The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


An adab to Bau for Ishme-Dagan (Ishme-Dagan B): composite text

1nin ni2 gur3 mah zu an ki nam-nir-ra cu du7
2ama dba-u2 gu2-gal nin-e-[ne] ur-saj X X
3dijir er9 me mah-a cu du7 /saj\-il2 umuc? gal LU?
4su4-un-su4-na munus zid nin gal-an-/zu\ cag4-ta umun2 ak
5dumu an-na mas-su2 inim pad3-de3 nij2-nam cu-ni si
6nin a-zu gal saj gig2-ga lu2 til3-le lu2 u3-tud
7cu-hal-bi cim-mu2 uj3 lu-a X X X X X
8cag4-la2-tuku arhuc2 sud kalam-ma nin nij2-gen6?-[na]
9den-lil2 lugal kur-kur-ra-[ke4]
10dnu-nam-nir en nam tar-re-[de3]
11ec3 nibruki dur-an-ki-a-ka gal-bi bi2-in-[dug4]
12e2-kur za-gin3-na mi-ni-im-mah-en IGI RA X
13sa-par3 kalag-ga dnu-nam-nir-ra-[me-en]
14an-gub-ba e2-kur-ra-ka kurum6 cum2-mu jectin za-a-[kam]
15den-lil2-la2 e2-gi4-a mah-a-ni-me-en a gub-ba-ni-[me]-/en\
16su4?-na cita-ba ki la2-a-zu-uc
17dnu-nam-nir nun kur-kur-ra-ke4
18nam-sa12-du5 mah an ki cu-zu im-mi-in-kur9
19mu-un-il2-en nam-nin ec3 numun i za-ra mu-ra-an-cum2
20a-a ugu-zu an dijir mah-e tug2 tug2ma6 tug2 mi-ri-in-mu
21ur-saj den-lil2-la2 dnin-jir2-/su\ /nitalam\-ce3 ma-ra-an-cum2
22e2-ninnu iri kug ec3 numun-i saj-/e-ec\ mu-ri-rig7
23lagacki jir2-suki /dim\-gal kalam-ma-ka
24e2-jalga-sud ki-tuc ki aj2-za
25tar-sir2-sir2 e2 nam-nin-a-ka barag mah-zu mi-ni-ri
26ki-tuc mah-zu-ce3 dijir ki-lagacki-a im-ci-gurum-e-de3-ec
27nin zag-dib me-ni cu nu-tej4-ja2
28dumu an-na nin gal nij2-nam zu
29cul me-dim2 sag9 nun dic-me-dda-gan dumu den-lil2-la2-ke4
30ki-sikil ama dba-u2 igi zid mu-ci-bar nam dug3 mu-ni-tar ud til3-la ed2-a-ce3

31sa-gid2-da-am3


32ama dba-u2 nun dic-me-dda-gan dumu den-lil2-la2-ra nam til3 ud su3-ra2 cum2-mu-dam

33jic-gi4-jal2 sa-gid2-da-[bi-im]


34e2?-nam-til3-la e2 den-lil2-la2-ce3
35sila4 babbar udu i5-jar sag9-ga gaba-na im-mi-tab
36nun dic-me-dda-gan za-e im-me-ni-kur9
37KI.LUGAL.GUB nam-til3-la-da im-da-e-gub
38kur gal den-lil2-ra KA ki mu-ne-jal2
39a-a dmu-ul-lil2 u3-mu-un gal kur-kur-ra
40dic-me-dda-gan-na na-aj2 de3-eb2-tar mu-ni de3-eb2-pad3 e-ne-er mu-ne-dug4
41den-lil2 lugal kur-kur-ra-ke4 igi nam-til3-la saj-ki zalag-ga-ni mu-un-ci-in-bar
42dic-me-dda-gan-na nam mu-ni-ib2-tar-re
43jicgu-za me ur4-ur4 aga zid ud su3-ra2-a jidru uj3 gen6-ne2 us2 ac-a lah4!-lah4!-e
44nun dic-me-dda-gan nam-e-ec he2-tar
45id2idigna id2buranun-e he2-jal2 a ectubku6 hu-mu-ra-ab-tum3 gu2-bi ha-ra-gid2-e (1 ms. has instead: kun X [...])
46gu2-gu2-bi u2-cim hu-mu-ra-an-mu2 asil ha-ra-ab-la2
47pu2-jickiri6-ba lal3-e jectin-e ki hu-mu-ra-ni-ib2-us2
48a-gar3 zid-bi ce gu-nu ha-ra-ab-mu2 gur7-bi ha-ra-dub-dub
49tur3 ha-ra-du3-du3 amac ha-ra-dajal-dajal
50nam-lugal-la mu hu-mu-ni-mah
51nam-nun-na saj an-ce3 he2-ni-il2
52sig igi-nim kur zag-til-la-bi gu2-un ha-mu-ra-ab-il2
53kisal mah nun ud-gin7 dalla he2-ni-in-ed2
54nidba-zu e2-kur za-gin3-na muc nam-ba-an-tum3-mu
55den-lil2-le nam-ce3 mu-ni-in-tar
56lugal-la e2-kur-ta a2 mah mu-na-cum2
57nir mu-un-jal2 inim den-lil2-la2-ta gaba-cu-jar nu-mu-un-tuku
58jiri3 il2-il2-la im-gub-gub-be2
59e2-gal mah ki-tuc nam-lugal-la-ka im-ma-da-an-ku4-/ku4\
60barag kug za-gin3-na dur2 bi2-in-jar e2-gal mu-un-[...]

61sa-jar-[ra-am3]


62munus zid dumu an-na den-lil2 gu3 ma-[ra-de6] barag kug za-[gin3 ... -ab-be2]
63ki-sikil ama dba-u2 dumu an-na den-lil2 [gu3] ma-ra-de6 barag kug [za-gin3 ...]-ab-be2
64dic-me-dda-gan dumu den-[lil2-la2]-ra nam-til3 ud su3-ra2 saj-e-[ec] rig7-a-ni-ib

65u19-ru1 2-bi-im


66[a-da]-ab dba-u2-kam
(ll. 65 and 66 are written as one line in source)


Top | Home This composition: translation | bibliography


Revision history

03.iii.2000 : GZ : standardisation
16.vi.2000 : JAB : proofreading
16.vi.2000 : GC : tagging
30.vi.2000 : ER : proofreading SGML
30.vi.2000 : ER : converting to HTML 4.0
7.ix.2001 : ER : header and footer reformatted; substantive content of file not changed