ETCSLtransliteration : c.4.19.1 ETCSL homepage

A balbale to Ninĝišzida (Ninĝišzida A)

1. [ur]-saj en cag4-tum2 a-gar3 ur-mah kur sud-[da]
2. dnin-jic-zid-da muc-mah ucumgal-a-/da\ [tab-ba]
3. am gal cen-cen-na gaba guz-a-ba a-ji6 X [...]
4. ama-ni ki aj2 dnin-girid2-<da>-a cag4 hi-/li\-[a tud-da]
5. [ubur] kug-ga-na ga zid gu7-a uc11 pirij sub-sub-ba
6. abzu-a buluj3-ja2 icib mah-am3 ec2-da kug cu du8
7. saj5-ja2 dub kalag-ga-ba nij2-zid zu2 kece2-da
8. lugal am ur5 un3 eme si sa2 nij2-erim2-e hul gig
9. uru2 idim hur nu-mu-un-gi4-gi4 cu suh3-a di-de3
10. dnin-jic-zid-da idim hur nu-mu-un-gi4-gi4 cu suh3-a di-de3
11. erim-erim-ma cu-zu ma-ra-ci-jal2
12. sipad saj gig2-ga cid-bi mu-e-zu
13. u8 sila4-bi kij2-kij2-de3 ma-ra-ci-jen
14. ud5-de3 mac2-bi jidru ud su3-ra2 tum2-tum2-mu-bi mu-e-zu
15. dnin-jic-zid-da jidru ud su3-ra2 tum2-tum2-mu-bi mu-e-zu
16. lugal cag4-la2 sug4 cag4-ta e3-a inim cudu3-zu cu-a he2-eb-gi4
17. nam-til3 u3-tud za-da ca-mu-un-jal2
18. nun hi-li sud-sud dnin-jic-zid-da
19. /barag\ ki-tuc mah-a tuc-a-ni en dijir cul a2 zid-da
20. [X] X-zu-ur tug2 mur10 jidru za-gin3 cu u3-mu-e-ti
21. [cir3]-/nam\-cub ad mi-ri-ib-dug4 ni2-te-na mi-ni-/ib\-[be2]
1 line missing
23. [...]-/bi\ ka lul-la bal-bal-[am3 cag4] mu-na-te-en-[te-en]
24. [X] X car2-car2-ra ca-mu-cubub-be2-en izi-gin7 ba-ra-ma5-ma5-an
25. lugal en cag4 su3-ra2 barag mah-za nam dug3 mu-ri-in-tar
26. dijir nij2-si-sa2-e ki aj2-e inim dug3-bi mu-un-e
27. palil gal-zu unken-na PA-PA-a he2-du7
28. lugal ni2 ri-a ildum2 ud-bi saj-ba du-a
29. an-bar an-ta a-ba de-jen-ne2 a-na an-da-sa2-a
30. ur-saj me3 igi jal2 taka4-a kur un3-na i3-a-e3
31. dnin-jic-zid-da me3 igi jal2 taka4-a kur un3-na i3-a-e3
32. lugal ki gu-la a2 aj2-ja2 tum2 ki DU-bi tum2-mu-de3
33. cul dijir tuku ki a2 aj2-ja2-ni igi-bi ma-ra-ci-jal2
34. lugal ka lal3 dijir-re-e-ne den-ki za3-mi2
35. dnin-jic-zid-da dumu dnin-a-zu
36. a-a den-ki za3-mi2
37.     bal-bal-e dnin-jic-zid-da-kam


Print sources

van Dijk 1960, p. 81-107: score transliteration, translation, commentary

Electronic sources

Krecher 1996b: translation, score transliteration

Cuneiform sources

AO 5390 (TCL 15 25; photo Parrot Assur fg. 352 mislabelled)


Revision history

30.vii.1999-11.viii.1999: JAB, editor: standardisation
10.viii.2000: GC, editor: proofreading
11.viii.2000: GC, editor: SGML tagging
08.xii.2000: ER, editor: proofreading SGML
28.x.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford