Gilgamesh and Aga: composite text

¹lu₂ kig₂-gi₄-a ag-ga dumu en-me-barag-ge₄-si-ke₄
²kic^ki-ta ^dgilgamec₂ unug^ki-ce₃ mu-un-ci-re₇-ec
³^dgilgamec₂ igi ab-ba iri^ki-na-ce₃
⁴inim ba-an-jar inim i₃-kij₂-kij₂-e
⁵tul₂ til-le-da tul₂ kalam til-til-le-da
⁶tul₂ nij₂-ban₃-da kalam til-til-le-da
⁷tul₂ buru₃-da ec₂-la₂ til-til-le-da
⁸e₂ kic^ki-ce₃ gu₂ nam-ba-an-ja₂-ja₂-an-de₃-en ^jictukul nam-ba-an-sig₃-ge-en-de₃-en (2 mss. have instead: ga-am₃-ma-sig₃-ge-en-de₃-en)
⁹unken jar-ra ab-ba iri-na-ka
¹⁰^dgilgamec₂ mu-na-ni-ib-gi₄-gi₄
¹¹tul₂ til-le-da tul₂ kalam til-til-le-da
¹²tul₂ nij₂-ban₃-da kalam til-til-le-da
¹³tul₂ buru₃-da ec₂-la₂ til-til-le-da
¹⁴e₂ kic^ki-ce₃ gu₂ ga-am₃-ja₂-ja₂-an-de₃-en ^jictukul nam-ba-sig₃-ge-en-de₃-en (1 ms. has instead: gu₂ nam-ba-ja₂-ja₂-an-de₃-en [^jictukul] ga-am₃-ma-sig₃-ge-en-de₃-en)
¹⁵^dgilgamec₂ en kul-aba₄^ki-a-ke₄
¹⁶^dinana-ra nir jal₂-la-e
¹⁷inim ab-ba iri-na-ke₄ cag₄-ce₃ nu-mu-na-gid₂
¹⁸2-kam-ma-ce₃ ^dgilgamec₂ (1 ms. adds: en kul-aba^ki-a-ke₄) igi juruc iri^ki-na-ce₃
¹⁹inim ba-an-jar inim i₃-kij₂-kij₂-e
²⁰tul₂ til-le-da tul₂ kalam til-til-le-da
²¹tul₂ nij₂-ban₃-da kalam til-til-le-da
²²tul₂ buru₃-da ec₂-la₂ til-til-le-da
²³e₂ kic^ki-ce₃ gu₂ nam-ba-an-jar-re-en-ze₂-en ^jictukul nam-ba-an-sig₃-ge-en-ze₂-en (1 ms. has instead: gu₂ /nam-ba-ja₂-ja₂-an-de₃\-[en] /^jic\tukul ga-am₃-ma-sig₃-/ge-en-de₃-en\)
²⁴unken jar-ra juruc iri^ki-na-ka ^dgilgamec₂ mu-na-ni-ib-gi₄-gi₄
²⁵gub-gub-bu-de₃ tuc-tuc-u₃-de₃
²⁶dumu lugal-la da ri-e-de₃
²⁷zib₂ ance dab₅-dab₅-be₂-e-de₃
²⁸a-ba zi-bi mu-un-tuku-e-ce
²⁹e₂ kic^ki-ce₃ gu₂ nam-ba-an-jar-re-en-ze₂-en ^jictukul nam-ba-an-sig₃-ge-en-de₃-en
³⁰unug^ki jic-kij₂-ti dijir-re-e-ne-ke₄
³¹e₂-an-na e₂ an-ta ed₃-de₃
³²dijir gal-gal-e-ne me-dim₂-bi ba-an-ak-ec-am₃
³³bad₃ gal bad₃ an-ne₂ ki us₂-sa (1 ms. has instead: muru₉ ki us₂-sa-a-ba)
³⁴ki-tuc mah an-ne₂ jar-ra-ni (1 ms. has instead: jar-ra-a-ba)
³⁵saj mu-e-sig₁₀ za-e lugal ur-saj-bi
³⁶saj lum-lum nun an-ne₂ ki aj₂
³⁷du-a-ni-ta a-gin₇ ni₂ ba-an-tej₃
³⁸erin₂-bi al-tur a-ga-bi-ta al-bir-re
³⁹lu₂-be₂-ne igi nu-mu-un-da-ru-gu₂-uc
⁴⁰ud-bi-a ^dgilgamec₂ en kul-aba₄^ki-ke₄
⁴¹inim juruc iri-na-ce₃ cag₄-ga-ni an-hul₂ ur₅-ra-ni ba-an-zalag
⁴²cubur-a-ni en-ki-du₁₀-ra gu₃ mu-na-de₂-e
⁴³ne-ce₃ ^jiccu-kar₂ a₂ me₃ sa he₂-em-mi-gi₄
⁴⁴^jictukul me₃ a₂-zu-ce₃ he₂-em-mi-gi₄
⁴⁵ni₂ gal me-lem₄-ma he₂-em-dim₂-dim₂-e
⁴⁶e-ne du-a-ni-ta ni₂ gal-ju₁₀ he₂-eb-cu₂
⁴⁷dim₂-ma-ni he₂-suh₃ jalga-a-ni he₂-bir-re
⁴⁸ud nu-5-am₃ ud nu-10-am₃
⁴⁹ag-ga dumu en-me-barag-ge₄-si-ke₄ unug^ki zag-ga ba-an-dab₅-be₂-ec
⁵⁰unug^ki-ga dim₂-ma-bi ba-an-suh₃
⁵¹^dgilgamec₂ en kul-aba^ki-ke₄
⁵²ur-saj-be₂-ne-er gu₃ mu-ne-de₂-e
⁵³ur-saj-ju₁₀-ne igi mu-un-suh-suh-u₃-ne (2 mss. have instead: zaj₃-zaj₃-en-ze₂-en)
⁵⁴cag₄-tuku he₂-en-zi-zi-i ag-ga-ce₃ ga-an-ci-jen (1 ms. has instead: ga-an-gi₄)
⁵⁵BIR.HUR-tur-ra lu₂-saj lugal-a-ni
⁵⁶lugal-a-ni-ir za₃-mi₂ mu-un-na-ab-be₂
⁵⁷ (2 mss. add: lugal-ju₁₀) je₂₆-e ag-ga-ce₃ ga-an-ci-jen (1 ms. has instead: /ga\-na-gud-gu₄-ud)
⁵⁸dim₂-ma-ni he₂-suh₃ jalga-a-ni he₂-bir-re
⁵⁹BIR.HUR-tur-ra abul-la ba-ra-ed₂
⁶⁰BIR.HUR-tur-ra abul-la ed₂-da-ni
⁶¹ka₂ abul-la-ka mu-ni-in-dab₅-be₂-ec
⁶²BIR.HUR-tur-ra suku_x-ra₂-ni mu-ni-in-kum-kum-ne
⁶³igi ag-ga-ce₃ mu-ni-in-tej₃^?
⁶⁴ag-ga-ce₃ gu₃ mu-na-de₂-e
⁶⁵inim-ma-ni nu-un-til zabar-dab₅ unug^ki-ga-ke₄ bad₃-ce₃ im-me-ed₃-de₃
⁶⁶bad₃-da gu₂-na im-ma-an-la₂
⁶⁷ag-ga igi im-ma-ni-in-du₈
⁶⁸BIR.HUR-tur-re gu₃ mu-na-de₂-e
⁶⁹arad₂ lu₂-ce lugal-zu-u₃
⁷⁰lu₂-ce lugal-ju₁₀ in-nu
⁷¹/lu₂\-ce lugal-ju₁₀ he₂-me-a
⁷²saj-ki huc-a-ni he₂-me-a
⁷³igi alim-ma-ka-ni he₂-me-a
⁷⁴sun₄^! ^na₄za-gin₃-na-ka-a-ni he₂-me-a
⁷⁵cu-si sag₉-ga-ni he₂-me-a
⁷⁶car₂-ra la-ba-an-cub-bu-uc car₂-ra la-ba-an-zig₃-ge-ec
⁷⁷car₂-ra sahar-ra la-ba-an-da-car₂-re-ec
⁷⁸kur-kur du₃-a-bi la-ba-an-da-cu₂-a
⁷⁹ka ma-da-ka sahar-ra la-ba-da-an-si
⁸⁰si ^jicma₂-gur₈-ra-ka la-ba-ra-an-kud
⁸¹ag-ga lugal kic^ki-a cag₄ erin₂-na-ka-ni caja-a la-ba-ni-in-ak
⁸²mu-ni-ib-ra-ra-ne mu-ni-ib-sig₃-sig₃-ge-ne
⁸³BIR.HUR-tur-re suku_x-ra₂-ni mu-ni-in-kum-kum-ne
⁸⁴ejer zabar-dab₅ unug^ki-ga-ke₄ ^dgilgamec₂ bad₃-ce₃ im-me-ed₃-de₃
⁸⁵ab-ba di₄-di₄-la₂ kul-aba₄^ki-a-ke₄ me-lem₄ bi₂-ib-cu₂-cu₂
⁸⁶juruc unug^ki-ga-ke₄ ^jictukul me₃ a₂-ne-ne bi₂-in-si
⁸⁷^jicig abul-la-ka sila-ba bi₂-in-gub
⁸⁸en-ki-du₁₀ abul-la dili ba-ra-ed₂
⁸⁹^dgilgamec₂ bad₃-da gu₂-na im-ma-an-la₂
⁹⁰igi bar-re-da-ni ag-ga igi ba-ni-in-du₈
⁹¹arad₂ lu₂-ce lugal-zu-u₃
⁹²lu₂-ce lugal-ju₁₀ i₃-me-a
⁹³bi₂-in-dug₄-ga-gin₇-nam
⁹⁴car₂-ra ba-an-cub-bu-uc car₂-ra ba-an-zig₃-ge-ec
⁹⁵car₂-ra sahar-ra ba-an-da-car₂-re-ec
⁹⁶kur-kur du₃-a-bi ba-an-da-cu₂-am₃
⁹⁷ka ma-da-ka sahar-ra ba-da-an-si
⁹⁸si ^jicma₂-gur₈-ra-ke₄ ba-/ra-an-kud\
⁹⁹ag-ga lugal kic^ki-a cag₄ erin₂-na-ka-ni caja-a ba-ni-in-ak
(1 ms. adds 1 line:
^99A/juruc\ unug^ki-ga-ke₄ erin₂-bi X-/a\ X /ba^?\ X)
¹⁰⁰^dgilgamec₂ en kul-aba₄^ki-ke₄
¹⁰¹ag-ga-a gu₃ mu-na-de₂-e (1 ms. has instead: [ag]-ga-ac sa₂ mu-na-ni^!-/ib-be₂\)
¹⁰²ag-ga ugula-ju₁₀ ag-ga nu-banda₃-ju₁₀
(1 ms. adds 1 line:
^102A[ag]-ga ensi₂-ju₁₀ ag-ga /cagina-ju₁₀\)
¹⁰³ag-ga cagina erin₂-na-ju₁₀
¹⁰⁴ag-ga zi ma-/an-cum₂\ ag-ga nam-til₃ ma-an-cum₂
¹⁰⁵ag-ga lu₂ kar-ra ur₂-ra bi₂-in-tum₂-mu
¹⁰⁶ag-ga mucen kar-ra ce bi₂-ib-si-si
¹⁰⁷unug^ki jic-kij₂-ti dijir-re-e-ne-ke₄
¹⁰⁸bad₃ gal bad₃ an-ne₂ ki us₂-sa (the other ms. has instead: muru₉ ki us₂-/sa-a-ba\)
¹⁰⁹ki-tuc mah an-ne₂ jar-ra-ni (the other ms. has instead: /jar-ra\-[a]-/ba\)
¹¹⁰saj mu-sig₁₀ za-e lugal ur-saj-bi (the other ms. has instead: cu-ju₁₀ /im-mi-ib-gi₄\)
¹¹¹saj lum-lum nun an-ne₂ ki aj₂ (the other ms. omits this line)
¹¹²igi ^dutu-ce₃ cu ud-bi-ta e-ra-an-gi₄
¹¹³ag-ga kic^ki-ce₃ cu ba-ni-in-ba (1 ms. has instead: ba-ni-in-bar)
¹¹⁴^dgilgamec₂ en kul-aba₄^ki-a-ke₄
¹¹⁵za₃-mi₂-zu dug₃-ga-am₃

Top | Home This composition: translation | bibliography

Revision history

22.v.2000-29.v.2000 : GC : standardisation
16.viii.2000 : JAB : proofreading
17.viii.2000 : GC : tagging
08.ix.2000 : ER : proofreading SGML
08.ix.2000 : ER : converting to HTML 4.0
7.ix.2001 : ER : header and footer reformatted; substantive content of file not changed