ETCSLtransliteration : c.2.1.7 ETCSL homepage

The building of Ninĝirsu's temple (Gudea, cylinders A and B)

1. (A1.1) ud /an ki\-a nam tar-[re]-/da\
2. (A1.2) /lagaš\[ki]-e me gal-la [saĝ] an-še3 mi-ni-ib2-il2
3. (A1.3) den-lil2-e en dnin-ĝir2-su2-še3 igi zid mu-ši-bar
4. (A1.4) iri-me-a niĝ2-du7 pa nam-e3
5. (A1.5) šag4 gu2-bi nam-gi4
6. (A1.6) šag4 den-lil2-la2 gu2-bi nam-gi4
7. (A1.7) šag4 gu2-bi nam-gi4
8. (A1.8) a-ĝi6 uru16 nam-mul ni2 il2-il2
9. (A1.9) šag4 den-lil2-la2-ke4 id2idigna-am3 a dug3-ga nam-de6
10. (A1.10) e2-e lugal-bi gu3 ba-de2
11. (A1.11) e2-ninnu me-bi an ki-a pa e3 mu-ak-ke4
12. (A1.12) ensi2 lu2 ĝeštug3 daĝal-kam ĝeštug3 i3-ĝa2-ĝa2
13. (A1.13) niĝ2 gal-gal-la šu mi-ni-mu2-mu2
14. (A1.14) gud du7 /maš2\ du7-re6 si im-sa2-sa2-e
15. (A1.15) šeg12 nam tar-ra saĝ mu-ši-ib2-il2
16. (A1.16) e2 kug du3-de3 gu2-bi mu-ši-ib2-zig3
17. (A1.17) lugal-ni-ir ud ne maš-ĝi6-ka
18. (A1.18) gu3-de2-a en dnin-ĝir2-su2-ra igi mu-ni-du8-am3
19. (A1.19) e2-a-ni du3-ba mu-na-dug4
20. (A1.20) e2-ninnu me-bi gal-gal-la-am3
21. (A1.21) igi mu-na-ni-ĝar
22. (A1.22) gu3-de2-a šag4-ga-ni su3-ra2-am3
23. (A1.23) inim-e mi-ni-kuš2-u3
24. (A1.24) ga-na ga-na-ab-dug4 ga-na ga-na-ab-dug4
25. (A1.25) inim-ba ḫa-mu-da-gub
26. (A1.26) sipad-me nam-nun-ne2 saĝ ma-ab-šum2-šum2
27. (A1.27) niĝ2 maš-ĝi6-ke4 ma-ab-de6-a-ĝa2
28. (A1.28) šag4-bi nu-zu
29. (A1.29) ama-ĝu10 ma-mu-ĝu10 ga-na-de6
30. (A2.1) ensi kug-zu me-te-na-ĝu10
31. (A2.2) dnanše nin9 diĝir sirara6-ta-ĝu10
32. (A2.3) šag4-bi ḫa-ma-pad3-de3
33. (A2.4) ma2-gur8-ra-na ĝiri3 nam-mi-gub
34. (A2.5) iri-ni niĝin6ki-še3 id2-niĝin6ki-du-a ma2 mu-ni-ri
35. (A2.6) id2-de3 ḫul2-la-e kur-ku4 i3-si-il-e
36. (A2.7) ba-gara2 e2 id2-de3 la2-a-e im-ti-a-ta
37. (A2.8) ninda ĝiš bi2-tag a sed6 i3-de2
38. (A2.9) lugal ba-gara2-ra mu-na-ĝen šudu3 mu-na-ša4
39. (A2.10) ur-saĝ piriĝ zig3-ga gaba-šu-ĝar nu-tuku
40. (A2.11) dnin-ĝir2-su2 abzu-a /gal-di\
41. (A2.12) nibruki-a nir-/ĝal2\
42. (A2.13) ur-saĝ /ma\-a-dug4 šu zid ga-mu-ra-ab-ĝar
43. (A2.14) dnin-ĝir2-su e2-zu ga-mu-ra-du3
44. (A2.15) me šu ga-mu-ra-ab-du7
45. (A2.16) nin9-zu dumu eridugki-ge tud-da
46. (A2.17) nir-ĝal2 me-te-na nin ensi3 diĝir-re-ne-ke4
47. (A2.18) dnanše nin9 diĝir sirara6-ta-ĝu10
48. (A2.19) ĝiri3-bi ḫa-ma-ĝa2-ĝa2
49. (A2.20) gu3 de2-a-ni ĝiš ba-tuku-am3
50. (A2.21) lugal-a-ni sizkur2 ra2-zu-ni gu3-de2-a-aš2
51. (A2.22) en dnin-ĝir2-su-ke4 šu ba-ši-ti
52. (A2.23) e2 ba-gara2!-ka 3-eš3 i3-ak
53. (A2.24) ensi2-ke4 dĝa2-tum3-dug3-še3 ki-nu2-a-ni ba-gub
54. (A2.25) ninda ĝiš bi2-tag a sed6 i3-de2
55. (A2.26) kug dĝa2-tum3-dug3-ra mu-na-ĝen
56. (A2.27) sizkur2 mu-na-be2
57. (A2.28) nin-ĝu10 dumu an kug-ge tud-da
58. (A2.29) nir-ĝal2 me-te-na diĝir saĝ zig3
59. (A3.1) kalam-ma til3-la
60. (A3.2) nu-du-zu iri-na
61. (A3.3) nin ama lagaški ki ĝar-ra-me
62. (A3.4) igi 3-še3 u3-ši-bar-ra-zu ni2-a ḫe2-ĝal2-la-am3
63. (A3.5) šul zid lu2 igi mu-bar-ra-zu nam-til3 mu-na-sud
64. (A3.6) ama nu-tuku-me ama-ĝu10 ze2-me
65. (A3.7) a nu-tuku-me a-ĝu10 ze2-me
66. (A3.8) a-ĝu10 šag4-ga šu ba-ni-dug4 unu6-a i3-tud-e
67. (A3.9) dĝa2-tum3-dug3 mu kug-zu dug3-ga-am3
68. (A3.10) ĝi6-a ma-ni-nu2
69. (A3.11) ĝišĝiri2 gal-ĝu10-me zag-ĝu10 mu-us2
70. (A3.12) NE.GI.BAR a gal-la du3-a-me
71. (A3.13) zi šag4 mu-ši-ni-ĝal2
72. (A3.14) an-dul3 daĝal-me ĝissu-zu-še3
73. (A3.15) ni2 ga-ma-ši-ib2-te
74. (A3.16) /šu maḫ\-za sa-ga a2 zid-da-bi
75. (A3.17) nin-ĝu10 dĝa2-tum3-dug3 ĝa2-ra ḫa-mu-u3-ru
76. (A3.18) iri-še3 i3-du-e ĝiškim-ĝu10 ḫe2-sag9
77. (A3.19) kur a-ta il2-la niĝin6ki-še3
78. (A3.20) u2(source: sukkal)-dug4 sag9-ga-zu igi-še3 ḫa-ma-ĝen
79. (A3.21) dlamma sag9-ga-zu ĝiri3-a ḫa-mu-da-ĝen
80. (A3.22) ga-na ga-na-ab-dug4
81. (A3.23) ga-na ga-na-ab-dug4
82. (A3.24) inim-ba ḫa-mu-da-gub
83. (A3.25) ama-ĝu10 ma-mu-ĝu10 ga-na-de6
84. (A3.26) ensi3 kug-zu me-te-na-ĝu10
85. (A3.27) dnanše nin9 diĝir sirara6-ta-ĝu10
86. (A3.28) šag4-bi ḫa-ma-pad3-de3
87. (A3.29) gu3 de2-a-ni ĝiš ba-tuku-am3
88. (A4.1) nin-a-ni sizkur2 ra2-zu-ni
89. (A4.2) gu3-de2-a-aš2 kug dĝa2-tum3-dug3-ge šu ba-ši-ti
90. (A4.3) ma2-gur8-ra-na ĝiri3 nam-mi-gub
91. (A4.4) iri-ni niĝin6ki-še3 <ma2 mu-ni-ri> kar niĝin6ki-na-ke4 ma2 bi2-us2
92. (A4.5) ensi2-ke4 kisal diĝir sirara6-ta-ka saĝ an-še3 mi-ni-il2
93. (A4.6) ninda ĝiš bi2-tag a sed6 i3-de2
94. (A4.7) dnanše mu-na-ĝen šudu3 mu-na-ša4
95. (A4.8) dnanše nin uru16 nin me dkal-dkal-la
96. (A4.9) nin den-lil2-gin7 nam tar-tar-re
97. (A4.10) dnanše-ĝu10 dug4-ga-zu zid-dam
98. (A4.11) saĝ-bi-še3 e3-a-am3
99. (A4.12) ensi diĝir-re-ne-me
100. (A4.13) nin kur-kur-ra-me ama inim-ĝu10 ud-da ma-mu-da
101. (A4.14) šag4 ma-mu-da-ka lu2 1(DIŠ)-am3 an-gin7 ri-ba-ni
102. (A4.15) ki-gin7 ri-ba-ni
103. (A4.16) a-ne saĝ-ĝa2-ni-še3 diĝir-ra-am3
104. (A4.17) a2-ni-še3 anzud2mušen-dam
105. (A4.18) sig-ba-a(source: ni)-ni(source: a)-še3 a-ma-ru-kam
106. (A4.19) zid-da gabu2-na piriĝ i3-nu2-nu2
107. (A4.20) e2-a-ni du3-da ma-an-dug4
108. (A4.21) šag4-ga-ni nu-mu-zu
109. (A4.22) ud ki-šar2-ra ma-ta-e3
110. (A4.23) munus 1(DIŠ)-am3 a-ba me-a nu a-ba me-a-ni
111. (A4.24) saĝ-ĝa2 e3 ki garadin9 mu-ak
112. (A4.25) gi-dub-ba kug NE-a šu im-mi-du8
113. (A4.26) dub mul-an dug3-ga im-mi-ĝal2
114. (A5.1) ad im-dab6-gi4-gi4
115. (A5.2) 2(MAN)-kam ur-saĝ-ĝa2-am3
116. (A5.3) a2 mu-gur le-um za-gin3 šu im-mi-du8
117. (A5.4) e2-a ĝiš-ḫur-bi im-ĝa2-ĝa2
118. (A5.5) igi-ĝu10-še3 dusu kug i3-gub
119. (A5.6) ĝišu3-šub kug / si\ ib2-sa2
120. (A5.7) šeg12 nam tar-ra ĝišu3-šub-ba ma-an-ĝal2
121. (A5.8) ildag2 zid-da igi-ĝu10 gub-ba
122. (A5.9) ti-gid2mušen-lu2 a ud mi-ni-ib2-zal-zal-e
123. (A5.10) dur3 a2 zid-da lugal-ĝa2-ke4 ki ma-ḫur-ḫur-e
124. (A5.11) ensi2-ra ama-ni dnanše mu-na-ni-ib2-gi4-gi4
125. (A5.12) sipad-ĝu10 ma-mu-zu ĝe26 ga-mu-ra-bur2-bur2
126. (A5.13) lu2 an-gin7 ri-ba ki-gin7 ri-ba-eše2
127. (A5.14) saĝ-ĝa2-<ni>-še3 diĝir a2-ni-še3
128. (A5.15) anzud2mušen-eše2 sig-ba-a-ni-še3 a-ma-ru-eše2
129. (A5.16) zid-da gabu2-na piriĝ i3-nu2-nu2(source: SA4-SA4)-a
130. (A5.17) šeš-ĝu10 dnin-ĝir2-su2 ga-nam me-am3
131. (A5.18) 3 e2-ninnu-na du3-ba za-ra ma-ra-an-dug4
132. (A5.19) ud ki-šar2-ra ma-ra-ta-e3-a
133. (A5.20) diĝir-zu dnin-ĝiš-zid-da ud-gin7 ki-ša-ra ma-«ra-da»-ra-ta-e3
134. (A5.21) ki-sikil saĝ-ĝa2 e3 ki garadin9 mu-ak
135. (A5.22) gi-dub-ba kug NE šu bi2-du8-a
136. (A5.23) dub mul dug3-ga bi2-ĝal2-la-a
137. (A5.24) ad im-da-gi4-a
138. (A5.25) nin9-ĝu10 dnisaba ga-nam me-am3
139. (A6.1) e2-a du3-ba mul kug-ba
140. (A6.2) gu3 ma-ra-a-de2
141. (A6.3) 2(MAN)-kam-ma ur-saĝ-am3 a2 mu-gur8
142. (A6.4) le-um za-gin3 šu bi2-du8-a
143. (A6.5) dnin-dub-kam e2-a ĝiš-ḫur-ba im-mi-sig10-sig10-ge
144. (A6.6) igi-zu-še3 dusu kug gub-ba u3-šub kug si sa2-a
145. (A6.7) šeg12 nam tar-ra u3-šub-ba ĝal2-la
146. (A6.8) šeg12 zid e2-ninnu ga-nam me-am3
147. (A6.9) ildag2 zid-da igi-zu gub-ba
148. (A6.10) ti-gid2mušen-lu2 a ud mi-ni-ib2-zal-a-eše2
149. (A6.11) e2 du3-de3 igi-zu u3 dug3-ga nu-ši-ku4-ku4
150. (A6.12) anšedur9 a2 zid-da lugal-zak-ke4 ki ma-ra-ḫur-ḫur-a-eše2
151. (A6.13) ze2-me e2-ninnu-/uš2?\ ni-is-ku-gin7 ki im-ši-ḫur-e
152. (A6.14) na ga-de5 na de5-ĝu10 ḫe2-dab5
153. (A6.15) ĝir2-suki e2 saĝ ki lagaški-še3 ĝiri3-zu ki i3-bi2-us2
154. (A6.16) e2 niĝ2-gur11-<ra>-za kišib u3-mi-kur2 ĝiš u3-ma-ta-ĝar
155. (A6.17) lugal-zu ĝišgigir u3-mu-DI
156. (A6.18) anšedur9ur3 u3-ši-la2
157. (A6.19) ĝišgigir-bi kug NE za-gin3-na šu u3-ma-ni-tag
158. (A6.20) ti mar-uru5-a ud-gin7 i3-e3
159. (A6.21) an-kar2 a2 nam-ur-saĝ-ka mi2 u3-ma-ni-dug4
160. (A6.22) šu-nir ki 2-ni u3-mu-na-dim2
161. (A6.23) mu-zu u3-mi-sar
162. (A6.24) balaĝ ki 2-ni ušumgal kalam-ma
163. (A6.25) ĝiš-gu3-di mu tuku niĝ2 ad gi4-gi4-ni
164. (A6.26) ur-saĝ niĝ2-ba-e ki 2-ra
165. (A7.1) lugal-zu en dnin-ĝir2-su2
166. (A7.2) e2-ninnu anzud2mušen babbar2-ra u3-mu-na-da-kur9-re
167. (A7.3) tur dug4-ga-zu maḫ dug4-ga-am3 šu ba-a-ši-ib2-ti
168. (A7.4) en-na šag4 an-gin7 su3-ra2-ni
169. (A7.5) dnin-ĝir2-su2 dumu den-lil2-la2-ka za-ra ma-ra-ḫuĝ-ĝe26-e
170. (A7.6) ĝiš-ḫur e2-a-na ma-ra-pad3-pad3-de3
171. (A7.7) ur-saĝ-e me-ni gal-gal-la-am3
172. (A7.8) šu ma-ra-ni-ib2-mu2-mu2
173. (A7.9) sipad zid gu3-de2-a
174. (A7.10) gal mu-zu gal i3-ga-tum2-mu
175. (A7.11) inim dnanše-e mu-na-dug4-ga-aš
176. (A7.12) saĝ sig ba-ši-ĝar
177. (A7.13) e2 niĝ2-gur11-ra-na kišib bi2-kur2
178. (A7.14) ĝiš im-ma-ta-ĝar
179. (A7.15) gu3-de2-a ĝiš-a mu-DU.DU
180. (A7.16) ĝiš-e mi2 im-e
181. (A7.17) ĝišmeš3-e saĝ bi2-sag9
182. (A7.18) ĝišḫa-lu-ub2-ba tun3 bi2-bar
183. (A7.19) ĝišgigir za-gin3-še3 mu-na-a-DI
184. (A7.20) dur9ur3-bi piriĝ-kaš4-e-pad3-da
185. (A7.21) im-ma-ši-la2-la2
186. (A7.22) šu-nir ki 2-ni mu-na-dim2
187. (A7.23) mu-ni im-mi-sar
188. (A7.24) balaĝ ki 2-e ušumgal kalam-ma
189. (A7.25) ĝiš-gu3-di mu tuku niĝ2 ad gi4-gi4-ni
190. (A7.26) ur-saĝ niĝ2-ba-e ki 2-ra
191. (A7.27) lugal-ni en dnin-ĝir2-su-ra
192. (A7.28) e2-ninnu anzud2mušen babbar2-ra
193. (A7.29) mu-na-da-ku4-ku4
194. (A7.30) e2-a ḫul2-la i3-na-ni-kur9
195. (A8.1) gu3-de2-a 3 e2-ninnu-ta zalag-ga nam-ta-e3
196. (A8.2) 2(MIN)-kam-ma e2-še3 ud-u3-de3 bi2-dib
197. (A8.3) ĝi6-ĝi6 ba-an-dib
198. (A8.4) du6-du6 mu-si-ig inim-ĝar mu-gi4
199. (A8.5) aḫ dug4-ga ĝiri2-ta im-ta-ĝar
200. (A8.6) šu-ga-lam ki ḫuš ki di kud-de3
201. (A8.7) ki dnin-ĝir2-su-ke4 kur-kur-ra igi mi-ni-ĝal2-la-še3
202. (A8.8) udu-i3 gukkal maš2 niga ensi2-ke4
203. (A8.9) fešgar ĝiš nu-zu kuš-ba mi-ni-durunx(KU.KU)
204. (A8.10) liĝiš u2 sikil kur-ra-kam izi-a bi2-si-si
205. (A8.11) šim erin ir-sim diĝir-ra-kam
206. (A8.12) i3-bi2-bi mu-du3
207. (A8.13) lugal-<ni>-ir 3-ĝa2 mu-na-zig3 šudu3 mu-na-ša4
208. (A8.14) ub-šu-kin-na-ka mu-na-ĝen giri17 šu mu-na-ĝal2
209. (A8.15) lugal-ĝu10 dnin-ĝir2-su2 en a ḫuš gi4-a
210. (A8.16) en zid a kur gal-e ri-a
211. (A8.17) šul ka tar <gaba-ri> nu-tuku
212. (A8.18) dnin-ĝir2-su e2-zu ma-ra-du3-e
213. (A8.19) ĝiškim-ĝu10 nu-ĝu10
214. (A8.20) ur-saĝ niĝ2-du7-e gu3 ba-a-de2
215. (A8.21) dumu den-lil2-la2 en dnin-ĝir2-su
216. (A8.22) šag4-bi nu-mu-u3-da-zu
217. (A8.23) šag4 ab-gin7 zi-zi-zu
218. (A8.24) iz-zi8-gin7 ĝa2-ĝa2-zu
219. (A8.25) a e3-a-gin7 gu3 nun di-zu
220. (A8.26) a-ma-ru12-gin7 u2-uru18 gul-gul-zu
221. (A8.27) ud-gin7 ki-bal-še3 du7-du7-zu
222. (A9.1) lugal-ĝu10 šag4-zu a e3-a u2 nu-la2-zu
223. (A9.2) ur-saĝ šag4 an-gin7 su3-ra2-zu
224. (A9.3) dumu den-lil2-la2 en dnin-ĝir2-su
225. (A9.4) ĝe26 a-na mu-u3-da-zu
226. (A9.5) 2(MIN)-kam-ma-še3 nu2-a-ra nu2-a-ra
227. (A9.6) saĝ-ĝa2 mu-na-gub ul4 mu-tag-tag-e
228. (A9.7) ma-du3-na ma-du3-na
229. (A9.8) ensi2 e2-ĝu10 ma-du3-na
230. (A9.9) gu3-de2-a e2-ĝu10 du3-da ĝiškim-bi ga-ra-ab-šum2
231. (A9.10) ĝarza-ĝa2 mul-an kug-ba gu3 ga-mu-ra-a-de2
232. (A9.11) e2-ĝu10 e2-ninnu an-ne2 ki ĝar-ra
233. (A9.12) me-bi me gal-gal me-me-a dirig-ga
234. (A9.13) e2 lugal-bi igi sud il2-il2
235. (A9.14) anzud2mušen-gin7 šeg12 gi4-a-bi-še3
236. (A9.15) an im-ši-dub2-dub2
237. (A9.16) me-lem4 ḫuš-bi an-ne2 im-us2
238. (A9.17) e2-ĝa2 ni2 gal-bi kur-kur-ra mu-ri
239. (A9.18) mu-bi-e an-zag-ta kur-kur-re gu2 im-ma-si-si
240. (A9.19) ma2-gan me-luḫ-ḫa kur-bi-ta im-ma-ta-ed3-de3
241. (A9.20) ĝe26 dnin-ĝir2-su a ḫuš gi4-a
242. (A9.21) ur-saĝ gal ki den-lil2-la2-ka
243. (A9.22) en gaba-ri nu-tuku
244. (A9.23) e2-ĝu10 e2-ninnu ĝe26-en kur-ra ab-dirig
245. (A9.24) tukul-ĝu10 šar2-ur3 kur šu-še3 ĝar-ĝar
246. (A9.25) igi ḫuš-a-ĝu10 kur-re nu-um-il2
247. (A9.26) a2(source: DA) bad-a-ĝu10 lu2 la-ba-ta-e3
248. (A10.1) a ugu4-ĝu10 nam gal ki 2-da
249. (A10.2) lugal a-ma-ru den-lil2-la2
250. (A10.3) igi ḫuš-a-ni kur-da nu-il2
251. (A10.4) dnin-ĝir2-su ur-saĝ den-lil2-la2
252. (A10.5) mu-še3 mu-sa4
253. (A10.6) me 50-a zag mi-ni-keše2
254. (A10.7) ĝišbanšur mu-il2
255. (A10.8) šu-luḫ si bi2-sa2
256. (A10.9) šu si sa2-a-ĝu10 an kug-ge u3-a ba-zig3-ge
257. (A10.10) niĝ2 šu-ĝa2 dug3-ga-am3
258. (A10.11) a ugu4-ĝu10 dug3-ga-bi mu-gu7
259. (A10.12) an lugal diĝir-re-ne-ke4
260. (A10.13) dnin-ĝir2-su lugal išib an-na
261. (A10.14) mu-še3 mu-sa4
262. (A10.15) ti-ra-aš2 abzu-gin7
263. (A10.16) nam-nun-na ki im-ma-ni-ĝar
264. (A10.17) šag4-bi-a /itid\-da ud-sakar-ra
265. (A10.18) me gal-gal ezen an-na-ĝu10 šu gal ma-du7-du7
266. (A10.19) e2-ḫuš ki ḫuš-ĝu10
267. (A10.20) muš-ḫuš-gin7 ki sumur-ra bi2-du3
268. (A10.21) ki-bal-ĝa2 nu-mi-ib2-dug4-ga
269. (A10.22) ud šag4-ĝu10 um-ši-mi-ri2-a
270. (A10.23) muš ze2 guru5-a-gin7 ma-a-u3-ku-e
271. (A10.24) e2-babbar2 ki a2 2-ĝa2-ĝa2
272. (A10.25) ki dutu-gin7 dalla-a-ĝa2
273. (A10.26) ki-ba dištaran-gin7 di iri-ĝa2 si ba-ni-ib2-sa2-e
274. (A10.27) e2-ba-gara2 ki banšur-ra-ĝu10
275. (A10.28) diĝir gal-gal lagaški-a-ke4-ne
276. (A10.29) gu2 ma-si-si-ne
277. (A11.1) e2-ĝu10 e2 saĝ-kal kur-kur-ra
278. (A11.2) a2 zid-da lagaški
279. (A11.3) anzud2mušen an-šar2-ra šeg12 gi4-gi4
280. (A11.4) e2-ninnu e2 nam-lugal-ĝu10
281. (A11.5) sipad zid gu3-de2-a
282. (A11.6) ud šu zid ma-ši-tum3-da
283. (A11.7) an-še3 tum9 duru5-e gu3 ba-de2
284. (A11.8) an-ta ḫe2-ĝal2 ḫa-mu-ra-ta-du
285. (A11.9) kalam-e ḫe2-ĝal2-la šu ḫe2-a-da-peš-e
286. (A11.10) e2-ĝa2 ki ĝar-ra-bi-da
287. (A11.11) ḫe2-ĝal2 ḫe2-da-ĝen
288. (A11.12) gana2 gal-gal-e šu ma-ra-ab-il2-e
289. (A11.13) eg2 pa5 gu2-bi ma-ra-ab-zi-zi
290. (A11.14) du6-du6 ki a nu-ed3-da
291. (A11.15) a ma-ra-ed3-de3
292. (A11.16) ki-en-gi-ra2 i3 dirig mu-da-de2
293. (A11.17) siki dirig mu-da-la2
294. (A11.18) ud temen-ĝu10 ma-sig9-ge4-na
295. (A11.19) e2-ĝu10 ud šu zid ma-ši-tum3-da
296. (A11.20) ḫur-saĝ ki tum9mir tuš-a-še3
297. (A11.21) ĝiri3-ĝu10 ki i3-bi2-us2
298. (A11.22) nitaḫ a2 dirig-ke4 tum9mir-e ḫur-saĝ ki sikil-ta
299. (A11.23) tum9 si ma-ra-ab-sa2-e
300. (A11.24) kalam-e zi-šag4-ĝal2 u3-ma-šum2
301. (A11.25) lu2 dili lu2 2(MIN)-da kiĝ2 mu-da-ak-ke4
302. (A11.26) ĝi6-a-na i3-ti ma-ra-e3-e3
303. (A11.27) e-bar7-gana2 ud-«ma»-dam ma-ra-e3-e3
304. (A12.1) e2 ud-de3 ma-ra-du3-e
305. (A12.2) ĝi6-e ma-ra-ab-mu2-mu2
306. (A12.3) sig-ta ĝišḫa-lu-ub2
307. (A12.4) ĝišNE-ḫa-an! mu-ra-ta-ed3-de3
308. (A12.5) igi-nim-ta ĝišerin ĝiššu-ur2-men2 ĝišza-ba-lum ni2-bi-a ma-ra-an-tum3
309. (A12.6) kur ĝišesi-a-ka
310. (A12.7) ĝišesi ma-ra-ni-tum3
311. (A12.8) kur na-ka na gal ḫur-saĝ-ĝa2
312. (A12.9) lagab-ba ma-ra-kud-e
313. (A12.10) ud-bi-a a2-zu izi bi2-tag
314. (A12.11) ĝiškim-ĝu10 ḫa-mu-u3-zu
315. (A12.12) gu3-de2-a i3-zig3 u3-sa-ga-am3
316. (A12.13) i3-ḫa-luḫ ma-mu-dam
317. (A12.14) inim dug4-ga dnin-ĝir2-su-ka-še3
318. (A12.15) saĝ sig ba-ši-ĝar
319. (A12.16) maš2 babbar2-ra šu mu-gid2-de3
320. (A12.17) maš2-a šu i3-gid2 maš2-a-ni i3-sag9
321. (A12.18) gu3-de2-a šag4 dnin-ĝir2-su-ka
322. (A12.19) ud-dam mu-na-e3
323. (A12.20) gal mu-zu gal i3-ga-tum2-mu
324. (A12.21) ensi2-ke4 iri-na lu2 dili-gin7
325. (A12.22) na de5 ba-ni-ĝar
326. (A12.23) ki lagaški-e dumu ama dili-a-gin7 šag4 mu-na-AŠ-e
327. (A12.24) ĝiš-šu mu-du8 ĝiš-ĝiri2 mu-zig3
328. (A12.25) u2-guru5 mu-ĝar inim dug4-ga bi2-gi4
329. (A12.26) šer7-da e2-ba im-ma-an-gi4
330. (A13.1) u3-sa-an bar-us2-sa eme i3-du8
331. (A13.2) siki udu gan-na-kam šu-a mi-ni-ĝar-ĝar
332. (A13.3) ama-a dumu-da gu3 nu-ma-da-de2
333. (A13.4) dumu-u3 ama-ni-ra ka du3-a
334. (A13.5) nu-ma-na-dug4
335. (A13.6) arad2 a2 ĝiš tag tuku-ra
336. (A13.7) lugal-a-ni saĝ nu-ma-da-dub2
337. (A13.8) geme2 lu2 nam-ra2 ḫul mu-na-ak
338. (A13.9) nin-a-ni igi-na niĝ2 nu-mu-na-ni-ra
339. (A13.10) ensi2 e2-ninnu du3-ra
340. (A13.11) gu3-de2-a-ar inim-ĝar-bi lu2-u3 nu-ma-ni-ĝar
341. (A13.12) ensi2-ke4 iri mu-kug
342. (A13.13) izi im-ma-ta-la2
343. (A13.14) uzug3-ga ni2-ĝal2 lu2-GI.AN
344. (A13.15) iri-ta ba-ta-e3
345. (A13.16) pisaĝ u3-šub-ba-še3 maš2 ba-ši-nu2
346. (A13.17) šeg12 maš2-e bi2-pad3
347. (A13.18) ka-al-bi-še3 igi zid ba-ši-bar
348. (A13.19) sipad mu pad3-da dnanše-ke4 nam-nun-na i3-ĝar
349. (A13.20) pisaĝ u3-šub-ba-<ka> ĝiš bi2-ḫur-ra-ni
350. (A13.21) ka-al nam-nun-na mu-ni-ĝar-ra-ni
351. (A13.22) anzud2mušen šu-nir lugal-la-na-kam
352. (A13.23) urin-še3 bi2-mul
353. (A13.24) u5 bur3 eše3-še3 iri mu-na-kug-ge
354. (A13.25) u5 mu-na-sikil-e
355. (A13.26) liĝiš u2 sikil kur-ra-kam izi-a bi2-si-si
356. (A13.27) šim erin ir-sim diĝir-ra-kam i3-bi2-bi mu-du3
357. (A13.28) ud sizkur2-ra mu-na-a-ĝal2
358. (A13.29) ĝi6 šudu3-de3 mu-na-zal-e
359. (A14.1) da-[nun-na] ki lagaški
360. (A14.2) e2 dnin-ĝir2-su-ka du3-de3
361. (A14.3) gu3-de2-a sizkur2 ra2-/zu\-[(X)]
362. (A14.4) mu-da-an-šu4-šu4-ge-eš2
363. (A14.5) sipad zid gu3-de2-a ḫul2-la-gin7
364. (A14.6) im-ma-na-ni-ib2-ĝar
365. (A14.7) ud-ba ensi2-ke4 kalam-ma-na zig3-ga ba-ni-ĝar
366. (A14.8) ma-da gu2-saĝ šar2-šar2-ra-na
367. (A14.9) gu2-edin-na dnin-ĝir2-su-ka-ka
368. (A14.10) zig3-ga ba-ni-ĝar
369. (A14.11) iri du3-a a2-dam ĝar-ra-na
370. (A14.12) gu2-ĝiš-bar-ra dnanše-ka
371. (A14.13) zig3-ga ba-ni-ĝar
372. (A14.14) gud ḫuš zig3-ga gaba gi4 nu-tuku
373. (A14.15) ĝišerin babbar2-ra lugal-bi-ir dab6-ba
374. (A14.16) im-ru-a dnin-ĝir2-su-ka-ka
375. (A14.17) zig3-ga mu-na-ĝal2
376. (A14.18) šu-nir maḫ-bi lugal-kur-dub2 saĝ-bi-a mu-gub
377. (A14.19) peš10-ĝal2 gaba-ĝal2 a-ta e3-a
378. (A14.20) id2 maḫ a dirig ḫe2-ĝal2-bi barag2-barag2
379. (A14.21) im-ru-a dnanše-ka
380. (A14.22) zig3-ga mu-na-ĝal2
381. (A14.23) u5 kug šu-nir dnanše-kam saĝ-bi-a mu-gub
382. (A14.24) gu maš2-anše edin-na la2-a
383. (A14.25) ni-is-ku erin2 mu tuku erin2 dutu ki 2
384. (A14.26) im-ru-a dinana-ka zig3-ga mu-na-ĝal2
385. (A14.27) aš-me šu-nir dinana-kam saĝ-bi-a mu-gub
386. (A14.28) e2 dnin-ĝir2-su-ka du3-de3
3 lines missing
390. (A15.4) [] TE []
391. (A15.5) šu /NI\ [] /\ [] ĝar
392. (A15.6) elam elam-ta mu-na-ĝen
393. (A15.7) šušin ki šušin-ta mu-na-ĝen
394. (A15.8) ma2-gan me-luḫ-ḫa kur-bi-ta gu2 ĝiš mu-na-ab-ĝal2
395. (A15.9) e2 dnin-ĝir2-su-ka du3-de3
396. (A15.10) gu3-de2-a iri-ni ĝir2-suki-še3 gu2 mu-na-si-si
397. (A15.11) dnin-zag-ga-da a2 mu-da-aĝ2
398. (A15.12) urud-da-ni še maḫ de6-a-gin7
399. (A15.13) gu3-de2-a lu2 e2 du3-a-ra
400. (A15.14) mu-na-ab-us2-e
401. (A15.15) dnin-sikil-a-da a2 mu-da-aĝ2
402. (A15.16) ĝišḫa-lu-ub2 gal-gal ĝišesi ĝiš-ab-ba-bi
403. (A15.17) ensi2 e2-ninnu du3-ra
404. (A15.18) mu-na-ab-us2-e
405. (A15.19) kur ĝišerin-na lu2 nu-ku4-ku4-da
406. (A15.20) gu3-de2-a en dnin-ĝir2-su-ke4
407. (A15.21) ĝiri2 mu-na-ni-ĝar
408. (A15.22) ĝišerin-bi tun3 gal-e im-mi-kud
409. (A15.23) šar2-ur3 a2 zid-da lagaški-a
410. (A15.24) tukul a-ma-ru lugal-la-na-še3
411. (A15.25) tun3 im-ma-bar
412. (A15.26) muš-maḫ-am3 a-e im-dirig-ga-am3
413. (A15.27) ḫur-saĝ ĝišerin-<na-ta> ad ĝišerin-na
414. (A15.28) ḫur-saĝ ĝiššu-ur2-men2-ta
415. (A15.29) ad ĝiššu-ur2-men2
416. (A15.30) ḫur-saĝ ĝišza-ba-lum-ma-ta
417. (A15.31) ad ĝišza-ba-lum
418. (A15.32) ĝišu3-<suḫ5> gal-gal ĝištu-lu-bu-um
419. (A15.33) ĝiše-ra-num2
420. (A15.34) ad gal-gal-bi dirig-dirig-ga-bi
421. (A15.35) kar maḫ kan4-sur-ra-ke4
422. (A16.1) [gu3-de2-a en dnin-ĝir2-su-ra]
423. (A16.2) [im-ma-na-us2]
424. (A16.3) [kur na lu2 nu-ku4-ku4-da]
425. (A16.4) [gu3-de2-a] en [dnin-ĝir2]-su-[ke4]
426. (A16.5) ĝiri2 mu-[na-ni-ĝar]
427. (A16.6) na gal-gal-bi lagab-ba mi-ni-de6
428. (A16.7) ma2 ḫa-u3-na ma2 na-lu-a
429. (A16.8) esir2 a-ba-al esir2 igi-esir2 im-babbar2-ra
430. (A16.9) ḫur-saĝ ma2-ad-ga-ta
431. (A16.10) niĝ2-gur11 ma2 še gana2 de6-a-gin7
432. (A16.11) gu3-de2-a en dnin-ĝir2-su-ra
433. (A16.12) im-ma-na-us2
434. (A16.13) ensi2 e2-ninnu du3-ra
435. (A16.14) niĝ2 gal-gal-e šu mu-na-ab-il2
436. (A16.15) ḫur-saĝ urud-ke4 ki-maš-ta
437. (A16.16) ni2-bi mu-na-ab-pad3
438. (A16.17) urud-bi gi-dirig-ba mu-ni-ba-al
439. (A16.18) lu2 e2 lugal-na du3-dam
440. (A16.19) ensi2-ra kug-sig17 kur-bi-ta
441. (A16.20) saḫar-ba mu-na-tum3
442. (A16.21) gu3-de2-a kug NE-a kur-bi-ta mu-na-ta-ed3-de3
443. (A16.22) gug gi-rin-e me-luḫ-ḫa-ta
444. (A16.23) šu mu-na-peš-e
445. (A16.24) kur nu11-ta nu11 mu-na-ta-ed3-de3
446. (A16.25) sipad-de3 e2 kug-ga mu-du3-e
447. (A16.26) kug-dim2 im-da-tuš
448. (A16.27) e2-ninnu za mu-du3-e zadim im-da-tuš
449. (A16.28) urud nagga-a mu-du3-e
450. (A16.29) saĝĝa-simug dnin-tur5 kalam-ma-ke4
451. (A16.30) igi-ni-še3 si im-<mi>-sa2
452. (A16.31) na4šu-min-e ud-da-am3 šeg12 mu-na-ab-gi4
453. (A16.32) na4esi na4 šu-ke4
454. (A17.1) [] 2(MIN) [] peš
455. (A17.2) [] X TI [X] X NAM [X] /a\ maḫ [X] /DU\-a-gin7
456. (A17.3) [] /MU\ [] X
1 line missing
458. (A17.5) /UD\ [] MU []
459. (A17.6) ĝi25-/ĝi25\ mu-na-gid2
460. (A17.7) nam e2 du3-da lugal-la-na-še3
461. (A17.8) u3 ĝi6 an-na nu-um-ku4-ku4
462. (A17.9) u3 an-ba-ra saĝ nu-mi-ib2-du3-e
463. (A17.10) igi zid bar-ra dnanše-kam
464. (A17.11) den-lil2-la2 lu2 šag4-ga-na-kam
465. (A17.12) ensi2 [X] X X [(X)] dnin-ĝir2-su-ka-kam
466. (A17.13) gu3-de2-a unu6 maḫ-a tud-da
467. (A17.14) dĝa2-tum3-dug3-ga-kam
468. (A17.15) dnisaba-ke4 e2 ĝeštug2-ke4
469. (A17.16) ĝal2 mu-na-taka4
470. (A17.17) e2-a den-ki-ke4 ĝiš-ḫur-bi si mu-na-sa2
471. (A17.18) e2 me-lem4-bi an-ne2 us2-sa
472. (A17.19) me-bi an ki-da gu2 la2-a
473. (A17.20) lugal-bi en igi ḫuš il2-il2
474. (A17.21) ur-saĝ dnin-ĝir2-su me3 gal-zu-bi
475. (A17.22) e2-ninnu anzud2mušen babbar2-še3
476. (A17.23) gu3-de2-a sig-ta ba-ši-ĝen
477. (A17.24) nim-še3 u5 bi2-dug4
478. (A17.25) nim-ta ba-ši-ĝen sig-še3 u5 bi2-dug4
479. (A17.26) iku zid-dam 2 i3-ĝar-ĝar
480. (A17.27) a2-ba ĝiš bi2-ĝar ni2-te-ni mu-zu
481. (A17.28) ḫul2-la-gin7 im-ma-na-ni-ib2-ĝar
482. (A17.29) u3-te-am3 e2 libir-ra-aš2 ra2-zu-a ba-ĝen
483. (A18.1) gu3-de2-a barag ĝir2-nun-na-ta
484. (A18.2) šag4 mu-na-ḫuĝ-ĝe26-e
485. (A18.3) ud im-zal a mu-tu17
486. (A18.4) me-te-ni mu-gi
487. (A18.5) dutu ḫe2-ĝal2 mu-na-ta-e3
488. (A18.6) gu3-de2-a [2(MIN)]-kam-aš2 iri-kug-[ta] im-ma-[ta]-/e3\
489. (A18.7) gud du7 maš2 du7-re6 ĝiš bi2-tag
490. (A18.8) e2-e im-ma-ĝen
491. (A18.9) giri17 šu im-ma-ĝal2
492. (A18.10) dusu kug ĝišu3-šub zid nam tar-ra
493. (A18.11) e2-/ninnu\ /mu\-[…]
494. (A18.12) X [] mu-la2 saĝ il2 mu-ĝen
495. (A18.13) dlugal-kur-dub2 igi-še3 mu-na-ĝen
496. (A18.14) dig-alim-ke4 ĝiri2 mu-na-ĝa2-ĝa2
497. (A18.15) dnin-ĝiš-zid-da diĝir-ra-ni
498. (A18.16) šu mu-da-ĝal2-ĝal2
499. (A18.17) pisaĝ u3-šub-ka a sa-ga i3-ak
500. (A18.18) ensi2-ra a-dab6 si-im a2-la2 mu-na-du12-am3
501. (A18.19) ka-al šeg12-bi saĝ im-mi-du8
502. (A18.20) lal3 i3-nun i3-ḫe-nun-na al im-ma-ni-tag
503. (A18.21) šembulugx(ŠIM×UḪ3) ŠIM×PI ĝiš ḫi-a
504. (A18.22) aḫ-še3 im-mi-ak
505. (A18.23) dusu kug mu-il2 u3-šub-e im-ma-gub
506. (A18.24) gu3-de2-a im u3-šub-ba i3-ĝar
507. (A18.25) niĝ2-du7 pa bi2-e3
508. (A18.26) e2-a šeg12-bi pa e3 mu-ni-ĝa2-ĝa2
509. (A18.27) kur-kur-re i3 mu-da-sud-e
510. (A18.28) erin mu-da-sud-e
511. (A19.1) iri-ni ki lagaški-e si11-le2-a
512. (A19.2) ud mu-di3-ni-ib2-zal-e
513. (A19.3) u3-šub mu-dub2 šeg12 ḫad2-de3 ba-šub
514. (A19.4) ka-al im aga3-ri2-na-ba-še3
515. (A19.5) igi zid ba-ši-bar
516. (A19.6) ŠIM×PI ḫa-šu-ur2 šembulugx(ŠIM×UḪ3)-a
517. (A19.7) saĝ im-<ma>-ni-du8
518. (A19.8) šeg12 u3-šub-ba mi-ni-ĝar-ra-ni
519. (A19.9) dutu im-da-ḫul2
520. (A19.10) aga3-ri2 id2 maḫ-gin7 zig3-ga-na
521. (A19.11) lugal den-/ki\ /nam?\ mu-[X]-/tar\
522. (A19.12) [X] mu-/ĝar u3-šub-ba?\ e2-a i3-kur9
523. (A19.13) pisaĝ u3-šub-ba-ta šeg12 ba-ta-il2
524. (A19.14) men kug an-ne2 il2-la
525. (A19.15) šeg12 mu-il2 3-ĝa2-na mu-ĝen
526. (A19.16) erin2 kug dutu saĝ bal-e-dam
527. (A19.17) šeg12-e e2-še3 saĝ il2-la-bi
528. (A19.18) ab2 dnanna tur3-ba erin2-erin2-dam
529. (A19.19) šeg12 mu-ĝar e2-a mu-kux(DU)-kux(DU)
530. (A19.20) e2-a ĝiš-ḫur-bi im-ĝa2-ĝa2
531. (A19.21) dnisaba šag4 šid zu-am3
532. (A19.22) lu2-tur gibil-bi e2 du3-gin7
533. (A19.23) igi-ni u3 dug3-ga nu-ši-ku4-ku4
534. (A19.24) ab2 amar-bi-še3 igi ĝal2-la-gin7
535. (A19.25) e2-še3 te-te-ma im-ši-ĝen
536. (A19.26) lu2 ninda tur ka-a gub-ba-gin7
537. (A19.27) du-du-e nu-ši-kuš2-u3
538. (A19.28) šag4 lugal-na ud-dam mu-<na>-e3
539. (A20.1) gu3-de2-a-ar inim dnin-ĝir2-su-ka urin-am3 mu-du3
540. (A20.2) šag4 gu3 di e2 du3-da-ka-na
541. (A20.3) inim-ĝar sag9-ga-a lu2 ma-a-ĝar
542. (A20.4) ḫul2-la-gin7 im-ma-na-ni-ib2-ĝar
543. (A20.5) maš-a šu i3-gid2 maš-a-ni i3-sag9
544. (A20.6) a-MIR-e še ba-šum2 igi-bi si ib2-sa2
545. (A20.7) gu3-de2-a saĝ-še3 nu2
546. (A20.8) mu-nu2 inim mu-na-ta-e3
547. (A20.9) e2 lugal-na-ka du3-bi
548. (A20.10) e2-ninnu an ki-ta bad-bi
549. (A20.11) /igi\-a mu-na-a-ĝal2
550. (A20.12) ḫul2-la-gin7 im-[ma-na]-/ni-ib2-ĝar\
551. (A20.13) gu mu-ba-ra me šu im-du7-du7
552. (A20.14) uz-ga kug-ge 3 mu-ĝa2-ĝa2
553. (A20.15) e2-a den-ki-ke4 temen mu-sig9-ge
554. (A20.16) dnanše dumu eridugki-ke4 eš-bar kiĝ2-ĝe26 mi2 ba-ni-dug4
555. (A20.17) ama lagaški kug dĝa2-tum3-dug3-ke4
556. (A20.18) šeg12-bi kur-ku4-a mu-ni-tud
557. (A20.19) dba-u2 nin dumu-saĝ an-na-ke4
558. (A20.20) i3 šim erin-na ba-ni-sud
559. (A20.21) e2-e en ba-gub la-gal ba-gub
560. (A20.22) me-e šu si im-ma-sa2
561. (A20.23) da-nun-na u3 di-de3 im-ma-šu4-šu4-ge-eš2
562. (A20.24) gu3-de2-a lu2 e2 du3-a-ke4
563. (A20.25) e2-a dusu-bi men kug saĝ-ĝa2 mu-ni-ĝal2
564. (A20.26) mu-ĝar a2-ĝar ki im-mi-tag
565. (A20.27) sa2 mu-sig10 šeg12-ga gu bi2-dub2
566. (A21.1) e2-a sa2 2-nam nam-mi-sig10
567. (A21.2) gu dugba saĝ ĝal2-la-am3
568. (A21.3) e2-a sa2 3-am3 nam-mi-sig10
569. (A21.4) anzud2mušen amar-a a2 pag-am3
570. (A21.5) e2-a sa2 4 nam(source: RI)-mi-sig10
571. (A21.6) nemurx(PIRIĜ.TUR) piriĝ ḫuš-a gu2-da la2-am3
572. (A21.7) e2-a sa2 5-am3 nam-mi-sig10
573. (A21.8) an nisig su-lim il2-la-am3
574. (A21.9) e2-a sa2 6-am3 nam-mi-sig10
575. (A21.10) ud sa2-dug4-ga ḫi-li guru3-am3
576. (A21.11) e2-a sa2 7 nam-mi-sig10
577. (A21.12) e2-ninnu i3-ti ud zal-la kalam si-am3
578. (A21.13) ĝiš-kan4-na im-ĝa2-ĝa2-ne
579. (A21.14) an nisig-ga men il2-la-am3
580. (A21.15) ĝiš-kan4-na-ta ba-ta-tuš
581. (A21.16) e2 maḫ an-da gu2 la2-am3
582. (A21.17) e2 mu-du3 ĝiš-e im-ma-šub
583. (A21.18) ambar dnanna saĝ keše2 den-ki-ka-kam
584. (A21.19) e2 ḫur-saĝ-gin7 im-mu2-mu2-ne
585. (A21.20) dugud-gin7 an-šag4-ge im-mi-ni-ib2-dirig-dirig-ne
586. (A21.21) gud-gin7 si im-mi-ib2-il2-il2-ne
587. (A21.22) ĝiš-gana2 abzu-gin7 kur-kur-ra saĝ ba-ni-ib2-il2-ne
588. (A21.23) e2-e ḫur-saĝ-gin7 an ki-a saĝ an-še3 mi-ni-ib2-il2
589. (A21.24) erin duru5 ki u2 rib mu2-a-am3
590. (A21.25) e2-ninnu šeg12 ki-en-gi-ra2-ka ḫi-li mu-ni-ib2-du8-du8
591. (A21.26) e2-a ĝiš im-ĝa2-ĝa2-ne
592. (A21.27) ušum abzu teš2-ba ed2-de3-dam
593. (A21.28) KA an-na im-mi-ib2-u3-u3-dam
594. (A22.1) muš-maḫ ḫur-saĝ-ĝa2 nam ak-am3
595. (A22.2) e2 gi guru5-bi muš kur-ra teš2-ba nu2-am3
596. (A22.3) sa-tu-/bi\ erin duru5 ḫa-/šu\-ur2-ra šu ḫe2-tag-ga-am3
597. (A22.4) aga3 erin igi u6 di-bi-a erin babbar2 im-ĝa2-ĝa2-ne
598. (A22.5) šim zid i3-ḫe-nun-ka mi2 ba-ni-ib2-e-ne
599. (A22.6) e2 im-du8-a-bi ḫe-nun abzu šu tag-ga-am3
600. (A22.7) A.ĜAR.KA-bi im-ši-ib2-suru5-ne
601. (A22.8) 3 e2-ninnu šu E2×BAD? an-na-ka ĝar-ĝar-a-am3
602. (A22.9) ensi2-ke4 e2 mu-du3 mu-mu2
603. (A22.10) kur gal-gin7 mu-mu2
604. (A22.11) temen abzu-bi dim gal-gal ki-a mi-ni-sig9-sig9
605. (A22.12) den-ki-da e2-an-gur4-ra-ka
606. (A22.13) šag4 mu-di3-ni-ib2-kuš2-u3
607. (A22.14) temen an-na ur-saĝ-am3 e2-e im-mi-dab6
608. (A22.15) ki-a-naĝ diĝir-re-<ne>-ka a im-na8-na8-a
609. (A22.16) e2-ninnu dim gal mu-gen6
610. (A22.17) abgal2-bi mu-du3
611. (A22.18) iri-na ĝišasal2 dug3-bi mu-du3
612. (A22.19) ĝissu-bi mu-la2
613. (A22.20) ĝiššar2-ur3-bi urin gal-gin7 lagaški-da im-da-sig9
614. (A22.21) šu-ga-lam ki ḫuš-ba im-mi-ni-ĝar
615. (A22.22) su zig3 bi2-du8-du8 barag ĝir2-nun-na ki di kud-ba
616. (A22.23) u2-a lagaški gud gal-gin7 a2 ba-il2-il2
617. (A22.24) na gal-gal lagab-ba mi-ni-de6-a
618. (A23.1) mu 1-a mu-de6 mu 1-a mu-ak
619. (A23.2) ud 2 ud 3 nu-ma-da-ab-zal
620. (A23.3) a2 ud-da 1-ta mu-du3
621. (A23.4) ud 7-kam-ma-ka e2-e im-mi-dab6
622. (A23.5) na da-bi kun-še3 mu-nu2
623. (A23.6) /šim\-še3 mu-dim2-dim2
624. (A23.7) e2-a mi-ni-šu4-šu4
625. (A23.8) na kisal maḫ-a <im>-mi-du3-a-na
626. (A23.9) na-du3-a lugal kisal si
627. (A23.10) gu3-de2-a en dnin-ĝir2-su-ke4
628. (A23.11) ĝir2-nun-ta mu-zu
629. (A23.12) na-ba mu-še3 im-ma-sa4
630. (A23.13) na kan4-sur-ra bi2-du3-a
631. (A23.14) lugal a-ma-ru den-lil2-la2
632. (A23.15) gaba-šu-ĝar nu-tuku
633. (A23.16) gu3-de2-a en dnin-ĝir2-su-ke4
634. (A23.17) igi zid mu-ši-bar
635. (A23.18) na-ba mu-še3 im-ma-sa4
636. (A23.19) na igi ud e3-a-<ka> bi2-du3-a
637. (A23.20) lugal ud gu3 di den-lil2-la2
638. (A23.21) en gaba-ri nu-tuku
639. (A23.22) gu3-de2-a en dnin-ĝir2-su-ke4
640. (A23.23) šag4 kug-ge bi2-pad3
641. (A23.24) na-ba mu-še3 im-ma-sa4
642. (A23.25) na igi šu-ga-lam-ma-ka bi2-du3-a
643. (A23.26) lugal mu-ni-še3 kur tuku2-tuku2-e
644. (A23.27) gu3-de2-a en dnin-ĝir2-su-ke4
645. (A23.28) gu-za-ni mu-gen6
646. (A23.29) na-ba mu-še3 im-ma-sa4
647. (A23.30) na igi e2-uru18-ga-ka bi2-du3-a
648. (A24.1) gu3-de2-a en dnin-ĝir2-su-ke4
649. (A24.2) nam dug3 mu-ni-tar
650. (A24.3) na-ba mu-še3 im-ma-sa4
651. (A24.4) na a-ga dba-u2-ka bi2-du3-a
652. (A24.5) e2-ninnu igi an-na-ke4 zu
653. (A24.6) dba-u2 zi-šag4-ĝal2 gu3-de2-a
654. (A24.7) na-ba mu-še3 im-ma-sa4
655. (A24.8) e2 lugal-na zid-de3-eš2 mu-du3
656. (A24.9) sipad zid gu3-de2-a an ki im-da-mu2
657. (A24.10) ud-sakar gibil-gin7 men bi2-il2
658. (A24.11) mu-bi kur-šag4-še3
659. (A24.12) pa bi2-e3
660. (A24.13) gu3-de2-a e2 dnin-ĝir2-su-ka
661. (A24.14) dutu-gin7 dugud-ta ba-ta-e3
662. (A24.15) ḫur-saĝ za-gin3-na-gin7 mu-mu2
663. (A24.16) ḫur-saĝ nu11 babbar2-ra-gin7
664. (A24.17) u6 di-de3 ba-gub
665. (A24.18) dub-la2-bi am-gin7 mu-šu4-šu4
666. (A24.19) ušum-bi ur-maḫ-gin7 šu-ba bi2-nu2-nu2
667. (A24.20) gi-gun4-bi ab-zu-gin7 ki sikil-e bi2-mu2
668. (A24.21) urin-bi taraḫ kug abzu-gin7
669. (A24.22) si ba-mul-mul
670. (A24.23) ud-sakar gibil an-na gub-ba-gin7
671. (A24.24) gu3-de2-a e2 dnin-ĝir2-su-ka
672. (A24.25) u6 di-de3 ba-gub
673. (A24.26) e2-a dub-la2-bi šu4-šu4-ga-bi
674. (A24.27) la-ḫa-ma abzu-da šu4-ga-am3
675. (A25.1) e2 ĝiš ĝar-ra-bi a-ĝi6 ambar maḫ muš a sig-ga-am3
676. (A25.2) e2 KA gid2-da-bi
677. (A25.3) an bar-bar-ra ni2-ĝal2-la-am3
678. (A25.4) e2 e2-dul4-la-bi nu11 an-šag4-ge dirig-ga-am3
679. (A25.5) kan4 ki lugal kur9-bi-ta
680. (A25.6) ḫu-ri2-in am-še3 igi il2-il2-dam
681. (A25.7) ĝišti kan4-e us2-sa-bi
682. (A25.8) tirx(NIR)-an-na an-ne2 us2-sa-am3
683. (A25.9) ĝiš-kan4 an-na-bi e2-ninnu ud gu3-ba gu3 di teš2-ba gub-ba-am3
684. (A25.10) sig7-igi-bi ni2 il2-il2-a-bi
685. (A25.11) igi u6 di diĝir-re-ne-kam
686. (A25.12) e2-a barag babbar2 mu-ru-gu2-ni
687. (A25.13) ḫur-saĝ za-gin3-na an ki-a ki ḫe2-us2-sa-am3
688. (A25.14) kiĝ2-sig17 unu6 gal mu-ĝa2-ĝa2-ne
689. (A25.15) bur kug-sig17 lal3 ĝeštin de2-a
690. (A25.16) an-ne2 šu4-ga-am3
691. (A25.17) e2-nu2-da mu-du3-ne
692. (A25.18) kur šar2-da meš3 kug abzu-a
693. (A25.19) gurun7 il2-la-am3
694. (A25.20) mu-du3 šu im-ta-ĝar-ra-ta
695. (A25.21) šag4 diĝir-re-ne gu2-bi gi4-a-am3
696. (A25.22) sipad zid gu3-de2-a gal mu-zu
697. (A25.23) gal i3-ga-tum2-mu
698. (A25.24) a-ga tukul la2 kan4 me3-ba
699. (A25.25) ur-saĝ šeg9-saĝ-6 saĝ-ar-bi
700. (A25.26) im-ma-ab-dab5-be2
701. (A25.27) igi iriki-še3 ki ni2 guru3-ba
702. (A25.28) muš(source: ur)-saĝ-7-am3 im-ma-ab-dab5-e
703. (A26.1) šu-ga-lam kan4 me-lem4-ba
704. (A26.2) ušum ĝišnimbar-bi im-ma-ab-dab5-be2
705. (A26.3) igi ud e3 ki nam tar-re-ba
706. (A26.4) šu-nir dutu saĝ-alim-ma
707. (A26.5) im-ma-da-sig9-ge
708. (A26.6) kan4-sur-ra igi u6 di-ba
709. (A26.7) ur-maḫ ni2 diĝir-re-ne-kam
710. (A26.8) im-ma-ab-dab5-e
711. (A26.9) tar-sir2-sir2 ki a2 2-ba
712. (A26.10) ku-li-an-na urud-bi
713. (A26.11) im-ma-ab-dab5-e
714. (A26.12) a-ga dba-u2 ki šag4 kuš2-ba
715. (A26.13) ma2-gi4-lum gud-alim-bi-da
716. (A26.14) im-ma-ab-dab5-e
717. (A26.15) ur-saĝ ug5-ga i3-me-ša-ke4-eš2
718. (A26.16) ka-bi ki a naĝ-še3 mu-ĝar
719. (A26.17) mu-bi mu-ru diĝir-re-ne-ka
720. (A26.18) gu3-de2-a ensi2 lagaški-ke4
721. (A26.19) pa e3 ba-ni-a
722. (A26.20) ig ĝišerin-na e2-a šu4-ga-bi
723. (A26.21) diškur an-ta gu3 nun di-da-am3
724. (A26.22) e2-ninnu saĝ-kul-bi idim
725. (A26.23) ĝišnu-kušu4-bi ur-maḫ
726. (A26.24) si-ĝar-bi-ta muš-šag4-tur3 muš-ḫuš
727. (A26.25) am-še3 eme ed2-de3
728. (A26.26) ga-du ig-e u5 us2-sa-bi
729. (A26.27) ug nemurx(PIRIĜ.TUR) tur-tur šu-ba du2-ru-na-am3
730. (A26.28) e2-a gag ĝiš-ur3 kug mu-sig9-ge4-ne
731. (A26.29) ušum lu2-še3 šu ib2-ĝar-ra-am3
732. (A26.30) ig-ba 2 kug im-suru5-ne
733. (A27.1) dniraḫ kug abzu dar-a-am3
734. (A27.2) e2-sa-la2-a-bi keš3ki arattaki na de5-ga-am3
735. (A27.3) e2-sa-du8-a-bi piriĝ ḫuš-am3
736. (A27.4) kalam-ma igi mi-ni-ib2-ĝal2
737. (A27.5) dili du igi-bi nu-ma-dib-be2
738. (A27.6) e2-ninnu ni2-bi kur-kur-ra
739. (A27.7) tug2-gin7 im-dul4
740. (A27.8) e2 kug NE-a an-ne2 ki ĝar-ra
741. (A27.9) šembi2-zid-da šu tag dug4-ga
742. (A27.10) še-er-zid an-na-ka i3-ti-gin7 e3-a
743. (A27.11) e2 igi-bi kur gal ki us2-sa
744. (A27.12) šag4-bi nam-šub šir3 ḫa-mun
745. (A27.13) bar-bi an e2 maḫ ḫe2-ĝal2-la zig3-ga
746. (A27.14) gu2-en bar-ra-bi
747. (A27.15) ki di kud da-nun-ke4-ne
748. (A27.16) a-lal3-bi-ta inim šudu3-da
749. (A27.17) šukur2-bi-da ḫe2-ĝal2 diĝir-re-ne-kam
750. (A27.18) urin e2-da sig9-sig9-ga-bi
751. (A27.19) anzud2mušen kur šubax(MUŠ)-a a2(source: DA) ḫe2-ba9-ra2-am3
752. (A27.20) e2-ninnu im-bi im ḫa-mun
753. (A27.21) id2edin-ta ed3-da
754. (A27.22) lugal-bi en dnin-ĝir2-su-ke4
755. (A27.23) šag4 kug-ge bi2-pad3
756. (A27.24) šembi2-zid-gin7 saĝ-ĝa2 mi-ni-ib2-de2
757. (A28.1) gu3-de2-a še-er-zid an-na-ka
758. (A28.2) šu tag ba-ni-dug4
759. (A28.3) e2 gud-bi-ta
760. (A28.4) i3 kur9 ga kur9
761. (A28.5) udun-maḫ-bi-ta
762. (A28.6) gug2 gal si gal
763. (A28.7) ĝiri2-PA-na-bi
764. (A28.8) gud gu7 udu gu7
765. (A28.9) e2 ki šukur2-bi uz-ga 3 ĝa2-ĝa2
766. (A28.10) ne-saĝ-bi
767. (A28.11) kur ĝeštin biz-biz-ze2
768. (A28.12) e2-lunga3-bi-ta
769. (A28.13) id2idigna a-u3-ba ĝal2-la-am3
770. (A28.14) e2 niĝ2-gur11-<ra>-bi-a za kug nagga
771. (A28.15) e2 ĝišgigir-ra-bi
772. (A28.16) kur ki-a gub-ba
773. (A28.17) a-ga balaĝ-a-bi gud gu3 nun di
774. (A28.18) kisal-bi šudu3 kug si-im a2-la2
775. (A28.19) kun na4 e2-a nu2-a-bi
776. (A28.20) ḫur-saĝ ul nun-ne2-eš2 nu2-am3
777. (A28.21) kun an-na ur3-še3 da-a-bi
778. (A28.22) nu11 kur-še3 igi sud il2-dam
779. (A28.23) ĝiškiri6 gig2 edin e2-še3 sig9-ga-bi
780. (A28.24) kur ĝeštin biz-biz-ze2 ki ni2 <me>-lem4-e mu2-am3
781. (A29.1) na 7 e2-e dab6-ba-bi
782. (A29.2) niĝ2 lugal-bi-da šag4 kuš2-kuš2-dam
783. (A29.3) e2-ninda-ki-sig10-bi
784. (A29.4) niĝ2 sikil abzu na de5-ga-am3
785. (A29.5) šim na4 e2-a šu4-ga-bi
786. (A29.6) e2 gudug kug a nu-silig5-ge-dam
787. (A29.7) bad3-si an-na
788. (A29.8) tum12mušen du2-ru-na-bi
789. (A29.9) eridugki nam ḪI A du3-X-am3
790. (A29.10) e2-ninnu tum12mušen-e ni2 bi2-ne
791. (A29.11) an-dul3 pa gal-gal ĝissu dug3-ga-kam
792. (A29.12) simmušen mušen-e šeg12 mu-gi4-gi4
793. (A29.13) e2-kur den-lil2-la2 ezen ĝal2-la-am3
794. (A29.14) e2-a ni2 gal-bi
795. (A29.15) kalam-ma mu-ri
796. (A29.16) ka tar-ra-bi
797. (A29.17) kur-re ba-ti
798. (A29.18) e2-ninnu ni2-bi kur-kur-ra tug2-gin7 im-dul4
799. (A30.1) e2 lugal-bi ḫi-li-a i3-du3
800. (A30.2) dnin-ĝiš-zid-da-ke4
801. (A30.3) ki gal-la bi2-du3
802. (A30.4) gu3-de2-a ensi2 lagaški-ke4
803. (A30.5) temen-bi mu-sig9
804. (A30.6) e2 dutu-gin7 kalam-ma e3-a
805. (A30.7) gud gal-gin7 saḫar bar-ra gub-ba
806. (A30.8) i3-ti giri17-zal-gin7
807. (A30.9) unken-ne2 si-a
808. (A30.10) ḫur-saĝ sig7-ga-gin7
809. (A30.11) ḫi-li guru3-a
810. (A30.12) u6 di-de3 gub-ba
811. (A30.13) e2-ninnu ki-bi gi4-a-ba
812. (A30.14) dnin-ĝir2-su za3-mi2
813. (A30.15) e2 dnin-ĝir2-su-ka du3-a
814. (A30.16) za3-mi2 mu-ru-bi-im
815. (B1.1) e2 dim gal kalam-ma
816. (B1.2) an ki-da mu2-a
817. (B1.3) e2-ninnu šeg12 zid den-lil2-e nam dug3-ga tar-ra
818. (B1.4) ḫur-saĝ nisig-ga u6-e gub-ba
819. (B1.5) kur-kur-ta e3-a
820. (B1.6) e2 kur gal-am3 an-ne2 im-us2
821. (B1.7) dutu-am3 an-šag4-ge im-si
822. (B1.8) e2-ninnu anzud2mušen babbar2-ra-am3
823. (B1.9) kur-ra dub3 mi-ni-ib2-bad
824. (B1.10) 3 ba-ĝar-ĝar kalam ba-gub-gub
825. (B1.11) da-nun-na u6 di-de3 im-ma-šu4-šu4-ge-eš2
826. (B1.12) ensi2 kug-zu-am3 inim zu-am3
827. (B1.13) nam-diĝir-re giri17 ki im-mi-su2-su2
828. (B1.14) sizkur2 ra-zu-a niĝ2-dun-a ki im-mi-us2-us2
829. (B1.15) ensi2-ke4 diĝir iri-na-ke4 ra2-zu im-ma-be2
830. (B1.16) e2 ninda gu7-bi ninda ba-an-taḫ
831. (B1.17) kiĝ2-sigx(SAR) udu dab5-bi udu im-ma-a-taḫ
832. (B1.18) bur ḫe2-ĝal2 an-šag4 NE-ša-gin7
833. (B1.19) gaba-ba si bi2-sa2
834. (B1.20) <d>a-nun-na-ke4-<ne>-er mu-ne-gub
835. (B1.21) šudu3 mu-ne-ša4 da-nun-na-da-nun-na u6 di-de3 ki lagaški
836. (B2.1) dlamma kur-kur-ra dug4-ga-ne-ne a maḫ e3-a
837. (B2.2) lu2 u2 la2 ba-ab-la2-e
838. (B2.3) šul zid lu2 igi mu-ši-bar-ra-ne
839. (B2.4) nam-til3 mu-na-sud
840. (B2.5) sipad-me e2 mu-du3 lugal-ĝu10 e2-a-na mi-ni-ku4-ku4
841. (B2.6) <d>a-nun-na bar-ĝu10-a šudu3 ḫe2-mi-sa4-za
842. (B2.7) sipad zid gu3-de2-a
843. (B2.8) gal mu-zu gal i3-ga-tum2-mu
844. (B2.9) u2-dug4 sag9-<ga>-ni igi-še3 mu-na-ĝen
845. (B2.10) dlamma sag9-ga-ni eĝer-ni im-us2
846. (B2.11) lugal-ni e2 ul e2 libir ki-tuš-na-še3
847. (B2.12) gu3-de2-a en dnin-ĝir2-su-ra
848. (B2.13) niĝ2-ba na-gu-ul-gu-ul
849. (B2.14) en-ra e2-ninnu-a mu-na-kurx(DU)
850. (B2.15) šudu3 mu-na-ša4
851. (B2.16) lugal-ĝu10 dnin-ĝir2-su
852. (B2.17) en a ḫuš gi4-a
853. (B2.18) en dug4-ga-ni saĝ-biš e3-a
854. (B2.19) dumu-nitaḫ2 den-lil2-la2 ur-saĝ ma-a-dug4
855. (B2.20) šu zid ma-ra-a-ĝar
856. (B2.21) dnin-ĝir2-su e2-zu mu-ra-du3
857. (B2.22) ḫul2-/la ḫa-ni\-ku4-ku4
858. (B2.23) dba-u2-ĝu10 a2-mi-zu ma-ra-ĝar
859. (B3.1) ki-tuš dug3-ga-ma-ni-ib2
860. (B3.2) gu3 de2-a-ni ĝiš ba-tuku-am3
861. (B3.3) ur-saĝ-e sizkur2 ra2-<zu>-ni
862. (B3.4) gu3-de2-a-aš2 en dnin-ĝir2-su-ke4 šu ba-ši-ti
863. (B3.5) mu ĝen-na-am3 itid til-la-am3
864. (B3.6) mu gibil an-na im-ma-gub
865. (B3.7) itid e2-ba ba-a-kur9
866. (B3.8) itid-bi ud 3-am3 im-ta-zal
867. (B3.9) dnin-ĝir2-su eridugki-ta ĝen-am3
868. (B3.10) i3-ti sa-sa im-e3
869. (B3.11) kalam-ma ud mu-ĝal2 e2-ninnu dsuen u3-tud-da
870. (B3.12) saĝ im-ma-da-ab-sa2
871. (B3.13) gu3-de2-a gug za-gin3 mi-ni-uḫ
872. (B3.14) ub-da im-mi-dug4
873. (B3.15) i3-ḫe-nun-na ki ba-ni-sud
874. (B3.16) MUŠ DA MA lu2 kiĝ2 ak-am3
875. (B3.17) e2-ta ba-ta-e3
876. (B3.18) lal3 i3-nun ĝeštin ga še-a
877. (B3.19) ĝiš-<ĝi6>-par4 ĝišpeš3 niĝ2-ĝen-na
878. (B3.20) ga saĝ-ba dim2-ma
879. (B3.21) zu2-lum ĝišan ĝeštin tur-tur
880. (B3.22) niĝ2 izi nu-tag-ga
881. (B3.23) niĝ2-gu7 diĝir-re-ne-kam
882. (B3.24) lal3 i3-nun-na kiĝ2 ba-ni-ak
883. (B3.25) ud diĝir zid-da du-da
884. (B3.26) gu3-de2-a ud /ten\-ta
885. (B3.27) kiĝ2-sigx(SAR)-ge bi2-dib
886. (B4.1) e2-e dasar-ri šu si ba-sa2
887. (B4.2) dnin-ma-da-ke4 na de5 mi-ni-ĝar
888. (B4.3) lugal den-ki-ke4 eš-bar kiĝ2 ba-an-šum2
889. (B4.4) dnin-dub išib maḫ eridugki-ga14-ke4
890. (B4.5) na-izi ba-ni-sig9
891. (B4.6) nin ĝarza kal-la-ke4 dnanše šir3 kug dug4 zu e2-e ba-an-dug4
892. (B4.7) u8 gig2-ge umbin mi-ni-ib2-kiĝ2
893. (B4.8) im-ma-al an-na-ke4
894. (B4.9) ubur si ba-ni-ib2-sa2
895. (B4.10) ĝiššinig ĝišŠEG9.AN u3-tud-<da>-ta
896. (B4.11) e2-ninnu im-ta-sikil-e-ne
897. (B4.12) im-ta-dadag-ge-eš2
898. (B4.13) ensi2-ke4 iri-a dub3 bi2-ĝar
899. (B4.14) kalam-ma sig bi2-ĝar
900. (B4.15) du6-du6 mu-si-ig inim-ĝar mu-gi4
901. (B4.16) a-aḫ dug4-ga ĝiri2-ta ĝar-am3
902. (B4.17) iri-a ama lu2 tur5-ra-ke4
903. (B4.18) a silim ĝar-ra-am3 maš-anše niĝ2-zi-ĝal2 edin-na
904. (B4.19) teš2-bi-še3 gam-ma-am3
905. (B4.20) ur-maḫ piriĝ ušumgal edin-na-ka
906. (B4.21) u3 dub3 ĝar-ra-am3
907. (B4.22) ud sizkur2-re ĝi6 šudu3-de3
908. (B4.23) i3-ti /niĝ2\ ud-zal-la-ke4
909. (B4.24) lugal-bi mu-um-ĝe26-e
910. (B5.1) ur-saĝ dnin-ĝir2-su e2-a mi-NI-ku4-ku4
911. (B5.2) e2-a lugal-bi im-ma-ĝen
912. (B5.3) ḫu-ri2-in am-še3 igi il2-il2-dam
913. (B5.4) ur-saĝ e2-a-na ku4-ku4-da-ni
914. (B5.5) ud me3-še3 gu3 ĝa2ĝar-am3
915. (B5.6) dnin-ĝir2-su e2-na mu-kux(DU)-kux(DU)
916. (B5.7) 3 abzu ezen ĝal2-/la-am3\
917. (B5.8) lugal [e2]-/ni\-ta nam-ta-ĝen
918. (B5.9) dutu ki lagaš<ki>-e e3-am3
919. (B5.10) dba-u2 a2-mi-ni-še3 du-a-ni
920. (B5.11) munus zid e2-a-ni-še3 šu ĝa2-ĝa2-dam
921. (B5.12) a2-nu2-da-ka-na kur9-ra-ni
922. (B5.13) id2idigna a-u3-ba ĝa2ĝar-am3
923. (B5.14) da PI-na-ka tuš-a-ni
924. (B5.15) nin dumu an kug-ga ĝiškiri6 nisig-ga gurun il2-la-am3
925. (B5.16) ud e3-am3 nam tar-ra-am3
926. (B5.17) dba-/u2\ a2(source: DA)-mi-na kur9-ra-am3
927. (B5.18) ki lagaški ḫe2-ĝal2-la-am3
928. (B5.19) ud im-zal dutu lagaški-ke4 kalam-ma saĝ mi-ni-il2
929. (B5.20) gud-i3 udu-i3 e2-e bi2-dab5
930. (B5.21) bur an-na mu-gub tin mu-ni-/de2-de2\
931. (B5.22) da-nun-<na> ki lagaš(source: ŠIR.BUR)ki en dnin-ĝir2-su-da ki-bi mu-da-rin2-ne2-eš2-am3
932. (B5.23) e2-a nam-išib-ba šu mi-ni-du7
933. (B5.24) eš-bar kiĝ2 mi2 mi-ni-dug4
934. (B6.1) tin bur gal-la im-ma-de2
935. (B6.2) e2-ninnu UL /GAL\ UL DU gu2 im-ma-gur-re
936. (B6.3) 3 dnin-dub-ke4 šeg12 mu-gi4-gi4
937. (B6.4) ninda ud-da ga maš2-lulim-ma
938. (B6.5) ud ĝi6-e de6-a
939. (B6.6) nir-ĝal2 dumu ki 2 den-lil2-la2 ur-saĝ dnin-ĝir2-su
940. (B6.7) u3-a mi-ni-zi-zi
941. (B6.8) me gal-gal-la saĝ /mi-ni\-il2-e
942. (B6.9) AN /KA\ /mar\-za e2-a SA-ni
943. (B6.10) 3 e2-ninnu ki-us2 mu-ĝa2-ĝa2
944. (B6.11) zid-du-e šu si sa2-da
945. (B6.12) erim2-du-e gu2 ĝiš ĝa2-ĝa2-da
946. (B6.13) e2 gen6-ne2-da e2 dug3-ge-da
947. (B6.14) iri-ni 3 ĝir2-suki na de6 šum2-mu-da
948. (B6.15) ĝišgu-za nam tar-ra gub-da
949. (B6.16) ĝidru ud su3-ra2 šu-a ĝa2-ĝa2-da
950. (B6.17) sipad dnin-ĝir2-su-ke4 gu3 de2-a-ar
951. (B6.18) men nisig-ga-gin7 saĝ an-še3 il2-da
952. (B6.19) kuš la2 gada la2 saĝ-a mur10-a
953. (B6.20) kisal e2-ninnu-ka ki-gub pad3-de3-da
954. (B6.21) ig gal dim ĝir2-nun-na gal5-la2 gal ĝir2-suki
955. (B6.22) dig-alim dumu ki 2-ĝa2-ni
956. (B6.23) en dnin-ĝir2-su-ra me-ni-da mu-na-da-dib-e
957. (B6.24) e2 sikil-e-da šu4-luḫ ĝa2-ĝa2-da
958. (B6.25) šu kug a en-ra šum2-mu-da
959. (B6.26) kaš bur-ra de2-da tin dug-a de2-da
960. (B7.1) e2-lunga3 e2 a2 sikil-ba
961. (B7.2) u2-lu5-ši-e a pap-sir2-gin7
962. (B7.3) kun-ka3-an za-a-da
963. (B7.4) gud du7 maš2 du7 udu niga
964. (B7.5) ninda ud-da ga maš2-lulim-ma
965. (B7.6) ud ĝi6-e de6-a nir-ĝal2 dumu ki 2
966. (B7.7) den-lil2-la2 ur-saĝ dnin-ĝir2-su
967. (B7.8) gu7-a naĝ-a X-bi u3-a «MI» zi-zi-<da>
968. (B7.9) en šu4-luḫ dadag-ga dumu-saĝ e2-ninnu
969. (B7.10) dšul-šag4-ga dnin-ĝir2-su-ra
970. (B7.11) me-ni-da mu-na-da-dib(source: LU)-e
971. (B7.12) šita2 saĝ 7 šu du8-a-da
972. (B7.13) e2-en-kar2 kan4 me3-ka ig-bi ĝal2 da13-da13-<da>
973. (B7.14) eme ĝiri2 mi-tum ĝiš-a-ma-ru
974. (B7.15) mar6-ra-tum ĝiš-ḫur me3-bi
975. (B7.16) si sa2-sa2-a-da
976. (B7.17) kur gu2-erim2-ĝal2 den-lil2-la2-ka
977. (B7.18) a-gin7 ĝa2-ĝa2-da
978. (B7.19) ur-saĝ ĝiššar2-ur3 me3-a kur šu-še3 ĝar-ĝar
979. (B7.20) šagina gu2-tuku e2-ninnu
980. (B7.21) mušensur2-du3 ki-bal-a
981. (B7.22) dlugal-kur-dub2 šagina-ni
982. (B7.23) en dnin-ĝir2-su-ra me-ni-da mu-na-da-dib-e
983. (B7.24) mi-tum an-na-ke4 ud /ḫuš\-gin7
984. (B8.1) kur-še3 gu3 ĝar-ra-a
985. (B8.2) ĝiššar2-ur3 a-ma-ru me3
986. (B8.3) ĝiš-gaz ki-bal-a
987. (B8.4) en-ne2 ki-bal kur saĝ-ki-ni u3-ma-da-gid2-da
988. (B8.5) gu3 mi-ri2-a-ni u3-ma-ra
989. (B8.6) lipiš-bi u3-mu-ra2
990. (B8.7) en-na šagina 2-kam-ni
991. (B8.8) kur-šu-na-buru5mušen-am3
992. (B8.9) dumu den-lil2-la2-ra me-ni-da mu-na-da-dib-e
993. (B8.10) nam-šita ki lagaški
994. (B8.11) šu du8-a-da
995. (B8.12) sizkur2 ra2-zu-bi dug3-ga ĝa2-ĝa2-da
996. (B8.13) ur-saĝ eridugki-še3 du-a-ni
997. (B8.14) silim-ma dug3 di-da
998. (B8.15) dnin-ĝir2-su eridugki-ta du-ni
999. (B8.16) iri du3-a ĝišgu-za-bi gen6-na-<da>
1000. (B8.17) nam-til3 sipad zid
1001. (B8.18) gu3-de2-a-da
1002. (B8.19) giri17 šu ĝal2-la-da
1003. (B8.20) ad gi4-gi4-ni
1004. (B8.21) dlugal-si-sa2 en dnin-ĝir2-su-<ra>
1005. (B8.22) me-ni-da mu-na-da-dib-e
1006. (B8.23) tur dug4-ga-da
1007. (B8.24) maḫ dug4-ga-da
1008. (B8.25) inim si sa2-e zu2 keše2 ak-da
1009. (B8.26) erim2 dug4-/ga?\ [] X […]-/da\
1010. (B9.1) ur-saĝ barag kug-ga tuš-a-ra
1011. (B9.2) dnin-ĝir2-su-ra e2-ninnu-a inim-bi ku4-ku4-da
1012. (B9.3) dšakkan2 šeg9-bar sukkal e2-dug3-ga saĝ-an-ni
1013. (B9.4) en dnin-ĝir2-su-ra me-ni-da
1014. (B9.5) mu-na-da-dib-e
1015. (B9.6) a kug-ge-da naĝa sikil-e-da
1016. (B9.7) i3 bur babbar2-ra naĝa E2.NUN-na-da
1017. (B9.8) ĝiš-nu2 u2 za-gin3 ba-ra-ga-na
1018. (B9.9) u3 dug3 ku4-ku4-da
1019. (B9.10) e2-nu2 e2-dug3-ga-ni-a
1020. (B9.11) bar-ra ku4-ku4-da
1021. (B9.12) šag4-ga nu-e3-e3-da
1022. (B9.13) dkinda-zid lu2 e2-dug3-ga-kam
1023. (B9.14) en dnin-ĝir2-su-ra me-ni-da mu-na-da-dib-e
1024. (B9.15) ĝišgigir kug an mul-a erin2-na-da
1025. (B9.16) anšedur9ur3-bi piriĝ-kaš4-e-pad3-da
1026. (B9.17) anše-ba sig10-ga-da
1027. (B9.18) anše sig-a anše eridugki-ga14
1028. (B9.19) anšedur9-da E2 KA kur-kur kur9 di-da
1029. (B9.20) lugal-bi dnin-ĝir2-su ḫul2-la tum2-mu-da
1030. (B9.21) lu2 ug-gin7 šeg12 gi4-a
1031. (B9.22) mar-uru5-gin7 zig3-ga
1032. (B9.23) maškim da-ga d/nin-ĝir2\-su-ka
1033. (B10.1) den-šeg12-nun sipad anše-ka-ni
1034. (B10.2) en dnin-ĝir2-su-ra me-ni-da mu-na-da-dib-e
1035. (B10.3) i3 ḫi-a-da gara2(source: BI) ḫi-a-da
1036. (B10.4) ud5 kug ud5 ga naĝ maš2-lulim
1037. (B10.5) ama dnin-ĝir2-su-ka
1038. (B10.6) i3 ga-bi 3 e2-ninnu-a muš nu-tum2-da
1039. (B10.7) en-lulim sipad maš2-lulim en dnin-ĝir2-su-ra
1040. (B10.8) me-ni-da mu-na-da-dib-e
1041. (B10.9) ti-gi4 niĝ2 dug3-ge si sa2-a-da
1042. (B10.10) kisal e2-ninnu ḫul2-a si-a-da
1043. (B10.11) al-ĝar mi-ri2-tum niĝ2 e2-dug3-ga
1044. (B10.12) ur-saĝ ĝeštugtug2-a-ra
1045. (B10.13) dnin-ĝir2-su-ra e2-ninnu dug3-bi ĝa2-ĝa2-da
1046. (B10.14) nar ki 2-a-ni ušumgal kalam-ma
1047. (B10.15) en dnin-ĝir2-su-ra me-ni-da mu-na-da-dib-e
1048. (B10.16) šag4 ḫuĝ-ĝa2-da bar ḫuĝ-ĝa2-da
1049. (B10.17) igi er2 pad3-da er2 šex(SIG)-da
1050. (B10.18) šag4 a-nir-ta a-nir be4-da
1051. (B10.19) en-na šag4 ab-gin7 zig3-ga-ni
1052. (B10.20) id2buranunaki-gin7 luḫ-ḫa-ni
1053. (B10.21) a-ma-ru-gin7 sa-ga dug4-<ga>-ni
1054. (B10.22) kur gu2-erim2-ĝal2 den-lil2-la2-ka
1055. (B10.23) a-gin7 u3-mi-/ĝar šag4\ [] /gu2-bi gi4\-a-ni a sed6? su3-da
1056. (B11.1) balaĝ-ĝa2-ni lugal-igi-ḫuš-am3
1057. (B11.2) en dnin-ĝir2-su-ra me-ni-da mu-na-da-dib-e
1058. (B11.3) lukur ki ig-ni ḫe2-ĝal2 lu2 šar2
1059. (B11.4) dza-za-ru
1060. (B11.5) diškur-pa-e3
1061. (B11.6) <d>ur2-agrun-ta-e3-a
1062. (B11.7) dḫe2-ĝir2-nun-na
1063. (B11.8) dḫe2-šag4-ga
1064. (B11.9) dzu2-ur2-ĝu10
1065. (B11.10) dza-ar-ĝu10
1066. (B11.11) dumu maš 7 dba-u2-me
1067. (B11.12) ban3-da en dnin-ĝir2-su-ka-me
1068. (B11.13) nam-šita sag9-ga gu3-de2-a-a-da
1069. (B11.14) en dnin-ĝir2-su-ra mu-na-da-šu4-ge-eš2
1070. (B11.15) gana2 gal-gal-e šu il2-la-da
1071. (B11.16) eg2 pa4 lagaški-ke4
1072. (B11.17) gu2-bi zig3-ga-da
1073. (B11.18) edin lugal-bi-ir tum2
1074. (B11.19) gu2-edin-na-ka dezina2-ku3-su3 pa sikil-e
1075. (B11.20) absin3-na saĝ an-še3 il2-še3
1076. (B11.21) gana2 zid-bi gig ziz2 gu2-gu2 um-de6
1077. (B11.22) guru7-guru7 maš ki lagaški-ke4
1078. (B11.23) gu2 gur-gur-ra-da
1079. (B11.24) saĝ-tun3 den-lil2-la2 engar gu2-edin-na
1080. (B11.25) dĝiš-bar-e3 en dnin-ĝir2-su-ra
1081. (B11.26) me-ni-da mu-na-da-an-dib-be2
1082. (B12.1) ambar-bi ku6ḪI.SUḪUR ku6suḫur u3-de6
1083. (B12.2) ĝiš-gi /nisig\-ga-bi gi ḫa-bu3-ur2 u3-de6
1084. (B12.3) imin-šatam ra-/gaba\ gu2-edin-na-ke4
1085. (B12.4) dnin-ĝir2-su-ra e2-ninnu-a inim-bi ku4-ku4-da
1086. (B12.5) dlamma enkud-e gu2-edin-na
1087. (B12.6) en dnin-ĝir2-su-ra me-ni-da mu-na-da-dib-e
1088. (B12.7) edin ki dug3-ge na de5-ga-da
1089. (B12.8) gu2-edin-na edin dug3-ge
1090. (B12.9) na de5 šum2-ma-da
1091. (B12.10) mušen-bi [rin2]-rin2-na-da
1092. (B12.11) nunuz-bi e2-DI-a ĝal2-la-da
1093. (B12.12) ama-bi buluĝ3-e-da
1094. (B12.13) du8-du8 maš-anše lu-a-ba
1095. (B12.14) edin ki 2 dnin-ĝir2-su-ka-ke4
1096. (B12.15) niĝ2-kud nu-ak-da
1097. (B12.16) ddim-gal-abzu niĝir gu2-edin-na
1098. (B12.17) en dnin-ĝir2-su-ra me-ni-da
1099. (B12.18) mu-na-da-dib-be2
1100. (B12.19) iri du3-a-da ki-tuš ĝar-ra-da
1101. (B12.20) bad3 iri-kug-ga en-nu du3-a-da
1102. (B12.21) daga-us2 dag-ga-na-bi
1103. (B12.22) šita2 saĝ maḫ ĝišerin babbar2-ra
1104. (B12.23) e2-e dab6-ba-da
1105. (B12.24) dlugal-en-nu-iri-kug-ga-kam
1106. (B12.25) en dnin-ĝir2-su-ra me-ni-da mu-na-da-dib-e
1107. (B12.26) an kug-ge zid-de3-eš2 mu-ĝar
1108. (B13.1) den-lil2-e saĝ-ba gur bi2-dar
1109. (B13.2) dnin-ḫur-saĝ-ke4 igi zid ba-ši-bar
1110. (B13.3) d/en-ki\ lugal eridug/ki-ke4\ temen-bi /mu\-sig9
1111. (B13.4) en zid šag4 zalag-zalag-ga-ke4
1112. (B13.5) dsuen-e me-bi an ki-a im-mi-dirig-ga-am3
1113. (B13.6) dnin-ĝir2-su-ke4 3 numun i-a šag4-ge ba-ni-pad3
1114. (B13.7) ama dnanše šeg12 ki lagaški-ka
1115. (B13.8) mi2 zid ba-ni-in-dug4
1116. (B13.9) diĝir numun zid-zid-da-ke4
1117. (B13.10) e2 /mu\-du3 mu-/bi\ pa /bi2-e3\
1118. (B13.11) aĝrig kalag-[ga] dnanše-/ke4\
1119. (B13.12) sipad /gu2\-tuku dnin-ĝir2-su-ka-ke4
1120. (B13.13) gal /mu\-zu gal i3-/ga\-tum2-/mu\
1121. (B13.14) e2-e lu2 /e2\ du3-a-ke4
1122. (B13.15) gu3-de2-a ensi2
1123. (B13.16) lagaški-ke4
1124. (B13.17) saĝ im-rig7(source: PA.TUK.DU)-ge
1125. (B13.18) ĝišgigir kur mu-gam su zig3 guru3 ni2 gal u5-a
1126. (B13.19) anšedur9ur3-bi ud-gu3-dug3-dug3-ga
1127. (B13.20) anše-ba sig10-ga-da
1128. (B13.21) šita2 saĝ 7 tukul ḫuš me3
1129. (B13.22) tukul ub 2-e nu-il2 ĝiš-gaz me3
1130. (B13.23) mi-tum tukul nir3 saĝ piriĝ
1131. (B14.1) kur-da gaba nu-gi4
1132. (B14.2) ĝišeme(source: KA×ĜIR2) ĝiri2 šu-nir 10 lal 1
1133. (B14.3) a2 nam-ur-saĝ-ĝa2
1134. (B14.4) ĝišpan tir meš3-gin7 gu3 ĝar-ra-ni
1135. (B14.5) ti sumur me3-a nim-gin7 ĝir2-da-ni
1136. (B14.6) e2-mar-uru5 ug piriĝ muš-ḫuš-še3
1137. (B14.7) eme ed2-de3-da-ni
1138. (B14.8) a2 me3 me nam-lugal si-si-a-da
1139. (B14.9) ensi2 lu2 e2 du3-a-ke4
1140. (B14.10) gu3-de2-a ensi2
1141. (B14.11) lagaški-ke4
1142. (B14.12) saĝ im-mi-ib2-rig7-ge
1143. (B14.13) /urud\ nagga lagab za-gin3-na kug NE gug gi-rin me-luḫ-ḫa-da
1144. (B14.14) urudšen maḫ uruduri maḫ
1145. (B14.15) urud2-da kug urudbur kug an-ne2 tum2
1146. (B14.16) X IM X ḪU GA-ke4
1147. (B14.17) banšur kug an-na il2-la-da
1148. (B14.18) ki sa2-[dug4-ga] bi2-[gub]
1149. (B14.19) dnin-/ĝir2\-[su]-ke4 iri-ni
1150. (B14.20) lagaški-e /u2? X\ ki dug3 ba-šum2
1151. (B14.21) e2 ki-nu2-a ki ni2 te e2-a-ba
1152. (B14.22) nu2 mu-ni-gub
1153. (B14.23) kur-kur-re mušen-gin7 sila-ba dumu den-lil2-la2-da
1154. (B14.24) ni2 mu-da-ab-ten-ten
1155. (B14.25) id2-de3 a zal-le si-a-da
1156. (B14.26) ambar-ra ḪI.SUḪURku6 suḫurku6 ĝal2-la-da
1157. (B15.1) enkud ku3-ĝal2-bi zag-ba gub-ba-da
1158. (B15.2) a gal-gal-e še si-si-a-<da>
1159. (B15.3) guru7-du6 guru7-maš ki lagaški-ke4
1160. (B15.4) gu2 gur-gur-ra-da
1161. (B15.5) tur3 du3-a-da a-maš du3-a-da
1162. (B15.6) u8 zid-da sila4 /du3-du3\-a-da
1163. (B15.7) udu-nitaḫ2 u8 zid-bi šu ba-ba-ra-da
1164. (B15.8) ab2 zid-da amar gub-gub-ba-da
1165. (B15.9) šag4-ba gudninda2 gu3 nun-bi di-da
1166. (B15.10) gud-e šudul2-la si sa2-a-da
1167. (B15.11) engar gud-ra-bi zag-ba gub-ba-da
1168. (B15.12) anše niĝ2-tug2-bi il2-a-da
1169. (B15.13) a2-dab5 še si-bi eĝer-bi us2-sa-/da\
1170. (B15.14) dur9-e urudḫa-X maḫ la2-a-da
1171. (B15.15) e2-kin2-kin2 maḫ il2-la-da
1172. (B15.16) ĜA2 DA ĜA2 GADA+KID2.DU8 e2 geme2 tur d/nin-ĝir2-su\-[ka]-/ke4\
1173. (B15.17) [] /A\-gin7 [] a-a-da
1174. (B15.18) [] /GI\ EN ĝar-e si /sa2\-a-da
1175. (B15.19) kisal e2(source: SA)-ninnu-/ke4\ ḫul2-la si-a-da
1176. (B15.20) si-im-da a2-la2 balaĝ nam-nar šu du7-a
1177. (B15.21) balaĝ ki 2-ni ušumgal kalam-ma
1178. (B15.22) saĝ-ba ĝen-na-da
1179. (B15.23) ensi2 e2-ninnu mu-du3-a
1180. (B16.1) gu3-de2-a en dnin-ĝir2-su-ra
1181. (B16.2) mu-na-da-ku4-ku4 (source uses REC 144 here; everywhere else it uses REC 56)
1182. (B16.3) /e2\-e me gal-la /saĝ\ mi-ni-ib2-il2
1183. (B16.4) ni2 me-lem4-ma šu mi-ni-ib2-du7
1184. (B16.5) ma2-gur8-gin7 sumur3? im-[X]
1185. (B16.6) dim2-sa-bi im-ak
1186. (B16.7) lugal-bi barag ĝir2-nun-na-ka
1187. (B16.8) ur-saĝ dnin-ĝir2-su ud-de3-eš2 im-e3
1188. (B16.9) ĝišPU2 niĝ2 il2-la du2-ru-na-bi
1189. (B16.10) an sig7-ga su2-lim il2-la-am3
1190. (B16.11) šu-nir-bi saĝ-šu4-ga-bi
1191. (B16.12) dnin-ĝir2-su <su> zig3 mu-guru3-am3
1192. (B16.13) kuš la2 igi-bi-še3 si sa2-a-bi
1193. (B16.14) muš-gu3 sig7-ga a tu17-a-am3
1194. (B16.15) ĝišgigir za-gin3 ul il2-a-na
1195. (B16.16) lugal-bi ur-saĝ dnin-ĝir2-su /d\utu-am3 mu-gub
1196. (B16.17) gu-za gu2-en-na gub-ba-bi
1197. (B16.18) e2 kug an-na ul-la du2-ru-na-am3
1198. (B16.19) nu2-bi ki-nu2-a gub-ba-bi
1199. (B16.20) šilamx(TUR3) ki-nu2-ba dub3 ĝar-ra-am3
1200. (B17.1) bar kug u2 za-gin3 ba-ra-ga-ba
1201. (B17.2) ama dba-u2 en dnin-ĝir2-su-da
1202. (B17.3) ki-nu2 mu-da-ab-dug3-ge
1203. (B17.4) zabar gal-gal-e teš2 mu-gu7-e
1204. (B17.5) e2 zid-da /zag\-da /zabar\ kug-ge ne-/saĝ\
1205. (B17.6) mi-ni-ib2-šeĝ6-šeĝ6
1206. (B17.7) bur kug unu6 gal-la šu4-ga-bi
1207. (B17.8) buniĝ(SUG) maḫ ban3-da a nu-silig5-ge-dam
1208. (B17.9) 2-da-bi da-ba gub-ba-bi
1209. (B17.10) id2idigna id2buranunaki-bi-da
1210. (B17.11) ḫe2-ĝal2 tum2-tum2-am3
1211. (B17.12) niĝ2-du7 iri-na-ke4 pa bi2-e3
1212. (B17.13) gu3-de2-a e2-ninnu mu-du3
1213. (B17.14) me-bi šu bi2-du7
1214. (B17.15) e2-i3-gara2-ba i3 gara2 i3-kur9
1215. (B17.16) e2 kug AN.KA-ba ninda mu-ni-ĝar-ĝar
1216. (B17.17) ur5 mu-du8 šu-šu mu-luḫ(source: ĜAR)
1217. (B17.18) ud lugal-ni e2-a kur9-ra
1218. (B17.19) ud 7(IMIN)-ne-eš2
1219. (B17.20) geme2 nin-a-ni mu-da-sa2-am3
1220. (B17.21) arad2-de3 lugal-e zag mu-da-gub-am3
1221. (B18.1) iri-na u2-si19-ni zag-bi-a mu-da-a-nu2-am3
1222. (B18.2) eme niĝ2-ḫul-da inim ba-da-kur2
1223. (B18.3) niĝ2-erim2 e2-ba im-ma-an-/gi4\
1224. (B18.4) niĝ2-/gen6\-[na] d[nanše] d/nin\-[ĝir2-su]-/ka\-[še3]
1225. (B18.5) en3 [im]-/ma\-[ši-tar ]
1226. (B18.6) nu-/siki\ [lu2 niĝ2-tuku] nu-/mu\-[na-ĝar]
1227. (B18.7) nu-/mu\-[su] lu2 [a2-tuku] nu-na-[ĝar]
1228. (B18.8) e2 /ibila\ nu-[tuku]
1229. (B18.9) dumu-/munus\-[bi i3-bi]-lu-[ba mi-ni-kur9]
1230. (B18.10) ud niĝ2-si-[sa2] mu-na-/ta-e3\
1231. (B18.11) niĝ2-erim2 i3-dutu gu2-bi ĝiri3 bi2-us2
1232. (B18.12) iri-e dutu-gin7
1233. (B18.13) ki-ša-ra im-ma-ta-a-e3
1234. (B18.14) saĝ-ĝa2-ni-a gur im-mi-dar
1235. (B18.15) igi an kug-ga-ke4
1236. (B18.16) ne-te-ni bi2-zu
1237. (B18.17) gud-gin7 saĝ il2-la mu-ku4-ku4
1238. (B18.18) 3 e2-ninnu-a
1239. (B18.19) gud du7 maš2 du7-e ĝiš bi2-tag
1240. (B18.20) bur an-na mu-gub
1241. (B18.21) ten mu-ni-de2-de2
1242. (B18.22) ušumgal kalam-ma ti-gi4-a mu-gub
1243. (B19.1) a2-la2 ud-dam šeg12 mu-na-ab-gi4
1244. (B19.2) ensi2 zag-e3-a
1245. (B19.3) nam-mi-gub
1246. (B19.4) iri-ni u6 mu-e
1247. (B19.5) gu3-de2-a []
6 lines missing
1254. (B19.12) [ ḫe2]-ĝal2 [mu-na]-/ta\-[e3]
1255. (B19.13) ki še gu-[nu] mu-na-mu2-mu2
1256. (B19.14) ensi2-da lagaški-e ḫe2-ĝal2-la
1257. (B19.15) šu mu-da-peš-e
1258. (B19.16) ur-saĝ e2 gibil-na kur9-ra-am3
1259. (B19.17) en dnin-ĝir2-su-ra ĝišbun dug3 mu-na-ni-ib2-ĝal2
1260. (B19.18) an zag gal-la mu-na-tuš
1261. (B19.19) an-ra den-lil2 im-ma-ni-us2
1262. (B19.20) den-lil2-ra
1263. (B19.21) dnin-maḫ mu-ni-us2
12 lines missing
1276. (B20.13) [] /SUD\ []
1277. (B20.14) e2-/da\ lugal /im\-da-/ḫul2\
1278. (B20.15) šeg12 ninnu-ka /nam\ im-[mi-ib2]-tar-re
1279. (B20.16) /šeg12\ [e2-ninnu]
1280. (B20.17) nam dug3 ḫe2-tar
1281. (B20.18) šeg12 e2-ninnu nam ḫe2-tar
1282. (B20.19) nam dug3 ḫe2-tar
1283. (B20.20) e2 kur an-ne2 ki ĝar-ra
1284. (B20.21) me gal-la du3-a
16 lines missing
1301. (B21.17) /šeg12 e2\-[ninnu]-ka nam i3-mi-ib2-tar-re
1302. (B21.18) šeg12 nam ḫe2-tar
1303. (B21.19) šeg12 e2-ninnu nam dug3 ḫe2-tar
1304. (B21.20) e2 IM ne-mur šub ki! us2-[sa] an gu2 la2-a
1305. (B22.1) [] kug [] E []
14 lines missing
1320. (B22.16) […]-/a?\
1321. (B22.17) [] mu-zu-še3 tur3 ḫe2-em-ši-du3-du3
1322. (B22.18) a-maš ḫe2-em-ši-gibil4-gibil4
1323. (B22.19) 3 u2-sal-la ḫe2-ĝal2-<la ḫa-mu-da>-nu2
1324. (B22.20) ki-en-gi-re6 kur-kur-<re> igi-bi ḫa-mu-ši-ĝal2
1325. (B23.1) e2 anzud2mušen-zu an-ne2 ḫa-ra-[ab]-/il2\
11 lines missing
1337. (B23.13) [] X [] /GA\ [] me
1338. (B23.14) [] /NINA\ [X] du3-a
1339. (B23.15) [] du3 [] /PA?\
1340. (B23.16) [d]/gilgameš2\-da mu2-a
1341. (B23.17) ĝišgu-za gub-ba-bi lu2 nu-kur2-e
1342. (B23.18) diĝir-zu en dnin-ĝiš-zid-da dumu-KA an-na-kam
1343. (B23.19) diĝir-ama-zu dnin-sumun2-na ama gan numun zid-da
1344. (B23.20) numun-e ki 2-ĝa2-am3
1345. (B23.21) ab2 zid-de3 dumu(source: MUNUS) ba-tud-da-me
1346. (B23.22) meš3 zid ki lagaški-[a] e3-a
1347. (B24.1) dnin-ĝir2-su-ka-me
1348. (B24.2) sig-ta nim-še3 /mu\-zu ḫe2-ĝal2
1349. (B24.3) gu3-de2-a [dug4]-ga-za
1350. (B24.4) [X] BI TUG2 /lu2\ na-DU
1351. (B24.5) [] X KA ĝuruš [X] an-ne2 zu-me
1352. (B24.6) /ensi2 zid\ e2-e nam [dug3] tar-ra-me
1353. (B24.7) /gu3\-de2-a /dumu\ dnin-ĝiš-zid-da-ka
1354. (B24.8) /nam\-til3 /ḫa\-mu-ra-sud
1355. (B24.9) /e2\ kur gal-gin7 an-ne2 us2-sa
1356. (B24.10) ni2 me-lem4-bi kalam-ma ru-a
1357. (B24.11) an-ne2 den-lil2-e nam lagaški tar-ra
1358. (B24.12) dnin-ĝir2-su-ka nam-nir-ĝal2-ni
1359. (B24.13) kur-kur-re zu-a
1360. (B24.14) e2-ninnu an ki-da mu2-a
1361. (B24.15) dnin-ĝir2-su za3-mi2
1362. (B24.16) /e2\ dnin-ĝir2-su-/ka\ du3-a
1363. (B24.17) za3-mi2 eĝer-bi

Print sources

Edzard 1997, p. 68-101: translation, commentary, composite text

Falkenstein 1953, p. 137-182: translation

Hurowitz 1992, p. 33-57: commentary

Jacobsen 1987, p. 386-444: translation, commentary

Suter 1997: commentary, translation, score transliteration (A 20.24-21.12)

Suter 2000: commentary

Zólyomi 1999: commentary

Electronic sources

Krecher 1995a: composite text, translation

Krecher 1995b: composite text, translation

Krecher 1996: composite text

Cuneiform sources

Cylinder A (TCL 8)

Cylinder B (TCL 8)


Revision history

01.iii.1998-07.iv.1998: GZ, editor: standardisation
13.iv.1998-14.iv.1998: JAB, editor: proofreading
19.viii.2000: GC, editor: proofreading
12.x.2000: GZ, editor: SGML tagging
11.vii.1998: GZ, editor: web publication
12.vii.1998: GZ, editor: tagging revised
15.vii.1998: GZ, editor: tagging revised
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford