The Electronic Text Corpus of Sumerian Literature

ETCSLtransliteration : c.1.8.1.1

Gilgameš and Aga

1.	lu₂-kiĝ₂-gi₄-a ag-ga dumu en-me-barag-ge₄-si-ke₄ (Cited in OB catalogue from Nibru, at Philadelphia, 0.2.01, line 12; OB catalogue from Urim (U2), 0.2.04, line 12)
2.	kiš^ki-ta ^dgilgameš₂ unug^ki-še₃ mu-un-ši-re₇-eš
3.	^dgilgameš₂ igi ab-ba iri^ki-na-še₃
4.	inim ba-an-ĝar inim i₃-kiĝ₂-kiĝ₂-e
5.	tul₂ til-le-da tul₂ kalam til-til-le-da
6.	tul₂ niĝ₂ ban₃-da kalam til-til-le-da
7.	tul₂ buru₃-da eš₂ la₂ til-til-le-da
8.	e₂ kiš^ki-še₃ gu₂ nam-ba-an-ĝa₂-ĝa₂-an-de₃-en ^ĝištukul {nam-ba-an-sag₃-ge-en-de₃-en} {(2 mss. have instead:) ga-am₃-ma-sag₃-ge-en-de₃-en}
9.	unken ĝar-ra ab-ba iri-na-ka
10.	^dgilgameš₂ mu-na-ni-ib-gi₄-gi₄
11.	tul₂ til-le-da tul₂ kalam til-til-le-da
12.	tul₂ niĝ₂ ban₃-da kalam til-til-le-da
13.	tul₂ buru₃-da eš₂ la₂ til-til-le-da
14.	e₂ kiš^ki-še₃ {gu₂ ga-am₃-ĝa₂-ĝa₂-an-de₃-en ^ĝištukul nam-ba-sag₃-ge-en-de₃-en} {(1 ms. has instead:) gu₂ nam-ba-ĝa₂-ĝa₂-an-de₃-en [^ĝištukul] ga-am₃-ma-sag₃-ge-en-de₃-en}
15.	^dgilgameš₂ en kul-aba₄^ki-a-ke₄
16.	^dinana-ra nir-ĝal₂-la-e
17.	inim ab-ba iri-na-ke₄ šag₄-še₃ nu-mu-na-gid₂
18.	2-kam-ma-še₃ ^dgilgameš₂ {(1 ms. adds:) en kul-aba^ki-a-ke₄} igi ĝuruš iri^ki-na-še₃
19.	inim ba-an-ĝar inim i₃-kiĝ₂-kiĝ₂-e
20.	tul₂ til-le-da tul₂ kalam til-til-le-da
21.	tul₂ niĝ₂ ban₃-da kalam til-til-le-da
22.	tul₂ buru₃-da eš₂ la₂ til-til-le-da
23.	e₂ kiš^ki-še₃ {gu₂ nam-ba-an-ĝar-re-en-ze₂-en ^ĝištukul nam-ba-an-sag₃-ge-en-ze₂-en} {(1 ms. has instead:) gu₂ /nam-ba-ĝa₂-ĝa₂-an-de₃\-[en] /^ĝiš\tukul ga-am₃-ma-sag₃-/ge-en-de₃-en\}
24.	unken ĝar-ra ĝuruš iri^ki-na-ka ^dgilgameš₂ mu-na-ni-ib-gi₄-gi₄
25.	gub-gub-bu-de₃ tuš-tuš-u₃-de₃
26.	dumu lugal-la da ri-e-de₃
27.	zib₂ anše dab₅-dab₅-be₂-e-de₃
28.	a-ba zi-bi mu-un-tuku-e-še
29.	e₂ kiš^ki-še₃ gu₂ nam-ba-an-ĝar-re-en-ze₂-en ^ĝištukul nam-ba-an-sag₃-ge-en-de₃-en
30.	unug^ki ĝiš-kiĝ₂-ti diĝir-re-e-ne-ke₄
31.	e₂-an-na e₂ an-ta ed₃-de₃
32.	diĝir gal-gal-e-ne me-dim₂-bi ba-an-ak-eš-am₃
33.	bad₃ gal {bad₃ an-ne₂ ki us₂-sa} {(1 ms. has instead:) muru₉ ki us₂-sa-a-ba}
34.	ki-tuš maḫ an-ne₂ {ĝar-ra-ni} {(1 ms. has instead:) ĝar-ra-a-ba}
35.	saĝ mu-e-sig₁₀ za-e lugal ur-saĝ-bi
36.	saĝ lum-lum nun an-ne₂ ki aĝ₂
37.	du-a-ni-ta a-gin₇ ni₂ ba-an-te
38.	erin₂-bi al-tur a-ga-bi-ta al-bir-re
39.	lu₂-be₂-ne igi nu-mu-un-da-ru-gu₂-uš
40.	ud-bi-a ^dgilgameš₂ en kul-aba₄^ki-ke₄
41.	inim ĝuruš iri-na-še₃ šag₄-ga-ni an-ḫul₂ ur₅-ra-ni ba-an-zalag
42.	šubur-a-ni en-ki-du₁₀-ra gu₃ mu-na-de₂-e
43.	ne-eš₂ ^ĝiššu-kar₂ a₂ me₃ sa ḫe₂-em-mi-gi₄
44.	^ĝištukul me₃ a₂-zu-še₃ ḫe₂-em-mi-gi₄
45.	ni₂ gal me-lem₄-ma ḫe₂-em-dim₂-dim₂-e
46.	e-ne du-a-ni-ta ni₂ gal-ĝu₁₀ ḫe₂-eb-šu₂
47.	dim₂-ma-ni ḫe₂-suḫ₃ ĝalga-a-ni ḫe₂-bir-re
48.	ud nu-5-am₃ ud nu-10-am₃
49.	ag-ga dumu en-me-barag-ge₄-si-ke₄ unug^ki zag-ga ba-an-dab₅-be₂-eš
50.	unug^ki-ga dim₂-ma-bi ba-an-suḫ₃
51.	^dgilgameš₂ en kul-aba^ki-ke₄
52.	ur-saĝ-be₂-ne-er gu₃ mu-ne-de₂-e
53.	ur-saĝ-ĝu₁₀-ne igi {mu-un-suḫ-suḫ-u₃-ne} {(2 mss. have instead:) saĝ₅-saĝ₅-en-ze₂-en}
54.	šag₄ tuku ḫe₂-en-zi-zi-i ag-ga-še₃ {ga-an-ši-ĝen} {(1 ms. has instead:) ga-an-gi₄}
55.	BIR-ḪAR-tur-ra lu₂-saĝ-lugal-a-ni
56.	lugal-a-ni-ir za₃-mi₂ mu-un-na-ab-be₂
57.	{(2 mss. add:) lugal-ĝu₁₀} ĝe₂₆-e ag-ga-še₃ {ga-an-ši-ĝen} {(1 ms. has instead:) /ga\-na-gud-gu₄-ud}
58.	dim₂-ma-ni ḫe₂-suḫ₃ ĝalga-a-ni ḫe₂-bir-re
59.	BIR-ḪAR-tur-ra abul-la ba-ra-e₃
60.	BIR-ḪAR-tur-ra abul-la ed₂-da-ni
61.	kan₄ abul-la-ka mu-ni-in-dab₅-be₂-eš
62.	BIR-ḪAR-tur-ra suku_x(SUKUD)-ra₂-ni mu-ni-in-gum-gum-ne
63.	igi ag-ga-še₃ mu-ni-in-te^?
64.	ag-ga-še₃ gu₃ mu-na-de₂-e
65.	inim-ma-ni nu-un-til zabar-dab₅ unug^ki-ga-ke₄ bad₃-še₃ im-me-ed₃-de₃
66.	bad₃-da gu₂-na im-ma-an-la₂
67.	ag-ga igi im-ma-ni-in-du₈
68.	BIR-ḪAR-tur-re gu₃ mu-na-de₂-e
69.	arad₂ lu₂ še lugal-zu-u₃
70.	lu₂ še lugal-ĝu₁₀ in-nu
71.	/lu₂\ še lugal-ĝu₁₀ ḫe₂-me-a
72.	saĝ-ki ḫuš-a-ni ḫe₂-me-a
73.	igi alim-ma-ka-ni ḫe₂-me-a
74.	sun₄^! ^na₄za-gin₃-na-ka-a-ni ḫe₂-me-a
75.	šu-si sag₉-ga-ni ḫe₂-me-a
76.	šar₂-ra la-ba-an-šub-bu-uš šar₂-ra la-ba-an-zig₃-ge-eš
77.	šar₂-ra saḫar-ra la-ba-an-da-šar₂-re-eš
78.	kur-kur du₃-a-bi la-ba-an-da-šu₂-a
79.	ka ma-da-ka saḫar-ra la-ba-da-an-si
80.	si ^ĝišma₂-gur₈-ra-ka la-ba-ra-an-kud
81.	ag-ga lugal kiš^ki-a šag₄ erin₂-na-ka-ni šaĝa-a la-ba-ni-in-ak
82.	mu-ni-ib-ra-ra-ne mu-ni-ib-sag₃-sag₃-ge-ne
83.	BIR-ḪAR-tur-re suku_x(SUKUD)-ra₂-ni mu-ni-in-gum-gum-ne
84.	eĝer zabar-dab₅ unug^ki-ga-ke₄ ^dgilgameš₂ bad₃-še₃ im-me-ed₃-de₃
85.	ab-ba di₄-di₄-la₂ kul-aba₄^ki-a-ke₄ me-lem₄ bi₂-ib-šu₂-šu₂
86.	ĝuruš unug^ki-ga-ke₄ ^ĝištukul me₃ a₂-ne-ne bi₂-in-si
87.	^ĝišig abul-la-ka sila-ba bi₂-in-gub
88.	en-ki-du₁₀ abul-la dili ba-ra-e₃
89.	^dgilgameš₂ bad₃-da gu₂-na im-ma-an-la₂
90.	igi bar-re-da-ni ag-ga igi ba-ni-in-du₈
91.	arad₂ lu₂ še lugal-zu-u₃
92.	lu₂ še lugal-ĝu₁₀ i₃-me-a
93.	bi₂-in-dug₄-ga-gin₇-nam
94.	šar₂-ra ba-an-šub-bu-uš šar₂-ra ba-an-zig₃-ge-eš
95.	šar₂-ra saḫar-ra ba-an-da-šar₂-re-eš
96.	kur-kur du₃-a-bi ba-an-da-šu₂-am₃
97.	ka ma-da-ka saḫar-ra ba-da-an-si
98.	si ^ĝišma₂-gur₈-ra-ke₄ ba-/ra-an-kud\
99.	ag-ga lugal kiš^ki-a šag₄ erin₂-na-ka-ni šaĝa-a ba-ni-in-ak
	{
	(1 ms. adds 1 line:)
99A.	/ĝuruš\ unug^ki-ga-ke₄ erin₂-bi X /A\ X /BA^?\ X
	}
100.	^dgilgameš₂ en kul-aba₄^ki-ke₄
101.	{ag-ga-a gu₃ mu-na-de₂-e} {(1 ms. has instead:) [ag]-ga-aš sa₂ mu-na-ni^!-/ib-be₂\}
102.	ag-ga ugula-ĝu₁₀ ag-ga nu-banda₃-ĝu₁₀
	{
	(1 ms. adds 1 line:)
102A.	[ag]-ga ensi₂-ĝu₁₀ ag-ga /šagina-ĝu₁₀\
	}
103.	ag-ga šagina erin₂-na-ĝu₁₀
104.	ag-ga zi ma-/an-šum₂\ ag-ga nam-til₃ ma-an-šum₂
105.	ag-ga lu₂-kar-ra ur₂-ra bi₂-in-tum₂-mu
106.	ag-ga mušen kar-ra še bi₂-ib-si-si
107.	unug^ki ĝiš-kiĝ₂-ti diĝir-re-e-ne-ke₄
108.	bad₃ gal {bad₃ an-ne₂ ki us₂-sa} {(the other ms. has instead:) muru₉ ki us₂-/sa-a-ba\}
109.	ki-tuš maḫ an-ne₂ {ĝar-ra-ni} {(the other ms. has instead:) /ĝar-ra\-[a]-/ba\}
110.	saĝ mu-sig₁₀ {za-e lugal ur-saĝ-bi} {(the other ms. has instead:) šu-ĝu₁₀ /im-mi-ib-gi₄\}
111.	saĝ lum-lum nun an-ne₂ ki aĝ₂ (the other ms. omits this line)
112.	igi ^dutu-še₃ šu ud-bi-ta e-ra-an-gi₄
113.	ag-ga kiš^ki-še₃ šu {ba-ni-in-ba} {(1 ms. has instead:) ba-ni-in-bar}
114.	^dgilgameš₂ en kul-aba₄^ki-a-ke₄
115.	za₃-mi₂-zu dug₃-ga-am₃

Print sources

Black 1995: commentary, translation (Discusses ll. 70-80 and 92-99)

Civil 1999-2000: commentary (Includes details of an unpublished source of ll. 1-60)

Cooper 1981: commentary

Edzard 1959: commentary

Falkenstein 1966: commentary

George 1999, p. 143-148: translation

Heimpel 1981a: commentary

Jacobsen 1970: commentary

Jacobsen 1970a: commentary

Jacobsen 1987, p. 345-355: translation, commentary

Katz 1987: commentary

Katz 1993: composite text, translation, commentary

Katz 1997: translation, commentary

Klein 1983: commentary

Kramer 1949: commentary

Lafont 1996: commentary

Lambert 1980: commentary

Malamat 1963: commentary

Marík 1998: commentary (esp. on l. 79 (97))

Michalowski 1982: commentary

Pettinato 1992, p. 307-311, 399-401: translation, commentary

Pettinato 1994: commentary

Römer 1980: commentary, translation, composite text

Römer 1993a, p. 549-559: translation, commentary

Tournay and Shaffer 1994, p. 282-291: translation

Vanstiphout 1986: commentary, translation

Vanstiphout 1987: commentary

Wilcke 1998a: commentary, handcopy

Wu 1998: commentary

Electronic sources

Civil 1989f: composite text

Krecher 1996: composite text

Krecher 1996a: composite text, translation

Vanstiphout 1998d: composite text, score transliteration, translation

Wilcke 1997: composite text

Cuneiform sources

CBS 4564 (PBS 10/2 5; photo AOAT 209/1 pl. vi)

CBS 6140 (SEM 29; photo AOAT 209/1 pl. vii-viii)

CBS 10355 (AJA 1949 fg. 1, photo pl. 1; FTS fg. 19 obv.]; photo AOAT 209/1 pl. v; new copy Fs. Römer p. 484) + N 3591 (Fs. Römer p. 484)

CBS 15164 (photo AOAT 209/1 pl. x-xi

HS 1485 (TMH NF 4 5)

HS 1515 (TMH NF 4 6) + Ni 9743 (ISET 2 53; fg. 5)

JRL n/u (BJRL 19 369ff.; photo AOAT 209/1 pl. i-iv)

N 1250 (NABU 1989 99)

N 4236 (photo AOAT 209/1 pl. ix)

Ni 2302 (SLTN 3)

Ni 2334 (SRT 38)

Ni 4351 (ISET 2 54; fg. 4)

Ni 4396 (ISET 2 20; fg. 3)

Ni 4402 (ISET 2 53; fg. 6)

Ni 4448 (ISET 2 54; fg. 2)

N 3563 (Fs. Römer p. 485)

Revision history

22.v.2000-29.v.2000: GC, editor: standardisation
16.viii.2000: JAB, editor: proofreading
17.viii.2000: GC, editor: SGML tagging
08.ix.2000: ER, editor: proofreading SGML
08.ix.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published