ETCSLtransliteration : c.1.8.2.3 ETCSL homepage

Enmerkar and the lord of Aratta

1. iri gud ḫuš dteš2 ni2 gal gur3-ru (Cited in OB catalogue from Nibru, at Philadelphia, 0.2.01, line 48; OB catalogue in the Louvre, 0.2.02, line 24; OB catalogue from Urim (U2), 0.2.04, line 40)
2. [kul]-/aba4\ki keše2 []
3. gaba ud-da ki nam tar-[re-da]
4. unugki kur gal šag4 []
5. kiĝ2-sig unu2 gal an-/na\ []
6. ud re-a nam ba-[tar-ra-ba]
7. unugki kul-aba4ki e2-/an\-[na] []
8. saĝ il2-la nun-gal-e-ne /mi\-[ni-…]
9. ḫe2-ĝal2 a-eštub ĝal2
10. šeĝx(IM.A) še gu-nu ĝal2
11. unugki kul-aba4ki-a ib-da-an-tab
{
(1 ms. adds a line:)
11A. […]-in-zal
}
12. kur dilmunki [(…)] X in-nu
13. {e2-an-na unugki-e kul-aba4ki-a-ka ki us2-sa-a} {(1 ms. has instead the line:) [] galam-a-am3}
14. ĝi6-par4 kug dinana-ke4
15. šeg12 kul-aba4ki-ke4 kug ki-in-dar-ra-gin7 pa e3 ak-am3
16. [] X X X nu-il2 bal nu-ak-e
17. [ nu]-il2 nam-ga-raš nu-ak-e
18. [kug-sig17 kug]-babbar urud nagga na4lagab za-gin3-na
19. [na4 ḫur-saĝ-ĝa2] /kur\-bi-ta teš2-bi nu-mu-un-ed3-de3
20. [] /ezem\-ma a nu-un-tu5!
21. [] nu-mu-un-dur2-ru
22. [] ud bi2-in-[zal]
23. []
24. []
25. [ gun3]-gun3
26. [] ki kug X [ na4za]-gin3 duru5-am3
27. /šag4\-[bi] ĝišmeš3 babbar-gin7 gurun il2-la sig7-ga-am3
28. dinana-ra en arattaki-ke4
29. saĝ-men kug-sig17-ga mu-na-ni-in-ĝal2
30. en kul-aba4ki-a-gin7 nu-mu-na-sag9
31. arattaki 3 e2-an-na ĝi6-par4 ki kug-gin7
32. kug dinana-ra šeg12 kul-aba4ki-gin7 nu-mu-un-na-du3
33. ud-ba en šag4-ge pad3-da dinana-ke4
34. kur šuba-ta šag4 kug-ge pad3-da dinana-ke4
35. en-me-er-kar2 dumu dutu-ke4
36. nin9-a-ni nin kurku2 dug3-ga
37. kug dinana-ra u3-gul mu-un-na-ĝa2-ĝa2
38. nin9-ĝu10 arattaki unugki-še3
39. kug-sig17 kug-babbar ḫa-ma-an-galam-e
40. na4za-gin3 duru5 lagab-ta []
41. su3-ra2-aĝ2 na4za-gin3 /duru5\ [] X
42. unugki-ga kur kug [] X X du3
43. e2 an-ta [ed3-da ki]-gub-ba-za
44. [arattaki 3] e2-an-na ḫe2-en-du3
45. [ĝi6]-par4 kug-ga [dur2] ĝar-ra-za
46. šag4-bi arattaki ḫa-ma-an-galam-e
47. ĝe26-e šag4-ba amar za-gin3-na gu2? ga-mu-ni-[…]-la2
48. arattaki /unug\[ki-še3] gu2 ĝiš ḫa-ma-[ĝa2-ĝa2]
49. nam-lu2-u18-lu arattaki-[ke4]
50. na4 ḫur-saĝ-ĝa2 /kur\-[bi] ḫa-ma-ab-ed3
51. 3 gal ḫa-ma-du3-e unu2 gal ḫa-ma-ĝa2-ĝa2
52. unu2 gal /unu2\ [diĝir-re-e-ne-ke4 pa] e3 [ḫa]-ma-ab-ak-e
53. me-ĝu10 kul-aba4ki-[a] si ḫa-ma-ni-ib-sa2-e
54. abzu kur kug-gin7 ḫa-ma-ab-mu2-mu2
55. eridugki ḫur-saĝ-gin7 ḫa-ma-ab-sikil-e
56. 3 abzu kug ki-in-dar-ra-gin7 pa e3 ḫa-ma-ab-ak-e
57. ĝe26-e abzu-ta za3-mi2 dug4-ga-ĝu10-ne
58. eridugki-ta me de6-a-ĝu10-ne
59. nam-en-na men 3 bar-gin7 sig7-ga-ĝu10-ne
60. unugki kul-aba4ki-a saĝ-men kug ĝal2-la-ĝu10-ne
61. [PA.A] 3 gal-la-ke4 ĝi6-par4-ra ḫu-mu-un-tum2-mu
62. [PA.A] ĝi6-par4-ra-ke4 3 gal-la ḫu-mu-un-tum2-mu
63. [nam]-/lu2\-ulu3 u6 dug3-ge-eš ḫu-mu-un-e
64. [d]/utu\ igi ḫul2-la ḫe2-em-ši-bar-bar-re
65. [ud-bi]-a giri17-zal an kug-ga nin kur-ra igi-ĝal2
66. in-nin9 dama-ušumgal-an-na šembi2-zid-da-ni
67. dinana nin kur-kur-ra-ke4
68. en-me-er-kar2 dumu dutu-ra gu3 mu-na-de2-e
69. en-me-er-kar2 ĝa2-nu na ga-e-de5 na de5-ĝu10 ḫe2-e-dab5
70. inim ga-ra-ab-dug4 ĝizzal ḫe2-ši-ak
71. kiĝ2-gi4-a inim zu zag-še tuku erin2-ta u3-ba-e-re-pad3
72. inim gal dinana gal-zu inim-ma-ke4 me-a ḫu-mu-na-ab-tum3
73. ḫur-saĝ zubi-še3 ḫe2-bi2-in-ed3-de3
74. ḫur-saĝ zubi-ta ḫe2-em-ma-da-ra-ed3-de3
75. šušinki-e kur an-ša4-anki-a-še3
76. peš2 tur-gin7 giri17 šu ḫu-mu-na-ab-ĝal2
77. ḫur-saĝ gal-gal ni2-ba lu-a
78. saḫar-ra ḫu-mu-na-da-gur4-gur4-e
79. arattaki unugki-še3 gu2 ĝiš <ḫa>-ma-ĝa2-ĝa2
80. nam-lu2-ulu3 arattaki-ke4
81. na4 ḫur-saĝ-ĝa2 kur-bi um-ta-ab-ed3
82. 3 gal ḫa-ra-du3-e unu2 gal ḫa-ra-ĝa2-ĝa2
83. unu2 gal unu2 diĝir-re-e-ne-ke4 pa e3 ḫa-ra-ab-ak-e
84. me-zu kul-aba4ki-a si ḫa-ra-ni-ib2-sa2-e
85. abzu kur kug-gin7 ḫa-ra-ab-mu2-mu2
86. eridugki ḫur-saĝ-gin7 ḫa-ra-ab-sikil-e
87. 3 abzu kug ki-<in>-dar-ra-gin7 pa e3 ḫa-ra-ab-ak-e
88. za-e abzu-ta za3-mi2 dug4-ga-zu-ne
89. eridugki-ta me de6-a-[zu-ne]
90. nam-en men-na 3 bar-[gin7 sig7-ga]-zu-ne
91. unugki-e kul-aba4ki-a saĝ-/men\ [kug ĝal2-la]-zu-ne
92. PA.A 3 gal-la-ke4 ĝi6-par4-ra ḫu-mu-e-tum2-mu
93. [PA.A] ĝi6-par4-ra-ke4 3 gal-la ḫu-mu-e-tum2-mu
94. [nam-lu2-ulu3] u6 dug3-ge-eš ḫe2-mu-e-e
95. dutu igi ḫul2-la ḫe2-mu-e-ši-bar-bar-re
96. [nam]-lu2-ulu3 arattaki-ke4
97. [X] NE ud šu2-uš-ta um-[ta]-ab-il2-ke4-eš
98. [X] NE ud te-en-e um-ma-[te]-e-ta
99. ki ddumu-zid-da u8 maš2 sila4?-ni lu-a
100. a kalag-ga a-šag4 ddumu-zid-da-ka
101. udu kur-ra-gin7 dub3 ḫa-ra-ni-ib-ĝar
102. gaba kug-ĝa2-a ud-gin7 e3-i3
103. zi-pa-aĝ2-ĝa2 niĝ2-suḫ10-bi ḫe2-me-en
104. za-ra en-me-er-kar2 dumu dutu za3-mi2
105. en-e inim kug dinana-ka-še3 saĝ keše2 {ba-ši-in-ak} {(1 ms. has instead:) ba-ši-in-ĝar}
106. kiĝ2-gi4-a inim zu zag-še [tuku erin2-ta] ba-ra-an-pad3
{
(1 ms. adds a line:)
106A. […]-e kiĝ2-gi4-a-ni-ir []
}
107. inim gal dinana gal-zu inim-ma-ke4 me-a mu-na-ab-tum3
108. ḫur-saĝ zubi-ka ḫe2-bi2-in-ed3-de3-en
109. ḫur-saĝ zubi-ta ḫe2-em-ma-da-ra-an-ed3-de3-en
110. šušinki-e [kur] [an]-ša4-anki-a-ke4
111. peš2 tur-gin7 giri17 šu ḫu-mu-na-ab-ĝal2
112. ḫur-saĝ gal-gal ni2-ba lu-a
113. saḫar-ra ḫu-mu-na-da-gur4-gur4-e
114. kiĝ2-gi4-a en arattaki-ra u3-na-dug4 u3-na-de3-taḫ
115. iri-bi ir7-saĝmušen-gin7 ĝiš-bi-ta na-an-na-ra-ab-dal-en
116. mušen-gin7 gud3 us2-sa-bi-a nam-bi2-ib-dal-en
117. ganba ĝal2-la-gin7 na-an-si-ig-en
118. iri gul-gul-lu-gin7 saḫar nam-bi2-ib-ḫa-za-en
119. arattaki a2-dam den-ki-ke4 nam ba-an-kud
120. /ki bi2\-in-gul-la-gin7 ki nam-ga-bi2-ib-gul-en
121. eĝer-bi dinana ba-ši-in-zig3
122. gu3 im-[mi-in-ra šeg11 im]-mi-in-gi4
123. kuš7 bi2-[in-su-a-gin7] kuš7 nam-ga-bi2-ib-su-su
124. kug-sig17 [u3-tud-da]-ba kušlu-ub2/lu-ub2-šir a-ba-ni-in-ak
125. kug-me-a saḫar-ba zag u3-ba-ni-in-us2
126. kug saĝ-PA-[še3] u3-mu-un-dim2-dim2
127. anše kur-kur-ra-ke4 barag um-mi-in-la2-la2
128. ĝe26-e-še3-am3 den-lil2 ban3-da ki-en-gi-ra-ke4
129. en dnu-dim2-mud šag4 kug-ge pad3-da
130. kur me sikil-la-ke4 ḫa-ma-du3-e
131. ĝištaškarin-gin7 ḫi-li ḫa-ma-ab-ak-e
132. dutu agrun-ta e3-a-gin7 si-muš2 ḫa-ma-ab-gun3-gun3
133. zag-du8-zag-du8-bi urin ḫa-ma-mul-e
134. e2-nun-e2-nun-ba šir3 kug nam-šub du12-a-ba
135. nam-šub dnu-dim2-mud-da-ke4 e-ne-ra dug4-mu-na-ab
136. ud-ba muš nu-ĝal2-am3 ĝiri2 nu-ĝal2-am3
137. kir4 nu-ĝal2-am3 ur-maḫ nu-ĝal2-am3
138. ur-gir15 ur-bar-ra nu-ĝal2-am3
139. ni2 teĝ3-ĝe26 su zi-zi-i nu-ĝal2-am3
140. lu2-u18-lu gaba-šu-ĝar nu-tuku
141. ud-ba kur šuburki ḫa-ma-ziki
142. eme ḫa-mun ki-en-gi kur gal me nam-nun-na-ka
143. ki-uri kur me-te-ĝal2-la
144. kur mar-tu u2-sal-la nu2-a
145. an ki niĝin2-na 3 saĝ sig10-ga
146. den-lil2-ra eme 1-am3 ḫe2-en-na-da-ab-dug4
147. ud-ba a-da en a-da nun a-da lugal-la
148. den-ki a-da en a-da nun a-da lugal-la
149. a-da en-e a-da nun-e a-da lugal-la
150. den-ki en ḫe2-ĝal2-la en dug4-ga zid-da
151. en ĝeštug2-ga igi-ĝal2 kalam-ma-ke4
152. mas-su diĝir-re-e-ne-ke4
153. ĝeštug2-ge pad3-da en eridugki-ga-ke4
154. ka-ba eme i3-kur2 en-na mi-ni-in-ĝar-ra
155. eme nam-lu2-ulu3 1 i3-me-[a]
156. 2-kam-ma-še3 en-e kiĝ2-gi4-a kur-še3 du-ur2
157. arattaki-aš inim mu-na-ab-taḫ-e
158. kiĝ2-gi4-a ĝi6 u3-na-ka im 1-gin7 šeĝ3-ĝa2
159. an-bar7-gana2-ka im-du8-gin7 zig3-ga
160. kiĝ2-gi4-a inim lugal-la-na-ke4 saĝ keše2 ba-ši-in-ak
161. ĝi6 u3-na-ka mul-am3 im-ĝen
162. an-bar7-gana2-ka dutu an-na-ta mu-un-de3-ĝen
163. inim gal dinana gi-zu2-lum-ma DU me-a mu-na-ab-tum3
164. ḫur-saĝ zubi-še3 bi2-in-ed3-de3
165. ḫur-saĝ zubi-ta im-ma-da-ra-ab-ed3-de3
166. šušinki-e kur an-ša4-anki-a-še3
167. peš2 tur-/gin7\ giri17 šu mu-na-ab-ĝal2
168. ḫur-saĝ gal-gal ni2-ba lu-a
169. saḫar-ra mu-na-da-gur4-gur4
170. ḫur-saĝ 5 ḫur-saĝ 6 ḫur-saĝ 7-e im-me-re-bal-bal
171. [igi mu-un]-/il2\ arattaki-aš ba-te
172. [kisal] /aratta\ki-ka ĝiri3 ḫul2-la mi-ni-in-gub
173. nam-nir-ĝal2 lugal-a-na mu-un-zu
174. bur2-ra-bi inim šag4-ga-na bi2-ib2-be2
175. kiĝ2-gi4-a en arattaki-ra mu-na-ab-bal-e
176. a-a-zu lugal-ĝu10 mu-e-ši-in-gi4-in-nam
177. en unugki-ga en kul-aba4ki-a-ke4 mu-e-ši-in-gi4-nam
178. lugal-za dug4-ga-ni nam-ĝu10 taḫ-a-ni nam-ĝu10
179. lugal-ĝu10 a-na bi2-in-dug4 a-na bi2-in-taḫ-am3
180. lugal-ĝu10 u3-tud-da-ni-ta {nam-en-na} {(1 ms. has instead:) men-na} tum2-ma
181. en unugki-ga muš-saĝ-kal ki-en-gi-ra til3-la {kur} {(2 mss. have instead:) saĝ} zid2-gin7 ma5-ma5
182. taraḫ-maš kur-bad3-da a2-nun-ĝal2
183. šilam-za maš naĝa kug-ga umbin sud2-sud2-e
184. ab2 zid-da kur-šag4-ga tud-da
185. en-me-er-kar2 dumu dutu-ke4 mu-e-ši-in-gi4-nam
{
(2 mss. add two lines:)
185A. [lugal]-zu dug4-ga-ni nam-ĝu10 taḫ-a-ni nam-ĝu10
185B. [lugal]-ĝu10 a-na bi2-in-dug4 [a-na] bi2-in-taḫ-am3
}
186. lugal-ĝu10 na-ab-be2-a
187. iri-ni ir7-saĝmušen-gin7 ĝiš-bi-ta na-na?-/ra-ab\-dag-e
188. mušen-gin7 gud3 us2-sa-bi-a nam-bi2-ib2-ḫu-luḫ-e
189. ganba ĝal2-la-gin7 na-an-sig9-ge-en
190. iri gul-gul-la-gin7 saḫar na-an-bi2-[ib-ḫa-za]-en
191. arattaki a2-dam den-ki-ke4 nam ba-an-kud
192. ki bi2-in-gul-la-gin7 ki nam-ga-bi2-ib-gul-en
193. eĝer-bi dinana ba-ši-in-zig3
194. gu3 im-mi-in-ra šeg11 im-mi-in-gi4
195. kuš7 bi2-in-su-a-gin7 kuš7 na-an-ga-bi2-ib-su-su-un
196. kug-sig17 u3-tud-da-ba kušlu-ub2/lu-ub2-šir a-ba-ni-in-ak
197. kug-me-a saḫar-ba zag u3-ba-ni-in-us2
198. kug saĝ-PA-še3 u3-mu-un-dim2-dim2
199. anše kur-kur-ra-ke4 barag um-mi-in-la2-la2
200. ĝe26-e-še3-am3 den-lil2 ban3-da ki-en-gi-ra-ke4
201. en dnu-dim2-mud-e šag4 kug-ge pad3-da
202. kur me sikil-la-ke4 ḫa-ma-du3-e
203. ĝištaškarin-gin7 ḫi-li ḫa-ma-ab-ak
204. dutu agrun-ta e3-a-gin7 si-muš2 ḫa-ma-ab-gun3-gun3
205. zag-du8-zag-du8-ba urin ḫa-ma-mul-e
206. e2-nun-e2-nun-ba šir3 kug nam-šub du12-a-ba
207. [nam-šub] dnu-dim2-mud-ke4 ĝa2-ra dug4-/mu\-[na-ab]
208. a-na ma-ab-be2-en-na-bi u3-mu-[e-dug4]
209. a ru-a sun4 na4za-gin3 [keše2]-da-[ar]
210. ab2 kal-la-ga-ni kur me sikil-la-ka [tud-da-ar]
211. saḫar arattaki-ka a2 e3-[a-ar]
212. ubur ab2 zid-da ga gu7-[a-ar]
213. kul-aba4ki kur me gal-gal-la-ka nam-nun-na tum2-ma
214. en-me-er-kar2 dumu dutu-ra
215. inim-bi 3 e2-an-na-ka inim dug3 ga-na-ab-dug4
216. ĝi6-par4 ĝišmeš3 gibil-gin7 gurun il2-la-na
217. lugal-ĝu10 en kul-aba4ki-ra šu-a ga-mu-na-ab-gi4
218. ur5-gin7 ḫu-mu-na-ab-be2-a-ka
219. kiĝ2-gi4-a lugal-zu en kul-aba4ki-a-ra u3-na-dug4 u3-na-de3-taḫ
220. ĝe26-e-me-en en šu sikil-la tum2-ma
221. ĝišrab3 maḫ an-na nin an ki-ke4
222. in-nin9 me šar2-ra kug dinana-ke4
223. arattaki kur me sikil-la-še3 ḫu-mu-un-de6-en
224. kur-ra ĝišig gal-gin7 igi-ba bi2-in-tab-en
225. arattaki unugki-še3 gu2 a-gin7 i3-ĝa2-ĝa2
226. arattaki unugki-še3 gu2 ĝa2-ĝa2 nu-ĝal2 e-ne-ra dug4-mu-na-ab
227. ur5-gin7 ḫu-mu-na-ab-be2-a-ka
228. kiĝ2-gi4-a en arattaki-ra mu-na-ni-ib-gi4-gi4
229. nin gal an-na me ḫuš-a u5-a
230. ḫur-saĝ kur šuba-ka dur2 ĝar-ra
231. barag kur šuba-ka še-er-ka-an dug4-ga
232. en lugal-ĝu10 šubur-a-ni-im
233. diĝir nin e2-an-na-ka mu-un-di-ni-ib-kur9-re-eš
234. en arattaki gu2 ki-še3 ba-ni-in-ĝal2
235. šeg12 kul-aba4ki-a-ka ur5-gin7 ḫu-mu-na-ab-be2
236. ud-bi-a en-e šag4 mu-un-sag3 zi mu-un-ir-ir
237. gaba-ri nu-mu-da-ĝal2 gaba-ri i3-kiĝ2-kiĝ2
238. ĝiri3 ni2-te-a-na-ka igi lib-ba bi2-in-du8-ru gaba-ri i3-pad3-de3
239. gaba-ri in-pad3 gu3 im-ta-an-e3
240. kiĝ2-gi4-a inim-ma gaba ri-bi
241. gud-gin7 gu3 nun mu-un-di-ni-ib-be2
242. kiĝ2-/gi4-a\ lugal-zu en kul-aba4ki-a-ra u3-na-dug4 u3-na-de3-taḫ
243. ḫur-saĝ gal ĝišmeš3 an-da mu2-a
244. ur2-bi-še3 sa-par4-am3 pa-bi ĝiš-bur2-am3
245. buru5 umbin-bi anzudmušen ḫu-ri2-inmušen-na
246. keše2-da [d]inana-/ka\ šar2 dug4-ge gib-ba
247. umbin ḫu-ri2-inmušen-bi u3-mun kur-ra kur šuba-da ed3-da
248. arattaki er2 [še8-še8 ]
249. a bal-bal-am3 zid2 dub-dub-ba-am3
250. kur-ra sizkur a-ra-zu-a giri17 šu ĝal2-la-am3
251. lu2 5 nu-me-a lu2 10 nu-me-a
252. unugki zig3-ga ḫur-saĝ zubi-še3 saĝ a-gin7 i3-ĝa2-ĝa2
253. lugal-zu ĝištukul-ĝa2 saĝ ḫa-ba-an-šum2
254. ĝe26-e a-da-min3-na saĝ /ga-ba\-an-šum2
255. a-da-min3 nu-um-zu teš2 [nu]-/um\-gu7
256. gud-de3 /gud\ a2!-ĝal2-bi [nu-um]-zu
257. [a-da]-/min3\ um-zu teš2 um-[gu7]
258. [gud]-/de3\ gud a2!-ĝal2-bi um-/zu\
259. [e]-/ne\ a-da-min3 mi-ni-in-taka4-taka4-an
260. […]-/gin7\ niĝ2 lu2 nu-sig10-ge
261. [e]-ne in-ga-mu-ni-in-taka4-taka4-an
262. [2-kam]-ma-še3 kiĝ2-gi4-a inim mu-ra-be2-en
263. [] de2-a ša-ra-ab-galam-e-en DU-a ḫe2-mu-e-ši-dib
264. [e2]-an-na piriĝ šu-ba nu2-a
265. šag4-bi-ta gud gu3 nun di-dam
266. ĝi6-par4 ĝišmeš3 gibil-gin7 gurun il2-la-na
267. lugal-zu en kul-aba4ki-a-ra šu-a gi4-mu-na-ab
268. ḫur-saĝ ur-saĝ sukud sig9-ga-am3
269. an-usan-na dutu e2-bi-še3 du-gin7
270. igi-bi-ta 2 la2-la2-e-gin7
271. dnanna si-un3-na maḫ-a-gin7
272. saĝ-ki-bi me-lem4 ĝal2-la-gin7
273. ĝiš-gin7 kur-kur-ra gib-ba-gin7
274. saĝ muš3 arattaki-ke4
275. dlamma sag9-ga kur me sikil-la-še3
276. ud-da arattaki aga kug an-na-gin7 si mu-na-an-sa2
277. ĝe26-e ud-ba nam-maḫ-ĝu10 ga-an-zu
278. še barag-ga nam-mu-un-sig9-si-ig-ge mar-e nam-me-e
279. še-bi kur-kur-ra nam-il2-e
280. erin2-na mu-un-kud nam-mu-un-ĝa2-ĝa2
281. še saal-kad5-e u3-mu-ni-in-si-si
282. anše barag la2-e um-mi-in-la2
283. anše-bal-e da-bi-a a-ba-an-sig10
284. tukum-bi kisal arattaki-ka guru7-še3 mu-dub-be2
285. i3-ge-en am3-dub-be2 guru7-a ḫi-li-bi
286. kur-kur-ra izi ĝar-ra-bi a2-dam me-te-bi
287. bad3 7-e še-er-ka-an dug4-ga
288. nin ur-saĝ me3-a tum2-ma
289. dinana ur-saĝ me3 saḫar-ra-ke4 saĝ ešemen dinana di-dam
290. i3-ge-en arattaki ur ad6 sar-gin7 šu-ta im-ta-ri
291. ĝe26-e ud-ba ša-ba-na-gam-e-de3-en
292. e-ne nam-maḫ-a-ni ši-im-ma-an-zu-zu-un
293. iri-gin7 nam-tur-ĝa2 gu2 ši-im-ma-ĝa2-ĝa2-an e-ne-ra dug4-mu-na-ab
294. ur5-gin7 ḫu-mu-na-ab-be2-a-ka
295. kiĝ2-gi4-a en arattaki-ke4
296. ka-ni-gin7 inim ka-na ba-an-sig10
297. sumun2-gin7 ḫaš2-a-na mu-un-gur
298. nim-saḫar-ra-gin7 tir ud zal-le-na mu-un-ĝen
299. šeg12 kul-aba4ki-a-ka ĝiri3 ḫul2-la mu-ni-in-gub
300. kisal maḫ-e kisal gu2-en-na-ka kiĝ2-gi4-a i-ib2-bur2
301. lugal-a-ni-ir en kul-aba4/ki\-[ra]
302. ka-ni-gin7 šu mu-na-an-gi4
303. gud-gin7 gu3 mu-na-an-sig10
304. gud ri-ri-gin7 ĝeštug2 mu-na-an-[ĝa2-ĝa2]
305. lugal-e zag zid-da-ni NE im-mi-in-/tuš\
306. zag gab2-bu-ni im-ma-ni-in-gi4
307. i3-ge-en arattaki ĝalga šum2-ma im-ma-zu im-me
308. ud im-zal dutu im-ta-e3-a-ra
309. dutu kalam-ma-ka saĝ bi2-ib-il2
310. lugal-e id2idigna id2buranuna-bi-da im-ma-da-an-tab
311. id2buranun-na id2idigna-da im-ma-da-an-tab
312. bur gal-gal an-ne2 ba-sug2-su8-ug
313. bur tur-tur sila4 u2-šim dur2-gin7 zag-bi-a im-ma-an-us2
314. bur i-gi8 an-na da-bi-a ba-su8-ug
315. lugal-e eš-da kug-sig17-ga-ke4
316. en-me-er-kar2 dumu dutu-ke4 dub3 mu-un-bad-ba9-re6
317. ud-bi-a dub i-gi8 im me-a gi-gag unken-na
318. alan kug-sig17-ga ud dug3-ga tud-da
319. dnanibgal sig7-ga KA×LI sikil mu2?-da
320. dnisaba nin ĝeštug2 daĝal-la-ke4
321. e2-ĜEŠTUG2.dNISABA kug-ga-ni ĝal2 mu-na-an-taka4
322. e2-gal an-na-ka kur9-ra-ni ĝeštug2 mu-un-ĝa2-ĝa2
323. en-e e2-nun maḫ-a-ni ĝal2 ba-an-taka4
324. ĝišli2-id-ga maḫ-a-ni ki /ba\-[an]-us2
325. lugal-e še-ta še libir-ra-ni šu ba-ra-an-/bal\
326. munu4 ki-šar2-ra a ba-ni-in-[si]
327. nundum-bi u2ḫirinḫu-ri2-in AN [X]-sug4-ge
328. saal-kad5-e igi im-mi-in-tur-tur
329. še guru7 ka i-ni-in-si zu2 buru5mušen-e bi2-in-taḫ
330. anše barag la2-e um-mi-in-la2
331. anše-bal-e da-bi-a ba-an-sig10
332. lugal en ĝeštug2 daĝal-la-ke4
333. en unugki-ga en kul-aba4ki-ke4
334. ḫar-ra-an arattaki-ke4 si bi2-in-sa2
335. nam-lu2-ulu3 kiši6 ki-in-dar-ra-gin7
336. arattaki-aš ni2-ba mu-un-sub2-be2-eš
337. en-e kiĝ2-gi4-a kur-še3 du-ur2
338. arattaki-aš inim mu-na-ab-taḫ-e
339. kiĝ2-gi4-a en arattaki-ra u3-na-dug4 u3-na-de3-taḫ
340. ĝidru-ĝa2 ur2-bi me nam-nun-na-ka
341. pa-bi kul-aba4ki-a an-dul3-eš i3-ak
342. pa mul-mul-la-bi 3 e2-an-na-ke4
343. kug dinana-ke4 ni2 im-ši-ib-te-en-ten
344. ĝidru um-ta-an-kid7 ḫu-mu-un-da-ĝal2
345. na4-gug-ĝiš-dili na4-za-gin3-ĝiš-dili-gin7 šu-ni-a ḫu-mu-un-ĝal2
346. en arattaki-ke4 igi-ĝu10-še3 ḫu-mu-un-tum2 e-ne-ra dug4-mu-na-ab
347. ur5-gin7 ḫu-mu-na-ab-be2-a-ka
348. kiĝ2-gi4-a arattaki-aš du-ni
349. saḫar kaskal-la ĝiri3-ni {mu-un-si} {(1 ms. has instead:) mu-un-e3}
350. na4 tur-tur ḫur-saĝ-ĝa2-ke4 suḫ3-saḫ4 mu-un-da-ab-za
351. ušumgal edin-na-ba kiĝ2-ĝe26-gin7 gaba-ri nu-mu-ni-in-tuku
352. kiĝ2-gi4-a arattaki-aš um-ma-te-a-ra
353. nam-lu2-ulu3 arattaki-ke4
354. anše barag la2-e u6 di-de3 im-ma-sug2-sug2-ge-eš
355. kiĝ2-gi4-a kisal arattaki-ka
356. še guru7 ka bi2-in-si zu2 buru5mušen-e bi2-in-taḫ
357. šeĝx(IM.A) an-na ud ĝal2-la-gin7
358. arattaki ḫe2-ĝal2-la i3-du3
359. diĝir dur2-bi-a ba-da-ab-gi4-a-/gin7\
360. arattaki šag4-ĝar-ra-ni am3-la2-[la2]
361. nam-lu2-ulu3 arattaki-[ke4]
362. munu4 a sig9-ga-na a-šag4 mu-ni-[ib-X]
363. /eĝer\-ba ra2-gaba šag4-tam []
364. [X] KI A taka4-ba []
365. X [X] X []
365B. [] X X NI [] (this line is possibly only a continuation of line 365)
366. dumu-[dumu] arattaki /ĝeštug2\ []
367. arattaki-aš inim mu-un-bur2
368. ur5-da arattaki-a šu-/ta\ []
370. en unugki-ga-ra šu-ni i-im-[…]
371. me-en-de3 sug4-ga lul-la-/be2\-[eš2]
372. en kul-aba4ki-a-ra na4gug /lul\-[la-me-a] ga-mu-na-dur2-ru-ne-en-de3-en
373. ab-ba-ab-ba inim zu-ne
374. šu teš2-a bi2-ib-ri-/eš\ zag e2-ĝar8-e bi2-ib-us2-[eš]
375. en-ra e2 sikil-bi ḫu-mu-un-ĝa2-ĝa2-[e-ne]
376. [(X) X] /KIĜ2\ ĝidru-ni DU.DU šag4 e2-/gal\-[la ]
377. [bur2-ra-bi inim šag4-ga]-na bi2-[ib-be2]
378. [a-a-zu lugal-ĝu10] mu-e-ši-/in\-[gi4-in-nam]
379. [en-me-er]-/kar2\ dumu dutu-[ke4] mu-e-ši-in-gi4-in-nam
380. lugal-zu dug4-ga-ni nam-ĝu10 taḫ-[a]-ni [nam]-ĝu10
381. lugal-ĝu10 a-na /bi2-in\-dug4 a-na [bi2-in-taḫ]-/am3\
382. ĝidru-ĝa2 ur2-bi me /nam\-nun-/na-ka\
383. pa-bi kul-aba4ki-a /an-dul3\-eš i3-ak
384. pa mul-mul-[la-bi] 3 e2-an-na-/ke4\
385. kug dinana-ke4 ni2 im-ši-ib-te-en-ten
386. ĝidru um-ta-an-kid7 ḫu-mu-/un-da\-ĝal2
387. na4-gug-ĝiš-dili na4-za-gin3-ĝiš-dili-gin7 šu-ni-a ḫu-mu-un-ĝal2
388. en arattaki-ke4 igi-ĝu10-še3 ḫu-mu-un-tum2 ĝa2-a-ra ḫa-ma-an-dug4
389. ur5-gin7 ḫu-mu-na-ab-be2-a-ka
390. nam-bi-še3 itima!-a KA ba-an-kur9 šag4-ka-tab-ba ba-an-nu2
391. ud im-zal inim im-šar2-šar2
392. inim ka-še3 nu-ĝar-ra im-me
393. inim-ma še anše gu7-a-gin7 ĝiri3 mi-ni-ib-ni10-ni10-e
394. i3-ne-eš2 lu2 lu2-u3-ra a-na na-an-dug4
395. lu2 lu2-ra dili a-na na-an-taḫ
396. lu2 lu2-ra in-na-ab-be2-a ur5 ḫe2-en-na-nam-ma-am3
397. kiĝ2-gi4-a lugal-zu en kul-aba4ki-ra [u3]-na-a-dug4 u3-na-de3-taḫ
398. ĝidru ĝiš nam-me mu ĝiš na-an-sa4-sa4
399. X [X] šu-na um-ma-ni-in-ĝar igi um-ši-bar-bar
{
400. ĝišildag2 nam-me ĝiššim-gig nam-me
401. ĝišerin nam-me ĝiššu-ur2-men2 nam-me
402. ĝišḫa-šu-ur2 [nam-me ĝišĝišnimbar] /nam\-me
403. ĝišesi nam-me [ĝišza-ba-lum nam-me]
}
{
(instead of lines 400-403, 1 ms. has:)
A. ĝišildag2 nam-me ĝiššim-gig nam-me
B. ĝišḫa-šu-ur2 nam-me ĝišĝišnimbar nam-me
C. ĝišerin nam-me ĝišza-ba-lum nam-me
D. ĝiššu-ur2-men2 nam-me [ĝišesi nam-me]
}
404. ĝišasal lam ĝišgigir-ra nam-me
405. ĝiškid-da ĝiš-kušusan3-na nam-me
406. kug-sig17 nam-me urud nam-me
407. kug-me-a zid kug-babbar nam-me
408. na4gug nam-me na4za-gin3 nam-me
409. ĝidru um-ta-an-kid7 ḫu-mu-un-da-ĝal2
410. na4-gug-ĝiš-dili na4-za-gin3-ĝiš-dili-gin7 šu-ni-a ḫu-mu-un-ĝal2
411. en kul-aba4ki-a-ke4 igi-ĝu10-še3 ḫu-mu-un-tum2 e-ne-ra dug4-mu-na-ab
412. ur5-gin7 ḫu-mu-na-ab-be2-a-ka
413. kiĝ2-gi4-a dur3ur3 si-gigir ku5-ra2-gin7 ka si-il-la mu-un-ĝen
414. anše edin-na bar-rim4-ma kaš4 di-gin7 kušum4 i3-tag-tag-ge
415. ka-ni tum9-a bi2-ib-zi-zi-zi
416. udu zulumḫi udu /sumur\-ba du7-du7-gin7 dub3-us2 dili mu-un-dab5
417. šeg12 kul-aba4ki-a-ka ĝiri3 ḫul2 mi-ni-in-gub
418. lugal-a-ni en kul-aba4ki-a-ra
419. inim-inim-ma mu-na-ra-si-si
420. en-me-er-kar2-ra den-ki-ke4 ĝeštug2 mu-na-/an\-šum2
421. en-e aĝrig maḫ-a-[ni] a2 ba-da-/an\-aĝ2
422. e2-ni? []
423. lugal-e /sumur3?\ [] šu ba-ra-an-ti
424. mu-un-dul-gin7 /šu\ bi2-[in-gur-gur] igi bi2-/in\-ĝa2!-ĝa2!
425. na4na KA-KA šim-gin7 /zu2\ [ba-ni]-/in\-ra
426. gi su-lim-ma-ka i3-gin7 mu-ni-in-de2
427. ud-ta ĝissu-še3 am3-ed2-e
428. ĝissu-ta ud-še3 am3-ed2-e
429. mu 5-am3 mu 10-am3 ba-zal-[la]-ri
430. gi su-lim-ma giĝ4-gin7 bi2-in-gaz
431. en-e igi ḫul2-la im-ši-in-bar
432. i3 li i3 li2 kur šuba-a-ka sag3-ga i-ni-in-de2
433. en-e kiĝ2-gi4-a kur-še3 du-ur2
434. ĝidru šu-na mu-un-na-ĝa2-ĝa2
435. kiĝ2-gi4-a arattaki-aš du-a-ni
436. u5mušen-gin7 ḫur-saĝ-ĝa2 nim-gin7 saḫar /niĝin\-a
437. ḪI.SUḪURku6-gin7 kur ur3-ur3-ru-[da]-ni arattaki-aš /ba\-te
438. kisal arattaki-ka ĝiri3 ḫul2-la mi-ni-in-gub
439. ĝidru TE SI NA mu-un-gub
440. šu kiĝ2 si bi2-in-sa2 a kiĝ2 /bi2-ib\-ak-e
441. en arattaki-ke4 ĝidru-ta igi tab-ba
442. itima-ka ki-tuš kug-ga-ni-a ni2 im-kar2-kar2-ka
443. en-e šag4-tam-a-ni-ir gu3 mu-na-de2-e
444. arattaki u8 /sag2\-[gin7] ḫe2-em kaskal-bi [kur] /ki\-bal ḫe2-em
445. maḫ arattaki kug dinana-ke4
446. en kul-aba4ki-ra mu-na-an-šum2-ma-ta
447. lu2-kiĝ2-gi4-a mu-un-gi4-a-ni
448. dutu ed2-de3 inim dugud pa ed2-de3
449. a-da-al kug dinana-ke4 igi me-ši-kar2-kar2
450. arattaki-a lul-e me-a ḫe2-en-de3-dib-e
451. al me-da-aš šu al-zil2-zil2-i-a
452. me-en-de3 sug4-ga lul-la-be2-eš2
453. en kul-aba4ki-ra na4gug lul-la-me-a mu-na-dur2-ru-ne-en-de3-en
454. en arattaki-ke4 kiĝ2-gi4-a-ar
455. inim-ma dub maḫ-gin7 šu mu-na-an-sig10
456. kiĝ2-gi4-a lugal-zu en kul-aba4ki-a-ra u3-na-dug4 u3-na-de3-taḫ
457. ur na-an-gig2-ge ur na-an-babbar-re
458. ur na-an-su4-e ur na-an-dara4-e
459. ur na-an-sig7-sig7-ge ur na-an-gun3-gun3gu2 ur ḫu-mu-ra-ab-šum2-mu
460. ur-ĝu10 ur-ra-ni a-da-min3 ḫe2-em-da-e
461. a2-ĝal2 ḫe2-zu e-ne-ra dug4-mu-na-ab
462. ur5-gin7 ḫu-mu-na-ab-be2-a-ka
463. kiĝ2-gi4-a u2-lum a-lam mu-un-ĝen
464. šeg12 kul-aba4ki-ke4 eĝer sig10-ga-gin7 inim /mu\-un-gi4
465. ud5!-gin7 ka gaba kur-ra-ka igi mi-ni-ib-il2-il2-i
466. mir! maḫ kiši17-kiši17-ta zig3-ga-gin7 e2 me MIN3 mu-un-ta-la2-la2
467. [X X X X]-ka saĝ mi-ni-in-il2
468. [] arattaki-a-ke4 []
469. ki-tuš-a-ni-ta a maḫ [e3-a-gin7 mu-un-na-ab]-be2
470. kiĝ2-gi4-a en /aratta\ki-ra u3-na-dug4 u3-na-de3-taḫ
471. tug2 na-an-gig2-ge tug2 na-an-babbar-re
472. tug2 na-an-su4-e tug2 na-an-dara4-e
473. tug2 na-an-sig7-sig7-ge tug2 na-an-gun3-gun3gu2 tug2 ga-mu-na-ab-šum2(source: ḫu-mu-ra-ab-šum2-mu)
474. ur-ĝu10 gu2-da ĝal2 den-lil2-la2 ur šu ga-mu-na-taka4
475. ur-ĝu10 ur-ra-ni a-da-min3 ḫe2-em-di-e
476. a2-ĝal2 ḫe2-zu-zu e-ne-ra dug4-mu-na-ab
477. 2-kam-ma-še3 u3-na-dug4 u3-na-de3-taḫ
478. en3-tukum-še3 lul-da LI-a ḫe2-ni-ib-dib-e
479. iri-na udu-gin7 igi-ni ḫu-mu-un-su8-ub
480. e-ne sipad-bi-gin7 eĝer-bi ḫe2-em-us2-e
481. du-a-ni kur kug na4za-gin3-na
482. gi niĝ2 dub-ba-gin7 gu2 ḫu-mu-na-ab-ĝar
483. kug-sig17 kug-babbar su3-ra2-aĝ2-bi
484. dinana nin e2-an-na-ra
485. kisal aratta[ki]-/ka\ guru7-še3 ḫu-mu-un-dub-dub-bu
486. 3-kam-ma-[še3] u3-na-dug4 u3-na-de3-taḫ
487. iri-ni ir7-saĝmušen-gin7 ĝiš-bi-ta na-an-tar-ta-ta-an
488. […]-/gin7\ na-an-dub2-be2-en
489. [ganba ĝal2-la]-/gin7\ na-an-si-ig-en
490. [] lil2-e nam-mi-ni-in-dib-be2-en
491. du-a-ni na4 ḫur-saĝ-ĝa2 šu u3-mu-ni-in-ti
492. 3 gal eridugki abzu e2-nun ḫa-ma-du3-e
493. a-sal-bar-bi im-šu2-ra-ke4 šu /ḫa\-[ma-ni]-ib-tag-ge
494. ĝissu-bi kalam-[ma ḫa-ma]-ni-ib-la2-la2-e
495. inim dug4-ga-ni […]-šar2?-a-ka
496. ĝiškim-a-ni [e-ne-ra] dug4-mu-na-ab
497. ud-ba en? […]-/ka\-am3
498. [] barag-ga dur2 ĝar-ra numun nun-na-ke4-ne
499. [X X] 1(DIŠ)-a mu2-a
500. dug4-ga-ni [maḫ]-am3 šag4-bi su-su-a-am3
501. kiĝ2-gi4-a ka-ni dugud šu nu-mu-un-da-an-gi4-gi4
502. bar kiĝ2-gi4-a ka-ni dugud šu nu-mu-un-da-an-gi4-gi4-da-ka
503. en kul-aba4ki-a-ke4 im-e šu bi2-in-ra inim dub-gin7 /bi2-in\-gub
504. ud-bi-ta inim im-ma gub-bu nu-ub-ta-ĝal2-la
505. i3-ne-eš2 dutu ud ne-a ur5 ḫe2-en-na-nam-ma-am3
506. en kul-aba4ki-a-ke4 /inim\ [dub-gin7] /bi2\-in-gub ur5 /ḫe2\-[en-na]-nam-ma
507. kiĝ2-gi4-a mušen-gin7 a2 dub2 i3-ak-e
508. ur-bar-ra maš2-e us2-sa-gin7 guru5-uš i3-bur2-bur2-re
509. ḫur-saĝ 5 ḫur-saĝ 6 ḫur-saĝ 7-e im-me-re-bal-bal
510. igi mu-un-il2 arattaki-aš ba-te
511. kisal arattaki-ka ĝiri3 ḫul2-la mi-ni-in-gub
512. nam-nir-ĝal2 lugal-a-na mu-un-zu
513. bur2-ra-bi inim šag4-ga-na bi2-ib2-be2
514. kiĝ2-gi4-a en arattaki-ra mu-na-ab-bal-e
515. a-a-zu lugal-[ĝu10] mu-e-ši-in-gi4-in-nam
516. en unugki-/ga\ /en\ kul-aba4ki-a-ke4 mu-[e-ši]-in-gi4-in-nam
517. lugal-zu /dug4\-[ga-ni] nam-ĝu10 taḫ-a-ni nam-ĝu10
518. lugal-ĝu10 [a-na bi2]-/in\-dug4 a-na bi2-in-taḫ-am3
519. lugal-ĝu10 [ĝišmeš3] gal dumu den-lil2-la2-ke4
520. ĝiš-bi [an ki]-da mu2-a
521. /pa\-[bi an-ne2] us2-sa-am3
522. [ur2-bi ki-a] gub-ba-bi
523. nam-en nam-lugal-la pa e3 ak-a
524. en-me-er-kar2 dumu dutu-ke4 im ma-an-šum2
525. en arattaki-ke4 im igi u3-ni-bar šag4 inim-ma u3-bi2-zu
526. a-na ma-ab-be2-en-na-bi u3-mu-e-dug4
527. a ru-a sun4 na4za-gin3 keše2-da-ar
528. ab2 kal-la-ga-ni kur me sikil-la-ka tud-da-ar
529. saḫar arattaki(source: unugki-ga)-ka a2 e3-a-ar
530. ubur ab2 zid-da-ka ga gu7-a-ar
531. kul-aba4ki kur me gal-gal-la-ka nam-en-na tum2-ma-ar
532. en-me-er-kar2 dumu dutu-ra
533. inim-bi 3 e2-an-na-ka inim dug3 ga-mu-na-ab-dug4
534. ĝi6-par4 ĝišmeš3 gibil-gin7 gurun il2-la-na
535. lugal-ĝu10 en kul-aba4ki-ra šu-a ga-mu-na-ab-gi4
536. ur5-gin7 ḫu-mu-na-ab-be2-a-ka
537. en arattaki-ke4 kiĝ2-gi4-a-ar
538. im šu-rin-na-ni šu ba-ši-in-ti
539. en arattaki-ke4 im-ma igi i-ni-in-bar
540. inim dug4-ga gag-am3 saĝ-ki mi-re2-da-am3
541. en arattaki-ke4 im šu-rin-na-ni igi im-bar-bar-re
542. ud-ba en men nam-en-na tum2-ma dumu den-lil2-la2-ke4
543. diškur an ki-a gu3 nun-bi di-dam
544. ud du7-du7 ug gal-la ki [X X]-ka nam-mi-ni-in-gub
545. kur-kur [] /mu-un\-tuku4-tuku4-e
546. ḫur-saĝ [ mu]-/un\-da-peš11-peš11-e
547. ni2 [me]-lem4? [X X] gaba-na ĝal2-la-bi
548. ḫur-saĝ giri17-zal-la gu3 mi-ni-in-il2
549. arattaki bar ud-bi šag4 ḫur-saĝ-ĝa2-ka
550. gig ni2-bi mu2-a gu2 ni2-bi an-ga-mu2-a
551. gig ni2-bi mu2-a guru7 [X (X)]-ka
552. en arattaki-ra mu-na-ni-in-/ku4\-[ku4]
553. kisal arattaki-a-ka igi-ni-še3 i-im-dub?
554. en arattaki-ke4 gig-e igi bi2-in-du8
555. kiĝ2-gi4-a igi sag3-sag3-a-ni mu-un-ši-ib-UR2×KID2-UR2×KID2-e
556. en arattaki-ke4 kiĝ2-gi4-a-ar gu3 mu-un-na-de2-e
557. maḫ-bi dinana nin kur-kur-ra-ke4
558. iri-ni arattaki šu {li-bi2-in-dag} {(the other ms. has instead:) li-bi2-in-kal} unugki-e la-ba-an-KA
559. e2-za-gin3-na-ka-ni šu {li-bi2-in-dag} {(the other ms. has instead:) li-bi2-in-kal} 3 e2-an-na-ka la-ba-an-KA
560. kur me sikil-la-ka šu {li-bi2-in-dag} {(the other ms. has instead:) li-bi2-in-kal} šeg12 kul-aba4ki-a-ke4 la-ba-an-KA
561. ĝiš-nu2 še-er-kan2 dug4 šu {li-bi2-in-dag} {(the other ms. has instead:) li-bi2-in-kal} ĝiš-nu2 gi-rin-na la-ba-an-KA
562. en-ra šu sikil-la-ka-ni šu {li-bi2-in-dag} {(the other ms. has instead:) li-bi2-in-kal} en unugki-ga en kul-aba4ki-a-ra la-ba-an-KA
563. arattaki zid-da gab2-bu-ba
564. dinana nin kur-kur-ra-ke4
565. a maḫ e3-a-gin7 mu-un-na-niĝin2-niĝin2
566. lu2-be2-ne lu2-lu2-ta dar-a
567. lu2 ddumu-zid-de3 lu2-ta e3-a-me-eš
568. inim kug dinana ki-bi-še3 ĝar-ĝar-me-eš
569. ur igi-ĝal2-la /DA\.A.SAR ddumu-zid-da ḫe2-ši-im-niĝin2-niĝin2
570. /ul4 ĝa2-nam-ma\ dumu ur4-[…]
571. [igi] a-ma-ru-ka gub-ba-me-eš
572. eĝer a-ma-ru ba-ur3-ra-ta
573. dinana nin kur-kur-ra-ke4
574. nam gal ki 2 ddumu-zid-da-ke4
575. a nam-til3-la-ka mu-un-ne-sud-sud
576. gu2 kalam-ma-ka ĝiš mu-un-ne-en-ĝal2
577. ur igi-ĝal2-la du-a-ni
578. tug2saĝšu gun3-a ugu-na i-im-šu2
579. tug2piriĝ-piriĝ-/ĝa2\ zag mu-ni-in-keše2
580. [X] il2-/la\ X šu? mi-ni-in-du8-[X]-/am3\
581. […]-te-na mi-ni-in-dug4
582. [] nin [] /ba\-an-PAdi
583. […]-a-ni
584. [] dinana
585. en3-du-ni dama-ušumgal-an-na nitalam-a-na ba-dug3
586. ud-bi-ta ĝeštug2 kug /ĝeštug2\ [kug] ddumu-zid-da-ke4
587. šu mu-ni-in-du7 šir3 mu-/ni\-[in]-dug4 inim mu-ni-in-zu
588. um-ma kur me sikil-še3 du-a-ni
589. ki-sikil ud-da-na til-la-gin7 im-ma-na-ta-e3
590. šembi2-zid-da igi-na mu-un-gun3
591. [tug2] babbar-ra zag mu-ni-in-keše2
592. [aga] zid-da iti6-gin7 mu-un-e3
593. [X] X X saĝ si ba-ni-in-sa2
594. [nitalam]-a-ni en-me-er-kar2 barag-ge4 mu-un-da-ab-si
595. [] um-mi-in-zi-zi
596. [ga-nam] im-da-lu-lu arattaki-aš u8-da sila4-bi
597. [ga-nam im]-da-lu-lu arattaki-aš ud5-da maš2-bi
598. [ga-nam im]-da-lu-lu arattaki-aš ab2-da amar-bi
599. [ga-nam] /im\-da-lu-lu arattaki-aš eme5 dur3ur3 kaš4 gig2-ga-<bi>
600. arattaki-a na-an-da-be2-a
601. [guru7-še3] ḫe2-em-dub-dub gu2 ḫe2-em-ĝar-ĝar
602. [ḫe2]-/ĝal2\ za-a ḫe2-ĝal2-zu
603. [] en arattaki-ra u3-mu-ni-in-ak
604. [] X X X RA ḫe2-en-[X (X)]
605. [] mu-un-di-ni-ib-X-e
606. [] mu-un-ta-e3
607. [] si mu-un-na-ab-sa2
3 lines missing
611. [] me-te-aš [] ĝal2
612. [] X SI i-lu šag4-[ga ] X
613. […]-ni-a ḫe2-ĝal2-zu AN []
614. [] den-lil2-le saĝ-eš mu-ri-in-rig7 [X]-/la\-la-ĝa2 ḫe2-zu-zu
615. [] kar2 a-a-ni nu-lam-lam a nu-un-de2
616. den-[lil2] [lugal] /kur\-kur-ra-ke4 ḫu-mu-un-kar2?-re ni2-ba
617. 2-gar3 /im\-ma-an-du3-a-gin7
618. nam-lu2-u18-[lu] arattaki-a-ke4
619. kug-sig17 kug na4[za]-gin3 bal ak-de3 2-gar3 X (X) X
620. lu2 gurun kug-sig17 gurun ĝiš gub-bu-de3
621. ĝišpeš3 ĝeštin-ba niĝ2-ta ub4-ba-gin7 guru7 gal-še3 [u3]-mu-un-dub
622. na4za-gin3 duru5 ur2-ba mu-un-bur2-re-ne
623. giušub pa-ba mu-un-ta-bal-e-ne
624. dinana nin e2-an-na-ra
625. kisal e2-an-naki-ka guru7-še3 mu-un-dub-bu-ne
626. lugal-ĝu10 ĝa2-nu na ga-e-de5 na de5-ĝu10 ḫe2-e-dab5
627. inim ga-ra-ab-dug4 ĝizzal ḫe2-e-ak
628. lu2 X /BI? E\ kur-kur-ra 3-e u3-/un\-pad3
629. [nam-lu2]-/ulu3\ arattaki-[ke4]
630. [X]-me-eš2 i-im-da ḫe2-em-me-ne
631. ĝe26-e gu2-e-ta du-a-ĝu10-ne
632. /nam-lugal\-ĝu10 nin mul-mul-e ma-an-šum2
633. dĝeštin-an-na []
634. iri-ba lil2 []
635. ezen nu-mu-[…]
636. ud šu2-uš nam-[…]
approx. 6 lines missing

Print sources

Cohen 1973: translation

Jacobsen 1987, p. 275-319: translation, commentary

Jacobsen 1992: translation, commentary, composite text (ll. 135-155)

Jacobsen 1997: translation, commentary (ll. 135-155, ll. 498 onwards)

Vanstiphout 1987a (joins)

Electronic sources

Civil 1980: composite text

Civil 1992b: composite text

Krecher 1996a: composite text, translation

Vanstiphout 1998c: composite text, score transliteration

Cuneiform sources

Ash 1924-475 (OECT 5 2; JAOS 88 110); provenance: Kiš

CBS 2150 (HAV 9); provenance: Nippur

CBS 2291 (photo pl. 28); provenance: Nippur

CBS 10435 (SEM 14; photo pl. 22f.) + Ni 4529 (ISET 2 40; pl. 15) + N 7256; provenance: Nippur

CBS 10436 (SEM 16); provenance: Nippur

CBS 13644 (SEM 15) + N 1496 + N 3261 + UM 29-16-183; provenance: Nippur

CBS 13676; provenance: Nippur

CBS 14232 (PBS 13 8; photo pl. 24); provenance: Nippur

CBS 15110 (PBS 5 8; photo pl. 27); provenance: Nippur

N 2822; provenance: Nippur

N 3236 (photo pl. 24); provenance: Nippur

N 3623 (photo pl. 27) + Ni 9601 (ISET 2 28ff.; pl. 1ff.; photo pl. 17f.; FTS fg. 14f.; cf. FTS fg. 17f.) + UM 29-13-194 (photo pl. 19); provenance: Nippur

N 3632 (photo pl. 28); provenance: Nippur

Ni 13191 (ISET 2 42) + N 4130 (photo pl. 19); provenance: Nippur

N 6022 ***; provenance: Nippur

N 6500; provenance: Nippur

N 7256; provenance: Nippur

Ni 2359 (SRT 34); provenance: Nippur

Ni 2379 (BE 31 44); provenance: Nippur

Ni 4361 + Ni 4440 (ISET 2 41; pl. 16); provenance: Nippur

Ni 9700 (ISET 2 40; pl. 13); provenance: Nippur

Ni 9733 (ISET 2 40; pl. 13); provenance: Nippur

U 16897 (UET 6 47) + UET 6 *40; provenance: Ur

UET 6 62; provenance: Ur

UM 29-16-422 (pl. 14; photo pl. 20) + UM 29-16-456 + N 6277 (pl. 21); provenance: Nippur

UM 29-16-442; provenance: Nippur

VAT 17463 (VS 24 73)


Revision history

05.iii.1998-22.iii.1998: JAB, editor: standardisation
26.iv.1998: GZ, editor: proofreading
10.v.1999: GZ, editor: SGML tagging
14.v.1999: ER, editor: proofreading SGML
14.v.1999: ER, editor: web publication
02.ii.2001: ER, editor: minor corrections to line 284
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford