The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


The exaltation of Inana (Inana B): composite text

1nin me car2-ra ud dalla ed2-a
2munus zid me-lem4 gur3-ru ki aj2 an urac-a
3nu-gig an-na suh-gir11 gal-gal-la
4aga zid-de3 ki aj2 nam-en-na tum2-ma
5me 7-bi cu sa2 dug4-ga
6nin-ju10 me gal-gal-la saj-KEC2-bi za-e-me-en
7me mu-e-il2 me cu-zu-ce3 mu-e-la2
8me mu-e-ur4 me gaba-za bi2-tab
9ucumgal-gin7 kur-re uc11 ba-e-cum2
10dickur-gin7 ki cegx(KAxLI) gi4-a-za dacnan la-ba-e-ci-jal2
11a-ma-ru kur-bi-ta ed3-de3
12saj-kal an ki-a dinana-bi-me-en
13izi bar7-bar7-ra kalam-e cej3-ja2
14an-ne2 me cum2-ma nin ur-ra u5-a
15inim kug an-na-ta inim dug4-dug4
16biluda gal-gal-la nij2-zu a-ba mu-un-zu
17kur gul-gul ud-de3 a2 ba-e-cum2
18ki aj2 den-lil2-la2 kalam-ma ni2 mi-ni-ri
19a2-aj2-ja2 an-na-ke4 ba-gub-be2-en
20nin-ju10 za-pa-aj2-zu-ce3 kur i3-GAM.GAM-e
21ni2 me-lem4 u18-lu-da nam-lu2-ulu3
22nij2-me-jar jiri3-bi u3-mu-ri-gub
23me-ta me huc-bi cu ba-e-re-ti
24i-dub er2-ra-ke4 jal2 ma-ra-ab-taka4
25e2 a-nir gal-gal-la sila-ba mu-ri-du
26igi me3-ta nij2 ma-ra-ta-si-ig
27nin-ju10 a2 ni2-za na4zu2 zu2 i3-gu7-e
28ud du7-du7-gin7 i3-du7-du7-de3-en
29ud gu3 ra-ra-da gu3 im-da-ab-ra-ra-an
30dickur-da cegx(KAxLI) mu-da-an-gi4-gi4-in
31im-hul-im-hul-da im-da-kuc2-u3-de3-en
32jiri3-za nu-kuc2-u3 i3-im-si
33balaj a-nir-ra-ta i-lu im-da-ab-be2
34nin-ju10 da-nun-na dijir gal-gal-e-ne
35su-dinmucen dal-la-gin7 du6-de3 mu-e-ci-ib-ra-ac
36igi huc-a-za la-ba-sug2-ge-de3-ec (some mss. have instead: la-ba-sug2-ge-ec-am3)
37saj-ki huc-a-za saj nu-mu-un-de3-ja2-ja2
38cag4 ib2-ba-za a-ba ib2-te-en-te-en
39cag4 hul-jal2-la-za te-en-te-bi mah-am3
40nin ur5 i3-sag9 nin cag4 i3-hul2
41ib2-ba nu-te-en-te-en dumu gal dsuen-na
42nin kur-ra dirig-ga a-ba ki-za ba-an-tum3
43hur-saj ki-za (2 mss. have instead: kur saj-ki-za) ba-e-de3-gid2-de3-en dacnan nij2-gig-bi
44abul-la-ba (1 ms. has instead: e2-gal-la-ba) izi mu-ni-in-ri-ri
45id2-ba uc2 ma-ra-an-de2 uj3-bi ma-ra-na8-na8 (2 mss. have instead: ba-ra-na8-na8)
46ugnim-bi ni2-bi-a ma-ra-ab-lah5-e
47KA.KEC2-bi ni2-bi-a ma-ra-ab-si-il-le
48juruc a2 tuku-bi ni2-bi-a ma-ra-ab-sug2-ge-ec
49iri-ba ecemen-ba mir i-ib2-si
50juruc cag4-gan-bi cajax(LU2)-ce3 ma-ra-ab-sar-re-ec
51iri kur za-ra li-bi2-in-dug4-ga-am3
52a-a ugu-zu li-bi2-in-ec-am3
53inim kug-zu bi2-in-dug4 ki jiri3-za he2-eb-gi4
54cag4 tur3-bi-ta jiri3 he2-eb2-ta-an-ze2-er
55munus-bi dam-a-ni-ta sag9-ga na-an-da-ab-be2
56ji6-u3-na ad na-an-di-ni-ib-gi4-gi4
57nij2-kug cag4-ga-na nam-mu-da-an-bur2-re
58u3-sun2 zi-zi dumu gal dsuen-na
59nin an-ra dirig-ga a-ba ki-za ba-an-tum3
60me zid-de3 nin gal nin-e-ne
61cag4 kug-ta ed2-a ama ugu-ni-ir dirig-ga
62gal-zu igi-jal2 nin kur-kur-ra
63zi-jal2 uj3 lu-a cir3 kug-zu ga-am3-dug4
64dijir zid me-a tum2-ma gal-bi dug4-ga-zu mah-am3
65cag4 su3-ra2 munus zid cag4 dadag-ga me-zu (2 mss. have instead: me zid) (1 ms. has instead: me kug) ga-mu-ra-ab-dug4
66ji6-par3 kug-ja2 hu-mu-ci-in-kur9-re-en
67en-me-en en-he2-du7-an-na-me-en
68gima-sa2-ab i3-gur3-ru asilal-la2 i3-dug4
69ki-sig9-ga (1 ms. has instead: kij2-sig-ga-ju10) bi2-ib-jar je26-e nu-mu-un-til3-le-en
70ud-de3 ba-tej3 ud mu-da-bil2
71jissu ne ba-tej3 u18-lu-da im-mi-dul
72ka lal3-ju10 cu uh3-a ba-ab-dug4
73nij2 ur5 sag9-sag9-ju10 sahar-ta ba-da-gi4
74nam-ju10 dsuen lugal-an-ne2
75an-ra dug4-mu-na-ab an-ne2 ha-ma-du8-e
76a-da-lam an-ra ba-an-na-ab-be2-en an-ne2 mu-e-du8-e
77nam lugal-an-ne2 munus-e ba-ab-kar-re
78kur a-ma-ru jiri3-ni-ce3 i3-nu2
79munus-bi in-ga-mah iri mu-un-da-ab-tuku4-e
80gub-ba cag4-ga-na ha-ma-sed-de3
81en-he2-du7-an-na-me-en a-ra-zu ga-mu-ra-ab-dug4
82er2-ja2 kac dug3-ga-gin7
83kug dinana-ra cu ga-mu-ni-ri-bar di-zu (some mss. have instead: silim-ma) ga-mu-ra-ab-dug4
84dac-im2-babbar na-an-kuc2-u3-de3-en
85cu-luh an kug-ga-ke4 nij2-nam-ma-ni in-kur2
86an-da e2-an-na ha-ba-da-an-kar
87dijir lu2 gu-la-ta ni2 ba-ra-ba-da-tej3
88e2-bi la-la-bi ba-ra-mu-un-gi4 hi-li-bi ba-ra-mu-un-til
89e2-bi e2 hul-a hu-mu-un-di-ni-in-kur9
90tab mu-ci-in-kur9-ra-ni ninim-ma-ni hu-mu-un-tej3
91dsun2 zid-ju10 lu2 hu-mu-sar-re-en lu2 he2-em-mi-dab5-be2-en
92ki zi-cag4-jal2-la-ka je26-e a-na-me-en
93ki bal hul-gig dnanna-za-ke4-ec an-ne2 ha-ba-ab-cum2-mu
94iri-bi an-ne2 ha-ba-ra-an-si-il-le
95den-lil2-le nam ha-ba-da-an-kud-de3
96dumu er2 pad3-da-bi ama-ni na-an-sed4-e
97nin a-nir ki jar-ra
98jicma2 a-nir-ra-zu ki kur2-ra he2-bi2-ib-taka4
99cir3 kug-ja2-ke4-ec i3-ug5-ge-de3-en
100je26-e dnanna-ju10 en3-ju10 ba-ra-an-tar (1 ms. has instead: /di\-[ju10 ba]-ra-bi2-in-kud)
101ki lul-la he2-eb-gul-gul-en
102dac-im2-babbar-e di-ju10 ba-ra-bi2-in-dug4
103bi-in-dug4 nam-ju10 li-bi2-in-dug4 nam-ju10
104u3-ma gub-gub-ba e2-ta ba-ra-an-ed2-en
105simmucen-gin7 ab-ta ba-ra-an-dal-en zi-ju10 im-mi-gu7
106jickici16 kur-ra-ke4 bi2-in-du-e-en
107aga (1 ms. has instead: tug2) zid nam-en-na mu-da-an-kar
108jir2 ba-da-ra ma-an-cum2 a-ra-ab-du7 ma-an-dug4
109nin kal-kal-la an-ne2 ki aj2
110cag4 kug-zu mah-a ki-bi ha-ma-gi4-gi4
111nitalam ki aj2 ducumgal-an-na-ka
112an-ur2 an-pa nin gal-bi-me-en
113da-nun-na-ke4-ne gu2 jic ma-ra-an-jar-re-ec
114u3-tud-da-ta nin ban3-da-me-en
115da-nun-na dijir gal-gal-e-ne a-gin7 ba-e-ne-dirig-ga
116da-nun-na-ke4-ne nundum-nundum-bi-ta ki su-ub ma-ra-ak-ke4-ne
117di ni2-ja2 nu-mu-un-til di kur2 di-ju10-gin7 igi-ja2 mu-un-nijin2
118jic-nu2 gi-rin-na (1 ms. has instead: gi-rin-ja2) cu nu-um-mi-la2
119inim dug4-ga dnin-gal lu2-ra nu-mu-na-bur2
120en dadag-ga dnanna-me-en
121nin ki aj2 an-na-ju10 cag4-zu ha-ma-sed-de3
122he2-zu he2-zu-am3 dnanna li-bi2-in-dug4-ga za-a-kam bi2-in-dug4-ga
123an-gin7 mah-a-za he2-zu-am3
124ki-gin7 dajal-la-za he2-zu-am3
125ki bal gul-gul-lu-za he2-zu-am3
126kur-ra gu3 de2-e-za he2-zu-am3
127saj jic ra-ra-za he2-zu-am3
128ur-gin7 ad6 gu7-u3-za he2-zu-am3
129igi huc-a-za he2-zu-am3
130igi huc-bi il2-il2-i-za he2-zu-am3
131igi gun3-gun3-na-za he2-zu-am3
132uru16-na nu-ce-ga-za he2-zu-am3
133u3-ma gub-gub-bu-za he2-zu-am3
134dnanna li-bi2-in-dug4-ga za-a-kam bi2-in-dug4-ga
135nin-ju10 ib2-gu-ul-en i3-mah-en
136nin ki aj2 an-na-ju10 mir-mir-za (1 ms. has instead: barag-barag-/za\) ga-am3-dug4
137ne-mur mu-dub cu-luh si bi2-sa2
138e2 ec2-dam-kug ma-ra-jal2 cag4-zu na-ma-sed-de3
139im-ma-si im-ma-dirig-ga-ta nin un gal ma-ra-dug4
140nij2 ji6-u3-na ma-ra-an-dug4-ga-am3
141gala-e an-bar7-ka cu hu-mu-ra-ab-gi4-gi4
142dam dab5-ba-za-ke4-ec dumu dab5-ba-za-ke4-ec
143ib2-ba-zu ib2-gu-ul cag4-zu nu-te-en-te-en
144nin gu2 tuku nir-jal2 gu2 en-na-ke4
145sizkur2-ra-na cu ba-an-ci-in-ti
146cag4 kug dinana ki-bi ba-an-na-ab-gi4
147ud ba-an-na-dug3 la-la ba-an-sud-sud hi-li ma-az ba-an-du8-du8
148iti6 ed2-a-gin7 la-la ba-an-gur3
149dnanna u6 zid-de3-ec mu-un-ed2
150ama-ni dnin-gal-am3 cud3 mu-na-an-ra2
151jicka2-na-ke4 silim-ma mu-na-ab-be2
152nu-gig-ra dug4-ga-ni mah-am3
153kur gul-gul an-da me ba-a
154nin-ju10 hi-li gu2 ed2 dinana za3-mi2


Top | translation | bibliography


Revision history

27.i.1999-01.ii.1999 : JAB : standardisation
8.ii.1999 : JAB : minor corrections
12.ii.1999 : JAB : minor corrections
02.xi.1999 : GZ : proofreading
22.xi.1999 : GC : tagging
21.i.2000 : ER : proofreading SGML
21.i.2000 : ER : converting to HTML 4.0
7.ix.2001 : ER : header and footer reformatted; substantive content of file not changed