ETCSLtransliteration : c.2.2.3 ETCSL homepage

The lament for Sumer and Urim

1. ud šu bal ak-de3 ĝiš-ḫur ḫa-lam-e-de3 (Cited in OB catalogue from Nibru, at Philadelphia, 0.2.01, line 34; OB catalogue in the Louvre, 0.2.02, line 29; OB catalogue from Urim (U2), 0.2.04, line 45)
2. ud-de3 mar-uru5-gin7 teš2-bi i3-gu7-e
3. me ki-en-gi-ra šu bal ak-de3
4. bal sag9-ga e2-ba gi4-gi4-de3
5. uru2 gul-gul-lu-de3 e2 gul-gul-lu-de3
6. tur3 gul-gul-lu-de3 amaš tab-tab-be2-de3
7. gud-bi tur3-bi-a nu-gub-bu-de3
8. udu-bi amaš-bi-a nu-daĝal-e-de3
9. id2-bi a mun4-na tum3-u3-de3
10. gan2-ne2 zid-de3 u2KI.KAL mu2-mu2-de3
11. edin-e u2-a-nir mu2-mu2-de3
12. ama dumu-ni-ir ki nu-kiĝ2-kiĝ2-de3
13. ad-da a dam-ĝu10 nu-di-de3
14. dam tur ur2-ra nu-ḫul2-le-de3
15. dumu tur dub3-ba nu-buluĝ3-ĝe26-e-de3
16. emeda(UM.ME)-e u5-a nu-di-de3
17. nam-lugal-la ki-tuš-bi kur2-ru-de3
18. eš-bar kiĝ2-e šu la2-e-de3
19. nam-lugal kalam-ma kar-kar-re-de3
20. igi-bi ki-šar2-ra ĝa2-ĝa2-de3
21. inim dug4-ga an den-lil2-la2-ta ĝiš-ḫur ḫa-lam-e-de3
22. ud an-ne2 kur-kur-ra saĝ-ki ba-da-an-gid2-da-ba
23. den-lil2-le igi-ni ki kur2-ra ba-an-ĝar-ra-a-ba
24. dnin-tur5-re niĝ2-dim2-dim2-ma-ni zag bi2-in-tag-ga-a-ba
25. den-ki-ke4 id2idigna id2buranun-na 2 bi2-in-bal-a-ba
26. dutu ḫar-ra-an kaskal-e nam ba-an-kud-da-a-ba
27. ki-en-gi-ra me-bi ḫa-lam-e-de3 ĝiš-ḫur-bi kur2-ru-de3
28. urim5ki-ma me nam-lugal-la bal-bi sud-su3-ud-de3
29. dumu nun-na e2-kiš-nu-ĝal2-la-na šu pe-el-la2 di-de3
30. dnanna 3 u8-gin7 lu-a-na igi-te-en-bi si-il-le-de3
31. urim5ki 3 nidba gal-gal-la nidba-bi kur2-ru-de3
32. 3-bi ki-tuš-ba nu-tuš-u3-de3 ki-erim2-e šum2-mu-de3
33. šimaškiki elamki lu2-kur2-ra ki-tuš-bi tuš-u3-de3
34. sipad-bi e2-gal-la ni2-te-na lu2-erim2-e dab5-be2-de3
35. di-bi2-dsuen kur elamki-ma-še3 ĝiš-bur2-ra tum2-u3-de3
36. iši za-buki gaba a-ab-ba-ka-ta zag an-ša4-anki-na-še3
37. simmušen e2-bi ba-ra-an-dal-a-gin7 iri-ni-še3 nu-gur-re-de3
38. id2idigna id2buranun-na gu2 tab 2-a-ba u2 ḫul mu2-mu2-de3
39. kaskal-la ĝiri3 nu-ĝa2-ĝa2-de3 ḫar-ra-an nu-kiĝ2-kiĝ2-de3
40. uru2 a2-dam ki ĝar-ĝar-ra-ba du6-du6-ra šid-de3
41. 3 saĝ gig2 lu-lu-a-ba ĝiš-ḫaš-e ak-de3
42. gan2-ne2 zid-de3 ĝišal nu-ru-gu2-de3 numun ki nu-tag-de3
43. e-el-lu šir3 gud sub2-sub2-ba edin-na nu-di-de3
44. e2tur3-ra i3 gara2 nu-ak-de3 šurum ki nu-tag-e-de3
45. sipad-de3 gi-šukur-ra amaš kug-ga šu nu-ni10-ni10-de3
46. i-lu-lam-ma dun5-dun5 dugšakir3-ra amaš-a nu-di-de3
47. edin-na maš2-anše tur-re-de3 niĝ2-zi-ĝal2 til-le-de3
48. niĝ2-ur2-4 dšakkan2-na-ke4 šurum ki nu-tag-ge-de3
49. ambar-ra šu ki-in-dar di-de3 numun nu-tuku-tuku-de3
50. ĝiš-gi gi saĝ ḫul mu2-mu2-de3 ḫab2-ba {til-e-de3} {(1 ms. has instead:) 2-u3-de3}
51. pu2-ĝiškiri6 u2 gibil-la2 nu-me-a ni2-ba šu2-šu2-de3
52. urim5ki am gal u3-na gub-ba ni2-bi-ta nir-ĝal2
53. iri numun i-i nam-en nam-lugal-la ki sikil-la du3-a
54. gud-gin7 saman ul4-la-bi šub-bu-de3 gu2 ki-še3 la2-e-de3
55. an den-lil2 den-ki {dnin-ḫur-saĝ-ĝa2-ke4} {(2 mss. have instead:) dnin-maḫ-bi} nam-bi ḫa-ba-an-tar-re-eš
56. nam-tar-ra-bi niĝ2 nu-kur2-ru-dam a-ba šu mi-ni-ib2-bal-e
57. inim dug4-ga an den-lil2-la2-kam saĝ a-ba-a mu-un-ĝa2-ĝa2
58. an-ne2 ki-en-gi ki-tuš-ba bi2-in-ḫu-luḫ 3-e ni2 bi2-in-te
59. den-lil2-le ud gig-ga mu-un-zal iri-a me bi2-ib-ĝar
60. dnin-tur5-re ama5 kalam-ma-ka ĝišig-šu-ur2 im-mi-in-de6
61. den-ki-ke4 id2idigna id2buranun-na a im-ma-da-an-keše2
62. dutu niĝ2-si-sa2 inim gen6-na ka-ta ba-da-an-kar
63. dinana-ke4 me3 šen-šen-na ki-bal-e ba-an-šum2
64. dnin-ĝir2-su-ke4 ki-en-gi ga-gin7 ur-e ba-an-de2
65. kalam-ma ga-ba-ra-ḫum im-ma-an-šub niĝ2 lu2 nu-zu-a
66. niĝ2 igi nu-ĝal2-la inim nu-ĝal2-la niĝ2 šu nu-teĝ3-ĝe26-dam
67. kur-kur-re ni2 te-a-bi-a šu suḫ3-a ba-ab-dug4
68. iriki diĝir-bi ba-da-gur sipad-bi ba-da-ḫa-lam
69. nam-lu2-ulu3 ni2 te-bi-a zi gig mu-un-pa-an-pa-an
70. ud-de3 šu-ne-ne ba-du3-du3 ud nu-mu-un-ne-gur-re
71. ud gi4-a mu-un-ne-tuku-am3 ud dur2-bi-še3 nu-ĝen
72. den-lil2 sipad saĝ gig2-ga-ke4 a-na bi2-in-ak-a-bi
73. den-lil2-le e2 zid gul-gul-lu-de3 lu2 zid tur-re-de3
74. dumu lu2 zid-da-ke4 dumu-saĝ-e igi ḫul dim2-me-de3
75. ud-ba den-lil2-le gu-ti-umki kur-ta im-ta-an-ed3
76. DU-bi a-ma-ru den-lil2-la2 gaba gi4 nu-tuku-am3
77. tum9 gal edin-na edin-e im-si igi-še3 mu-un-ne-ĝen
78. edin niĝ2-daĝal-la-ba sag3 ba-ab-dug4 lu2 nu-mu-ni-in-dib-be2
79. ud ku10-ku10-ga šika bar7-bar7-ra sa-še3 ba-ab-de6
80. ud babbar-re izi-ĝi6-edin-na ba-da-an-tab-tab
{
(2 mss. add 2 lines:)
80A. ud-mud-e giri17 i3-dub-dub saĝ i3-dab5-dab5
80B. ud ĝišgana2-ur3 an-ta ed2-de3 iri ĝišal-e ba-ab-ra-aḫ
}
81. ud-ba an ba-dub2 ki ba-sag3 igi ud-da ba-lib4
82. an ba-suḫ3-suḫ3 ĝissu ba-an-la2 kur-re mur mi-ni-ib-ša4
83. dutu an-ur2-ra i-in-nu2 saḫar kur-ra zal-am3
84. dnanna an-[pa]-a i-in-nu2 3-e ni2 bi2-in-te
85. {iriki-ba diĝir-X /ki-tuš\ ba-ab-be2-de3 bar-ta ba-da-gub} {(1 ms. has instead:) [iriki]-/ba? diĝir?-re?\-be2-ne X [ ba]-/sug2\-ge-eš}
86. kur-kur-re iriki lu2-bi nu-til-la i-im-sar-sar-re-ne
87. ĝiš maḫ ur2-bi-a mu-un-bal-e ĝištir-ra guru5 i
88. pu2-ĝiškiri6 gurun-ba mu-un-BU-BU ĝišligima i3-bur12-re
89. buru14 išin-bi-a mu-un-su-su dezina2 i3-tur-re
90. [(X) X]-la saĝ [X X]-/in\-bal-bal-e
91. [ ba-da]-kar-ra-bi [ ba]-/ab\-DU
92. [ u2]numun2 X ba-da-kar-ra-bi u2numun2 X ba-ab-DU
93. [ zar]-/re\-eš mu-un-du8-du8 [] /zar\-re-eš mu-un-sal-sal-e-eš
94. [] id2buranun-na ad6 i3-la2!-a [ĝištukul-e saĝ] gaz i3-ak-e
95. [ad-da dam-a-ni]-ta ba-da-gur dam-ĝu10 nu im-me
96. [ama dumu-ni]-ta ba-da-gur dumu-ĝu10 nu im-me
97. e2 zid-da-ke4 e2-a-ni mu-un-šub e2-ĝu10 nu im-me
98. niĝ2-gur11 tuku niĝ2-gur11-ra-ni-ta ĝiri3 kur2 ba-ra-/an\-[dab5]
99. ud-ba nam-lugal kalam-ma-ka šu pe-el-la2 ba-ab-dug4
100. aga men saĝ-ĝa2 ĝal2-la-bi teš2-bi ba-ra-an-[kur2]
101. kur-kur-re dub3-us2 dili dab5-ba-bi igi-te-en-bi [ba-si-il]
102. urim5ki 3 nidba gal-gal-la-ka nidba-bi ba-[ab-kur2]
103. dnanna 3 u8-gin7 lu-a-na šu bal ba-da-ab-ak
104. lugal-bi e2-gal ni2-te-na zi im-ma-ni-in-gi4
105. di-bi2-dsuen e2-gal ni2-te-na i-si-iš ba-ni-in-la2-la2
106. e2-nam-til3-la šag4 ḫul2-la-ka-na er2 gig mu-un-še8-še8
107. a-ma-ru ki al ak-e šu im-ur3-ur3-re
108. ud gal-gin7 ki-a mur mi-ni-ib-ša4 a-ba-a ba-ra-e3
109. iri gul-gul-lu-de3 e2 gul-gul-lu-de3
110. lu2-lul lu2 zid-da an-ta nu2-u3-de3
111. urin lu2-lul-e lu2 zid-ra ugu-a-na DU-še3
112.     ki-ru-gu2 1(DIŠ)-a-kam

113. ud-de3 mar-uru5-gin7 teš2-bi i3-gu7-e
114.     ĝiš-gi4-ĝal2 ki-ru-gu2-da-kam

115. e2 kiški-a ḫur-saĝ-kalam-ma-ka šu ḫul ba-e-dug4
116. dza-ba4-ba4 ki-tuš [ki 2-ĝa2-ni ĝiri3 kur2 ba-ra-an-dab5]
117. ama dba-u2 e2-[iri-kug-ga-na] [er2 gig mu-un-še8-še8]
118. a iri [gul-la e2 gul-la-ĝu10 gig-ga-bi im-me]
119. X []
2 lines missing
122. [a iri gul-la e2 gul-la-ĝu10 gig-ga-bi im-me]
123. ka-/zal-lu\ki iri ni2-ba lu-a šu suḫ3-a ba-ab-dug4
124. dnu-muš-da-ke4 iri ki-tuš ki 2-ĝa2-ni ĝiri3 kur2 ba-ra-an-dab5
125. nitalam-a-ni dnam-ra-at munus sag9-ga-a er2 in-še8-še8-e
126. a uru2 gul-la e2 gul-la-ĝu10 gig-ga-bi im-me
127. id2-bi šag4-sug4-ga i3-ĝal2 a nu-un-de2
128. id2 den-ki-ke4 nam ku5-ra2-gin7 ka-bi-a ba-uš2
129. a-šag4-ga še gu-nu nu-ĝal2 3-e nu-gu7-e
130. pu2-ĝiškiri6-bi gir4-gin7 ba-ḫur-ḫur edin-bi sag2 ba-ab-di
131. maš2-anše niĝ2-ur2-4 niĝ2-zi-ĝal2 nu-mu-un-bu-e
132. niĝ2-ur2-4 dšakkan2-ke4 ni2 nu-mu-ni-ib-te-en-te-en
133. dlugal-mar2-da-ke4 iri-ni-ta bar-ta ba-da-gub
134. dnin-zu-an-na ki-tuš ki 2-ĝa2-ni ĝiri3 kur2 ba-ra-an-dab5
135. a iri gul-la e2 gul-la-ĝu10 gig-ga-bi im-me
136. i3-si-inki 3 kar-re nu-me-a a-e ba-e-dar
137. dnin-isin2si-in-na ama kalam-ma-ke4 er2 gig mu-un-še8-še8
138. a iri gul-la e2 gul-la-ĝu10 gig-ga-bi im-me
139. den-lil2-le dur-an-ki-ka ĝišmitum2-a ba-an-sag3
140. den-lil2-le iri-ni 3 nibruki-a a-nir ba-ab-ĝar
141. ama dnin-lil2 nin ki-ur3-ra-ke4 er2 gig mu-un-še8-še8
142. a iri gul-la e2 gul-la-ĝu10 gig-ga-bi im-me
143. keš3ki an-edin-na dili du3-a šu lil2-la2 ba-ab-dug4
144. adabki-bu e2 id2-de3 la2-a re {ki-bal-še3 ba-ab-dug4} {(1 ms. has instead:) a-e ba-da-ab-be6}
145. muš kur-ra-ke4 ki-nu2 ba-ni-ib-ĝar ki-bal-še3 ba-ab-dug4
146. gu-ti-umki šag4 ba-ni-ib-bal-bal numun ba-ni-ib-i-i
147. dnin-tur5-re niĝ2-dim2-dim2-ma-ni-še3 er2 gig mu-un-še8-še8
148. a iri gul-la e2 gul-la-ĝu10 gig-ga-bi im-me
149. ki zabalamki-a gi-gun4-na kug-ga šu lil2-la2 ba-ab-dug4
150. unugki-ta dinana ba-da-an-kar ki-erim2-e ba-ab-ĝen
151. e2-an-na 3 ĝi6-par4 kug-ga erim2-e igi i-ni-in-bar
152. ĝi6-par4 kug nam-en-na-ba šu ba-e-la2-la2
153. en-bi ĝi6-par4-ta ba-da-an-kar ki-erim2-e ba-ab-de6
154. a iri gul-la e2 gul-la-ĝu10 gig-ga-bi im-me
155. ummaki šeg12-kur-ša3-ba-ke4 ud gig-ga ba-e-dal
156. [dšara2] [e2]-maḫ ki-[tuš] ki 2-ĝa2-ni ĝiri3 kur2 ba-ra-an-dab5
157. [dnin]-mul-e iriki ḫul-a-na er2 gig mu-un-še8-še8
158. [iriki-ĝu10] la-la-bi lu2 nu-un-gi4-a-ĝu10 gig-ga-bi im-me
159. ĝir2-suki iriki ur-saĝ-ĝe26-e-ne-ke4 im ĝir2-e ba-ab-dug4
160. dnin-ĝir2-su-ke4 e2-ninnu-ta ĝiri3 kur2 ba-ra-an-dab5
161. ama dba-u2 e2-iri-kug-ga-na er2 gig mu-un-še8-še8
162. a iri gul-la e2 gul-la-ĝu10 gig-ga-bi im-me
163. ud-ba inim ud-dam al-du7-du7 šag4-bi a-ba-a mu-un-zu
164. inim den-lil2-la2 zid-da-aš gel-le-eĝ3-de3 gab2-bu zu-zu-de3
165. den-lil2 lu2 nam tar-tar-re-de3 a-na bi2-in-ak-a-ba
166. den-lil2-le elamki lu2-kur2-ra kur-ta im-ta-an-e3
167. dnanše dumu-gir15 iri bar-ra mu-un-na-tuš-am3
168. dnin-mar-ki-ra 3 gu2-ab-ba-ka izi im-ma-da-an-te
169. kug na4za-gin3-bi ma2 gal-gal-e bal-še3 i3-ak-e
170. nin niĝ2-gur11-ra-ni ḫul-lu til3-la-am3 kug dnin-mar-ki-ke4
171. ud-ba ud ka izi-gin7 bar7-ra-am3 im-ma-da-ab-tar-re
172. ki lagaški elamki šu-ni-a im-ma-ši-in-gi4
173. ud-bi-a nin-e ud-da-a-ni sa2 nam-ga-mu-ni-ib-dug4
174. dba-u2 lu2-ulu3-gin7 ud-da-a-ni sa2 nam-ga-mu-ni-ib-dug4
175. me-li-e-a ud-de3 šu-ni-a im-ma-ši-in-gi4
176. ud uru2 gul-gul-e šu-ni-a im-ma-ši-in-gi4
177. ud e2 gul-gul-e šu-ni-a im-ma-ši-in-gi4
178. ddumu-zid-abzu e2-bi ki-nu-nir-ša3-ba-ke4 ni2 im-ma-da-an-te
179. /ki\-[nu]-nir-ša3ki iri nam-dumu-gir15-ra-ka-ni kar-kar-re-de3 ba-ab-dug4
180. dnanše iri-ni niĝin6ki-a kur-re ba-ab-ĝar
181. sirara3ki ki-tuš ki 2-ĝa2-ni ḫul-ĝal2-e ba-an-šum2
182. a iri gul-la e2 gul-la-ĝu10 gig-ga-bi im-me
183. ĝi6-par4 kug nam-en-na-ba šu ba-e-la2-la2
184. en-bi ĝi6-par4-ta ba-da-an-kar ki-erim2-e ba-ab-de6
185. gu2 id2-nun-na-dnanna-ka a2 dugud ba-ši-in-de6
186. maš-gana2-maš-gana2 e2-danna dnanna-ka tur3 dugud-gin7 ba-gul
187. lu2-kar-ra-bi maš kar-ra-gin7 ur im-me-da
188. ga-eški ga-gin7 ur-re ba-an-de2 i3-gul-gul-lu-ne
189. alan dim2-ma ulutim2 sag9-ga-bi im-ze2-er-ze2-re-e-ne
190. a iri gul-la e2 gul-la-ĝu10 gig-ga-bi im-me
191. ĝi6-par4 kug nam-en-na-ba šu ba-e-la2-la2
192. en-bi ĝi6-par4-ta ba-da-an-kar ki-erim2-e ba-ab-de6
193. barag an-na-da gid2-da-bi a-nir ba-da-ab-sa2
194. ĝišgu-za an-na-bi nu-ub-gub saĝ me-te-a-aš li-bi2-ib-ĝal2
195. ĝišĝišnimbar-gin7 gu2-guru5 ba-ab-dug4 teš2-bi ba-ra-an-kad4
196. aš-šuki e2 id2-de3 la2-a re a-e ba-da-ab-bu
197. niĝ2-erim2 nu-dib dnanna-ka lu2-erim2-e ba-an-dib
198. e2 ur5-re-am3 a-na-am3 ab-ak
199. e2-pu-uḫ2-ru-um-ma šag4-sug4-ga ba-ab-ĝar
200. ki-abrigki-ga ab2 lu amar lu-a re tur3 dugud-gin7 ba-gul
201. dnin-gublaga-ke4 ĝa2-bur-ta ĝiri3 kur2 ba-ra-an-dab5
202. dnin-i3-gara2-ke4 ni2-te-na er2 gig mu-un-še8-še8
203. a iri gul-la e2 gul-la-ĝu10 gig-ga-bi im-me
204. ĝi6-par4 kug nam-en-na-ba šu ba-e-la2-la2
205. en-bi ĝi6-par4-ta ba-da-an-kar ki-erim2-e ba-ab-de6
206. dnin-a-zu e2-gid2-da-ke4 ĝištukul ub-ba i-ni-in-gub
207. dnin-ḫur-saĝ e2-nu-tur-ra-ke4 ud ḫul ba-an-da-dal
208. tum12mušen-gin7 ab-lal3-ta ba-da-an-dal edin-na bar bi2-ib-gub
209. a iriki gul-la e2 gul-la-ĝu10 gig-ga-bi im-me
210. ĝiš-ban3-da e2 er2-re ĝal2-la re gi er2-ra ba-an-gul
211. dnin-ĝiš-zid-da ĝiš-ban3-da ĝiri3 kur2 ba-ra-an-dab5
212. da2-zi-mu2-a nin iri-a-ke4 er2 gig mu-un-še8-še8
213. a uru2 gul-la e2 gul-la-ĝu10 gig-ga-bi im-me
214. ud-bi-a u18-lu lu2 ĝi6-a ba-an-dur2-ru-ne-eš
215. kuaraki ḫul-ḫul-lu-de3 lu2 ĝi6-a ba-an-dur2-ru-ne-eš
216. dnin-e2-ḪA-ma ni2-te-na er2 gig mu-un-še8-še8
217. a uru2 gul-la e2 gul-la-ĝu10 gig-ga-bi im-me
218. dasar-lu2-ḫi ul4-ul4-la tug2 ba-an-mur10 LUL.KU mu-un-DU
219. dlugal-ban3-da ki-tuš ki 2-ĝa2-ni ĝiri3 kur2 ba-ra-an-dab5
{
(1 ms. adds 1 line:)
219A. /d\[nin-sumun2] []
}
220. a uru2 gul-la e2 gul-la-ĝu10 gig-ga-bi im-me
221. eridugki a gal-la dirig-ga a naĝ-e ba-am3-u-gun3?
222. bar-ba edin-lil2-e du3-a X X []
223. lu2 zid ki-lul-la X X []
224. dka-ḫe2-ĝal2-la digi-ḫe2-ĝal2-la []
225. ĝuruš-me-en ud nu-/gul\-la-/me-en\ mu-[X]-gul-[…]
226. ud nu-gul-la ḫi-li nu-til-la-me-en [] mu-/un\-[…]
227. /ĝištaškarin\-gin7 ba?-sag9-ga-me-eš i3-[sag3]-ge-de3-[en-de3-en]
228. X X-gin7 igi gun3-gun3-me-eš i3-[sag3]-/ge\-de3-en-de3-en
229. alan-gin7 kuš3-kuš3-a de2-a-me-eš i3-[sag3]-/ge\-de3-en-de3-en
230. [gu]-ti-umki lu2 ḫa-lam-ma-ke4 me-ze2-er-ze2-re-ne
231. [a-a] [d]en-ki-ra abzu eridugki-še3 šu-a ba-en-de3-en-gi4
232. [X X] a-na im-me-en-da-na a-na bi2-in-taḫ-e-da-na
233. [X X] X a-na im-me-en-da-na a-na bi2-in-taḫ-e-da-na
234. [X X X X X X] eridugki-ga-ta ḫe2-em-da-sar?-da-na
235. [ud-da ] /ḫa?\-ba-gub-bu-da-na ĝissu ba-X-mu
236. ĝi6-a X X-ke4 ḫa-ba-gub-bu-da-na ud-de3 ba-ra-an-tuku
237. ud-da gub saĝ sag3-ge-me-a a-na šu ba-ni-ti-en-de3-en
238. ĝi6-da gub u3 nu-ku-me-a a-na u2-gu me-de2-de3-en-de3-[en ]
239. den-ki-ke4 uru2-zu nam ḫa-ba-da-an-kud ki-erim2-e ḫa-ba-an-šum2
240. me-en-de3-/en\ eridugki-ta ĝal2-la-da a-na-aš mu-e-de3-la2-e-ne?
241. ĝišĝišnimbar-gin7 šu nu-dug4-ga-me-a a-na-aš mu-e-gul-gul-lu-ne
242. ĝišma2 gibil-gin7 sa bil2-la2 nu-ak-e a-na-aš mu-e-ze2-er-ze2-re-ne
243. den-ki-ke4 igi-ni ki kur2-ra ba-an-ĝar-ra-ba
244. UD? X X nam-tag dugud-da-ke4 ĝiš ḫul mu-un-ne-tag
245. [] UM? ba-da-an-zig3-ge-eš-a ildum2-ba mu-un-sa4?-eš
246. [den-ki]-ke4 eridugki-ga-ta ĝiri3 kur2 ba-ra-an-dab5
247. [ddam-gal]-nun-na ama e2-maḫ-a er2 gig mu-un-še8-še8
248. a uru2 gul-la e2 gul-la-ĝu10 gig-ga-bi im-me
249. ĝi6-par4 kug nam-en-na-ba šu ba-e-la2-la2
250. en-bi ĝi6-par4-ta ba-da-an-kar ki-erim2-e ba-ab-de6
251. urim5ki-ma lu2 u2-še3 nu-ĝen lu2 a-še3 nu-ĝen
252. u2-še3 ĝen-bi u2-ta ba-ĝen ḫur nu-um-mi-ib-gur-ru
253. a-še3 ĝen-bi a-ta ba-ĝen ḫur nu-um-mi-ib-gur-ru
254. sig-še3 elamki-ma ba-ši-in-gub-bu gaz-de3 i3-TIL-e
255. nim-še3 ḫa-al-ma lu2-kur2-ra-ke4 šu-ni […]-X-/ĝar\
256. ti-id-nu-umki-e ud šu2-uš ĝišmitum2-a ur2-ra ba-ni-in-ĝar
257. sig-še3 elamki-ma u2-a e3-a-gin7 KU-bi im-[…]-X-le
258. nim-še3 in-dal tum9 dal-la-gin7 edin-na [] X
259. urim5ki am gal u3-na gub-ba-gin7 gu2 ki-[še3 ba-ab-ĝar]
260. den-lil2-le lu2 nam tar-tar-re-de3 a-na [bi2-in-ak-a-ba]
261. 2-kam-ma-še3 elamki lu2-kur2-ra kur-ta [ba-ra-e3]
262. e2 saĝ-kal-la ĝiri3 du3-a um-ma-[…]
263. kisigaki ḫul-ḫul-lu-de3 lu2 10 /lu2\ [5 ]
264. ud 3-e ĝi6 3-e la-ba-da-te? X X [] iri ĝišal-e ba-ab-/ra\-[aḫ]
265. kisigaki ddumu-zid saĝ-gin7 ba-ra-[e3] šu-ni ba-da-ab-du3
266. e2-še3 kug ĝiri3 [] a KA []
267. zig3-ga u5-[a ] /zig3\-ga u5-[a …]-am3?
268. […]-un-DU zig3-ga u5-[a …]-am3?
269. [] si gal-gal ba-an-u5-bi X […]-X-DU-eš
270. [] si tur-tur maš2 palil-gin7 X […]-/dab5?\-be2-eš
271. niĝ2-gur11-ra-ni-ta ba-da-u5 kur-še3 ba-ĝen
272. i-lu kur ĝiri3 nu-ĝal2-la-ba gal-gal-bi /mi\-[ni-ib2-be2]
273. ga-ša-an-ĝen niĝ2-gur11-ĝa2 ga-ba-da-[u5 ki]-ba gi4-in de3-ĝen
274. kug na4za-gin3-ĝu10-ta ga-ba-e-[da]-u5 ki-ba gi4-in de3-ĝen
275. ki-ba na-aĝ2-gi4-in nam-lu2-ulu3 [X] X saĝ a-ba-a ba-ab-us2-e
276. ki-ba na-aĝ2-gi4-in elamki [X] X X saĝ a-ba-a ba-ab-us2-e
277. a iri gul-la e2 gul-la-ĝu10 gig-[ga]-bi im-me
278. nin-ĝu10 lu2-kur nu-me-a /kur?-re?\ ba-ab-ĝen
279. d[ama]-/ušumgal\-an-na kisiga[ki] […]-ĝa2
280. [X] /MU?\ uru2-gin7 nu-X [] X
281.     ki-/ru\-[gu2 2-kam-ma]

282. [] X X []
1 line missing
284.     [ĝiš-gi4-ĝal2 ki-ru-gu2-da-kam]

4 lines missing
289. [] u2-a ba-/ši\-[in-…]
290. [ u2]-a ba-ši-in-X []
291. [] /gub\-bu-bi šukur2 maḫ-gin7 ba-e-X []
292. den-lil2-le abul-la maḫ-ba ĝišig tum9-ma bi2-[in-gub]
293. urim5ki-ma lu2 u2-še3 nu-ĝen lu2 a-še3 nu-ĝen
294. 3-bi a tul2-la2 de2-a-gin7 šu i3-ni10-ni10?-ne
295. usu-bi ni2-bi-a nu-ĝal2 ĝiri3-bi ba-ra-an-dab5
296. den-lil2-le šag4-ĝar lu2 niĝ2-ḫul iri-a ba-an-da-dab5
297. niĝ2 iri gul-gul-e niĝ2 e2 gul-gul-e iri-a ba-an-da-dab5
298. niĝ2 igi-bi-še3 ĝištukul-e la-ba-gub-bu-a iri-a ba-an-da-dab5
299. šag4 nu-si-si igi niĝin2-bi iri-a ba-an-da-dab5
300. urim5ki-ma gi dili du3-a-gin7 saĝ sag3-ge nu-ĝa2-ĝa2
301. 3-bi ku6 šu dab5-ba-gin7 zi-bi mi-ni-in-tum2-tum2-mu
302. tur maḫ-bi i3-barag2-barag2-ge-eš lu2 nu-um-zi-zi-zi
303. LUGAL.BI.GUB dub-la2-a u5-a niĝ2-gu7 la-ba-na-ĝal2
304. lugal niĝ2 sag9-ga gu7-gu7-a šukur2-re im-ma-an-dab5
305. ud im-šu2-šu2 igi im-la2-e šag4-ka-tab i3-zu-zu
306. e2-lunga-na kaš nu-un-ĝal2 munu4-bi nu-um-ĝal2
307. e2-gal-la-na niĝ2-gu7 la-ba-na-ĝal2 tuš-u3-bi nu-ub-du7
308. ĝa2-nun maḫ-a-ni še nu-um-si-si zi-bi la-ba-ši-in-tum2-tum2-mu
309. guru7-du6 guru7-maš-e dnanna-ka dezina2 nu-un-ĝal2
310. kiĝ2-sig unu2 gal diĝir-re-e-ne-ke4 šu ba-e-la2-la2
311. unu2 gal-bi kurun lal3 muš3 im-ma-ab-tum2
312. ĝiri2-PA-a gud udu gu7-ra u2-šim-e ba-da-nu2
313. gir4 maḫ-ba gud udu nu-ak-e ir nu-mu-un-ur5-ur5-e
314. bur-saĝ-ta a2 sikil dnanna-ka za-pa-aĝ2-bi ba-ra-gul
315. e2 gud-gin7 gu3 bi2-ib-dug4-ga-a re sig9-ga-bi ba-du3
316. mu-un-DU kug-ga si nu-un-sa2-e ĝar-ra-bi ba-su3-ud
317. na4kinkin(ḪAR) ĝišnaĝa3 ĝiš-gan-na i3-dur2-dur2 lu2 nu-um-ši-gam-e
318. kar-za-gin3-na dnanna-ka a-e ba-da-la2
319. a ĝišma2-saĝ-ĝa2-ke4 gu3 nu-mu-un-gi4-gi4 asil3-la2 nu-mu-un-šub
320. unu2-RI-ban3-da dnanna-ka saḫar ba-da-dub-dub
321. u2numun2 ba-da-mu2 u2numun2 ba-da-mu2 gir re-e ba-an-mu2
322. ma2 ma2-gur8-ra kar-za-gin3-na muš3 im-ma-ab-tum2
323. id2 ma2-gur8-ra ba-ab-du7-a-za a2 nu-un-sud-sud-e
324. ezen ki ĝarza-ka ĝiš-ḫur-bi ba-da-kur2
325. ma2 nesaĝ-ĝa2 a-a ugu-na-ka nesaĝ nu-mu-un-na-ab-tum3
326. ninda nidba-bi den-lil2 nibruki-še3 nu-mu-da-an-ku4-ku4
327. id2-bi šag4-sug4(source: BU)-ga i3-ĝal2 ma2-gur8 nu-mu-un-dib-be2
328. gu2 tab 2-a-bi ĝiri3 nu-ĝal2 u2 gid2-da ba-am3-mu2
329. e2tur3 daĝal-la dnanna-ka dub-ba-an-bi ba-si-il
330. gi-sig ĝiškiri6-ka šu ba-e-[la2]-la2 gu2-ĝiri3 ba-an-ĝar-ĝar
331. ab2-šilam-ma amar-bi ba-[da-ab]-dab5 ki-erim2-e ba-ab-de6
332. ab2 u2munzer-e edin ki nu-zu-bi ĝiri3 kur2 ba-ra-an-dab5-be2-eš
333. dga-a-a-u2 lu2 ab2 ki 2-ĝa2 ĝištukul šurum-ma ba-šub
334. dšu-ni-dug3 i3 ga-ar3-ra du6-ul-du6-ul-e i3 ga-ar3-ra nu-du6-ul-du6-ul
335. i3-bi lu2 i3 nu-zu-ne i3-du9-du9-ne
336. ga-bi lu2 ga nu-zu-ne i3-im-muš3-muš3-u3-ne
337. e2tur3-ra dugšakir3-e dun5-dun5-e gu3 nun nu-mu-ni-ib-be2
338. ne-mur dugud-gin7 i3-ra-a re i-bi2-bi ba-gul
339. [] X unu2 gal dnanna-ka []
340. dsuen-e a-a-ni den-lil2-ra er2 mu-un-na-še8-še8
341. a-a ugu-ĝu10 iriki-ĝu10 a-na-ra-du3? a-na-aš ba-e-da-gur-re-en
342. den-lil2 urim5ki-ĝu10 a-na-ra-du3? a-na-aš ba-e-da-gur-re-en
343. ma2 nesaĝ-e a-a ugu-na-še3 nesaĝ nu-mu-un-na-ab-tum3
344. ninda nidba-zu den-lil2 nibruki-še3 nu-mu-un-na-da-an-ku4-ku4
345. en iri bar-ra en iri šag4-ga lil2-e ḫa-ba-ab-laḫ5-e-eš
346. urim5ki iriki ĝišal-e ri-a-gin7 du6-du6-da ba-šid
347. du6-ur2 ki ni2 dub2-bu den-lil2-la2 3 lil2-la2 ba-ab-ĝar
348. den-lil2 iri-zu igi bar-ra e2-ri-a sug4-ga
349. nibruki iri-zu igi bar-[ra e2-ri-a sug4-ga]
350. urim5ki-ma ur-bi ur2 bad3-da si-im-si-im nu-mu-un-ak-e
351. tul2 saĝ bulug-ga ganba-bi-a ki li-bi2-ib-de5-de5-ge
352. a-a ugu-ĝu10 iriki-ĝu10 dili-bi-ta a2-zu-še3 niĝin2-am3-ši-ib
353. den-lil2 urim5ki-ĝu10 dili-bi-ta a2-zu-še3 niĝin2-am3-ši-ib
354. e2-kiš-nu-ĝal2-ĝu10 dili-bi-ta a2-zu-še3 niĝin2-am3-ši-ib
355. urim5ki-ma numun ḫa-ra-ni-ib-e3 3 ḫu-mu-ra-ab-daĝal-la
356. me ki-en-gi-ra ba-da-ḫa-lam-e ki-bi ḫa-ra-ab-gi4-gi4
357.     ki-ru-gu2 3(EŠ5)-kam-ma

358. a e2 zid e2 zid a lu2-bi lu2-bi
359.     ĝiš-gi4-ĝal2-bi-im

360. den-lil2-le dumu-ni dsuen-ra mu-un-na-ni-ib-gi4-gi4
361. uru2 lil2-la2 šag4-bi a-nir-ra gi er2-ra ba-am3-mu2
{
(1 ms. adds 1 line:)
361A. [šag4-bi] a-še-ra gi er2-ra ba-am3-mu2
}
362. šag4-bi-a a-nir-ra ud mi-ni-ib-zal-zal-e
{
(1 ms. adds 1 line:)
362A. [dumu]-ĝu10 dumu-gir15 ni2-za-bi-me-en er2-ra na-bi-me-en
}
363. dnanna dumu-gir15 ni2-za-bi-me-en er2-ra na-bi-me-en
364. di-til-la inim pu-uḫ2-ru-um-ma-ka šu gi4-gi4 nu-ĝal2
365. inim dug4-ga an den-lil2-la2-ka šu bal-e nu-zu
366. urim5ki-ma nam-lugal ḫa-ba-šum2 bal da-ri2 la-ba-an-šum2
367. ud ul kalam ki ĝar-ra-ta zag 3 lu-a-še3
368. bal nam-lugal-la saĝ-bi-še3 e3-a a-ba-a igi im-mi-in-du8-a
369. nam-lugal-bi bal-bi ba-gid2-e-de3 šag4 kuš2-u3-de3
370. dnanna-ĝu10 na-an-kuš2-kuš2-u3-de3 iriki-zu e3-bar-ra-ab
371. ud-ba lugal-ĝu10 dumu-gir15-ra ur5-ra-ni ba-an-uš2
372. en daš-im2-babbar dumu-gir15-ra šag4 ḫul-lu im-ma-an-dim2
373. dnanna lu2 iriki-ni ki 2-ĝa2 iriki-ni ba-ra-e3
374. dsuen-e urim5ki ki 2-ĝa2 ĝiri3 kur2 ba-ra-an-dab5
375. dnin-gal-e gir5 iriki-ni-ta ki kur2-še3 du-u3-de3
376. tug2 ul4-ul4-la-bi ba-ra-an-mur10 iriki-ta ba-ra-e3
377. urim5ki-ma da-nun-na-bi bar-ra ba-sug2-ge-eš
378. urim5ki-ma NE ni2-bi ki X X X-a ba-a-te
379. urim5ki-ma ĝiš-bi tur5-ra-am3 gi-bi tur5-ra-am3
380. bad3-bi en-na niĝin2-na-bi-da a-nir ba-da-sa2
381. ud šu2-uš-e ĝištukul-e igi-bi-še3 saĝ i3-sag3-sag3-ge
382. urim5ki-ma urudḫa-zi-in gal-gal-e igi-bi-še3 u3-sar i3-ak-e
383. ĝiš-gid2-da a2 me3-ke4 si bi2-ib-sa2-sa2-e-ne
384. ĝišpan gal-gal ĝišilar kušgur21ur3-ra teš2 im-da-gu7-e
385. ĝišti zu2-ke4 muru9 šeĝ3-ĝa2-gin7 bar-ba mi-ni-in-si
386. na4 gal-gal-e ni2-bi-a pu-ud-pa-ad im-mi-ib-za
{
(1 ms. adds 1 line:)
386A. ud šu2-uš iriki-ta im-ḫul-e mu-un-da-an-gi4-gi4
}
387. urim5ki ne3-bi-ta nir-ĝal2 gab2-gaz-e ba-gub
388. 3-bi lu2-erim2-e a2 bi2-ib2-ĝar ĝištukul-e la-ba-sug2-ge-eš
389. iriki ĝištukul-e saĝ nu-šum2-mu-a šag4-ĝar-e im-us2
390. šag4-ĝar-e iriki a-gin7 ba-e-si ĝa2-la nu-um-ta-dag-ge
391. šag4-ĝar-e igi-bi im-gam-me-e sa-bi im-lug-gu2-ne
392. 3-bi a-niĝin2-na ba-e-si zi ḪAR i-ak-e
393. lugal-bi e2-gal ni2-te-na-ka zi gig mu-un-pa-an-pa-an
394. nam-lu2-ulu3-bi ĝištukul ba-e-šub ĝištukul ki bi2-ib2-tag
395. šu-bi gu2-bi-še3 ba-ši-ib-ri-ri er2 mu-un-še8-še8-ne
396. ni2-bi-a ad mi-ni-ib-gi4-gi4 inim im-šar2-šar2-e-ne
397. me-li-e-a dug4-ga-me nam-ĝu10 taḫ-me nam-ĝu10
398. en3-še3-am3 ka garaš2-a-ka i-im-til-le-de3-en-de3-en
399. urim5ki-ma šag4-bi nam-uš2-am3 bar-bi nam-uš2-am3
400. šag4-bi-a niĝ2 šag4-ĝar-ra-ka i-im-til-le-de3-en-de3-en
401. bar-bi-a ĝištukul elamki-ma-ka ga-nam ba-[e-til]-le-en-de3-en
402. urim5ki-ma lu2-erim2-e a2 bi2-ib-ĝar ga-nam ba-til-e-de3-<en>-de3-en
403. zi-bi murgu-bi-še3 i3-ak-e gu3 teš2-a bi2-in-sig10-ge5-eš
404. {e2-gal a ba-šub-ba šu ba-e-la2-la2 ĝišsi-ĝar-bi bi2-in-bur12-bur12-uš} {(1 ms. has instead:) abul-la-bi ĝišsi-ĝar bi2-in-du8-du8-uš ĝišig-bi ud-de3 gub-bu}
405. elamki-e a maḫ e3-a-gin7 gidim im-ma-ni-ib2-ĝar
406. urim5ki-ma ĝištukul-e dugsaḫar2-gin7 saĝ gaz i3-ak-e
407. lu2-kar-ra-bi dub3 nu-um-zil-e bad3 zag-ga bi2-in-dab5-be2-eš
{
(1 ms. adds 3 lines:)
407A. ku6 a-niĝin2-na lug-ga-gin7 zi-bi in-tum3-tum3-mu-ne
407B. e2-kiš-nu-ĝal2 dnanna-ka lu2-erim2-e ba-e-dab5
407C. sig an-ĝar-bi dugud ĝal2-la-a re im-ze-er-ze-re-ne
}
408. urudalan uzugx(AN.ZAG)-ge si-a-bi gu2-guru5 ba-an-ne-eš
409. dnin-i3-gara2 aĝrig maḫ-e erim3-ma šu bi2-in-dag
410. ĝišgu-za-bi igi-bi-ta ba-e-šu2 saḫar-ra ba-da-an-tuš
411. ab2 maḫ-bi si-muš3-bi ba-ra-an-dab5-be2-eš si-bi ba-ra-an-kud
412. gud du7-du7-bi udu u2 gu7-a-bi ĝištukul-e ba-an-sag3-sag3
{
(1 ms. adds 1 line:)
412A. ĝišĝišnimbar-gin7 gu2-gur5-ru ba-ab-dug4 teš2-bi ba-ra-an-kad4
}
413. ĝišĝišnimbar urud niĝ2 kalag-ga a2 nam-ur-saĝ-ĝa2
414. u2numun2-gin7 ba-bur12 u2numun2-gin7 ba-ze2 ur2-ba ti mi-ni-ib-bal
415. saĝ saḫar-ra ki ba-ni-ib-u2-us2 lu2 zi-zi la-ba-tuku
416. ĝišze2-na-bi gu2 ba-an-/guru5\-uš saĝ šu bi2-in-ḫu-ḫu-uz
417. ĝiša2-an zu2-lum-ma-bi pu2 du7-du7 ba-ra-an-BU-BU-de3-eš
418. gi-zi NAB? kug-ge mu2-a šu ba-e-la2-la2
419. gu2-un gal-gal-e mi-ni-in-ĝar-re-eš-a kur-re i3-il2-il2
420. e2-e ĝiš-bur2 maḫ-bi ba-šub bad3-si-bi ba-gul
421. maš2-anše zid-da gab2-bu-ba gu2-da la2-a-bi
422. ur-saĝ ur-saĝ-e gaz-a-gin7 igi-bi-ta ba-šu2
423. ušumgal ka du8-a piriĝ-ĝa2 ni2 guru3-gur3-ru-bi
424. am dab5-ba-gin7 saman-e bi2-in-šub-bu re ki-erim2-e ba-ab-de6
425. ki-tuš kug dnanna tir šim ĝišerin-na-gin7 ir-si-im-bi ba-gul
{
(1 ms. adds 1 line:)
425A. a-sal-bar-bi kug-sig17 na4za-gin3 ki X X-da dug4-ga-a-bi
}
426. e2 u6 di-bi i3-dug3-ga re u6 di-bi ba-gul
427. ud-gin7 kur-kur-ra im-si-a an-usan an-na-gin7 ba-e-du3
428. ĝišig-bi mul?-an-na X-bi [] dug4-ga-ba
429. urudbulug gal-gal-e KA […]-gi4-gi4 ba-ra-an-bur12-bur12-uš
430. kuša2-si-bi a-ba /IM\ [] en3-bi-še3 TUG2 PI [] ba-ab-dug4
431. ĝišnu-kuš2-u3-bi-da lu2-kar-ra-gin7 er2 gig i3-še8-še8
432. ĝišsaĝ-kul ĝišsuḫub4 kug-ga ĝišig gal gu2 gid2-i nu-mu-na-ab-be2
433. ĝišig gu2 gid2-da za-pa-aĝ2-bi ba-šub lu2 gu2 gid2-i la-ba-an-tuku
434. [] X-ba-še3 ba-la2-la2 sila daĝal-la ni2-bi ba-ab-ĝar
435. ki X X-da ki lugal gub-bu-na nidba-bi ba-kur2
436. ki? kug-ba tigi2 šem5 kuša2-la2-e gu3 nun nu-mu-ni-ib-be2
437. ĝištigi2 maḫ-ba er2? X […]-si-a šir3 kug nu-mu-na-ab-be2
438. dub-la2-maḫ ki nam tar-re-de3 ka-inim-ma nu-ĝal2
439. ĝišgu-za ki di ku5-ru-bi nu-mu-un-gub di si nu-um-sa2-e
440. dalamuš-e ĝišĝidru ba-da-an-šub šu-ni gu4?-ud-gu4-ud
441. a2-nu2-da kug dnanna-ka balaĝ na-mu-un-tag-ge-ne
442. dub-šen kug lu2 igi nu-bar-re-dam erim2-e igi i-ni-in-bar
443. ĝiš-nu2 gi4-rin-na nu-um-gub u2 za-gin3 nu-mu-un-barag2
444. urudalan uzugx(AN.ZAG)-ge4 si-a-ba gu2-guru5 ba-an-ne-eš
445. engiz ensi kišib3-ĝal2-bi eš-da šu li-bi2-in-du7-uš
446. gu2 ki-še3 ĝal2-la-ba ba-e-sug2-sug2-ge-eš kur2-re ba-ab-laḫ5-e-eš
447. uz-ga kug šu-luḫ dadag-ga šag4-gada-la2-be2-e-ne
448. ĝiš-ḫur me kug-ga ba-da-ḫa-lam-e iri kur2-še3 ba-e-re7-eš
449. dsuen-e šag4 ḫul-la-ni a-a-ni-ir ba-ši-in-ĝen
450. igi a-a ugu-na den-lil2-la2-še3 dug3 ki ba-ni-in-us2
451. a-a ugu-ĝu10 en3-tukum-še3 niĝ2-kas7-ĝu10 igi erim2 mu-e-du8 en3-tukum-še3 SAR
452. nam-en nam-lugal šum2-ma-za-am3 X mu-e-ši-de2?
453. a-a den-lil2 lu2 a2 2-e dug4-ga zid
454. inim kug-zu kalam-ma []
455. [di] niĝ2 kur2-zu /šag4\ []
456. šag4 zu-mu-ug-ga i-zi-gin7 ḫu-luḫ-ḫa-za igi zid bar-mu-un-ši-ib
457. a-a den-lil2 nam mu-e-tar-ra ĝalga ba-ra-an-du8-du8
458. siki-pa nam-en-na suḫ keše2-da-ĝa2
459. ud sikil maḫ luḫ-luḫ X X [] X tug2-mu-dur7-ra mi-ni-in-mur10
460. den-lil2-le dumu-ni dsuen-ra inim zid mu-un-na-ab-be2
461. dumu-ĝu10 iri nam-ḫe2 giri17-zal ša-ra-da-du3-a bal-zu ba-ši-ib-tuku
462. iriki gul bad3 gal bad3-si-bi sig10-ge5 u3 ur5-re bal an-ga-am3
463. sa2 mi-ri-ib-dug4-ga bal ud ku10-ku10-ga-bi-ir ĝal2-lu ša-ra-dug4
464. dur2-u3 re ki-tuš e2-temen-ni2-gur3-ru-za zid-de3-eš du3-du3-am3
465. urim5ki giri17-zal-la ḫe2-en-du3 3 ḫe2-en-ši-gam-e
466. ur2-bi-a niĝ2 ḫe2-en-ĝal2 dezina2 ḫe2-eb2-da-tuš
467. pa-bi-a giri17-zal ḫe2-en-ĝal2 dutu ḫe2-en-da-ḫul2
468. ĝišbanšur-ba ḫe2-ĝal2 dezina2-ka gu2-da ḫe2-em-mi-ib-la2
469. urim5ki iri an-ne2 nam tar-re ki-bi ḫa-ra-ab-gi4-gi4
470. den-lil2-le gu3 zid de2-am3 gu2 an-še3 ḫe2-en-zig3
471. dnanna-ra ma-da sig igi-nim-ma gu2 ḫu-mu-na-ab-dirig
472. dsuen-ra kaskal kur-ra-ke4 si ḫe2-en-na-sa2-e
473. muru9-gin7 ki us2-sa-a-gin7 šu mu-un-na-ĝa2-ĝa2
474. inim dug4-ga an den-lil2-la2-kam šu zid ḫe2-ĝa2-ĝa2
475. a-a dnanna iriki-ni urim5ki-ma saĝ il2-la mu-un-ĝen
476. šul dsuen e2-kiš-nu-ĝal2-la-še3 im-ma-da-an-ku4-ku4
477. dnin-gal-e agrun kug-ga-na ni2 mu-ni-ib-te-en-te-en
{
(1 ms. adds 1 line:)
477A. urim5ki-ma e2-kiš-nu-ĝal2-la-na im-ma-da-an-ku4-ku4
}
478.     ki-ru-gu2 4(LIMMU5)-kam-ma

479. iriki lil2-la2-am3 šag4-bi a-še-ra gi er2-ra ba-an-mu2
480. šag4-bi a-še-ra gi er2-ra ba-an-mu2
481. 3-bi a-še-er-ra ud mi-ni-ib-zal-zal-e
482.     ĝiš-gi4-ĝal2-bi-im

483. ud gig-ga ud gaba-zu zig3-ga-ab ud e2-za gi4-bi
484. ud uru2 gul-gul ud gaba-zu zig3-ga-ab ud e2-za gi4-bi
485. ud e2 gul-gul ud gaba-zu zig3-ga-ab ud e2-za gi4-bi
486. ud ki-en-gi-ra ba-e-zal-la kur-re ḫe2-eb-zal
487. ud ma-da ba-e-zal-la kur-re ḫe2-eb-zal
488. kur ti-id-nu-umki-ma-ka ḫe2-eb-zal kur-re ḫe2-eb-zal
489. kur gu-ti-umki-ma-ka ḫe2-eb-zal kur-re ḫe2-eb-zal
490. kur an-ša4-anki-na-ka ḫe2-eb-zal kur-re ḫe2-eb-zal
491. an-ša4-anki-e im-ḫul dal-la-gin7 kuš7 ḫe2-ni-ib-su-su
492. šag4-ĝar lu2 niĝ2-ḫul ḫe2-en-da-dab5 3 ḫe2-em-ši-ib-gam-e
493. me an-na ĝiš-ḫur 3 gen6-ne2 an-ne2 nam-kur2-re
494. di kud ka-aš bar-re 3 si sa2-sa2-e an-ne2 nam-kur2-re
495. kaskal kalam-ma-ke4 ĝiri3 ĝa2-ĝa2 an-ne2 nam-kur2-re
496. an-ne2 den-lil2-bi nam-kur2-ru-ne an-ne2 nam-kur2-re
497. den-ki dnin-maḫ-bi nam-kur2-ru-ne an-ne2 nam-kur2-re
498. id2idigna id2buranun-na a-bi tum3-de3 an-ne2 nam-kur2-re
499. šeĝx(IM.A) an-na ki-a še gu-nu an-ne2 nam-kur2-re
500. id2 a-bi-da a-šag4 še-bi-da an-ne2 nam-kur2-re
501. ambar-ambar-re ku6 mušen tum3 an-ne2 <nam-kur2-re>
502. ĝiš-gi gi sumun gi ḫenbur mu2-mu2-de3 an-ne2 nam-kur2-re
503. an-ne2 den-lil2-bi nam-kur2-ru-ne
504. den-ki dnin-maḫ-bi nam-kur2-ru-ne
505. pu2-ĝiškiri6 lal3 ĝeštin u3-tud
506. an-edin-na ĝišmaš2-gurum u3-[tud]
507. e2-gal-la zi su3-ud-ĝal2 [u3-tud]
508. a-ab-ba ḫe2-ĝal2 niĝ2 u3-tud an-[ne2] [nam-kur2-re]
509. ma-da 3 lu-a sig igi-nim-ma an-[ne2] [nam-kur2-re]
510. an-ne2 den-lil2-bi nam-kur2-re-ne an-ne2 nam-kur2-re
511. den-ki dnin-maḫ-bi nam-kur2-re-ne [an]-ne2 nam-kur2-re
512. iri du3-du3-a 3 [šar2-šar2]-ra
513. an ki niĝin2-na 3 saĝ sig10-ga
514. dnanna nam-lugal-zu dug3-ga-am3 [ki]-za gi4-ni-ib
515. urim5ki bal dug3 nam-ḫe2 ud ḫe2-ni-ib-su3-ud-de3
516. 3-bi u2-sal-la ḫe2-eb-nu2 e-ne su3-ud ḫe2(source: bi)-em-ak?
517. a nam-lu2-ulu3 ba-tu11 KU-re egir3-re mu-lu er2 a-še-re
518. dnanna a iri-zu a e2-zu a nam-lu2-u18-lu-zu
519.     ki-ru-gu2 5(IA2)-kam-ma-am3


Print sources

Falkenstein 1953, p. 192-213: translation

Kramer 1969b, p. 611-619: translation

Kraus 1968: commentary

Krecher 1980-83: commentary

Michalowski 1989: composite text, score transliteration, translation, commentary

Römer 1989a, p. 700-707: translation, commentary (ll. 1-75)

Electronic sources

Civil 1989l: composite text

Krecher 1996: composite text

Krecher 1996a: composite text, translation

Cuneiform sources

Ash 1926,396 (OECT 5 11; photo pl. 1))

CBS 2154 (PBS 10/4 6; photo pl. 2))

CBS 2222 (PBS 5 20) + CBS 2279 (STVC 31)(both photo pl. 3)

CBS 2299

CBS 2307 + N 2430 + CBS 9204 (SEM 96) + CBS 9878 (SEM 95)(all fig. 1, photo pl. 4)

CBS 2359 (PBS 10/2 19; photo pl. 5)

CBS 4577 (PBS 10/2 4; photo pl. 6)

CBS 4593 (STVC 25; photo pl. 7)

CBS 8324 (STVC 27; photo pl. 7)

CBS 9245 (fig. 2) + CBS 13112 (STVC 28)(both pl. 8)

CBS 10342 (STVC 29; photo pl. 9)

CBS 12671 (STVC 26; photo pl. 9)

CBS 15178 (PBS 5 21) + CBS 15305 (both photo pl. 10)

HS 1525 (TMH 4 26) + HS 2508 + HS 2551 + HS 1523 (TMH 4 58; all WK 62f.)

N 1735 + N 1764 + N 1783 + N 6287 (all fig. 3, photo pl. 11f.) + Ni 4414 (ISET 1 95)

N 1775 ***

N 1778 + N 1781 (both fig. 4, photo pl. 13f.)

N 2624 + N 3084 (both fig. 5, photo pl. 14)

N 3123 (fig. 6, photo pl. 14)

N 3253 (fig. 7, photo pl. 15)

N 3381

N 3626 (fig. 8, photo pl. 15)

N 3740

N 6722 (fig. 9, photo pl. 15)

N 7322

Ni 350 (BE 31 3)

Ni 1089

Ni 1578 (BE 31 2)

Ni 2281 (SLTN 100)

Ni 2519 (SRT 51)

Ni 4079 (ISET 2 5)

Ni 4203 (ISET 1 79)

Ni 4277 (ISET 1 85)

Ni 4279 (ISET 1 85)

Ni 4338 (ISET 1 146)

Ni 4281 (ISET 1 85)

Ni 9461 (ISET 1 170)

Ni 9637 (ISET 1 118)

Ni 9944 (ISET 1 146)

Ni 9951 (ISET 2 61)

UET 6 124 = U 16900E

UET 6 125

UET 6 126 + UET 6 127 (+) UET 6 *24 + UET 6 *139 + UET 6 *242 + UET 6 *434 (all photo pl. 16)

UET 6 128

UET 6 129

UET 6 130 + UET 6 *157

UET 6 131 = U 16900B

UET 6 132 = U 16900H

UET 6 133

UET 6 134 = U 16858

UET 6 *21 + UET 6 *22 (both photo pl. 17)

UET 6 *26 (photo pl. 17)

UET 6 *272 (photo pl. 17)

UM 29-15-414 (fig. 10, photo pl. 18)

YBC 4160 (fig. 11, photo pl. 19)

3N-T318B = A 30218B + 3N-T321 = UM 55-21-305 (both fig. 12, photo pl. 20f.)

3N-T666 = IM 58605 + 3N-T917,386 (SLFN pl. 12) + 3N-T917,402 (SLFN pl. 12) (all fig. 13, photo pl. 22f.)

3N-T900,3 (SLFN pl. 12; photo pl. 23)

L 74.150 (cf. Syria 53 76f.; photo pl. 24)


Revision history

24.iv.1998-15.v.1998: GC, editor: standardisation
02.vi.1998-11.vi.1998: JAB, editor: proofreading
10.xi.1999: GC, editor: SGML tagging
15.xii.1999: ER, editor: proofreading SGML
15.xii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford