The Electronic Text Corpus of Sumerian Literature

ETCSLtransliteration : c.1.8.2.4

Enmerkar and En-suḫgir-ana

	Segment A
1.	{šeg₁₂ /kur\ [šuba-ta e₃]-a} {(on the edge of ms. C:) šeg₁₂ muš₃ za-gin₃-/ta\ [e₃-a]} (Cited in OB catalogue from Nibru, at Philadelphia, 0.2.01, line 40; OB catalogue in the Louvre, 0.2.02, line 25)
2.	kul-aba₄^ki iri^ki an ki-da mu₂-a
3.	unug^ki-ga mu-bi ^dtir-an-na-gin₇
4.	an-ne₂ us₂-sa-bi si-muš₃ gun₃-a
5.	an-na gub-ba-bi ud-sakar gibil na-nam
6.	me gal-[gal] nam-nun-na du₃-a
7.	kur sikil-la ud dug₃-ga ki ĝar-ra
8.	iti₆-gin₇ kalam-ma e₃-a
9.	ud zalag-gin₇ kalam-ma si sa₂
10.	ab₂-ur₃ ab₂-saḫar_x(NE)-gin₇ ḫe-nun-ta e₃-a
11.	unug^ki-ga ka tar-ra-bi kur-ra ba-te
12.	me-lem₄-bi kug-me-a zid-da-am₃
13.	aratta^ki-a tug₂-gin₇ ba-e-dul gada-gin₇ ba-e-bur₂
14.	ud-ba ud en-na-am₃ ĝi₆ barag-ga-am₃ ^dutu lugal-am₃
15.	sukkal en aratta^ki-ka sukkal an-sig₇-ga-ri-a mu-ni ḫe₂-en-na-nam
16.	sukkal en-me-er-kar₂ en kul-aba₄^ki-ke₄ nam-en-na-tum₂-ma mu-ni
17.	en uru e-ne nun uru e-ne
18.	en MI uru e-ne nun MI uru e-ne
19.	en MI-MI uru e-ne nun MI-MI uru e-ne
20.	lu₂ diĝir-še₃ tu-ud e-ne
21.	lu₂ diĝir-še₃ pa e₃ e-ne
22.	en unug^ki-ga en kul-aba₄^ki-ra ur₅-bi a-da-min₃ na-e-de₃
23.	en aratta^ki en-suḫ-gir₁₁-an-na-ke₄
24.	igi-bi igi unug^ki-še₃ kiĝ₂-gi₄-a-ar inim mu-na-ni-ib₂-be₂
25.	e-ne ĝa₂-a-ra gu₂ ḫa-ma-an-ĝa₂-ĝa₂ ^ĝiššudul₄ ḫa-ma-ab-il₂-e
26.	ud-da gu₂ ma-an-ĝar gu₂ na-ma-an-ĝar u₃ e-ne u₃ ĝe₂₆-e
27.	[e-ne] ^dinana-da e₂-ĝar₈-a-ka ḫu-mu-da-an-til₃
28.	[ĝe₂₆]-/e\ ^dinana-da e₂-za-gin₃ aratta^ki-ka ḫu-mu-da-an-til₃-e-en
29.	ĝiš-nu₂ girin-a-ka ḫu-mu-un-de₃-nu₂
30.	še-er-kan₂ dug₄ u₃ dug₃ ku-ku-de₃ ḫu-mu-de₃-nu₂-en
31.	e-ne ^dinana-da ĝi₆-a ma-mu₂-da igi ḫu-mu-ni-in-du₈
32.	ĝe₂₆-e ^dinana-da ĝiri₃ babbar-ra-na inim mu-da-bal-e
33.	e-ne kur-gi₄^mušen še ḫe₂-bi₂-ib₂-gu₇-e
34.	ĝe₂₆-e kur-gi₄^mušen še ba-ra-bi₂-ib₂-gu₇-e
35.	ĝe₂₆-e kur-gi₄^mušen nunuz-bi ĝir₃-lam-ma amar-[bi ĜAR la₂-e]
36.	tur-tur-bi utul₂-ĝu₁₀-še₃ gal-gal šen maḫ-[ĝu₁₀-še₃]
37.	kur-gi₄^mušen ki-a ba-ra-ab-taka₄-[a-bi]
38.	ensi₂ kur-ra-ke₄ gu₂ mu-un-ĝar-[re-eš-a] mu-da-an-gu₇-[u₃-ne]
39.	en-me-er-kar₂-ra ur₅-gin₇ inim mu-na-ab-[be₂]
40.	kiĝ₂-gi₄-a du-ni šeg₉-bar-ra-am₃ im₂-mi-da-ni sur₂-du₃^mušen-am₃
41.	ud-dam i₃-e₃ an-u₂-sa₁₁-an-na-am₃ i₃-gi₄-gi₄
42.	buru₅^mušen ud zal-le-da-gin₇ gaba ki zag im-gub
43.	buru₅^mušen ĝi₆ MAŠ-gin₇ kur-šag₄-ge im-si
44.	^ĝišilar-gin₇ zag im-gub-gub-be₂
45.	dur₃^ur₃ dili du-e ^dšakkan₂-gin₇ ḫur-saĝ-ĝa₂ {i₃-dag-ge₄} {(1 ms. has instead:) i₃-si-il-le}
46.	dur₃^ur₃ uru₁₆ gal-gin₇ kušum₄ i₃-tag-tag-ge
47.	dur₃^ur₃ sal-la kaš₄-e kiĝ₂-ĝa₂ du-ru-uš bur₂
48.	ur-maḫ a-šag₄-ga ud zal-la mur-ma-ra mu-un-ša₄
49.	ur-bar-ra sila₄ šu ti-a-gin₇ ul₄-ul₄-e im-ĝen
50.	ki tur-tur-bi /mu\-un-ĝen-na-a DUL₃-a mu-na-ab-si
51.	ki gal-gal-/bi\ mu-un-ĝen-na-a bulug-ga mu-na-ab-be₂
52.	en-ra {[ĝi₆-par₄] kug-ga-ni-še₃} {(1 ms. has instead:) ki /kug-kug-ga-ni-še₃\} im-ma-ši-in-ku₄-ku₄
	{
	(1 ms. adds 1 line:)
52A.	en-me-er-kar₂ <ki> kug-kug-ga-ni-še₃ im-ma-ši-in-ku₄-ku₄
	}
53.	za-e-še₃ lugal-ĝu₁₀ mu-e-ši-in-gi₄-gi₄
54.	en aratta^ki en-suḫ-gir₁₁-an-na-ke₄ mu-e-ši-in-gi₄-gi₄
	{
	(some mss. add the lines:)
54A.	lugal-zu dug₄-ga-ni nam-ĝu₁₀ taḫ-a-ni nam-ĝu₁₀
54B.	en-suḫ-gir₁₁-an-na-ke₄ dug₄-<ga>-ni nam-ĝu₁₀ taḫ-a-ni nam-ĝu₁₀
54C.	lugal-ĝu₁₀ a-na bi₂-in-dug₄ a-na bi-in-taḫ-am₃
54D.	en-suḫ-gir₁₁-an-na-ke₄ a-na bi₂-in-dug₄ a-na bi₂-in-taḫ-am₃
	}
55.	lugal-ĝu₁₀ na-ab-be₂-a
56.	e-ne ĝa₂-a-ra gu₂ ḫa-ma-an-ĝa₂-ĝa₂ ^ĝiššudul₄ ḫa-ma-ab-il₂-e
57.	ud-da gu₂ ma-an-ĝar gu₂ [na-ma-an-ĝar u₃ e]-/ne\ u₃ ĝe₂₆-e
58.	e-ne ^dinana-da e₂-/ĝar₈\-[a-ka ḫu-mu-da]-an-til₃
59.	ĝe₂₆-e ^dinana-da e₂-za-gin₃ [aratta^ki-ka ḫu-mu]-da-an-til₃-en
60.	ĝiš-nu₂ girin-a-ka ḫu-mu-un-[de₃-nu₂]
61.	še-er-kan₂ dug₄ u₃ dug₃ ku-ku-da [ḫu-mu-de₃-nu₂-en]
62.	e-ne ^dinana-da ĝi₆-a ma-/mu₂\-[da igi ḫu-mu-ni-in-du₈]
63.	ĝe₂₆-e ^dinana-da ĝiri₃ babbar-ra-na inim [mu-da-bal-e]
64.	e-ne kur-gi₄^mušen še ḫe₂-bi₂-[ib₂-gu₇-e]
65.	ĝe₂₆-e kur-gi₄^mušen še ba-ra-bi₂-[ib₂-gu₇-e]
66.	ĝe₂₆-e kur-gi₄^mušen nunuz-bi ĝir₃-lam-[ma amar-bi ĜAR la₂-e]
67.	tur-tur-bi utul₂-ĝu₁₀-še₃ gal-gal šen maḫ-ĝu₁₀-še₃
68.	kur-gi₄^mušen ki-a ba-ra-ab-taka₄-bi
69.	ensi₂ kur-ra /gu₂\ [mu]-/un\-ĝar-re-eš-am₃ [mu-da]-gu₇-u₃-ne
70.	en unug^ki-ga [X] si^?-muš₃-bi X-da ^ĝišzi-gan-bi-im
71.	[…] ^ĝišrab₃ šu ri-bi
72.	[…] ki us₂-sa-a-ba
73.	sur₂-[du₃]^mušen an-na dal-e-da-bi gu mušen-na-bi-[im]
74.	/šeg₁₂\ [e₂] gal aratta^ki-ka sur-sur maḫ ḫe₂-[…]-/im^?\
75.	[…] /gal\-gal aratta^ki-a /nam\ […] maḫ-bi-im
76.	[…] ba^?-DU-a-aš […] ĝal₂
77.	[im]-gin₇ šu bi₂-in-ra im-gin₇ igi i-ni-in-bar
78.	[e-ne] ^dinana-da e₂-za-gin₃ aratta-ka ḫu-mu-da-an-til₃
79.	ĝe₂₆-e [X] /an\-ta ki-a gub-ba-ni ḫu-mu-da-an-til₃-en
80.	še-er-kan₂-na dug₄ u₃ dug₃ ku-ku-da ḫu-mu-un-de₃-nu₂-en
81.	ĝe₂₆-e ĝiš-nu₂ gi-rin ^dinana-ka u₂ za-gin₃ barag-ga-a-ba
82.	eĝer-bi-še₃ ug-am₃ saĝ-bi-še₃ piriĝ-am₃
83.	ug-e piriĝ im-sar-re
84.	piriĝ-e ug [im]-sar-re
85.	ug-e piriĝ im-[sar]-re-da-bi
86.	piriĝ-e ug im-[sar]-re-da-bi
87.	ud nu-um-zal ĝi₆ [u₃-na] nu-ru-gu₂
88.	ĝe₂₆-e ^dinana-da kaskal danna [15]-/am₃\ šu ḫu-mu-un-da-[niĝin₂-niĝin₂]
89.	^dutu suḫ kug-ĝa₂ igi nu-mu-un-[bar]
90.	ĝi₆-par₄ kug-ĝa₂ ba-e-ši-in-[ku₄-ku₄]
91.	^den-lil₂-le aga zid /ĝidru\ […]
92.	^dnin-urta dumu ^den-lil₂-la₂-ke₄
93.	ĝiš ^kušummud-da-gin₇ ur₂ mu-un-/tal₂\-[tal₂]
94.	^da-ru-ru nin₉ ^den-lil₂-la₂-ke₄
95.	ubur zid-da-ni ma-an-la₂ ubur gab₂-bu-[ni ma-an-la₂]
96.	eš₃ gal-še₃ ed₃-de₃-da-ĝu₁₀-ne
97.	nu-gig-e anzud^mušen amar-ra-gin₇ mur /mu\-[ša₄]
98.	2-kam-ma-še₃ ed₃-de₃-da-ĝu₁₀-ne
99.	uz amar-ra nu-me-en-na šeg₁₁ mu-un-[gi₄]
100.	iri^ki tud-da-ni-ta NE im-ta-[…]
101.	iri^ki du₃-gin₇ iri^ki na-me ba-ra-dim₂
102.	^dinana unug^ki-ga ḫe₂-en-til₃ aratta^ki-aš a-na me-a-bi
103.	šeg₁₂ kul-aba₄^ki-ka ḫe₂-en-til₃ kur me sikil-še₃ a-na-am₃ ab-ak-e
104.	mu 5-am₃ mu 10-am₃ aratta^ki-aš ba-ra-ĝen
105.	ud aratta^ki-aš in-ga-an-du-a-ba
106.	kug gal nin e₂-an-na-ke₄
107.	ad-bi mu-un-da-gi₄-a-aš inim-bi {mu-un-zu-a-aš} {(1 ms. has instead:) mu-dug₄-a-aš} aratta^ki-aš ba-ra-ĝen
108.	e-ne nu-tuku-da-am₃ kur-gi₄^mušen še ba-ra-bi₂-ib₂-gu₇-e
109.	ĝe₂₆-e kur-gi₄^mušen še ḫe₂-bi₂-ib₂-gu₇-e
110.	ĝe₂₆-e kur-gi₄^mušen nunuz-bi ĝir₃-lam-ma amar-bi ĜAR la₂-e
111.	tur-tur-bi utul₂-ĝu₁₀-še₃ gal-gal šen maḫ-ĝu₁₀-še₃
112.	kur-gi₄^mušen ki-a ba-ra-ab-taka₄-a-bi
113.	ensi₂ {kur-ra} {(1 ms. has instead:) ki-en-gi^ki-ra} {(1 ms. has instead:) ki-en-gi-ra} gu₂ mu-un-ĝar-re-eš-a mu-da-gu₇-e-ne
114.	kiĝ₂-gi₄-a en-me-er-kar₂ en-suḫ-gir₁₁-an-na-ke₄
115.	ĝi₆-par₄ kug ki kug-kug-ga-ni-še₃
116.	ki kug-kug-ga ba-da-an-KU-a DAĜAL-bi ba-na-te
117.	en-suḫ-gir₁₁-an-na-ke₄ a₂ aĝ₂-ĝa₂ gu₃ ba-an-de₂ inim im-kiĝ₂-kiĝ₂-e
118.	išib lu₂-maḫ gudug ĝiri₃-sig₁₀-ga ĝi₆-par₄-ra til₃-la
119.	gu₂ X mu-ni-in-ĝar šag₄ mu-da-ab-kuš₂-u₃
120.	a-na ga-an-na-ab-be₂ a-na ga-an-na-ab-be₂
121.	en unug^ki-ga en kul-aba₄^ki-ra a-na ga-an-na-ab-be₂
122.	[gud]-da-ni gud-ĝu₁₀-da /lirum^?\ im-da-ab-zig₃
123.	gud unug^ki-ga-ke₄ a₂ bi₂-ib-ĝar
124.	lu₂-ni lu₂-ĝu₁₀-da usu im-da-ab-ra₂
125.	lu₂ unug^ki-ga-ke₄ a₂ bi₂-ib-ĝar
126.	ur-ra-ni ur-ĝu₁₀-da usu im-da-ab-ra
127.	ur unug^ki-ga-ke₄ KA.NI ba-ab-ĝar
128.	unken ĝar-ra si sa₂-na mu-un-na-ni-ib-gi₄-gi₄
129.	za-e-me-en unug^ki-ga-še₃ dub-saĝ-ta
130.	niĝ₂ gal-gal en-me-er-kar₂-ra kiĝ₂-gi₄-a-aš mu-un-gi₄
131.	en-me-er-kar₂ la-ba-du₃-e-en za-e-me-en ba-e-du₃-e-en
132.	zi gi₄-ba šag₄-zu niĝ₂ na-me na-an-tum₃ en-na ba-e-zu-zu
133.	iri-ĝu₁₀ dul ḫe₂-a ĝe₂₆-e šika-bi ḫe₂-me-en
134.	en unug^ki-ga en kul-aba₄^ki-ra gu₂ ba-ra-na-an-ĝa₂-ĝa₂
135.	maš-maš dim₂-ma-ni dumu ḫa-ma-zu-ke₄
136.	ur-ĝiri₃-nun-na dim₂-ma-ni dumu ḫa-ma-zu-ke₄
137.	ḫa-ma-zu ḫul-a-ta aratta^ki-aš bal-a
138.	e₂-ĝi₆-par₄ nam-maš-maš-e da^?-ga^?-na na-mu-un-KU
139.	sukkal an-sig₇-ga-ri-a gu₃ mu-un-na-de₂-e
140.	lugal-ĝu₁₀ ad-da gal-gal iri^ki-ke₄-ne
141.	[libir-ra uš] /ki\ ĝar-ra-ke₄-ne
142.	[…] X-ka a-na-aš-am₃ nu-um-ĝa₂-ĝa₂-ne ad nu-um-gi₄-gi₄-ne
143.	[ĝe₂₆-e id₂] unug^ki-ga-ke₄ ga-am₃-ba-al
144.	[itima] aratta^ki-ka gu₂ ga-mu-ni-ib₂-ĝar
145.	[inim] [unug]^ki-ga-ke₄ KA×X um-mi-in-tag
146.	[erin₂ gal-ĝu₁₀ sig]-ta igi-nim-še₃ ab-ta kur ^ĝišerin-še₃
147.	igi-nim-[ta kur] šim ^ĝišerin-na-še₃ gu₂ ga-mu-ni-ib-ĝar
148.	unug^ki-ge niĝ₂-gur₁₁ ni₂-ba-ke₄ ^ĝišma₂ [ḫe₂]-em-da-gid₂-de₃
149.	^ĝišma₂ ḫe₂-em-da-la₂-e e₂-za-gin₃ aratta^ki-še₃
150.	sukkal an-sig₇-ga-ri-a iri^?-na mu-ni-zig₃ KIŠI₄-na mu-ni-šub
151.	[X] lu₂ […] an-sig₇-ga-ri-a na-mu-ni-X-/dug₄\-X
152.	[…] X-e^? nu-uš-ma-ab-X-[X]
153.	lugal-ĝu₁₀ ad-da gal-gal iri^ki-ke₄-[ne]
154.	libir-ra uš ki ĝar-ra-ke₄-ne
155.	ki /sukkal\ e₂-gal-la a-na-aš-am₃ [nu-um-ĝa₂-ĝa₂-ne] ad nu-um-[gi₄-gi₄-ne]
156.	ĝe₂₆-e id₂ unug^ki-ga-ke₄ ga-am₃-ba-al
157.	/itima\ aratta^ki-ka gu₂ ga-mu-ni-ib-ĝar
158.	inim unug^ki-ga-ke₄ KA×X um-mi-in-tag
159.	erin₂ gal-ĝu₁₀ sig-ta igi-nim-še₃ ab-ta kur ^ĝišerin-še₃
160.	igi-nim-še₃ kur šim ^ĝišerin-na-še₃ gu₂ ga-mu-ni-ib-ĝar
161.	unug^ki-ga niĝ₂-gur₁₁ ni₂-ba-ke₄ ^ĝišma₂ ḫe₂-em-da-gid₂-de₃
162.	^ĝišma₂ ḫe₂-em-da-la₂-e e₂-za-gin₃ aratta^ki-še₃
163.	en-ra ḫul₂-la-gin₇ im-ma-na-ni-ib-ĝar
164.	5 ma-na kug-sig₁₇ mu-na-ab-šum₂-mu
165.	5 ma-na kug-babbar mu-na-ab-šum₂-mu
166.	u₂ nir-<ĝal₂> gu₇ ba-bi mu-na-ab-be₂
167.	a nir-<ĝal₂> naĝ ba-bi mu-na-ab-be₂
168.	ud nam-ra-aš lu₂-bi ak-am₃
169.	zi-zu niĝ₂-ĝa₂ a-la šu-zu ḫe₂-ĝal₂ mu-na-ab-be₂
170.	maš-maš engar numun saĝ-ĝa₂-ke₄
171.	ereš₂^ki iri^ki ^dnisaba-še₃ ĝiri₃ im-ma-ab-gub-be₂-en
172.	^e₂/tur₃\-ra e₂ ab₂ dur₂-ru-na-aš ba-te
173.	ab₂-[e] tur₃-ra saĝ mu-da-ab-sag₃
174.	ab₂-e inim bi₂-in-dug₄ lu₂-ulu₃-gin₇ inim mu-da-ab-bal-e
175.	ab₂ i₃-zu a-ba-a i₃-gu₇-e ga-zu a-ba-a i₃-na₈-na₈
176.	i₃-ĝu₁₀ i₃-gu₇-e ^dnisaba-ke₄
177.	[ga]-ĝu₁₀ i₃-na₈-na₈ ^dnisaba-ke₄
178.	[ga-ar₃-ĝu₁₀] suḫ₁₀ kug galam dug₄-ga
179.	[unu₆ gal] unu₆ ^dnisaba-ke₄ me-te-a-aš im-mi-ib-ĝal₂
180.	i₃-/ĝu₁₀\ [tur₃ kug]-ta en-na ga-mu-de₆-a-aš
181.	ga-ĝu₁₀ [amaš] kug-ta en-na ga-mu-de₆-a-aš
182.	u₃-sumun₂ zid ^dnisaba dumu-saĝ ^den-lil₂-la₂-ke₄ lu₂ nu-um-mi-in-zi-zi
183.	ab₂ i₃-zu si-muš₃-zu-še₃ ga-zu murgu-[zu-še₃]
184.	ab₂ i₃-bi si-muš₃-bi-še₃ ba-ab-[BU] ga-bi murgu-bi-še₃ ba-ab-BU ĝiri₃ […]
185.	amaš kug amaš ^dnisaba-še₃ ba-[te]
186.	/ud₅-de₃\ amaš-a saĝ mu-da-ab-[sag₃]
187.	ud₅-de₃ inim bi₂-in-dug₄ lu₂-[ulu₃]-gin₇ inim mu-un-da-ab-bal-[e]
188.	/ud₅\ i₃-zu a-ba-a i₃-gu₇-e ga-zu a-ba-a [i₃-na₈]-/na₈\
189.	i₃-ĝu₁₀ i₃-gu₇-e ^dnisaba-ke₄
190.	ga-ĝu₁₀ i₃-na₈-na₈ ^dnisaba-ke₄
191.	ga-ar₃-ĝu₁₀ suḫ₁₀ kug galam dug₄-ga
192.	unu₆ gal unu₆ ^dnisaba-ke₄ me-te-a-aš im-mi-ib-ĝal₂
193.	i₃-ĝu₁₀ tur₃ kug-ta en-na ga-mu-un-de₆-a-aš
194.	ga-ĝu₁₀ amaš [kug-ta] en-na ga-mu-un-de₆-a-aš
195.	u₃-sumun₂ zid ^dnisaba dumu-saĝ ^den-lil₂-la₂-ke₄ lu₂ nu-um-mi-in-zi-zi
196.	ud₅ i₃-zu si-muš₃-zu-še₃ ga-zu murgu-zu-še₃
197.	ud₅ i₃-bi si-muš₃-bi-še₃ ba-ab-BU ga-bi murgu-bi-še₃ ba-ab-e₃
198.	ud-bi-a tur₃ amaš-a e₂ sig₉-ga ba-ab-du₇ niĝ₂ ḫa-lam-ma ba-ab-ak
199.	ubur ab₂-ka ga nu-un-ĝal₂ amar-e ud bi₂-/in\-šu₂
200.	amar tur-bi šag₄-sug₄-ga mu-un-ĝal₂ er₂ gig i₃-še₈-/še₈\
201.	ubur ud₅-ka ga nu-un-[ĝal₂ maš₂-e ud bi₂-in-šu₂]
202.	maš₂-ud₅-da-bi šag₄-ka-tab-[ba ba-an-nu₂] zi-bi mi-ni-[…]
203.	ab₂-e amar-bi-še₃ inim gig [bi-ib₂-be₂]
204.	ud₅-de₃ maš₂-bi mu-na-ab-[…]
205.	^dugšakir₃ kug-ga sig₉-si-ig X […] šag₄-sug₄-ga mu-un-ĝal₂ šag₄-ka-[tab-ba ba-an-nu₂]
206.	ud-bi-a tur₃ amaš-a e₂ sig₉-ga ba-ab-dug₄ niĝ₂ ḫa-lam-ma ba-ab-ak
207.	unud(UNU₃)-de₃ ešgiri₂ šu-na bi₂-in-taka₄ igi-ni i₃-sag₃-ge
208.	sipad-de₃ šibir zag-ga-na bi₂-in-la₂ er₂ gig i₃-še₈-še₈
209.	kab-bar tur amaš tur₃-še₃ la-ba-X ĝiri₃ kur₂ ba-ra-an-dab₅
210.	ga-il₂-bi ad gal-eš₂ nu-mu-ed₃ sila kur₂ ba-ra-an-dab₅
211.	/unud(UNU₃)\ sipad ^dnisaba-ke₄-ne
212.	dumu tud-da ama dili-me-eš
213.	tur₃ amaš-a a₂ e₃-a-me-eš
214.	1-kam-ma maš₂-gu-la mu-ni ḫe₂-en-na-nam
215.	2-kam-ma ur-edin-na mu-ni ḫe₂-en-na-nam
216.	2-na-ne-ne kan₄ maḫ igi ^dutu e₃-a ki u₆ di kalam-ma
217.	saḫar-tu₁₁-saḫar-tu₁₁-ba ba-an-dur₂-ru-ne-eš ^dutu an-ta i-im-gi₄-gi₄-ne
218.	maš-maš-e lu₂ aratta^ki-ka ^e₂tur₃-ra mu-un-kur₉
219.	^e₂tur₃-ra gara₂ ba-an-kal amar tur la-ba-an-ri-ri
220.	{tur₃ amaš niĝ₂-gig-bi bi₂-ak i₃ ga ba-e-ni-kal bi₂-in-la₂} {(1 ms. has instead the line:) […] X-ni im-ši-im-la₂ […] /ga\ ud₅-da ba-an-kal}
221.	[…] X-bi i₃-šub-šub niĝ₂ ḫa-lam-ma ba-ab-ak
222.	[…] KA-bi ba-an-na-te
223.	[…] ĝal₂-la-am₃ igi mu-un-na-niĝin₂
224.	[…] ereš₂^ki […]-X-an-gur
225.	[gu₂] /^id₂\buranun-na id₂ NA^? maḫ^? KA ĝal₂-la id₂ diĝir-re-e-ne
226.	[iri^ki nam] tar-ra an ^den-lil₂-la₂ […] ĝiri₃ bi₂-in-gub
227.	um-ma saĝ-bur-ru šu mu-un-na-/an\-[…]
228.	2-na-ne-ne agargara id₂-da i-ni-in-/šub\-[bu-uš]
229.	maš-maš-e suḫur^ku₆ gal a-/ta\ {im-ta-an-[e₃]} {(1 ms. has instead:) im-ta-an-/ed₃\}
230.	um-ma saĝ-bur-ru [ḫu-ri₂]-in^mušen a-ta {im-ta-an-[e₃]} {(1 ms. has instead:) im-ta-an-/ed₃\}
231.	ḫu-ri₂-in^mušen-e suḫur^ku₆ gal {in-kar ḫur-saĝ-še₃ ba-[an-kur₉]} {(1 ms. has instead:) a-/ĝi₆-a\ in-kar an-na ba-/e\-ed₃}
232.	2-kam-ma-aš agargara id₂-da i-ni-in-šub-bu-uš
233.	maš-maš-e u₈ sila₄-bi a-ta {im-ta-an-[e₃]} {(1 ms. has instead:) im-ta-an-ed₃}
234.	um-ma saĝ-bur-ru ur-bar-ra a-ta {im-ta-an-[e₃]} {(1 ms. has instead:) im-ta-an-ed₃}
235.	ur-bar-ra u₈ sila₄^!-/bi\ in-kar edin daĝal-še₃ ba-an-ur₃
236.	3-kam-ma-aš agargara id₂-da i-ni-in-šub-bu-uš
237.	maš-maš-e ab₂ amar-bi-ta a-ta {im-ta-an-e₃} {(1 ms. has instead:) im-ta-an-ed₃}
238.	um-ma saĝ-bur-ru ur-maḫ-e a-ta {im-ta-an-e₃} {(1 ms. has instead:) im-ta-an-ed₃}
239.	ur-maḫ-e ab₂ amar-bi in-kar ĝiš-gi-še₃ {ba-an-kur₉} {(some mss. have instead:) ba-an-ur₃}
240.	4-kam-ma-aš agargara id₂-da i-ni-in-šub-bu-uš
241.	maš-maš-e šeg₉ šeg₉-bar-e a-ta {im-ta-an-e₃} {(1 ms. has instead:) im-ta-an-ed₃^?}
242.	um-ma saĝ-bur-ru nemur_x(PIRIĜ.TUR) ḫur-saĝ-ĝa₂ a-ta {im-ta-an-e₃} {(1 ms. has instead:) im-ta-an-/ed₃\}
243.	nemur_x(PIRIĜ.TUR)-e šeg₉ šeg₉-bar-e in-kar ḫur-saĝ-še₃ ba-an-kur₉
244.	5-kam-ma-aš agargara id₂-da i-ni-in-šub-bu-uš
245.	maš-maš-e amar maš-da₃ a-ta im-ta-an-e₃
246.	um-ma saĝ-bur-ru ur-šub₅ ur-nim-e a-ta im-ta-an-e₃
247.	ur-šub₅ ur-nim-ma amar maš-da₃ in-kar ^ĝištir-tir-še₃ {ba-an-kur₉} {(1 ms. has instead:) ba-an-ur₃}
248.	maš-maš-e igi-ni ba-ku₁₀-ku₁₀ dim₂-ma-ni ba-suḫ₃
249.	um-ma saĝ-bur-ru gu₃ mu-na-de₂-e
250.	maš-maš nam-maš-maš-zu ḫe₂-ĝal₂ dim₂-ma-zu me-a
251.	a-na-gin₇-nam ereš₂^ki iri ^dnisaba-še₃
252.	iri^ki nam tar-ra an ^den-lil₂-la₂
253.	iri^ki ul iri ki aĝ₂ ^dnin-lil₂-la₂
254.	nam-maš-maš ak-de₃ a-gin₇ im-da-ĝen-ne-en
255.	/maš\-maš-e mu-un-na-ni-ib-gi₄-gi₄
256.	nu-zu-a-ĝu₁₀-ne i-im-ĝen-ne-en
257.	nam-gur₄-ra-zu i₃-zu nam-ba-an-sis-e-de₃-en
258.	šu giri₁₇-na i-ni-in-ĝal₂ šudu₃ mu-un-na-an-ša₄-aš
259.	šu ba-mu-u₈ nin-ĝu₁₀ šu ba-mu-u₈
260.	silim-ma-bi iri^ki-ĝu₁₀-še₃ ga-ĝen
261.	aratta^ki kur me sikil-la-še₃ zi-ĝu₁₀ ga-ba-ši-de₆
262.	nam-maḫ-zu kur-kur-ra {ga-bi₂-ib-zu} {(1 ms. has instead:) ga-ba-ab-dug₄}
263.	aratta^ki kur me sikil-la-ka ka tar-zu ga-si-il
264.	um-ma saĝ-bur-ru mu-un-na-ni-ib-gi₄-gi₄
265.	tur₃ amaš-a niĝ₂-gig-ga bi₂-ak i₃ ga ba-e-ni-kal
266.	^ĝišbanšur an-bar₇ ^ĝišbanšur kiĝ₂-[nim kiĝ₂]-sig mu-e-sud
267.	kiĝ₂-sig unu₆ gal-la i₃ ga ba-e-kud niĝ₂-gig-bi X DU
268.	nam-tag-zu i₃ ga […] nu-mu-e-tum₃
269.	^dnanna lugal X amaš-/a^?\ MU X GA ba-e-šum₂-mu
270.	šer₇-da i₃-ĝa₂-ĝa₂ zi /nu-mu\-ra-ab-šum₂-mu
271.	um-ma saĝ-bur-ru maš-maš-e unken^?-ni inim-ma-ni mu-ni-in-sag₃
272.	šaĝa-a-ni gu₂ ^id₂buranun-na-[ka] i-ni-in-šub
273.	zi nam-til₃-la ba-da-an-kar iri^ki-ni ereš₂^ki-še₃ ba-e-gur
274.	en-suḫ-gir₁₁-an-na-ke₄ inim-bi ĝiš ba-an-tuku-a-ta
275.	en-me-er-kar₂-ra lu₂ mu-un-ši-in-gi₄-gi₄
276.	za-e-me-en en ki aĝ₂ ^dinana-me-en dili-zu-ne maḫ-me-en
277.	^dinana-ke₄ ur₂ kug-ga-ni-še₃ zid-de₃-eš mu-un-pad₃-de₃-en ki /aĝ₂-ĝa₂\-ni-me-en
278.	sig-ta igi-nim-še₃ en gal-bi za-e-me-en ĝe₂₆-e us₂-sa-zu-me-en
279.	a ru-a-ta gaba-ri-zu nu-me-en šeš-gal za-e-me-en
280.	ĝe₂₆-e nu-mu-da-sa₂-e-en ud da-ri₂-še₃
281.	en-me-er-kar₂ en-suḫ-gir₁₁-an-na a-da-min₃ dug₄-ga
282.	en-me-er-kar₂ en-suḫ-gir₁₁-an-na dirig-ga-a-ba
283.	^dnisaba za₃-mi₂
	Segment B
	(ms. K iv 2'-7' and ms. S + Z + T i 1-4 give the following lines, which are placed differently by different scholars. Attinger (ELS, p 36) refers to ll. 3-4 of Segment B as 150a and 150b and identifies ll. 6-7 of Segment B with ll. 151-152; however, we could not match ll. 1-3 of Segment B with ll. 150 and preceding. Behrens (AfO 29/30, p. 103) relates l. 5 of Segment B to l. 135)
B1.	[…] BI SI
B2.	[…]-ta
B3.	[…]-an-dug₄
B4.	[maš-maš-e] ki en-na-še₃ lu₂ mu-un-ni-in-ku₄-ku₄
B5.	ur-ĝiri₃-nun-na ki en-na-še₃ lu₂ mu-ni-in-ku₄-ku₄
B6.	[maš]-maš-e sukkal ĜA₂ an-sig₇-ga-ri-a na-mu-un-ne-dug₄-ga
B7.	[X]-bi-še₃ nu-uš-[…]

Print sources

Behrens 1983-84: commentary

Berlin 1979: translation, commentary, photograph, composite text

Cohen 1973, p. 1-25: commentary, translation (ll. 1-15)

Cooper 1997: commentary, translation (l. 1)

Heimpel 1981b: commentary, handcopy

Römer 1981: commentary

Vanstiphout 1983: commentary

Vanstiphout 1987a (joins)

Vanstiphout 1992b: commentary

Vanstiphout 1995: commentary

Zólyomi 1995: translation, commentary (173-174; 186-187)

Electronic sources

Civil 1989c: composite text

Civil 1992c: composite text

Krecher 1996a: composite text, translation

Cuneiform sources

CBS 2209

CBS 3843 (HAV 17)

CBS 6096 (SEM 19)

CBS 6985 (SEM 17) + N 1766 + N 1772 + N 1772A ***

CBS 7144 (SEM 13)

CBS 11345 (PBS 5 9)

CBS 13384 (SEM 18) + N 4147

CBS 15084

CBS 15104

CBS 15107 (PBS 5 10)

N 1454 + N 1770 + N 1779

N 3205

N 3403

N 3494

N 3664 + N 4207

N 3751

N 3770

N 4334

N 6495

N 6977

N 7448

N 7860?

N 7733

Ni 2283 (SLTN 1)

Ni 4126 (ISET 2 40; FTS fg. 71)

Ni 4497 (ISET 1 97)

Ni 9634 (ISET 2 42)

Ni 9663 (ISET 2 42)

Ni 9886 (ISET 1 135)

UM 29-13-392

UM 29-15-505

UM 29-16-424

UM 29-16-450

VAT 7832b (VAS 17 39)

3N-T308 = UM 55-21-303

3N-T352 = IM 58440

Revision history

20.ii.1998-03.iii.1998: GZ, editor: standardisation
12.iii.1998: JAB, editor: proofreading
27.iii.1998: GZ, editor: minor corrections
30.iv.1999: GZ, editor: minor corrections
30.iv.1999: GZ, editor: SGML tagging
07.v.1999: ER, editor: proofreading SGML
07.v.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

Enmerkar and En-suḫgir-ana

Segment A

Segment B

Print sources

Electronic sources

Cuneiform sources

Revision history