ETCSLtransliteration : c.2.2.3 ETCSL homepage

The lament for Sumer and Urim

1. ud cu bal ak-de3 jic-hur ha-lam-e-de3 (Cited in OB catalogue from Nibru, at Philadelphia, 0.2.01, line 34; OB catalogue in the Louvre, 0.2.02, line 29; OB catalogue from Urim (U2), 0.2.04, line 45)
2. ud-de3 mar-uru5-gin7 tec2-bi i3-gu7-e
3. me ki-en-gi-ra cu bal ak-de3
4. bal sag9-ga e2-ba gi4-gi4-de3
5. uru2 gul-gul-lu-de3 e2 gul-gul-lu-de3
6. tur3 gul-gul-lu-de3 amac tab-tab-be2-de3
7. gud-bi tur3-bi-a nu-gub-bu-de3
8. udu-bi amac-bi-a nu-dajal-e-de3
9. id2-bi a mun4-na tum3-u3-de3
10. gan2-ne2 zid-de3 u2KI.KAL mu2-mu2-de3
11. edin-e u2-a-nir mu2-mu2-de3
12. ama dumu-ni-ir ki nu-kij2-kij2-de3
13. ad-da a dam-ju10 nu-di-de3
14. dam tur ur2-ra nu-hul2-le-de3
15. dumu tur dub3-ba nu-buluj3-je26-e-de3
16. emeda(UM.ME)-e u5-a nu-di-de3
17. nam-lugal-la ki-tuc-bi kur2-ru-de3
18. ec-bar kij2-e cu la2-e-de3
19. nam-lugal kalam-ma kar-kar-re-de3
20. igi-bi ki-car2-ra ja2-ja2-de3
21. inim dug4-ga an den-lil2-la2-ta jic-hur ha-lam-e-de3
22. ud an-ne2 kur-kur-ra saj-ki ba-da-an-gid2-da-ba
23. den-lil2-le igi-ni ki kur2-ra ba-an-jar-ra-a-ba
24. dnin-tur5-re nij2-dim2-dim2-ma-ni zag bi2-in-tag-ga-a-ba
25. den-ki-ke4 id2idigna id2buranun-na ac2 bi2-in-bal-a-ba
26. dutu har-ra-an kaskal-e nam ba-an-kud-da-a-ba
27. ki-en-gi-ra me-bi ha-lam-e-de3 jic-hur-bi kur2-ru-de3
28. urim5ki-ma me nam-lugal-la bal-bi sud-su3-ud-de3
29. dumu nun-na e2-kic-nu-jal2-la-na cu pe-el-la2 di-de3
30. dnanna uj3 u8-gin7 lu-a-na igi-te-en-bi si-il-le-de3
31. urim5ki ec3 nidba gal-gal-la nidba-bi kur2-ru-de3
32. uj3-bi ki-tuc-ba nu-tuc-u3-de3 ki-erim2-e cum2-mu-de3
33. cimackiki elamki lu2-kur2-ra ki-tuc-bi tuc-u3-de3
34. sipad-bi e2-gal-la ni2-te-na lu2-erim2-e dab5-be2-de3
35. di-bi2-dsuen kur elamki-ma-ce3 jic-bur2-ra tum2-u3-de3
36. ici za-buki gaba a-ab-ba-ka-ta zag an-ca4-anki-na-ce3
37. simmucen e2-bi ba-ra-an-dal-a-gin7 iri-ni-ce3 nu-gur-re-de3
38. id2idigna id2buranun-na gu2 tab 2-a-ba u2 hul mu2-mu2-de3
39. kaskal-la jiri3 nu-ja2-ja2-de3 har-ra-an nu-kij2-kij2-de3
40. uru2 a2-dam ki jar-jar-ra-ba du6-du6-ra cid-de3
41. uj3 saj gig2 lu-lu-a-ba jic-hac-e ak-de3
42. gan2-ne2 zid-de3 jical nu-ru-gu2-de3 numun ki nu-tag-de3
43. e-el-lu cir3 gud sub2-sub2-ba edin-na nu-di-de3
44. e2tur3-ra i3 gara2 nu-ak-de3 curum ki nu-tag-e-de3
45. sipad-de3 gi-cukur-ra amac kug-ga cu nu-ni10-ni10-de3
46. i-lu-lam-ma dun5-dun5 dugcakir3-ra amac-a nu-di-de3
47. edin-na mac2-ance tur-re-de3 nij2-zi-jal2 til-le-de3
48. nij2-ur2-4 dcakkan2-na-ke4 curum ki nu-tag-ge-de3
49. ambar-ra cu ki-in-dar di-de3 numun nu-tuku-tuku-de3
50. jic-gi gi saj hul mu2-mu2-de3 hab2-ba {til-e-de3} {(1 ms. has instead:) uc2-u3-de3}
51. pu2-jickiri6 u2 gibil-la2 nu-me-a ni2-ba cu2-cu2-de3
52. urim5ki am gal u3-na gub-ba ni2-bi-ta nir-jal2
53. iri numun i-i nam-en nam-lugal-la ki sikil-la du3-a
54. gud-gin7 saman ul4-la-bi cub-bu-de3 gu2 ki-ce3 la2-e-de3
55. an den-lil2 den-ki {dnin-hur-saj-ja2-ke4} {(2 mss. have instead:) dnin-mah-bi} nam-bi ha-ba-an-tar-re-ec
56. nam-tar-ra-bi nij2 nu-kur2-ru-dam a-ba cu mi-ni-ib2-bal-e
57. inim dug4-ga an den-lil2-la2-kam saj a-ba-a mu-un-ja2-ja2
58. an-ne2 ki-en-gi ki-tuc-ba bi2-in-hu-luh uj3-e ni2 bi2-in-te
59. den-lil2-le ud gig-ga mu-un-zal iri-a me bi2-ib-jar
60. dnin-tur5-re ama5 kalam-ma-ka jicig-cu-ur2 im-mi-in-de6
61. den-ki-ke4 id2idigna id2buranun-na a im-ma-da-an-kece2
62. dutu nij2-si-sa2 inim gen6-na ka-ta ba-da-an-kar
63. dinana-ke4 me3 cen-cen-na ki-bal-e ba-an-cum2
64. dnin-jir2-su-ke4 ki-en-gi ga-gin7 ur-e ba-an-de2
65. kalam-ma ga-ba-ra-hum im-ma-an-cub nij2 lu2 nu-zu-a
66. nij2 igi nu-jal2-la inim nu-jal2-la nij2 cu nu-tej3-je26-dam
67. kur-kur-re ni2 te-a-bi-a cu suh3-a ba-ab-dug4
68. iriki dijir-bi ba-da-gur sipad-bi ba-da-ha-lam
69. nam-lu2-ulu3 ni2 te-bi-a zi gig mu-un-pa-an-pa-an
70. ud-de3 cu-ne-ne ba-du3-du3 ud nu-mu-un-ne-gur-re
71. ud gi4-a mu-un-ne-tuku-am3 ud dur2-bi-ce3 nu-jen
72. den-lil2 sipad saj gig2-ga-ke4 a-na bi2-in-ak-a-bi
73. den-lil2-le e2 zid gul-gul-lu-de3 lu2 zid tur-re-de3
74. dumu lu2 zid-da-ke4 dumu-saj-e igi hul dim2-me-de3
75. ud-ba den-lil2-le gu-ti-umki kur-ta im-ta-an-ed3
76. DU-bi a-ma-ru den-lil2-la2 gaba gi4 nu-tuku-am3
77. tum9 gal edin-na edin-e im-si igi-ce3 mu-un-ne-jen
78. edin nij2-dajal-la-ba sag3 ba-ab-dug4 lu2 nu-mu-ni-in-dib-be2
79. ud ku10-ku10-ga cika bar7-bar7-ra sa-ce3 ba-ab-de6
80. ud babbar-re izi-ji6-edin-na ba-da-an-tab-tab
{
(2 mss. add 2 lines:)
80A. ud-mud-e giri17 i3-dub-dub saj i3-dab5-dab5
80B. ud jicgana2-ur3 an-ta ed2-de3 iri jical-e ba-ab-ra-ah
}
81. ud-ba an ba-dub2 ki ba-sag3 igi ud-da ba-lib4
82. an ba-suh3-suh3 jissu ba-an-la2 kur-re mur mi-ni-ib-ca4
83. dutu an-ur2-ra i-in-nu2 sahar kur-ra zal-am3
84. dnanna an-[pa]-a i-in-nu2 uj3-e ni2 bi2-in-te
85. {iriki-ba dijir-X /ki-tuc\ ba-ab-be2-de3 bar-ta ba-da-gub} {(1 ms. has instead:) [iriki]-/ba? dijir?-re?\-be2-ne X [... ba]-/sug2\-ge-ec}
86. kur-kur-re iriki lu2-bi nu-til-la i-im-sar-sar-re-ne
87. jic mah ur2-bi-a mu-un-bal-e jictir-ra guru5 i
88. pu2-jickiri6 gurun-ba mu-un-BU-BU jicligima i3-bur12-re
89. buru14 icin-bi-a mu-un-su-su dezina2 i3-tur-re
90. [(X) X]-la saj [X X]-/in\-bal-bal-e
91. [... ba-da]-kar-ra-bi [... ba]-/ab\-DU
92. [... u2]numun2 X ba-da-kar-ra-bi u2numun2 X ba-ab-DU
93. [... zar]-/re\-ec mu-un-du8-du8 [...] /zar\-re-ec mu-un-sal-sal-e-ec
94. [...] id2buranun-na ad6 i3-la2!-a [jictukul-e saj] gaz i3-ak-e
95. [ad-da dam-a-ni]-ta ba-da-gur dam-ju10 nu im-me
96. [ama dumu-ni]-ta ba-da-gur dumu-ju10 nu im-me
97. e2 zid-da-ke4 e2-a-ni mu-un-cub e2-ju10 nu im-me
98. nij2-gur11 tuku nij2-gur11-ra-ni-ta jiri3 kur2 ba-ra-/an\-[dab5]
99. ud-ba nam-lugal kalam-ma-ka cu pe-el-la2 ba-ab-dug4
100. aga men saj-ja2 jal2-la-bi tec2-bi ba-ra-an-[kur2]
101. kur-kur-re dub3-us2 dili dab5-ba-bi igi-te-en-bi [ba-si-il]
102. urim5ki ec3 nidba gal-gal-la-ka nidba-bi ba-[ab-kur2]
103. dnanna uj3 u8-gin7 lu-a-na cu bal ba-da-ab-ak
104. lugal-bi e2-gal ni2-te-na zi im-ma-ni-in-gi4
105. di-bi2-dsuen e2-gal ni2-te-na i-si-ic ba-ni-in-la2-la2
106. e2-nam-til3-la cag4 hul2-la-ka-na er2 gig mu-un-ce8-ce8
107. a-ma-ru ki al ak-e cu im-ur3-ur3-re
108. ud gal-gin7 ki-a mur mi-ni-ib-ca4 a-ba-a ba-ra-e3
109. iri gul-gul-lu-de3 e2 gul-gul-lu-de3
110. lu2-lul lu2 zid-da an-ta nu2-u3-de3
111. urin lu2-lul-e lu2 zid-ra ugu-a-na DU-ce3
112.     ki-ru-gu2 1(DIC)-a-kam

113. ud-de3 mar-uru5-gin7 tec2-bi i3-gu7-e
114.     jic-gi4-jal2 ki-ru-gu2-da-kam

115. e2 kicki-a hur-saj-kalam-ma-ka cu hul ba-e-dug4
116. dza-ba4-ba4 ki-tuc [ki aj2-ja2-ni jiri3 kur2 ba-ra-an-dab5]
117. ama dba-u2 e2-[iri-kug-ga-na] [er2 gig mu-un-ce8-ce8]
118. a iri [gul-la e2 gul-la-ju10 gig-ga-bi im-me]
119. X [...]
2 lines missing
122. [a iri gul-la e2 gul-la-ju10 gig-ga-bi im-me]
123. ka-/zal-lu\ki iri ni2-ba lu-a cu suh3-a ba-ab-dug4
124. dnu-muc-da-ke4 iri ki-tuc ki aj2-ja2-ni jiri3 kur2 ba-ra-an-dab5
125. nitalam-a-ni dnam-ra-at munus sag9-ga-a er2 in-ce8-ce8-e
126. a uru2 gul-la e2 gul-la-ju10 gig-ga-bi im-me
127. id2-bi cag4-sug4-ga i3-jal2 a nu-un-de2
128. id2 den-ki-ke4 nam ku5-ra2-gin7 ka-bi-a ba-uc2
129. a-cag4-ga ce gu-nu nu-jal2 uj3-e nu-gu7-e
130. pu2-jickiri6-bi gir4-gin7 ba-hur-hur edin-bi sag2 ba-ab-di
131. mac2-ance nij2-ur2-4 nij2-zi-jal2 nu-mu-un-bu-e
132. nij2-ur2-4 dcakkan2-ke4 ni2 nu-mu-ni-ib-te-en-te-en
133. dlugal-mar2-da-ke4 iri-ni-ta bar-ta ba-da-gub
134. dnin-zu-an-na ki-tuc ki aj2-ja2-ni jiri3 kur2 ba-ra-an-dab5
135. a iri gul-la e2 gul-la-ju10 gig-ga-bi im-me
136. i3-si-inki ec3 kar-re nu-me-a a-e ba-e-dar
137. dnin-isin2si-in-na ama kalam-ma-ke4 er2 gig mu-un-ce8-ce8
138. a iri gul-la e2 gul-la-ju10 gig-ga-bi im-me
139. den-lil2-le dur-an-ki-ka jicmitum2-a ba-an-sag3
140. den-lil2-le iri-ni ec3 nibruki-a a-nir ba-ab-jar
141. ama dnin-lil2 nin ki-ur3-ra-ke4 er2 gig mu-un-ce8-ce8
142. a iri gul-la e2 gul-la-ju10 gig-ga-bi im-me
143. kec3ki an-edin-na dili du3-a cu lil2-la2 ba-ab-dug4
144. adabki-bu e2 id2-de3 la2-a re {ki-bal-ce3 ba-ab-dug4} {(1 ms. has instead:) a-e ba-da-ab-be6}
145. muc kur-ra-ke4 ki-nu2 ba-ni-ib-jar ki-bal-ce3 ba-ab-dug4
146. gu-ti-umki cag4 ba-ni-ib-bal-bal numun ba-ni-ib-i-i
147. dnin-tur5-re nij2-dim2-dim2-ma-ni-ce3 er2 gig mu-un-ce8-ce8
148. a iri gul-la e2 gul-la-ju10 gig-ga-bi im-me
149. ki zabalamki-a gi-gun4-na kug-ga cu lil2-la2 ba-ab-dug4
150. unugki-ta dinana ba-da-an-kar ki-erim2-e ba-ab-jen
151. e2-an-na ec3 ji6-par4 kug-ga erim2-e igi i-ni-in-bar
152. ji6-par4 kug nam-en-na-ba cu ba-e-la2-la2
153. en-bi ji6-par4-ta ba-da-an-kar ki-erim2-e ba-ab-de6
154. a iri gul-la e2 gul-la-ju10 gig-ga-bi im-me
155. ummaki ceg12-kur-ca3-ba-ke4 ud gig-ga ba-e-dal
156. [dcara2] [e2]-mah ki-[tuc] ki aj2-ja2-ni jiri3 kur2 ba-ra-an-dab5
157. [dnin]-mul-e iriki hul-a-na er2 gig mu-un-ce8-ce8
158. [iriki-ju10] la-la-bi lu2 nu-un-gi4-a-ju10 gig-ga-bi im-me
159. jir2-suki iriki ur-saj-je26-e-ne-ke4 im jir2-e ba-ab-dug4
160. dnin-jir2-su-ke4 e2-ninnu-ta jiri3 kur2 ba-ra-an-dab5
161. ama dba-u2 e2-iri-kug-ga-na er2 gig mu-un-ce8-ce8
162. a iri gul-la e2 gul-la-ju10 gig-ga-bi im-me
163. ud-ba inim ud-dam al-du7-du7 cag4-bi a-ba-a mu-un-zu
164. inim den-lil2-la2 zid-da-ac gel-le-ej3-de3 gab2-bu zu-zu-de3
165. den-lil2 lu2 nam tar-tar-re-de3 a-na bi2-in-ak-a-ba
166. den-lil2-le elamki lu2-kur2-ra kur-ta im-ta-an-e3
167. dnance dumu-gir15 iri bar-ra mu-un-na-tuc-am3
168. dnin-mar-ki-ra ec3 gu2-ab-ba-ka izi im-ma-da-an-te
169. kug na4za-gin3-bi ma2 gal-gal-e bal-ce3 i3-ak-e
170. nin nij2-gur11-ra-ni hul-lu til3-la-am3 kug dnin-mar-ki-ke4
171. ud-ba ud ka izi-gin7 bar7-ra-am3 im-ma-da-ab-tar-re
172. ki lagacki elamki cu-ni-a im-ma-ci-in-gi4
173. ud-bi-a nin-e ud-da-a-ni sa2 nam-ga-mu-ni-ib-dug4
174. dba-u2 lu2-ulu3-gin7 ud-da-a-ni sa2 nam-ga-mu-ni-ib-dug4
175. me-li-e-a ud-de3 cu-ni-a im-ma-ci-in-gi4
176. ud uru2 gul-gul-e cu-ni-a im-ma-ci-in-gi4
177. ud e2 gul-gul-e cu-ni-a im-ma-ci-in-gi4
178. ddumu-zid-abzu e2-bi ki-nu-nir-ca3-ba-ke4 ni2 im-ma-da-an-te
179. /ki\-[nu]-nir-ca3ki iri nam-dumu-gir15-ra-ka-ni kar-kar-re-de3 ba-ab-dug4
180. dnance iri-ni nijin6ki-a kur-re ba-ab-jar
181. sirara3ki ki-tuc ki aj2-ja2-ni hul-jal2-e ba-an-cum2
182. a iri gul-la e2 gul-la-ju10 gig-ga-bi im-me
183. ji6-par4 kug nam-en-na-ba cu ba-e-la2-la2
184. en-bi ji6-par4-ta ba-da-an-kar ki-erim2-e ba-ab-de6
185. gu2 id2-nun-na-dnanna-ka a2 dugud ba-ci-in-de6
186. mac-gana2-mac-gana2 e2-danna dnanna-ka tur3 dugud-gin7 ba-gul
187. lu2-kar-ra-bi mac kar-ra-gin7 ur im-me-da
188. ga-ecki ga-gin7 ur-re ba-an-de2 i3-gul-gul-lu-ne
189. alan dim2-ma ulutim2 sag9-ga-bi im-ze2-er-ze2-re-e-ne
190. a iri gul-la e2 gul-la-ju10 gig-ga-bi im-me
191. ji6-par4 kug nam-en-na-ba cu ba-e-la2-la2
192. en-bi ji6-par4-ta ba-da-an-kar ki-erim2-e ba-ab-de6
193. barag an-na-da gid2-da-bi a-nir ba-da-ab-sa2
194. jicgu-za an-na-bi nu-ub-gub saj me-te-a-ac li-bi2-ib-jal2
195. jicjicnimbar-gin7 gu2-guru5 ba-ab-dug4 tec2-bi ba-ra-an-kad4
196. ac-cuki e2 id2-de3 la2-a re a-e ba-da-ab-bu
197. nij2-erim2 nu-dib dnanna-ka lu2-erim2-e ba-an-dib
198. e2 ur5-re-am3 a-na-am3 ab-ak
199. e2-pu-uh2-ru-um-ma cag4-sug4-ga ba-ab-jar
200. ki-abrigki-ga ab2 lu amar lu-a re tur3 dugud-gin7 ba-gul
201. dnin-gublaga-ke4 ja2-bur-ta jiri3 kur2 ba-ra-an-dab5
202. dnin-i3-gara2-ke4 ni2-te-na er2 gig mu-un-ce8-ce8
203. a iri gul-la e2 gul-la-ju10 gig-ga-bi im-me
204. ji6-par4 kug nam-en-na-ba cu ba-e-la2-la2
205. en-bi ji6-par4-ta ba-da-an-kar ki-erim2-e ba-ab-de6
206. dnin-a-zu e2-gid2-da-ke4 jictukul ub-ba i-ni-in-gub
207. dnin-hur-saj e2-nu-tur-ra-ke4 ud hul ba-an-da-dal
208. tum12mucen-gin7 ab-lal3-ta ba-da-an-dal edin-na bar bi2-ib-gub
209. a iriki gul-la e2 gul-la-ju10 gig-ga-bi im-me
210. jic-ban3-da e2 er2-re jal2-la re gi er2-ra ba-an-gul
211. dnin-jic-zid-da jic-ban3-da jiri3 kur2 ba-ra-an-dab5
212. da2-zi-mu2-a nin iri-a-ke4 er2 gig mu-un-ce8-ce8
213. a uru2 gul-la e2 gul-la-ju10 gig-ga-bi im-me
214. ud-bi-a u18-lu lu2 ji6-a ba-an-dur2-ru-ne-ec
215. kuaraki hul-hul-lu-de3 lu2 ji6-a ba-an-dur2-ru-ne-ec
216. dnin-e2-HA-ma ni2-te-na er2 gig mu-un-ce8-ce8
217. a uru2 gul-la e2 gul-la-ju10 gig-ga-bi im-me
218. dasar-lu2-hi ul4-ul4-la tug2 ba-an-mur10 LUL.KU mu-un-DU
219. dlugal-ban3-da ki-tuc ki aj2-ja2-ni jiri3 kur2 ba-ra-an-dab5
{
(1 ms. adds 1 line:)
219A. /d\[nin-sumun2] [...]
}
220. a uru2 gul-la e2 gul-la-ju10 gig-ga-bi im-me
221. eridugki a gal-la dirig-ga a naj-e ba-am3-u-gun3?
222. bar-ba edin-lil2-e du3-a X X [...]
223. lu2 zid ki-lul-la X X [...]
224. dka-he2-jal2-la digi-he2-jal2-la [...]
225. juruc-me-en ud nu-/gul\-la-/me-en\ mu-[X]-gul-[...]
226. ud nu-gul-la hi-li nu-til-la-me-en [...] mu-/un\-[...]
227. /jictackarin\-gin7 ba?-sag9-ga-me-ec i3-[sag3]-ge-de3-[en-de3-en]
228. X X-gin7 igi gun3-gun3-me-ec i3-[sag3]-/ge\-de3-en-de3-en
229. alan-gin7 kuc3-kuc3-a de2-a-me-ec i3-[sag3]-/ge\-de3-en-de3-en
230. [gu]-ti-umki lu2 ha-lam-ma-ke4 me-ze2-er-ze2-re-ne
231. [a-a] [d]en-ki-ra abzu eridugki-ce3 cu-a ba-en-de3-en-gi4
232. [X X] a-na im-me-en-da-na a-na bi2-in-tah-e-da-na
233. [X X] X a-na im-me-en-da-na a-na bi2-in-tah-e-da-na
234. [X X X X X X] eridugki-ga-ta he2-em-da-sar?-da-na
235. [ud-da ...] /ha?\-ba-gub-bu-da-na jissu ba-X-mu
236. ji6-a X X-ke4 ha-ba-gub-bu-da-na ud-de3 ba-ra-an-tuku
237. ud-da gub saj sag3-ge-me-a a-na cu ba-ni-ti-en-de3-en
238. ji6-da gub u3 nu-ku-me-a a-na u2-gu me-de2-de3-en-de3-[en ]
239. den-ki-ke4 uru2-zu nam ha-ba-da-an-kud ki-erim2-e ha-ba-an-cum2
240. me-en-de3-/en\ eridugki-ta jal2-la-da a-na-ac mu-e-de3-la2-e-ne?
241. jicjicnimbar-gin7 cu nu-dug4-ga-me-a a-na-ac mu-e-gul-gul-lu-ne
242. jicma2 gibil-gin7 sa bil2-la2 nu-ak-e a-na-ac mu-e-ze2-er-ze2-re-ne
243. den-ki-ke4 igi-ni ki kur2-ra ba-an-jar-ra-ba
244. UD? X X nam-tag dugud-da-ke4 jic hul mu-un-ne-tag
245. [...] UM? ba-da-an-zig3-ge-ec-a ildum2-ba mu-un-sa4?-ec
246. [den-ki]-ke4 eridugki-ga-ta jiri3 kur2 ba-ra-an-dab5
247. [ddam-gal]-nun-na ama e2-mah-a er2 gig mu-un-ce8-ce8
248. a uru2 gul-la e2 gul-la-ju10 gig-ga-bi im-me
249. ji6-par4 kug nam-en-na-ba cu ba-e-la2-la2
250. en-bi ji6-par4-ta ba-da-an-kar ki-erim2-e ba-ab-de6
251. urim5ki-ma lu2 u2-ce3 nu-jen lu2 a-ce3 nu-jen
252. u2-ce3 jen-bi u2-ta ba-jen hur nu-um-mi-ib-gur-ru
253. a-ce3 jen-bi a-ta ba-jen hur nu-um-mi-ib-gur-ru
254. sig-ce3 elamki-ma ba-ci-in-gub-bu gaz-de3 i3-TIL-e
255. nim-ce3 ha-al-ma lu2-kur2-ra-ke4 cu-ni [...]-X-/jar\
256. ti-id-nu-umki-e ud cu2-uc jicmitum2-a ur2-ra ba-ni-in-jar
257. sig-ce3 elamki-ma u2-a e3-a-gin7 KU-bi im-[...]-X-le
258. nim-ce3 in-dal tum9 dal-la-gin7 edin-na [...] X
259. urim5ki am gal u3-na gub-ba-gin7 gu2 ki-[ce3 ba-ab-jar]
260. den-lil2-le lu2 nam tar-tar-re-de3 a-na [bi2-in-ak-a-ba]
261. 2-kam-ma-ce3 elamki lu2-kur2-ra kur-ta [ba-ra-e3]
262. e2 saj-kal-la jiri3 du3-a um-ma-[...]
263. kisigaki hul-hul-lu-de3 lu2 10 /lu2\ [5 ...]
264. ud 3-e ji6 3-e la-ba-da-te? X X [...] iri jical-e ba-ab-/ra\-[ah]
265. kisigaki ddumu-zid saj-gin7 ba-ra-[e3] cu-ni ba-da-ab-du3
266. e2-ce3 kug jiri3 [...] a KA [...]
267. zig3-ga u5-[a ...] /zig3\-ga u5-[a ...]-am3?
268. [...]-un-DU zig3-ga u5-[a ...]-am3?
269. [...] si gal-gal ba-an-u5-bi X [...]-X-DU-ec
270. [...] si tur-tur mac2 palil-gin7 X [...]-/dab5?\-be2-ec
271. nij2-gur11-ra-ni-ta ba-da-u5 kur-ce3 ba-jen
272. i-lu kur jiri3 nu-jal2-la-ba gal-gal-bi /mi\-[ni-ib2-be2]
273. ga-ca-an-jen nij2-gur11-ja2 ga-ba-da-[u5 ki]-ba gi4-in de3-jen
274. kug na4za-gin3-ju10-ta ga-ba-e-[da]-u5 ki-ba gi4-in de3-jen
275. ki-ba na-aj2-gi4-in nam-lu2-ulu3 [X] X saj a-ba-a ba-ab-us2-e
276. ki-ba na-aj2-gi4-in elamki [X] X X saj a-ba-a ba-ab-us2-e
277. a iri gul-la e2 gul-la-ju10 gig-[ga]-bi im-me
278. nin-ju10 lu2-kur nu-me-a /kur?-re?\ ba-ab-jen
279. d[ama]-/ucumgal\-an-na kisiga[ki] [...]-ja2
280. [X] /MU?\ uru2-gin7 nu-X [...] X
281.     ki-/ru\-[gu2 2-kam-ma]

282. [...] X X [...]
1 line missing
284.     [jic-gi4-jal2 ki-ru-gu2-da-kam]

4 lines missing
289. [...] u2-a ba-/ci\-[in-...]
290. [... u2]-a ba-ci-in-X [...]
291. [...] /gub\-bu-bi cukur2 mah-gin7 ba-e-X [...]
292. den-lil2-le abul-la mah-ba jicig tum9-ma bi2-[in-gub]
293. urim5ki-ma lu2 u2-ce3 nu-jen lu2 a-ce3 nu-jen
294. uj3-bi a tul2-la2 de2-a-gin7 cu i3-ni10-ni10?-ne
295. usu-bi ni2-bi-a nu-jal2 jiri3-bi ba-ra-an-dab5
296. den-lil2-le cag4-jar lu2 nij2-hul iri-a ba-an-da-dab5
297. nij2 iri gul-gul-e nij2 e2 gul-gul-e iri-a ba-an-da-dab5
298. nij2 igi-bi-ce3 jictukul-e la-ba-gub-bu-a iri-a ba-an-da-dab5
299. cag4 nu-si-si igi nijin2-bi iri-a ba-an-da-dab5
300. urim5ki-ma gi dili du3-a-gin7 saj sag3-ge nu-ja2-ja2
301. uj3-bi ku6 cu dab5-ba-gin7 zi-bi mi-ni-in-tum2-tum2-mu
302. tur mah-bi i3-barag2-barag2-ge-ec lu2 nu-um-zi-zi-zi
303. LUGAL.BI.GUB dub-la2-a u5-a nij2-gu7 la-ba-na-jal2
304. lugal nij2 sag9-ga gu7-gu7-a cukur2-re im-ma-an-dab5
305. ud im-cu2-cu2 igi im-la2-e cag4-ka-tab i3-zu-zu
306. e2-lunga-na kac nu-un-jal2 munu4-bi nu-um-jal2
307. e2-gal-la-na nij2-gu7 la-ba-na-jal2 tuc-u3-bi nu-ub-du7
308. ja2-nun mah-a-ni ce nu-um-si-si zi-bi la-ba-ci-in-tum2-tum2-mu
309. guru7-du6 guru7-mac-e dnanna-ka dezina2 nu-un-jal2
310. kij2-sig unu2 gal dijir-re-e-ne-ke4 cu ba-e-la2-la2
311. unu2 gal-bi kurun lal3 muc3 im-ma-ab-tum2
312. jiri2-PA-a gud udu gu7-ra u2-cim-e ba-da-nu2
313. gir4 mah-ba gud udu nu-ak-e ir nu-mu-un-ur5-ur5-e
314. bur-saj-ta a2 sikil dnanna-ka za-pa-aj2-bi ba-ra-gul
315. e2 gud-gin7 gu3 bi2-ib-dug4-ga-a re sig9-ga-bi ba-du3
316. mu-un-DU kug-ga si nu-un-sa2-e jar-ra-bi ba-su3-ud
317. na4kinkin(HAR) jicnaja3 jic-gan-na i3-dur2-dur2 lu2 nu-um-ci-gam-e
318. kar-za-gin3-na dnanna-ka a-e ba-da-la2
319. a jicma2-saj-ja2-ke4 gu3 nu-mu-un-gi4-gi4 asil3-la2 nu-mu-un-cub
320. unu2-RI-ban3-da dnanna-ka sahar ba-da-dub-dub
321. u2numun2 ba-da-mu2 u2numun2 ba-da-mu2 gir re-e ba-an-mu2
322. ma2 ma2-gur8-ra kar-za-gin3-na muc3 im-ma-ab-tum2
323. id2 ma2-gur8-ra ba-ab-du7-a-za a2 nu-un-sud-sud-e
324. ezen ki jarza-ka jic-hur-bi ba-da-kur2
325. ma2 nesaj-ja2 a-a ugu-na-ka nesaj nu-mu-un-na-ab-tum3
326. ninda nidba-bi den-lil2 nibruki-ce3 nu-mu-da-an-ku4-ku4
327. id2-bi cag4-sug4(source: BU)-ga i3-jal2 ma2-gur8 nu-mu-un-dib-be2
328. gu2 tab 2-a-bi jiri3 nu-jal2 u2 gid2-da ba-am3-mu2
329. e2tur3 dajal-la dnanna-ka dub-ba-an-bi ba-si-il
330. gi-sig jickiri6-ka cu ba-e-[la2]-la2 gu2-jiri3 ba-an-jar-jar
331. ab2-cilam-ma amar-bi ba-[da-ab]-dab5 ki-erim2-e ba-ab-de6
332. ab2 u2munzer-e edin ki nu-zu-bi jiri3 kur2 ba-ra-an-dab5-be2-ec
333. dga-a-a-u2 lu2 ab2 ki aj2-ja2 jictukul curum-ma ba-cub
334. dcu-ni-dug3 i3 ga-ar3-ra du6-ul-du6-ul-e i3 ga-ar3-ra nu-du6-ul-du6-ul
335. i3-bi lu2 i3 nu-zu-ne i3-du9-du9-ne
336. ga-bi lu2 ga nu-zu-ne i3-im-muc3-muc3-u3-ne
337. e2tur3-ra dugcakir3-e dun5-dun5-e gu3 nun nu-mu-ni-ib-be2
338. ne-mur dugud-gin7 i3-ra-a re i-bi2-bi ba-gul
339. [...] X unu2 gal dnanna-ka [...]
340. dsuen-e a-a-ni den-lil2-ra er2 mu-un-na-ce8-ce8
341. a-a ugu-ju10 iriki-ju10 a-na-ra-du3? a-na-ac ba-e-da-gur-re-en
342. den-lil2 urim5ki-ju10 a-na-ra-du3? a-na-ac ba-e-da-gur-re-en
343. ma2 nesaj-e a-a ugu-na-ce3 nesaj nu-mu-un-na-ab-tum3
344. ninda nidba-zu den-lil2 nibruki-ce3 nu-mu-un-na-da-an-ku4-ku4
345. en iri bar-ra en iri cag4-ga lil2-e ha-ba-ab-lah5-e-ec
346. urim5ki iriki jical-e ri-a-gin7 du6-du6-da ba-cid
347. du6-ur2 ki ni2 dub2-bu den-lil2-la2 ec3 lil2-la2 ba-ab-jar
348. den-lil2 iri-zu igi bar-ra e2-ri-a sug4-ga
349. nibruki iri-zu igi bar-[ra e2-ri-a sug4-ga]
350. urim5ki-ma ur-bi ur2 bad3-da si-im-si-im nu-mu-un-ak-e
351. tul2 saj bulug-ga ganba-bi-a ki li-bi2-ib-de5-de5-ge
352. a-a ugu-ju10 iriki-ju10 dili-bi-ta a2-zu-ce3 nijin2-am3-ci-ib
353. den-lil2 urim5ki-ju10 dili-bi-ta a2-zu-ce3 nijin2-am3-ci-ib
354. e2-kic-nu-jal2-ju10 dili-bi-ta a2-zu-ce3 nijin2-am3-ci-ib
355. urim5ki-ma numun ha-ra-ni-ib-e3 uj3 hu-mu-ra-ab-dajal-la
356. me ki-en-gi-ra ba-da-ha-lam-e ki-bi ha-ra-ab-gi4-gi4
357.     ki-ru-gu2 3(EC5)-kam-ma

358. a e2 zid e2 zid a lu2-bi lu2-bi
359.     jic-gi4-jal2-bi-im

360. den-lil2-le dumu-ni dsuen-ra mu-un-na-ni-ib-gi4-gi4
361. uru2 lil2-la2 cag4-bi a-nir-ra gi er2-ra ba-am3-mu2
{
(1 ms. adds 1 line:)
361A. [cag4-bi] a-ce-ra gi er2-ra ba-am3-mu2
}
362. cag4-bi-a a-nir-ra ud mi-ni-ib-zal-zal-e
{
(1 ms. adds 1 line:)
362A. [dumu]-ju10 dumu-gir15 ni2-za-bi-me-en er2-ra na-bi-me-en
}
363. dnanna dumu-gir15 ni2-za-bi-me-en er2-ra na-bi-me-en
364. di-til-la inim pu-uh2-ru-um-ma-ka cu gi4-gi4 nu-jal2
365. inim dug4-ga an den-lil2-la2-ka cu bal-e nu-zu
366. urim5ki-ma nam-lugal ha-ba-cum2 bal da-ri2 la-ba-an-cum2
367. ud ul kalam ki jar-ra-ta zag uj3 lu-a-ce3
368. bal nam-lugal-la saj-bi-ce3 e3-a a-ba-a igi im-mi-in-du8-a
369. nam-lugal-bi bal-bi ba-gid2-e-de3 cag4 kuc2-u3-de3
370. dnanna-ju10 na-an-kuc2-kuc2-u3-de3 iriki-zu e3-bar-ra-ab
371. ud-ba lugal-ju10 dumu-gir15-ra ur5-ra-ni ba-an-uc2
372. en dac-im2-babbar dumu-gir15-ra cag4 hul-lu im-ma-an-dim2
373. dnanna lu2 iriki-ni ki aj2-ja2 iriki-ni ba-ra-e3
374. dsuen-e urim5ki ki aj2-ja2 jiri3 kur2 ba-ra-an-dab5
375. dnin-gal-e gir5 iriki-ni-ta ki kur2-ce3 du-u3-de3
376. tug2 ul4-ul4-la-bi ba-ra-an-mur10 iriki-ta ba-ra-e3
377. urim5ki-ma da-nun-na-bi bar-ra ba-sug2-ge-ec
378. urim5ki-ma NE ni2-bi ki X X X-a ba-a-te
379. urim5ki-ma jic-bi tur5-ra-am3 gi-bi tur5-ra-am3
380. bad3-bi en-na nijin2-na-bi-da a-nir ba-da-sa2
381. ud cu2-uc-e jictukul-e igi-bi-ce3 saj i3-sag3-sag3-ge
382. urim5ki-ma urudha-zi-in gal-gal-e igi-bi-ce3 u3-sar i3-ak-e
383. jic-gid2-da a2 me3-ke4 si bi2-ib-sa2-sa2-e-ne
384. jicpan gal-gal jicilar kucgur21ur3-ra tec2 im-da-gu7-e
385. jicti zu2-ke4 muru9 cej3-ja2-gin7 bar-ba mi-ni-in-si
386. na4 gal-gal-e ni2-bi-a pu-ud-pa-ad im-mi-ib-za
{
(1 ms. adds 1 line:)
386A. ud cu2-uc iriki-ta im-hul-e mu-un-da-an-gi4-gi4
}
387. urim5ki ne3-bi-ta nir-jal2 gab2-gaz-e ba-gub
388. uj3-bi lu2-erim2-e a2 bi2-ib2-jar jictukul-e la-ba-sug2-ge-ec
389. iriki jictukul-e saj nu-cum2-mu-a cag4-jar-e im-us2
390. cag4-jar-e iriki a-gin7 ba-e-si ja2-la nu-um-ta-dag-ge
391. cag4-jar-e igi-bi im-gam-me-e sa-bi im-lug-gu2-ne
392. uj3-bi a-nijin2-na ba-e-si zi HAR i-ak-e
393. lugal-bi e2-gal ni2-te-na-ka zi gig mu-un-pa-an-pa-an
394. nam-lu2-ulu3-bi jictukul ba-e-cub jictukul ki bi2-ib2-tag
395. cu-bi gu2-bi-ce3 ba-ci-ib-ri-ri er2 mu-un-ce8-ce8-ne
396. ni2-bi-a ad mi-ni-ib-gi4-gi4 inim im-car2-car2-e-ne
397. me-li-e-a dug4-ga-me nam-ju10 tah-me nam-ju10
398. en3-ce3-am3 ka garac2-a-ka i-im-til-le-de3-en-de3-en
399. urim5ki-ma cag4-bi nam-uc2-am3 bar-bi nam-uc2-am3
400. cag4-bi-a nij2 cag4-jar-ra-ka i-im-til-le-de3-en-de3-en
401. bar-bi-a jictukul elamki-ma-ka ga-nam ba-[e-til]-le-en-de3-en
402. urim5ki-ma lu2-erim2-e a2 bi2-ib-jar ga-nam ba-til-e-de3-<en>-de3-en
403. zi-bi murgu-bi-ce3 i3-ak-e gu3 tec2-a bi2-in-sig10-ge5-ec
404. {e2-gal a ba-cub-ba cu ba-e-la2-la2 jicsi-jar-bi bi2-in-bur12-bur12-uc} {(1 ms. has instead:) abul-la-bi jicsi-jar bi2-in-du8-du8-uc jicig-bi ud-de3 gub-bu}
405. elamki-e a mah e3-a-gin7 gidim im-ma-ni-ib2-jar
406. urim5ki-ma jictukul-e dugsahar2-gin7 saj gaz i3-ak-e
407. lu2-kar-ra-bi dub3 nu-um-zil-e bad3 zag-ga bi2-in-dab5-be2-ec
{
(1 ms. adds 3 lines:)
407A. ku6 a-nijin2-na lug-ga-gin7 zi-bi in-tum3-tum3-mu-ne
407B. e2-kic-nu-jal2 dnanna-ka lu2-erim2-e ba-e-dab5
407C. sig an-jar-bi dugud jal2-la-a re im-ze-er-ze-re-ne
}
408. urudalan uzugx(AN.ZAG)-ge si-a-bi gu2-guru5 ba-an-ne-ec
409. dnin-i3-gara2 ajrig mah-e erim3-ma cu bi2-in-dag
410. jicgu-za-bi igi-bi-ta ba-e-cu2 sahar-ra ba-da-an-tuc
411. ab2 mah-bi si-muc3-bi ba-ra-an-dab5-be2-ec si-bi ba-ra-an-kud
412. gud du7-du7-bi udu u2 gu7-a-bi jictukul-e ba-an-sag3-sag3
{
(1 ms. adds 1 line:)
412A. jicjicnimbar-gin7 gu2-gur5-ru ba-ab-dug4 tec2-bi ba-ra-an-kad4
}
413. jicjicnimbar urud nij2 kalag-ga a2 nam-ur-saj-ja2
414. u2numun2-gin7 ba-bur12 u2numun2-gin7 ba-ze2 ur2-ba ti mi-ni-ib-bal
415. saj sahar-ra ki ba-ni-ib-u2-us2 lu2 zi-zi la-ba-tuku
416. jicze2-na-bi gu2 ba-an-/guru5\-uc saj cu bi2-in-hu-hu-uz
417. jica2-an zu2-lum-ma-bi pu2 du7-du7 ba-ra-an-BU-BU-de3-ec
418. gi-zi NAB? kug-ge mu2-a cu ba-e-la2-la2
419. gu2-un gal-gal-e mi-ni-in-jar-re-ec-a kur-re i3-il2-il2
420. e2-e jic-bur2 mah-bi ba-cub bad3-si-bi ba-gul
421. mac2-ance zid-da gab2-bu-ba gu2-da la2-a-bi
422. ur-saj ur-saj-e gaz-a-gin7 igi-bi-ta ba-cu2
423. ucumgal ka du8-a pirij-ja2 ni2 guru3-gur3-ru-bi
424. am dab5-ba-gin7 saman-e bi2-in-cub-bu re ki-erim2-e ba-ab-de6
425. ki-tuc kug dnanna tir cim jicerin-na-gin7 ir-si-im-bi ba-gul
{
(1 ms. adds 1 line:)
425A. a-sal-bar-bi kug-sig17 na4za-gin3 ki X X-da dug4-ga-a-bi
}
426. e2 u6 di-bi i3-dug3-ga re u6 di-bi ba-gul
427. ud-gin7 kur-kur-ra im-si-a an-usan an-na-gin7 ba-e-du3
428. jicig-bi mul?-an-na X-bi [...] dug4-ga-ba
429. urudbulug gal-gal-e KA [...]-gi4-gi4 ba-ra-an-bur12-bur12-uc
430. kuca2-si-bi a-ba /IM\ [...] en3-bi-ce3 TUG2 PI [...] ba-ab-dug4
431. jicnu-kuc2-u3-bi-da lu2-kar-ra-gin7 er2 gig i3-ce8-ce8
432. jicsaj-kul jicsuhub4 kug-ga jicig gal gu2 gid2-i nu-mu-na-ab-be2
433. jicig gu2 gid2-da za-pa-aj2-bi ba-cub lu2 gu2 gid2-i la-ba-an-tuku
434. [...] X-ba-ce3 ba-la2-la2 sila dajal-la ni2-bi ba-ab-jar
435. ki X X-da ki lugal gub-bu-na nidba-bi ba-kur2
436. ki? kug-ba tigi2 cem5 kuca2-la2-e gu3 nun nu-mu-ni-ib-be2
437. jictigi2 mah-ba er2? X [...]-si-a cir3 kug nu-mu-na-ab-be2
438. dub-la2-mah ki nam tar-re-de3 ka-inim-ma nu-jal2
439. jicgu-za ki di ku5-ru-bi nu-mu-un-gub di si nu-um-sa2-e
440. dalamuc-e jicjidru ba-da-an-cub cu-ni gu4?-ud-gu4-ud
441. a2-nu2-da kug dnanna-ka balaj na-mu-un-tag-ge-ne
442. dub-cen kug lu2 igi nu-bar-re-dam erim2-e igi i-ni-in-bar
443. jic-nu2 gi4-rin-na nu-um-gub u2 za-gin3 nu-mu-un-barag2
444. urudalan uzugx(AN.ZAG)-ge4 si-a-ba gu2-guru5 ba-an-ne-ec
445. engiz ensi kicib3-jal2-bi ec-da cu li-bi2-in-du7-uc
446. gu2 ki-ce3 jal2-la-ba ba-e-sug2-sug2-ge-ec kur2-re ba-ab-lah5-e-ec
447. uz-ga kug cu-luh dadag-ga cag4-gada-la2-be2-e-ne
448. jic-hur me kug-ga ba-da-ha-lam-e iri kur2-ce3 ba-e-re7-ec
449. dsuen-e cag4 hul-la-ni a-a-ni-ir ba-ci-in-jen
450. igi a-a ugu-na den-lil2-la2-ce3 dug3 ki ba-ni-in-us2
451. a-a ugu-ju10 en3-tukum-ce3 nij2-kas7-ju10 igi erim2 mu-e-du8 en3-tukum-ce3 SAR
452. nam-en nam-lugal cum2-ma-za-am3 X mu-e-ci-de2?
453. a-a den-lil2 lu2 a2 aj2-e dug4-ga zid
454. inim kug-zu kalam-ma [...]
455. [di] nij2 kur2-zu /cag4\ [...]
456. cag4 zu-mu-ug-ga i-zi-gin7 hu-luh-ha-za igi zid bar-mu-un-ci-ib
457. a-a den-lil2 nam mu-e-tar-ra jalga ba-ra-an-du8-du8
458. siki-pa nam-en-na suh kece2-da-ja2
459. ud sikil mah luh-luh X X [...] X tug2-mu-dur7-ra mi-ni-in-mur10
460. den-lil2-le dumu-ni dsuen-ra inim zid mu-un-na-ab-be2
461. dumu-ju10 iri nam-he2 giri17-zal ca-ra-da-du3-a bal-zu ba-ci-ib-tuku
462. iriki gul bad3 gal bad3-si-bi sig10-ge5 u3 ur5-re bal an-ga-am3
463. sa2 mi-ri-ib-dug4-ga bal ud ku10-ku10-ga-bi-ir jal2-lu ca-ra-dug4
464. dur2-u3 re ki-tuc e2-temen-ni2-gur3-ru-za zid-de3-ec du3-du3-am3
465. urim5ki giri17-zal-la he2-en-du3 uj3 he2-en-ci-gam-e
466. ur2-bi-a nij2 he2-en-jal2 dezina2 he2-eb2-da-tuc
467. pa-bi-a giri17-zal he2-en-jal2 dutu he2-en-da-hul2
468. jicbancur-ba he2-jal2 dezina2-ka gu2-da he2-em-mi-ib-la2
469. urim5ki iri an-ne2 nam tar-re ki-bi ha-ra-ab-gi4-gi4
470. den-lil2-le gu3 zid de2-am3 gu2 an-ce3 he2-en-zig3
471. dnanna-ra ma-da sig igi-nim-ma gu2 hu-mu-na-ab-dirig
472. dsuen-ra kaskal kur-ra-ke4 si he2-en-na-sa2-e
473. muru9-gin7 ki us2-sa-a-gin7 cu mu-un-na-ja2-ja2
474. inim dug4-ga an den-lil2-la2-kam cu zid he2-ja2-ja2
475. a-a dnanna iriki-ni urim5ki-ma saj il2-la mu-un-jen
476. cul dsuen e2-kic-nu-jal2-la-ce3 im-ma-da-an-ku4-ku4
477. dnin-gal-e agrun kug-ga-na ni2 mu-ni-ib-te-en-te-en
{
(1 ms. adds 1 line:)
477A. urim5ki-ma e2-kic-nu-jal2-la-na im-ma-da-an-ku4-ku4
}
478.     ki-ru-gu2 4(LIMMU5)-kam-ma

479. iriki lil2-la2-am3 cag4-bi a-ce-ra gi er2-ra ba-an-mu2
480. cag4-bi a-ce-ra gi er2-ra ba-an-mu2
481. uj3-bi a-ce-er-ra ud mi-ni-ib-zal-zal-e
482.     jic-gi4-jal2-bi-im

483. ud gig-ga ud gaba-zu zig3-ga-ab ud e2-za gi4-bi
484. ud uru2 gul-gul ud gaba-zu zig3-ga-ab ud e2-za gi4-bi
485. ud e2 gul-gul ud gaba-zu zig3-ga-ab ud e2-za gi4-bi
486. ud ki-en-gi-ra ba-e-zal-la kur-re he2-eb-zal
487. ud ma-da ba-e-zal-la kur-re he2-eb-zal
488. kur ti-id-nu-umki-ma-ka he2-eb-zal kur-re he2-eb-zal
489. kur gu-ti-umki-ma-ka he2-eb-zal kur-re he2-eb-zal
490. kur an-ca4-anki-na-ka he2-eb-zal kur-re he2-eb-zal
491. an-ca4-anki-e im-hul dal-la-gin7 kuc7 he2-ni-ib-su-su
492. cag4-jar lu2 nij2-hul he2-en-da-dab5 uj3 he2-em-ci-ib-gam-e
493. me an-na jic-hur uj3 gen6-ne2 an-ne2 nam-kur2-re
494. di kud ka-ac bar-re uj3 si sa2-sa2-e an-ne2 nam-kur2-re
495. kaskal kalam-ma-ke4 jiri3 ja2-ja2 an-ne2 nam-kur2-re
496. an-ne2 den-lil2-bi nam-kur2-ru-ne an-ne2 nam-kur2-re
497. den-ki dnin-mah-bi nam-kur2-ru-ne an-ne2 nam-kur2-re
498. id2idigna id2buranun-na a-bi tum3-de3 an-ne2 nam-kur2-re
499. cejx(IM.A) an-na ki-a ce gu-nu an-ne2 nam-kur2-re
500. id2 a-bi-da a-cag4 ce-bi-da an-ne2 nam-kur2-re
501. ambar-ambar-re ku6 mucen tum3 an-ne2 <nam-kur2-re>
502. jic-gi gi sumun gi henbur mu2-mu2-de3 an-ne2 nam-kur2-re
503. an-ne2 den-lil2-bi nam-kur2-ru-ne
504. den-ki dnin-mah-bi nam-kur2-ru-ne
505. pu2-jickiri6 lal3 jectin u3-tud
506. an-edin-na jicmac2-gurum u3-[tud]
507. e2-gal-la zi su3-ud-jal2 [u3-tud]
508. a-ab-ba he2-jal2 nij2 u3-tud an-[ne2] [nam-kur2-re]
509. ma-da uj3 lu-a sig igi-nim-ma an-[ne2] [nam-kur2-re]
510. an-ne2 den-lil2-bi nam-kur2-re-ne an-ne2 nam-kur2-re
511. den-ki dnin-mah-bi nam-kur2-re-ne [an]-ne2 nam-kur2-re
512. iri du3-du3-a uj3 [car2-car2]-ra
513. an ki nijin2-na uj3 saj sig10-ga
514. dnanna nam-lugal-zu dug3-ga-am3 [ki]-za gi4-ni-ib
515. urim5ki bal dug3 nam-he2 ud he2-ni-ib-su3-ud-de3
516. uj3-bi u2-sal-la he2-eb-nu2 e-ne su3-ud he2(source: bi)-em-ak?
517. a nam-lu2-ulu3 ba-tu11 KU-re egir3-re mu-lu er2 a-ce-re
518. dnanna a iri-zu a e2-zu a nam-lu2-u18-lu-zu
519.     ki-ru-gu2 5(IA2)-kam-ma-am3


Print sources

Falkenstein 1953, p. 192-213: translation

Kramer 1969b, p. 611-619: translation

Kraus 1968: commentary

Krecher 1980-83: commentary

Michalowski 1989: composite text, score transliteration, translation, commentary

Römer 1989a, p. 700-707: translation, commentary (ll. 1-75)

Electronic sources

Civil 1989l: composite text

Krecher 1996: composite text

Krecher 1996a: composite text, translation

Cuneiform sources

Ash 1926,396 (OECT 5 11; photo pl. 1))

CBS 2154 (PBS 10/4 6; photo pl. 2))

CBS 2222 (PBS 5 20) + CBS 2279 (STVC 31)(both photo pl. 3)

CBS 2299

CBS 2307 + N 2430 + CBS 9204 (SEM 96) + CBS 9878 (SEM 95)(all fig. 1, photo pl. 4)

CBS 2359 (PBS 10/2 19; photo pl. 5)

CBS 4577 (PBS 10/2 4; photo pl. 6)

CBS 4593 (STVC 25; photo pl. 7)

CBS 8324 (STVC 27; photo pl. 7)

CBS 9245 (fig. 2) + CBS 13112 (STVC 28)(both pl. 8)

CBS 10342 (STVC 29; photo pl. 9)

CBS 12671 (STVC 26; photo pl. 9)

CBS 15178 (PBS 5 21) + CBS 15305 (both photo pl. 10)

HS 1525 (TMH 4 26) + HS 2508 + HS 2551 + HS 1523 (TMH 4 58; all WK 62f.)

N 1735 + N 1764 + N 1783 + N 6287 (all fig. 3, photo pl. 11f.) + Ni 4414 (ISET 1 95)

N 1775 ***

N 1778 + N 1781 (both fig. 4, photo pl. 13f.)

N 2624 + N 3084 (both fig. 5, photo pl. 14)

N 3123 (fig. 6, photo pl. 14)

N 3253 (fig. 7, photo pl. 15)

N 3381

N 3626 (fig. 8, photo pl. 15)

N 3740

N 6722 (fig. 9, photo pl. 15)

N 7322

Ni 350 (BE 31 3)

Ni 1089

Ni 1578 (BE 31 2)

Ni 2281 (SLTN 100)

Ni 2519 (SRT 51)

Ni 4079 (ISET 2 5)

Ni 4203 (ISET 1 79)

Ni 4277 (ISET 1 85)

Ni 4279 (ISET 1 85)

Ni 4338 (ISET 1 146)

Ni 4281 (ISET 1 85)

Ni 9461 (ISET 1 170)

Ni 9637 (ISET 1 118)

Ni 9944 (ISET 1 146)

Ni 9951 (ISET 2 61)

UET 6 124 = U 16900E

UET 6 125

UET 6 126 + UET 6 127 (+) UET 6 *24 + UET 6 *139 + UET 6 *242 + UET 6 *434 (all photo pl. 16)

UET 6 128

UET 6 129

UET 6 130 + UET 6 *157

UET 6 131 = U 16900B

UET 6 132 = U 16900H

UET 6 133

UET 6 134 = U 16858

UET 6 *21 + UET 6 *22 (both photo pl. 17)

UET 6 *26 (photo pl. 17)

UET 6 *272 (photo pl. 17)

UM 29-15-414 (fig. 10, photo pl. 18)

YBC 4160 (fig. 11, photo pl. 19)

3N-T318B = A 30218B + 3N-T321 = UM 55-21-305 (both fig. 12, photo pl. 20f.)

3N-T666 = IM 58605 + 3N-T917,386 (SLFN pl. 12) + 3N-T917,402 (SLFN pl. 12) (all fig. 13, photo pl. 22f.)

3N-T900,3 (SLFN pl. 12; photo pl. 23)

L 74.150 (cf. Syria 53 76f.; photo pl. 24)


Revision history

24.iv.1998-15.v.1998: GC, editor: standardisation
02.vi.1998-11.vi.1998: JAB, editor: proofreading
10.xi.1999: GC, editor: SGML tagging
15.xii.1999: ER, editor: proofreading SGML
15.xii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford