The Electronic Text Corpus of Sumerian Literature

ETCSLtransliteration : c.4.13.05

A hymn to Nanna (Nanna E)

1.	dumu nun-e AB×A kug-ta /e₃\-a ba-zal-zal si i₃-[…]
2.	kur me sikil eš₃ abzu šag₄ X X daĝal kur /me^?\ […]
3.	ki-ur₃ maḫ /dur₂^?\ [X X] /daĝal^?\-la […]
4.	ambar-ta me-/lem₄ ḫuš tum₃ muš₃ ni₂\ [X X]-ge-en
5.	nam-dug₃-zu-še₃ nam-gal nam-maḫ-zu-še₃ saĝ im-/ma\-il₂-la₂
6.	nam tar-re-de₃-eš a₂ maḫ mi-ni-in-sud₄-un
7.	nam-lugal an ki-zu an gal-e šu daĝal mu-ri-in-dug₄
8.	nam-dumu nun gal-zu ^den-lil₂-le nam-men^! šu mi-ri-in-du₇
9.	nam-diĝir maḫ ^den-lil₂ pa e₃ ma-ra-ni-in-e₃
10.	a DU-a a sig maḫ-zu-še₃ nam tar-re ki dug₃ ama dug₃
11.	^den-ki AB×A-šag₄ kug-ta ĝiri₃-zu-še₃ im-mi-in-ĝar
12.	^den-lil₂ nam-maḫ nam-en-na mi-ni-in-tud-de₃-en
13.	^dnanna ud-sakar-zu ud-sakar 7-bi mu pad₃-da
14.	^den-lil₂ an ki-ka mu-zu mu kug-ga mu mi-ri-in-pad₃
15.	dumu nun-e nam-gal-zu an ki-a pa e₃ im-mi-in-e₃
16.	unken maḫ nam ^den-lil₂-la₂-na saĝ-e-eš mu-ra-an-rig₇
17.	^den-ki-ke₄ ki eš₃ eridug^ki-ta nam-men^! nam-maḫ-zu mu-ri-in-tar
18.	abzu maḫ ki eš₃ eridug^ki-ta nam-en gal-zu-še₃
19.	lugal an ki-ke₄ /an^? ki^?\ gun₃-a nam-gal-zu-še₃ ba-an-dug₄
20.	^dnanna saĝ-zu il₂ ^da-nun-na-ke₄-ne-er ḫa-la ba-an-pad₃
21.	me sikil šag₄ ḫul₂-la-ka-ne-ne /ki\-tuš /kug\ im-mi-ni-in-tuš-un
22.	diĝir gal-gal-e-ne nidba-eš /gal\ [ba]-an-pad₃
23.	zag gu-la₂ šag₄ ḫi-li maḫ si-a /im^?\-[mi-ni]-in-durun-uš
24.	diĝir-re-e-ne sizkur₂ šag₄ ḫul₂-la-/ne^?\-[ne im]-/mi\-ni-in-šum₂-šum₂
25.	ki maḫ ki kug-ga mi-ni-/in\-[tuš]-un
26.	^dnanna ki kug-ga ki-tuš kug mi-ni-in-[tuš]-/un\
27.	^den-ki-ke₄ ki-tuš ma-ra-ab-/sikil-e ki-tuš^? ma^?-ra^?\-ab-šen-e
28.	an mu-ra-ab-kug-ge ki mu-/ra-ab\-[šen-e]
29.	e₂-kiš-nu-ĝal₂ e₂ tir ^ĝišerin-na an-/še₃ si ma-ra\-an-sa₂
30.	dur₂ maḫ-zu ki kug-ga ma-ra-ab-ak ur₂ niĝ₂ an ki-a
31.	/ĝiš\-ḫur šu-luḫ maḫ-zu si ma-ra-/an\-sa₂-e
32.	[…] /gir₄^?\ X-zu banšur ki kug-ga ma-ra-ab-šen
33.	[…] kiĝ₂-sig-bi kiĝ₂-sig kiĝ₂-nim-zu
34.	[…] X X si ma-ra-an-sa₂
35.	[šu-luḫ]-ḫa ma-ra-ab-ku₃-ug ma-ra-ab-šen
36.	[X X] X DU SA /U₃ du₈\ X UZ KA /LA\ ba-an-sig₇
37.	X [X] X mi-ni-in-pad₃
38.	^d/en-ki\ abzu-ni u₃-tud /šu-luḫ\ mu-ra-an-ĝa₂-ĝa₂
39.	^dku₃-su₁₃-e šu-luḫ-ḫa ba-ni-gub e₂ ni₂-bi u₃-tud
40.	AB×A-šag₄ bar-ba gir₄ gud udu ninda eš₃ bar-ba šu-luḫ kug-bi
41.	e₂-e i₃ im-sikil-e saĝ ba-ab-ḫa-za a₂-šu-ĝiri₃ ba-an-KU-uš
42.	šu-luḫ kug nu-šub-bu-še₃ ambar maḫ
43.	AB×A daĝal kug-ga-ta nam-bi im-ta-e₃
44.	e₂-kiš-nu-ĝal₂ barag maḫ kug-ga me gal maḫ an ki-a šu du₇
45.	AB×A kug-ta peš₁₀ maḫ a tu₅-a-zu
46.	i₃ ḫur-saĝ su kug ĝal₂-la-zu
47.	^dnanna barag maḫ-zu /ba\-ĝar-ra
48.	gada maḫ keše₂ saĝ il₂ si mul suḫ₁₀-gir₁₁ nam-men^!-na
49.	i₃ maḫ i₃ nam-men^! i₃ erim₃ gal-zu su-bar kug-ga-ka
50.	kar-za-gin₃ kar maḫ kar kug-ga-na
51.	^dnin-gublaga-ke₄ en šu im-ma-an-kug-ga
52.	^dtaraḫ abzu eridug^ki-ta šu-bi i₃ im-sikil-e
53.	u₂-a-zu banšur unu₂ ki gal-zu-še₃ šu kug ĝa₂-ĝa₂-zu-še₃
54.	^dku₃-su₃-e šu sikil šu dadag ak šu im-ma-an-kug-ge
55.	^dtaraḫ abzu eridug^ki-ta šu-bi i₃ im-sikil-e
56.	eš₃ abzu barag maḫ urim₂^ki-ma nam dug₃ gal tar-re
57.	/e₂-kiš\-nu-ĝal₂ ki-tuš kug dug₃-ga-am₃ ^dnin-gal nin^! maḫ-bi
58.	[ki-tuš] kug ki nam-nin-za ^dnanna lugal-bi-ir
59.	/e₂-kiš\-nu-ĝal₂ agrun-kug-ga e₂ nam-lugal-zu
60.	^dnanna ^dnin-gal ki-tuš mi-ni-ib₂-ḫul₂-ne
61.	^d/suen\-[e] /en\ zu maḫ an ki aga-zu aga maḫ-am₃
62.	me-lem₄ /ḫuš\ an ki-a /sig₉-ge ^daš-im₂-babbar-e šu ḫe₂\-en-na-kug-ge
63.	an-gin₇ ḫe₂-en-na-kug-[ge ki]-/gin₇\ ḫe₂-en-na-šen-e
64.	šag₄ an-/na\-gin₇ [ḫe₂]-en-na-dadag-ge
65.	/aga^?\ an ki-a aga kug /saĝ\ [ḫe₂]-em-ma-il₂-e
66.	[^d]/suen\-e en zu maḫ /an ki\ barag sikil-la šu du₇
67.	[^d]/aš\-im₂-babbar-e saĝ-men /aga zid\-da si mul maḫ X [(X)]
68.	saĝ im-ma-il₂-/e\
69.	i₃ kug i₃ sikil i₃ dadag-ge (This line is written on the left edge of the tablet and may represent an accidentally omitted line, or else the catchline to another composition, possibly an incantation.)

Print sources

Charpin 1986, p. 366-379: score transliteration, translation, handcopy, commentary

Hall 1985, p. 814-828: score transliteration, translation, commentary

Michalowski 1993, p. 155, 160: commentary

Electronic sources

Krecher 1996: score transliteration

Cuneiform sources

U 7749 (UET 6 67)

Revision history

21.viii.2000-24.viii.2000: GC, editor: standardisation
30.ix.2000: JAB, editor: proofreading
05.x.2000: GC, editor: SGML tagging
20.x.2000: ER, editor: proofreading SGML
20.x.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published