The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A praise poem of Shulgi (Shulgi B): composite text

¹lugal-e mu-ni nij₂-ul-ce₃
²ud su₃-ra₂ ka pa ed₂ ak-de₃
^3dcul-gi lugal urim^ki-ma-ke₄
⁴a₂-na za₃-mi₂-bi-im kalag-ga-na cir₃-bi-im
⁵gal-an-zu nij₂-saj-bi-ce₃ ed₂-a-na mu da-ri₂-bi-im
⁶cag₄-bal-bal-a ejer ud-da-ka cu-a bal-e-de₃
⁷kalag-ga dumu ^dnin-sumun₂-ka-ra
⁸jectug₂ ejer-ra-bi igi-ce₃ mu-un-na-de₆
⁹a₂-ni cir₃-ra silim-ce₃ mu-un-e
¹⁰dim₂-ma nij₂-sag₉-ga cag₄-ta DU-a-ni ni₂-bi i₃-balaj-e
¹¹lugal a lugal-e ru-a nin-e tud-da-me-en
^12dcul-gi-me-en dumu-gir₁₅ cag₄ zid-ta nam dug₃ tar-ra-me-en
¹³tur-ra-ju₁₀-ne e₂-dub-ba-a-a-am₃
¹⁴dub ki-en-gi ki-uri-ka nam-dub-sar-ra mi-ni-zu
¹⁵nam-dumu-gir₁₅ je₂₆-e-gin₇-nam im nu-mu-un-sar
¹⁶nam-dub-sar-ra ki nam-kug-zu-ba lu₂ im-mi-re₆-re₆
¹⁷zi-zi-i ja₂-ja₂ cid nij₂-cid-de₃ zag im-mi-til-til
^18dnanibgal sig₇-ga ^dnisaba₂-ke₄
¹⁹jectug₂ jizzal₂-la cu dajal ma-ni-in-dug₄
²⁰dub-sar jal₂ taka₄-a nij₂-e nu-dib-be₂-me-en
²¹sa pirij tur-gin₇ zig₃-ga-ju₁₀-ne
²²ance-pirij-gin₇ kac₄ kalag-ga di-ja₂
²³cag₄ an-na-ke₄ hul₂-la ma-ab-de₆
²⁴a-la-ja₂ ^den-lil₂-le gu₃ zid ma-ni-in-de₂
²⁵nam-si-sa₂-ju₁₀-uc jidru ma-an-cum₂-mu-uc
²⁶gu₂ kur-kur-ra-ka jiri₃ ba-da-gub
^27jictukul-ja₂ mu-bi sig-ce₃ mu-un-jal₂
²⁸aga₃-kar₂ sig₁₀-ga-ju₁₀ igi-nim-ce₃ mu-un-jal₂
²⁹me₃ cen-cen-na um-ta-ab-ed₂-en
³⁰ki ib₂-dug₄-ga ^den-lil₂-la₂-ce₃
³¹ama erin₂-na-ju₁₀-u₈ igi-ce₃ ba-du-un
³²igi-bar-ra-ju₁₀-u₈ a-cag₄ ba-ab-zalag-ge-en
³³je₂₆-e-me-en ^jictukul-la a-la mu-un-ja₂-ja₂-an
^34urudcukur ^urudma-sa-tum a-ba-da-ab-jal₂-le-en-na
^35kucda-lu-uc₂-a a₂-sig₃-ge-bi mu-zu
³⁶im-dug im-lag hul sig₃-ga-ju₁₀
³⁷mir im ne₃-jal₂-la-gin₇ dal-le-da-bi
³⁸cag₄-dib-ba-ju₁₀-u₈ la-ba-ab-dib-be₂-en
³⁹ni₂ zi-ir kur-re ba-ab-cum₂-mu-un
⁴⁰cec gu₅-li-ju₁₀ cul ^dutu-am₃
⁴¹ki zi-cag₄-jal₂-la-ka igi mu-na-ni-du₈
^42dcul-gi-me-en dalla ed₂-bi-a inim mu-un-da-bal-e-en
⁴³dijir igi sag₉ me₃-ja₂-a-kam
⁴⁴cul ^dutu kur-ra ki aj₂ ^dlama ^jictukul-ja₂-kam
⁴⁵inim-ma-ni-ce₃ ga-mu-un-kalag-ge la ga-mu-un-ne₃-e
⁴⁶me₃ jic jic-e la₂-a-ba ^dutu ja₂-a-ar ma-an-ed₂
^47jictukul igi-nim-ma dug₃-ja₂ bi₂-tar
⁴⁸sig-ce₃ elam^ki-ma gu₃-ba jic ma-ab-us₂
⁴⁹ki bal ^jictukul-ja₂ a-na ba-zig₃-zig₃-ga
⁵⁰nam-lu₂-ulu₃-bi ce sahar-ra-gin₇
⁵¹ki-en-gi ki-uri ha-ba-ni-du₈
⁵²nij₂-ak-a-ja₂ ni₂-bi ga-balaj
⁵³kalag-ga-ja₂ mu-bi a₂ bi₂-su₃-ud
⁵⁴jectug₂-ju₁₀ nij₂-galam-ma sug₄-ga-am₃
⁵⁵a-na-ju₁₀ nij₂-ka-ge dib-ba-nu
⁵⁶nam-nun-da du-du-a-ju₁₀-ne
^57u₂numun₂ jic-hul ^u₂numun₂ jic-hul zukum-ma-ju₁₀-ne
⁵⁸til-lu-ug til-lu-ug-da nij₂-zi-jal₂ edin-na dab₅-dab₅-be₂-da-ju₁₀-ne
⁵⁹ur-mah ug ucumgal edin-na-ke₄
⁶⁰me-da im-tij₄-ba me-a jen-na-ba
⁶¹gu₃ nam-ur-saj-ja₂-bi-ir edin-na ja₂-la ha-ba-ni-dag-dag
⁶²sa-du₃-a-ta ba-ra-ab-ci-jen-ne-en
⁶³ce-er-tab-ta en-nu-un ba-ra-bi₂-ak
⁶⁴a₂ jic la₂-a ba-ab-ak ^jictukul ba-ra-bi₂-cub^ub
65ud zu₂ sis-a-bi ^urudcukur zi-ba he₂-bi₂-jar
⁶⁶za-pa-aj₂-bi-ce₃ gaba-ju₁₀ ba-ra-bi₂-zig₃
⁶⁷je₂₆-e tuc-ju₁₀-ce₃ ba-ra-ba-ta-jen-ne-en
⁶⁸ur-saj ur-saj-e gaz-a-gin₇
⁶⁹edin-na nij₂ ul₄-la-ac hu-mu-ni-ak
⁷⁰gu₃ cubtum_x(KASKAL.LAGABxU)-ma ki jiri₃ kud-da-ba edin-ba hu-mu-si-si-ig
⁷¹tur₃ amac ki saj bi₂-in-bur₂-bur₂-ra
⁷²sipad ildum₂-ma-bi-ir su-bi hu-mu-dug₃
⁷³ud-me-da ud-ul-li₂-a-ce₃
⁷⁴ga-nam ac-bi ba-an-da-sig₁₀-ga lu₂ nam-mu-un-ci-ib-be₂
⁷⁵ur-mah ^jictukul-la bi₂-til-la-ju₁₀
⁷⁶a-ra₂-bi zag-bi-ce₃ cid-bi ba-ra-zu
⁷⁷nij₂-ak-a-ja₂ ni₂-bi ga-balaj
⁷⁸kalag-ga-ja₂ mu-bi a₂ bi₂-su₃-ud
⁷⁹jectug₂-ju₁₀ nij₂-galam-ma sug₄-ga-am₃
⁸⁰a-na-ju₁₀ nij₂ ka-ge dib-ba-nu
^81dcul-gi dijir nam-juruc-a saj-kal erin₂-na-me-en
⁸²tir-ra sa i-ni-di ti galam-ma i-ni-gid₂
⁸³nij₂ cu-man a₂-ta ri-a-ja₂ ^jicgag-pan he₂-ni-ib-ri-en
⁸⁴am gal gud an-na sumun₂ alim gu₃ ib₂-de₂-de₂-e
⁸⁵kur-ur₂-ra saj bal-e-da-bi
⁸⁶a₂ ne₃-jal₂-la-ja₂ ti zu₂ mu-ni-in-ri
⁸⁷u₃-ur₅-re nij₂-la-ga me-dim₂
⁸⁸zi-bi edin-na cub-cub-bu-da-bi
⁸⁹an-za-gar₃ libir-ra-gin₇ hu-mu-cub^ub
90saj-bi ^jicnaja₃ hul-gin₇ ki he₂-bi₂-tag
⁹¹ance edin-na-ce₃ ^jices₂-ad la-ba-nu₂-en pu₂ la-ba-ba-al-e
^92jicgag u₂-tag-ga la-ba-ci-gid₂-en
⁹³gaba-ri-ju₁₀-gin₇ dug₃ bi₂-bur₂
⁹⁴gaz tur-ba dur₃ sal-la gaz-gin₇-nam la-ba-ci-ninni₂-de₃
⁹⁵ceg₉-bar ne₃-jal₂-la edin-na kac₄ di-da-bi
⁹⁶ur₅-bi ^jicgag-ta ba-ta-la₂
⁹⁷a₂ ac zig₃-ga-ju₁₀ ki-a ba-ab-ha-za
^98jicgag-pan-ta ka-KEC₂-ja₂ na-me
⁹⁹im-ri-a 1-am₃ lu₂ na-ma-ta-ed₂-e
¹⁰⁰nitah igi si-sa₂-a-me-en
¹⁰¹AB-ru-um ki-iz-ru-um-ma DU-a-ju₁₀-ne
^102jicilar sig₃-ge-bi gal-zu-me-en
^103jicnu₁₁ an-ta cu bar-ra-gin₇ kac₄ /dug₄\-bi
¹⁰⁴nij₂ bi₂-ra-a-ju₁₀ ki-bi nu-zi-zi-i
¹⁰⁵nij₂-gu₂-un-na-ce₃ da ba-ri-e
^106jicellag nij₂ an-na dirig-ga-am₃ tug₂-gin₇ im-ra-ra-an
¹⁰⁷nij₂-ur₂-4 nim-gin₇ jir₂-re-da a₂-sig₃ bi₂-ib-cub^ub-be₂-en
^108dcul-gi-me-en dug₃ cu bar-ra-gin₇ mac am₃-mi-ib₂-dab₅-be₂-en
¹⁰⁹a₂-ju₁₀ nij₂-na-me la-ba-dab₅-be₂ ma-ga-tum ma-cum₂
¹¹⁰ki-jiri₃-jen-ju₁₀ nij₂ mu-un-jar-jar
¹¹¹edin-ta du-ju₁₀-ne nij₂ mu-un-ci-la₂-la₂
¹¹²ama-ugu-ju₁₀ ^dnin-sumun₂-ka-ra
¹¹³dumu nij₂-5 nij₂-10-ni je₂₆-e-me-en
¹¹⁴nij₂-ak-ja₂ ni₂-bi ga-balaj
¹¹⁵kalag-ga-ja₂ mu-bi a₂ bi₂-su₃-ud
¹¹⁶jectug₂-ju₁₀ nij₂-galam-ma sug₄-ga-am₃
¹¹⁷a-na-ju₁₀ nij₂-ka-ge dib-ba-nu
¹¹⁸lugal-me-en ur-saj cu du₇-a kalam-ma kur₂-ra-am₃
^119dcul-gi nir-jal₂ usu gal-gal-la-me-en
¹²⁰kalag-ga-me-en nij₂ saj nu-gen₆-me-en nij₂-hul nu-zu-me-en
¹²¹id₂-da ^jicma₂-gur₈-ju₁₀ gu₂ nu-mu-da-ja₂-ja₂
¹²²ance erin₂-na-ju₁₀ zi-bi nu-mu-e-da-cub-be₂
¹²³cec gu₅-li-ju₁₀ cul ^dutu-gin₇
¹²⁴za₃-ce₃ pirij-gin₇ sug₂-sug₂-ge-ja₂
¹²⁵ance sahar la₂ ug-gin₇ sig₁₄ gi₄-a-ja₂ kuc₇ sag₉-ga-bi-me-en
¹²⁶dur₃^ur₃-gin₇ kac₄-a ne₃-ju₁₀ nu-silig-ge
¹²⁷kac₄-ta ed₂-a-me-en dug₃ nu-kuc₂-u₃-me-en
¹²⁸nam-te nu-jal₂-me-en isic-a gud-gu₄-ud-me-en
¹²⁹inim-ju₁₀ nij₂ ka-ta nu-cub-bu-dam
¹³⁰mi₂-ju₁₀ di nij₂-gen₆-na-ka ka-ga₁₄ mu-ci-jal₂
¹³¹mac₂ cu gid₂-gid₂ zalag-zalag-ga-me-en
¹³²jiri₃-jen-na inim UZU-ga-ka ^dnin-tud-bi je₂₆-e-me-en
¹³³cu-luh-ha nam-icib cu du₇-de₃
¹³⁴en-ra za₃-mi₂ <di>-de₃ ji₆-par₄-ce₃ huj-e
¹³⁵lu₂-mah nin-dijir cag₄ kug-ge pad₃-da
¹³⁶sig-ce₃ saj ja₂-ja₂ nim-ce₃ aga₃-kar₂ sig₁₀-ge
¹³⁷e₂ cu-nir-ra-ke₄ jal₂ da₁₃-da₁₃-[X]
¹³⁸jic-gid₂-da a me₃ tu₅-tu₅-[X]
¹³⁹ki bal-a-ce₃ sa₂ galam-ma ja₂-ja₂-[X]
¹⁴⁰inim dijir-re-e-ne nij₂ kal-kal-la-am₃
¹⁴¹sila₄ babbar udu kij₂ gi₄-a-ka i₅-jar u₃-bi₂-jar-jar
¹⁴²ki mu pad₃-da-ba a ece₄ ba-ni-de₂
¹⁴³inim sizkur₂-ra-ka udu sa am₃-mi-ni-ib₂-gi₄-gi₄-in
¹⁴⁴mac₂ cu gid₂-gid₂-ju₁₀ na-ja₂-ah-gin₇ u₆ mu-e
¹⁴⁵udu sa gi₄-a cu-ja₂ ma-an-dib
¹⁴⁶sag₉-ga hul-da la-ba-an-da-ha-ze₂-en
¹⁴⁷cag₄ zalag ni₂-ja₂-me-en igi-ju₁₀-ta i₃-du-un
¹⁴⁸lugal-me-en cag₄ udu 1-a-kam
¹⁴⁹a₂ aj₂-ja₂ nij₂ ki car₂-ra-ka igi mu-na-ni-du₈
¹⁵⁰nij₂-ak-ja₂ ni₂-bi ga-balaj
¹⁵¹kalag-ga-ja₂ mu-bi a₂ bi₂-su₃-ud
¹⁵²jectug₂-ju₁₀ nij₂-galam-ma sug₄-ga-am₃
¹⁵³a-na-ju₁₀ nij₂ ka-ge dib-ba-nu
^154dcul-gi lugal urim^ki-ma-me-en
¹⁵⁵u₃ nam-nar-ra gu₂-ju₁₀ ha-na-cum₂
¹⁵⁶nij₂-na-me-bi la-ba-da-an-gib-en
¹⁵⁷tigi a-da-ab nam-nar cu du₇-a buru₃ dajal-bi mu-zu
¹⁵⁸jic-cu-kar₂-ke₄ cag₄ bi₂-ib-dab₅
¹⁵⁹si ak-de₃ a₂ nu-mu-e-ci-ib-gaz-e-en
¹⁶⁰zi-zi-i cu₂-cu₂-ba jic mu-e-hur-hur
^161jicgu₂-uc za-mi₂-a kam-ma sag₉-ga mi-ni-zu
^162jicsa-ec₅ u₃ cag₄ nam-nar-ra-ka cag₄ du-bu-la mi-ni-zu
^163jicmi-ri₂-tum nij₂ e₂-sig₉-ga-ke₄ cu mu-un-gid₂-gid₂-de₃
^164jical-jar ^jicsa-bi₂-tum in-dim₂ lugal-la aga cu-si mu-ni-zu
^165jicur-za-ba-bi₂-tum ^jichar-har ^jicza-na-ru
^166jicur gu-la ^jicdim₃ lu₂ ma₂-gur₈-ra ne-gin₇ gu₃ mi-ni-ed₂
¹⁶⁷dumu nar-ra cu tam-tam-ma-gin₇
¹⁶⁸jic gu₃ di jic la-ba-ra-ab-tuku-a ki-ju₁₀-uc lu₂ mu-ni-ib-DU-[X (X)]
¹⁶⁹u₃-ne-en cag₄-bi ba-zu-zu
¹⁷⁰nij₂ ud-bi-ce₃ cu-ja₂ jal₂-la-gin₇ ba-e-de₃-ja₂-ja₂-de₃-[X]
¹⁷¹ad pad₃-de₃ gid₂-i tu-lu gen₆-na cu-ja₂ la-ba-ra-ed₂
¹⁷²gi di gi sipad-gin₇ nu-um-me
¹⁷³sumun-ca₄ ur₅ ca₄-e i-si-ic ja₂-ja₂
¹⁷⁴cag₄ gen₆ saj us₂-bi-gin₇ i₃-zu
¹⁷⁵hul₂-hul₂-le-me-en dug₃-dug₃-ge-me-en
¹⁷⁶giri₁₇-zal nam-nun-na ud zal-zal-le-me-en
¹⁷⁷lu₂-u₁₈-lu ni₂-te-a-ni-ce₃ jectug₂ he₂-ja₂-ja₂
¹⁷⁸nij₂-bi nij₂ igi nijin₂-na-ka
¹⁷⁹zag nam-til₃-la saj im-gi₄-a
¹⁸⁰ze₂ kur nam-gu₂-ga-ka lu₂ la-ba-an-da₁₃-da₁₃-e
¹⁸¹kalag-ga ne₃-ni-ta nir-jal₂-la-me-en
¹⁸²mu mah-a-ni-ta nir-jal₂-e
¹⁸³nij₂ he₂-em-gu-ul-gu-ul-e a-na-ac ba-ni-ib-la₂-e
¹⁸⁴ama-ugu-ju₁₀ ^dnin-sumun₂-na-ra ama na-an-da-u₃-tud
¹⁸⁵hul₂-hul₂-le-ja₂ dug₃-dug₃-ge-ja₂
¹⁸⁶a sila₃ jar-ra-ju₁₀ mi₂-ce₃ ma-ni-in-dug₄
¹⁸⁷nij₂-lul-la ka-ka nu-un-jal₂
¹⁸⁸munus-e tur-ra cu nu-bar-re
¹⁸⁹e₂-gal-ja₂ nij₂-hul₂-hul₂-la ud mi-ni-ib₂-zal-zal-e
^190dcul-gi-me-en til₃-la ud su₃-ra₂-ka nij₂ mi-ni-ib-gu-ul-gu-ul-lu-ja₂
¹⁹¹lugal-me-en ud nam-ju₁₀ ba-tar-ra-ta
¹⁹²til₃-la ur₅ sag₉-ge nij₂ gu-ul-gu-ul-lu-ja₂
¹⁹³igi ^dutu dumu ^dnin-gal-la-ka-ce₃ ba-ra-ma-ni-la₂
¹⁹⁴lugal-me-en ud til₃-la su₃-ra₂-ce₃
¹⁹⁵mu-ju₁₀ ud ul-li₂-a-ac cir₃-re he₂-em-dug₃-ge
¹⁹⁶cir₃ zu-ju₁₀-gin₇ inim zu-ju₁₀-gin₇
¹⁹⁷nij₂-saj-gi₄-a mul-an-bi-me-en
¹⁹⁸ni₂ saj-ki e₂-gal gen₆-ne₂-dam
¹⁹⁹saj-gag gi-ninda iri^ki du₃-du₃-u₃-dam
²⁰⁰ni₂ saj-ki-ju₁₀ a-ba-da-ab-jal₂-la-am₃
²⁰¹kur-kur ^jickab-gin₇ a-ba-da-ab-jal₂-en-na
²⁰²ni₂ me-lem₄ ^jickar₂ sig₁₀-sig₁₀ cu-ja₂
^203jicrab-gin₇ kalam-ma a-ba-da-jal₂-le-na
²⁰⁴nam-tag-ga sig₃-ge du₈-u₃-bi mu-zu
²⁰⁵inim-ma gal-gal-la silim-zu /jal₂\-[la-me-en]
²⁰⁶a ed₂-a-gin₇ gu₃ gal ud gal ud a-[X X]
²⁰⁷hi-il-zum^ki dab₅-be₂ elam um-ci-[X]
²⁰⁸a₂ jal₂ inim-ma-bi-ir gaba-ri-ni mu-zu
²⁰⁹dumu ki-en-gi^ki-ra numun-ba je₂₆-e-me-en
²¹⁰ur-saj ki-en-gi^ki-ra ur-saj je₂₆-e-me-en
²¹¹3-kam-ma-ac [lu₂] kur gig₂-gig₂-ga-ke₄
²¹²je₂₆-e-me-en [gu₂ mu-na]-/de₂\-e
²¹³4-kam-ma-ac [mar-tu] lu₂ kur-ra a [X (X)]
²¹⁴eme bal-e mu-un-da-an-gub-be₂
²¹⁵je₂₆-e eme-ni-ta inim-inim kilib-ba-ni si mu-un-na-ab-sa₂-e
²¹⁶5-kam-ma-ac su-bir₄^ki-a U.NAM.KUR gu₃ ra
²¹⁷eme-na dumu iri-na nu-me-en-na inim ba-an-di-ni-ib-kar-re
²¹⁸di ki-en-gi^ki-ke₄ si sa₂-da-ju₁₀-ne
²¹⁹5-bi eme-bi ba-ni-ib-gi₄-gi₄-in
²²⁰e₂-gal-ja₂ kac₄ inim bal-e eme-e li-bi₂-du₃-e
²²¹di-til-la-ja₂ cag₄ uc im-gu₇
²²²gal zu nam-lugal an-ta-jal₂-bi-me-en
²²³unken-jar-ra-ju₁₀ uj₃ saj sig₁₀-ga-gin₇
²²⁴nijir gal si gu₃ SA gu₃-bi-a ni₂ cag₄-ga cub-bu-de₃
²²⁵ad gi₄-gi₄-da inim car₂-car₂-dam
²²⁶pu-uh₂-ru-um^ki nam tar-tar-re-de₃
²²⁷caggina-ju₁₀-ne-er ad gi₄-gi₄ mu-un-zu inim car₂-car₂ mu-zu
²²⁸inim id₂-gin₇ unu₂-ba suh-ra-ba
²²⁹nir-da saj i₃-tum₂-tum₂-ja₂ ma-da gal-gal-ja₂ suhuc ma-ab-ge-en-ge-en
²³⁰inim-ta ^jictukul-gin₇ iri lah₅-me-en
²³¹nam-kug-zu-ju₁₀ gam-gam-da-bi-gin₇
²³²nam-kalag-ga saj-izi [bar₇]-a-gin₇
²³³ama tuku nu-me-en cag₄ inim-[ma] mu-zu
²³⁴inim-ju₁₀ saj i₃-li inim-ma-kam
²³⁵cag₄ izi-gin₇ bar₇-a ced₁₀-bi mu-zu
²³⁶ka jic-gi-gin₇ izi-ba cum₂-ma te-en-te-en-bi mu-zu
²³⁷inim-ju₁₀ lu₂-inim-ma dirig-ga ki mu-un-ci-ib-la₂-e
²³⁸nij₂-kal-kal-la je₂₆-e lu₂-bi-me-en
²³⁹sun₅-na dugud-bi saj-bi ma-kal
²⁴⁰nij₂-na-me-ja₂ la-ba-da-kar₂-kar₂-re-de₃
²⁴¹inim an-na inim ^den-lil-la₂-ta
²⁴²zi kalam-ma zi kur-kur-ra-ka giri₁₇ cu ca-ba-jal₂
²⁴³ja₂-la nu-dag-ge muc₃ nu-tum₂-mu-bi-me-en
²⁴⁴dijir-re-e-ne gub-bu in-ga-zu
^245da-nun-na-ke₄-ne cag₄ ced₁₀-de₃ mu-zu
^246dcul-gi nam-nun-na gu₂ gal pec₁₁-a-me-en
²⁴⁷nij₂-gal-gal-la a-ba-da-jal₂-le-en-na
²⁴⁸cag₄-ja₂ hul₂-la a-ba-da-jal₂-la
²⁴⁹nij₂ ja₂-la dag-dag-ge bar-ce₃ nu-cub-be₂-me-en
²⁵⁰ur₅-gin₇ gid₂-gid₂ saj-jal₂-a-me-en
²⁵¹a₂ ki lul-la nu-mu-ci-/aj₂\-[ja₂]
²⁵²a-gar₃ gal-gal-e gu₂ /mu\-[un-cum₂]
²⁵³gan₂-ne₂ gana₂ zid-de₃ jic /mu\-[ni-in-du₃]
²⁵⁴dul saj eg₂ pa₅-re a₂ cum₂-/mu\-[me-en]
²⁵⁵i₃ gal-gal-me-en siki gal-[gal]-me-en
²⁵⁶gu nam-ju₁₀ mah ce /nam\-[ju₁₀] mah
²⁵⁷enmen₂ cag₄-jar dijir-re-e-ne-/ka\ cag₄-zarah ma-ab-/gu-ul\-gu-ul
^258dcul-gi-me-en zi ki-en-gi-ra-me-en
²⁵⁹lugal bad-ba₉-ra₂ gaba-ri nu-tuku-me-en
²⁶⁰in-ga-ab-be₂-en nij₂-ju₁₀ nij₂-gal-am₃
²⁶¹lugal-me-en a-na-ju₁₀ cu ba-ab-tej₃-je₂₆-e
²⁶²jectug₂ a₂ dirig nam-si-sa₂-ju₁₀-uc
²⁶³inim gen₆-na nij₂ nu-ha-lam-e-ju₁₀-uc
^264dictaran-gin₇ di ku₅-ru gal zu-ju₁₀-uc
^265den-lil₂-le a₂ uj₃ lu-a-na mu-da-an-aj₂-ja₂-ta
²⁶⁶uri he₂-em dumu ki-en-gi-ra he₂-em
²⁶⁷ki gu-ti-um^ki lu₂ i-^dutu he₂-em
²⁶⁸lugal ud ul-li-a 1-ra
²⁶⁹cag₄-ju₁₀ nij₂-a₂-zig₃ ba-ra-mu-un-na-ta-ab-de₆
²⁷⁰nam-lu₂-ulu₃ us₂-a an-ta sig₁₀-ga-ta
²⁷¹jectug₂ dab₅-ba-ba na-ja₂-ah-bi nu-me-en-na
²⁷²en₃-du ud-bi-ta libir-ra ul-li₂-a
²⁷³tigi za-am-za-am cu ci-tum₂-mu-de₃
²⁷⁴ud na-me lul-ce₃ ba-ra-bi₂-pad₃ ka-ge ba-ra-bi₂-gi₄
²⁷⁵nij₂ libir-ra-bi en he₂-bi-tar-tar cub-bu-de₃ ba-ra-bi₂-cum₂
²⁷⁶tigi za-am-za-am ki di-bi nij₂-/na\-[me] jectug₂-ga he₂-ni-us₂
²⁷⁷cir₃-gid₂-da-bi e₂ dug₃-ga-ja₂ pa ed₂ ha-ni-ak
²⁷⁸nij₂-cu-ta ba-ra-cub-bu-da-[bi]
²⁷⁹cu nam-nar-ra-ke₄ he₂-bi₂-la₂-la₂
²⁸⁰cag₄ kalam-ma-ke₄ izi zal-gin₇ he₂-bi₂-ak
²⁸¹a-na ab-tuku ur₅-re ib₂-hul
²⁸²a-ba nam-til₃ an-na ba-e-ed₂
²⁸³ud me-da ud ul-li₂-a-ce₃
²⁸⁴lu₂ ^den-lil₂-la₂ mu-un-zi-[zi-i]
²⁸⁵tukum-bi je₂₆-e-gin₇-nam lugal si-sa₂-am₃
²⁸⁶mi₂ cud₃ cir₃ nam-kug-zu-ju₁₀
²⁸⁷a₂ nam-ur-saj-ja₂ ki-jiri₃-jen-na-ju₁₀
²⁸⁸lugal-bi-ir e₂-gal dug₃-ga-na he₂-na-an-us₂
²⁸⁹nij₂ in-na-dug₃-ga cag₄-ce₃ he₂-na-gid₂
²⁹⁰mi₂-ja₂ usu-bi he₂-en-zi-zi-[i]
²⁹¹cir₃-ja₂ a-la-bi he₂-en-tum₂-tum₂-mu
²⁹²jectug₂ gal-gal-ju₁₀ ur₅-da hu-mu-na-ak
²⁹³kalag-ga nij₂ in-da-sig₁₀-ge-da-gin₇
²⁹⁴ki a₂-na la-ba-ni-ib-jal₂-la-am₃
²⁹⁵nij₂-nam-ju₁₀-u₈ cu ha-ba-an-sig₃-sig₃-ge me-tec₂ hu-mu-i-i
²⁹⁶mu dug₃-ga-ju₁₀ he₂-en-pad₃-pad₃-de₃
²⁹⁷tukum-bi cag₄-ga-ni nij₂-erim₂ mu-e-ci-ib₂-tum₃
²⁹⁸nij₂-na-me-ja₂ saj ba-an-sig₃
²⁹⁹lu₂ a₂-zig₃-ga-bi-ir ^dnanna di he₂-en-e
^300dutu saj-izi-e cu he₂-en-da-ab-ri-e
³⁰¹lugal-bi ki-jiri₃-jen-na he₂-du inim-ma-ni al-ze₂-er
³⁰²un-ga-til₃ ud til₃-la-ni-a
³⁰³nij₂-usu-na he₂-en-ak en₃-du me-da tum₃
³⁰⁴lugal-me-en in-ga-zu-a-ta nij₂-me-jar gu₃ i₃-de₂
³⁰⁵jectug₂ jectug₂-ga dirig-ga-ju₁₀-ce₃
³⁰⁶um-mi-a-gin₇ mu libir-ra-ju₁₀-ce₃
³⁰⁷nij₂-umun₂-a en₃-du-ju₁₀ he₂-en-pad₃-de₃ mul-an he₂-u₃-tud
³⁰⁸sig-ce₃ urim^ki-ma ki sikil-la bi₂-mu₂
³⁰⁹e₂ jectug₂ ^dnisaba mul en₃-du-ja₂-ka
³¹⁰nim-ce₃ nibru^ki-a ki-gal-la bi₂-gub
³¹¹cud₃ e₂-kur-ra ki he₂-us₂-sa-ju₁₀-uc
³¹²dub-sar he₂-gub cu-ni he₂-eb-dab₅-be₂
³¹³nar he₂-gub gu₃ hu-mu-un-ne₂-re-de₂
³¹⁴e₂-dub-ba-a da-ri₂ hur nu-kur₂-ru-dam
³¹⁵ki-umun₂ da-ri₂ hur nu-silig-ge-dam
³¹⁶jectug₂ dab₅-ba-ju₁₀ i₃-ne-ec₂ ne-e ur₅-ra-am₃
³¹⁷nij₂ ka-ge dib-ba ki-car₂-ra
³¹⁸jiri₃-jen-na inim en₃-du-ja₂-kam a-na mu-ci-jal₂-la
³¹⁹an ^den-lil₂ ^dutu ^dinana lul ba-ra-na he₂-ge-en
³²⁰u₃ nam-erim₂-e lu₂ na-an-ga-am₃-me
³²¹ud ne-e mu-sar-ra-ju₁₀-a
³²²iri nu-mu-un-gul-la bad₃ nu-mu-un-sig₁₀-ga-ju₁₀
³²³kur gi-sig-gin₇ nu-mu-un-dub₂-ba-ju₁₀
³²⁴ar₂ zag li-bi₂-til-til-la-ju₁₀
³²⁵a-na-gin₇-nam nar-e en₃-du-a mu-ci-ja₂-ja₂-a
³²⁶nij₂-umun₂-a saj-kal mu da-ri₂-kam
³²⁷nij₂-lul nij₂-gen₆-na nu-me-a sar-re-bi a-na-gin₇-nam
³²⁸lugal-me-en a₂-ja₂ ^dlama-bi kalag-ga-na cir₃-bi-im
³²⁹ki-jiri₃-jen-na-ju₁₀ nar-e mu-ci-in-jar
³³⁰en₃-du-ju₁₀ nij₂ nu-ha-lam-e-de₃
³³¹inim-ju₁₀ nij₂ ka-ta nu-cub-bu-de₃
³³²je₂₆-e lugal kalam-ma dug₃-ga-me-en
³³³numun ba-i-i-ta zag uj₃ lu-a-ce₃
³³⁴lugal nij₂-ja₂ nij₂ bi₂-in-sig₁₀-ga-am₃
³³⁵aga-ni an-ne₂ ba-ra-ba-ta-an-il₂
³³⁶jidru-ni barag nam-lugal-la-ta ba-ra-ba-ta-ed₃-de₃
³³⁷kalag-ga nam-kug-zu jectug₂ cum₂-ma-me-en
³³⁸nij₂-gal-gal-ja₂ zag-bi til-la
³³⁹pirij igi ^urudcukur-ra ga-rac^sar-gin₇ cab-cab-e
³⁴⁰pirij-tur cu zig₃-ga igi ^jicga-rig₂ ak gi-gin₇ ca₅-ca₅-dam
³⁴¹zi-bi ur-gir₁₅-gin₇ ^uruddur₁₀-uc NE.NE-ga
³⁴¹sumun₂ usu gal-gal gud a₂ nu-gi₄-a
³⁴³gud kur-bi-ce₃ DU-ba edin-na mi-ni-gaz-za
³⁴⁴kur-ba cu-a bal-e-da-bi
³⁴⁵hur-saj nij₂ cag₄-ge nu-gid₂-i-gin₇
³⁴⁶cag₄-ge cu nu-tej₃-je₂₆-e-gin₇ ib₂-ak
³⁴⁷inim ib₂-ta-DU.DU i-gi₄-in-zu lul na-nam
³⁴⁸ki nam-dub-ba inim dugud-dugud-da-bi
³⁴⁹nam-kug-zu-ju₁₀ nam-kalag-ga-ju₁₀
³⁵⁰a₂ jal₂ taka₄-a ki silim-ce₃ di-ja₂
³⁵¹mu-un-zu-a-na nu-mu-un-[...]-/na\
³⁵²nij₂-gen₆-na-ju₁₀ nij₂-lul-la-gin₇
³⁵³cu tec₂-a mu-un-ru-gu₂ ka-tar-ra mu-un-si-il-le
³⁵⁴ur-saj kalag-ga-ni kalag-ga rib-ba-me-en
^355dcul-gi jissu-a-ni kur-ra la₂-a-me-en
³⁵⁶lugal ^jictukul a-ru-ub ki bal-na je₂₆-e-me-en
³⁵⁷mu da-ri₂-ju₁₀ a₂ gal bi₂-su₃-ud
³⁵⁸i₃-ne-ec₂ ^dutu ud ne-a-a
³⁵⁹kur dumu ki-en-gi-ra nu-zu-ba
³⁶⁰sa-dur₂ kaskal-bi-ce₃ cu la-ba-jal₂-la-ba
³⁶¹zag-ba ka-inim-ma lu₂ nu-gub-gub-ba
³⁶²cec di₄-di₄-la₂ lu₂ inim-ma-bi-ne
³⁶³dumu-saj inim u₃-tud cir₃ kad₄ inim kad₄-bi-im
³⁶⁴cir₃-ja₂ mul-an-gin₇ gu₃ im-de₂-e-ne
³⁶⁵inim-ju₁₀-ta X-gin₇ ki im-tag-tag-ge-ne
³⁶⁶[...] buru₅^mucen DU-a-gin₇
³⁶⁷[...]-da la-ba-an-dug₄
³⁶⁸[...] zag til-la-me-en
³⁶⁸[...] X-ba nir-jal₂-me-en
³⁷⁰[...]-a mu-da-an-zu
³⁷¹[...] nij₂ [...] /su₃\-ud-da
³⁷²[X] X X X X je₂₆-e-me-en
³⁷³[X X] X tag-tag-da-bi
³⁷⁴e₂-bi-a lu₂ si-sa₂-bi kun₄ dib-be₂-me-en
³⁷⁵lu₂ mu pad₃-da ^dnanna-me-en
³⁷⁶saj-us₂ e₂ ^den-lil₂-ka emedu₂ an-na-me-en
^377dcul-gi-me-en e₂-ju₁₀ e₂-hur-saj e₂-gal e₂-gal-bi-im
³⁷⁸ki-tuc nam-lugal-ja₂ za₃-mi₂ gal-gal-la-kam
³⁷⁹hur-saj za-gin₃-na-gin₇ ca-ba-an-galam-en
^380dinana nin dijir-re-e-ne-ke₄
³⁸¹a₂-ja₂ ^dlama-bi-im kalag-ga-ja₂ cir₃-bi-im
³⁸²lugal-lugal-e-ne-er dirig-ga-me-en
³⁸³nij₂-ki-car₂-ra-ke₄ cu mi-ni-in-du₇
³⁸⁴za₃-mi₂-ju₁₀ dug₃-ga-am₃
^385dnisaba za₃-mi₂

Top | Home This composition: translation | bibliography

Revision history

10.viii.1998-12.i.1999 : JAB : standardisation
26.vii.2000 : GZ : proofreading
27.vii.2000 : GC : tagging
01.ix.2000 : ER : proofreading SGML
01.ix.2000 : ER : converting to HTML 4.0
7.ix.2001 : ER : header and footer reformatted; substantive content of file not changed