ETCSLtransliteration : c.1.8.2.3 ETCSL homepage

Enmerkar and the lord of Aratta

1. iri gud huc dtec2 ni2 gal gur3-ru (Cited in OB catalogue from Nibru, at Philadelphia, 0.2.01, line 48; OB catalogue in the Louvre, 0.2.02, line 24; OB catalogue from Urim (U2), 0.2.04, line 40)
2. [kul]-/aba4\ki kece2 [...]
3. gaba ud-da ki nam tar-[re-da]
4. unugki kur gal cag4 [...]
5. kij2-sig unu2 gal an-/na\ [...]
6. ud re-a nam ba-[tar-ra-ba]
7. unugki kul-aba4ki e2-/an\-[na] [...]
8. saj il2-la nun-gal-e-ne /mi\-[ni-...]
9. he2-jal2 a-ectub jal2
10. cejx(IM.A) ce gu-nu jal2
11. unugki kul-aba4ki-a ib-da-an-tab
{
(1 ms. adds a line:)
11A. [...]-in-zal
}
12. kur dilmunki [(...)] X in-nu
13. {e2-an-na unugki-e kul-aba4ki-a-ka ki us2-sa-a} {(1 ms. has instead the line:) [...] galam-a-am3}
14. ji6-par4 kug dinana-ke4
15. ceg12 kul-aba4ki-ke4 kug ki-in-dar-ra-gin7 pa e3 ak-am3
16. [...] X X X nu-il2 bal nu-ak-e
17. [... nu]-il2 nam-ga-rac nu-ak-e
18. [kug-sig17 kug]-babbar urud nagga na4lagab za-gin3-na
19. [na4 hur-saj-ja2] /kur\-bi-ta tec2-bi nu-mu-un-ed3-de3
20. [...] /ezem\-ma a nu-un-tu5!
21. [...] nu-mu-un-dur2-ru
22. [...] ud bi2-in-[zal]
23. [...]
24. [...]
25. [... gun3]-gun3
26. [...] ki kug X [... na4za]-gin3 duru5-am3
27. /cag4\-[bi] jicmec3 babbar-gin7 gurun il2-la sig7-ga-am3
28. dinana-ra en arattaki-ke4
29. saj-men kug-sig17-ga mu-na-ni-in-jal2
30. en kul-aba4ki-a-gin7 nu-mu-na-sag9
31. arattaki ec3 e2-an-na ji6-par4 ki kug-gin7
32. kug dinana-ra ceg12 kul-aba4ki-gin7 nu-mu-un-na-du3
33. ud-ba en cag4-ge pad3-da dinana-ke4
34. kur cuba-ta cag4 kug-ge pad3-da dinana-ke4
35. en-me-er-kar2 dumu dutu-ke4
36. nin9-a-ni nin kurku2 dug3-ga
37. kug dinana-ra u3-gul mu-un-na-ja2-ja2
38. nin9-ju10 arattaki unugki-ce3
39. kug-sig17 kug-babbar ha-ma-an-galam-e
40. na4za-gin3 duru5 lagab-ta [...]
41. su3-ra2-aj2 na4za-gin3 /duru5\ [...] X
42. unugki-ga kur kug [...] X X du3
43. e2 an-ta [ed3-da ki]-gub-ba-za
44. [arattaki ec3] e2-an-na he2-en-du3
45. [ji6]-par4 kug-ga [dur2] jar-ra-za
46. cag4-bi arattaki ha-ma-an-galam-e
47. je26-e cag4-ba amar za-gin3-na gu2? ga-mu-ni-[...]-la2
48. arattaki /unug\[ki-ce3] gu2 jic ha-ma-[ja2-ja2]
49. nam-lu2-u18-lu arattaki-[ke4]
50. na4 hur-saj-ja2 /kur\-[bi] ha-ma-ab-ed3
51. ec3 gal ha-ma-du3-e unu2 gal ha-ma-ja2-ja2
52. unu2 gal /unu2\ [dijir-re-e-ne-ke4 pa] e3 [ha]-ma-ab-ak-e
53. me-ju10 kul-aba4ki-[a] si ha-ma-ni-ib-sa2-e
54. abzu kur kug-gin7 ha-ma-ab-mu2-mu2
55. eridugki hur-saj-gin7 ha-ma-ab-sikil-e
56. ec3 abzu kug ki-in-dar-ra-gin7 pa e3 ha-ma-ab-ak-e
57. je26-e abzu-ta za3-mi2 dug4-ga-ju10-ne
58. eridugki-ta me de6-a-ju10-ne
59. nam-en-na men ec3 bar-gin7 sig7-ga-ju10-ne
60. unugki kul-aba4ki-a saj-men kug jal2-la-ju10-ne
61. [PA.A] ec3 gal-la-ke4 ji6-par4-ra hu-mu-un-tum2-mu
62. [PA.A] ji6-par4-ra-ke4 ec3 gal-la hu-mu-un-tum2-mu
63. [nam]-/lu2\-ulu3 u6 dug3-ge-ec hu-mu-un-e
64. [d]/utu\ igi hul2-la he2-em-ci-bar-bar-re
65. [ud-bi]-a giri17-zal an kug-ga nin kur-ra igi-jal2
66. in-nin9 dama-ucumgal-an-na cembi2-zid-da-ni
67. dinana nin kur-kur-ra-ke4
68. en-me-er-kar2 dumu dutu-ra gu3 mu-na-de2-e
69. en-me-er-kar2 ja2-nu na ga-e-de5 na de5-ju10 he2-e-dab5
70. inim ga-ra-ab-dug4 jizzal he2-ci-ak
71. kij2-gi4-a inim zu zag-ce tuku erin2-ta u3-ba-e-re-pad3
72. inim gal dinana gal-zu inim-ma-ke4 me-a hu-mu-na-ab-tum3
73. hur-saj zubi-ce3 he2-bi2-in-ed3-de3
74. hur-saj zubi-ta he2-em-ma-da-ra-ed3-de3
75. cucinki-e kur an-ca4-anki-a-ce3
76. pec2 tur-gin7 giri17 cu hu-mu-na-ab-jal2
77. hur-saj gal-gal ni2-ba lu-a
78. sahar-ra hu-mu-na-da-gur4-gur4-e
79. arattaki unugki-ce3 gu2 jic <ha>-ma-ja2-ja2
80. nam-lu2-ulu3 arattaki-ke4
81. na4 hur-saj-ja2 kur-bi um-ta-ab-ed3
82. ec3 gal ha-ra-du3-e unu2 gal ha-ra-ja2-ja2
83. unu2 gal unu2 dijir-re-e-ne-ke4 pa e3 ha-ra-ab-ak-e
84. me-zu kul-aba4ki-a si ha-ra-ni-ib2-sa2-e
85. abzu kur kug-gin7 ha-ra-ab-mu2-mu2
86. eridugki hur-saj-gin7 ha-ra-ab-sikil-e
87. ec3 abzu kug ki-<in>-dar-ra-gin7 pa e3 ha-ra-ab-ak-e
88. za-e abzu-ta za3-mi2 dug4-ga-zu-ne
89. eridugki-ta me de6-a-[zu-ne]
90. nam-en men-na ec3 bar-[gin7 sig7-ga]-zu-ne
91. unugki-e kul-aba4ki-a saj-/men\ [kug jal2-la]-zu-ne
92. PA.A ec3 gal-la-ke4 ji6-par4-ra hu-mu-e-tum2-mu
93. [PA.A] ji6-par4-ra-ke4 ec3 gal-la hu-mu-e-tum2-mu
94. [nam-lu2-ulu3] u6 dug3-ge-ec he2-mu-e-e
95. dutu igi hul2-la he2-mu-e-ci-bar-bar-re
96. [nam]-lu2-ulu3 arattaki-ke4
97. [X] NE ud cu2-uc-ta um-[ta]-ab-il2-ke4-ec
98. [X] NE ud te-en-e um-ma-[te]-e-ta
99. ki ddumu-zid-da u8 mac2 sila4?-ni lu-a
100. a kalag-ga a-cag4 ddumu-zid-da-ka
101. udu kur-ra-gin7 dub3 ha-ra-ni-ib-jar
102. gaba kug-ja2-a ud-gin7 e3-i3
103. zi-pa-aj2-ja2 nij2-suh10-bi he2-me-en
104. za-ra en-me-er-kar2 dumu dutu za3-mi2
105. en-e inim kug dinana-ka-ce3 saj kece2 {ba-ci-in-ak} {(1 ms. has instead:) ba-ci-in-jar}
106. kij2-gi4-a inim zu zag-ce [tuku erin2-ta] ba-ra-an-pad3
{
(1 ms. adds a line:)
106A. [...]-e kij2-gi4-a-ni-ir [...]
}
107. inim gal dinana gal-zu inim-ma-ke4 me-a mu-na-ab-tum3
108. hur-saj zubi-ka he2-bi2-in-ed3-de3-en
109. hur-saj zubi-ta he2-em-ma-da-ra-an-ed3-de3-en
110. cucinki-e [kur] [an]-ca4-anki-a-ke4
111. pec2 tur-gin7 giri17 cu hu-mu-na-ab-jal2
112. hur-saj gal-gal ni2-ba lu-a
113. sahar-ra hu-mu-na-da-gur4-gur4-e
114. kij2-gi4-a en arattaki-ra u3-na-dug4 u3-na-de3-tah
115. iri-bi ir7-sajmucen-gin7 jic-bi-ta na-an-na-ra-ab-dal-en
116. mucen-gin7 gud3 us2-sa-bi-a nam-bi2-ib-dal-en
117. ganba jal2-la-gin7 na-an-si-ig-en
118. iri gul-gul-lu-gin7 sahar nam-bi2-ib-ha-za-en
119. arattaki a2-dam den-ki-ke4 nam ba-an-kud
120. /ki bi2\-in-gul-la-gin7 ki nam-ga-bi2-ib-gul-en
121. ejer-bi dinana ba-ci-in-zig3
122. gu3 im-[mi-in-ra ceg11 im]-mi-in-gi4
123. kuc7 bi2-[in-su-a-gin7] kuc7 nam-ga-bi2-ib-su-su
124. kug-sig17 [u3-tud-da]-ba kuclu-ub2/lu-ub2-cir a-ba-ni-in-ak
125. kug-me-a sahar-ba zag u3-ba-ni-in-us2
126. kug saj-PA-[ce3] u3-mu-un-dim2-dim2
127. ance kur-kur-ra-ke4 barag um-mi-in-la2-la2
128. je26-e-ce3-am3 den-lil2 ban3-da ki-en-gi-ra-ke4
129. en dnu-dim2-mud cag4 kug-ge pad3-da
130. kur me sikil-la-ke4 ha-ma-du3-e
131. jictackarin-gin7 hi-li ha-ma-ab-ak-e
132. dutu agrun-ta e3-a-gin7 si-muc2 ha-ma-ab-gun3-gun3
133. zag-du8-zag-du8-bi urin ha-ma-mul-e
134. e2-nun-e2-nun-ba cir3 kug nam-cub du12-a-ba
135. nam-cub dnu-dim2-mud-da-ke4 e-ne-ra dug4-mu-na-ab
136. ud-ba muc nu-jal2-am3 jiri2 nu-jal2-am3
137. kir4 nu-jal2-am3 ur-mah nu-jal2-am3
138. ur-gir15 ur-bar-ra nu-jal2-am3
139. ni2 tej3-je26 su zi-zi-i nu-jal2-am3
140. lu2-u18-lu gaba-cu-jar nu-tuku
141. ud-ba kur cuburki ha-ma-ziki
142. eme ha-mun ki-en-gi kur gal me nam-nun-na-ka
143. ki-uri kur me-te-jal2-la
144. kur mar-tu u2-sal-la nu2-a
145. an ki nijin2-na uj3 saj sig10-ga
146. den-lil2-ra eme 1-am3 he2-en-na-da-ab-dug4
147. ud-ba a-da en a-da nun a-da lugal-la
148. den-ki a-da en a-da nun a-da lugal-la
149. a-da en-e a-da nun-e a-da lugal-la
150. den-ki en he2-jal2-la en dug4-ga zid-da
151. en jectug2-ga igi-jal2 kalam-ma-ke4
152. mas-su dijir-re-e-ne-ke4
153. jectug2-ge pad3-da en eridugki-ga-ke4
154. ka-ba eme i3-kur2 en-na mi-ni-in-jar-ra
155. eme nam-lu2-ulu3 1 i3-me-[a]
156. 2-kam-ma-ce3 en-e kij2-gi4-a kur-ce3 du-ur2
157. arattaki-ac inim mu-na-ab-tah-e
158. kij2-gi4-a ji6 u3-na-ka im 1-gin7 cej3-ja2
159. an-bar7-gana2-ka im-du8-gin7 zig3-ga
160. kij2-gi4-a inim lugal-la-na-ke4 saj kece2 ba-ci-in-ak
161. ji6 u3-na-ka mul-am3 im-jen
162. an-bar7-gana2-ka dutu an-na-ta mu-un-de3-jen
163. inim gal dinana gi-zu2-lum-ma DU me-a mu-na-ab-tum3
164. hur-saj zubi-ce3 bi2-in-ed3-de3
165. hur-saj zubi-ta im-ma-da-ra-ab-ed3-de3
166. cucinki-e kur an-ca4-anki-a-ce3
167. pec2 tur-/gin7\ giri17 cu mu-na-ab-jal2
168. hur-saj gal-gal ni2-ba lu-a
169. sahar-ra mu-na-da-gur4-gur4
170. hur-saj 5 hur-saj 6 hur-saj 7-e im-me-re-bal-bal
171. [igi mu-un]-/il2\ arattaki-ac ba-te
172. [kisal] /aratta\ki-ka jiri3 hul2-la mi-ni-in-gub
173. nam-nir-jal2 lugal-a-na mu-un-zu
174. bur2-ra-bi inim cag4-ga-na bi2-ib2-be2
175. kij2-gi4-a en arattaki-ra mu-na-ab-bal-e
176. a-a-zu lugal-ju10 mu-e-ci-in-gi4-in-nam
177. en unugki-ga en kul-aba4ki-a-ke4 mu-e-ci-in-gi4-nam
178. lugal-za dug4-ga-ni nam-ju10 tah-a-ni nam-ju10
179. lugal-ju10 a-na bi2-in-dug4 a-na bi2-in-tah-am3
180. lugal-ju10 u3-tud-da-ni-ta {nam-en-na} {(1 ms. has instead:) men-na} tum2-ma
181. en unugki-ga muc-saj-kal ki-en-gi-ra til3-la {kur} {(2 mss. have instead:) saj} zid2-gin7 ma5-ma5
182. tarah-mac kur-bad3-da a2-nun-jal2
183. cilam-za mac naja kug-ga umbin sud2-sud2-e
184. ab2 zid-da kur-cag4-ga tud-da
185. en-me-er-kar2 dumu dutu-ke4 mu-e-ci-in-gi4-nam
{
(2 mss. add two lines:)
185A. [lugal]-zu dug4-ga-ni nam-ju10 tah-a-ni nam-ju10
185B. [lugal]-ju10 a-na bi2-in-dug4 [a-na] bi2-in-tah-am3
}
186. lugal-ju10 na-ab-be2-a
187. iri-ni ir7-sajmucen-gin7 jic-bi-ta na-na?-/ra-ab\-dag-e
188. mucen-gin7 gud3 us2-sa-bi-a nam-bi2-ib2-hu-luh-e
189. ganba jal2-la-gin7 na-an-sig9-ge-en
190. iri gul-gul-la-gin7 sahar na-an-bi2-[ib-ha-za]-en
191. arattaki a2-dam den-ki-ke4 nam ba-an-kud
192. ki bi2-in-gul-la-gin7 ki nam-ga-bi2-ib-gul-en
193. ejer-bi dinana ba-ci-in-zig3
194. gu3 im-mi-in-ra ceg11 im-mi-in-gi4
195. kuc7 bi2-in-su-a-gin7 kuc7 na-an-ga-bi2-ib-su-su-un
196. kug-sig17 u3-tud-da-ba kuclu-ub2/lu-ub2-cir a-ba-ni-in-ak
197. kug-me-a sahar-ba zag u3-ba-ni-in-us2
198. kug saj-PA-ce3 u3-mu-un-dim2-dim2
199. ance kur-kur-ra-ke4 barag um-mi-in-la2-la2
200. je26-e-ce3-am3 den-lil2 ban3-da ki-en-gi-ra-ke4
201. en dnu-dim2-mud-e cag4 kug-ge pad3-da
202. kur me sikil-la-ke4 ha-ma-du3-e
203. jictackarin-gin7 hi-li ha-ma-ab-ak
204. dutu agrun-ta e3-a-gin7 si-muc2 ha-ma-ab-gun3-gun3
205. zag-du8-zag-du8-ba urin ha-ma-mul-e
206. e2-nun-e2-nun-ba cir3 kug nam-cub du12-a-ba
207. [nam-cub] dnu-dim2-mud-ke4 ja2-ra dug4-/mu\-[na-ab]
208. a-na ma-ab-be2-en-na-bi u3-mu-[e-dug4]
209. a ru-a sun4 na4za-gin3 [kece2]-da-[ar]
210. ab2 kal-la-ga-ni kur me sikil-la-ka [tud-da-ar]
211. sahar arattaki-ka a2 e3-[a-ar]
212. ubur ab2 zid-da ga gu7-[a-ar]
213. kul-aba4ki kur me gal-gal-la-ka nam-nun-na tum2-ma
214. en-me-er-kar2 dumu dutu-ra
215. inim-bi ec3 e2-an-na-ka inim dug3 ga-na-ab-dug4
216. ji6-par4 jicmec3 gibil-gin7 gurun il2-la-na
217. lugal-ju10 en kul-aba4ki-ra cu-a ga-mu-na-ab-gi4
218. ur5-gin7 hu-mu-na-ab-be2-a-ka
219. kij2-gi4-a lugal-zu en kul-aba4ki-a-ra u3-na-dug4 u3-na-de3-tah
220. je26-e-me-en en cu sikil-la tum2-ma
221. jicrab3 mah an-na nin an ki-ke4
222. in-nin9 me car2-ra kug dinana-ke4
223. arattaki kur me sikil-la-ce3 hu-mu-un-de6-en
224. kur-ra jicig gal-gin7 igi-ba bi2-in-tab-en
225. arattaki unugki-ce3 gu2 a-gin7 i3-ja2-ja2
226. arattaki unugki-ce3 gu2 ja2-ja2 nu-jal2 e-ne-ra dug4-mu-na-ab
227. ur5-gin7 hu-mu-na-ab-be2-a-ka
228. kij2-gi4-a en arattaki-ra mu-na-ni-ib-gi4-gi4
229. nin gal an-na me huc-a u5-a
230. hur-saj kur cuba-ka dur2 jar-ra
231. barag kur cuba-ka ce-er-ka-an dug4-ga
232. en lugal-ju10 cubur-a-ni-im
233. dijir nin e2-an-na-ka mu-un-di-ni-ib-kur9-re-ec
234. en arattaki gu2 ki-ce3 ba-ni-in-jal2
235. ceg12 kul-aba4ki-a-ka ur5-gin7 hu-mu-na-ab-be2
236. ud-bi-a en-e cag4 mu-un-sag3 zi mu-un-ir-ir
237. gaba-ri nu-mu-da-jal2 gaba-ri i3-kij2-kij2
238. jiri3 ni2-te-a-na-ka igi lib-ba bi2-in-du8-ru gaba-ri i3-pad3-de3
239. gaba-ri in-pad3 gu3 im-ta-an-e3
240. kij2-gi4-a inim-ma gaba ri-bi
241. gud-gin7 gu3 nun mu-un-di-ni-ib-be2
242. kij2-/gi4-a\ lugal-zu en kul-aba4ki-a-ra u3-na-dug4 u3-na-de3-tah
243. hur-saj gal jicmec3 an-da mu2-a
244. ur2-bi-ce3 sa-par4-am3 pa-bi jic-bur2-am3
245. buru5 umbin-bi anzudmucen hu-ri2-inmucen-na
246. kece2-da [d]inana-/ka\ car2 dug4-ge gib-ba
247. umbin hu-ri2-inmucen-bi u3-mun kur-ra kur cuba-da ed3-da
248. arattaki er2 [ce8-ce8 ...]
249. a bal-bal-am3 zid2 dub-dub-ba-am3
250. kur-ra sizkur a-ra-zu-a giri17 cu jal2-la-am3
251. lu2 5 nu-me-a lu2 10 nu-me-a
252. unugki zig3-ga hur-saj zubi-ce3 saj a-gin7 i3-ja2-ja2
253. lugal-zu jictukul-ja2 saj ha-ba-an-cum2
254. je26-e a-da-min3-na saj /ga-ba\-an-cum2
255. a-da-min3 nu-um-zu tec2 [nu]-/um\-gu7
256. gud-de3 /gud\ a2!-jal2-bi [nu-um]-zu
257. [a-da]-/min3\ um-zu tec2 um-[gu7]
258. [gud]-/de3\ gud a2!-jal2-bi um-/zu\
259. [e]-/ne\ a-da-min3 mi-ni-in-taka4-taka4-an
260. [...]-/gin7\ nij2 lu2 nu-sig10-ge
261. [e]-ne in-ga-mu-ni-in-taka4-taka4-an
262. [2-kam]-ma-ce3 kij2-gi4-a inim mu-ra-be2-en
263. [...] de2-a ca-ra-ab-galam-e-en DU-a he2-mu-e-ci-dib
264. [e2]-an-na pirij cu-ba nu2-a
265. cag4-bi-ta gud gu3 nun di-dam
266. ji6-par4 jicmec3 gibil-gin7 gurun il2-la-na
267. lugal-zu en kul-aba4ki-a-ra cu-a gi4-mu-na-ab
268. hur-saj ur-saj sukud sig9-ga-am3
269. an-usan-na dutu e2-bi-ce3 du-gin7
270. igi-bi-ta uc2 la2-la2-e-gin7
271. dnanna si-un3-na mah-a-gin7
272. saj-ki-bi me-lem4 jal2-la-gin7
273. jic-gin7 kur-kur-ra gib-ba-gin7
274. saj muc3 arattaki-ke4
275. dlamma sag9-ga kur me sikil-la-ce3
276. ud-da arattaki aga kug an-na-gin7 si mu-na-an-sa2
277. je26-e ud-ba nam-mah-ju10 ga-an-zu
278. ce barag-ga nam-mu-un-sig9-si-ig-ge mar-e nam-me-e
279. ce-bi kur-kur-ra nam-il2-e
280. erin2-na mu-un-kud nam-mu-un-ja2-ja2
281. ce saal-kad5-e u3-mu-ni-in-si-si
282. ance barag la2-e um-mi-in-la2
283. ance-bal-e da-bi-a a-ba-an-sig10
284. tukum-bi kisal arattaki-ka guru7-ce3 mu-dub-be2
285. i3-ge-en am3-dub-be2 guru7-a hi-li-bi
286. kur-kur-ra izi jar-ra-bi a2-dam me-te-bi
287. bad3 7-e ce-er-ka-an dug4-ga
288. nin ur-saj me3-a tum2-ma
289. dinana ur-saj me3 sahar-ra-ke4 saj ecemen dinana di-dam
290. i3-ge-en arattaki ur ad6 sar-gin7 cu-ta im-ta-ri
291. je26-e ud-ba ca-ba-na-gam-e-de3-en
292. e-ne nam-mah-a-ni ci-im-ma-an-zu-zu-un
293. iri-gin7 nam-tur-ja2 gu2 ci-im-ma-ja2-ja2-an e-ne-ra dug4-mu-na-ab
294. ur5-gin7 hu-mu-na-ab-be2-a-ka
295. kij2-gi4-a en arattaki-ke4
296. ka-ni-gin7 inim ka-na ba-an-sig10
297. sumun2-gin7 hac2-a-na mu-un-gur
298. nim-sahar-ra-gin7 tir ud zal-le-na mu-un-jen
299. ceg12 kul-aba4ki-a-ka jiri3 hul2-la mu-ni-in-gub
300. kisal mah-e kisal gu2-en-na-ka kij2-gi4-a i-ib2-bur2
301. lugal-a-ni-ir en kul-aba4/ki\-[ra]
302. ka-ni-gin7 cu mu-na-an-gi4
303. gud-gin7 gu3 mu-na-an-sig10
304. gud ri-ri-gin7 jectug2 mu-na-an-[ja2-ja2]
305. lugal-e zag zid-da-ni NE im-mi-in-/tuc\
306. zag gab2-bu-ni im-ma-ni-in-gi4
307. i3-ge-en arattaki jalga cum2-ma im-ma-zu im-me
308. ud im-zal dutu im-ta-e3-a-ra
309. dutu kalam-ma-ka saj bi2-ib-il2
310. lugal-e id2idigna id2buranuna-bi-da im-ma-da-an-tab
311. id2buranun-na id2idigna-da im-ma-da-an-tab
312. bur gal-gal an-ne2 ba-sug2-su8-ug
313. bur tur-tur sila4 u2-cim dur2-gin7 zag-bi-a im-ma-an-us2
314. bur i-gi8 an-na da-bi-a ba-su8-ug
315. lugal-e ec-da kug-sig17-ga-ke4
316. en-me-er-kar2 dumu dutu-ke4 dub3 mu-un-bad-ba9-re6
317. ud-bi-a dub i-gi8 im me-a gi-gag unken-na
318. alan kug-sig17-ga ud dug3-ga tud-da
319. dnanibgal sig7-ga KAxLI sikil mu2?-da
320. dnisaba nin jectug2 dajal-la-ke4
321. e2-JECTUG2.dNISABA kug-ga-ni jal2 mu-na-an-taka4
322. e2-gal an-na-ka kur9-ra-ni jectug2 mu-un-ja2-ja2
323. en-e e2-nun mah-a-ni jal2 ba-an-taka4
324. jicli2-id-ga mah-a-ni ki /ba\-[an]-us2
325. lugal-e ce-ta ce libir-ra-ni cu ba-ra-an-/bal\
326. munu4 ki-car2-ra a ba-ni-in-[si]
327. nundum-bi u2hirinhu-ri2-in AN [X]-sug4-ge
328. saal-kad5-e igi im-mi-in-tur-tur
329. ce guru7 ka i-ni-in-si zu2 buru5mucen-e bi2-in-tah
330. ance barag la2-e um-mi-in-la2
331. ance-bal-e da-bi-a ba-an-sig10
332. lugal en jectug2 dajal-la-ke4
333. en unugki-ga en kul-aba4ki-ke4
334. har-ra-an arattaki-ke4 si bi2-in-sa2
335. nam-lu2-ulu3 kici6 ki-in-dar-ra-gin7
336. arattaki-ac ni2-ba mu-un-sub2-be2-ec
337. en-e kij2-gi4-a kur-ce3 du-ur2
338. arattaki-ac inim mu-na-ab-tah-e
339. kij2-gi4-a en arattaki-ra u3-na-dug4 u3-na-de3-tah
340. jidru-ja2 ur2-bi me nam-nun-na-ka
341. pa-bi kul-aba4ki-a an-dul3-ec i3-ak
342. pa mul-mul-la-bi ec3 e2-an-na-ke4
343. kug dinana-ke4 ni2 im-ci-ib-te-en-ten
344. jidru um-ta-an-kid7 hu-mu-un-da-jal2
345. na4-gug-jic-dili na4-za-gin3-jic-dili-gin7 cu-ni-a hu-mu-un-jal2
346. en arattaki-ke4 igi-ju10-ce3 hu-mu-un-tum2 e-ne-ra dug4-mu-na-ab
347. ur5-gin7 hu-mu-na-ab-be2-a-ka
348. kij2-gi4-a arattaki-ac du-ni
349. sahar kaskal-la jiri3-ni {mu-un-si} {(1 ms. has instead:) mu-un-e3}
350. na4 tur-tur hur-saj-ja2-ke4 suh3-sah4 mu-un-da-ab-za
351. ucumgal edin-na-ba kij2-je26-gin7 gaba-ri nu-mu-ni-in-tuku
352. kij2-gi4-a arattaki-ac um-ma-te-a-ra
353. nam-lu2-ulu3 arattaki-ke4
354. ance barag la2-e u6 di-de3 im-ma-sug2-sug2-ge-ec
355. kij2-gi4-a kisal arattaki-ka
356. ce guru7 ka bi2-in-si zu2 buru5mucen-e bi2-in-tah
357. cejx(IM.A) an-na ud jal2-la-gin7
358. arattaki he2-jal2-la i3-du3
359. dijir dur2-bi-a ba-da-ab-gi4-a-/gin7\
360. arattaki cag4-jar-ra-ni am3-la2-[la2]
361. nam-lu2-ulu3 arattaki-[ke4]
362. munu4 a sig9-ga-na a-cag4 mu-ni-[ib-X]
363. /ejer\-ba ra2-gaba cag4-tam [...]
364. [X] KI A taka4-ba [...]
365. X [X] X [...]
365B. [...] X X NI [...] (this line is possibly only a continuation of line 365)
366. dumu-[dumu] arattaki /jectug2\ [...]
367. arattaki-ac inim mu-un-bur2
368. ur5-da arattaki-a cu-/ta\ [...]
370. en unugki-ga-ra cu-ni i-im-[...]
371. me-en-de3 sug4-ga lul-la-/be2\-[ec2]
372. en kul-aba4ki-a-ra na4gug /lul\-[la-me-a] ga-mu-na-dur2-ru-ne-en-de3-en
373. ab-ba-ab-ba inim zu-ne
374. cu tec2-a bi2-ib-ri-/ec\ zag e2-jar8-e bi2-ib-us2-[ec]
375. en-ra e2 sikil-bi hu-mu-un-ja2-ja2-[e-ne]
376. [(X) X] /KIJ2\ jidru-ni DU.DU cag4 e2-/gal\-[la ...]
377. [bur2-ra-bi inim cag4-ga]-na bi2-[ib-be2]
378. [a-a-zu lugal-ju10] mu-e-ci-/in\-[gi4-in-nam]
379. [en-me-er]-/kar2\ dumu dutu-[ke4] mu-e-ci-in-gi4-in-nam
380. lugal-zu dug4-ga-ni nam-ju10 tah-[a]-ni [nam]-ju10
381. lugal-ju10 a-na /bi2-in\-dug4 a-na [bi2-in-tah]-/am3\
382. jidru-ja2 ur2-bi me /nam\-nun-/na-ka\
383. pa-bi kul-aba4ki-a /an-dul3\-ec i3-ak
384. pa mul-mul-[la-bi] ec3 e2-an-na-/ke4\
385. kug dinana-ke4 ni2 im-ci-ib-te-en-ten
386. jidru um-ta-an-kid7 hu-mu-/un-da\-jal2
387. na4-gug-jic-dili na4-za-gin3-jic-dili-gin7 cu-ni-a hu-mu-un-jal2
388. en arattaki-ke4 igi-ju10-ce3 hu-mu-un-tum2 ja2-a-ra ha-ma-an-dug4
389. ur5-gin7 hu-mu-na-ab-be2-a-ka
390. nam-bi-ce3 itima!-a KA ba-an-kur9 cag4-ka-tab-ba ba-an-nu2
391. ud im-zal inim im-car2-car2
392. inim ka-ce3 nu-jar-ra im-me
393. inim-ma ce ance gu7-a-gin7 jiri3 mi-ni-ib-ni10-ni10-e
394. i3-ne-ec2 lu2 lu2-u3-ra a-na na-an-dug4
395. lu2 lu2-ra dili a-na na-an-tah
396. lu2 lu2-ra in-na-ab-be2-a ur5 he2-en-na-nam-ma-am3
397. kij2-gi4-a lugal-zu en kul-aba4ki-ra [u3]-na-a-dug4 u3-na-de3-tah
398. jidru jic nam-me mu jic na-an-sa4-sa4
399. X [X] cu-na um-ma-ni-in-jar igi um-ci-bar-bar
{
400. jicildag2 nam-me jiccim-gig nam-me
401. jicerin nam-me jiccu-ur2-men2 nam-me
402. jicha-cu-ur2 [nam-me jicjicnimbar] /nam\-me
403. jicesi nam-me [jicza-ba-lum nam-me]
}
{
(instead of lines 400-403, 1 ms. has:)
A. jicildag2 nam-me jiccim-gig nam-me
B. jicha-cu-ur2 nam-me jicjicnimbar nam-me
C. jicerin nam-me jicza-ba-lum nam-me
D. jiccu-ur2-men2 nam-me [jicesi nam-me]
}
404. jicasal lam jicgigir-ra nam-me
405. jickid-da jic-kucusan3-na nam-me
406. kug-sig17 nam-me urud nam-me
407. kug-me-a zid kug-babbar nam-me
408. na4gug nam-me na4za-gin3 nam-me
409. jidru um-ta-an-kid7 hu-mu-un-da-jal2
410. na4-gug-jic-dili na4-za-gin3-jic-dili-gin7 cu-ni-a hu-mu-un-jal2
411. en kul-aba4ki-a-ke4 igi-ju10-ce3 hu-mu-un-tum2 e-ne-ra dug4-mu-na-ab
412. ur5-gin7 hu-mu-na-ab-be2-a-ka
413. kij2-gi4-a dur3ur3 si-gigir ku5-ra2-gin7 ka si-il-la mu-un-jen
414. ance edin-na bar-rim4-ma kac4 di-gin7 kucum4 i3-tag-tag-ge
415. ka-ni tum9-a bi2-ib-zi-zi-zi
416. udu zulumhi udu /sumur\-ba du7-du7-gin7 dub3-us2 dili mu-un-dab5
417. ceg12 kul-aba4ki-a-ka jiri3 hul2 mi-ni-in-gub
418. lugal-a-ni en kul-aba4ki-a-ra
419. inim-inim-ma mu-na-ra-si-si
420. en-me-er-kar2-ra den-ki-ke4 jectug2 mu-na-/an\-cum2
421. en-e ajrig mah-a-[ni] a2 ba-da-/an\-aj2
422. e2-ni? [...]
423. lugal-e /sumur3?\ [...] cu ba-ra-an-ti
424. mu-un-dul-gin7 /cu\ bi2-[in-gur-gur] igi bi2-/in\-ja2!-ja2!
425. na4na KA-KA cim-gin7 /zu2\ [ba-ni]-/in\-ra
426. gi su-lim-ma-ka i3-gin7 mu-ni-in-de2
427. ud-ta jissu-ce3 am3-ed2-e
428. jissu-ta ud-ce3 am3-ed2-e
429. mu 5-am3 mu 10-am3 ba-zal-[la]-ri
430. gi su-lim-ma gij4-gin7 bi2-in-gaz
431. en-e igi hul2-la im-ci-in-bar
432. i3 li i3 li2 kur cuba-a-ka sag3-ga i-ni-in-de2
433. en-e kij2-gi4-a kur-ce3 du-ur2
434. jidru cu-na mu-un-na-ja2-ja2
435. kij2-gi4-a arattaki-ac du-a-ni
436. u5mucen-gin7 hur-saj-ja2 nim-gin7 sahar /nijin\-a
437. HI.SUHURku6-gin7 kur ur3-ur3-ru-[da]-ni arattaki-ac /ba\-te
438. kisal arattaki-ka jiri3 hul2-la mi-ni-in-gub
439. jidru TE SI NA mu-un-gub
440. cu kij2 si bi2-in-sa2 a kij2 /bi2-ib\-ak-e
441. en arattaki-ke4 jidru-ta igi tab-ba
442. itima-ka ki-tuc kug-ga-ni-a ni2 im-kar2-kar2-ka
443. en-e cag4-tam-a-ni-ir gu3 mu-na-de2-e
444. arattaki u8 /sag2\-[gin7] he2-em kaskal-bi [kur] /ki\-bal he2-em
445. mah arattaki kug dinana-ke4
446. en kul-aba4ki-ra mu-na-an-cum2-ma-ta
447. lu2-kij2-gi4-a mu-un-gi4-a-ni
448. dutu ed2-de3 inim dugud pa ed2-de3
449. a-da-al kug dinana-ke4 igi me-ci-kar2-kar2
450. arattaki-a lul-e me-a he2-en-de3-dib-e
451. al me-da-ac cu al-zil2-zil2-i-a
452. me-en-de3 sug4-ga lul-la-be2-ec2
453. en kul-aba4ki-ra na4gug lul-la-me-a mu-na-dur2-ru-ne-en-de3-en
454. en arattaki-ke4 kij2-gi4-a-ar
455. inim-ma dub mah-gin7 cu mu-na-an-sig10
456. kij2-gi4-a lugal-zu en kul-aba4ki-a-ra u3-na-dug4 u3-na-de3-tah
457. ur na-an-gig2-ge ur na-an-babbar-re
458. ur na-an-su4-e ur na-an-dara4-e
459. ur na-an-sig7-sig7-ge ur na-an-gun3-gun3gu2 ur hu-mu-ra-ab-cum2-mu
460. ur-ju10 ur-ra-ni a-da-min3 he2-em-da-e
461. a2-jal2 he2-zu e-ne-ra dug4-mu-na-ab
462. ur5-gin7 hu-mu-na-ab-be2-a-ka
463. kij2-gi4-a u2-lum a-lam mu-un-jen
464. ceg12 kul-aba4ki-ke4 ejer sig10-ga-gin7 inim /mu\-un-gi4
465. ud5!-gin7 ka gaba kur-ra-ka igi mi-ni-ib-il2-il2-i
466. mir! mah kici17-kici17-ta zig3-ga-gin7 e2 me MIN3 mu-un-ta-la2-la2
467. [X X X X]-ka saj mi-ni-in-il2
468. [...] arattaki-a-ke4 [...]
469. ki-tuc-a-ni-ta a mah [e3-a-gin7 mu-un-na-ab]-be2
470. kij2-gi4-a en /aratta\ki-ra u3-na-dug4 u3-na-de3-tah
471. tug2 na-an-gig2-ge tug2 na-an-babbar-re
472. tug2 na-an-su4-e tug2 na-an-dara4-e
473. tug2 na-an-sig7-sig7-ge tug2 na-an-gun3-gun3gu2 tug2 ga-mu-na-ab-cum2(source: hu-mu-ra-ab-cum2-mu)
474. ur-ju10 gu2-da jal2 den-lil2-la2 ur cu ga-mu-na-taka4
475. ur-ju10 ur-ra-ni a-da-min3 he2-em-di-e
476. a2-jal2 he2-zu-zu e-ne-ra dug4-mu-na-ab
477. 2-kam-ma-ce3 u3-na-dug4 u3-na-de3-tah
478. en3-tukum-ce3 lul-da LI-a he2-ni-ib-dib-e
479. iri-na udu-gin7 igi-ni hu-mu-un-su8-ub
480. e-ne sipad-bi-gin7 ejer-bi he2-em-us2-e
481. du-a-ni kur kug na4za-gin3-na
482. gi nij2 dub-ba-gin7 gu2 hu-mu-na-ab-jar
483. kug-sig17 kug-babbar su3-ra2-aj2-bi
484. dinana nin e2-an-na-ra
485. kisal aratta[ki]-/ka\ guru7-ce3 hu-mu-un-dub-dub-bu
486. 3-kam-ma-[ce3] u3-na-dug4 u3-na-de3-tah
487. iri-ni ir7-sajmucen-gin7 jic-bi-ta na-an-tar-ta-ta-an
488. [...]-/gin7\ na-an-dub2-be2-en
489. [ganba jal2-la]-/gin7\ na-an-si-ig-en
490. [...] lil2-e nam-mi-ni-in-dib-be2-en
491. du-a-ni na4 hur-saj-ja2 cu u3-mu-ni-in-ti
492. ec3 gal eridugki abzu e2-nun ha-ma-du3-e
493. a-sal-bar-bi im-cu2-ra-ke4 cu /ha\-[ma-ni]-ib-tag-ge
494. jissu-bi kalam-[ma ha-ma]-ni-ib-la2-la2-e
495. inim dug4-ga-ni [...]-car2?-a-ka
496. jickim-a-ni [e-ne-ra] dug4-mu-na-ab
497. ud-ba en? [...]-/ka\-am3
498. [...] barag-ga dur2 jar-ra numun nun-na-ke4-ne
499. [X X] 1(DIC)-a mu2-a
500. dug4-ga-ni [mah]-am3 cag4-bi su-su-a-am3
501. kij2-gi4-a ka-ni dugud cu nu-mu-un-da-an-gi4-gi4
502. bar kij2-gi4-a ka-ni dugud cu nu-mu-un-da-an-gi4-gi4-da-ka
503. en kul-aba4ki-a-ke4 im-e cu bi2-in-ra inim dub-gin7 /bi2-in\-gub
504. ud-bi-ta inim im-ma gub-bu nu-ub-ta-jal2-la
505. i3-ne-ec2 dutu ud ne-a ur5 he2-en-na-nam-ma-am3
506. en kul-aba4ki-a-ke4 /inim\ [dub-gin7] /bi2\-in-gub ur5 /he2\-[en-na]-nam-ma
507. kij2-gi4-a mucen-gin7 a2 dub2 i3-ak-e
508. ur-bar-ra mac2-e us2-sa-gin7 guru5-uc i3-bur2-bur2-re
509. hur-saj 5 hur-saj 6 hur-saj 7-e im-me-re-bal-bal
510. igi mu-un-il2 arattaki-ac ba-te
511. kisal arattaki-ka jiri3 hul2-la mi-ni-in-gub
512. nam-nir-jal2 lugal-a-na mu-un-zu
513. bur2-ra-bi inim cag4-ga-na bi2-ib2-be2
514. kij2-gi4-a en arattaki-ra mu-na-ab-bal-e
515. a-a-zu lugal-[ju10] mu-e-ci-in-gi4-in-nam
516. en unugki-/ga\ /en\ kul-aba4ki-a-ke4 mu-[e-ci]-in-gi4-in-nam
517. lugal-zu /dug4\-[ga-ni] nam-ju10 tah-a-ni nam-ju10
518. lugal-ju10 [a-na bi2]-/in\-dug4 a-na bi2-in-tah-am3
519. lugal-ju10 [jicmec3] gal dumu den-lil2-la2-ke4
520. jic-bi [an ki]-da mu2-a
521. /pa\-[bi an-ne2] us2-sa-am3
522. [ur2-bi ki-a] gub-ba-bi
523. nam-en nam-lugal-la pa e3 ak-a
524. en-me-er-kar2 dumu dutu-ke4 im ma-an-cum2
525. en arattaki-ke4 im igi u3-ni-bar cag4 inim-ma u3-bi2-zu
526. a-na ma-ab-be2-en-na-bi u3-mu-e-dug4
527. a ru-a sun4 na4za-gin3 kece2-da-ar
528. ab2 kal-la-ga-ni kur me sikil-la-ka tud-da-ar
529. sahar arattaki(source: unugki-ga)-ka a2 e3-a-ar
530. ubur ab2 zid-da-ka ga gu7-a-ar
531. kul-aba4ki kur me gal-gal-la-ka nam-en-na tum2-ma-ar
532. en-me-er-kar2 dumu dutu-ra
533. inim-bi ec3 e2-an-na-ka inim dug3 ga-mu-na-ab-dug4
534. ji6-par4 jicmec3 gibil-gin7 gurun il2-la-na
535. lugal-ju10 en kul-aba4ki-ra cu-a ga-mu-na-ab-gi4
536. ur5-gin7 hu-mu-na-ab-be2-a-ka
537. en arattaki-ke4 kij2-gi4-a-ar
538. im cu-rin-na-ni cu ba-ci-in-ti
539. en arattaki-ke4 im-ma igi i-ni-in-bar
540. inim dug4-ga gag-am3 saj-ki mi-re2-da-am3
541. en arattaki-ke4 im cu-rin-na-ni igi im-bar-bar-re
542. ud-ba en men nam-en-na tum2-ma dumu den-lil2-la2-ke4
543. dickur an ki-a gu3 nun-bi di-dam
544. ud du7-du7 ug gal-la ki [X X]-ka nam-mi-ni-in-gub
545. kur-kur [...] /mu-un\-tuku4-tuku4-e
546. hur-saj [... mu]-/un\-da-pec11-pec11-e
547. ni2 [me]-lem4? [X X] gaba-na jal2-la-bi
548. hur-saj giri17-zal-la gu3 mi-ni-in-il2
549. arattaki bar ud-bi cag4 hur-saj-ja2-ka
550. gig ni2-bi mu2-a gu2 ni2-bi an-ga-mu2-a
551. gig ni2-bi mu2-a guru7 [X (X)]-ka
552. en arattaki-ra mu-na-ni-in-/ku4\-[ku4]
553. kisal arattaki-a-ka igi-ni-ce3 i-im-dub?
554. en arattaki-ke4 gig-e igi bi2-in-du8
555. kij2-gi4-a igi sag3-sag3-a-ni mu-un-ci-ib-UR2xKID2-UR2xKID2-e
556. en arattaki-ke4 kij2-gi4-a-ar gu3 mu-un-na-de2-e
557. mah-bi dinana nin kur-kur-ra-ke4
558. iri-ni arattaki cu {li-bi2-in-dag} {(the other ms. has instead:) li-bi2-in-kal} unugki-e la-ba-an-KA
559. e2-za-gin3-na-ka-ni cu {li-bi2-in-dag} {(the other ms. has instead:) li-bi2-in-kal} ec3 e2-an-na-ka la-ba-an-KA
560. kur me sikil-la-ka cu {li-bi2-in-dag} {(the other ms. has instead:) li-bi2-in-kal} ceg12 kul-aba4ki-a-ke4 la-ba-an-KA
561. jic-nu2 ce-er-kan2 dug4 cu {li-bi2-in-dag} {(the other ms. has instead:) li-bi2-in-kal} jic-nu2 gi-rin-na la-ba-an-KA
562. en-ra cu sikil-la-ka-ni cu {li-bi2-in-dag} {(the other ms. has instead:) li-bi2-in-kal} en unugki-ga en kul-aba4ki-a-ra la-ba-an-KA
563. arattaki zid-da gab2-bu-ba
564. dinana nin kur-kur-ra-ke4
565. a mah e3-a-gin7 mu-un-na-nijin2-nijin2
566. lu2-be2-ne lu2-lu2-ta dar-a
567. lu2 ddumu-zid-de3 lu2-ta e3-a-me-ec
568. inim kug dinana ki-bi-ce3 jar-jar-me-ec
569. ur igi-jal2-la /DA\.A.SAR ddumu-zid-da he2-ci-im-nijin2-nijin2
570. /ul4 ja2-nam-ma\ dumu ur4-[...]
571. [igi] a-ma-ru-ka gub-ba-me-ec
572. ejer a-ma-ru ba-ur3-ra-ta
573. dinana nin kur-kur-ra-ke4
574. nam gal ki aj2 ddumu-zid-da-ke4
575. a nam-til3-la-ka mu-un-ne-sud-sud
576. gu2 kalam-ma-ka jic mu-un-ne-en-jal2
577. ur igi-jal2-la du-a-ni
578. tug2sajcu gun3-a ugu-na i-im-cu2
579. tug2pirij-pirij-/ja2\ zag mu-ni-in-kece2
580. [X] il2-/la\ X cu? mi-ni-in-du8-[X]-/am3\
581. [...]-te-na mi-ni-in-dug4
582. [...] nin [...] /ba\-an-PAdi
583. [...]-a-ni
584. [...] dinana
585. en3-du-ni dama-ucumgal-an-na nitalam-a-na ba-dug3
586. ud-bi-ta jectug2 kug /jectug2\ [kug] ddumu-zid-da-ke4
587. cu mu-ni-in-du7 cir3 mu-/ni\-[in]-dug4 inim mu-ni-in-zu
588. um-ma kur me sikil-ce3 du-a-ni
589. ki-sikil ud-da-na til-la-gin7 im-ma-na-ta-e3
590. cembi2-zid-da igi-na mu-un-gun3
591. [tug2] babbar-ra zag mu-ni-in-kece2
592. [aga] zid-da iti6-gin7 mu-un-e3
593. [X] X X saj si ba-ni-in-sa2
594. [nitalam]-a-ni en-me-er-kar2 barag-ge4 mu-un-da-ab-si
595. [...] um-mi-in-zi-zi
596. [ga-nam] im-da-lu-lu arattaki-ac u8-da sila4-bi
597. [ga-nam im]-da-lu-lu arattaki-ac ud5-da mac2-bi
598. [ga-nam im]-da-lu-lu arattaki-ac ab2-da amar-bi
599. [ga-nam] /im\-da-lu-lu arattaki-ac eme5 dur3ur3 kac4 gig2-ga-<bi>
600. arattaki-a na-an-da-be2-a
601. [guru7-ce3] he2-em-dub-dub gu2 he2-em-jar-jar
602. [he2]-/jal2\ za-a he2-jal2-zu
603. [...] en arattaki-ra u3-mu-ni-in-ak
604. [...] X X X RA he2-en-[X (X)]
605. [...] mu-un-di-ni-ib-X-e
606. [...] mu-un-ta-e3
607. [...] si mu-un-na-ab-sa2
3 lines missing
611. [...] me-te-ac [...] jal2
612. [...] X SI i-lu cag4-[ga ...] X
613. [...]-ni-a he2-jal2-zu AN [...]
614. [...] den-lil2-le saj-ec mu-ri-in-rig7 [X]-/la\-la-ja2 he2-zu-zu
615. [...] kar2 a-a-ni nu-lam-lam a nu-un-de2
616. den-[lil2] [lugal] /kur\-kur-ra-ke4 hu-mu-un-kar2?-re ni2-ba
617. ec2-gar3 /im\-ma-an-du3-a-gin7
618. nam-lu2-u18-[lu] arattaki-a-ke4
619. kug-sig17 kug na4[za]-gin3 bal ak-de3 ec2-gar3 X (X) X
620. lu2 gurun kug-sig17 gurun jic gub-bu-de3
621. jicpec3 jectin-ba nij2-ta ub4-ba-gin7 guru7 gal-ce3 [u3]-mu-un-dub
622. na4za-gin3 duru5 ur2-ba mu-un-bur2-re-ne
623. giucub pa-ba mu-un-ta-bal-e-ne
624. dinana nin e2-an-na-ra
625. kisal e2-an-naki-ka guru7-ce3 mu-un-dub-bu-ne
626. lugal-ju10 ja2-nu na ga-e-de5 na de5-ju10 he2-e-dab5
627. inim ga-ra-ab-dug4 jizzal he2-e-ak
628. lu2 X /BI? E\ kur-kur-ra uj3-e u3-/un\-pad3
629. [nam-lu2]-/ulu3\ arattaki-[ke4]
630. [X]-me-ec2 i-im-da he2-em-me-ne
631. je26-e gu2-e-ta du-a-ju10-ne
632. /nam-lugal\-ju10 nin mul-mul-e ma-an-cum2
633. djectin-an-na [...]
634. iri-ba lil2 [...]
635. ezen nu-mu-[...]
636. ud cu2-uc nam-[...]
approx. 6 lines missing

Print sources

Cohen 1973: translation

Jacobsen 1987, p. 275-319: translation, commentary

Jacobsen 1992: translation, commentary, composite text (ll. 135-155)

Jacobsen 1997: translation, commentary (ll. 135-155, ll. 498 onwards)

Vanstiphout 1987a (joins)

Electronic sources

Civil 1980: composite text

Civil 1992b: composite text

Krecher 1996a: composite text, translation

Vanstiphout 1998c: composite text, score transliteration

Cuneiform sources

Ash 1924-475 (OECT 5 2; JAOS 88 110); provenance: Kic

CBS 2150 (HAV 9); provenance: Nippur

CBS 2291 (photo pl. 28); provenance: Nippur

CBS 10435 (SEM 14; photo pl. 22f.) + Ni 4529 (ISET 2 40; pl. 15) + N 7256; provenance: Nippur

CBS 10436 (SEM 16); provenance: Nippur

CBS 13644 (SEM 15) + N 1496 + N 3261 + UM 29-16-183; provenance: Nippur

CBS 13676; provenance: Nippur

CBS 14232 (PBS 13 8; photo pl. 24); provenance: Nippur

CBS 15110 (PBS 5 8; photo pl. 27); provenance: Nippur

N 2822; provenance: Nippur

N 3236 (photo pl. 24); provenance: Nippur

N 3623 (photo pl. 27) + Ni 9601 (ISET 2 28ff.; pl. 1ff.; photo pl. 17f.; FTS fg. 14f.; cf. FTS fg. 17f.) + UM 29-13-194 (photo pl. 19); provenance: Nippur

N 3632 (photo pl. 28); provenance: Nippur

Ni 13191 (ISET 2 42) + N 4130 (photo pl. 19); provenance: Nippur

N 6022 ***; provenance: Nippur

N 6500; provenance: Nippur

N 7256; provenance: Nippur

Ni 2359 (SRT 34); provenance: Nippur

Ni 2379 (BE 31 44); provenance: Nippur

Ni 4361 + Ni 4440 (ISET 2 41; pl. 16); provenance: Nippur

Ni 9700 (ISET 2 40; pl. 13); provenance: Nippur

Ni 9733 (ISET 2 40; pl. 13); provenance: Nippur

U 16897 (UET 6 47) + UET 6 *40; provenance: Ur

UET 6 62; provenance: Ur

UM 29-16-422 (pl. 14; photo pl. 20) + UM 29-16-456 + N 6277 (pl. 21); provenance: Nippur

UM 29-16-442; provenance: Nippur

VAT 17463 (VS 24 73)


Revision history

05.iii.1998-22.iii.1998: JAB, editor: standardisation
26.iv.1998: GZ, editor: proofreading
10.v.1999: GZ, editor: SGML tagging
14.v.1999: ER, editor: proofreading SGML
14.v.1999: ER, editor: web publication
02.ii.2001: ER, editor: minor corrections to line 284
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford