ETCSLtransliteration : c.4.13.05 ETCSL homepage

A hymn to Nanna (Nanna E)

1. dumu nun-e AB×A kug-ta /e3\-a ba-zal-zal si i3-[…]
2. kur me sikil 3 abzu šag4 X X daĝal kur /me?\ []
3. ki-ur3 maḫ /dur2?\ [X X] /daĝal?\-la []
4. ambar-ta me-/lem4 ḫuš tum3 muš3 ni2\ [X X]-ge-en
5. nam-dug3-zu-še3 nam-gal nam-maḫ-zu-še3 saĝ im-/ma\-il2-la2
6. nam tar-re-de3-eš a2 maḫ mi-ni-in-sud4-un
7. nam-lugal an ki-zu an gal-e šu daĝal mu-ri-in-dug4
8. nam-dumu nun gal-zu den-lil2-le nam-men! šu mi-ri-in-du7
9. nam-diĝir maḫ den-lil2 pa e3 ma-ra-ni-in-e3
10. a DU-a a sig maḫ-zu-še3 nam tar-re ki dug3 ama dug3
11. den-ki AB×A-šag4 kug-ta ĝiri3-zu-še3 im-mi-in-ĝar
12. den-lil2 nam-maḫ nam-en-na mi-ni-in-tud-de3-en
13. dnanna ud-sakar-zu ud-sakar 7-bi mu pad3-da
14. den-lil2 an ki-ka mu-zu mu kug-ga mu mi-ri-in-pad3
15. dumu nun-e nam-gal-zu an ki-a pa e3 im-mi-in-e3
16. unken maḫ nam den-lil2-la2-na saĝ-e-eš mu-ra-an-rig7
17. den-ki-ke4 ki 3 eridugki-ta nam-men! nam-maḫ-zu mu-ri-in-tar
18. abzu maḫ ki 3 eridugki-ta nam-en gal-zu-še3
19. lugal an ki-ke4 /an? ki?\ gun3-a nam-gal-zu-še3 ba-an-dug4
20. dnanna saĝ-zu il2 da-nun-na-ke4-ne-er ḫa-la ba-an-pad3
21. me sikil šag4 ḫul2-la-ka-ne-ne /ki\-tuš /kug\ im-mi-ni-in-tuš-un
22. diĝir gal-gal-e-ne nidba-eš /gal\ [ba]-an-pad3
23. zag gu-la2 šag4 ḫi-li maḫ si-a /im?\-[mi-ni]-in-durun-uš
24. diĝir-re-e-ne sizkur2 šag4 ḫul2-la-/ne?\-[ne im]-/mi\-ni-in-šum2-šum2
25. ki maḫ ki kug-ga mi-ni-/in\-[tuš]-un
26. dnanna ki kug-ga ki-tuš kug mi-ni-in-[tuš]-/un\
27. den-ki-ke4 ki-tuš ma-ra-ab-/sikil-e ki-tuš? ma?-ra?\-ab-šen-e
28. an mu-ra-ab-kug-ge ki mu-/ra-ab\-[šen-e]
29. e2-kiš-nu-ĝal2 e2 tir ĝišerin-na an-/še3 si ma-ra\-an-sa2
30. dur2 maḫ-zu ki kug-ga ma-ra-ab-ak ur2 niĝ2 an ki-a
31. /ĝiš\-ḫur šu-luḫ maḫ-zu si ma-ra-/an\-sa2-e
32. [] /gir4?\ X-zu banšur ki kug-ga ma-ra-ab-šen
33. [] kiĝ2-sig-bi kiĝ2-sig kiĝ2-nim-zu
34. [] X X si ma-ra-an-sa2
35. [šu-luḫ]-ḫa ma-ra-ab-ku3-ug ma-ra-ab-šen
36. [X X] X DU SA /U3 du8\ X UZ KA /LA\ ba-an-sig7
37. X [X] X mi-ni-in-pad3
38. d/en-ki\ abzu-ni u3-tud /šu-luḫ\ mu-ra-an-ĝa2-ĝa2
39. dku3-su13-e šu-luḫ-ḫa ba-ni-gub e2 ni2-bi u3-tud
40. AB×A-šag4 bar-ba gir4 gud udu ninda 3 bar-ba šu-luḫ kug-bi
41. e2-e i3 im-sikil-e saĝ ba-ab-ḫa-za a2-šu-ĝiri3 ba-an-KU-uš
42. šu-luḫ kug nu-šub-bu-še3 ambar maḫ
43. AB×A daĝal kug-ga-ta nam-bi im-ta-e3
44. e2-kiš-nu-ĝal2 barag maḫ kug-ga me gal maḫ an ki-a šu du7
45. AB×A kug-ta peš10 maḫ a tu5-a-zu
46. i3 ḫur-saĝ su kug ĝal2-la-zu
47. dnanna barag maḫ-zu /ba\-ĝar-ra
48. gada maḫ keše2 saĝ il2 si mul suḫ10-gir11 nam-men!-na
49. i3 maḫ i3 nam-men! i3 erim3 gal-zu su-bar kug-ga-ka
50. kar-za-gin3 kar maḫ kar kug-ga-na
51. dnin-gublaga-ke4 en šu im-ma-an-kug-ga
52. dtaraḫ abzu eridugki-ta šu-bi i3 im-sikil-e
53. u2-a-zu banšur unu2 ki gal-zu-še3 šu kug ĝa2-ĝa2-zu-še3
54. dku3-su3-e šu sikil šu dadag ak šu im-ma-an-kug-ge
55. dtaraḫ abzu eridugki-ta šu-bi i3 im-sikil-e
56. 3 abzu barag maḫ urim2ki-ma nam dug3 gal tar-re
57. /e2-kiš\-nu-ĝal2 ki-tuš kug dug3-ga-am3 dnin-gal nin! maḫ-bi
58. [ki-tuš] kug ki nam-nin-za dnanna lugal-bi-ir
59. /e2-kiš\-nu-ĝal2 agrun-kug-ga e2 nam-lugal-zu
60. dnanna dnin-gal ki-tuš mi-ni-ib2-ḫul2-ne
61. d/suen\-[e] /en\ zu maḫ an ki aga-zu aga maḫ-am3
62. me-lem4 /ḫuš\ an ki-a /sig9-ge daš-im2-babbar-e šu ḫe2\-en-na-kug-ge
63. an-gin7 ḫe2-en-na-kug-[ge ki]-/gin7\ ḫe2-en-na-šen-e
64. šag4 an-/na\-gin7 [ḫe2]-en-na-dadag-ge
65. /aga?\ an ki-a aga kug /saĝ\ [ḫe2]-em-ma-il2-e
66. [d]/suen\-e en zu maḫ /an ki\ barag sikil-la šu du7
67. [d]/aš\-im2-babbar-e saĝ-men /aga zid\-da si mul maḫ X [(X)]
68. saĝ im-ma-il2-/e\
69. i3 kug i3 sikil i3 dadag-ge (This line is written on the left edge of the tablet and may represent an accidentally omitted line, or else the catchline to another composition, possibly an incantation.)

Print sources

Charpin 1986, p. 366-379: score transliteration, translation, handcopy, commentary

Hall 1985, p. 814-828: score transliteration, translation, commentary

Michalowski 1993, p. 155, 160: commentary

Electronic sources

Krecher 1996: score transliteration

Cuneiform sources

U 7749 (UET 6 67)


Revision history

21.viii.2000-24.viii.2000: GC, editor: standardisation
30.ix.2000: JAB, editor: proofreading
05.x.2000: GC, editor: SGML tagging
20.x.2000: ER, editor: proofreading SGML
20.x.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford