The Electronic Text Corpus of Sumerian Literature

ETCSLtransliteration : c.2.6.9.7

A prayer to Nanna for Rīm-Sîn (Rīm-Sîn G)

1.	nidba kug-ga si sa₂-zu
2.	šu kug-zu sizkur₂ kug sikil-e ma-ra-tag-ga-zu
3.	ĝiš tag-ga šu tag-tag-ga-zu
4.	šag₄-ge dug₄-ga eme ĝar-ra-zu
5.	giri₁₇ šu ĝal₂-la-zu šu kug il₂-la-zu
6.	^dnanna lugal an ki en ^dlamma sag₉-ga-zu ḫe₂-me-še-še
7.	^dnin-gal nin maḫ nin ĝiškim sag₉-ga-zu ḫe₂-me-še-še
8.	lugal šag₄-ĝar du₈-du₈ ^dnanna ^dnin-gal-bi diĝir gal-gal-e-ne-ke₄
9.	^dri-im-^dsuen lugal e₂ diĝir-re-e-ne-ke₄
10.	ḫe₂-ĝal₂ ma-ra-si-si
11.	lugal mu pad₃-da ^den-lil₂-le nam bal-a-ni nam-ḫe₂
12.	ud ḫe₂-ĝal₂-la mu giri₁₇-zal-la
13.	nam nam-gub nam ḫe₂-ĝal₂-la nam-zu-še₃ ḫe₂-bi₃-ši-ĝal₂
14.	lugal ud ĝi₆-a ĝi₆ u₃-na ḫe₂-ĝal₂ nu-til-le-de₃
15.	ud ma-ra-ab-za-al ma-ra-<ab-dug₃>-ga ma-ra-ab-gen₆-ne₂
16.	lugal nidba-zu saĝ-bi šag₄ abzu-a du₃-du₃-ra-a ma-ra-du₃-du₃-ra
17.	lugal nidba-zu eĝer-bi kisal maḫ-a <du₃-du₃-ra-a ma-ra-du₃-du₃-ra>
18.	ḫe₂-ĝal₂ nu-til-le-de₃
19.	lugal su e₂-a ma-ra-si-sa₂
20.	^dri-im-^dsuen lugal urim₅^ki-ma me maḫ ki-ur₃-ra
21.	ki-bi šu bi₂-in-gi
22.	^dnanna lugal an ki-ke₄ aga zid maḫ nam-lugal-la šu du₇
23.	saĝ-za ḫe₂-ni-ib-gen₆-ne₂
24.	^dnin-gal nin maḫ šag₄-ĝar du₈-du₈-zu
25.	šag₄ še-ga-ni-ta ud-bi-še₃ nam-til₃ dug₃
26.	zi-zu ḫe₂-eb-«UD»-dug₃
27.	šu kug-ga-ni-ta me-lem₄ gal nam-lugal-la dab₅
28.	[^ĝiš]ĝidru maḫ an ki-a šu-zu-še₃ tug₂-ba₁₃-gin₇ ḫe₂-/dib\
29.	^dri-im-^dsuen lugal ki-ur₃-ra ḫe₂-ĝal₂ du₈-[du₈]
30.	saĝ us₂ nu-til₃-le-[de₃]
31.	lugal ^id₂idigna [ḫe₂-ĝal₂]-la ḫu-mu-ra-ab-[tum₃]
32.	^id₂nun NIM-na šag₄ si-ni-ta a zal-le ḫu-mu-/ra-si\
33.	^id₂nun ^id₂nun zid id₂ zi-ĝal₂ /kalam\-[ma]
34.	ku₆ mušen ḫu-mu-ra-ab-tum₃
35.	a-ab-ba ab su-su-da-ta kun al-gub-ba-[a]-ta
36.	u₃-tud nu-til-le-da <nam>-lugal-zu-še₃ ḫu-mu-ra-ab-tum₃
37.	edin daĝal ki daĝal-ba niĝ₂-ur₂-4 niĝ₂-zi-ĝal₂ SU RA-RA GA AL
38.	eg₂ pa₅ pa₄-ugur₂-e šu ḫu-mu-<ra>-ab-il₂-la
39.	nam-til₃ ḫa-ra-ĝa₂-ĝa₂
40.	šudu₃ inim-ĝar niĝ₂ sag₉-ga ḫa-ra-ĝa₂-ĝa₂
41.	šag₄ ḫul₂-la ḫa-ra-ĝa₂-ĝa₂
42.	ĝiškim sag₉-sag₉-ga ḫa-ra-ĝa₂-ĝa₂
43.	šag₄-zu ḫa-ra-dug₃
44.	su-zu ḫa-ra-dug₃
45.	bar-zu ĝiškim gen₆-na-a-zu ḫa-ra-dug₃
46.	šag₄ ^dnanna ^dnin-gal-bi ĝiškim sag₉-sag₉-ga
47.	nam nam-til₃-la da-ri₂-še₃ ḫe₂-me-kar₂-kar₂
48.	^dri-im-^dsuen lugal me-te-ĝal₂ ḫe₂-ĝal₂ šu du₈-du₈ diĝir gal-gal-e-ne-ke₄
49.	ma-da ḫe₂-en-na-gen₆ suḫuš ma-da ḫe₂-en-na-ge-en
50.	^dnanna lugal an ki-ke₄ gu₃ kalam-ma teš₂ ḫu-mu-ra-ab-sig₁₀-ge
51.	^dri-im-^dsuen lugal-ĝu₁₀

Print sources

Charpin 1986, p. 295-301: score transliteration, translation, commentary

Steible 1975, p. 87-118: score transliteration, translation, commentary

Electronic sources

Krecher 1996: composite text

Krecher 1996a: composite text, translation

Tinney 1998bbbb: composite text

Cuneiform sources

U 7760 (UET 6 106)

Revision history

04.vi.1999-27.vi.1999: JAB, editor: standardisation
28.vii.1999: GZ, editor: proofreading
06.viii.1999: GZ, editor: SGML tagging
10.ix.1999: ER, editor: proofreading SGML
10.ix.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published