The Electronic Text Corpus of Sumerian Literature

ETCSLtransliteration : c.2.6.9.2

A hymn to Ḫaia for Rīm-Sîn (Rīm-Sîn B)

1.	en ĝeštug₂ maḫ šu du₇ sa₂ gal-e pad₃-da
2.	^dḫa-ia₃ dub gal-gal ḫa-ḫa-za ĝeštug₂-ĝeštug₂-ga peš-peš
3.	šid-du₃ ḫal-an-kug igi zag til galam-ma-ke₄ e₂-ĜEŠTUG₂.^dNISABA-ke₄
4.	pisaĝ-dub-ba e₂-gal an ki-a kiĝ₂ kilib-ba šid-šid
5.	gi kug-ga šu ĝal₂-le im nam-tar gal-gal mul-mul
6.	gal-an-zu inim ĝeštug₂ de₅-ge ud-bi-še₃ an kug-ga-ra
7.	kišib-ĝal₂ a-a ^den-lil₂-la₂-ke₄ lu₂ tam-ma e₃ erim₃ e₂-kur-ra
8.	ḫe₂-du₇ eš₃-e abzu-a siki bar-ra la₂-la₂ en ^dnu-dim₂-mud-ra
9.	^dḫa-ia₃ šag₄-gada-la₂ e₂-u₆-nir-ra uz-ga kug lu-lu
10.	umun₂ ak-ak eš₃ e₂-kiš-nu-ĝal₂-la₂-ke₄ mu maḫ-bi gal-la
11.	šag₄ inim-ĝal₂ ki-sikil ^dnin-gal-e unu₇ gal-e til₃-la
12.	muš₃-me sag₉ nitalam₂ ki aĝ₂ ^dnun-bar-še-gu-nu
13.	lu₂ mu maḫ mussa kur gal a-a ^den-lil₂-la₂-kam
14.	saĝĝa ban₃-da igi-ĝal₂-tuku pad₃-da an ki-bi-da-ke₄
15.	gu₂-un diĝir-re-[e-ne] šu gid₂-i ma-dam kur ab su₃-ud-da inim-ma-ni bur₂-e
16.	gal-zu me maḫ /nam-nun-na\-ka u₅ tur₃^? zag keše₂-da
17.	šag₄ daĝal sur-ra ĝiš-ḫur kug-ga e₂ eridug^ki-ga-ke₄ šu dab-be₂
18.	^dḫa-ia₃ lu₂ šu-luḫ sikil-la engur-ra-ke₄ tug₂-ba₁₃ tug₂ la₂-la₂
19.	^dindagara saĝĝa₇(GA.DUB₂) utaḫ-ḫe₂ kur-ta ka du₈-u₃ diĝir-re-e-ne-ke₄
20.	šag₄ dub-ba su₃-ud-da zu-a galam ak-ak diĝir gal-gal-e-ne
21.	šu-nir-nir ^ĝišgag-a du₃-du₃ saĝ sig₉-ga ki galam ḫur kalam-ma
22.	ki šu tag-tag unu₇ sig₇-ga an-šar₂ kur gal-ra
23.	saĝ il₂ maḫ eš₃-e abzu-ta dug₄-ga-ni še-ga
24.	lu₂ saĝ keše₂ ninda babbar sikil-la šu dab-be₂ e₂ diĝir-re-e-ne
25.	^dku₃-su₃ ^dindagara e-ne-ne-da nu an nu-sikil-la ki nu-dadag-ge
26.	u₂ gal-gal sud-sud an ^den-lil₂-la₂ unu₇ maḫ-ne-ne-ke₄
27.	lu₂ muš₃ kug-ga igi du₈ en ^dnu-dim₂-mud-e
28.	zabar kug-ga šu ĝal₂-le šag₄ ḫul₂-ḫul₂ bar sig₁₀-sig₁₀-ge₅
29.	lugal-ĝu₁₀ nam-maḫ-zu šir₃-ra ga-am₃-i-i
30.	^dḫa-ia₃ nam-gal-zu gi₁₆-sa-še₃ ga-am₃-pad₃-pad₃-de₃-en
31.	a-ba za-a-gin₇ diĝir-re-e-ne-ke₄ me kug-ga-aš tum₂-ma
32.	nitalam ki aĝ₂-zu ki-sikil ^dnisaba nin gal nin-e-ne
33.	u₃-tud-da šag₄-ga-ni ^dnin-lil₂-la₂ dam maḫ ^dnu-nam-nir-ra
34.	barag e₂-kur-ra-ke₄ saĝ il₂-la an-še₃ ši-in-da-til₃
35.	nam-nin diĝir-re-e-ne-ke₄ me-er-ga-bi al-ak-e diĝir zag ša₄ nu-tuku
36.	za-e ninda₂ gal ĝalga zid pad₃-da en₃ tar-tar diĝir-re-e-ne-ke₄
37.	^dḫa-ia₃ me šum₂-šum₂-mu kiĝ₂ aĝ₂-e ki-šu-peš igi zu-zu-me-en
38.	^den-ki-ke₄ eš₃-e abzu-ta mu₇-mu₇ nam-til₃-la-ni mu-ra-rig₇
39.	en ĝi₆-par₃-e mu-ni-ib-ḫuĝ-en saĝ sig₁₀ mu-ni-ib-ĝar-re-en
40.	sipad kalam-ma-ra ĝidru maḫ ud su₃-ra₂ šu-ni-še₃ bi₂-ib-dab₅-e-en
41.	^dḫa-ia₃ diĝir kalam-ma a-ra-zu uĝ₃ šar₂-ra ĝiš tuku-me-en
42.	za-e diĝir gal-gal-e-ne uĝ₃ daĝal-la šu-ni-še₃ bi₂-ib-dab₅-e-en
43.	a-a ^den-ki abzu-ta ed₂-da-ni-ta
44.	^dḫa-ia₃ nam-gal-bi za-e ša-mu-re-da-an-aĝ₂
45.	uĝ₃ šag₄-ba i₃-ni-me-a-ke₄ gu₂-bi an-še₃ ši-bi₂-ib₂-zi-zi
46.	nam-lu₂-ulu₃-bi ud asil-la₂ mi-ni-ib-zal-zal-le-ne
47.	uĝ₃ šar₂-ra-bi šag₄ ḫul₂-la ud ul-le₂-a-aš bi₂-ib-ak-e-en
48.	e₂ diĝir gal-gal-e-ne ezen ab-ĝar-re-en giri₁₇-zal ši-bi₂-du₈-du₈-un
49.	saĝ-kal saĝ-kal-e diĝir-re-e-ne-ke₄ ĝiš-šub gal-gal uĝ₃ til-la-ni
50.	igi sag₉-ga-zu nam-til₃ si-a lugal-ra igi zid bar-mu-un-ši-ib
51.	nun ^dri-im-^dsuen bal ḫul₂-ḫul₂ ud su₃-ud-da šu zid ĝar-mu-na-ab
52.	im nam-til₃-la-ke₄ du-ri₂-še₃ nu-kur₂-ru mu-bi gub-i₃
53.	sipad ^dri-im-^dsuen nam-en-bi an ^den-lil₂-la₂ ki ḫe₂-aĝ₂-e-ne
54.	lu₂ šir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
55.	^dḫa-ia₃ lu₂ šir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
56.	en an ki lugal abzu-a za₃-mi₂-bi maḫ-a
57.	a-a ^den-ki lugal abzu-a za₃-mi₂-zu dug₃-ga
58.	u₁₈-ru₁₂-bi-im

59.	^dḫa-ia₃ diĝir kalam-ma ga-til₃-e ki aĝ₂ nun ^dri-im-^dsuen-e a₂ bad tal₂-ni ḫe₂-me-en
60.	ĝiš-gi-ĝal₂-bi-im

Print sources

Charpin 1986, p. 344-357: translation, commentary, composite text

Kramer 1977, p. 44-47: translation, handcopy

Steible 1967: score transliteration, translation, commentary

Electronic sources

Krecher 1996: composite text

Krecher 1996b: composite text, translation

Tinney 1998www: composite text

Cuneiform sources

U 7730 (UET 6 101; composite copy with U 7738)

U 7738 (UET 6 101; composite copy with U 7730)

Revision history

04.vi.1999-07.vii.1999: JAB, editor: standardisation
28.vii.1999: GZ, editor: proofreading
30.vii.1999: GZ, editor: SGML tagging
27.viii.1999: ER, editor: proofreading SGML
27.viii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published