The Electronic Text Corpus of Sumerian Literature

ETCSLtransliteration : c.2.1.7

The building of Ninĝirsu's temple (Gudea, cylinders A and B)

1.	(A1.1) ud /an ki\-a nam tar-[re]-/da\
2.	(A1.2) /lagaš\[^ki]-e me gal-la [saĝ] an-še₃ mi-ni-ib₂-il₂
3.	(A1.3) ^den-lil₂-e en ^dnin-ĝir₂-su₂-še₃ igi zid mu-ši-bar
4.	(A1.4) iri-me-a niĝ₂-du₇ pa nam-e₃
5.	(A1.5) šag₄ gu₂-bi nam-gi₄
6.	(A1.6) šag₄ ^den-lil₂-la₂ gu₂-bi nam-gi₄
7.	(A1.7) šag₄ gu₂-bi nam-gi₄
8.	(A1.8) a-ĝi₆ uru₁₆ nam-mul ni₂ il₂-il₂
9.	(A1.9) šag₄ ^den-lil₂-la₂-ke₄ ^id₂idigna-am₃ a dug₃-ga nam-de₆
10.	(A1.10) e₂-e lugal-bi gu₃ ba-de₂
11.	(A1.11) e₂-ninnu me-bi an ki-a pa e₃ mu-ak-ke₄
12.	(A1.12) ensi₂ lu₂ ĝeštug₃ daĝal-kam ĝeštug₃ i₃-ĝa₂-ĝa₂
13.	(A1.13) niĝ₂ gal-gal-la šu mi-ni-mu₂-mu₂
14.	(A1.14) gud du₇ /maš₂\ du₇-re₆ si im-sa₂-sa₂-e
15.	(A1.15) šeg₁₂ nam tar-ra saĝ mu-ši-ib₂-il₂
16.	(A1.16) e₂ kug du₃-de₃ gu₂-bi mu-ši-ib₂-zig₃
17.	(A1.17) lugal-ni-ir ud ne maš-ĝi₆-ka
18.	(A1.18) gu₃-de₂-a en ^dnin-ĝir₂-su₂-ra igi mu-ni-du₈-am₃
19.	(A1.19) e₂-a-ni du₃-ba mu-na-dug₄
20.	(A1.20) e₂-ninnu me-bi gal-gal-la-am₃
21.	(A1.21) igi mu-na-ni-ĝar
22.	(A1.22) gu₃-de₂-a šag₄-ga-ni su₃-ra₂-am₃
23.	(A1.23) inim-e mi-ni-kuš₂-u₃
24.	(A1.24) ga-na ga-na-ab-dug₄ ga-na ga-na-ab-dug₄
25.	(A1.25) inim-ba ḫa-mu-da-gub
26.	(A1.26) sipad-me nam-nun-ne₂ saĝ ma-ab-šum₂-šum₂
27.	(A1.27) niĝ₂ maš-ĝi₆-ke₄ ma-ab-de₆-a-ĝa₂
28.	(A1.28) šag₄-bi nu-zu
29.	(A1.29) ama-ĝu₁₀ ma-mu-ĝu₁₀ ga-na-de₆
30.	(A2.1) ensi kug-zu me-te-na-ĝu₁₀
31.	(A2.2) ^dnanše nin₉ diĝir sirara₆-ta-ĝu₁₀
32.	(A2.3) šag₄-bi ḫa-ma-pad₃-de₃
33.	(A2.4) ma₂-gur₈-ra-na ĝiri₃ nam-mi-gub
34.	(A2.5) iri-ni niĝin₆^ki-še₃ id₂-niĝin₆^ki-du-a ma₂ mu-ni-ri
35.	(A2.6) id₂-de₃ ḫul₂-la-e kur-ku₄ i₃-si-il-e
36.	(A2.7) ba-gara₂ e₂ id₂-de₃ la₂-a-e im-ti-a-ta
37.	(A2.8) ninda ĝiš bi₂-tag a sed₆ i₃-de₂
38.	(A2.9) lugal ba-gara₂-ra mu-na-ĝen šudu₃ mu-na-ša₄
39.	(A2.10) ur-saĝ piriĝ zig₃-ga gaba-šu-ĝar nu-tuku
40.	(A2.11) ^dnin-ĝir₂-su₂ abzu-a /gal-di\
41.	(A2.12) nibru^ki-a nir-/ĝal₂\
42.	(A2.13) ur-saĝ /ma\-a-dug₄ šu zid ga-mu-ra-ab-ĝar
43.	(A2.14) ^dnin-ĝir₂-su e₂-zu ga-mu-ra-du₃
44.	(A2.15) me šu ga-mu-ra-ab-du₇
45.	(A2.16) nin₉-zu dumu eridug^ki-ge tud-da
46.	(A2.17) nir-ĝal₂ me-te-na nin ensi₃ diĝir-re-ne-ke₄
47.	(A2.18) ^dnanše nin₉ diĝir sirara₆-ta-ĝu₁₀
48.	(A2.19) ĝiri₃-bi ḫa-ma-ĝa₂-ĝa₂
49.	(A2.20) gu₃ de₂-a-ni ĝiš ba-tuku-am₃
50.	(A2.21) lugal-a-ni sizkur₂ ra₂-zu-ni gu₃-de₂-a-aš₂
51.	(A2.22) en ^dnin-ĝir₂-su-ke₄ šu ba-ši-ti
52.	(A2.23) e₂ ba-gara₂^!-ka eš₃-eš₃ i₃-ak
53.	(A2.24) ensi₂-ke₄ ^dĝa₂-tum₃-dug₃-še₃ ki-nu₂-a-ni ba-gub
54.	(A2.25) ninda ĝiš bi₂-tag a sed₆ i₃-de₂
55.	(A2.26) kug ^dĝa₂-tum₃-dug₃-ra mu-na-ĝen
56.	(A2.27) sizkur₂ mu-na-be₂
57.	(A2.28) nin-ĝu₁₀ dumu an kug-ge tud-da
58.	(A2.29) nir-ĝal₂ me-te-na diĝir saĝ zig₃
59.	(A3.1) kalam-ma til₃-la
60.	(A3.2) nu-du-zu iri-na
61.	(A3.3) nin ama lagaš^ki ki ĝar-ra-me
62.	(A3.4) igi uĝ₃-še₃ u₃-ši-bar-ra-zu ni₂-a ḫe₂-ĝal₂-la-am₃
63.	(A3.5) šul zid lu₂ igi mu-bar-ra-zu nam-til₃ mu-na-sud
64.	(A3.6) ama nu-tuku-me ama-ĝu₁₀ ze₂-me
65.	(A3.7) a nu-tuku-me a-ĝu₁₀ ze₂-me
66.	(A3.8) a-ĝu₁₀ šag₄-ga šu ba-ni-dug₄ unu₆-a i₃-tud-e
67.	(A3.9) ^dĝa₂-tum₃-dug₃ mu kug-zu dug₃-ga-am₃
68.	(A3.10) ĝi₆-a ma-ni-nu₂
69.	(A3.11) ^ĝišĝiri₂ gal-ĝu₁₀-me zag-ĝu₁₀ mu-us₂
70.	(A3.12) NE.GI.BAR a gal-la du₃-a-me
71.	(A3.13) zi šag₄ mu-ši-ni-ĝal₂
72.	(A3.14) an-dul₃ daĝal-me ĝissu-zu-še₃
73.	(A3.15) ni₂ ga-ma-ši-ib₂-te
74.	(A3.16) /šu maḫ\-za sa-ga a₂ zid-da-bi
75.	(A3.17) nin-ĝu₁₀ ^dĝa₂-tum₃-dug₃ ĝa₂-ra ḫa-mu-u₃-ru
76.	(A3.18) iri-še₃ i₃-du-e ĝiškim-ĝu₁₀ ḫe₂-sag₉
77.	(A3.19) kur a-ta il₂-la niĝin₆^ki-še₃
78.	(A3.20) u₂(source: sukkal)-dug₄ sag₉-ga-zu igi-še₃ ḫa-ma-ĝen
79.	(A3.21) ^dlamma sag₉-ga-zu ĝiri₃-a ḫa-mu-da-ĝen
80.	(A3.22) ga-na ga-na-ab-dug₄
81.	(A3.23) ga-na ga-na-ab-dug₄
82.	(A3.24) inim-ba ḫa-mu-da-gub
83.	(A3.25) ama-ĝu₁₀ ma-mu-ĝu₁₀ ga-na-de₆
84.	(A3.26) ensi₃ kug-zu me-te-na-ĝu₁₀
85.	(A3.27) ^dnanše nin₉ diĝir sirara₆-ta-ĝu₁₀
86.	(A3.28) šag₄-bi ḫa-ma-pad₃-de₃
87.	(A3.29) gu₃ de₂-a-ni ĝiš ba-tuku-am₃
88.	(A4.1) nin-a-ni sizkur₂ ra₂-zu-ni
89.	(A4.2) gu₃-de₂-a-aš₂ kug ^dĝa₂-tum₃-dug₃-ge šu ba-ši-ti
90.	(A4.3) ma₂-gur₈-ra-na ĝiri₃ nam-mi-gub
91.	(A4.4) iri-ni niĝin₆^ki-še₃ <ma₂ mu-ni-ri> kar niĝin₆^ki-na-ke₄ ma₂ bi₂-us₂
92.	(A4.5) ensi₂-ke₄ kisal diĝir sirara₆-ta-ka saĝ an-še₃ mi-ni-il₂
93.	(A4.6) ninda ĝiš bi₂-tag a sed₆ i₃-de₂
94.	(A4.7) ^dnanše mu-na-ĝen šudu₃ mu-na-ša₄
95.	(A4.8) ^dnanše nin uru₁₆ nin me ^dkal-^dkal-la
96.	(A4.9) nin ^den-lil₂-gin₇ nam tar-tar-re
97.	(A4.10) ^dnanše-ĝu₁₀ dug₄-ga-zu zid-dam
98.	(A4.11) saĝ-bi-še₃ e₃-a-am₃
99.	(A4.12) ensi diĝir-re-ne-me
100.	(A4.13) nin kur-kur-ra-me ama inim-ĝu₁₀ ud-da ma-mu-da
101.	(A4.14) šag₄ ma-mu-da-ka lu₂ 1(DIŠ)-am₃ an-gin₇ ri-ba-ni
102.	(A4.15) ki-gin₇ ri-ba-ni
103.	(A4.16) a-ne saĝ-ĝa₂-ni-še₃ diĝir-ra-am₃
104.	(A4.17) a₂-ni-še₃ anzud₂^mušen-dam
105.	(A4.18) sig-ba-a(source: ni)-ni(source: a)-še₃ a-ma-ru-kam
106.	(A4.19) zid-da gabu₂-na piriĝ i₃-nu₂-nu₂
107.	(A4.20) e₂-a-ni du₃-da ma-an-dug₄
108.	(A4.21) šag₄-ga-ni nu-mu-zu
109.	(A4.22) ud ki-šar₂-ra ma-ta-e₃
110.	(A4.23) munus 1(DIŠ)-am₃ a-ba me-a nu a-ba me-a-ni
111.	(A4.24) saĝ-ĝa₂ e₃ ki garadin₉ mu-ak
112.	(A4.25) gi-dub-ba kug NE-a šu im-mi-du₈
113.	(A4.26) dub mul-an dug₃-ga im-mi-ĝal₂
114.	(A5.1) ad im-dab₆-gi₄-gi₄
115.	(A5.2) 2(MAN)-kam ur-saĝ-ĝa₂-am₃
116.	(A5.3) a₂ mu-gur le-um za-gin₃ šu im-mi-du₈
117.	(A5.4) e₂-a ĝiš-ḫur-bi im-ĝa₂-ĝa₂
118.	(A5.5) igi-ĝu₁₀-še₃ dusu kug i₃-gub
119.	(A5.6) ^ĝišu₃-šub kug / si\ ib₂-sa₂
120.	(A5.7) šeg₁₂ nam tar-ra ^ĝišu₃-šub-ba ma-an-ĝal₂
121.	(A5.8) ildag₂ zid-da igi-ĝu₁₀ gub-ba
122.	(A5.9) ti-gid₂^mušen-lu₂ a ud mi-ni-ib₂-zal-zal-e
123.	(A5.10) dur₃ a₂ zid-da lugal-ĝa₂-ke₄ ki ma-ḫur-ḫur-e
124.	(A5.11) ensi₂-ra ama-ni ^dnanše mu-na-ni-ib₂-gi₄-gi₄
125.	(A5.12) sipad-ĝu₁₀ ma-mu-zu ĝe₂₆ ga-mu-ra-bur₂-bur₂
126.	(A5.13) lu₂ an-gin₇ ri-ba ki-gin₇ ri-ba-eše₂
127.	(A5.14) saĝ-ĝa₂-<ni>-še₃ diĝir a₂-ni-še₃
128.	(A5.15) anzud₂^mušen-eše₂ sig-ba-a-ni-še₃ a-ma-ru-eše₂
129.	(A5.16) zid-da gabu₂-na piriĝ i₃-nu₂-nu₂(source: SA₄-SA₄)-a
130.	(A5.17) šeš-ĝu₁₀ ^dnin-ĝir₂-su₂ ga-nam me-am₃
131.	(A5.18) eš₃ e₂-ninnu-na du₃-ba za-ra ma-ra-an-dug₄
132.	(A5.19) ud ki-šar₂-ra ma-ra-ta-e₃-a
133.	(A5.20) diĝir-zu ^dnin-ĝiš-zid-da ud-gin₇ ki-ša-ra ma-«ra-da»-ra-ta-e₃
134.	(A5.21) ki-sikil saĝ-ĝa₂ e₃ ki garadin₉ mu-ak
135.	(A5.22) gi-dub-ba kug NE šu bi₂-du₈-a
136.	(A5.23) dub mul dug₃-ga bi₂-ĝal₂-la-a
137.	(A5.24) ad im-da-gi₄-a
138.	(A5.25) nin₉-ĝu₁₀ ^dnisaba ga-nam me-am₃
139.	(A6.1) e₂-a du₃-ba mul kug-ba
140.	(A6.2) gu₃ ma-ra-a-de₂
141.	(A6.3) 2(MAN)-kam-ma ur-saĝ-am₃ a₂ mu-gur₈
142.	(A6.4) le-um za-gin₃ šu bi₂-du₈-a
143.	(A6.5) ^dnin-dub-kam e₂-a ĝiš-ḫur-ba im-mi-sig₁₀-sig₁₀-ge
144.	(A6.6) igi-zu-še₃ dusu kug gub-ba u₃-šub kug si sa₂-a
145.	(A6.7) šeg₁₂ nam tar-ra u₃-šub-ba ĝal₂-la
146.	(A6.8) šeg₁₂ zid e₂-ninnu ga-nam me-am₃
147.	(A6.9) ildag₂ zid-da igi-zu gub-ba
148.	(A6.10) ti-gid₂^mušen-lu₂ a ud mi-ni-ib₂-zal-a-eše₂
149.	(A6.11) e₂ du₃-de₃ igi-zu u₃ dug₃-ga nu-ši-ku₄-ku₄
150.	(A6.12) ^anšedur₉ a₂ zid-da lugal-zak-ke₄ ki ma-ra-ḫur-ḫur-a-eše₂
151.	(A6.13) ze₂-me e₂-ninnu-/uš₂^?\ ni-is-ku-gin₇ ki im-ši-ḫur-e
152.	(A6.14) na ga-de₅ na de₅-ĝu₁₀ ḫe₂-dab₅
153.	(A6.15) ĝir₂-su^ki e₂ saĝ ki lagaš^ki-še₃ ĝiri₃-zu ki i₃-bi₂-us₂
154.	(A6.16) e₂ niĝ₂-gur₁₁-<ra>-za kišib u₃-mi-kur₂ ĝiš u₃-ma-ta-ĝar
155.	(A6.17) lugal-zu ^ĝišgigir u₃-mu-DI
156.	(A6.18) ^anšedur₉^ur₃ u₃-ši-la₂
157.	(A6.19) ^ĝišgigir-bi kug NE za-gin₃-na šu u₃-ma-ni-tag
158.	(A6.20) ti mar-uru₅-a ud-gin₇ i₃-e₃
159.	(A6.21) an-kar₂ a₂ nam-ur-saĝ-ka mi₂ u₃-ma-ni-dug₄
160.	(A6.22) šu-nir ki aĝ₂-ni u₃-mu-na-dim₂
161.	(A6.23) mu-zu u₃-mi-sar
162.	(A6.24) balaĝ ki aĝ₂-ni ušumgal kalam-ma
163.	(A6.25) ĝiš-gu₃-di mu tuku niĝ₂ ad gi₄-gi₄-ni
164.	(A6.26) ur-saĝ niĝ₂-ba-e ki aĝ₂-ra
165.	(A7.1) lugal-zu en ^dnin-ĝir₂-su₂
166.	(A7.2) e₂-ninnu anzud₂^mušen babbar₂-ra u₃-mu-na-da-kur₉-re
167.	(A7.3) tur dug₄-ga-zu maḫ dug₄-ga-am₃ šu ba-a-ši-ib₂-ti
168.	(A7.4) en-na šag₄ an-gin₇ su₃-ra₂-ni
169.	(A7.5) ^dnin-ĝir₂-su₂ dumu ^den-lil₂-la₂-ka za-ra ma-ra-ḫuĝ-ĝe₂₆-e
170.	(A7.6) ĝiš-ḫur e₂-a-na ma-ra-pad₃-pad₃-de₃
171.	(A7.7) ur-saĝ-e me-ni gal-gal-la-am₃
172.	(A7.8) šu ma-ra-ni-ib₂-mu₂-mu₂
173.	(A7.9) sipad zid gu₃-de₂-a
174.	(A7.10) gal mu-zu gal i₃-ga-tum₂-mu
175.	(A7.11) inim ^dnanše-e mu-na-dug₄-ga-aš
176.	(A7.12) saĝ sig ba-ši-ĝar
177.	(A7.13) e₂ niĝ₂-gur₁₁-ra-na kišib bi₂-kur₂
178.	(A7.14) ĝiš im-ma-ta-ĝar
179.	(A7.15) gu₃-de₂-a ĝiš-a mu-DU.DU
180.	(A7.16) ĝiš-e mi₂ im-e
181.	(A7.17) ^ĝišmeš₃-e saĝ bi₂-sag₉
182.	(A7.18) ^ĝišḫa-lu-ub₂-ba tun₃ bi₂-bar
183.	(A7.19) ^ĝišgigir za-gin₃-še₃ mu-na-a-DI
184.	(A7.20) dur₉^ur₃-bi piriĝ-kaš₄-e-pad₃-da
185.	(A7.21) im-ma-ši-la₂-la₂
186.	(A7.22) šu-nir ki aĝ₂-ni mu-na-dim₂
187.	(A7.23) mu-ni im-mi-sar
188.	(A7.24) balaĝ ki aĝ₂-e ušumgal kalam-ma
189.	(A7.25) ĝiš-gu₃-di mu tuku niĝ₂ ad gi₄-gi₄-ni
190.	(A7.26) ur-saĝ niĝ₂-ba-e ki aĝ₂-ra
191.	(A7.27) lugal-ni en ^dnin-ĝir₂-su-ra
192.	(A7.28) e₂-ninnu anzud₂^mušen babbar₂-ra
193.	(A7.29) mu-na-da-ku₄-ku₄
194.	(A7.30) e₂-a ḫul₂-la i₃-na-ni-kur₉
195.	(A8.1) gu₃-de₂-a eš₃ e₂-ninnu-ta zalag-ga nam-ta-e₃
196.	(A8.2) 2(MIN)-kam-ma e₂-še₃ ud-u₃-de₃ bi₂-dib
197.	(A8.3) ĝi₆-ĝi₆ ba-an-dib
198.	(A8.4) du₆-du₆ mu-si-ig inim-ĝar mu-gi₄
199.	(A8.5) aḫ dug₄-ga ĝiri₂-ta im-ta-ĝar
200.	(A8.6) šu-ga-lam ki ḫuš ki di kud-de₃
201.	(A8.7) ki ^dnin-ĝir₂-su-ke₄ kur-kur-ra igi mi-ni-ĝal₂-la-še₃
202.	(A8.8) udu-i₃ gukkal maš₂ niga ensi₂-ke₄
203.	(A8.9) ^fešgar ĝiš nu-zu kuš-ba mi-ni-durun_x(KU.KU)
204.	(A8.10) li^ĝiš u₂ sikil kur-ra-kam izi-a bi₂-si-si
205.	(A8.11) šim erin ir-sim diĝir-ra-kam
206.	(A8.12) i₃-bi₂-bi mu-du₃
207.	(A8.13) lugal-<ni>-ir uĝ₃-ĝa₂ mu-na-zig₃ šudu₃ mu-na-ša₄
208.	(A8.14) ub-šu-kin-na-ka mu-na-ĝen giri₁₇ šu mu-na-ĝal₂
209.	(A8.15) lugal-ĝu₁₀ ^dnin-ĝir₂-su₂ en a ḫuš gi₄-a
210.	(A8.16) en zid a kur gal-e ri-a
211.	(A8.17) šul ka tar <gaba-ri> nu-tuku
212.	(A8.18) ^dnin-ĝir₂-su e₂-zu ma-ra-du₃-e
213.	(A8.19) ĝiškim-ĝu₁₀ nu-ĝu₁₀
214.	(A8.20) ur-saĝ niĝ₂-du₇-e gu₃ ba-a-de₂
215.	(A8.21) dumu ^den-lil₂-la₂ en ^dnin-ĝir₂-su
216.	(A8.22) šag₄-bi nu-mu-u₃-da-zu
217.	(A8.23) šag₄ ab-gin₇ zi-zi-zu
218.	(A8.24) iz-zi₈-gin₇ ĝa₂-ĝa₂-zu
219.	(A8.25) a e₃-a-gin₇ gu₃ nun di-zu
220.	(A8.26) a-ma-ru₁₂-gin₇ u₂-uru₁₈ gul-gul-zu
221.	(A8.27) ud-gin₇ ki-bal-še₃ du₇-du₇-zu
222.	(A9.1) lugal-ĝu₁₀ šag₄-zu a e₃-a u₂ nu-la₂-zu
223.	(A9.2) ur-saĝ šag₄ an-gin₇ su₃-ra₂-zu
224.	(A9.3) dumu ^den-lil₂-la₂ en ^dnin-ĝir₂-su
225.	(A9.4) ĝe₂₆ a-na mu-u₃-da-zu
226.	(A9.5) 2(MIN)-kam-ma-še₃ nu₂-a-ra nu₂-a-ra
227.	(A9.6) saĝ-ĝa₂ mu-na-gub ul₄ mu-tag-tag-e
228.	(A9.7) ma-du₃-na ma-du₃-na
229.	(A9.8) ensi₂ e₂-ĝu₁₀ ma-du₃-na
230.	(A9.9) gu₃-de₂-a e₂-ĝu₁₀ du₃-da ĝiškim-bi ga-ra-ab-šum₂
231.	(A9.10) ĝarza-ĝa₂ mul-an kug-ba gu₃ ga-mu-ra-a-de₂
232.	(A9.11) e₂-ĝu₁₀ e₂-ninnu an-ne₂ ki ĝar-ra
233.	(A9.12) me-bi me gal-gal me-me-a dirig-ga
234.	(A9.13) e₂ lugal-bi igi sud il₂-il₂
235.	(A9.14) anzud₂^mušen-gin₇ šeg₁₂ gi₄-a-bi-še₃
236.	(A9.15) an im-ši-dub₂-dub₂
237.	(A9.16) me-lem₄ ḫuš-bi an-ne₂ im-us₂
238.	(A9.17) e₂-ĝa₂ ni₂ gal-bi kur-kur-ra mu-ri
239.	(A9.18) mu-bi-e an-zag-ta kur-kur-re gu₂ im-ma-si-si
240.	(A9.19) ma₂-gan me-luḫ-ḫa kur-bi-ta im-ma-ta-ed₃-de₃
241.	(A9.20) ĝe₂₆ ^dnin-ĝir₂-su a ḫuš gi₄-a
242.	(A9.21) ur-saĝ gal ki ^den-lil₂-la₂-ka
243.	(A9.22) en gaba-ri nu-tuku
244.	(A9.23) e₂-ĝu₁₀ e₂-ninnu ĝe₂₆-en kur-ra ab-dirig
245.	(A9.24) tukul-ĝu₁₀ šar₂-ur₃ kur šu-še₃ ĝar-ĝar
246.	(A9.25) igi ḫuš-a-ĝu₁₀ kur-re nu-um-il₂
247.	(A9.26) a₂(source: DA) bad-a-ĝu₁₀ lu₂ la-ba-ta-e₃
248.	(A10.1) a ugu₄-ĝu₁₀ nam gal ki aĝ₂-da
249.	(A10.2) lugal a-ma-ru ^den-lil₂-la₂
250.	(A10.3) igi ḫuš-a-ni kur-da nu-il₂
251.	(A10.4) ^dnin-ĝir₂-su ur-saĝ ^den-lil₂-la₂
252.	(A10.5) mu-še₃ mu-sa₄
253.	(A10.6) me 50-a zag mi-ni-keše₂
254.	(A10.7) ^ĝišbanšur mu-il₂
255.	(A10.8) šu-luḫ si bi₂-sa₂
256.	(A10.9) šu si sa₂-a-ĝu₁₀ an kug-ge u₃-a ba-zig₃-ge
257.	(A10.10) niĝ₂ šu-ĝa₂ dug₃-ga-am₃
258.	(A10.11) a ugu₄-ĝu₁₀ dug₃-ga-bi mu-gu₇
259.	(A10.12) an lugal diĝir-re-ne-ke₄
260.	(A10.13) ^dnin-ĝir₂-su lugal išib an-na
261.	(A10.14) mu-še₃ mu-sa₄
262.	(A10.15) ti-ra-aš₂ abzu-gin₇
263.	(A10.16) nam-nun-na ki im-ma-ni-ĝar
264.	(A10.17) šag₄-bi-a /itid\-da ud-sakar-ra
265.	(A10.18) me gal-gal ezen an-na-ĝu₁₀ šu gal ma-du₇-du₇
266.	(A10.19) e₂-ḫuš ki ḫuš-ĝu₁₀
267.	(A10.20) muš-ḫuš-gin₇ ki sumur-ra bi₂-du₃
268.	(A10.21) ki-bal-ĝa₂ nu-mi-ib₂-dug₄-ga
269.	(A10.22) ud šag₄-ĝu₁₀ um-ši-mi-ri₂-a
270.	(A10.23) muš ze₂ guru₅-a-gin₇ uš ma-a-u₃-ku-e
271.	(A10.24) e₂-babbar₂ ki a₂ aĝ₂-ĝa₂-ĝa₂
272.	(A10.25) ki ^dutu-gin₇ dalla-a-ĝa₂
273.	(A10.26) ki-ba ^dištaran-gin₇ di iri-ĝa₂ si ba-ni-ib₂-sa₂-e
274.	(A10.27) e₂-ba-gara₂ ki banšur-ra-ĝu₁₀
275.	(A10.28) diĝir gal-gal lagaš^ki-a-ke₄-ne
276.	(A10.29) gu₂ ma-si-si-ne
277.	(A11.1) e₂-ĝu₁₀ e₂ saĝ-kal kur-kur-ra
278.	(A11.2) a₂ zid-da lagaš^ki
279.	(A11.3) anzud₂^mušen an-šar₂-ra šeg₁₂ gi₄-gi₄
280.	(A11.4) e₂-ninnu e₂ nam-lugal-ĝu₁₀
281.	(A11.5) sipad zid gu₃-de₂-a
282.	(A11.6) ud šu zid ma-ši-tum₃-da
283.	(A11.7) an-še₃ tum₉ duru₅-e gu₃ ba-de₂
284.	(A11.8) an-ta ḫe₂-ĝal₂ ḫa-mu-ra-ta-du
285.	(A11.9) kalam-e ḫe₂-ĝal₂-la šu ḫe₂-a-da-peš-e
286.	(A11.10) e₂-ĝa₂ uš ki ĝar-ra-bi-da
287.	(A11.11) ḫe₂-ĝal₂ ḫe₂-da-ĝen
288.	(A11.12) gana₂ gal-gal-e šu ma-ra-ab-il₂-e
289.	(A11.13) eg₂ pa₅ gu₂-bi ma-ra-ab-zi-zi
290.	(A11.14) du₆-du₆ ki a nu-ed₃-da
291.	(A11.15) a ma-ra-ed₃-de₃
292.	(A11.16) ki-en-gi-ra₂ i₃ dirig mu-da-de₂
293.	(A11.17) siki dirig mu-da-la₂
294.	(A11.18) ud temen-ĝu₁₀ ma-sig₉-ge₄-na
295.	(A11.19) e₂-ĝu₁₀ ud šu zid ma-ši-tum₃-da
296.	(A11.20) ḫur-saĝ ki ^tum₉mir tuš-a-še₃
297.	(A11.21) ĝiri₃-ĝu₁₀ ki i₃-bi₂-us₂
298.	(A11.22) nitaḫ a₂ dirig-ke₄ ^tum₉mir-e ḫur-saĝ ki sikil-ta
299.	(A11.23) tum₉ si ma-ra-ab-sa₂-e
300.	(A11.24) kalam-e zi-šag₄-ĝal₂ u₃-ma-šum₂
301.	(A11.25) lu₂ dili lu₂ 2(MIN)-da kiĝ₂ mu-da-ak-ke₄
302.	(A11.26) ĝi₆-a-na i₃-ti ma-ra-e₃-e₃
303.	(A11.27) e-bar₇-gana₂ ud-«ma»-dam ma-ra-e₃-e₃
304.	(A12.1) e₂ ud-de₃ ma-ra-du₃-e
305.	(A12.2) ĝi₆-e ma-ra-ab-mu₂-mu₂
306.	(A12.3) sig-ta ^ĝišḫa-lu-ub₂
307.	(A12.4) ^ĝišNE-ḫa-an^! mu-ra-ta-ed₃-de₃
308.	(A12.5) igi-nim-ta ^ĝišerin ^ĝiššu-ur₂-men₂ ^ĝišza-ba-lum ni₂-bi-a ma-ra-an-tum₃
309.	(A12.6) kur ^ĝišesi-a-ka
310.	(A12.7) ^ĝišesi ma-ra-ni-tum₃
311.	(A12.8) kur na-ka na gal ḫur-saĝ-ĝa₂
312.	(A12.9) lagab-ba ma-ra-kud-e
313.	(A12.10) ud-bi-a a₂-zu izi bi₂-tag
314.	(A12.11) ĝiškim-ĝu₁₀ ḫa-mu-u₃-zu
315.	(A12.12) gu₃-de₂-a i₃-zig₃ u₃-sa-ga-am₃
316.	(A12.13) i₃-ḫa-luḫ ma-mu-dam
317.	(A12.14) inim dug₄-ga ^dnin-ĝir₂-su-ka-še₃
318.	(A12.15) saĝ sig ba-ši-ĝar
319.	(A12.16) maš₂ babbar₂-ra šu mu-gid₂-de₃
320.	(A12.17) maš₂-a šu i₃-gid₂ maš₂-a-ni i₃-sag₉
321.	(A12.18) gu₃-de₂-a šag₄ ^dnin-ĝir₂-su-ka
322.	(A12.19) ud-dam mu-na-e₃
323.	(A12.20) gal mu-zu gal i₃-ga-tum₂-mu
324.	(A12.21) ensi₂-ke₄ iri-na lu₂ dili-gin₇
325.	(A12.22) na de₅ ba-ni-ĝar
326.	(A12.23) ki lagaš^ki-e dumu ama dili-a-gin₇ šag₄ mu-na-AŠ-e
327.	(A12.24) ĝiš-šu mu-du₈ ĝiš-ĝiri₂ mu-zig₃
328.	(A12.25) u₂-guru₅ mu-ĝar inim dug₄-ga bi₂-gi₄
329.	(A12.26) šer₇-da e₂-ba im-ma-an-gi₄
330.	(A13.1) u₃-sa-an bar-us₂-sa eme i₃-du₈
331.	(A13.2) siki udu gan-na-kam šu-a mi-ni-ĝar-ĝar
332.	(A13.3) ama-a dumu-da gu₃ nu-ma-da-de₂
333.	(A13.4) dumu-u₃ ama-ni-ra ka du₃-a
334.	(A13.5) nu-ma-na-dug₄
335.	(A13.6) arad₂ a₂ ĝiš tag tuku-ra
336.	(A13.7) lugal-a-ni saĝ nu-ma-da-dub₂
337.	(A13.8) geme₂ lu₂ nam-ra₂ ḫul mu-na-ak
338.	(A13.9) nin-a-ni igi-na niĝ₂ nu-mu-na-ni-ra
339.	(A13.10) ensi₂ e₂-ninnu du₃-ra
340.	(A13.11) gu₃-de₂-a-ar inim-ĝar-bi lu₂-u₃ nu-ma-ni-ĝar
341.	(A13.12) ensi₂-ke₄ iri mu-kug
342.	(A13.13) izi im-ma-ta-la₂
343.	(A13.14) uzug₃-ga ni₂-ĝal₂ lu₂-GI.AN
344.	(A13.15) iri-ta ba-ta-e₃
345.	(A13.16) pisaĝ u₃-šub-ba-še₃ maš₂ ba-ši-nu₂
346.	(A13.17) šeg₁₂ maš₂-e bi₂-pad₃
347.	(A13.18) ka-al-bi-še₃ igi zid ba-ši-bar
348.	(A13.19) sipad mu pad₃-da ^dnanše-ke₄ nam-nun-na i₃-ĝar
349.	(A13.20) pisaĝ u₃-šub-ba-<ka> ĝiš bi₂-ḫur-ra-ni
350.	(A13.21) ka-al nam-nun-na mu-ni-ĝar-ra-ni
351.	(A13.22) anzud₂^mušen šu-nir lugal-la-na-kam
352.	(A13.23) urin-še₃ bi₂-mul
353.	(A13.24) u₅ bur₃ eše₃-še₃ iri mu-na-kug-ge
354.	(A13.25) u₅ mu-na-sikil-e
355.	(A13.26) li^ĝiš u₂ sikil kur-ra-kam izi-a bi₂-si-si
356.	(A13.27) šim erin ir-sim diĝir-ra-kam i₃-bi₂-bi mu-du₃
357.	(A13.28) ud sizkur₂-ra mu-na-a-ĝal₂
358.	(A13.29) ĝi₆ šudu₃-de₃ mu-na-zal-e
359.	(A14.1) ^da-[nun-na] ki lagaš^ki
360.	(A14.2) e₂ ^dnin-ĝir₂-su-ka du₃-de₃
361.	(A14.3) gu₃-de₂-a sizkur₂ ra₂-/zu\-[(X)]
362.	(A14.4) mu-da-an-šu₄-šu₄-ge-eš₂
363.	(A14.5) sipad zid gu₃-de₂-a ḫul₂-la-gin₇
364.	(A14.6) im-ma-na-ni-ib₂-ĝar
365.	(A14.7) ud-ba ensi₂-ke₄ kalam-ma-na zig₃-ga ba-ni-ĝar
366.	(A14.8) ma-da gu₂-saĝ šar₂-šar₂-ra-na
367.	(A14.9) gu₂-edin-na ^dnin-ĝir₂-su-ka-ka
368.	(A14.10) zig₃-ga ba-ni-ĝar
369.	(A14.11) iri du₃-a a₂-dam ĝar-ra-na
370.	(A14.12) gu₂-ĝiš-bar-ra ^dnanše-ka
371.	(A14.13) zig₃-ga ba-ni-ĝar
372.	(A14.14) gud ḫuš zig₃-ga gaba gi₄ nu-tuku
373.	(A14.15) ^ĝišerin babbar₂-ra lugal-bi-ir dab₆-ba
374.	(A14.16) im-ru-a ^dnin-ĝir₂-su-ka-ka
375.	(A14.17) zig₃-ga mu-na-ĝal₂
376.	(A14.18) šu-nir maḫ-bi lugal-kur-dub₂ saĝ-bi-a mu-gub
377.	(A14.19) peš₁₀-ĝal₂ gaba-ĝal₂ a-ta e₃-a
378.	(A14.20) id₂ maḫ a dirig ḫe₂-ĝal₂-bi barag₂-barag₂
379.	(A14.21) im-ru-a ^dnanše-ka
380.	(A14.22) zig₃-ga mu-na-ĝal₂
381.	(A14.23) u₅ kug šu-nir ^dnanše-kam saĝ-bi-a mu-gub
382.	(A14.24) gu maš₂-anše edin-na la₂-a
383.	(A14.25) ni-is-ku erin₂ mu tuku erin₂ ^dutu ki aĝ₂
384.	(A14.26) im-ru-a ^dinana-ka zig₃-ga mu-na-ĝal₂
385.	(A14.27) aš-me šu-nir ^dinana-kam saĝ-bi-a mu-gub
386.	(A14.28) e₂ ^dnin-ĝir₂-su-ka du₃-de₃
	3 lines missing
390.	(A15.4) […] TE […]
391.	(A15.5) šu /NI\ […] /UŠ\ […] ĝar
392.	(A15.6) elam elam-ta mu-na-ĝen
393.	(A15.7) šušin ki šušin-ta mu-na-ĝen
394.	(A15.8) ma₂-gan me-luḫ-ḫa kur-bi-ta gu₂ ĝiš mu-na-ab-ĝal₂
395.	(A15.9) e₂ ^dnin-ĝir₂-su-ka du₃-de₃
396.	(A15.10) gu₃-de₂-a iri-ni ĝir₂-su^ki-še₃ gu₂ mu-na-si-si
397.	(A15.11) ^dnin-zag-ga-da a₂ mu-da-aĝ₂
398.	(A15.12) urud-da-ni še maḫ de₆-a-gin₇
399.	(A15.13) gu₃-de₂-a lu₂ e₂ du₃-a-ra
400.	(A15.14) mu-na-ab-us₂-e
401.	(A15.15) ^dnin-sikil-a-da a₂ mu-da-aĝ₂
402.	(A15.16) ^ĝišḫa-lu-ub₂ gal-gal ^ĝišesi ĝiš-ab-ba-bi
403.	(A15.17) ensi₂ e₂-ninnu du₃-ra
404.	(A15.18) mu-na-ab-us₂-e
405.	(A15.19) kur ^ĝišerin-na lu₂ nu-ku₄-ku₄-da
406.	(A15.20) gu₃-de₂-a en ^dnin-ĝir₂-su-ke₄
407.	(A15.21) ĝiri₂ mu-na-ni-ĝar
408.	(A15.22) ^ĝišerin-bi tun₃ gal-e im-mi-kud
409.	(A15.23) šar₂-ur₃ a₂ zid-da lagaš^ki-a
410.	(A15.24) tukul a-ma-ru lugal-la-na-še₃
411.	(A15.25) tun₃ im-ma-bar
412.	(A15.26) muš-maḫ-am₃ a-e im-dirig-ga-am₃
413.	(A15.27) ḫur-saĝ ^ĝišerin-<na-ta> ad ^ĝišerin-na
414.	(A15.28) ḫur-saĝ ^ĝiššu-ur₂-men₂-ta
415.	(A15.29) ad ^ĝiššu-ur₂-men₂
416.	(A15.30) ḫur-saĝ ^ĝišza-ba-lum-ma-ta
417.	(A15.31) ad ^ĝišza-ba-lum
418.	(A15.32) ^ĝišu₃-<suḫ₅> gal-gal ^ĝištu-lu-bu-um
419.	(A15.33) ^ĝiše-ra-num₂
420.	(A15.34) ad gal-gal-bi dirig-dirig-ga-bi
421.	(A15.35) kar maḫ kan₄-sur-ra-ke₄
422.	(A16.1) [gu₃-de₂-a en ^dnin-ĝir₂-su-ra]
423.	(A16.2) [im-ma-na-us₂]
424.	(A16.3) [kur na lu₂ nu-ku₄-ku₄-da]
425.	(A16.4) [gu₃-de₂-a] en [^dnin-ĝir₂]-su-[ke₄]
426.	(A16.5) ĝiri₂ mu-[na-ni-ĝar]
427.	(A16.6) na gal-gal-bi lagab-ba mi-ni-de₆
428.	(A16.7) ma₂ ḫa-u₃-na ma₂ na-lu-a
429.	(A16.8) esir₂ a-ba-al esir₂ igi-esir₂ im-babbar₂-ra
430.	(A16.9) ḫur-saĝ ma₂-ad-ga-ta
431.	(A16.10) niĝ₂-gur₁₁ ma₂ še gana₂ de₆-a-gin₇
432.	(A16.11) gu₃-de₂-a en ^dnin-ĝir₂-su-ra
433.	(A16.12) im-ma-na-us₂
434.	(A16.13) ensi₂ e₂-ninnu du₃-ra
435.	(A16.14) niĝ₂ gal-gal-e šu mu-na-ab-il₂
436.	(A16.15) ḫur-saĝ urud-ke₄ ki-maš-ta
437.	(A16.16) ni₂-bi mu-na-ab-pad₃
438.	(A16.17) urud-bi gi-dirig-ba mu-ni-ba-al
439.	(A16.18) lu₂ e₂ lugal-na du₃-dam
440.	(A16.19) ensi₂-ra kug-sig₁₇ kur-bi-ta
441.	(A16.20) saḫar-ba mu-na-tum₃
442.	(A16.21) gu₃-de₂-a kug NE-a kur-bi-ta mu-na-ta-ed₃-de₃
443.	(A16.22) gug gi-rin-e me-luḫ-ḫa-ta
444.	(A16.23) šu mu-na-peš-e
445.	(A16.24) kur nu₁₁-ta nu₁₁ mu-na-ta-ed₃-de₃
446.	(A16.25) sipad-de₃ e₂ kug-ga mu-du₃-e
447.	(A16.26) kug-dim₂ im-da-tuš
448.	(A16.27) e₂-ninnu za mu-du₃-e zadim im-da-tuš
449.	(A16.28) urud nagga-a mu-du₃-e
450.	(A16.29) saĝĝa-simug ^dnin-tur₅ kalam-ma-ke₄
451.	(A16.30) igi-ni-še₃ si im-<mi>-sa₂
452.	(A16.31) ^na₄šu-min-e ud-da-am₃ šeg₁₂ mu-na-ab-gi₄
453.	(A16.32) ^na₄esi na₄ šu-ke₄
454.	(A17.1) […] 2(MIN) […] peš
455.	(A17.2) […] X TI [X] X NAM [X] /a\ maḫ [X] /DU\-a-gin₇
456.	(A17.3) […] /MU\ […] X
	1 line missing
458.	(A17.5) /UD\ […] MU […]
459.	(A17.6) ĝi₂₅-/ĝi₂₅\ mu-na-gid₂
460.	(A17.7) nam e₂ du₃-da lugal-la-na-še₃
461.	(A17.8) u₃ ĝi₆ an-na nu-um-ku₄-ku₄
462.	(A17.9) u₃ an-ba-ra saĝ nu-mi-ib₂-du₃-e
463.	(A17.10) igi zid bar-ra ^dnanše-kam
464.	(A17.11) ^den-lil₂-la₂ lu₂ šag₄-ga-na-kam
465.	(A17.12) ensi₂ [X] X X [(X)] ^dnin-ĝir₂-su-ka-kam
466.	(A17.13) gu₃-de₂-a unu₆ maḫ-a tud-da
467.	(A17.14) ^dĝa₂-tum₃-dug₃-ga-kam
468.	(A17.15) ^dnisaba-ke₄ e₂ ĝeštug₂-ke₄
469.	(A17.16) ĝal₂ mu-na-taka₄
470.	(A17.17) e₂-a ^den-ki-ke₄ ĝiš-ḫur-bi si mu-na-sa₂
471.	(A17.18) e₂ me-lem₄-bi an-ne₂ us₂-sa
472.	(A17.19) me-bi an ki-da gu₂ la₂-a
473.	(A17.20) lugal-bi en igi ḫuš il₂-il₂
474.	(A17.21) ur-saĝ ^dnin-ĝir₂-su me₃ gal-zu-bi
475.	(A17.22) e₂-ninnu anzud₂^mušen babbar₂-še₃
476.	(A17.23) gu₃-de₂-a sig-ta ba-ši-ĝen
477.	(A17.24) nim-še₃ u₅ bi₂-dug₄
478.	(A17.25) nim-ta ba-ši-ĝen sig-še₃ u₅ bi₂-dug₄
479.	(A17.26) iku zid-dam eš₂ i₃-ĝar-ĝar
480.	(A17.27) a₂-ba ĝiš bi₂-ĝar ni₂-te-ni mu-zu
481.	(A17.28) ḫul₂-la-gin₇ im-ma-na-ni-ib₂-ĝar
482.	(A17.29) u₃-te-am₃ e₂ libir-ra-aš₂ ra₂-zu-a ba-ĝen
483.	(A18.1) gu₃-de₂-a barag ĝir₂-nun-na-ta
484.	(A18.2) šag₄ mu-na-ḫuĝ-ĝe₂₆-e
485.	(A18.3) ud im-zal a mu-tu₁₇
486.	(A18.4) me-te-ni mu-gi
487.	(A18.5) ^dutu ḫe₂-ĝal₂ mu-na-ta-e₃
488.	(A18.6) gu₃-de₂-a [2(MIN)]-kam-aš₂ iri-kug-[ta] im-ma-[ta]-/e₃\
489.	(A18.7) gud du₇ maš₂ du₇-re₆ ĝiš bi₂-tag
490.	(A18.8) e₂-e im-ma-ĝen
491.	(A18.9) giri₁₇ šu im-ma-ĝal₂
492.	(A18.10) dusu kug ^ĝišu₃-šub zid nam tar-ra
493.	(A18.11) e₂-/ninnu\ /mu\-[…]
494.	(A18.12) X […] mu-la₂ saĝ il₂ mu-ĝen
495.	(A18.13) ^dlugal-kur-dub₂ igi-še₃ mu-na-ĝen
496.	(A18.14) ^dig-alim-ke₄ ĝiri₂ mu-na-ĝa₂-ĝa₂
497.	(A18.15) ^dnin-ĝiš-zid-da diĝir-ra-ni
498.	(A18.16) šu mu-da-ĝal₂-ĝal₂
499.	(A18.17) pisaĝ u₃-šub-ka a sa-ga i₃-ak
500.	(A18.18) ensi₂-ra a-dab₆ si-im a₂-la₂ mu-na-du₁₂-am₃
501.	(A18.19) ka-al šeg₁₂-bi saĝ im-mi-du₈
502.	(A18.20) lal₃ i₃-nun i₃-ḫe-nun-na al im-ma-ni-tag
503.	(A18.21) šembulug_x(ŠIM×UḪ₃) ŠIM×PI ĝiš ḫi-a
504.	(A18.22) aḫ-še₃ im-mi-ak
505.	(A18.23) dusu kug mu-il₂ u₃-šub-e im-ma-gub
506.	(A18.24) gu₃-de₂-a im u₃-šub-ba i₃-ĝar
507.	(A18.25) niĝ₂-du₇ pa bi₂-e₃
508.	(A18.26) e₂-a šeg₁₂-bi pa e₃ mu-ni-ĝa₂-ĝa₂
509.	(A18.27) kur-kur-re i₃ mu-da-sud-e
510.	(A18.28) erin mu-da-sud-e
511.	(A19.1) iri-ni ki lagaš^ki-e si₁₁-le₂-a
512.	(A19.2) ud mu-di₃-ni-ib₂-zal-e
513.	(A19.3) u₃-šub mu-dub₂ šeg₁₂ ḫad₂-de₃ ba-šub
514.	(A19.4) ka-al im aga₃-ri₂-na-ba-še₃
515.	(A19.5) igi zid ba-ši-bar
516.	(A19.6) ŠIM×PI ḫa-šu-ur₂ šembulug_x(ŠIM×UḪ₃)-a
517.	(A19.7) saĝ im-<ma>-ni-du₈
518.	(A19.8) šeg₁₂ u₃-šub-ba mi-ni-ĝar-ra-ni
519.	(A19.9) ^dutu im-da-ḫul₂
520.	(A19.10) aga₃-ri₂ id₂ maḫ-gin₇ zig₃-ga-na
521.	(A19.11) lugal ^den-/ki\ /nam^?\ mu-[X]-/tar\
522.	(A19.12) [X] mu-/ĝar u₃-šub-ba^?\ e₂-a i₃-kur₉
523.	(A19.13) pisaĝ u₃-šub-ba-ta šeg₁₂ ba-ta-il₂
524.	(A19.14) men kug an-ne₂ il₂-la
525.	(A19.15) šeg₁₂ mu-il₂ uĝ₃-ĝa₂-na mu-ĝen
526.	(A19.16) erin₂ kug ^dutu saĝ bal-e-dam
527.	(A19.17) šeg₁₂-e e₂-še₃ saĝ il₂-la-bi
528.	(A19.18) ab₂ ^dnanna tur₃-ba erin₂-erin₂-dam
529.	(A19.19) šeg₁₂ mu-ĝar e₂-a mu-ku_x(DU)-ku_x(DU)
530.	(A19.20) e₂-a ĝiš-ḫur-bi im-ĝa₂-ĝa₂
531.	(A19.21) ^dnisaba šag₄ šid zu-am₃
532.	(A19.22) lu₂-tur gibil-bi e₂ du₃-gin₇
533.	(A19.23) igi-ni u₃ dug₃-ga nu-ši-ku₄-ku₄
534.	(A19.24) ab₂ amar-bi-še₃ igi ĝal₂-la-gin₇
535.	(A19.25) e₂-še₃ te-te-ma im-ši-ĝen
536.	(A19.26) lu₂ ninda tur ka-a gub-ba-gin₇
537.	(A19.27) du-du-e nu-ši-kuš₂-u₃
538.	(A19.28) šag₄ lugal-na ud-dam mu-<na>-e₃
539.	(A20.1) gu₃-de₂-a-ar inim ^dnin-ĝir₂-su-ka urin-am₃ mu-du₃
540.	(A20.2) šag₄ gu₃ di e₂ du₃-da-ka-na
541.	(A20.3) inim-ĝar sag₉-ga-a lu₂ ma-a-ĝar
542.	(A20.4) ḫul₂-la-gin₇ im-ma-na-ni-ib₂-ĝar
543.	(A20.5) maš-a šu i₃-gid₂ maš-a-ni i₃-sag₉
544.	(A20.6) a-MIR-e še ba-šum₂ igi-bi si ib₂-sa₂
545.	(A20.7) gu₃-de₂-a saĝ-še₃ nu₂
546.	(A20.8) mu-nu₂ inim mu-na-ta-e₃
547.	(A20.9) e₂ lugal-na-ka du₃-bi
548.	(A20.10) e₂-ninnu an ki-ta bad-bi
549.	(A20.11) /igi\-a mu-na-a-ĝal₂
550.	(A20.12) ḫul₂-la-gin₇ im-[ma-na]-/ni-ib₂-ĝar\
551.	(A20.13) gu mu-ba-ra me šu im-du₇-du₇
552.	(A20.14) uz-ga kug-ge eš₃ mu-ĝa₂-ĝa₂
553.	(A20.15) e₂-a ^den-ki-ke₄ temen mu-sig₉-ge
554.	(A20.16) ^dnanše dumu eridug^ki-ke₄ eš-bar kiĝ₂-ĝe₂₆ mi₂ ba-ni-dug₄
555.	(A20.17) ama lagaš^ki kug ^dĝa₂-tum₃-dug₃-ke₄
556.	(A20.18) šeg₁₂-bi kur-ku₄-a mu-ni-tud
557.	(A20.19) ^dba-u₂ nin dumu-saĝ an-na-ke₄
558.	(A20.20) i₃ šim erin-na ba-ni-sud
559.	(A20.21) e₂-e en ba-gub la-gal ba-gub
560.	(A20.22) me-e šu si im-ma-sa₂
561.	(A20.23) ^da-nun-na u₃ di-de₃ im-ma-šu₄-šu₄-ge-eš₂
562.	(A20.24) gu₃-de₂-a lu₂ e₂ du₃-a-ke₄
563.	(A20.25) e₂-a dusu-bi men kug saĝ-ĝa₂ mu-ni-ĝal₂
564.	(A20.26) uš mu-ĝar a₂-ĝar ki im-mi-tag
565.	(A20.27) sa₂ mu-sig₁₀ šeg₁₂-ga gu bi₂-dub₂
566.	(A21.1) e₂-a sa₂ 2-nam nam-mi-sig₁₀
567.	(A21.2) gu ^dugba saĝ ĝal₂-la-am₃
568.	(A21.3) e₂-a sa₂ 3-am₃ nam-mi-sig₁₀
569.	(A21.4) anzud₂^mušen amar-a a₂ pag-am₃
570.	(A21.5) e₂-a sa₂ 4 nam(source: RI)-mi-sig₁₀
571.	(A21.6) nemur_x(PIRIĜ.TUR) piriĝ ḫuš-a gu₂-da la₂-am₃
572.	(A21.7) e₂-a sa₂ 5-am₃ nam-mi-sig₁₀
573.	(A21.8) an nisig su-lim il₂-la-am₃
574.	(A21.9) e₂-a sa₂ 6-am₃ nam-mi-sig₁₀
575.	(A21.10) ud sa₂-dug₄-ga ḫi-li guru₃-am₃
576.	(A21.11) e₂-a sa₂ 7 nam-mi-sig₁₀
577.	(A21.12) e₂-ninnu i₃-ti ud zal-la kalam si-am₃
578.	(A21.13) ĝiš-kan₄-na im-ĝa₂-ĝa₂-ne
579.	(A21.14) an nisig-ga men il₂-la-am₃
580.	(A21.15) ĝiš-kan₄-na-ta ba-ta-tuš
581.	(A21.16) e₂ maḫ an-da gu₂ la₂-am₃
582.	(A21.17) e₂ mu-du₃ ĝiš-e im-ma-šub
583.	(A21.18) ambar ^dnanna saĝ keše₂ ^den-ki-ka-kam
584.	(A21.19) e₂ ḫur-saĝ-gin₇ im-mu₂-mu₂-ne
585.	(A21.20) dugud-gin₇ an-šag₄-ge im-mi-ni-ib₂-dirig-dirig-ne
586.	(A21.21) gud-gin₇ si im-mi-ib₂-il₂-il₂-ne
587.	(A21.22) ĝiš-gana₂ abzu-gin₇ kur-kur-ra saĝ ba-ni-ib₂-il₂-ne
588.	(A21.23) e₂-e ḫur-saĝ-gin₇ an ki-a saĝ an-še₃ mi-ni-ib₂-il₂
589.	(A21.24) erin duru₅ ki u₂ rib mu₂-a-am₃
590.	(A21.25) e₂-ninnu šeg₁₂ ki-en-gi-ra₂-ka ḫi-li mu-ni-ib₂-du₈-du₈
591.	(A21.26) e₂-a ĝiš im-ĝa₂-ĝa₂-ne
592.	(A21.27) ušum abzu teš₂-ba ed₂-de₃-dam
593.	(A21.28) KA an-na im-mi-ib₂-u₃-u₃-dam
594.	(A22.1) muš-maḫ ḫur-saĝ-ĝa₂ nam ak-am₃
595.	(A22.2) e₂ gi guru₅-bi muš kur-ra teš₂-ba nu₂-am₃
596.	(A22.3) sa-tu-/bi\ erin duru₅ ḫa-/šu\-ur₂-ra šu ḫe₂-tag-ga-am₃
597.	(A22.4) aga₃ erin igi u₆ di-bi-a erin babbar₂ im-ĝa₂-ĝa₂-ne
598.	(A22.5) šim zid i₃-ḫe-nun-ka mi₂ ba-ni-ib₂-e-ne
599.	(A22.6) e₂ im-du₈-a-bi ḫe-nun abzu šu tag-ga-am₃
600.	(A22.7) A.ĜAR.KA-bi im-ši-ib₂-suru₅-ne
601.	(A22.8) eš₃ e₂-ninnu šu E₂×BAD^? an-na-ka ĝar-ĝar-a-am₃
602.	(A22.9) ensi₂-ke₄ e₂ mu-du₃ mu-mu₂
603.	(A22.10) kur gal-gin₇ mu-mu₂
604.	(A22.11) temen abzu-bi dim gal-gal ki-a mi-ni-sig₉-sig₉
605.	(A22.12) ^den-ki-da e₂-an-gur₄-ra-ka
606.	(A22.13) šag₄ mu-di₃-ni-ib₂-kuš₂-u₃
607.	(A22.14) temen an-na ur-saĝ-am₃ e₂-e im-mi-dab₆
608.	(A22.15) ki-a-naĝ diĝir-re-<ne>-ka a im-na₈-na₈-a
609.	(A22.16) e₂-ninnu dim gal mu-gen₆
610.	(A22.17) abgal₂-bi mu-du₃
611.	(A22.18) iri-na ^ĝišasal₂ dug₃-bi mu-du₃
612.	(A22.19) ĝissu-bi mu-la₂
613.	(A22.20) ^ĝiššar₂-ur₃-bi urin gal-gin₇ lagaš^ki-da im-da-sig₉
614.	(A22.21) šu-ga-lam ki ḫuš-ba im-mi-ni-ĝar
615.	(A22.22) su zig₃ bi₂-du₈-du₈ barag ĝir₂-nun-na ki di kud-ba
616.	(A22.23) u₂-a lagaš^ki gud gal-gin₇ a₂ ba-il₂-il₂
617.	(A22.24) na gal-gal lagab-ba mi-ni-de₆-a
618.	(A23.1) mu 1-a mu-de₆ mu 1-a mu-ak
619.	(A23.2) ud 2 ud 3 nu-ma-da-ab-zal
620.	(A23.3) a₂ ud-da 1-ta mu-du₃
621.	(A23.4) ud 7-kam-ma-ka e₂-e im-mi-dab₆
622.	(A23.5) na da-bi kun-še₃ mu-nu₂
623.	(A23.6) /šim\-še₃ mu-dim₂-dim₂
624.	(A23.7) e₂-a mi-ni-šu₄-šu₄
625.	(A23.8) na kisal maḫ-a <im>-mi-du₃-a-na
626.	(A23.9) na-du₃-a lugal kisal si
627.	(A23.10) gu₃-de₂-a en ^dnin-ĝir₂-su-ke₄
628.	(A23.11) ĝir₂-nun-ta mu-zu
629.	(A23.12) na-ba mu-še₃ im-ma-sa₄
630.	(A23.13) na kan₄-sur-ra bi₂-du₃-a
631.	(A23.14) lugal a-ma-ru ^den-lil₂-la₂
632.	(A23.15) gaba-šu-ĝar nu-tuku
633.	(A23.16) gu₃-de₂-a en ^dnin-ĝir₂-su-ke₄
634.	(A23.17) igi zid mu-ši-bar
635.	(A23.18) na-ba mu-še₃ im-ma-sa₄
636.	(A23.19) na igi ud e₃-a-<ka> bi₂-du₃-a
637.	(A23.20) lugal ud gu₃ di ^den-lil₂-la₂
638.	(A23.21) en gaba-ri nu-tuku
639.	(A23.22) gu₃-de₂-a en ^dnin-ĝir₂-su-ke₄
640.	(A23.23) šag₄ kug-ge bi₂-pad₃
641.	(A23.24) na-ba mu-še₃ im-ma-sa₄
642.	(A23.25) na igi šu-ga-lam-ma-ka bi₂-du₃-a
643.	(A23.26) lugal mu-ni-še₃ kur tuku₂-tuku₂-e
644.	(A23.27) gu₃-de₂-a en ^dnin-ĝir₂-su-ke₄
645.	(A23.28) gu-za-ni mu-gen₆
646.	(A23.29) na-ba mu-še₃ im-ma-sa₄
647.	(A23.30) na igi e₂-uru₁₈-ga-ka bi₂-du₃-a
648.	(A24.1) gu₃-de₂-a en ^dnin-ĝir₂-su-ke₄
649.	(A24.2) nam dug₃ mu-ni-tar
650.	(A24.3) na-ba mu-še₃ im-ma-sa₄
651.	(A24.4) na a-ga ^dba-u₂-ka bi₂-du₃-a
652.	(A24.5) e₂-ninnu igi an-na-ke₄ zu
653.	(A24.6) ^dba-u₂ zi-šag₄-ĝal₂ gu₃-de₂-a
654.	(A24.7) na-ba mu-še₃ im-ma-sa₄
655.	(A24.8) e₂ lugal-na zid-de₃-eš₂ mu-du₃
656.	(A24.9) sipad zid gu₃-de₂-a an ki im-da-mu₂
657.	(A24.10) ud-sakar gibil-gin₇ men bi₂-il₂
658.	(A24.11) mu-bi kur-šag₄-še₃
659.	(A24.12) pa bi₂-e₃
660.	(A24.13) gu₃-de₂-a e₂ ^dnin-ĝir₂-su-ka
661.	(A24.14) ^dutu-gin₇ dugud-ta ba-ta-e₃
662.	(A24.15) ḫur-saĝ za-gin₃-na-gin₇ mu-mu₂
663.	(A24.16) ḫur-saĝ nu₁₁ babbar₂-ra-gin₇
664.	(A24.17) u₆ di-de₃ ba-gub
665.	(A24.18) dub-la₂-bi am-gin₇ mu-šu₄-šu₄
666.	(A24.19) ušum-bi ur-maḫ-gin₇ šu-ba bi₂-nu₂-nu₂
667.	(A24.20) gi-gun₄-bi ab-zu-gin₇ ki sikil-e bi₂-mu₂
668.	(A24.21) urin-bi taraḫ kug abzu-gin₇
669.	(A24.22) si ba-mul-mul
670.	(A24.23) ud-sakar gibil an-na gub-ba-gin₇
671.	(A24.24) gu₃-de₂-a e₂ ^dnin-ĝir₂-su-ka
672.	(A24.25) u₆ di-de₃ ba-gub
673.	(A24.26) e₂-a dub-la₂-bi šu₄-šu₄-ga-bi
674.	(A24.27) la-ḫa-ma abzu-da šu₄-ga-am₃
675.	(A25.1) e₂ ĝiš ĝar-ra-bi a-ĝi₆ ambar maḫ muš a sig-ga-am₃
676.	(A25.2) e₂ KA gid₂-da-bi
677.	(A25.3) an bar-bar-ra ni₂-ĝal₂-la-am₃
678.	(A25.4) e₂ e₂-dul₄-la-bi nu₁₁ an-šag₄-ge dirig-ga-am₃
679.	(A25.5) kan₄ ki lugal kur₉-bi-ta
680.	(A25.6) ḫu-ri₂-in am-še₃ igi il₂-il₂-dam
681.	(A25.7) ^ĝišti kan₄-e us₂-sa-bi
682.	(A25.8) tir_x(NIR)-an-na an-ne₂ us₂-sa-am₃
683.	(A25.9) ĝiš-kan₄ an-na-bi e₂-ninnu ud gu₃-ba gu₃ di teš₂-ba gub-ba-am₃
684.	(A25.10) sig₇-igi-bi ni₂ il₂-il₂-a-bi
685.	(A25.11) igi u₆ di diĝir-re-ne-kam
686.	(A25.12) e₂-a barag babbar₂ mu-ru-gu₂-ni
687.	(A25.13) ḫur-saĝ za-gin₃-na an ki-a ki ḫe₂-us₂-sa-am₃
688.	(A25.14) kiĝ₂-sig₁₇ unu₆ gal mu-ĝa₂-ĝa₂-ne
689.	(A25.15) bur kug-sig₁₇ lal₃ ĝeštin de₂-a
690.	(A25.16) an-ne₂ šu₄-ga-am₃
691.	(A25.17) e₂-nu₂-da mu-du₃-ne
692.	(A25.18) kur šar₂-da meš₃ kug abzu-a
693.	(A25.19) gurun₇ il₂-la-am₃
694.	(A25.20) mu-du₃ šu im-ta-ĝar-ra-ta
695.	(A25.21) šag₄ diĝir-re-ne gu₂-bi gi₄-a-am₃
696.	(A25.22) sipad zid gu₃-de₂-a gal mu-zu
697.	(A25.23) gal i₃-ga-tum₂-mu
698.	(A25.24) a-ga tukul la₂ kan₄ me₃-ba
699.	(A25.25) ur-saĝ šeg₉-saĝ-6 saĝ-ar-bi
700.	(A25.26) im-ma-ab-dab₅-be₂
701.	(A25.27) igi iri^ki-še₃ ki ni₂ guru₃-ba
702.	(A25.28) muš(source: ur)-saĝ-7-am₃ im-ma-ab-dab₅-e
703.	(A26.1) šu-ga-lam kan₄ me-lem₄-ba
704.	(A26.2) ušum ĝišnimbar-bi im-ma-ab-dab₅-be₂
705.	(A26.3) igi ud e₃ ki nam tar-re-ba
706.	(A26.4) šu-nir ^dutu saĝ-alim-ma
707.	(A26.5) im-ma-da-sig₉-ge
708.	(A26.6) kan₄-sur-ra igi u₆ di-ba
709.	(A26.7) ur-maḫ ni₂ diĝir-re-ne-kam
710.	(A26.8) im-ma-ab-dab₅-e
711.	(A26.9) tar-sir₂-sir₂ ki a₂ aĝ₂-ba
712.	(A26.10) ku-li-an-na urud-bi
713.	(A26.11) im-ma-ab-dab₅-e
714.	(A26.12) a-ga ^dba-u₂ ki šag₄ kuš₂-ba
715.	(A26.13) ma₂-gi₄-lum gud-alim-bi-da
716.	(A26.14) im-ma-ab-dab₅-e
717.	(A26.15) ur-saĝ ug₅-ga i₃-me-ša-ke₄-eš₂
718.	(A26.16) ka-bi ki a naĝ-še₃ mu-ĝar
719.	(A26.17) mu-bi mu-ru diĝir-re-ne-ka
720.	(A26.18) gu₃-de₂-a ensi₂ lagaš^ki-ke₄
721.	(A26.19) pa e₃ ba-ni-a
722.	(A26.20) ig ^ĝišerin-na e₂-a šu₄-ga-bi
723.	(A26.21) ^diškur an-ta gu₃ nun di-da-am₃
724.	(A26.22) e₂-ninnu saĝ-kul-bi idim
725.	(A26.23) ^ĝišnu-kušu₄-bi ur-maḫ
726.	(A26.24) si-ĝar-bi-ta muš-šag₄-tur₃ muš-ḫuš
727.	(A26.25) am-še₃ eme ed₂-de₃
728.	(A26.26) ga-du ig-e u₅ us₂-sa-bi
729.	(A26.27) ug nemur_x(PIRIĜ.TUR) tur-tur šu-ba du₂-ru-na-am₃
730.	(A26.28) e₂-a gag ĝiš-ur₃ kug mu-sig₉-ge₄-ne
731.	(A26.29) ušum lu₂-še₃ šu ib₂-ĝar-ra-am₃
732.	(A26.30) ig-ba eš₂ kug im-suru₅-ne
733.	(A27.1) ^dniraḫ kug abzu dar-a-am₃
734.	(A27.2) e₂-sa-la₂-a-bi keš₃^ki aratta^ki na de₅-ga-am₃
735.	(A27.3) e₂-sa-du₈-a-bi piriĝ ḫuš-am₃
736.	(A27.4) kalam-ma igi mi-ni-ib₂-ĝal₂
737.	(A27.5) dili du igi-bi nu-ma-dib-be₂
738.	(A27.6) e₂-ninnu ni₂-bi kur-kur-ra
739.	(A27.7) tug₂-gin₇ im-dul₄
740.	(A27.8) e₂ kug NE-a an-ne₂ ki ĝar-ra
741.	(A27.9) šembi₂-zid-da šu tag dug₄-ga
742.	(A27.10) še-er-zid an-na-ka i₃-ti-gin₇ e₃-a
743.	(A27.11) e₂ igi-bi kur gal ki us₂-sa
744.	(A27.12) šag₄-bi nam-šub šir₃ ḫa-mun
745.	(A27.13) bar-bi an e₂ maḫ ḫe₂-ĝal₂-la zig₃-ga
746.	(A27.14) gu₂-en bar-ra-bi
747.	(A27.15) ki di kud ^da-nun-ke₄-ne
748.	(A27.16) a-lal₃-bi-ta inim šudu₃-da
749.	(A27.17) šukur₂-bi-da ḫe₂-ĝal₂ diĝir-re-ne-kam
750.	(A27.18) urin e₂-da sig₉-sig₉-ga-bi
751.	(A27.19) anzud₂^mušen kur šuba_x(MUŠ)-a a₂(source: DA) ḫe₂-ba₉-ra₂-am₃
752.	(A27.20) e₂-ninnu im-bi im ḫa-mun
753.	(A27.21) ^id₂edin-ta ed₃-da
754.	(A27.22) lugal-bi en ^dnin-ĝir₂-su-ke₄
755.	(A27.23) šag₄ kug-ge bi₂-pad₃
756.	(A27.24) šembi₂-zid-gin₇ saĝ-ĝa₂ mi-ni-ib₂-de₂
757.	(A28.1) gu₃-de₂-a še-er-zid an-na-ka
758.	(A28.2) šu tag ba-ni-dug₄
759.	(A28.3) e₂ gud-bi-ta
760.	(A28.4) i₃ kur₉ ga kur₉
761.	(A28.5) udun-maḫ-bi-ta
762.	(A28.6) gug₂ gal si gal
763.	(A28.7) ĝiri₂-PA-na-bi
764.	(A28.8) gud gu₇ udu gu₇
765.	(A28.9) e₂ ki šukur₂-bi uz-ga eš₃ ĝa₂-ĝa₂
766.	(A28.10) ne-saĝ-bi
767.	(A28.11) kur ĝeštin biz-biz-ze₂
768.	(A28.12) e₂-lunga₃-bi-ta
769.	(A28.13) ^id₂idigna a-u₃-ba ĝal₂-la-am₃
770.	(A28.14) e₂ niĝ₂-gur₁₁-<ra>-bi-a za kug nagga
771.	(A28.15) e₂ ^ĝišgigir-ra-bi
772.	(A28.16) kur ki-a gub-ba
773.	(A28.17) a-ga balaĝ-a-bi gud gu₃ nun di
774.	(A28.18) kisal-bi šudu₃ kug si-im a₂-la₂
775.	(A28.19) kun na₄ e₂-a nu₂-a-bi
776.	(A28.20) ḫur-saĝ ul nun-ne₂-eš₂ nu₂-am₃
777.	(A28.21) kun an-na ur₃-še₃ da-a-bi
778.	(A28.22) nu₁₁ kur-še₃ igi sud il₂-dam
779.	(A28.23) ^ĝiškiri₆ gig₂ edin e₂-še₃ sig₉-ga-bi
780.	(A28.24) kur ĝeštin biz-biz-ze₂ ki ni₂ <me>-lem₄-e mu₂-am₃
781.	(A29.1) na 7 e₂-e dab₆-ba-bi
782.	(A29.2) niĝ₂ lugal-bi-da šag₄ kuš₂-kuš₂-dam
783.	(A29.3) e₂-ninda-ki-sig₁₀-bi
784.	(A29.4) niĝ₂ sikil abzu na de₅-ga-am₃
785.	(A29.5) šim na₄ e₂-a šu₄-ga-bi
786.	(A29.6) e₂ gudug kug a nu-silig₅-ge-dam
787.	(A29.7) bad₃-si an-na
788.	(A29.8) tum₁₂^mušen du₂-ru-na-bi
789.	(A29.9) eridug^ki nam ḪI A du₃-X-am₃
790.	(A29.10) e₂-ninnu tum₁₂^mušen-e ni₂ bi₂-ne
791.	(A29.11) an-dul₃ pa gal-gal ĝissu dug₃-ga-kam
792.	(A29.12) sim^mušen mušen-e šeg₁₂ mu-gi₄-gi₄
793.	(A29.13) e₂-kur ^den-lil₂-la₂ ezen ĝal₂-la-am₃
794.	(A29.14) e₂-a ni₂ gal-bi
795.	(A29.15) kalam-ma mu-ri
796.	(A29.16) ka tar-ra-bi
797.	(A29.17) kur-re ba-ti
798.	(A29.18) e₂-ninnu ni₂-bi kur-kur-ra tug₂-gin₇ im-dul₄
799.	(A30.1) e₂ lugal-bi ḫi-li-a i₃-du₃
800.	(A30.2) ^dnin-ĝiš-zid-da-ke₄
801.	(A30.3) ki gal-la bi₂-du₃
802.	(A30.4) gu₃-de₂-a ensi₂ lagaš^ki-ke₄
803.	(A30.5) temen-bi mu-sig₉
804.	(A30.6) e₂ ^dutu-gin₇ kalam-ma e₃-a
805.	(A30.7) gud gal-gin₇ saḫar bar-ra gub-ba
806.	(A30.8) i₃-ti giri₁₇-zal-gin₇
807.	(A30.9) unken-ne₂ si-a
808.	(A30.10) ḫur-saĝ sig₇-ga-gin₇
809.	(A30.11) ḫi-li guru₃-a
810.	(A30.12) u₆ di-de₃ gub-ba
811.	(A30.13) e₂-ninnu ki-bi gi₄-a-ba
812.	(A30.14) ^dnin-ĝir₂-su za₃-mi₂
813.	(A30.15) e₂ ^dnin-ĝir₂-su-ka du₃-a
814.	(A30.16) za₃-mi₂ mu-ru-bi-im
815.	(B1.1) e₂ dim gal kalam-ma
816.	(B1.2) an ki-da mu₂-a
817.	(B1.3) e₂-ninnu šeg₁₂ zid ^den-lil₂-e nam dug₃-ga tar-ra
818.	(B1.4) ḫur-saĝ nisig-ga u₆-e gub-ba
819.	(B1.5) kur-kur-ta e₃-a
820.	(B1.6) e₂ kur gal-am₃ an-ne₂ im-us₂
821.	(B1.7) ^dutu-am₃ an-šag₄-ge im-si
822.	(B1.8) e₂-ninnu anzud₂^mušen babbar₂-ra-am₃
823.	(B1.9) kur-ra dub₃ mi-ni-ib₂-bad
824.	(B1.10) uĝ₃ ba-ĝar-ĝar kalam ba-gub-gub
825.	(B1.11) ^da-nun-na u₆ di-de₃ im-ma-šu₄-šu₄-ge-eš₂
826.	(B1.12) ensi₂ kug-zu-am₃ inim zu-am₃
827.	(B1.13) nam-diĝir-re giri₁₇ ki im-mi-su₂-su₂
828.	(B1.14) sizkur₂ ra-zu-a niĝ₂-dun-a ki im-mi-us₂-us₂
829.	(B1.15) ensi₂-ke₄ diĝir iri-na-ke₄ ra₂-zu im-ma-be₂
830.	(B1.16) e₂ ninda gu₇-bi ninda ba-an-taḫ
831.	(B1.17) kiĝ₂-sig_x(SAR) udu dab₅-bi udu im-ma-a-taḫ
832.	(B1.18) bur ḫe₂-ĝal₂ an-šag₄ NE-ša-gin₇
833.	(B1.19) gaba-ba si bi₂-sa₂
834.	(B1.20) <^d>a-nun-na-ke₄-<ne>-er mu-ne-gub
835.	(B1.21) šudu₃ mu-ne-ša₄ ^da-nun-na-^da-nun-na u₆ di-de₃ ki lagaš^ki
836.	(B2.1) ^dlamma kur-kur-ra dug₄-ga-ne-ne a maḫ e₃-a
837.	(B2.2) lu₂ u₂ la₂ ba-ab-la₂-e
838.	(B2.3) šul zid lu₂ igi mu-ši-bar-ra-ne
839.	(B2.4) nam-til₃ mu-na-sud
840.	(B2.5) sipad-me e₂ mu-du₃ lugal-ĝu₁₀ e₂-a-na mi-ni-ku₄-ku₄
841.	(B2.6) <^d>a-nun-na bar-ĝu₁₀-a šudu₃ ḫe₂-mi-sa₄-za
842.	(B2.7) sipad zid gu₃-de₂-a
843.	(B2.8) gal mu-zu gal i₃-ga-tum₂-mu
844.	(B2.9) u₂-dug₄ sag₉-<ga>-ni igi-še₃ mu-na-ĝen
845.	(B2.10) ^dlamma sag₉-ga-ni eĝer-ni im-us₂
846.	(B2.11) lugal-ni e₂ ul e₂ libir ki-tuš-na-še₃
847.	(B2.12) gu₃-de₂-a en ^dnin-ĝir₂-su-ra
848.	(B2.13) niĝ₂-ba na-gu-ul-gu-ul
849.	(B2.14) en-ra e₂-ninnu-a mu-na-kur_x(DU)
850.	(B2.15) šudu₃ mu-na-ša₄
851.	(B2.16) lugal-ĝu₁₀ ^dnin-ĝir₂-su
852.	(B2.17) en a ḫuš gi₄-a
853.	(B2.18) en dug₄-ga-ni saĝ-biš e₃-a
854.	(B2.19) dumu-nitaḫ₂ ^den-lil₂-la₂ ur-saĝ ma-a-dug₄
855.	(B2.20) šu zid ma-ra-a-ĝar
856.	(B2.21) ^dnin-ĝir₂-su e₂-zu mu-ra-du₃
857.	(B2.22) ḫul₂-/la ḫa-ni\-ku₄-ku₄
858.	(B2.23) ^dba-u₂-ĝu₁₀ a₂-mi-zu ma-ra-ĝar
859.	(B3.1) ki-tuš dug₃-ga-ma-ni-ib₂
860.	(B3.2) gu₃ de₂-a-ni ĝiš ba-tuku-am₃
861.	(B3.3) ur-saĝ-e sizkur₂ ra₂-<zu>-ni
862.	(B3.4) gu₃-de₂-a-aš₂ en ^dnin-ĝir₂-su-ke₄ šu ba-ši-ti
863.	(B3.5) mu ĝen-na-am₃ itid til-la-am₃
864.	(B3.6) mu gibil an-na im-ma-gub
865.	(B3.7) itid e₂-ba ba-a-kur₉
866.	(B3.8) itid-bi ud 3-am₃ im-ta-zal
867.	(B3.9) ^dnin-ĝir₂-su eridug^ki-ta ĝen-am₃
868.	(B3.10) i₃-ti sa-sa im-e₃
869.	(B3.11) kalam-ma ud mu-ĝal₂ e₂-ninnu ^dsuen u₃-tud-da
870.	(B3.12) saĝ im-ma-da-ab-sa₂
871.	(B3.13) gu₃-de₂-a gug za-gin₃ mi-ni-uḫ
872.	(B3.14) ub-da im-mi-dug₄
873.	(B3.15) i₃-ḫe-nun-na ki ba-ni-sud
874.	(B3.16) MUŠ DA MA lu₂ kiĝ₂ ak-am₃
875.	(B3.17) e₂-ta ba-ta-e₃
876.	(B3.18) lal₃ i₃-nun ĝeštin ga še-a
877.	(B3.19) ĝiš-<ĝi₆>-par₄ ^ĝišpeš₃ niĝ₂-ĝen-na
878.	(B3.20) ga saĝ-ba dim₂-ma
879.	(B3.21) zu₂-lum ^ĝišan ĝeštin tur-tur
880.	(B3.22) niĝ₂ izi nu-tag-ga
881.	(B3.23) niĝ₂-gu₇ diĝir-re-ne-kam
882.	(B3.24) lal₃ i₃-nun-na kiĝ₂ ba-ni-ak
883.	(B3.25) ud diĝir zid-da du-da
884.	(B3.26) gu₃-de₂-a ud /ten\-ta
885.	(B3.27) kiĝ₂-sig_x(SAR)-ge bi₂-dib
886.	(B4.1) e₂-e ^dasar-ri šu si ba-sa₂
887.	(B4.2) ^dnin-ma-da-ke₄ na de₅ mi-ni-ĝar
888.	(B4.3) lugal ^den-ki-ke₄ eš-bar kiĝ₂ ba-an-šum₂
889.	(B4.4) ^dnin-dub išib maḫ eridug^ki-ga₁₄-ke₄
890.	(B4.5) na-izi ba-ni-sig₉
891.	(B4.6) nin ĝarza kal-la-ke₄ ^dnanše šir₃ kug dug₄ zu e₂-e ba-an-dug₄
892.	(B4.7) u₈ gig₂-ge umbin mi-ni-ib₂-kiĝ₂
893.	(B4.8) im-ma-al an-na-ke₄
894.	(B4.9) ubur si ba-ni-ib₂-sa₂
895.	(B4.10) ^ĝiššinig ^ĝišŠEG₉.AN u₃-tud-<da>-ta
896.	(B4.11) e₂-ninnu im-ta-sikil-e-ne
897.	(B4.12) im-ta-dadag-ge-eš₂
898.	(B4.13) ensi₂-ke₄ iri-a dub₃ bi₂-ĝar
899.	(B4.14) kalam-ma sig bi₂-ĝar
900.	(B4.15) du₆-du₆ mu-si-ig inim-ĝar mu-gi₄
901.	(B4.16) a-aḫ dug₄-ga ĝiri₂-ta ĝar-am₃
902.	(B4.17) iri-a ama lu₂ tur₅-ra-ke₄
903.	(B4.18) a silim ĝar-ra-am₃ maš-anše niĝ₂-zi-ĝal₂ edin-na
904.	(B4.19) teš₂-bi-še₃ gam-ma-am₃
905.	(B4.20) ur-maḫ piriĝ ušumgal edin-na-ka
906.	(B4.21) u₃ dub₃ ĝar-ra-am₃
907.	(B4.22) ud sizkur₂-re ĝi₆ šudu₃-de₃
908.	(B4.23) i₃-ti /niĝ₂\ ud-zal-la-ke₄
909.	(B4.24) lugal-bi mu-um-ĝe₂₆-e
910.	(B5.1) ur-saĝ ^dnin-ĝir₂-su e₂-a mi-NI-ku₄-ku₄
911.	(B5.2) e₂-a lugal-bi im-ma-ĝen
912.	(B5.3) ḫu-ri₂-in am-še₃ igi il₂-il₂-dam
913.	(B5.4) ur-saĝ e₂-a-na ku₄-ku₄-da-ni
914.	(B5.5) ud me₃-še₃ gu₃ ^ĝa₂ĝar-am₃
915.	(B5.6) ^dnin-ĝir₂-su e₂-na mu-ku_x(DU)-ku_x(DU)
916.	(B5.7) eš₃ abzu ezen ĝal₂-/la-am₃\
917.	(B5.8) lugal [e₂]-/ni\-ta nam-ta-ĝen
918.	(B5.9) ^dutu ki lagaš<^ki>-e e₃-am₃
919.	(B5.10) ^dba-u₂ a₂-mi-ni-še₃ du-a-ni
920.	(B5.11) munus zid e₂-a-ni-še₃ šu ĝa₂-ĝa₂-dam
921.	(B5.12) a₂-nu₂-da-ka-na kur₉-ra-ni
922.	(B5.13) ^id₂idigna a-u₃-ba ^ĝa₂ĝar-am₃
923.	(B5.14) da PI-na-ka tuš-a-ni
924.	(B5.15) nin dumu an kug-ga ^ĝiškiri₆ nisig-ga gurun il₂-la-am₃
925.	(B5.16) ud e₃-am₃ nam tar-ra-am₃
926.	(B5.17) ^dba-/u₂\ a₂(source: DA)-mi-na kur₉-ra-am₃
927.	(B5.18) ki lagaš^ki ḫe₂-ĝal₂-la-am₃
928.	(B5.19) ud im-zal ^dutu lagaš^ki-ke₄ kalam-ma saĝ mi-ni-il₂
929.	(B5.20) gud-i₃ udu-i₃ e₂-e bi₂-dab₅
930.	(B5.21) bur an-na mu-gub tin mu-ni-/de₂-de₂\
931.	(B5.22) ^da-nun-<na> ki lagaš(source: ŠIR.BUR)^ki en ^dnin-ĝir₂-su-da ki-bi mu-da-rin₂-ne₂-eš₂-am₃
932.	(B5.23) e₂-a nam-išib-ba šu mi-ni-du₇
933.	(B5.24) eš-bar kiĝ₂ mi₂ mi-ni-dug₄
934.	(B6.1) tin bur gal-la im-ma-de₂
935.	(B6.2) e₂-ninnu UL /GAL\ UL DU gu₂ im-ma-gur-re
936.	(B6.3) eš₃ ^dnin-dub-ke₄ šeg₁₂ mu-gi₄-gi₄
937.	(B6.4) ninda ud-da ga maš₂-lulim-ma
938.	(B6.5) ud ĝi₆-e de₆-a
939.	(B6.6) nir-ĝal₂ dumu ki aĝ₂ ^den-lil₂-la₂ ur-saĝ ^dnin-ĝir₂-su
940.	(B6.7) u₃-a mi-ni-zi-zi
941.	(B6.8) me gal-gal-la saĝ /mi-ni\-il₂-e
942.	(B6.9) AN /KA\ /mar\-za e₂-a SA-ni
943.	(B6.10) eš₃ e₂-ninnu ki-us₂ mu-ĝa₂-ĝa₂
944.	(B6.11) zid-du-e šu si sa₂-da
945.	(B6.12) erim₂-du-e gu₂ ĝiš ĝa₂-ĝa₂-da
946.	(B6.13) e₂ gen₆-ne₂-da e₂ dug₃-ge-da
947.	(B6.14) iri-ni eš₃ ĝir₂-su^ki na de₆ šum₂-mu-da
948.	(B6.15) ^ĝišgu-za nam tar-ra gub-da
949.	(B6.16) ĝidru ud su₃-ra₂ šu-a ĝa₂-ĝa₂-da
950.	(B6.17) sipad ^dnin-ĝir₂-su-ke₄ gu₃ de₂-a-ar
951.	(B6.18) men nisig-ga-gin₇ saĝ an-še₃ il₂-da
952.	(B6.19) kuš la₂ gada la₂ saĝ-a mur₁₀-a
953.	(B6.20) kisal e₂-ninnu-ka ki-gub pad₃-de₃-da
954.	(B6.21) ig gal dim ĝir₂-nun-na gal₅-la₂ gal ĝir₂-su^ki
955.	(B6.22) ^dig-alim dumu ki aĝ₂-ĝa₂-ni
956.	(B6.23) en ^dnin-ĝir₂-su-ra me-ni-da mu-na-da-dib-e
957.	(B6.24) e₂ sikil-e-da šu₄-luḫ ĝa₂-ĝa₂-da
958.	(B6.25) šu kug a en-ra šum₂-mu-da
959.	(B6.26) kaš bur-ra de₂-da tin dug-a de₂-da
960.	(B7.1) e₂-lunga₃ e₂ a₂ sikil-ba
961.	(B7.2) u₂-lu₅-ši-e a pap-sir₂-gin₇
962.	(B7.3) kun-ka₃-an za-a-da
963.	(B7.4) gud du₇ maš₂ du₇ udu niga
964.	(B7.5) ninda ud-da ga maš₂-lulim-ma
965.	(B7.6) ud ĝi₆-e de₆-a nir-ĝal₂ dumu ki aĝ₂
966.	(B7.7) ^den-lil₂-la₂ ur-saĝ ^dnin-ĝir₂-su
967.	(B7.8) gu₇-a naĝ-a X-bi u₃-a «MI» zi-zi-<da>
968.	(B7.9) en šu₄-luḫ dadag-ga dumu-saĝ e₂-ninnu
969.	(B7.10) ^dšul-šag₄-ga ^dnin-ĝir₂-su-ra
970.	(B7.11) me-ni-da mu-na-da-dib(source: LU)-e
971.	(B7.12) šita₂ saĝ 7 šu du₈-a-da
972.	(B7.13) e₂-en-kar₂ kan₄ me₃-ka ig-bi ĝal₂ da₁₃-da₁₃-<da>
973.	(B7.14) eme ĝiri₂ mi-tum ĝiš-a-ma-ru
974.	(B7.15) mar₆-ra-tum ĝiš-ḫur me₃-bi
975.	(B7.16) si sa₂-sa₂-a-da
976.	(B7.17) kur gu₂-erim₂-ĝal₂ ^den-lil₂-la₂-ka
977.	(B7.18) a-gin₇ ĝa₂-ĝa₂-da
978.	(B7.19) ur-saĝ ^ĝiššar₂-ur₃ me₃-a kur šu-še₃ ĝar-ĝar
979.	(B7.20) šagina gu₂-tuku e₂-ninnu
980.	(B7.21) ^mušensur₂-du₃ ki-bal-a
981.	(B7.22) ^dlugal-kur-dub₂ šagina-ni
982.	(B7.23) en ^dnin-ĝir₂-su-ra me-ni-da mu-na-da-dib-e
983.	(B7.24) mi-tum an-na-ke₄ ud /ḫuš\-gin₇
984.	(B8.1) kur-še₃ gu₃ ĝar-ra-a
985.	(B8.2) ^ĝiššar₂-ur₃ a-ma-ru me₃
986.	(B8.3) ĝiš-gaz ki-bal-a
987.	(B8.4) en-ne₂ ki-bal kur saĝ-ki-ni u₃-ma-da-gid₂-da
988.	(B8.5) gu₃ mi-ri₂-a-ni u₃-ma-ra
989.	(B8.6) lipiš-bi u₃-mu-ra₂
990.	(B8.7) en-na šagina 2-kam-ni
991.	(B8.8) kur-šu-na-buru₅^mušen-am₃
992.	(B8.9) dumu ^den-lil₂-la₂-ra me-ni-da mu-na-da-dib-e
993.	(B8.10) nam-šita ki lagaš^ki
994.	(B8.11) šu du₈-a-da
995.	(B8.12) sizkur₂ ra₂-zu-bi dug₃-ga ĝa₂-ĝa₂-da
996.	(B8.13) ur-saĝ eridug^ki-še₃ du-a-ni
997.	(B8.14) silim-ma dug₃ di-da
998.	(B8.15) ^dnin-ĝir₂-su eridug^ki-ta du-ni
999.	(B8.16) iri du₃-a ^ĝišgu-za-bi gen₆-na-<da>
1000.	(B8.17) nam-til₃ sipad zid
1001.	(B8.18) gu₃-de₂-a-da
1002.	(B8.19) giri₁₇ šu ĝal₂-la-da
1003.	(B8.20) ad gi₄-gi₄-ni
1004.	(B8.21) ^dlugal-si-sa₂ en ^dnin-ĝir₂-su-<ra>
1005.	(B8.22) me-ni-da mu-na-da-dib-e
1006.	(B8.23) tur dug₄-ga-da
1007.	(B8.24) maḫ dug₄-ga-da
1008.	(B8.25) inim si sa₂-e zu₂ keše₂ ak-da
1009.	(B8.26) erim₂ dug₄-/ga^?\ […] X […]-/da\
1010.	(B9.1) ur-saĝ barag kug-ga tuš-a-ra
1011.	(B9.2) ^dnin-ĝir₂-su-ra e₂-ninnu-a inim-bi ku₄-ku₄-da
1012.	(B9.3) ^dšakkan₂ šeg₉-bar sukkal e₂-dug₃-ga saĝ-an-ni
1013.	(B9.4) en ^dnin-ĝir₂-su-ra me-ni-da
1014.	(B9.5) mu-na-da-dib-e
1015.	(B9.6) a kug-ge-da naĝa sikil-e-da
1016.	(B9.7) i₃ bur babbar₂-ra naĝa E₂.NUN-na-da
1017.	(B9.8) ĝiš-nu₂ u₂ za-gin₃ ba-ra-ga-na
1018.	(B9.9) u₃ dug₃ ku₄-ku₄-da
1019.	(B9.10) e₂-nu₂ e₂-dug₃-ga-ni-a
1020.	(B9.11) bar-ra ku₄-ku₄-da
1021.	(B9.12) šag₄-ga nu-e₃-e₃-da
1022.	(B9.13) ^dkinda-zid lu₂ e₂-dug₃-ga-kam
1023.	(B9.14) en ^dnin-ĝir₂-su-ra me-ni-da mu-na-da-dib-e
1024.	(B9.15) ^ĝišgigir kug an mul-a erin₂-na-da
1025.	(B9.16) ^anšedur₉^ur₃-bi piriĝ-kaš₄-e-pad₃-da
1026.	(B9.17) anše-ba sig₁₀-ga-da
1027.	(B9.18) anše sig-a anše eridug^ki-ga₁₄
1028.	(B9.19) ^anšedur₉-da E₂ KA kur-kur kur₉ di-da
1029.	(B9.20) lugal-bi ^dnin-ĝir₂-su ḫul₂-la tum₂-mu-da
1030.	(B9.21) lu₂ ug-gin₇ šeg₁₂ gi₄-a
1031.	(B9.22) mar-uru₅-gin₇ zig₃-ga
1032.	(B9.23) maškim da-ga ^d/nin-ĝir₂\-su-ka
1033.	(B10.1) ^den-šeg₁₂-nun sipad anše-ka-ni
1034.	(B10.2) en ^dnin-ĝir₂-su-ra me-ni-da mu-na-da-dib-e
1035.	(B10.3) i₃ ḫi-a-da gara₂(source: BI) ḫi-a-da
1036.	(B10.4) ud₅ kug ud₅ ga naĝ maš₂-lulim
1037.	(B10.5) ama ^dnin-ĝir₂-su-ka
1038.	(B10.6) i₃ ga-bi eš₃ e₂-ninnu-a muš nu-tum₂-da
1039.	(B10.7) en-lulim sipad maš₂-lulim en ^dnin-ĝir₂-su-ra
1040.	(B10.8) me-ni-da mu-na-da-dib-e
1041.	(B10.9) ti-gi₄ niĝ₂ dug₃-ge si sa₂-a-da
1042.	(B10.10) kisal e₂-ninnu ḫul₂-a si-a-da
1043.	(B10.11) al-ĝar mi-ri₂-tum niĝ₂ e₂-dug₃-ga
1044.	(B10.12) ur-saĝ ĝeštug^tug₂-a-ra
1045.	(B10.13) ^dnin-ĝir₂-su-ra e₂-ninnu dug₃-bi ĝa₂-ĝa₂-da
1046.	(B10.14) nar ki aĝ₂-a-ni ušumgal kalam-ma
1047.	(B10.15) en ^dnin-ĝir₂-su-ra me-ni-da mu-na-da-dib-e
1048.	(B10.16) šag₄ ḫuĝ-ĝa₂-da bar ḫuĝ-ĝa₂-da
1049.	(B10.17) igi er₂ pad₃-da er₂ še_x(SIG)-da
1050.	(B10.18) šag₄ a-nir-ta a-nir be₄-da
1051.	(B10.19) en-na šag₄ ab-gin₇ zig₃-ga-ni
1052.	(B10.20) ^id₂buranuna^ki-gin₇ luḫ-ḫa-ni
1053.	(B10.21) a-ma-ru-gin₇ sa-ga dug₄-<ga>-ni
1054.	(B10.22) kur gu₂-erim₂-ĝal₂ ^den-lil₂-la₂-ka
1055.	(B10.23) a-gin₇ u₃-mi-/ĝar šag₄\ […] /gu₂-bi gi₄\-a-ni a sed₆^? su₃-da
1056.	(B11.1) balaĝ-ĝa₂-ni lugal-igi-ḫuš-am₃
1057.	(B11.2) en ^dnin-ĝir₂-su-ra me-ni-da mu-na-da-dib-e
1058.	(B11.3) lukur ki ig-ni ḫe₂-ĝal₂ lu₂ šar₂
1059.	(B11.4) ^dza-za-ru
1060.	(B11.5) ^diškur-pa-e₃
1061.	(B11.6) <^d>ur₂-agrun-ta-e₃-a
1062.	(B11.7) ^dḫe₂-ĝir₂-nun-na
1063.	(B11.8) ^dḫe₂-šag₄-ga
1064.	(B11.9) ^dzu₂-ur₂-ĝu₁₀
1065.	(B11.10) ^dza-ar-ĝu₁₀
1066.	(B11.11) dumu maš 7 ^dba-u₂-me
1067.	(B11.12) ban₃-da en ^dnin-ĝir₂-su-ka-me
1068.	(B11.13) nam-šita sag₉-ga gu₃-de₂-a-a-da
1069.	(B11.14) en ^dnin-ĝir₂-su-ra mu-na-da-šu₄-ge-eš₂
1070.	(B11.15) gana₂ gal-gal-e šu il₂-la-da
1071.	(B11.16) eg₂ pa₄ lagaš^ki-ke₄
1072.	(B11.17) gu₂-bi zig₃-ga-da
1073.	(B11.18) edin lugal-bi-ir tum₂
1074.	(B11.19) gu₂-edin-na-ka ^dezina₂-ku₃-su₃ pa sikil-e
1075.	(B11.20) absin₃-na saĝ an-še₃ il₂-še₃
1076.	(B11.21) gana₂ zid-bi gig ziz₂ gu₂-gu₂ um-de₆
1077.	(B11.22) guru₇-guru₇ maš ki lagaš^ki-ke₄
1078.	(B11.23) gu₂ gur-gur-ra-da
1079.	(B11.24) saĝ-tun₃ ^den-lil₂-la₂ engar gu₂-edin-na
1080.	(B11.25) ^dĝiš-bar-e₃ en ^dnin-ĝir₂-su-ra
1081.	(B11.26) me-ni-da mu-na-da-an-dib-be₂
1082.	(B12.1) ambar-bi ^ku₆ḪI.SUḪUR ^ku₆suḫur u₃-de₆
1083.	(B12.2) ĝiš-gi /nisig\-ga-bi gi ḫa-bu₃-ur₂ u₃-de₆
1084.	(B12.3) imin-šatam ra-/gaba\ gu₂-edin-na-ke₄
1085.	(B12.4) ^dnin-ĝir₂-su-ra e₂-ninnu-a inim-bi ku₄-ku₄-da
1086.	(B12.5) ^dlamma enkud-e gu₂-edin-na
1087.	(B12.6) en ^dnin-ĝir₂-su-ra me-ni-da mu-na-da-dib-e
1088.	(B12.7) edin ki dug₃-ge na de₅-ga-da
1089.	(B12.8) gu₂-edin-na edin dug₃-ge
1090.	(B12.9) na de₅ šum₂-ma-da
1091.	(B12.10) mušen-bi [rin₂]-rin₂-na-da
1092.	(B12.11) nunuz-bi e₂-DI-a ĝal₂-la-da
1093.	(B12.12) ama-bi buluĝ₃-e-da
1094.	(B12.13) du₈-du₈ maš-anše lu-a-ba
1095.	(B12.14) edin ki aĝ₂ ^dnin-ĝir₂-su-ka-ke₄
1096.	(B12.15) niĝ₂-kud nu-ak-da
1097.	(B12.16) ^ddim-gal-abzu niĝir gu₂-edin-na
1098.	(B12.17) en ^dnin-ĝir₂-su-ra me-ni-da
1099.	(B12.18) mu-na-da-dib-be₂
1100.	(B12.19) iri du₃-a-da ki-tuš ĝar-ra-da
1101.	(B12.20) bad₃ iri-kug-ga en-nu du₃-a-da
1102.	(B12.21) ^daga-us₂ dag-ga-na-bi
1103.	(B12.22) šita₂ saĝ maḫ ^ĝišerin babbar₂-ra
1104.	(B12.23) e₂-e dab₆-ba-da
1105.	(B12.24) ^dlugal-en-nu-iri-kug-ga-kam
1106.	(B12.25) en ^dnin-ĝir₂-su-ra me-ni-da mu-na-da-dib-e
1107.	(B12.26) an kug-ge zid-de₃-eš₂ mu-ĝar
1108.	(B13.1) ^den-lil₂-e saĝ-ba gur bi₂-dar
1109.	(B13.2) ^dnin-ḫur-saĝ-ke₄ igi zid ba-ši-bar
1110.	(B13.3) ^d/en-ki\ lugal eridug/^ki-ke₄\ temen-bi /mu\-sig₉
1111.	(B13.4) en zid šag₄ zalag-zalag-ga-ke₄
1112.	(B13.5) ^dsuen-e me-bi an ki-a im-mi-dirig-ga-am₃
1113.	(B13.6) ^dnin-ĝir₂-su-ke₄ eš₃ numun i-a šag₄-ge ba-ni-pad₃
1114.	(B13.7) ama ^dnanše šeg₁₂ ki lagaš^ki-ka
1115.	(B13.8) mi₂ zid ba-ni-in-dug₄
1116.	(B13.9) diĝir numun zid-zid-da-ke₄
1117.	(B13.10) e₂ /mu\-du₃ mu-/bi\ pa /bi₂-e₃\
1118.	(B13.11) aĝrig kalag-[ga] ^dnanše-/ke₄\
1119.	(B13.12) sipad /gu₂\-tuku ^dnin-ĝir₂-su-ka-ke₄
1120.	(B13.13) gal /mu\-zu gal i₃-/ga\-tum₂-/mu\
1121.	(B13.14) e₂-e lu₂ /e₂\ du₃-a-ke₄
1122.	(B13.15) gu₃-de₂-a ensi₂
1123.	(B13.16) lagaš^ki-ke₄
1124.	(B13.17) saĝ im-rig₇(source: PA.TUK.DU)-ge
1125.	(B13.18) ^ĝišgigir kur mu-gam su zig₃ guru₃ ni₂ gal u₅-a
1126.	(B13.19) ^anšedur₉^ur₃-bi ud-gu₃-dug₃-dug₃-ga
1127.	(B13.20) anše-ba sig₁₀-ga-da
1128.	(B13.21) šita₂ saĝ 7 tukul ḫuš me₃
1129.	(B13.22) tukul ub 2-e nu-il₂ ĝiš-gaz me₃
1130.	(B13.23) mi-tum tukul nir₃ saĝ piriĝ
1131.	(B14.1) kur-da gaba nu-gi₄
1132.	(B14.2) ^ĝišeme(source: KA×ĜIR₂) ĝiri₂ šu-nir 10 lal 1
1133.	(B14.3) a₂ nam-ur-saĝ-ĝa₂
1134.	(B14.4) ^ĝišpan tir meš₃-gin₇ gu₃ ĝar-ra-ni
1135.	(B14.5) ti sumur me₃-a nim-gin₇ ĝir₂-da-ni
1136.	(B14.6) e₂-mar-uru₅ ug piriĝ muš-ḫuš-še₃
1137.	(B14.7) eme ed₂-de₃-da-ni
1138.	(B14.8) a₂ me₃ me nam-lugal si-si-a-da
1139.	(B14.9) ensi₂ lu₂ e₂ du₃-a-ke₄
1140.	(B14.10) gu₃-de₂-a ensi₂
1141.	(B14.11) lagaš^ki-ke₄
1142.	(B14.12) saĝ im-mi-ib₂-rig₇-ge
1143.	(B14.13) /urud\ nagga lagab za-gin₃-na kug NE gug gi-rin me-luḫ-ḫa-da
1144.	(B14.14) ^urudšen maḫ ^uruduri maḫ
1145.	(B14.15) ^urudeš₂-da kug ^urudbur kug an-ne₂ tum₂
1146.	(B14.16) X IM X ḪU GA-ke₄
1147.	(B14.17) banšur kug an-na il₂-la-da
1148.	(B14.18) ki sa₂-[dug₄-ga] bi₂-[gub]
1149.	(B14.19) ^dnin-/ĝir₂\-[su]-ke₄ iri-ni
1150.	(B14.20) lagaš^ki-e /u₂^? X\ ki dug₃ ba-šum₂
1151.	(B14.21) e₂ ki-nu₂-a ki ni₂ te e₂-a-ba
1152.	(B14.22) nu₂ mu-ni-gub
1153.	(B14.23) kur-kur-re mušen-gin₇ sila-ba dumu ^den-lil₂-la₂-da
1154.	(B14.24) ni₂ mu-da-ab-ten-ten
1155.	(B14.25) id₂-de₃ a zal-le si-a-da
1156.	(B14.26) ambar-ra ḪI.SUḪUR^ku₆ suḫur^ku₆ ĝal₂-la-da
1157.	(B15.1) enkud ku₃-ĝal₂-bi zag-ba gub-ba-da
1158.	(B15.2) a gal-gal-e še si-si-a-<da>
1159.	(B15.3) guru₇-du₆ guru₇-maš ki lagaš^ki-ke₄
1160.	(B15.4) gu₂ gur-gur-ra-da
1161.	(B15.5) tur₃ du₃-a-da a-maš du₃-a-da
1162.	(B15.6) u₈ zid-da sila₄ /du₃-du₃\-a-da
1163.	(B15.7) udu-nitaḫ₂ u₈ zid-bi šu ba-ba-ra-da
1164.	(B15.8) ab₂ zid-da amar gub-gub-ba-da
1165.	(B15.9) šag₄-ba ^gudninda₂ gu₃ nun-bi di-da
1166.	(B15.10) gud-e šudul₂-la si sa₂-a-da
1167.	(B15.11) engar gud-ra-bi zag-ba gub-ba-da
1168.	(B15.12) anše niĝ₂-tug₂-bi il₂-a-da
1169.	(B15.13) a₂-dab₅ še si-bi eĝer-bi us₂-sa-/da\
1170.	(B15.14) dur₉-e ^urudḫa-X maḫ la₂-a-da
1171.	(B15.15) e₂-kin₂-kin₂ maḫ il₂-la-da
1172.	(B15.16) ĜA₂ DA ĜA₂ GADA+KID₂.DU₈ e₂ geme₂ tur ^d/nin-ĝir₂-su\-[ka]-/ke₄\
1173.	(B15.17) […] /A\-gin₇ […] a-a-da
1174.	(B15.18) […] /GI\ EN ĝar-e si /sa₂\-a-da
1175.	(B15.19) kisal e₂(source: SA)-ninnu-/ke₄\ ḫul₂-la si-a-da
1176.	(B15.20) si-im-da a₂-la₂ balaĝ nam-nar šu du₇-a
1177.	(B15.21) balaĝ ki aĝ₂-ni ušumgal kalam-ma
1178.	(B15.22) saĝ-ba ĝen-na-da
1179.	(B15.23) ensi₂ e₂-ninnu mu-du₃-a
1180.	(B16.1) gu₃-de₂-a en ^dnin-ĝir₂-su-ra
1181.	(B16.2) mu-na-da-ku₄-ku₄ (source uses REC 144 here; everywhere else it uses REC 56)
1182.	(B16.3) /e₂\-e me gal-la /saĝ\ mi-ni-ib₂-il₂
1183.	(B16.4) ni₂ me-lem₄-ma šu mi-ni-ib₂-du₇
1184.	(B16.5) ma₂-gur₈-gin₇ sumur₃^? im-[X]
1185.	(B16.6) dim₂-sa-bi im-ak
1186.	(B16.7) lugal-bi barag ĝir₂-nun-na-ka
1187.	(B16.8) ur-saĝ ^dnin-ĝir₂-su ud-de₃-eš₂ im-e₃
1188.	(B16.9) ^ĝišPU₂ niĝ₂ il₂-la du₂-ru-na-bi
1189.	(B16.10) an sig₇-ga su₂-lim il₂-la-am₃
1190.	(B16.11) šu-nir-bi saĝ-šu₄-ga-bi
1191.	(B16.12) ^dnin-ĝir₂-su <su> zig₃ mu-guru₃-am₃
1192.	(B16.13) kuš la₂ igi-bi-še₃ si sa₂-a-bi
1193.	(B16.14) muš-gu₃ sig₇-ga a tu₁₇-a-am₃
1194.	(B16.15) ^ĝišgigir za-gin₃ ul il₂-a-na
1195.	(B16.16) lugal-bi ur-saĝ ^dnin-ĝir₂-su /^d\utu-am₃ mu-gub
1196.	(B16.17) gu-za gu₂-en-na gub-ba-bi
1197.	(B16.18) e₂ kug an-na ul-la du₂-ru-na-am₃
1198.	(B16.19) nu₂-bi ki-nu₂-a gub-ba-bi
1199.	(B16.20) šilam_x(TUR₃) ki-nu₂-ba dub₃ ĝar-ra-am₃
1200.	(B17.1) bar kug u₂ za-gin₃ ba-ra-ga-ba
1201.	(B17.2) ama ^dba-u₂ en ^dnin-ĝir₂-su-da
1202.	(B17.3) ki-nu₂ mu-da-ab-dug₃-ge
1203.	(B17.4) zabar gal-gal-e teš₂ mu-gu₇-e
1204.	(B17.5) e₂ zid-da /zag\-da /zabar\ kug-ge ne-/saĝ\
1205.	(B17.6) mi-ni-ib₂-šeĝ₆-šeĝ₆
1206.	(B17.7) bur kug unu₆ gal-la šu₄-ga-bi
1207.	(B17.8) buniĝ(SUG) maḫ ban₃-da a nu-silig₅-ge-dam
1208.	(B17.9) eš₂-da-bi da-ba gub-ba-bi
1209.	(B17.10) ^id₂idigna ^id₂buranuna^ki-bi-da
1210.	(B17.11) ḫe₂-ĝal₂ tum₂-tum₂-am₃
1211.	(B17.12) niĝ₂-du₇ iri-na-ke₄ pa bi₂-e₃
1212.	(B17.13) gu₃-de₂-a e₂-ninnu mu-du₃
1213.	(B17.14) me-bi šu bi₂-du₇
1214.	(B17.15) e₂-i₃-gara₂-ba i₃ gara₂ i₃-kur₉
1215.	(B17.16) e₂ kug AN.KA-ba ninda mu-ni-ĝar-ĝar
1216.	(B17.17) ur₅ mu-du₈ šu-šu mu-luḫ(source: ĜAR)
1217.	(B17.18) ud lugal-ni e₂-a kur₉-ra
1218.	(B17.19) ud 7(IMIN)-ne-eš₂
1219.	(B17.20) geme₂ nin-a-ni mu-da-sa₂-am₃
1220.	(B17.21) arad₂-de₃ lugal-e zag mu-da-gub-am₃
1221.	(B18.1) iri-na u₂-si₁₉-ni zag-bi-a mu-da-a-nu₂-am₃
1222.	(B18.2) eme niĝ₂-ḫul-da inim ba-da-kur₂
1223.	(B18.3) niĝ₂-erim₂ e₂-ba im-ma-an-/gi₄\
1224.	(B18.4) niĝ₂-/gen₆\-[na] ^d[nanše] ^d/nin\-[ĝir₂-su]-/ka\-[še₃]
1225.	(B18.5) en₃ [im]-/ma\-[ši-tar ]
1226.	(B18.6) nu-/siki\ [lu₂ niĝ₂-tuku] nu-/mu\-[na-ĝar]
1227.	(B18.7) nu-/mu\-[su] lu₂ [a₂-tuku] nu-na-[ĝar]
1228.	(B18.8) e₂ /ibila\ nu-[tuku]
1229.	(B18.9) dumu-/munus\-[bi i₃-bi]-lu-[ba mi-ni-kur₉]
1230.	(B18.10) ud niĝ₂-si-[sa₂] mu-na-/ta-e₃\
1231.	(B18.11) niĝ₂-erim₂ i₃-^dutu gu₂-bi ĝiri₃ bi₂-us₂
1232.	(B18.12) iri-e ^dutu-gin₇
1233.	(B18.13) ki-ša-ra im-ma-ta-a-e₃
1234.	(B18.14) saĝ-ĝa₂-ni-a gur im-mi-dar
1235.	(B18.15) igi an kug-ga-ke₄
1236.	(B18.16) ne-te-ni bi₂-zu
1237.	(B18.17) gud-gin₇ saĝ il₂-la mu-ku₄-ku₄
1238.	(B18.18) eš₃ e₂-ninnu-a
1239.	(B18.19) gud du₇ maš₂ du₇-e ĝiš bi₂-tag
1240.	(B18.20) bur an-na mu-gub
1241.	(B18.21) ten mu-ni-de₂-de₂
1242.	(B18.22) ušumgal kalam-ma ti-gi₄-a mu-gub
1243.	(B19.1) a₂-la₂ ud-dam šeg₁₂ mu-na-ab-gi₄
1244.	(B19.2) ensi₂ zag-e₃-a
1245.	(B19.3) nam-mi-gub
1246.	(B19.4) iri-ni u₆ mu-e
1247.	(B19.5) gu₃-de₂-a […]
	6 lines missing
1254.	(B19.12) [… ḫe₂]-ĝal₂ [mu-na]-/ta\-[e₃]
1255.	(B19.13) ki še gu-[nu] mu-na-mu₂-mu₂
1256.	(B19.14) ensi₂-da lagaš^ki-e ḫe₂-ĝal₂-la
1257.	(B19.15) šu mu-da-peš-e
1258.	(B19.16) ur-saĝ e₂ gibil-na kur₉-ra-am₃
1259.	(B19.17) en ^dnin-ĝir₂-su-ra ĝišbun dug₃ mu-na-ni-ib₂-ĝal₂
1260.	(B19.18) an zag gal-la mu-na-tuš
1261.	(B19.19) an-ra ^den-lil₂ im-ma-ni-us₂
1262.	(B19.20) ^den-lil₂-ra
1263.	(B19.21) ^dnin-maḫ mu-ni-us₂
	12 lines missing
1276.	(B20.13) […] /SUD\ […]
1277.	(B20.14) e₂-/da\ lugal /im\-da-/ḫul₂\
1278.	(B20.15) šeg₁₂ ninnu-ka /nam\ im-[mi-ib₂]-tar-re
1279.	(B20.16) /šeg₁₂\ [e₂-ninnu]
1280.	(B20.17) nam dug₃ ḫe₂-tar
1281.	(B20.18) šeg₁₂ e₂-ninnu nam ḫe₂-tar
1282.	(B20.19) nam dug₃ ḫe₂-tar
1283.	(B20.20) e₂ kur an-ne₂ ki ĝar-ra
1284.	(B20.21) me gal-la du₃-a
	16 lines missing
1301.	(B21.17) /šeg₁₂ e₂\-[ninnu]-ka nam i₃-mi-ib₂-tar-re
1302.	(B21.18) šeg₁₂ nam ḫe₂-tar
1303.	(B21.19) šeg₁₂ e₂-ninnu nam dug₃ ḫe₂-tar
1304.	(B21.20) e₂ IM ne-mur šub ki^! us₂-[sa] an gu₂ la₂-a
1305.	(B22.1) […] kug […] E […]
	14 lines missing
1320.	(B22.16) […]-/a^?\
1321.	(B22.17) […] mu-zu-še₃ tur₃ ḫe₂-em-ši-du₃-du₃
1322.	(B22.18) a-maš ḫe₂-em-ši-gibil₄-gibil₄
1323.	(B22.19) uĝ₃ u₂-sal-la ḫe₂-ĝal₂-<la ḫa-mu-da>-nu₂
1324.	(B22.20) ki-en-gi-re₆ kur-kur-<re> igi-bi ḫa-mu-ši-ĝal₂
1325.	(B23.1) e₂ anzud₂^mušen-zu an-ne₂ ḫa-ra-[ab]-/il₂\
	11 lines missing
1337.	(B23.13) […] X […] /GA\ […] me
1338.	(B23.14) […] /NINA\ [X] du₃-a
1339.	(B23.15) […] du₃ […] /PA^?\
1340.	(B23.16) [^d]/gilgameš₂\-da mu₂-a
1341.	(B23.17) ^ĝišgu-za gub-ba-bi lu₂ nu-kur₂-e
1342.	(B23.18) diĝir-zu en ^dnin-ĝiš-zid-da dumu-KA an-na-kam
1343.	(B23.19) diĝir-ama-zu ^dnin-sumun₂-na ama gan numun zid-da
1344.	(B23.20) numun-e ki aĝ₂-ĝa₂-am₃
1345.	(B23.21) ab₂ zid-de₃ dumu(source: MUNUS) ba-tud-da-me
1346.	(B23.22) meš₃ zid ki lagaš^ki-[a] e₃-a
1347.	(B24.1) ^dnin-ĝir₂-su-ka-me
1348.	(B24.2) sig-ta nim-še₃ /mu\-zu ḫe₂-ĝal₂
1349.	(B24.3) gu₃-de₂-a [dug₄]-ga-za
1350.	(B24.4) [X] BI TUG₂ /lu₂\ na-DU
1351.	(B24.5) […] X KA ĝuruš [X] an-ne₂ zu-me
1352.	(B24.6) /ensi₂ zid\ e₂-e nam [dug₃] tar-ra-me
1353.	(B24.7) /gu₃\-de₂-a /dumu\ ^dnin-ĝiš-zid-da-ka
1354.	(B24.8) /nam\-til₃ /ḫa\-mu-ra-sud
1355.	(B24.9) /e₂\ kur gal-gin₇ an-ne₂ us₂-sa
1356.	(B24.10) ni₂ me-lem₄-bi kalam-ma ru-a
1357.	(B24.11) an-ne₂ ^den-lil₂-e nam lagaš^ki tar-ra
1358.	(B24.12) ^dnin-ĝir₂-su-ka nam-nir-ĝal₂-ni
1359.	(B24.13) kur-kur-re zu-a
1360.	(B24.14) e₂-ninnu an ki-da mu₂-a
1361.	(B24.15) ^dnin-ĝir₂-su za₃-mi₂
1362.	(B24.16) /e₂\ ^dnin-ĝir₂-su-/ka\ du₃-a
1363.	(B24.17) za₃-mi₂ eĝer-bi

Print sources

Edzard 1997, p. 68-101: translation, commentary, composite text

Falkenstein 1953, p. 137-182: translation

Hurowitz 1992, p. 33-57: commentary

Jacobsen 1987, p. 386-444: translation, commentary

Suter 1997: commentary, translation, score transliteration (A 20.24-21.12)

Suter 2000: commentary

Zólyomi 1999: commentary

Electronic sources

Krecher 1995a: composite text, translation

Krecher 1995b: composite text, translation

Krecher 1996: composite text

Cuneiform sources

Cylinder A (TCL 8)

Cylinder B (TCL 8)

Revision history

01.iii.1998-07.iv.1998: GZ, editor: standardisation
13.iv.1998-14.iv.1998: JAB, editor: proofreading
19.viii.2000: GC, editor: proofreading
12.x.2000: GZ, editor: SGML tagging
11.vii.1998: GZ, editor: web publication
12.vii.1998: GZ, editor: tagging revised
15.vii.1998: GZ, editor: tagging revised
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published