la₂
99.	na-aĝ₂-bi-še₃ ki-nu₂ ĝi₆ u₃-na-ĝa₂ ki-nu₂ ĝi₆ u₃-na-ĝa₂ lib ba-ra-an-mar
100.	ud tur-bi-še₃ ki-nu₂-ĝa₂ mu-uš-la₂-a-bi ki-nu₂-ĝa₂ ĝiš-la₂-a-bi nu-ši-in-ga-mu-ni-ib-DU
	{
	(2 mss. add 1 line:)
100A.	ka-na-aĝ₂-ĝu₁₀-ta ni₂ šub me-e ba-ra-ba-da-ak
	}
101.	ka-na-aĝ₂-ĝu₁₀ aĝ₂-gig-ga ba-ĝal₂-la-ke₄-eš
102.	ab₂ amar-ra-gin₇-nam ki šu ḫe₂-em-mi-ib-ak
103.	ka-na-aĝ₂-ĝu₁₀ ni₂ šu-a ba-ra-mu-da-ab-gi₄
104.	uru₂-ĝu₁₀ du-lum gig ba-ĝal₂-la-ke₄-eš
105.	mušen an-na-gin₇ a₂ dub₂ ḫe₂-em-ši-ak
106.	me-e uru₂-ĝu₁₀-še₃ ḫe₂-em-ši-dal-dal-en
107.	uru₂-ĝu₁₀ ki-ĝal₂-ba ḫe₂-en-ga-mu-de₃-gul
108.	urim₂^ki ki-nu₂-bi-a ḫe₂-en-ga-mu-de₃-til
109.	šu ud-da an-ta ba-ĝal₂-la-ke₄-eš
110.	gu₃ ḫu-mu-dub₂ edin-na ud gi₄-a me-e ḫe₂-em-ma-dug₄
111.	ud-da gaba-bi ba-ra-mu-da-zig₃
112.	nu-nus-ĝen agrun-kug e₂ na-aĝ₂-^dga-ša-an-na-ĝu₁₀
113.	bal-ba ud su₃-ra₂ na-ma-ni-in-ĝar-re-eš-am₃
114.	er₂ a-še-er-ra ki ḫa-ma-ab-us₂-am₃
115.	e₂ ki ur₅ sag₉-ge saĝ gig₂-ga i₃-me-a-ke₄-eš
116.	ezen-bi-ta ib₂-ba su-mu-ug-ga ḫe₂-en-ga-mu-da-tab-tab-be₂-eš
117.	ud tur-bi-še₃ e₂-ĝu₁₀ ki sag₉-ga
118.	e₂ zid ḫul-a-ĝu₁₀ i-bi₂ ba-ra-bi₂-in-du₈-am₃
119.	ur₅ uš₂-a a-še-er aĝ₂-gig-ga
120.	a-še-er aĝ₂-gig-ga ḫu-mu-ni-tum₂-tum₂-mu-uš
121.	e₂ lu₂ zid-de₃ ba-ab-ĝar-ra-ĝu₁₀
122.	gi-sig kiri₆-gin₇ bar-ba ḫe₂-bi₂-in-dub₂
123.	e₂-kiš-nu-ĝal₂ e₂ nam-lugal-la-ĝu₁₀
124.	e₂ zid e₂ er₂-ra ba-an-di-ni-ib-ĝar-ra-ĝu₁₀
125.	lul-e-eš du₃-u₃-ba zid-de₃-eš gul-lu-ba
126.	ḫa-la ba-bi-a ḫa-ma-ni-in-ĝar-re-eš-am₃
127.	za-lam-ĝar e₂ ki-buru₁₄ bur₁₂-ra-gin₇
128.	e₂ ki-buru₁₄ bur₁₂-ra-gin₇ tum₉ šeĝ₃-ĝa₂ ḫa-ba-an-ĝar
129.	urim₂^ki ama₅ niĝ₂ dirig-ĝu₁₀
130.	e₂ uru₂ sig₉-ga mu-un-bur₁₂-bur₁₂-bur₁₂
131.	amaš ^lu₂sipad-da-gin₇ ḫa-ba-bur₁₂-bur₁₂
132.	niĝ₂-gur₁₁ uru₂ ĝal₂-ĝal₂-la-ĝu₁₀ sug-ge ḫu-mu-da-ab-gu₇
133.	ki-ru-gu₂ 3-kam-ma-am₃

134.	urim₂^ki er₂-re ba-an-di-ni-ib-ĝar
135.	ĝiš-gi₄-ĝal₂-bi-im

136.	ud-ba ud ne-en ba-sag₃-sag₃-ga-ba
137.	nin-da uru₂-ni ba-an-da-gul-la-ba
138.	ud-ba ud ne-en ba-dim₂-dim₂-ma-ba
139.	uru₂-ĝu₁₀ gul-gul-da im-me-ne-eš-a-ba
140.	urim₂^ki gul-gul-da im-me-ne-eš-a-ba
141.	uĝ₃-bi ug₅-ge-de₃ a₂ mu-un-aĝ₂-eš-a-ba
142.	ud-ba me-e uru₂-ĝu₁₀-še₃ ĝa₂-la ba-ra-ba-ra-dag
143.	ka-na-aĝ₂-ĝu₁₀-ta ni₂ šub me ba-ra-ba-da-ak
144.	an-ra a i-bi₂-ĝa₂ me-e ḫe₂-em-ma-na-de₂
145.	^dmu-ul-lil₂-ra ni₂-ĝu₁₀ šag₄-ne-ša₄ ḫe₂-em-ma-na-ak
146.	uru₂-ĝu₁₀ nam-ba-gul-lu ḫe₂-em-me-ne-dug₄
147.	urim₂^ki nam-ba-gul-lu ḫe₂-em-me-ne-dug₄
148.	uĝ₃-bi nam-ba-til-le ḫe₂-em-me-ne-dug₄
149.	an-ne₂ e-ne-eĝ₃-bi ba-ra-mu-un-gur
150.	^dmu-ul-lil₂-le i₃-sag₉ ḫe₂-am₃-bi šag₄-ĝu₁₀ ba-ra-bi₂-in-sed₄
151.	2-kam-ma-še₃ pu-uḫ₂-rum ki saĝ-ki ba-da-ab-ĝal₂-la
152.	^da-nun-na e-ne-eĝ₃ zu₂ keše₂-da-bi ba-da-an-dur₂-ru-ne-eš-a
153.	ur₂ ḫe₂-em-ma-sud-sud a₂ ḫe₂-em-ma-la₂-la₂
154.	an-ra a i-bi₂-ĝa₂ me-e ḫe₂-em-ma-na-dug₄
155.	^dmu-ul-lil₂-ra ni₂-ĝu₁₀ šag₄-ne-ša₄ ḫe₂-em-ma-ak
156.	uru₂-ĝu₁₀ nam-ba-gul-lu ḫe₂-em-me-ne-dug₄
157.	urim₂^ki nam-ba-gul-lu ḫe₂-em-me-ne-dug₄
158.	uĝ₃-bi nam-ba-til-le ḫe₂-em-me-ne-dug₄
159.	an-ne₂ e-ne-eĝ₃-bi ba-ra-mu-un-gur
160.	^dmu-ul-lil₂-le i₃-sag₉ ḫe₂-am₃-bi šag₄-ĝu₁₀ ba-ra-bi₂-in-sed₄
161.	uru₂-ĝu₁₀ gul-gul-lu-ba a₂-bi ḫe₂-em-ma-an-aĝ₂-eš
162.	urim₂^ki gul-gul-lu-ba a₂-bi ḫe₂-em-ma-an-aĝ₂-eš
163.	uĝ₃-bi ug₅-ge-de₃ na-aĝ₂-bi ḫa-ba-an-tar-re-eš
164.	me-e niĝ₂-dug₄-ĝu₁₀ mu-ne-šum₂-ma-gin₇
165.	me-e uru₂-ĝu₁₀-da ḫe₂-en-ga-mu-un-da-la₂-eš
166.	urim₂^ki-ĝu₁₀ ma-da ḫe₂-en-ga-mu-da-la₂-e-eš
167.	an-ne₂ dug₄-ga-ni ḫur nu-kur₂-ru-dam
168.	^dmu-ul-lil₂-le ka-ta e₃-a-ni šu nu-bal-e-de₃
169.	ki-ru-gu₂ 4-kam-ma-am₃

170.	uru₂-ni ba-an-da-gul-la me-ni ba-an-da-kur₂-ra
171.	ĝiš-gi₄-ĝal₂-bi-im

172.	^den-lil₂-le ud-de₃ gu₃ ba-an-de₂ uĝ₃-e še am₃-ša₄
173.	ud ḫe₂-ĝal₂-la kalam-da ba-da-an-kar uĝ₃-e še am₃-ša₄
174.	ud dug₃ ki-en-gi-da ba-da-an-kar uĝ₃-e še am₃-ša₄
175.	ud ḫul-ĝal₂-e a₂ ba-da-an-aĝ₂ uĝ₃-e še am₃-ša₄
176.	kin-gal-ud-da ud-da gub-ba šu-na im-ma-an-šum₂
177.	ud kalam til-til-e gu₃ ba-an-de₂ uĝ₃-e še am₃-ša₄
178.	im-ḫul-im-ḫul-e gu₃ ba-an-de₂ uĝ₃-e še am₃-ša₄
179.	^den-lil₂-le ^dgibil a₂-taḫ-a-ni mu-na-ni-in-kur₉-re
180.	ud gal an-na-ke₄ gu₃ ba-an-de₂ uĝ₃-e še am₃-ša₄
181.	ud gal-e an-ta gu₃ im-me uĝ₃-e še am₃-ša₄
182.	ud kalam til-til-e ki-a mur im-ša₄ uĝ₃-e še am₃-ša₄
183.	im-ḫul-e a maḫ e₃-a-gin₇ gu₂-bi nu-ĝa₂-ĝa₂
184.	^ĝištukul uru₂-ke₄ saĝ gaz i₃-ak-e teš₂-bi i₃-gu₇-e
185.	an-na ur₂-ba kana₆^? mu-un-ni₁₀-ni₁₀ uĝ₃-e še am₃-ša₄
186.	ud-da igi-ba izi mu-un-bar₇-bar₇-e uĝ₃-e še am₃-ša₄
187.	ud mir-mir-da izi-ĝi₆-edin-na bar ba-da-an-tab
188.	an-bar₇ bar-šeĝ₃ il₂-il₂-la-gin₇ izi im-ma-an-bar₇-bar₇
189.	an-bar₇-gana₂ ud zalag e₃-a ud dug₃-da ba-da-an-tab
190.	kalam-ma ud zalag-ga la-ba-an-e₃ mul an-usan_x(DUR)-gin₇ ba-zal
191.	ĝi₆ giri₁₇-zal a₂ sed ĝar-ra-ba ^tum₉u₁₈-lu ba-da-an-tab
192.	šika bar₇-bar₇-re-da saḫar im-da-tab-tab uĝ₃-e še am₃-ša₄
193.	saĝ gig₂-ga tum₉-tum₉ ba-an-dal uĝ₃-e še am₃-ša₄
194.	ki-en-gi ĝiš-bur₂-ra i₃-bal-e uĝ₃-e še am₃-ša₄
195.	kalam-e saĝ e₂-ĝar₈ du₃ i₃-ak-e teš₂-bi i₃-gu₇-e
196.	ud gig er₂-re nam nu-tar-re uĝ₃-e še am₃-ša₄
197.	ud šu ur₄-ur₄-re kalam i₃-ur₃-ur₃-re
198.	ud a-ma-ru-gin₇ uru₂ i₃-gul-gul-e
199.	ud kalam til-til-e uru₂-a me bi₂-ib-ĝar
200.	ud niĝ₂ u₂-gu de₂-de₂ ḫul-ĝal₂-eš ba-e-DU
201.	ud izi-gin₇ bar₇-a uĝ₃-e šu bi₂-ib-ĝar
202.	ud ḫul gig dug₄-ga ^den-lil₂-la₂ ud kalam-ta be₄-be₄
203.	urim₂^ki-ma tug₂-gin₇ ba-e-dul gada-gin₇ ba-e-bur₂
204.	ki-ru-gu₂ 5-kam-ma-am₃

205.	ud ug-am₃ al-du₇-du₇ uĝ₃-e še am₃-ša₄
206.	ĝiš-gi₄-ĝal₂-bi-im

207.	ud-ba ud uru₂-da ba-da-an-ĝar uru₂-bi du₆-du₆-da
208.	a-a ^dnanna uru₂-ni du₆-du₆-da ba-da-an-ĝar uĝ₃-e še am₃-ša₄
209.	ud-ba ud kalam-ta ba-da-an-kar uĝ₃-e še am₃-ša₄
	{
	(2 mss. add 1 line:)
209A.	ud dug₃ ki-en-gi-da ba-da-an-kar uĝ₃-e še am₃-ša₄
	}
210.	uĝ₃-bi šika kud-da nu-me-a bar-ba ba-e-si
211.	bad₃-bi gu₂-ĝiri₃ im-ma-an-ĝar-ĝar uĝ₃-e še am₃-ša₄
212.	abula maḫ ĝiri₃ ĝal₂-la-ba ad₆ im-ma-an-ĝar-ĝar
213.	sila daĝal ezem-ma du₃-a-ba saĝ bal-e-eš ba-ab-ĝar
214.	e-sir₂-e-sir₂ ĝiri₃ ĝal₂-la-ba ad₆ im-ma-an-ĝar-ĝar
215.	ešemen kalam-ma ĝal₂-la-ba uĝ₃ zar-re-eš ba-an-du₈
216.	u₃-mun kalam-ma-ke₄ urud nagga-gin₇ sur₃-sur₃ ba-ni-in-de₆-eš
217.	ad₆-bi ^uzui₃-udu ud-de₃ ĝal₂-la-gin₇ ni₂-bi-a mu-un-zal-eš
218.	lu₂ ^urudḫa-zi-in-e im-til-la-gin₇ saĝ tug₂ la-ba-ab-dul-eš
219.	maš-da₃ ĝiš-bur₂-ra dab₅-ba-gin₇ ka saḫar-ra bi₂-in-us₂
220.	lu₂ ĝiš-gid₂-da mu-un-ra-bi niĝ₂-la₂ ba-ra-bi₂-in-la₂-eš
221.	i-gi₄-in-zu ki ḫa-ri-iš-ta ama-ba-ka uš₂-bi-a mu-un-nu₂(source: sa₄)-eš
222.	lu₂ ^ĝišmitum-e im-til-la-gin₇ tug₂ gibil ba-ra-bi₂-in-la₂-eš
223.	lu₂ kurun naĝ-a nu-me-eš-a gu₃ zag-ga bi₂-in-ĝal₂-eš
224.	^ĝištukul-e gub-ba ^ĝištukul-e in-gaz uĝ₃-e še am₃-ša₄
225.	lu₂-kar-ra-bi ud im-ma-du-bu-ul uĝ₃-e še am₃-ša₄
226.	urim₂^ki-ma sig₉-ga kalag-ga-bi šag₄-ĝar-ra im-til
227.	um-ma ab-ba e₂-ta nu-e₃ izi mu-ni-in-sig₁₀-sig₁₀-ge₅-eš
228.	di₄-di₄-la₂ ur₂ ama-ba-ka nu₂-a ku₆-gin₇ a ba-an-de₆
229.	emeda(UM.ME)^da lirum kalag-ga-bi lirum ba-an-da-du₈
230.	dim₂-ma kalam-ma u₂-gu im-ta-an-de₂ uĝ₃-e še am₃-ša₄
231.	ĝalga kalam-ma sug-ge₄ ba-ab-gu₇ uĝ₃-e še am₃-ša₄
232.	ama dumu-ni igi-ni ba-ra-e₃ uĝ₃-e še am₃-ša₄
233.	ad-da dumu-ni-ta ba-da-an-kur₂ uĝ₃-e še am₃-ša₄
234.	uru₂-a dam ba-šub dumu ba-šub niĝ₂-gur₁₁ ba-bir-bir-re
235.	saĝ gig₂ ki-saĝ-ĝal₂-la-ba im-me-de₃-re₇-eš
236.	nin-bi mušen ni₂ te-a-gin₇ uru₂-ni ba-ra-e₃
237.	nin-gal-e mušen ni₂ te-a-gin₇ uru₂-ni ba-ra-e₃
238.	niĝ₂-gur₁₁ kalam-ma ĝar-ĝar-ra-ba šu pe-el-la₂ ba-ab-dug₄
239.	ama₅ kalam-ma šar₂-šar₂-ra-ba izi im-ma-an-bar₇-bar₇
240.	a-niĝin₂-ba ^dgibil lu₂ sikil-la kiĝ₂ mu-un-tuku-tuku
241.	ḫur-saĝ suku_x(SUKUD)-ra₂ šu nu-teĝ₃-ĝe₂₆ e₂-kiš-nu-ĝal₂-la
242.	e₂ zid-ba ^urudḫa-zi-in gal-gal-e teš₂-bi i₃-gu₇-e
243.	šimaški^ki elam^ki lu₂ ḫa-lam-ma 30 giĝ₄ ba-an-ak-e-eš
244.	e₂ zid ^ĝišal-a mi-ni-ib-bal-e-ne
245.	uru₂ du₆-du₆-dam mu-un-ĝa₂-ĝa₂-ne
246.	nin-bi a uru₂-ĝu₁₀ im-me a e₂-ĝu₁₀ im-me
247.	^dnin-gal-e a uru₂-ĝu₁₀ im-me a e₂-ĝu₁₀ im-me
248.	lu₂ nu-nus-e u₃ uru₂-ĝu₁₀ mu-da-gul u₃ e₂-ĝu₁₀ mu-da-gul
249.	^dnanna eš₃ urim₂^ki mu-da-gul mu-lu-bi ba-ug₅-ga-eš
250.	ki-ru-gu₂ 6-kam-ma-am₃

251.	tur₃-ra-na amaš-a-na nu-nus-e inim gig mu-ni-ib-be₂
252.	uru₂ ud-de₃ am₃-gul-e
253.	ĝiš-gi₄-ĝal₂-bi-im

254.	ama ^dnin-gal uru₂-ni lu₂-erim₂-gin₇ bar-ta ba-da-gub
255.	lu₂ nu-nus-e er₂ e₂ ḫul-a-na gig-ga-bi im-me
256.	egir₃-re eš₃ urim₂^ki ḫul-a-na gig-ga-bi im-me
257.	an-ne₂ uru₂-ĝu₁₀ na-aĝ₂ ḫa-ba-da-an-kud uru₂-ĝu₁₀ ḫu-mu-da-gul
258.	^dmu-ul-lil₂-le e₂-ĝu₁₀ šu ḫe₂-bi₂-in-bal ^ĝišal-e ḫa-ba-ra
259.	sig-ta di-ĝa₂ izi ḫa-ba-ni-in-šub a uru₂-ĝu₁₀ ḫu-mu-da-gul
260.	^dmu-ul-lil₂-e i-bi₂ nim-ta di-ĝa₂ u₃-bu-bu-ul ḫa-ba-ni-in-šub
261.	uru₂ bar-ra uru₂ bar ḫu-mu-da-an-gul a uru₂-ĝu₁₀ ga-am₃-dug₄
262.	uru₂ šag₄-ba uru₂ ša₃-ab ḫu-mu-da-an-gul a uru₂-ĝu₁₀ ga-am₃-dug₄
263.	e₂ uru₂ bar-ra-ĝu₁₀ ḫa-ba-gul-gul a e₂-ĝu₁₀ ga-am₃-dug₄
264.	e₂ uru₂ ša₃-ba-ĝu₁₀ ḫa-ba-gul-gul a e₂-ĝu₁₀ ga-am₃-dug₄
265.	uru₂-ĝu₁₀ u₈ zid-gin₇ ba-ra-ma-lu sipad zid-bi ba-ra-ĝen
266.	urim₂^ki u₈ zid-gin₇ ba-ra-ma-lu kab-bar-bi ba-ra-ĝen
267.	gud-ĝu₁₀ tur₃-bi-a ba-ra-mu-un-šub mu-lu-bi ba-ra-ĝen
268.	e-ze₂-ĝu₁₀ amaš-bi-a ba-ra-mu-un-šub na-gada-bi ba-ra-ĝen
269.	id₂ uru₂-ĝa₂-ke₄ saḫar ḫa-ba-niĝin₂ e₂ ka₅-a ḫa-ba-an-du₃
270.	šag₄-ba a zal-le ba-ra-mu-un-de₆ mu-un-kud-bi ba-ra-ĝen
271.	gana₂ uru₂-ĝa₂-ke₄ še ba-ra-ma-al mu-un-gar₃-bi ba-ra-ĝen
272.	gana₂-ĝu₁₀ gana₂ ^ĝišal-e ri-a-gin₇ mul-gana₂ bil₂ ḫa-ba-mu₂
273.	pu₂-kiri₆ lal₃ gurun dirig-ĝu₁₀ ^ĝiškiši₁₆ kur-ra ḫa-ba-mu₂
274.	edin giri₁₇-zal-bi du₃-du₃-a-ĝu₁₀ gir₄-gin₇ ḫa-ba-ḫur-ḫur
275.	mu-un-gur₁₁-ĝu₁₀ buru₄^mušen-dugud zig₃-ga-gin₇ dal-dal-bi ḫa-ba-ab-in-zig₃ mu-un-gur₁₁-ĝu₁₀ ga-am₃-dug₄
276.	mu-un-gur₁₁-ĝu₁₀ sig-ta di-ĝa₂ sig-še₃ ḫa-ba-ab-ir mu-un-gur₁₁-ĝu₁₀ ga-am₃-dug₄
277.	mu-un-gur₁₁-ĝu₁₀ i-bi₂ nim-ta di-ĝa₂ i-bi₂ nim-še₃ ḫa-ba-ab-ir mu-un-gur₁₁-ĝu₁₀ ga-am₃-dug₄
278.	kug za ^na₄za-gin₃-ĝu₁₀ ḫu-mu-da-an-bir-bir-re mu-un-gur₁₁-ĝu₁₀ ga-am₃-dug₄
279.	gi₁₆-sa-ĝu₁₀ sug-ge₄ ḫu-mu-da-ab-gu₇ mu-un-gur₁₁-ĝu₁₀ ga-am₃-dug₄
280.	kug-ĝu₁₀ lu₂ kug nu-zu-u₃-ne šu-bi ḫa-ba-da-ab-si
281.	za-ĝu₁₀ lu₂ za nu-zu-u₃-ne gu₂-bi ḫa-ba-da-ab-si
282.	buru₅^mušen mušen-ĝu₁₀ ḫu-mu-dal-dal a uru₂-ĝu₁₀ ga-am₃-dug₄
283.	gi₄-in du₅-mu-ĝu₁₀ ma₂-e ḫa-ba-ab-laḫ₄-e-eš a uru₂-ĝu₁₀ ga-am₃-dug₄
284.	me-li-e-a gi₄-in-ĝu₁₀ uru₂ kur₂-ra šu-še-er kur₂ ḫa-ba-an-dab₅
285.	šul-ĝu₁₀ edin ki nu-zu-na tug₂-mu-un-dur₇ ḫa-ba-an-ak
286.	[me-li-e-a uru₂-ĝu₁₀] nu-me-a me-e ga-ša-an-bi nu-ĝen
287.	[^dnanna] urim₂^ki nu-me-a me-e lu₂-bi nu-ĝen
288.	ar₂-mur-ra e₂-ĝu₁₀ ḫa-ba-du₃-a uru₂-ĝu₁₀ ḫa-ba-gul-la
289.	nu-nus zid-ĝen uru₂-ĝu₁₀-ta uru₂ kur₂ ḫa-ba-ra-du₃-du₃-a
290.	ar₂-mur-ra uru₂-ĝu₁₀ ḫa-ba-du₃-a e₂-ĝu₁₀ ḫa-ba-gul-la
291.	ga-ša-an-gal-ĝen uru₂-ĝu₁₀-ta e₂ kur₂ ḫa-ba-ra-du₃-du₃-a
292.	me-li-e-a uru₂ mu-da-gul u₃ e₂-ĝu₁₀ mu-da-gul
293.	^dnanna eš₃ urim₂^ki mu-da-gul mu-lu-bi ba-ug₅-ga-eš
294.	me-li-e-a me-a tuš-u₃-de₃ me-a gub-bu-de₃
295.	me-li-e-a uru₂-ĝu₁₀-ta e₂ kur₂ ma-ra-an-du₃-u₃-de₃
296.	nu-nus zid-ĝen e₂-ĝu₁₀-ta uru₂ kur₂ ma-ra-an-ĝa₂-ĝa₂-de₃
297.	ki-bi-ta edin-ta ba₉-ra₂-a-bi a mu-lu-ĝu₁₀ ga-am₃-dug₄
298.	uru₂-ĝu₁₀ urim₂^ki-ta ba₉-ra₂-a-bi a uru₂-ĝu₁₀ ga-am₃-dug₄
299.	lu₂ siki-ni numun₂-bur-gin₇ šu mu-ni-in-dub₂-dub₂
300.	gaba-ni ub₃ kug-ga-am₃ i₃-sag₃-ge a uru₂-ĝu₁₀ im-me
301.	igi-ni er₂-ra mi-ni-ib-zi-zi-i-zi er₂ gig i₃-še₈-še₈
302.	me-li-e-a uru₂-ĝu₁₀ nu-me-a me-e ga-ša-an-bi nu-ĝen
303.	^dnanna eš₃ urim₂^ki nu-me-a me-e mu-lu-bi nu-ĝen
304.	me-li-e-a ^e₂tur₃ bur₁₂-ra-ĝen ab₂ sag₂ dug₄-ga-ĝen
305.	^dga-ša-an-gal-ĝen na-gada pe-el-la₂-gin₇ ^ĝištukul ganam₄-ma bi₂-in-šub
306.	me-li-e-a uru₂-ta e₃-a-ĝen ni₂ nu-dub₂-bu-ĝen
307.	^dga-ša-an-gal-ĝen e₂-ta e₃-a-ĝen ki-tuš nu-pad₃-de₃-ĝen
308.	i-gi₄-in-zu gir₅ uru₂ kur₂-ra saĝ il₂ tuš-a-ĝen
309.	e₂ ur₅-ur₅-ra aĝ₂-gig-ga-am₃ saĝ-a tuš ma-ab-us₂-e
310.	e₂ ur₅-ra mu-lu tuš-bi tuš-tuš-a gu₃ e-ne-eĝ₃ nu-dirig-ĝen
311.	ki-ba nam uru₂-na mu-un-na-te er₂ gig i₃-še₈-še₈
312.	nin-ra nam e₂-a-na mu-un-na-te er₂ gig i₃-še₈-še₈
313.	nam e₂ ḫul-a-na mu-un-na-te er₂ gig i₃-še₈-še₈
314.	nam uru₂ ḫul-a-na mu-un-na-te er₂ gig i₃-še₈-še₈
315.	me-li-e-a na-aĝ₂ uru₂-ĝu₁₀ ga-am₃-dug₄ na-aĝ₂ uru₂-ĝu₁₀ gig-ga-am₃
316.	nin-ĝen e₂ gul-la-ĝu₁₀ ga-am₃-dug₄ na-aĝ₂ e₂-ĝu₁₀ gig-ga-am₃
317.	še-eb urim₂^ki-ma a dug₄-ga-am₃ a bi₂-gi₄-a-ĝu₁₀
318.	e₂ zid-ĝu₁₀ uru₂-ĝu₁₀ du₆-du₆-da ba-mar-re-en-na-ĝu₁₀
319.	bur₂-ra e₂ zid gul-la-za-ka ba-e₃-de₃-nu₂-u₃-nam
320.	gud šub-ba-gin₇ in-ĝar-zu-ta ba-ra-mu-e-da-zig₃-ga
321.	me-li-e-a du₃-a-zu lul-la-am₃ gul-la-zu gig-ga-am₃
322.	nu-nus-ĝen eš₃ urim₂^ki nidba-bi i₃-ba-kur₂-ra-am₃
323.	agrun-kug e₂ gibil-gibil-la-ĝu₁₀ la-la-bi nu-gi₄-a-ĝu₁₀
324.	uru₂-ĝu₁₀ du₃-a la-ba-mar-ra-ĝu₁₀ ta-a-aš ḫul-a-ĝu₁₀
325.	ba-gul in-ga-ba-ḫul-a-ĝu₁₀ ta-a-aš ḫul-a-ĝu₁₀
326.	a-da-al ud ḫul gig dug₄-ga a₂-bi la-ba-ra-e₃
327.	urim₂^ki-ma e₂ ^dsuen-na-ĝu₁₀ gul-la-bi gig-ga-am₃
328.	ki-ru-gu₂ 7-kam-ma-am₃

329.	a uru₂-ĝu₁₀ a e₂-ĝu₁₀
330.	ĝiš-gi-ĝal₂-bi-im

331.	nin šag₄-zu a-gin₇ du₃-mu-un za-e a-gin₇ i₃-til₃-le-en
332.	^dnin-gal šag₄-zu a-gin₇ du₃-mu-un za-e a-gin₇ i₃-til₃-le-en
333.	munus zid lu₂ uru₂ ba-e-da-gul-la i₃-ne-eš₂-gin₇ i₃-e-am₃-mu₂
334.	^dnin-gal lu₂ kalam ba-e-da-til-la šag₄-zu a-gin₇ du₃-mu-un
335.	ud uru₂-zu im-ma-gul-la-ba i₃-ne-eš₂-gin₇ i₃-e-am₃-mu₂
336.	ud e₂-zu im-ma-gul-la-ba šag₄-zu a-gin₇ du₃-mu-un
337.	uru₂-zu uru₂ kur₂-ra ba-ab-ĝar i₃-ne-eš₂-gin₇ i₃-e-am₃-mu₂
338.	e₂-zu er₂-re ba-an-di-ni-ib-ĝar šag₄-zu a-gin₇ du₃-mu-un
339.	uru₂ du₆-du₆-da ba-ĝar-ra-zu mušen-bi nu-ĝen
340.	e₂ zid ^ĝišal-e ba-ĝar-ra-za tuš-bi-še₃ la-ba-tuš-en
341.	uĝ₃ ki-lul-la ba-ab-re₇-a-za nin-bi-še₃ la-ba-kur₉-re-en
342.	er₂-zu er₂ kur₂-ra ba-ab-ĝar ka-na-aĝ₂-zu nu-še₈-še₈
343.	er₂-šag₄-ne-ša₄ nu-tuku-am₃ kur-kur im-ma-an-tuš
344.	kalam-zu niĝ₂ KA dirig-gin₇ gu₃ šu ba-ni-ib-dab₅
345.	uru₂-zu du₆-du₆-da im-ma-an-ĝar i₃-ne-eš₂-gin₇ i₃-e-am₃-mu₂
346.	e₂-zu šag₄-sug₄-ga ba-an-du₃ šag₄-zu a-gin₇ du₃-mu-un
347.	urim₂^ki eš₃ lil₂-e im-ma-an-ĝar i₃-ne-eš₂-gin₇ i₃-e-am₃-mu₂
348.	gudug-bi ḫi-li-a ba-ra-mu-un-ĝen šag₄-zu a-gin₇ du₃-mu-un
349.	en-bi ĝi₆-par₃-ra ba-ra-mu-un-til i₃-ne-eš₂-gin₇ i₃-e-am₃-mu₂
350.	uz₃-ga lu₂ šu-luḫ-e ki aĝ₂-e šu-luḫ nu-mu-ra-an-ĝa₂-ĝa₂
351.	a-a ^dnanna išib-zu šita kug-ga šu nu-mu-ra-ni-in-du₇
352.	lu₂-maḫ-zu gi-gun₄-na kug-zu šag₄ gada la-ba-an-la₂
353.	en zid šag₄ ḫi-li-a pad₃-da-zu e₂-kiš-nu-ĝal₂-la-am₃
354.	/eš₃^?\-da ĝi₆-par₃-še₃ ḫul₂-la-na nu-mu-ni-in-dib-dib-be₂
355.	a-u₃-a e₂ ezem-ma-za ezen nu-mu-ni-in-dug₃-ge-eš
356.	šem₃ ^kuša₂-la₂-e niĝ₂ šag₄ ḫul₂-le-da tigi-a nu-mu-ra-an-du₁₂-uš
357.	uĝ₃ saĝ gig₂-ga ezen-zu-še₃ a la-ba-an-tu₅-tu₅-ne
358.	gu-gin₇ mu-dur₇-ra nam ḫa-ba-ni-in-tar ulutim₂-bi ḫa-ba-an-kur₂
359.	en₃-du-zu er₂-ra ba-e-da-an-kur₉ en₃-tukum-še₃ mu₂
360.	tigi-zu a-nir-ra ba-e-da-an-kur₉ en₃-tukum-še₃ mu₂
361.	gud-zu tur₃-bi-a ba-ra-mu-un-de₆ i₃-bi nu-mu-ra-ak-e
362.	udu-zu amaš-bi-a ba-ra-mu-un-dur₂-ru ga-bi nu-mu-ra-dulu-e
363.	i₃ gur₃-ru-zu tur₃-ta nu-mu-ra-de₆ en₃-tukum-še₃ mu₂
364.	ga gur₃-ru-zu amaš-ta nu-mu-ra-de₆ en₃-tukum-še₃ mu₂
365.	šu-peš ku₆ gur₃-ru-zu ḫul-ĝal₂-e ba-an-dab₅ en₃-tukum-še₃ mu₂
366.	mušen-du₃ mušen gur₃-ru-zu ĝir₂-ĝir₂-re im-DU
367.	id₂ ma₂-gur₈-ra ba-ab-du₇-a-zu šag₄-ba teme^sar ba-mu₂
368.	ḫar-ra-an ^ĝišgigir-ra ba-ab-ĝar-ra-za ^ĝiškiši₁₆(source: U₂.ĜIŠ.ĜIR₂) kur-ra ba-mu₂
369.	nin-ĝu₁₀ uru₂-zu ama-bi-gin₇-nam er₂ mu-e-ši-še₈-še₈
370.	urim₂^ki-ma dumu sila ḫa-lam-ma-gin₇ ki mu-e-ši-kiĝ₂-kiĝ₂
371.	e₂-zu lu₂ niĝ₂ u₂-gu de₂-a-gin₇ šu mu-e-ši-ša-an-ša
372.	šeg₁₂ e₂ zid-da-zu lu₂-ulu₃-gin₇ me-a-zu im-me
373.	nin-ĝu₁₀ e₂-ta e₃-a ḫe₂-me-en uru₂-ta ba-ra-e₃-me-en
374.	en₃-še₃-am₃ uru₂-za lu₂-erim₂-gin₇ bar-ta ba-e-da-gub
375.	ama ^dnin-gal uru₂-zu lu₂-erim₂-gin₇ gaba-za ba-e-de₃-sa₂
376.	nin uru₂-ni ki aĝ₂ ḫe₂-me-en-na amaš-zu-ta ba-e-ni-tag
377.	kalam-ma-ni-še₃ kuš₂-u₃ ḫe₂-me-en-na za-e izi-ba mu-un-tag
378.	ama ^dnin-gal gud-gin₇ tur₃-zu-še₃ udu-gin₇ amaš-zu-še₃
379.	gud-gin₇ tur₃ ud-bi-ta-še₃ udu-gin₇ amaš-zu-še₃
380.	dumu ban₃-da-gin₇ ama₅-zu-še₃ nin-ĝu₁₀ e₂-zu-še₃
381.	an lugal diĝir-re-e-ne-ke₄ muš₃-am₃-zu ḫe₂-em-me
382.	^den-lil₂ lugal kur-kur-ra-ke₄ nam-zu ḫe₂-eb-tar-re
383.	uru₂-zu ki-bi ḫa-ra-ab-gi₄-gi₄ nam-nin-bi ak-a
384.	nibru^ki ki-bi ḫa-ra-ab-gi₄-gi₄ nam-nin-bi ak-a
385.	urim₂^ki ki-bi ḫa-ra-ab-gi₄-gi₄ nam-nin-bi ak-a
386.	i₃-si-in^ki ki-bi ḫa-ra-ab-gi₄-gi₄ nam-nin-bi ak-a
387.	ki-ru-gu₂ 8-kam-ma-am₃

388.	me-ĝu₁₀ mu-da-kur₂-ra-am₃
389.	ĝiš-gi₄-ĝal₂-bi-im

390.	e ud-de₃ ud-de₃ kalam teš₂-a mi-ni-ib-ra
391.	ud gal an-na-ke₄ ud gu₃ dub₂-dub₂-be₂
392.	ud gig-ga kalam-ma ba-e-zal-la re
393.	ud uru₂ gul-gul-e ud e₂ gul-gul-e
394.	ud tur₃ gul-gul-e ud amaš tab-tab-be₂
395.	ĝarza kug-ga šu bi₂-ib₂-la₂-a re
396.	ĝalga niĝ₂ aratta^ki-ka šu pe-el-la₂ im-mi-ib-dug₄-ga re
397.	ud kalam-ma niĝ₂ dug₃ im-mi-ib-kud-da re
398.	ud saĝ gig₂-ga a₂ bi₂-ib-la₂-a re
399.	ki-ru-gu₂ 9-kam-ma-am₃

400.	ud re ud igi-ba teš₂ nu-ĝal₂-la re
401.	ĝiš-gi₄-ĝal₂-bi-im

402.	ud ama nu-zu re ud a-a nu-zu re
403.	ud dam nu-zu re ud dumu nu-zu re
404.	ud nin₉ nu-zu re ud šeš nu-zu re
405.	ud ušur nu-zu re ud ma-la nu-zu re
406.	ud dam im-šub-ba ud dumu im-šub-ba re
407.	ud-de₃ ud kalam-ma u₂-gu bi₂-ib-de₂-a re
408.	ud ḫul gig dug₄-ga ^den-lil₂-la₂-ta im-mi-in-zal-la re
409.	a-a ^dnanna ud-bi uru₂-zu-ta ki nam-ba-ĝa₂-ĝa₂
410.	uĝ₃ saĝ gig₂-zu igi-«zu» nam-bi₂-ib-du₈
411.	ud-bi im an-ta šeĝ₃-ĝe₂₆-gin₇ ki-tuš-bi nam-ba-gur-ru
412.	niĝ₂-zi-ĝal₂ an ki saĝ gig₂ im-ma-an-dub₂-ba re
413.	ud-ba du₃-a-bi ḫe₂-em-ma-gul-lu
414.	abula ĝi₆ u₃-na-gin₇ ^ĝišig ḫe₂-bi₂-in-keše₂-da
415.	ud-ba šudum-ma na-an-ni-ĝa₂-ĝa₂
416.	niĝ₂-kas₇-bi e₂ ^den-lil₂-la₂-ta ^ĝišgag-ta ḫe₂-em-ta-si-ig
417.	ki-ru-gu₂ 10-kam-ma-am₃

418.	ud ul ud kur₂-ra ud-da eĝer-bi-še₃
419.	ĝiš-gi₄-ĝal₂-bi-im

420.	ud ul kalam ki ĝar-ra-še₃
421.	^dnanna lu₂ sun₅^!-na ĝiri₃-zu mu-un-dab₅-be₂
422.	er₂ e₂ sig₉-ga-bi mu-ra-an-de₆ igi-zu-še₃ du₁₂-a-bi
423.	saĝ gig₂ ba-ra-šub-bu-uš-a-bi giri₁₇ šu ḫa-ra-ab-tag-ge-ne
424.	uru₂ du₆-du₆-da ba-an-ĝar-ra-za i-si-iš ḫu-mu-ra-an-ĝa₂-ĝa₂
425.	^dnanna uru₂^ki ki-bi gi₄-a-za pa e₃ ḫa-ra-ab-ak-e
426.	mul-an kug-gin₇ nam-mu-un-ḫa-lam-e igi-zu ḫe₂-bi₂-ib-dib₂-be₂
427.	diĝir lu₂-u₁₈-lu-ke₄ kadra mu-ra-an-de₆
428.	lu₂ sizkur₂-ra-ke₄ a-ra-zu mu-ra-ab-be₂
429.	^dnanna arḫuš kalam-ma-me-en
430.	en ^daš-im₂-babbar šag₄-zu im-mi-ib-dug₄-ga re
431.	^dnanna lu₂-ulu₃-bi nam-tag-ga-ni u₃-mu-e-du₈
432.	lu₂ a-ra-zu im-me-a-bi šag₄ ḫa-ba-na-ḫuĝ-e
	{
	(3 mss. add 1 line:)
432A.	diĝir lu₂-ba-ke₄ kadra(source: ĜAR.ŠAG₄.ĜAR) mu-ra-an-de₆
	}
433.	lu₂ sizkur₂-ra mu-un-gub-ba-bi-ir igi zid mu-un-ši-in-bar
434.	^dnanna igi du₈-a bar-ra-zu šag₄ šu niĝin sug₄-ga-am₃
435.	lu₂-ulu₃-bi ud ḫul du₃-a-ba ḫe₂-em-ma-an-ši-kug-ge
436.	šag₄ kalam-ma ĝal₂-la-zu ḫe₂-em-ma-an-ši-kug-ge
437.	^dnanna uru₂ ki-bi gi₄-a-za me-teš₂ ḫe₂-i-i
438.	ki-ru-gu₂ 11-kam-ma-am₃

Print sources

Jacobsen 1987, p. 447-477: translation, commentary

Klein 1997a: commentary, translation (partial translation)

Kramer 1940, p. 16-71: translation, composite text, commentary

Rosengarten 1971, p. 39-132: translation, commentary

Witzel 1945: composite text, translation, commentary

Witzel 1946: commentary

Electronic sources

Civil 1989k: composite text

Krecher 1996b: composite text, translation

Vanstiphout 1998f: score transliteration

Cuneiform sources

AO 6446 (TCL 16 40)

Ash 1932,415 (OECT 5 12)

Ash 1932,522 (OECT 5 15)

Ash 1932,526j (OECT 5 13)

Ash 1932,526o (OECT 5 14)

CBS 2191

CBS 2204 + CBS 2270 + CBS 2302 + CBS 19751 (MBI 6) + N 3144

CBS 3878 (STVC 22) + CBS 3901 + CBS 3927 + CBS 9316 + CBS 11078

CBS 4584 (PBS 10/2 10)

CBS 6889 (STVC 19) + CBS 6905 (STVC 20) + CBS 8023

CBS 7975 (STVC 21) + CBS 14234 (PBS 13 20) + UM 29-16-246

CBS 7080 (PBS 10/4 11; photo MJ 9 157) + CBS 14110 (STVC 17) + N 3076

CBS 8079 (STVC 23)

CBS 8336

CBS 10227 (STVC 33) + N 2569

CBS 11555

CBS 12512

CBS 13593 + CBS 13605 + CBS 13624 + CBS 13630 + CBS 13631

CBS 13911 (STVC 24)

CBS 15091

CBS 15135

CBS 15179 + HS 1426 (TMH NF 4 18) + HS 1427 (TMH NF 4 19) + HS 1452 (TMH NF 4 21) + HS 1575 (TMH NF 4 20) + HS 1579 (TMH NF 4 22) + HS 2504 (WK 58; join photo WK pl. 5f.)

CBS 19827

CBS n/u (STVC 18)

HS 1487 (TMH NF 4 24)

HS 1510 (TMH NF 4 25)

HS 1553 (TMH NF 4 23)

MAH 15861 (photo JNES 29 pl. 1)

MAH 16015 (photo JNES 29 pl. 2)

N 1331

N 1810

N 3182 + N 3283 + N 3301

N 3267

N 3609

N 3621 = N 4253?

N 3752

N 6270 + Ni 4496 (ISET 1 100)

Ni 1162 (SLTN 97)

Ni 2401 (SLTN 95; AS 12 pl. 3)

Ni 2510 (SRT 32)

Ni 2518 (SRT 45)

Ni 2780 (SLTN 94; AS 12 pl. 1f.)

Ni 2911 (SLTN 99; AS 12 pl. 4)

Ni 3166 (SLTN 96; AS 12 pl. 4)

Ni 4024 (SLTN 98; AS 12 pl. 4)

Ni 4074 (TAD 8/2 pl. 35)

Ni 4116 (TAD 8/2 pl. 6)

Ni 4296

Ni 4383

Ni 4424 (ISET 1 95)

Ni 4429 (ISET 1 95)

Ni 4459 (ISET 1 81)

Ni 4474 (ISET 1 107)

Ni 4566

Ni 9586 (ISET 1 147)

Ni 9599 (ISET 1 115)

Ni 9623 (ISET 1 118)

Ni 9822 (ISET 1 139)

Ni 9969 (ISET 1 142)

PUL 550 (RA 63 5ff.)

U 16900N (var. with UET 6 137)

UET 6 135 = U 8840

UET 6 136 = U 16900J

UET 6 137 = U 16900K

UET 6 138 = U 16900L

UET 6 139 = U 16900M

UET 6 *290

UM 29-13-240

UM 29-16-153

UM 29-16-244

UM 29-16-397

UM 29-16-774 + UM 29-16-778

UM 29-16-786

UM 29-16-789

VAT 4595 (VAS 10 171)

3N-T357 = IM 58443

3N-T416 = IM 58468

3N-T458 = IM 58492

3N-T492 = IM 58517

3N-T519 = IM 58532

3N-T546 = IM 58544

3N-T553 = IM 58548

3N-T680 = IM 58615

3N-T901,41

3N-T901,46

3N-T902,88

3N-T904,151

3N-T906,233

3N-T906,241

3N-T918,414

3N-T918,420

3N-T921ii = A 33551

YBC 4661

YBC 7159

Revision history

23.vii.1998-21.viii.1998: GC, editor: standardisation
11.ix.1998: JAB, editor: proofreading
09.xi.1999: GC, editor: SGML tagging
15.xii.1999: ER, editor: proofreading SGML
14.xii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published