ur3-bad3 kug-ga-ta hi-li gur3-ru
urim2{ki} uc-u2-zu he2-jal2 ki us2-sa
asil3-la2-a uru2 u3-mu-un-zu he2-a-u5
{d}ur-{d}namma he2-a-u5
sun4 za-gin3 sud4-sud4 he2-a-u5
gu2-en-ta en sukud-da ed2-de3-bi-ta nir-jal2
abula-zu e3-a a mah gaba-cu-jar nu-tuku


ec3 urim2{ki} cag4-zu kur he2-jal2 bar-zu hur-saj he-nun-na
e2-kic-nu-jal2 hur-saj galam-ma cag4-bi lu2 nu-zu
e2-zu kur gi-rin-na mu-zu cag4 gur-ra
en-zu en sig7-ga mu pad3-da
dumu {d}nin-sumun2 me-te kur-kur-ra
e2 me gal-zu rab3 dijir-re-e-ne kalam-ma la2-am3
kan4-zu dijir-zu dijir sig7-ga mu pad3-da
jal2 da13-da13-bi {d}utu an-ur2-ta ud mi-ni-in-jar-ra
gi-sa2-zu ki nam tar-ra dijir-re-e-ne di si sa2 ku5-ru-de3
{d}a-nun-na dijir an ki-ka ad mi-ni-in-gi-gi-ne
X-zu-ta munus zid giri17-zal a-a gu2 pec-a
cag4-ga-zu-ta jic-hur kug-ga-a hul-jal2 nu-mu-un-dab5-be2
e2 gi-gun4-na ninda-ba-bi ki-bal kuc7 su3-su3


dub-la2-mah ki nam tar-re-za
dijir gal-gal-e-ne nam mi-ni-tar-re-ne
ki-en-gi ki-uri uj3 saj gig2-ga
{d}ur-{d}namma {d}suen cag4-ge ba-ni-in-pad3
lugal hi-li gur3-ru me-lem4 kalam-ma dul-la
me-e u3-mu-un-ra mi2 zid-de3-ec
{d}ur-{d}namma ga-an-i-i-de3
{d}ur-{d}namma hi-li gur3-ru me-lem4 kalam-ma dul-la
{d}ur-{d}namma {d}ac-im2-babbar cag4-ge ba-ni-in-pad3
{jic}rab3-ba kur-kur-ra im-mi-in-jar
si-jar kalag-ga im-mi-in-gib-ba lugal {d}suen-ra tum2-ma-am3
nij2-erim2 igi-ni-ce3 nu-dib2-be2
nij2-si-sa2 {d}ur-{d}namma nij2-gur11 sa2 bi2-in-dug4
za-pa-aj2-ja2-ni-ce3 kur erim2-ma bi2-in-jar
ki-bal-bi mu-un-sig10 {d}ur-{d}namma mackim im-me
lugal-e e2 {d}suen-na-ke4
{id2}idigna {id2}buranuna {d}ur-{d}namma-ke4 nam mu-ni-ib2-tar-re
{d}utu an-ur2-ta e3-a-ba
nam-lu2-ulu3 hu-mu-ci-ib2-dajal-e-ne
{d}nin-sumun2-ka hu-mu-ni-in-dib2-dib2-be2 u6 di
nin-bi nin nij2-gur11-e ki aj2


ki aj2-ja2-na-ke4 {d}ur-{d}namma-ke4 nam mu-ni-ib-tar-re
{d}nin-gal nin-bi nin nij2-gur11-e ki aj2


munus a nun-na-ke4 {d}ur-{d}namma-ke4 nam mu-ni-ib-tar-re


sipad {d}ur-{d}namma-ke4 il2 e2 {d}suen-na-ce3 sun4 za-gin3 sud4-sud4
{d}nin-X hu-mu-ni-ib-dib2-dib2-be2
dug3-ga-am3 hi-li-ba ku7-ku7-dam
{d}nin-lil2-le ud-da u3-tud-da-gin7
dumu {d}nin-sumun2-na-ke4 za-e hu-mu-ra-u3-tud
sipad-da an kug-ga hu-mu-X
sipad {d}ur-{d}namma-da saj
cir3-nam-cub {d}nanna-kam