ETCSLtransliteration : c.1.4.1.1 ETCSL homepage

Dumuzid and Ĝeštin-ana

1. gal5-la2 tur ka ba-a-ši-ba9-re6 gal5-la2 gu-la-ra gu3 mu-na-de2-e
2. ĝa2-nam-ma-an-ze2-en ur2 kug dinana-ka-še3 ga-da-re7-en-de3-en
3. gal5-la2 unugki-še3 ba-ni-in-kur9-re-eš kug dinana-ke4 mu-ni-in-dab5-be2-ne
4. ĝa2-nu dinana kaskal-zu-še3 ni-ba ĝen-na kur-še3 ed3-de3
5. ki šag4-ge de6-a-zu-še3 ĝen-na kur-še3 ed3-de3
6. ki dereš-ki-gal-la-še3 ĝen-na kur-še3 ed3-de3
7. tug2-ba13 kug tug2pala3-a tug2 nam-nin-zu nam-ba-mu4-mu4-un kur-še3 ed3-de3
8. men kug me-te ka silim-ma saĝ-zu-a um-ta-ĝa2-ar kur-še3 ed3-de3
9. ḫi-li-a igi-zu la-ba-ni-in-du7 kur-še3 ed3-de3
10. UR NU TUR ĝiri3-zu […]-du8-du8 kur-še3 ed3-de3
11. ud za-e ed3-[de3-da ] nu-BU-BU
12. kug dinana-ke4 mu-un-bur2-bur2-re-eš […]-ga-de3-eš
13. dinana ni2-te-na ddumu-zid šu-še3 ba-an-šum2
14. ĝuruš-e ĝiš<rab3> maḫ ĝiri3-ni im-ma-an-ĝar-re-en-de3-en
15. ĝuruš-e ĝišes2-ad <šu-ni> šub-bu-de3-en-de3-en ĝiš-gu2 gu2-ni ĝar-re-en-de3-en
16. urud-ḫenzer urudkibir2 urudšukur maḫ-e igi-ni-še3 ba-an-ši-ib2-il2-il2
17. urudḫa-zi-in gal-gal-la u3-sar i3-ak-e-ne
18. ĝuruš-e mu-ni-in-gub-bu-de3-eš mu-ni-in-dur2-de3-eš
19. tug2-gun5-na-ni šub-bu-de3-en-de3-en KUM gub-bu-de3-en-de3-en
20. ĝuruš-e a2-na mu-un-la2-e-de3-eš tug2-eš ḫuḫul mu-un-ši-ak-eš
21. tug2 ni2-te-na igi-na mu-ni-in-dul-u3-de3-eš
22. ĝuruš-e dutu-ra an-še3 šu-ni ba-an-ši-zig3(source: mu)
23. dutu gu5-li-zu ĝe26-e-me-en šul-me-en za-e mu-zu
24. nin9-zu nam-dam-še3 ba-an-tuku-a
25. e-ne kur-še3 ed3-de3
26. mu e-ne kur-še3 ed3-de3
27. ĝe26-e ki-ĝar-ra-bi-še3 kur-še3 ba-ab-šum2-mu-de3
28. dutu di-kud niĝ2-si-sa2 za-e-me-en nam-ba-lul-de3
29. šu-ĝa2 u3-mu-e-kur2 ulutim2-ĝu10 u3-mu-e-bal
30. šu gal5-la2-ĝu10-ne ga-ba-e-da-an-ze-er nam-mu-ḫa-a-za-aš
31. muš-saĝ-kal-gin7 šag4-tum2 ḫur-saĝ-ĝa2 mu-ni-in-bal-bal
32. ki nin9 dĝeštin-an-na-še3 zi-ĝu10 ga-ba-an-ši-in-de6
33. dutu er2-na šu ba-an-ši-in-ti
34. šu-ni mu-ni-in-kur2-kur2 ulutim2-ma-ni mu-ni-in-bal-bal
35. muš-saĝ-kal-gin7 šag4-tum2 ḫur-saĝ-ĝa2 mu-ni-in-bal-bal
36. ddumu-zid-de3 mušen-še3 sur2-du3mušen dal-a-gin7 zi-ni ur5-da i3-šub-ba
37. ki dĝeštin-an-na-še3 zi-ni ba-ši-in-de6
38. [d]ĝeštin-an-na šeš-a-ni igi ba-ni-in-du8-am3
39. te-na mu-ni-in-ḫur-ḫur giri17-na mu-ni-in-ḫur-ḫur
40. igi-ni zag-ga-na mi-ni-in-du8 tug2-ni mi-ni-in-da-da-ra
41. ĝuruš 2-gig-ra i-lu 2-gig-ga ḫu-mu-ni-ib2-be2
42. a šeš-ĝu10 a šeš-ĝu10 ĝuruš ud-bi nu-um-[si]
43. a šeš-ĝu10 su8-ba dama-ušumgal-an-na ĝuruš ud-bi mu!-bi nu-um-si
44. a šeš-ĝu10 ĝuruš dam nu-tuku dumu nu-tuku
45. a šeš-ĝu10 ĝuruš gu5-li nu-tuku dub3-us2-sa nu-tuku
46. a šeš-ĝu10 ĝuruš ama-ni sag9-ga-ni nu-du8
47. gal5-la2 ddumu-zid-de3 mu-ni-in-kin-kin-ne mu-ni-in-niĝin2-niĝin2-na-eš
48. gal5-la2 tur gal5-la2 gu-la-ra gu3 mu-na-de2-e-ne
49. gal5-la2 ama nu-tuku ad-da ama nin9 šeš dam dumu nu-tuku-me-eš
50. ud me-da gal? 3 ĝar-ra an ki-ta ri-a-bi
51. za-e-ne-ne gal5-la2-ze2-en lu2 zag-ga-ni gi-šukur-gin7
52. šu ĝar sag9-ga nu-tuku-me-eš sag9-ga ḫul nu-zu-me-eš
53. lu2-u3 e2 nu ni2-te-na zi-ni silim-ma a-ba-a igi mi-ni-in-du8
54. ki gu5-li-bi nu-um-ši-du!-de3-en ki mussa-bi nu-um-ši-du-de3-en
55. su8-ba-ra ki dĝeštin-an-na-ka-še3 ga-an-ši-re7-en-de3-en
56. gal5-la2-e-e-ne šu-ta ba-ab-sag3-sag3-ge-me-eš mu-ni-in-kin-kin-ne-eš
57. i-lu-bi ka-ga14-na nu-mu-un-til-la-am3
58. gal5-la2 ki dĝeštin-an-na-še3 ba-e-ši-re7re-eš
59. ki šeš-zu la2-ma-ra-ab e-ne mu-ni-ib2-be2-e-ne inim-bi nu-mu-na-ab-be2
60. ḫab ni2-te ki ur2-ra ba-ni-in-ze2-eĝ3 inim-bi nu-mu-na-ab-be2
61. X ni2-te ki igi-na ba-ni-in-ḫur-ḫur inim-bi nu-mu-na-ab-be2
62. kuš ni2-te ki dur2-na ba-ni-in-kar2-kar2 inim-bi nu-mu-na-ab-be2
63. esir2 ur2-ra-na ba-ni-in-de2-de2 inim-bi nu-mu-na-ab-be2
64. ddumu-zid-de3 e2 dĝeštin-an-na-ke4 nu-um-me-ni-in-pad3-de3
65. gal5-la2 [tur gal5]-la2 gu-la-ra gu3 mu-na-de2-e-ne
66. ĝa2-/nam\-[ma-an-ze2]-/en\ amaš kug-ga-še3 ga-an-ši-re7-de3-en
67. ddumu-zid-de3 amaš [kug-ga]-/ta\ mu-ni-in-dab5-be2-de3-eš
68. mu-ni-in-niĝin2-niĝin2-ne-eš [mu-ni-in]-dab5-be2-de3-eš
69. mu-ni-in-kin-ne-eš igi ba-ni-in-du8-am3
70. ĝuruš-ra e2 nu-nam-ma urudḫa-zi-in šu ĝal2 ba-ši-in-ti
71. ĝiri2-ur3-ra mu-ni-in-sar-sar-re-eš ki-sig9-ga mu-ni-in-dub2-eš
72. nin9-e na-aĝ2 šeš-na-še3 iri-a mušen-gin7 im-ma-an-niĝin2-niĝin2
73. šeš-ĝu10 2-gig-ga gal šu ga-de6 ĝa2-na me ga-an-te

Print sources

Sladek 1974, p. 225-239: composite text, translation, commentary

Electronic sources

Black 1997a: translation

Krecher 1996a: composite text, translation

Cuneiform sources

UET 6 11

UET 6 *29 + UET 6 *73 + UET 6 *89


Revision history

15.i.1998-16.i.1998: JAB, editor: standardisation
29.i.1998: GZ, editor: proofreading
20.vii.1999: GZ, editor: minor corrections
20.vii.1999: GZ, editor: SGML tagging
31.vii.1999: ER, editor: proofreading SGML
31.vii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford