ETCSLtransliteration : c.2.6.9.2 ETCSL homepage

A hymn to Ḫaia for Rīm-Sîn (Rīm-Sîn B)

1. en jectug2 mah cu du7 sa2 gal-e pad3-da
2. dha-ia3 dub gal-gal ha-ha-za jectug2-jectug2-ga pec-pec
3. cid-du3 hal-an-kug igi zag til galam-ma-ke4 e2-JECTUG2.dNISABA-ke4
4. pisaj-dub-ba e2-gal an ki-a kij2 kilib-ba cid-cid
5. gi kug-ga cu jal2-le im nam-tar gal-gal mul-mul
6. gal-an-zu inim jectug2 de5-ge ud-bi-ce3 an kug-ga-ra
7. kicib-jal2 a-a den-lil2-la2-ke4 lu2 tam-ma e3 erim3 e2-kur-ra
8. he2-du7 ec3-e abzu-a siki bar-ra la2-la2 en dnu-dim2-mud-ra
9. dha-ia3 cag4-gada-la2 e2-u6-nir-ra uz-ga kug lu-lu
10. umun2 ak-ak ec3 e2-kic-nu-jal2-la2-ke4 mu mah-bi gal-la
11. cag4 inim-jal2 ki-sikil dnin-gal-e unu7 gal-e til3-la
12. muc3-me sag9 nitalam2 ki aj2 dnun-bar-ce-gu-nu
13. lu2 mu mah mussa kur gal a-a den-lil2-la2-kam
14. sajja ban3-da igi-jal2-tuku pad3-da an ki-bi-da-ke4
15. gu2-un dijir-re-[e-ne] cu gid2-i ma-dam kur ab su3-ud-da inim-ma-ni bur2-e
16. gal-zu me mah /nam-nun-na\-ka u5 tur3? zag kece2-da
17. cag4 dajal sur-ra jic-hur kug-ga e2 eridugki-ga-ke4 cu dab-be2
18. dha-ia3 lu2 cu-luh sikil-la engur-ra-ke4 tug2-ba13 tug2 la2-la2
19. dindagara sajja7(GA.DUB2) utah-he2 kur-ta ka du8-u3 dijir-re-e-ne-ke4
20. cag4 dub-ba su3-ud-da zu-a galam ak-ak dijir gal-gal-e-ne
21. cu-nir-nir jicgag-a du3-du3 saj sig9-ga ki galam hur kalam-ma
22. ki cu tag-tag unu7 sig7-ga an-car2 kur gal-ra
23. saj il2 mah ec3-e abzu-ta dug4-ga-ni ce-ga
24. lu2 saj kece2 ninda babbar sikil-la cu dab-be2 e2 dijir-re-e-ne
25. dku3-su3 dindagara e-ne-ne-da nu an nu-sikil-la ki nu-dadag-ge
26. u2 gal-gal sud-sud an den-lil2-la2 unu7 mah-ne-ne-ke4
27. lu2 muc3 kug-ga igi du8 en dnu-dim2-mud-e
28. zabar kug-ga cu jal2-le cag4 hul2-hul2 bar sig10-sig10-ge5
29. lugal-ju10 nam-mah-zu cir3-ra ga-am3-i-i
30. dha-ia3 nam-gal-zu gi16-sa-ce3 ga-am3-pad3-pad3-de3-en
31. a-ba za-a-gin7 dijir-re-e-ne-ke4 me kug-ga-ac tum2-ma
32. nitalam ki aj2-zu ki-sikil dnisaba nin gal nin-e-ne
33. u3-tud-da cag4-ga-ni dnin-lil2-la2 dam mah dnu-nam-nir-ra
34. barag e2-kur-ra-ke4 saj il2-la an-ce3 ci-in-da-til3
35. nam-nin dijir-re-e-ne-ke4 me-er-ga-bi al-ak-e dijir zag ca4 nu-tuku
36. za-e ninda2 gal jalga zid pad3-da en3 tar-tar dijir-re-e-ne-ke4
37. dha-ia3 me cum2-cum2-mu kij2 aj2-e ki-cu-pec igi zu-zu-me-en
38. den-ki-ke4 ec3-e abzu-ta mu7-mu7 nam-til3-la-ni mu-ra-rig7
39. en ji6-par3-e mu-ni-ib-huj-en saj sig10 mu-ni-ib-jar-re-en
40. sipad kalam-ma-ra jidru mah ud su3-ra2 cu-ni-ce3 bi2-ib-dab5-e-en
41. dha-ia3 dijir kalam-ma a-ra-zu uj3 car2-ra jic tuku-me-en
42. za-e dijir gal-gal-e-ne uj3 dajal-la cu-ni-ce3 bi2-ib-dab5-e-en
43. a-a den-ki abzu-ta ed2-da-ni-ta
44. dha-ia3 nam-gal-bi za-e ca-mu-re-da-an-aj2
45. uj3 cag4-ba i3-ni-me-a-ke4 gu2-bi an-ce3 ci-bi2-ib2-zi-zi
46. nam-lu2-ulu3-bi ud asil-la2 mi-ni-ib-zal-zal-le-ne
47. uj3 car2-ra-bi cag4 hul2-la ud ul-le2-a-ac bi2-ib-ak-e-en
48. e2 dijir gal-gal-e-ne ezen ab-jar-re-en giri17-zal ci-bi2-du8-du8-un
49. saj-kal saj-kal-e dijir-re-e-ne-ke4 jic-cub gal-gal uj3 til-la-ni
50. igi sag9-ga-zu nam-til3 si-a lugal-ra igi zid bar-mu-un-ci-ib
51. nun dri-im-dsuen bal hul2-hul2 ud su3-ud-da cu zid jar-mu-na-ab
52. im nam-til3-la-ke4 du-ri2-ce3 nu-kur2-ru mu-bi gub-i3
53. sipad dri-im-dsuen nam-en-bi an den-lil2-la2 ki he2-aj2-e-ne
54. lu2 cir3-ra-ke4 za3-mi2-zu ka-bi-a mi-ni-ib-dug3-ge-ne
55. dha-ia3 lu2 cir3-ra-ke4 za3-mi2-zu ka-bi-a mi-ni-ib-dug3-ge-ne
56. en an ki lugal abzu-a za3-mi2-bi mah-a
57. a-a den-ki lugal abzu-a za3-mi2-zu dug3-ga
58.     u18-ru12-bi-im

59. dha-ia3 dijir kalam-ma ga-til3-e ki aj2 nun dri-im-dsuen-e a2 bad tal2-ni he2-me-en
60.     jic-gi-jal2-bi-im


Print sources

Charpin 1986, p. 344-357: translation, commentary, composite text

Kramer 1977, p. 44-47: translation, handcopy

Steible 1967: score transliteration, translation, commentary

Electronic sources

Krecher 1996: composite text

Krecher 1996b: composite text, translation

Tinney 1998www: composite text

Cuneiform sources

U 7730 (UET 6 101; composite copy with U 7738)

U 7738 (UET 6 101; composite copy with U 7730)


Revision history

04.vi.1999-07.vii.1999: JAB, editor: standardisation
28.vii.1999: GZ, editor: proofreading
30.vii.1999: GZ, editor: SGML tagging
27.viii.1999: ER, editor: proofreading SGML
27.viii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford