The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


Inana and Ebih: composite text

1in-nin me huc-a ni2 gur3-ru me gal-la u5-a
2dinana a2 an-kar2 kug cu du7 mud-bi gu2 e3
3me3 gal-gal-la hub2 dar ak kucguru21ur3-bi ki us2-sa
4ud mar-uru5-a cu tag dug4-ga
5nin gal dinana cen-cen-na sa2 sig10-sig10-ge5 gal zu
6kur gul-gul ti a2-ta i-ni-in-ug7 kur-re a2 ba-e-cum2
7pirij-gin7 an ki-a ceg11 i-ni-in-gi4 uj3-e su i3-ni-in-sig3
8am gal-gin7 kur gu2 erim2 jal2-la u3-na ba-gub-be2-en
9pirij huc-gin7 uru16-na nu-ce-ga ze2-za bi2-ib2-te-en-te-en
10nin-ju10 an-gin7 buluj3-ja2-za
11ki-sikil dinana ki-gin7 mah-a-za
12dutu lugal-gin7 e3-a-za a2 dajal su3-su3-za
13an-na du-a-za ni2 huc gur3-ru-za
14ki-a ud ce-er-zi gur3-ru-za
15hur-saj-ja2 jen-na sa za-gin3 e3-a-za
16kur gi-rin-na a tu5-a-za
17kur cuba2 kur ki sikil u3-tu-ud-da-za
18za-gin3 ur5-gin7 ni2-ba dur2-dur2-ra-za
19en ul en car2-gin7 cita2 kur4-kur4-ra-za
20me3-ba jictukul ur3-ra-gin7 saj gur4-gur4-re-za
21saj jig2-ga cir3-re-ec bi2-ib-ra
22kur-kur-re i-lu-lam-ma-bi dug3-ge-ec im-mi-ib2-be2
23nin me3 dumu gal dsuen-na
24ki-sikil dinana me-tec2-e ga-i-i
25in-nin-me-en an nijin2-na-ju10-ne ki nijin2-na-ju10-ne
26dinana-me-en an nijin2-na-ju10-ne ki nijin2-na-ju10-ne
27elamki su-bir4ki-a nijin2-na-ju10-ne
28kur lu5-lu5-bi-a nijin2-na-ju10-ne
29kur cag4-ga du7-du7-da-ju10-ne
30in-nin9-me-en kur-re tej3-a-me-en ni2-bi na-ma-ra-ab-ak
31dinana-me-en kur-re tej3-a-me-en ni2-bi na-ma-ra-ab-ak
32hur-saj ebihki-ke4 tej3-a-me-en ni2-bi na-ma-ra-ab-ak
33ni2-bi-ta na-ma-ra-ab-ak-gin7
34kiri3-bi ki-ce3 na-ma-ra-ab-tej3-a-gin7
35nundum sahar-ra na-ma-ni-ib-ur3-ra-gin7
36hur-saj zig3 cu-ju10 ga-am3-mi-ib-si ni2-ju10-ce3
37a2 mah-bi-ce3 gud mah ga-ba-ci-gub
38a2 tur-bi-ce3 gud tur ga-ba-ci-gub
39hub2 ga-mu-un-cu2 ecemen dinana kug ga-mu-ni-in-sar
40hur-saj-ja2 me3 ga-ba-ab-de6 cen-cen si ga-ba-ab-sa2
41ti mar-uru5-a si ga-ba-ab-sa2
42a2-sig3 ebih2-gin7 ga-ba-ab-sur-sur
43jicgid2-da nij2-su-ub ga-ba-ab-ak
44jicjecpu kucguru21ur3 si ga-na-ab-sa2-sa2
45jictir us2-sa-bi-ce3 izi ga-am3-sig3
46hul du-bi-ce3 uruduha-zi-in ga-ba-ci-gub
47a nijin2-ba dgibil6 lu2 sikil-la zu2 kug ga-ba-an-du3-du3
48hur-saj arattaki cu nu-tej3-ja2 ni2-bi ga-ba-ni-ib2-su3
49uru an-ne2 nam ba-an-kud-da-gin7 ki-bi na-an-gi4-gi4
50den-lil2-le saj-ki gid2-da-gin7 gu2-bi na-an-zi-zi
51kur-re in-tij4-ju10 he2-kur-ku
52ebihki-e ka-tar-ju10 he2-si-il-le me-tec2 hu-mu-i-i
53dinana dumu dsuen-na-ke4
54tug2 nam-nin-a ba-an-mu4 ul gu2 ba-an-e3
55ni2 me-lem4 huc-a saj-ki-na ce-er-ka-an ba-ni-in-dug4
56zi-pa-aj2 kug-ga-na na4gug gi-rin2-na si ba-ni-in-sa2-sa2
57cita saj-7-e zid-da-na nam-cul ba-ni-in-ak
58dur na4za-gin3-na jiri3-ni bi2-in-de6
59an-usan-na nir mi-ni-ib-e3
60ka2 u6-di sila-ba bi2-in-jen
61an-ra ne-saj mu-un-na-an-gub siskur mu-na-ab-be2
62an dinana-da hul2-la-e
63mu-un-gid2 ki-na ba-e-tuc
64zag gal an-na-ka ba-e-si
65an a-a-ju10 silim ma-ra-ab-be2-en inim-ju10-uc jectug2-zu
66an-na«-ni» dijir-ba ni2-ju10 mi-ni-in-ri
67za-e-me-en inim-ju10 an ki-a gaba-ri la-ba-e-ni-tuku
68an-bar-ra jicsilig-ga-am3
69an-ti-bal nam-ma-an-si-um
70ki-gal sig10-ge5 jicgu-za suhuc gi-na
71a2 nam-cita4 cu ja2-ja2 mu-bu-um-gin7 gur2
726 la2-e ki ha-ha-ze2
734 la2-e hac2 gid2-gid2-i
74kaskal gaz-e har-ra-an-na zag-ce3 DU
75lugal-bi-ir IC.IC an-na-ka iti6-gin7 e3-a
76ti a2-ta e3-a a-gar3-e jickiri6 tir zu2 buru5mucen-gin7 zi-zi
77jicgan2-ur3 ki-bal sig10-sig10-ge5
78abul-a-ba jicsi-jar gid2-de3 jicig-bi bi2-ib-gub-be2
79an lugal cu-ju10 he2-em-mu-e-cum2 a2 [...]
80lugal-la zid-da-na he2-ni-in-ku4 ki-bal gul-gul-lu-de3
81kur ur2-ra sur2-du3mucen-gin7 saj hu-mu-da-dub2-be2
82an lugal mu-zu zag kalam-ma gu-gin7 ga-an-ci-BAD
83kur-kur-ra muc ki in-dar-ra-gin7 cu hu-mu-da-dub2-be2-ec
84muc saj-kal kur-bi-ta ed3-da-gin7 da-ga hu-mu-da-an-du
85kur-ra a2 he2-bi2-in-jar igi he2-ni-in-bar gid2-da-bi ha-ba-zu
86har-ra-an kug an-na-ka-ce3 he2-ni-e3 buru3-da-bi ha-ba-zu
87dijir-re-e-ne kurku2
88dinana-me-en da-nun-na-ke4-ne u3-ba-DU
89a-gin7 je26-e kur-re an ki-a ni2-ju10 la-ba-ni-ib-be2-a-ta
90dinana-me-en kur-re an ki-a ni2-ju10 la-ba-ni-ib-be2-a-ta
91hur-saj ebihki-a-ke4 kur-re an ki-a ni2-ju10 la-ba-ni-ib-be2-a-ta
92ni2-bi-ta na-ma-ra-ab-ak-gin7
93kiri3-bi ki-ce3 na-ma-ab-tej3-a-gin7
94nundum sahar-ra na-ma-ni-ib-ur3-ra-gin7
95hur-saj zig3 cu-ju10 ga-am3-mi-ib2-si ni2-ju10-ce3 ga-[ni]-ib-si
96a2 mah-bi-ce3 gud mah ga-ba-ci-gub
97a2 tur-bi-ce3 gud tur ga-ba-ci-gub
98hub2 ga-mu-un-cub ecemen dinana kug ga-mu-ni-in-sar
99hur-saj-ja2 me3 ga-ba-lah5 cen-cen ga-ba-ab-sar-sar
100ti mar-uru5-am3 si ga-ba-ab-sa2
101a2-sig3 ebih2-bi ga-ba-ab-sur-sur
102jicgid2-da nij2-su-ub ga-ba-ab-ak
103jicjecpu kucguru21ur3 si ga-na-ab-sa2-sa2 (some mss. have instead: ga-am3-ma-ab-si3-si3)
104tir us2-sa-bi-ce3 izi ga-am3-sig3
105hul-du-bi-ce3 uruduha-zi-in ga-ba-ci-gub
106a nijin2-ba dgibil6 lu2 sikil-la kij2 ga-ba-an-tuku-tuku
107hur-saj arattaki cu nu-tej3-ja2 ni2-bi ga-ba-ni-ib2-su3
108uru an-ne2 nam ba-kud-da-gin7 ki-bi na-an-gi4-gi4
109den-lil2-le saj-ki gid2-da-gin7 gu2-bi na-an-zi-zi
110kur-re in-tij4-ju10 he2-kur-<ku>
111ebihki ka-tar-ju10 he2-si-il-le me-tec2 hu-mu-i-i
112an lugal dijir-re-e-ne-ke4 mu-na-ni-ib-gi4-gi4
113lu2-tur-ju10 kur-re al bi2-dug4 cag4-bi a-na ab-ak
114dinana-me-en kur-re al bi2-dug4 cag4-bi a-na ab-ak
115hur-saj ebihki al bi2-dug4 cag4-bi a-na ab-ak
116ki-gub dijir-re-e-ne-ke4 ni2 huc im-da-ri-ri
117ki-tuc kug da-nun-na-ke4-ne kuc-zi im-du8-du8
118ni2-bi huc-a kalam-ma mu-un-ri
119hur-saj-ja2 me-lem4-bi huc-a kur-kur mu-un-ri
120sukud-da-bi an-na cag4-bi nir mi-ni-ib-e3
121jickiri6 mu2-bi kurun im-la2 giri17-zal im-du8-du8
122jic mah-bi ur an-na ni2-ba u6-di-de3 ba-gub
123ebihki-a jic an-dul3 pa mul-mul-la-ba ug tab-ba mu-un-lu
124ceg9 lu-lim-bi ni2-ba mu-un-lu
125am-bi u2 lu-a mu-un-gub
126tarah-bi ha-cu-ur2 hur-saj-ja2-ka e-ne-su3-ud-bi im-me
127ni2-bi huc-a nu-mu-e-da-ku4-ku4
128hur-saj-ja2 me-lem4-bi huc-am3
129ki-sikil dinana saj nu-mu-e-de3-ja2-ja2
130ur5-gin7 hu-mu-na-ab-ak
131nu-gig ib2-ba-ni lipic bal-a-ni
132e2 me3-ka jal2 ba-an-tag4
133jicig za-gin3-na cu ba-an-us2
134me3 mah ba-ra-an-e3 ud gal ki bi2-in-us2
135kug dinana-ke4 mar-uru5 sa2 bi2-in-dug4
136mar-uru5 zig3-ga sahar hul bi2-ib-zig3
137im hul zig3-ga cika im-bar-re
138nin-ju10 hur-saj-ja2 ba-du7-du7
139jiri3-ni2-a-bi mu-un-su8
140gir2 a2 2-a-bi u3-sar ba-an-ak
141ebihki-a gu2-bi u2-numun2 bur-gin7 cu ba-an-ci-in-tij4
142cag4-bi zu2 gir2-a ba-ni-in-ra
143ka gal kurku2-gin7 mu-un-si-il-le
144ebihki-e na4 su ni2-ba-ke4
145bar-bi-a dub-dab5 he2-em-mi-ib-za
146a2-ta ri-a-ta muc-cag4-tur3 gal-gal-la uc11 mu-un-gu2gur5-gu2
147jictir-bi ac2 bi2-in-dug4 jic-bi nam ba-an-ku5
148jical-la-nu-um-bi immen-ba mi-ni-in-ug7
149bar-bi-a izi mi-ni-in-ri i-bi2-bi bi2-in-mu2
150in-nin-e kur-re me bi2-in-tal2
151kug dinana-ke4 a-la-ni-gin7 bi2-in-dim2
152hur-saj ebihki-ke4 im-ma-jen gu3 im-ma-de2-e
153hur-saj il2-la-zu-ce3 sukud-da-zu-ce3
154sag9-ga-zu-ce3 sig7-ga-zu-ce3
155tug2-ma kug-ga mu4-ra-zu-ce3
156an-ne2 cu si sa2-a-zu-ce3
157kiri3 ki-ce3 nu-tej3-a-zu-ce3
158nundum sahar-ra nu-ur3-ra-zu-ce3
159mu-ug5-ge-en cag4 sig9-ga mu-un-sig10-ge-en
160am-si-gin7 si-za mi-ni-ib2-dab5-be2-en
161am-gal-gin7 a2 gur4-gur4-ra-za ki mu-e-ci-ib-us2
162gud-gin7 a2 mah-zu ki ba-e-te-en hul-bi mu-ri-ib2-us2
163igi-za er2-ra si ba-ni-in-sa2
164cag4-za a-nir-ra ba-ni-in-jar
165bar-bi-a mucen cag4 sig3-ga-ke4 gud3 im-ma-ni-us2
1662-kam-ma-ce3 ni2-huc-na kur-ku silim zid-de3-ec na-e
167a-a-ju10 dmu-ul-lil2-le cag4 kur-kur-ra-ka ni2 gal-ju10 mi-ni-in-ri
168a2 zid-da-ju10 jictukul mi-ni-in-ri
169a2 gab2-bu-ju10 KU7-e ri-ri-me-en
170mir-ju10 jicgan2-ur3 zu2 gal-gal-la in-si-il-si-il-e
171e2-gal mu-du3 nij2-dirig bi2-ak
172jicgu-za mi-ni-gub suhuc-bi mi-ni-ge-en
173kur-jar-ra gir2 ba-da-ra mu-na-cum2
174gala-ra kucub li-li-is3 mu-na-cum2
175pi-li-pi-li saj-cu bal mu-ni-ak
176kur-re u3-ma-ja2 saj ba-cum2
177hur-saj ebihki u3-ma-ju10 saj ba-ra-cum2
178a mah e3-a-gin7 u3-ba-jen
179a zig3-ga-gin7 jicKEC2-ra2 ba-sur
180kur-ra u3-ma-ju10 im-ma-gub
181ebihki-e u3-ma-ju10 im-ma-gub
182ebihki hul-a dumu gal dsuen-na
183ki-sikil dinana za3-mi2
184dnisaba za3-mi2


Top | Home This composition: translation | bibliography


Revision history

04.ii.1998-20.ii.1998 : GC : standardisation
24.ii.1998 : JAB : proofreading
3.v.1999 : JAB : minor corrections
03.vi.1999 : GZ : SGML tagging
17.vi.1999 : ER : proofreading SGML
17.vi.1999 : ER : converting to HTML 4.0
7.ix.2001 : ER : header and footer reformatted; substantive content of file not changed