ETCSLtransliteration : c.2.5.4.11 ETCSL homepage

A hymn to Inana for Išme-Dagan (Išme-Dagan K)

1. ki-sikil dinana dumu dsuen-na-ka
2. me kalam-/ma dirig\ niĝ2-nam-e sa2 di
3. an-na me dab5-dab5-be2 ki-a me ur4-ur4-e
4. il2-la dib? saĝ an-ne2 us2-e
5. me-lem4-a-ni izi sud-e il2-la-gin7 ĝi6 u3-na bi2-gen6
6. diĝir na-me gaba-ri-ni-še3 nu-gub-bu e-ne-ra im-ma-zal
7. dinana-ra an tuku4-tuku4-e ki sag3-sag3-ge
8. ub-da 4-ba šu-ni ĝal2-le nam-nin gal-bi ak
9. me3 šen-šen-e ka du8-e ĝiš ĝiš-e la2-e
10. nam-ur-saĝ-bi am sumun2-gin7 teš2-bi-da du7-du7
11. 2 erim2-ma a-gin7 ki-e na8-na8 ad6!-bi ĝar-ĝar-e
12. erin2 gar3 dar-ra-bi nam-ra-aš šum2-mu igi-a sug2-ga-bi
13. 3 ki-ta an-na-še3 ed3-de3 3 {kur2} {(1 ms. has instead:) šar2} ki šu bal-e
14. zalag ku10-ku10-še3 du3 ku10-ku10 zalag-še3 dib-be2
15. [den-lil2] [d]nin-lil2-bi kug dinana-ra mu-na-an-šum2-mu-uš
16. [an ki]-a gaba-ri nu-mu-ni-in-tuku-uš
17. e2 [X X] ama5 ki ĝa2-ĝa2 saĝ-e-eš mu-ni-in-rig7-eš
18. dam X […]-/še3?\ šum2-mu teš2-bi dug3-ge nam-še3 mu-ni-in-tar-re-eš
19. ni2-tuku-na ki-tuš ki ĝar-ra-na šag4 zalag-ga ĝa2-ĝa2
20. ni2 nu-tuku-na e2 du3-a-na ur5 sag9-ge nu-ĝa2-ĝa2
21. nitaḫ munus-a munus nitaḫ-a-bi ku4-ku4 šu bal ba-a-ak
22. ki-sikil-e-ne nam-ĝuruš-e tug2 zid-da mu4-mu4
23. ĝuruš-e-ne nam-ki-sikil-e-eš2 tug2 gab2-bu mu4-mu4
24. (written in six short lines on the edge; must belong here on the basis of the content) X zu [nitaḫ-e]-ne ĝiš ?bal šu-ba? ĝa2?-ĝa2 munus-e-ne-er ĝištukul šum2-mu
25. eme bungu munus-e e-ne di
26. eme munus-e bungu e-ne [di ]
27. niĝ2 galam-ma ĝar-ĝar ĝa2 kur2-ra KA-ge TUM [X]
28. den-lil2 dnin-lil2-bi dinana-ra šu-ni-še3 mu-un-ĝar-[re-eš]
29. e2-gal e2 nam-nin-ka-ni nu-gig an-na-ra
30. mu-na-an-du3-uš [su] zig3 im-da-ri-eš
31. ĝišrab3 kur-kur-ra-ka mi-ni-in-kur9-re-eš ni2 me-lem4 bi2-in-guru3-uš
32. saĝ gig2 šu ri-ri-e-de3 KA-bi X MA X []
33. di 3 šar2-ra si sa2-e-de3 zid tam-me X []
34. lu2 niĝ2-a2-zig3 ka-ga14 mi-ni-in-ĝal2-la-ar ĝar-[X]
35. kilib3-ba-bi kug dinana-ra šu-ni im-mi-in-si-[si-eš]
36. diš-me-dda-gan saĝ us2 muš nu-tum2-mu MU A2 X X šum2
37. den-lil2 dnin-lil2-bi nu-pad3 dam-še3 mu-na-an-šum2-mu-uš
38. e2 diĝir-re-e-ne du3-du3-de3 šukur2-ud-bi šub-šub-bu-de3
39. gi-gun4-na-bi šen-šen-e-de3 barag-bi kug-ge-de3
40. unu2-ba kurun2 lal3 /kaš\ kurun-bi ud šu2-uš gen6-ne2-de3
41. dinana diš-me-dda-gan-bi
42. den-lil2 dnin-lil2-bi saĝ-e-eš mu-ni-in-rig7-eš
43. nibruki maḫ en nin-zu-gin7 diĝir na-me nu-dib
44. šag4-zu-a ki-sikil dinana-ra me mu-na-ni-in-šum2-mu-uš
45. diš-me-dda-gan-me-en du-ri2-še3 ka-ga14 mu-ni-ĝar

Print sources

Römer 1988a: score transliteration, translation, photograph, commentary

Electronic sources

Krecher 1996b: composite text, translation

Tinney 1998jj: composite text

Cuneiform sources

Ni 2485:1-44 (SRT 36)

UCLM 9-1914 (JCS 28 104)


Revision history

07.iii.2000: GZ, editor: standardisation
27.v.2000: JAB, editor: proofreading
08.vi.2000: GZ, editor: SGML tagging
09.vi.2000: ER, editor: proofreading SGML
09.vi.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford