ETCSLtransliteration : c.2.4.2.05 ETCSL homepage

A praise poem of Culgi (Culgi E)

1. den-lil2 temen an ki-bi-da (Cited in OB catalogue in the Louvre, 0.2.02, line 61)
2. cibir kalam ge-en-gen6-ne2 cu du8
3. su4-un-su4-un-na-ni kur-ra dib-dib-be2
4. me ni2-te-na-ke4 giri17 cu jal2
5. den-lil2 sipad da-ri2 kalam-ma-ke4
6. dcul-gi lugal urim2ki-ma-me-en
7. igi du8-a bar-ra-na gu3 zid ma-ni-in-de2
8. en-e cag4 gu2-bi gi4-a-na jidru ma-ni-in-cum2
9. ceg12 eridugki-ga-ta aga zid ak-me-en
10. unugki-ta suhsu-uh za-gin3 kece2-ra2-me-en
11. sipad ki aj2 dnanna-me-en barag-ga tum2-ma-me-en
12. inim den-lil2-la2-ke4 nij2 sag9-ga ki-car2-ra ma-ab-de6
13. u2 il2-la-ja2 igi im-ma-ni-in-du8 gu3 hul2-la ma-an-de2
14. lugal mu cir3-ra he2-du7-me-en
15. dcul-gi-me-en cudu3 za3-mi2-ja2 silim-ec2 ga-dug4
16. dnin-tur5 nij2-nam-ma i3-me-en-na-ja2
17. dijir-re-ne-er gub-bu gal-zu-ja2
18. dijir cag4-ne-ca4-a inim ma-ab-jar-ra
19. mu he2-jal2-la ki-bi-ce3 ma-zal-le-da
20. um-mi-a gur4-gur4! jar-jar-ju10-ne
21. inim nin-ju10 djectin-an-na-ka-ta
22. a-da-ab tigi ma-al-ga-tum-bi mu-ci-in-jar-jar-re-ec
23. sig-ce3! jictukul ab-e bal-e-ja2
24. kur elamki u2 abula-gin7 dab5-be2 ma-gid2-da
25. igi-nim-ta uj3 ce-gin7 dul-le-ja2
26. kur-zag til-la-ac me3-a DU-ja2
27. ance cu-gi4 kaskal X nu-kuc2 kur? nim-ta kac4?-ja2
28. cu tuku4-a ki-jiri3-jen-na-ja2
29. cir3-gid2-da ar2 nam-lugal-la
30. cumun-ca4 kun-jar bal-bal-e-bi mu-ci-in-jar-jar-re-ec
31. nam-dub-sar-ra nij2 galam-galam-ma-ba cu tam-tam-ma-ja2
32. ud-sakar mu2-mu2 cudum nij2-cid-de3 jal2 ba-ab-taka4-a-ja2
33. hul2-hul2-le-ja2 dug3-dug3-ge-ja2
34. zi-zi cu2-cu2 tigi za-am-za-am-ma-ka ki bi2-zu-zu-a
35. aga cu-si jic-gu3-di gal-gal-la zag-bi-ce3 ba-ab-til-la
36. nij2 a2 nun gi4-a la-ba-gub-bu-de3-en-na-ju10
37. dub3-tuku nu-kuc2-u3 kac4-ta e3-a-ja2
38. gi-gid2 za-am-za-am-bi mu-ci-in-jar-jar-re-ec
39. mu an lugal saj-bi-ce3 e3-a
40. den-lil2 dug4-ga-ni cu nu-bal-e-de3
41. mu dsuen iri nam ku5-ra2-ni ceg12-bi nu-il2-i-da
42. lu2 nam ku5-ra2-ni nij2-gig-sahar-ra-ka
43. mu dutu mackim dijir-re-ne-ka
44. nij2-lul en3-du-ja2 lu2 ba-ra-ma-ni-in-jar
45. cudu3-ju10 nij2 nu-um-sig10-sig10-ga mi2-ec2 ba-ra-ni-dug4
46. dcul-gi-me-en silim nij2 a2 dirig-ga cir3-ra ba-ra-ba-jal2
47. kug sag9-ga-gin7 dadag-ga-ju10-um
48. jectug2-ga cir3 zu inim zu-ju10-um
49. sipad-me nij2 na-me zag til-til-la-ju10-um
50. nam-lugal-ja2 mi2-ec2 he2-ni-dug4
51. mu nij2 en3-du-ja2 en-na <in>-ga-ba-jal2-la
52. lul ba-ra-na he2-ge-en
53. en3-du-ju10 a-da-ab he2-em tigi ma-al-ga-tum he2-em
54. cir3-gid2-da ar2 nam-lugal-la
55. cumun-ca4 kun-jar bal-bal-e he2-em
56. gi-gid2 za-am-za-am he2-em
57. jectug2-ge nu-dib-be2 ka-ta nu-cub-bu-de3
58. ki-cu-ke4 lu2 nam-bi2-ib2-da13-da13-a
59. e2-kur za-gin3-na muc nam-ba-an-tum2-mu
60. den-lil2-ra ec3 ud-sakar-ra-ka-na he2-na-du12
61. ec3-ec3 kac gi-rin a-gin7 sud-sud-u3-da-bi
62. den-lil2 dnin-lil2-da tuc-a-ra he2-en-ne-ja2-ja2-ja2
63. ud ul-le2-a-ac lu2 je26-gin7 den-lil2-le
64. [nam]-/sipad\ kalam-ma-ce3 gu3 mu-na-de2-e-a
65. [X X] X en3-du-ju10
66. [X X] X X X igi hu-mu-ni-bar-e
67. [X X] ki aj2-ja2 mu-ju10 hu-mu-pad3-de3
68. [...] lu2-bi ud en3-/du-ju10\
1 line missing
70. [...] /nar?\-ju10 [...] jal2
71. e2 [...] /ki\ aj2 mu-ju10 [X X]-ja2
72. lu2 [X X] den-ki den-lil2-le [...]-/le?\ he2-em
73. e2 lu2 [X X] si sa2 nam-tar-ra sag9-ga [ha-mu]-na-ta-e3
74. tukum-bi en3-du-ju10
75. mu-/ju10 um\-ta-ja2-ar mu-ni AC-ce3 ba-ni-ib-X
76. ceg12 e2-kur-ra-ka mu-ju10 nu-pad3-de3?
77. lu2-bi [...]-e nij2-erim2 nij2-a2-zig3 ak-[de3]
78. lu2-bi lugal he2-em ensi2 he2-em
79. den-lil2-le X saj-ja2?-na nam [X X]-ku5-re7
80. e2 den-lil2-la2-ta nij2-erim2 nij2-a2-zig3 ha-mu-na-ta-[e3]
81. nij2-erim2 mackim-ce3 he-en6-cum2
82. a2-sag3 nam-uc2 dugud jal2-la-gin7
83. su iri-na-ke4 nam-bi2-ib-dug3-ge
84. gug-kal bar-ce3 mu ce-jar-ra-ka igi kalam-ma-ka na-ni-sag9
85. dezina2-e garadinx(TAB.JAR.CE)-na-ke4 ce na-ni-ib-dim2-e
86. dnanibgal sig7-ga dnisaba-ke4
87. guru7-ni im-cu na-ba-ab-sig7-ge
88. ugnim-ma [...]
89. dam-gara3 gal-a-ni kug ur2-[ra ...]
90. ce-jar a-naj dijir-re-[e-ne-ke4]
91. iri bal-a-ni-ta ce /BA\ [...]
92. nij2-gur11 urudcen zabar kug cu X [...]
93. nij2-dim2-dim2-ma kalam-ma-na-ke4
94. tak4-ka3 nu-ba-ba cu he2-eb-dag-ge?
95. ce-jar nij2 gu2 KUR? CA /TA\ [...]
96. nij2 2 gij4 iri-na 1 sila3 ce he2-sam2-e
97. uj3-e jical-le )dusu?-ka! cu he2-di3-ni-ib2-tum2-tum2-mu
98. lu2-bi-e naj gu7 e2-gal-/la\-[na]-/ka cu?\ [X]-ni-ib2-tum2-tum2-mu
99. gag nam-tag2 gu-la he2-da-sig10?
100. dnanna lugal urim2ki-ma-ke4
101. si-im-da balaj /igi bar\-[ra-bi]
102. ninda igi du2-ru-na-bi cu bi2-[ri-ri]
103. nam-til3-bi nam-uc2-da X [X X] tur5-ra sag9-ge [X X]
104. /nam\-gilim-ma a-zu-u3? X [X X]
105. /su?\ X X [...]
3 lines missing
109. kug-/sig17\ [...]
110. cer7-da iri uj3-ba di-kud-/bi!\ [he2-em] saj-bi e3-a-ni [he2-em]
111. lu2 en3-du-ju10-a cu i3-[...]
112. [...] JIC gibil-gibil-la-am3 [...]
113. [...] X-ga AM3 he2-na-ta-[...]
114. [...] iri bar-ra ha-ba-ni-[...]-e
115. bad3 iri-na-ka na-am3-/bi2?\-[X-X]
116. a sa-ga nam-lugal-la-na na-/an?\-[X X]
117. ki lugal gub ki dadag-ga nam-bi2-gub-[be2]
118. ub-cu-unken-na-ta bar-ce3 he2-[...]
119. cag4-ge guru7-a mu pad3-da-ni [...]
120. [...] X X cu-cu? KA? gi4-de3
121. an-jar X-ga-na ha-ba-an-[X X]
122. nidba e2-kur-ce3 il2-la-na den-lil2-le he2-[...]
123. kadra zid nij2 dug3-ga-na /he2\-[X X] KA-/bi\ [...]
25 lines missing
149. /nam\ [...]
150. mu-da-an-X KA? [...]
151. JIC A KA? nij2 nu-[...]
152. cul-gi-me nir-[jal2 ...]-ra gaba-/ri\ [nu]-/tuku\
153. jictukul-a ma2-gur8 ki-bal [...] /gul\-gul-lu-de3 [X X]
154. A UL X lugal-me X nu-gu-la-na er2-ra ha-mu-[X X]
155. /cul?\-gi-me nar gal nu-banda3 nam-/nar\-[ra] X nar ki-nu2 X [...]
156. tukum-bi IM [...] X igi sag9-/ga\ [...]
157. en3-du-ju10 ka-ta cub jectug2-/ge\ [dib]
158. ki-cu-ki-cu-ke4 IGI? [...] da13-da13
159. X-bi lugal-a-ni ba-ni-/in\-[...]
160. e2 tigi dijir-re-e-ne-ke4 NE [...]
161. mu cid-am3 an zig3-ga igi hul-ce3 ba-[...]
162. lugal nam-nar-ra dsuen [...]
163. dlamma nam-nar-ra djectin-an-/na\ [...]
164. [...]-gin7 [...] ha-ba-tej3?-je26 X
165. [...] /zid\-da [...] X-bi-im he2-[...]
166. [...] jectug2 [...]
7 lines missing
174. ud nam kur-kur-/ra\ [ba-tar-ra]
175. lugal cag4 gal-la-na [...]
176. hi-li-a den-lil2 d/nin\-[lil2] [...]
177. zi ki-en-gi ki-uri-ce3 [...]
178. kalam-e nij2-gen6-na [...]
179. eg2 nu-mu-na-ak-a [...]
180. iri nu-mu-gul-a [...]
181. kur gal idim-ma ki [...]
182. zag-ba ki gal-gal /BA?\ [...]
183. dijir e2-gal-la nu-mu-X [...]
184. den-lil2-ra saj mu-ni-in-X [...]
185. e2-kur-re nij2 la-ba-gu-ul-gu-ul-la
186. za-ra dijir-re-ne nu-mu-e-X X
187. cir3 me ca-mu-da-dug4-ga X [...]
188. a-a-ar-ra-na a-na ak-[a-bi ...]
189. inim-ma-na a-na ki cu tag-ga-[bi ...]
190. nar-re en3-du-ni-ce3 [...]
191. je26 cul-gi /lugal\ [...]
192. u2-a an kug-ga /nidba\ [...]
193. saj us2 den-lil2 /an?\ [...]
194. dnanna A X DA nam-/en\ [...]
195. ensi2 den-lil2-la2 d/nin\-[urta]-ke4
196. cita2 jicmitum e2-cu-me-ca4-ta ma-an-cum2
197. numun nam-lu2-ulu3 ba-i-i-ta
198. lugal dili-ni ugnim gen6-na-ar
199. den-lil2-le jidru nam-lugal-la2 nu-mu-na-ta-an-cum2
200. dur3 dili-ni jictukul-la gaba ri-a
201. ud na-me lugal kalam-ma-ke4 jictukul-ce3 nu-gi4
202. a2 lugal-ju10 den-lil2-la2-ta
203. mu-ju10 an-zag-ce3 ja2-ja2-de3
204. a-a-ar da-ri2 nam-gu2-ka-ju10
205. ud su3-ra2-ac cu-a bal-e-de3
206. ki-bal gu2-erim2-jal2 kur a2-ta ri-a
207. nemurx(PIRIJ.TUR) huc-gin7 cubtum3 la-ba-ja2-ar
208. muc-jiri2-gin7-nam dun-ta la-jen-ne-en
209. ama erin2-na-ju10 a2-ja2 bi2-taka4
210. igi bar-ra-ju10 saj ba-dib
211. ma-da gu-ti-<umki>-ma sa-ga hur-saj-ja2-ka
212. muc mir-gin7 ba-gi4-me-en ni2-ju10 a2 bi2-su13-ud
213. erin2 zi-cag4-jal2-la-ju10 na-me na-ma-da-an-te
214. saj-dili-gin7 kur ki nu-zu-na dub3 cu bar
215. pirij umbin-ce-ba sumun2 dab5-dab5-gin7 uzu-bi ab-gul-e
216. ucum dili du-gin7 ni2 mu-da-ri
217. iri du3-du3-a jal2 saj-ju10 ba-us2
218. dgir3-ra-gin7 gu3 mir-a mu-dub2
219. za-pa-aj2 cag4 ni2 te-te izi u3-bu-bu-ul-bi hur-saj-ja2 ba-an-cub
220. ki-bal-e inim la-ba-gub-gub-ba cu-nir la-ba-il2-la
221. me3-ju10 an-ur2 dungu jal2-la u2-sa11-an ni2 gu2 e3
222. kur-re tir jicdehi2?-gin7 la-ba-mu2-a
223. ki-cu mar-za dinana-ka
224. jicilar kucgur21 ud gal-gin7 ki la-ba-ni-us2-a
225. jictukul-e lah4 lipic me3-a a2 nu-kuc2-a-na gig-bi li-bi2-nu2?-a
226. kurun3 u3-mun saj lul saj zid-da IM UD KA NE-NE
227. dungu dirig-ga-gin7 u8 gig2 kur-ra saj nu-mu-ni-in-bal-a
228. ad6 jic-gi-a ki-in-dar-[ra ...]
229. KU? BU UL TAR-TAR-a-gin7 KA U2 GI X [...]
230. muc-jiri2 edin-na-ke4 ur5-ce3 la-ba-ab-ak X
231. ki-tukum-ce3 ejer ud-da nu-e-/zig3?\ [X]
232. hul-du gu2-erim2-jal2 a2 jictukul-la-bi izi? ir-pag nu?-[...]
233. jiri3 suh3-a har-ra-an amar?-gin7 ku5-ra2
234. ma-da gu-ti-umki-ma jicmu-bu-um-gin7 mu-gam
235. kur-re ni2-bi cag4 ma-nijin2-nijin2-ne-ec gu2-ba jiri3 bi2-gub
236. dili-ni iri a2-na lah6-me-en
237. kalag-ga mi2 jictukul-la dug4-ga-me-en
238. mu gi16-sa inim cudu3-da dug4 am-gin7 rib-ba-me-en
239. si sa2 lu2 dug3-ga kalam-ma-me-en
240. en3-du-ju10 ka-ga14 he2-jal2
241. cir3-ju10 jectug2-ge na-an-dib-be2
242. gu-kur silim-ec2 dug4-ga-ja2-kam
243. inim den-ki-ke4 mu-ci-ja2-ja2-a-am3
244. hul2-hul2-e cag4-ta dug4 tal2-tal2 djectin-an-na-ka-kam
245. ud ul-le2-a-ac nu-ha-lam-e-de3
246. e2-JECTUG2.dNISABA nij2-umun2-a gal-gal mu-bi-ce3 mul-an kug-gin7 bi2-sar
247. ud me-da na-me jectug2-ge nij2 la-ba-ab-dib-be2 [...]-bi
248. nu-ha-lam-e mul-an sag2 nu-di mu da-ri2 mu-tuku2?
249. nar-e dub-sar he2-en-ci-tum2 igi he2-en-ni-in-bar-re
250. jectug2 jizzal dnisaba-ka-kam
251. dub za-gin3-gin7 gu3 he2-na?-ta?-de2-e
252. en3-du-ju10 kug ki-dar-ra-gin7 pa he2-em-ta-e3-e3
253. ki-cu-ki-cu-ke4 he2-em-ma-an-du12
254. ec3 ud-sakar-ra na-me na-an-taka4-taka4
255. ja2 tigi den-lil2 dnin-lil2-la2-ke4
256. kij2-sig kij2-nim dnanna-ka
257. cul-gi-me-en za3-mi2-ju10 dug3-ga muc3 nam-ba-an-tum2-mu

Print sources

Attinger 1993, p. 58: commentary (adds to the list of mss. in Klein, 3CH, p. 40: N1762+N1788+N6064 (also noted Gerardi, Bibliography, p. 242.))

Hall 1985, p. 417-420: commentary

Klein 1981, p. 40: commentary (list of mss.)

Klein 1990a, p. 72-77: commentary

Ludwig 1990: composite text, translation, commentary (ll. 14-38, 49, 51-65, 74-76, 162-163, 203-205, 249-257 (see index))

Electronic sources

Krecher 1996a: composite text, translation

Cuneiform sources

AO 5380 (TCL 15 14)

CBS 10255

CBS 10402

?CBS 12503

CBS 13298 (STVC 71) + N 960

CBS 14071 (STVC 53)

FK 26a (PBS 10/2 7)

N 1762 + N 1788

N 3497

Ni 4378 (ISET 1 89) + Ni 4504 (ISET 1 100)

Ni 4519 (ISET 1 104) + Ni 4594 (ISET 1 108)

Ni 9619 (ISET 1 117)

YBC 4660

YBC 7152


Revision history

11.viii.1998-26.xi.1998: JAB, editor: standardisation
06.v.1999: GZ, editor: proofreading
16.x.1999: GZ, editor: SGML tagging
04.ii.2000: ER, editor: proofreading SGML
04.ii.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford