The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


Enki and Ninmah: composite text

1ud re-a-ta ud an ki-bi-ta ba-an-[dim2-ma-ba]
2ji6 re-a-ta ji6 an ki-bi-ta /ba\-[an-dim2-ma-ba]
3[mu re]-a-/ta\ mu nam ba-[tar-ra-ba]
4[da]-/nun\-na-ke4-ne ba-tu-ud-da-a-ba
5dama-dinana nam-NIR.PA-ce3 ba-tuku-a-ba
6dama-dinana an ki-a ba-hal-hal-la-a-ba
7dama-dinana [...] ba-a-pec u3-tu-da-a-ba
8dijir kurum6-ma-bi A X X unu2?-bi-ce3 ba-ab-KEC2-a-<ba>
9dijir car2-car2 kij2-ja2 al-sug2-ge-ec dijir tur-tur du2-lum im-il2-il2-e-ne
10dijir id2 <im> dun-dun-u3-ne sahar-bi ha-ra-li im-dub-dub-be2-ne
11 dijir im-ur5-ur5-re-ne zi-bi inim am3-ma-jar-re-ne
12ud-ba jectug2 dajal mud dijir car2-car2 jal2-jal2
13den-ki-ke4 engur buru3 a sur-ra ki dijir na-me cag4-bi u6 nu-um-me
14ki-nu2-ni i3-nu2 u3 ku nu-um-zi-zi
15dijir er2-ra im-pad-pad-ne a-nir jal2 i3-ak im-me-ne
16lu2 ku-ra i3-nu2-a-ra ki-nu2-bi nu-um-zi-zi-<ra>
17dnamma-ke4 ama palil u3-tu dijir car2-car2-ra-ke4-ne
18er2-ra dijir-re-e-ne dumu-ni-ir ba-ci-in-de6
19X mu-un-ci-nu2-u3-nam u3 mu-un-ci-ku-ku-na-nam
20[X]-TE BA [... nu-mu-un]-zi-zi
21dim3-mi-ir cu dim2-dim2-ma-zu X gu2?-bi im-tu10-tu10-ne
22du5-mu-ju10 ki-nu2-zu zig3-ga [i3-bi2]-ma-al-la-zu-ta na-aj2-kug-zu u3-mu-e-kij2-ja2
23kij2-sig10 dim3-mi-ir-e-ne-ke4 u3-mu-[e]-dim2 du2-lum-bi ha-ba-tu-lu-/ne\
24den-ki-ke4 inim ama-na dnamma-ke4 ki-nu2-na ba-ta-zig3
25hal-an-kug nijin2 cag4 kuc2-u3-da-na hac im-mi-/ni\-[ra]
26jectug2 jizzal en3 tar [...] nam-kug-zu mud me-dim2 nij2-nam-ma SIG7.EN.SIG7.DUG3 im-ta-an-e3
27den-ki-ke4 a2-ni ba-ci-in-de6 jectug2 i3-ninni2-e
28den-ki-ke4 mud me-dim2 ni2-te-a-na cag4-bi jectu2-ta u3-mu-ni-ri-ge
29ama-ni dnamma-ra gu3 mu-un-na-de2-e
30ama-ju10 mud mu-jar-ra-zu i3-jal2-la-am3 zub-sig3 dijir-re-e-ne KEC2-i3
31cag4 im ugu abzu-ka u3-mu-e-ni-in-car2
32SIG7.EN.SIG7.DUG3 im mu-e-kir3-kir3-re-ne za-e me-dim2 u3-mu-e-ni-jal2
33dnin-mah-e an-ta-zu he2-ak-e
34dnin-imma dcu-zi-an-na dnin-ma-da dnin-barag {dnin-barag}
35dnin-mug dCAR.CAR.GABA dnin-gun3-na
36tu-tu-a-zu ha-ra-gub-bu-ne
37ama-ju10 za-e nam-bi u3-mu-e-tar dnin-mah zub-sig3-bi he2-KEC2
38[...] i3-du3 nam-lu2-ulu3 [...]
39[...]-ke4? nam-lu2-ulu3 am3-[ma- ...]
40[...] HA? saj-e saj am3-/ma\-[ ...]
41[...] dim2-zu unu6-RI-zu ga-a-/am3\
42[...] SAR-e jic-nu11 mi-ni-in-il2 nam-lu2?-[...]
43[...] SIG11 numun2-e mi-ni-in-ri u3-tu na-bi mu-ri
44den-ki-ke4 kij2 ninni2-da [X] mi-ni-in-la2 cag4-bi ba-hul2
45ama-ni dnamma dnin-mah-ce3 jicbun na-am3-ma-ni-in-jar
46gu2 SIG7.EN.SIG7.DU nun-ne-ke4 nam-tar gi-saj ninda i-im-gu7-e
47an-e den-lil2-bi en dnu-dim2-mud-e mac kug i-im-cej6-cej6
48dijir car2-car2-ra-ke4-e-ne ka-tar i-im-si-il-le-ne
49en jectug2 dajal-la a-ba-a jectug2 i3-ri-ge
50en gal den-ki-ke4 nij2-ak-ak-zu-ce3 a-ba-a i3-sig10-ge
51a-a tu-da-gin7 me nam tar-tar-ra me za-e al-me-en-na
52den-ki-ke4 dnin-mah-e kac im-na8-na8-ne cag4-bi ul mu-un-te
53dnin-mah-e den-ki-ra gu3 mu-na-de2-e
54me-dim2 na-aj2-lu2-ulu3-ta sag9-ge hul ma-al-la-a-kam
55ki cag4-gi4-a-ju10 na-aj2-tar bi2-ib-sig10-ge bi2-ib-hul-e
56den-ki-ke4 dnin-mah-e mu-na-ni-ib-gi4-gi4
57nam-tar cag4-ge de6-a-zu sag9-ge hul ma-al ga-am3-ci-ib2-la2
58dnin-mah-e im ugu abzu-a cu-ni mu-ni-in-ti
59lu2 gi cu cu2-cu2 sa2-sa2-de3 nu-gam lu2-u3 am3-ma-ni-in-dim2
60den-ki-ke4 lu2 gi cu cu2-cu2 sa2-sa2-de3 nu-gam igi du8-a-ni-ta
61nam-bi i-ni-in-tar saj lugal-la-ke4 am3-ma-ni-in-gub
62gi4-bi jic-nu11 gi4-gi4 lu2 u6 e am3-ma-ni-in-dim2
63den-ki-ke4 jic-nu11 gi4-gi4 lu2 u6 e igi [du8-a-ni-ta]
64nam-bi i-ni-in-tar nam-nar mi-ni-in-ba
65[X]-gal ucumgal-la igi lugal-la-ke4 am3-[ma]-ni-in-[gub]
66pec-bi [jiri3 2] hum jiri3 dab5-ba-a [am3-ma-ni-in-dim2]
(1 ms. has instead: [lu2] pec-bi lu2-lil u3-tu-bi lu2-u3 am3-ma-[...])
67den-[ki-ke4] jiri3 2! hum jiri3 dab5-ba igi [du8-a-ni-ta]
(1 ms. has instead: den-ki-ke4 lu2-lil u3-tu-bi lu2-u3 igi du8-a-ni-/ta\)
68kij2-[...] ku3-babbar-dim2 me-lem4-ma-ni /am3\-[ma]-ni-in-[X]
(1 ms. has instead: nam-bi i-ni-/in-tar\ saj lugal-la-ke4 im-ma-ci-in-gub)
69pec-gi lu2 a sur-sur-ra am3-[ma]-ni-dim2
70den-ki-ke4 lu2 a sur-sur-ra igi du8-a-ni-ta
71a tu6-tu6 mi-ni-in-tu5 nam-tar su-bi am3-ma-ni-in-zig3
72pec-pec-gi munus nu-u3-tu am3-ma-ni-in-dim2
73den-ki-ke4 munus nu-u3-tu igi du8-a-ni-ta
74nam-bi /mi\-ni-in-tar e2-mi2-a-ke4 am3-ma-ni-in-du3 (1 ms. has instead: uc-bar mu-ni-in-du8 e2-mi2-a-kam am3-ma-ci-in-dim2)
75pec-bal-gi lu2 su-ba jic3 nu-jar gal4-la nu-jar am3-ma-ni-dim2
76den-ki-ke4 lu2 su-ba jic3 nu-jar gal4-la nu-jar igi du8-a-ni-ta
77dnibruki tiru(GAL.TE?)-e mu-e mu-ni-in-sa4-a
78igi lugal-la-ke4 gub-bu-de3 nam-bi a-ma-ni-in-tar
79 dnin-mah-e im nijin2 cu-na ki-a mu-un-cub lul-ac lib mu-un-jar (1 ms. has instead: den-ki-ke4 im cu nijin2-na ki-a in-cub lul-ac i3-ni-gi)
80en gal den-ki-ke4 dnin-mah-a-ra gu3 mu-un-[na]-de2-e
81lu2 cu dim2-ma-zu-ce3 nam-bi i-ni-in-tar ninda i-ni-in-cum2
82je26-e ga-na ga-mu-ra-ab-dim2 za-e u3-tu-bi nam-bi tar-ra-ab
83den-ki-ke4 me-dim2 saj-ja2 X-ga? ka cag4-ba a-ma-ni-dim2
84dnin-mah-a-ra gu3 mu-un-na-de2-e
85a jic3-ak cag4 munus-a-ka ri-a (1 ms. has instead: a gan cag4 munus-a-ka) a cag4-ga-na munus-bi mu-un-u3-tu
86dnin-mah [...] u3-tu-bi-ce3 am3-mi-ni-gub
87munus-bi ud-bi [...] ga AC X KA cag4-ba i-in-cub (1 ms. has instead: saj-bi-ic [ba]-/ra\-an-ed2)
dnin-[mah] [...] i3-si-ig
88gi4-bi u4-mu-ul a-za-ad-bi gig-ga ki-nam-X-bi gig-ga igi-bi gig-ga gu2-bi gig-ga
89zi til-til ti sur-sur mur gig-ga cag4 gig-ga lipic gig-ga
90cu-bi!(ni) a-za-ad la2-la2 ka-bi-ce3 ninda nu-jar murgu2 [saj]-du ze2-re
91zag-ce sur jiri3 sur-sur a-gar3 nu-DU am3-ma-ni-/in\-dim2
92den-ki-ke4 dnin-mah-ra gu3 mu-na-de2-e
93lu2 cu dim2-ma-zu nam i-ni-in-tar ninda mi-ni-[cum2]
94za-e lu2 cu dim2-ju10-uc nam-bi tar-ra-ab ninda he2-[...-cum2]
95dnin-mah-e u4-mu-ul igi [du8-a-ni-ta e-ne]-ce3 ba-e-gi4
96u4-mu-ul mu-na-te en3 mu-na-tar-tar-re du11-ga nu-zu-e
97ninda gu7-a-ni-ce3 mu-na-ab-de6 cu nu-mu-na-da-gid2-/de3\
98jicgur8-u6 cag4? nu-mu-na-nu2 nu-mu-da-an-jal2-jal2
99gub [nu]-mu-da-tuc nu-mu-da-nu2 e2 nu-mu-da-[X] ninda nu-mu-da-[gu7]
100dnin-mah-e den-ki-ra inim-ma mu-[...-gi4-gi4]
101lu2 cu dim2-ma-zu lu2 til3-la in-nu lu2 [ug5-ga] /in\-nu il2-bi nu-mu-da
102den-ki-ke4 dnin-mah-e mu-na-ni-ib-gi4-gi4
103lu2 gi cu sig-ra nam mi-ni-tar ninda mi-ni-in-cum2
104lu2 jic-nu11 gi4-gi4-ra nam mi-ni-tar ninda mi-ni-in-cum2
105/lu2\ jiri3 hum dab5-ra nam mi-ni-tar ninda mi-ni-in-cum2
106lu2-a [sur-sur]-ra nam mi-ni-tar [ninda mi-ni-in-cum2]
107munus nu-[u3-tu]-ra nam mi-ni-tar /ninda\ mi-ni-/in\-[cum2]
108lu2 [su-ba jic3 nu-jar gal4-la nu-jar]-ra nam mi-ni-[tar ninda mi-ni-in-cum2]
109nin9-ju10 [...]
110[...]
111A [...]
112dnin-[mah-e] [den-ki-ra gu3 mu-na-de2-e]
113aj2-[...]
114aj2-/ja2\ [...]
115ma-a [...]
116aj2-ja2 [...]
117aj2-ja2 [...]
118aj2-[ga2] X [...]
119[...]
120[...]
121[...] X X DU [...]
122[...] NI DU AG2 TAG-ce3 [mu-ni]-/in\-kur9-re
123a2-ce3 an nu-mu-e-tuc ki nu-[mu-e]-tuc i-bi2 il2-la-zu ka-na-aj2-ja2 nu-ed2-en
124ki za-e nu-tuc-en e2-ju10 du3-a inim-zu mu (1 ms. has instead: jic) nu-tuku
125ki za-e nu-til3-en iri-ju10 du3-a nij2-ju10 lib ba-sig9-ge-en
126[uru]-ju10 gel-le-ej3-ja2 e2-ju10 gul-la du5-mu-<ju10> (1 ms. has instead: dumu-ju10) cu dab5-ba
127[lu2]-kar-ra-jen e2-kur-ta ed2-jen (1 ms. has instead: ed2-a)
128ud me-e nij2-ju10 cu-zu-ta cu la-ba-ra-ed2
129den-ki-ke4 dnin-mah-ra mu-na-ni-ib-gi4-gi4
130inim ka-zu ed2-a a-ba-a i3-kur2-re
131u4-mu-ul X-tu dab5-ba ur2-zu-ta cu jal2-ab-ta
132dnin-mah? kij2-ja2-zu he2-bi2-la2-la2 cu nu-du7 ma-dab5 a-ba-am3 saj mu-un-ja2-ja2
133lu2 me?-dim2?-ju10 ejir-zu-ce3 tuku-a ka-bi cu he2-bi2-jal2
134ud-da jic3-ju10 me-tec2 ha-ba-i-i jectug2 ri-ge-zu he2-jal2
135enkum ninkum
136ud-X jiri3 cub-cub gu2 nam-bi-[...] ka-tar-zu he2-[si-il]-le-ne
137nin9-ju10 a2 nam-ur-saj-ja2 [...] DU
138cir3 [...] nam-dub? [...]
139dijir jic tuku-a-bi u4-mu-ul du3? [...] e2-ju10 he2-ak-[e]
140dnin-mah-e en-gal den-ki-ke4 zag nu-mu-ni-in-du
141a-a den-ki za3-mi2-zu dug3-ga


Top | Home This composition: translation | bibliography


Revision history

09.ii.1998-16.ii.1998 : GZ : standardisation
22.ii.1998 : JAB : proofreading
07.v.1999 : GC : tagging
14.v.1999 : ER : proofreading SGML
14.v.1999 : ER : converting to HTML 4.0
7.ix.2001 : ER : header and footer reformatted; substantive content of file not changed