The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


A hymn to Haia for Rim-Sin (Rim-Sin B): composite text

1en jectug2 mah cu du7 sa2 gal-e pad3-da
2dha-ia3 dub gal-gal ha-ha-za jectug2 jectug2-ga pec-pec
3CID du3 hal-an-kug igi zag-til galam-ma-ke4 e2 jectug2 dnisaba-ke4
4ca13-dub-ba e2-gal an ki-a kij2 kilib-ba cid-cid
5gi kug-ga cu jal2-le im nam-tar gal-gal mul-mul
6gal-an-zu inim jectug2 rig5-ge ud-bi-ce3 an kug-ga-ra
7kicib-jal2 a-a den-lil2-la2-ke4 lu2 tam-ma ed2 erim3 e2-kur-ra
8he2-du7 ec3-e abzu-a siki-bar-ra la2-la2 en dnu-dim2-mud-ra
9dha-ia3 cag4-gada-la2 e2-u6-nir-ra uz-ga kug lu-lu
10umun2 ak-ak ec3 e2-kic-nu-jal2-la2-ke4 mu mah-bi gal-la
11cag4 inim-jal2 ki-sikil dnin-gal-e unu7 gal-e til3-la
12muc3-me sag9 nitalam2 ki aj2 dnun-bar-ce-gu-nu
13lu2 mu mah mi2-us2-sa kur gal a-a den-lil2-la2-kam
14sajja ban3-da igi-jal2 tuku pad3-da an ki-bi-da-ke4
15gu2-un dijir-re-[e-ne] cu gid2-i ma-dam kur ab su3-ud-da inim-ma-ni bur2-e
16gal-zu me mah /nam-nun-na\-ka u5 tur3? zag KEC2-da
17cag4 dajal sur-ra jic-hur kug-ga e2 eridugki-ga-ke4 cu dab-be2
18dha-ia3 lu2 cu-luh sikil-la engur-ra-ke4 tug2ma6 tug2 la2-la2
19dindagara sajja2(GA.DUB2) utah-he2 kur-ta ka du8-u3 dijir-re-e-ne-ke4
20cag4 dub-ba su3-ud-da zu-a galam ak-ak dijir gal-gal-e-ne
21cu-nir-nir jicgag-a du3-du3 saj sig9-ga ki galam hur kalam-ma
22ki cu tag-tag unu7 sig7-ga an-car2 kur gal-ra
23saj il2 mah ec3-e abzu-ta dug4-ga-ni ce-ga
24lu2 saj-KEC2 ninda babbar sikil-la cu dab-be2 e2 dijir-re-e-ne
25dkug-sud dindagara e-ne-ne-da-nu an nu-sikil-la ki nu-dadag-ge
26u2 gal-gal sud-sud an den-lil2-la2 unu7 mah-ne-ne-ke4
27lu2 muc3 kug-ga igi-du8 en dnu-dim2-mud-e
28zabar kug-ga cu jal2-le cag4 hul2-hul2 bar sig10-sig10-ge5
29lugal-ju10 nam-mah-zu cir3-ra ga-am3-i-i
30dha-ia3 nam-gal-zu gi16-sa-ce3 ga-am3-pad3-pad3-de3-en
31a-ba za-a-gin7 dijir-re-e-ne-ke4 me kug-ga-ac tum2-ma
32nitalam ki aj2-zu ki-sikil dnisaba nin gal nin-e-ne
33u3-tud-da cag4-ga-ni dnin-lil2-la2 dam mah dnu-nam-nir-ra
34barag e2-kur-ra-ke4 saj il2-la an-ce3 ci-in-da-til3
35nam-nin dijir-re-e-ne-ke4 me-er-ga-bi al-ak-e dijir zag-cag4 nu-tuku
36za-e ninda2 gal jalga zid pad3-da en3 tar-tar dijir-re-e-ne-ke4
37dha-ia3 me cum2-cum2-mu kij2 aj2-e ki cu-pec igi-zu-zu-me-en
38den-ki-ke4 ec3-e abzu-ta tu6-tu6 nam-til3-la-ni mu-ra-rig7
39en ji6-par3-e mu-ni-ib-huj-en saj-sig10 mu-ni-ib-jar-re-en
40sipad kalam-ma-ra jidru mah ud su3-ra2 cu-ni-ce3 bi2-ib-dab5-e-en
41dha-ia3 dijir kalam-ma a-ra-zu uj3 car2-ra jic tuku-me-en
42za-e dijir gal-gal-e-ne uj3 dajal-la cu-ni-ce3 bi2-ib-dab5-e-en
43a-a den-ki abzu-ta ed2-da-ni-ta
44dha-ia3 nam-gal-bi za-e ca-mu-re-da-an-aj2
45uj3 cag4-ba i3-ni-me-a-ke4 gu2-bi an-ce3 ci-bi2-ib2-zi-zi
46nam-lu2-ulu3-bi ud asilal-la2 mi-ni-ib-zal-zal-le-ne
47uj3 car2-ra-bi cag4 hul2-la ud ul-li2-a-ac bi2-ib-ak-e-en
48e2 dijir gal-gal-e-ne ezen ab-jar-re-en giri17-zal ci-bi2-du8-du8-un
49saj-kal saj-kal-e dijir-re-e-ne-ke4 jic-cub gal-gal uj3 til-la-ni
50igi sag9-ga-zu nam-til3 si-a lugal-ra igi zid bar-mu-un-ci-ib
51nun dri-im-dsuen bal hul2-hul2 ud su3-ud-da cu zid jar-mu-na-ab
52im nam-til3-la-ke4 du-ri2-ce3 nu-kur2-ru mu-bi gub-i3
53sipad dri-im-dsuen nam-en-bi an den-lil2-la2 ki he2-aj2-e-ne
54lu2 cir3-ra-ke4 za3-mi2-zu ka-bi-a mi-ni-ib-dug3-ge-ne
55dha-ia3 lu2-cir3-ra-ke4 za3-mi2-zu ka-bi-a mi-ni-ib-dug3-ge-ne
56en an ki lugal abzu-a za3-mi2-bi mah-a
57a-a den-ki lugal abzu-a za3-mi2-zu dug3-ga

58u18-ru1 2-bi-im


59dha-ia3 dijir kalam-ma ga-til3-e ki aj2 nun dri-im-dsuen-e a2 bad tal2-ni he2-me-en

60jic-gi-jal2-bi-im



Top | Home This composition: translation | bibliography


Revision history

4.vi.1999-7.vii.1999 : JAB : standardising
28.vii.1999 : GZ : proofreading
30.vii.1999 : GZ : SGML tagging
27.viii.1999 : ER : proofreading SGML
27.viii.1999 : ER : converting to HTML 4.0
7.ix.2001 : ER : header and footer reformatted; substantive content of file not changed