The Electronic Text Corpus of Sumerian Literature

ETCSLtransliteration : c.1.4.1

Inana's descent to the nether world

1.	an gal-ta ki gal-ce₃ jectug₂-ga-ni na-an-/gub\ (Cited in OB catalogue from Nibru, at Philadelphia, 0.2.01, line 41; OB catalogue in the Louvre, 0.2.02, line 33; OB catalogue from Urim (U2), 0.2.04, line 27)
2.	dijir an gal-ta ki gal-ce₃ jectug₂-ga-ni na-an-[gub]
3.	^dinana an gal-[ta ki gal-ce₃] jectug₂-ga-ni na-an-[gub]
4.	nin-ju₁₀ an mu-un-cub ki mu-un-cub kur-ra ba-e-a-ed₃
5.	^dinana an mu-un-cub ki mu-un-cub kur-ra ba-e-a-ed₃
6.	nam-en mu-un-cub nam-lagar mu-un-cub kur-ra ba-e-a-ed₃
7.	unug^ki-ga e₂-an-na mu-un-cub kur-ra ba-e-a-ed₃
8.	bad₃-/tibira\^ki-a e₂-muc₃-kalam-ma mu-un-cub kur-ra ba-[e-a]-ed₃
9.	zabalam^ki-a gi-gun₄^ki-na mu-un-cub kur-ra ba-e-a-ed₃
10.	adab^ki-a e₂-car-ra mu-un-cub kur-ra ba-e-a-ed₃
11.	nibru^ki-a barag-dur₂-jar-ra mu-un-cub [kur-ra ba-e-a-ed₃]
12.	kic^ki-a hur-saj-kalam-ma mu-un-cub kur-ra ba-e-[a-ed₃]
13.	a-ga-de₃^ki-a e₂-ul-mac^ki mu-un-cub kur-a ba-e-a-ed₃
	{
	(1 ms. adds 8 other lines:)
13A.	umma^ki-a ib-gal mu-un-cub <kur-ra ba-e-a-ed₃>
13B.	urim₂^ki-ma e₂-dilmun-na mu-un-cub <kur-ra ba-e-a-ed₃>
13C.	kisiga^ki-a amac-e₂-kug mu-un-cub <kur-ra ba-e-a-ed₃>
13D.	jir₂-su^ki-a e₂-ec₂-dam-kug mu-un-cub <kur-ra ba-e-a-ed₃>
13E.	i₃-si-in-na^ki e₂-ceg₁₂-me-ce₃-du₇ mu-un-cub <kur-ra ba-e-a-ed₃>
13F.	akcak^ki-a an-za-gar₃ mu-un-cub <kur-ra ba-e-a-ed₃>
13G.	curuppag^ki-e nijin₃-jar-kug mu-un-cub <kur-ra ba-e-a-ed₃>
13H.	ka-zal-lu^ki e₂-cag₄-hul₂-la mu-un-cub <kur-ra ba-e-a-ed₃>
	}
14.	me 7-bi zag mu-ni-in-kece₂
15.	me mu-un-ur₄-ur₄ cu-ni-ce₃ mu-un-la₂
16.	me dug₃ jiri₃ gub-ba i-im-jen
17.	tug₂-cu-gur-ra men edin-na saj-ja₂-na mu-un-jal₂
18.	hi-li saj-ki-na cu ba-ni-in-ti
19.	^na₄za-gin₃ di₄-di₄-la₂ gu₂-na ba-an-la₂
20.	na₄-nunuz tab-ba gaba-na ba-ni-in-si
21.	^tug₂pala₃ tug₂ nam-nin-a bar-ra-na ba-an-dul
22.	cembizid lu₂ he₂-em-du he₂-em-du igi-na ba-ni-in-jar
23.	tu-di-da lu₂ ja₂-nu ja₂-nu gaba-na ba-an-gid₂
24.	har kug-sig₁₇ cu-na ba-an-du₈
25.	gi-dic-nindan ec₂-gana₂ za-gin₃ cu ba-ni-in-du₈
26.	^dinana kur-ce₃ i-im-jen
27.	sukkal-a-ni ^dga-ca-an-cubur-ra ejer-a-na i-im-jen
28.	kug ^dinana-ke₄ ^dnin-cubur-ra gu₃ mu-na-de₂-e
29.	ja₂-nu sukkal zid e₂-an-na-ju₁₀
	{
30.	sukkal e-ne-ej₃ sag₉-sag₉-ga-ju₁₀
31.	ra-gaba e-ne-ej₃ ge-en-gen₆-na-ju₁₀
	}
	{
	(1 ms. has instead:)
30A.	[na] ga-e-de₅ na de₅-ju₁₀ /he₂\-[dab₅]
31A.	[inim] ga-ra-ab-dug₄ jizzal [he₂-em-ci-ak]
	}
32.	ud-da kur-ce₃ ed₃-de₃-en
33.	ud-da kur-ce₃ jen-na-ju₁₀-ne
34.	er₂ du₆-du₆-dam mar-mar-ma-ni-ib
35.	cem₃ gu₂-en-na du₁₂-du₁₂-a-ma-ni-ib
36.	[e₂] dijir-re-e-ne nijin₂-nijin₂-na-ma-ni-ib
37.	[i-bi₂-zu] hur-ma-ab giri₁₇-zu hur-ma-ab
	{
	(1 ms. adds 1 line:)
37A.	[jectug₂ ki] u₆ di-zu [hur-ma-ab]
	}
38.	ki mu-lu-da nu-di hac₄-gal-zu hur-ma-ab
39.	mu-lu nu-tuku-gin₇ tug₂ dili-a mur₁₀-ma-ab
40.	e₂-kur-re e₂ ^dmu-ul-lil₂-la₂-ce₃ me-ri-zu dili [gub-mu-un]
41.	[e₂]-kur-re e₂ ^dmu-ul-lil₂-la₂-ce₃ ku₄-ku₄-da-zu-ne
42.	i-bi₂ ^dmu-ul-lil₂-la₂-ce₃ er₂ cec₂-a
43.	[a-a] ^dmu-ul-lil₂ du₅-mu-zu mu-lu kur-ra nam-ba-da-an-gam-e
44.	kug sag₉-ga-zu sahar kur-ra-ka nam-ba-da-ab-car₂-re
45.	za-gin₃ sag₉-ga-zu za zadim-ma-ka nam-ba-da-an-si-il-si-il
46.	^jictackarin-zu jic nagar-ra-ka nam-ba-an-dar-dar-e
47.	ki-sikil ^dga-ca-an-na kur-ra nam-ba-da-an-gam-e
48.	ud-da ^dmu-ul-lil₂ e-ne-ej₃-ba nu-ri-gub urim₂^ki-ce₃ jen-na
49.	urim₂^ki e₂-mud-kur-ra-ka
50.	[e₂]-kic-[nu]-jal₂ ^dnanna-ce₃ ku₄-ku₄-da-[zu]-ne
51.	[i]-bi₂ ^dnanna-ce₃ er₂ cec₂-a
52.	[a]-a ^dnanna du₅-mu-zu mu-lu kur-ra [nam-ba-da]-an-gam-e
53.	[kug sag₉-ga]-zu sahar kur-ra-ka nam-ba-da-ab-[car₂]-re
54.	[za-gin₃] sag₉-ga-zu za zadim-ma-ka nam-ba-da-an-si-il-si-il
55.	[^jictackarin-zu] jic nam-nagar-[ra-ka] nam-ba-da-an-dar-dar-[re]
56.	ki-/sikil\ /^d\ga-[ca-an-na] [kur-ra nam-ba]-da-an-gam-e
57.	ud-/da\ /^d\nanna e-ne-ej₃-[ba] [nu-ri-gub] uru₂-ze₂-eb^ki-ce₃ jen-na
58.	uru₂-ze₂-eb^ki e₂ ^dam-[an-ki-ka₃-ce₃] [ku₄-ku₄-da-zu]-ne
59.	[i-bi₂] ^dam-an-ki-ka₃-ce₃ er₂ cec₂-am₃
60.	a-a ^dam-an-ki du₅-mu-zu mu-lu kur-ra nam-ba-da-an-gam-e
61.	kug sag₉-ga-zu sahar kur-ra-ka nam-ba-da-ab-[car₂-re]
62.	za-gin₃ sag₉-ga-zu za zadim-ma-ka nam-ba-da-an-[si-il-si]-il
63.	^jictackarin-zu jic nagar-ra-ka nam-ba-da-an-dar-[dar-re]
64.	ki-sikil ^dga-ca-an-na kur-ra nam-ba-da-an-gam-e
65.	a-a ^dam-an-ki u₃-mu-un mu-uc-«jic»-tug₂ <da>-ma-al-la-ke₄
66.	u₂ nam-til₃-la mu-un-zu a nam-til₃-la mu-un-zu
67.	e-ne ma-ra hu-mu-un-til₃-le-en
68.	^dinana kur-ce₃ jen-/na\-[ni-ta]
69.	sukkal-a-ni ^dnin-cubur-ra-ke₄ ejer-a-ni i₃-[im-jen]
70.	sukkal-a-ni ^dnin-cubur-ra gu₃ mu-na-[de₂-e]
71.	jen-na ^dga-ca-an-cubur-ju₁₀ saj [kece₂ he₂-ak]
72.	e-ne-<ej₃> a-ra-dug₄-ga-ju₁₀ gu₂-zu la-ba-ci-cub
73.	^dinana e₂-gal ganzer-ce₃ um-ma-te
74.	^jicig kur-ra-ka cu hul ba-an-us₂
75.	abula kur-ra-ka gu₃ hul ba-an-de₂
76.	e₂ jal₂-u₃ i₃-du₈ e₂ jal₂-u₃
77.	e₂ jal₂-u₃ ^dne-ti e₂ jal₂-u₃ dili-ju₁₀-ce₃ ga-kur₉
78.	^dne-ti i₃-du₈ gal kur-ra-ke₄
79.	kug ^dinana inim mu-na-ni-ib-gi₄-gi₄
80.	a-ba-me-en za-e
81.	me-e ^dga-ca-an(source: na)-na ki ^dutu e₃-a-ac
82.	tukum-bi za-e ^dinana ki ^dutu e₃-a-ac
83.	a-na-am₃ ba-du-un kur nu-gi₄-ce₃
84.	har-ra-an lu₂ du-bi nu-gi₄-gi₄-de₃ cag₄-zu a-gin₇ tum₂-mu-un
85.	kug ^dinana-ke₄ mu-na-ni-ib₂-gi₄-gi₄
86.	nin₉ gal-ju₁₀ kug ^dga-ca-an-ki-gal-la-ke₄
87.	mu dam-a-ni u₃-mu-un gud-gal-an-na ba-an-ug₅-ga
88.	ki-sig₁₀-ga-na i-bi₂ du₈-u₃-de₃
89.	kac ki-sig₁₀-ga-na gu-ul ba-ni-in-de₂ ur₅ he₂-na-nam-ma
90.	^dne-ti i₃-du₈ gal kur-ra-ke₄
91.	kug ^dinana-ra mu-na-ni-ib-gi₄-gi₄
92.	gub-ba-a ^dinana nin-ja₂ ga-an-na-ab-dug₄
93.	nin-ju₁₀ ^derec-ki-gal-la-ra ga-an-na-dug₄ [inim-zu] ga-an-na-ab-dug₄
94.	^dne-ti i₃-du₈ gal kur-ra-ke₄
95.	nin-a-ni ^derec-ki-gal-la-ra
96.	e₂-[a-ni-ce₃ ba]-ci-in-kur₉ gu₃ mu-na-de₂
97.	nin-ju₁₀ ki-sikil 1(DIC)-am₃
98.	^d/inana\ [nin₉-zu e₂-gal ganzer-ce₃ um-ma-te]
99.	^jicig [kur-ra-ka cu hul ba-an-us₂]
100.	[abula kur-ra-ka gu₃ hul ba-an-de₂]
101.	e₂-an-na [mu-un-cub kur-ra ba-e-a-ed₃]
102.	me 7-bi zag [mu-ni-in-kece₂]
103.	me mu-[un-ur₄-ur₄ cu-ni-ce₃ mu-un-la₂]
104.	me [dug₃ jiri₃ gub-ba i-im-jen]
105.	tug₂-cu-gur-ra [men edin-na saj-ja₂-na mu-un-jal₂]
106.	hi-li saj-ki-na [cu ba-ni-in-ti]
107.	[^na₄za]-gin₃ /di₄\-[di₄-la₂ gu₂-na i-im-la₂]
108.	na₄-nunuz tab-ba [gaba-na i-im-si]
109.	^tug₂pala₃ nam-nin-a [bar-ra-na i-im-dul]
110.	cembizid lu₂ he₂-em-du igi-ni [i-im-jar]
111.	tu-di-da lu₂ ja₂-nu ja₂-nu [gaba-na i-im-gid₂]
112.	har kug-sig₁₇ cu-na i-/im\-[la₂]
113.	gi-dic-nindan ec₂-gana₂ za-gin₃ cu-na i-/im\-[du₈]
114.	ud-ba ^derec-ki-gal-la-ke₄ hac₂ bar-bi bi₂-in-ra
115.	nundum zu₂ bi₂-in-gub inim cag₄-ce₃ ba-ti
116.	^dne-ti i₃-du₈ gal-ni-ir gu₃ mu-na-de₂-e
117.	ja₂-nu ^dne-ti i₃-du₈ gal kur-ra-ju₁₀
118.	inim a-ra-dug₄-ga-ju₁₀ gu₂-zu la-ba-an-cub-be₂-/en\
119.	abula kur-ra 7-bi ^jicsi-jar-bi he₂-eb-us₂
120.	e₂-gal ganzer dili-bi ^jicig-bi cu ha-ba-an-us₂
121.	e-ne ku₄-ku₄-da-ni-ta
122.	gam-gam-ma-ni tug₂ zil-zil-la-ni-ta lu₂ ba-/an\-[de₆]
123.	^dne-ti i₃-du₈ gal kur-ra-[ke₄]
124.	inim nin-a-na-ce₃ saj kece₂ ba-ci-[in-ak]
125.	abula kur-ra 7-bi ^jicsi-jar-bi [bi₂-ib₂-us₂]
126.	e₂-gal ganzer dili-bi [^jicig-bi cu ba-an-us₂]
127.	kug ^dinana-ra gu₃ mu-na-de₂-[e]
128.	ja₂-nu ^dinana kur₉-um-[ma-ni]
129.	^dinana ku₄-ku₄-da-[ni-ta]
	{
	(1 ms. adds 2 lines:)
129A.	gi-dic-nindan ec₂-gana₂ za-gin₃ [cu-na lu₂ ba-da-an-ze₂-er]
129B.	abula 1-kam-ma ku₄-[ku₄-da-ni-ta]
	}
130.	tug₂-cu-gur-ra men edin-na saj-ja₂-na lu₂ ba-da-an-ze₂-er
131.	ta-am₃ ne-e
132.	si-a ^dinana me kur-ra-ke₄ cu al-du₇-du₇
133.	^dinana jarza kur-ra-ke₄ ka-zu na-an-ba-e
134.	abula 2-kam-ma ku₄-ku₄-da-[ni-ta]
135.	^na₄za-gin₃ di₄-di₄-la₂ gu₂-na lu₂ ba-da-an-ze₂-er
136.	ta-am₃ ne-e
137.	si-a ^dinana me kur-ra-ke₄ cu al-du₇-du₇
138.	^dinana jarza kur-ra-ke₄ ka-zu na-an-ba-e
139.	abula 3-kam-ma ku₄-ku₄-da-ni-ta
140.	na₄-nunuz tab-ba gaba-na lu₂ ba-da-an-ze₂-er
141.	ta-am₃ ne-e
142.	si-a ^dinana me kur-ra-ke₄ cu al-du₇-du₇
143.	^dinana jarza kur-ra-ke₄ ka-zu na-an-ba-e
144.	abula 4-kam-ma ku₄-ku₄-da-ni-ta
145.	tu-di-da lu₂ ja₂-nu ja₂-nu gaba-na lu₂ ba-da-an-ze₂-er
146.	ta-am₃ ne-e
147.	si-a ^dinana me kur-ra-ke₄ cu al-du₇-du₇
148.	^dinana jarza kur-ra-ke₄ ka-zu na-an-ba-e
149.	abula 5-kam-ma ku₄-ku₄-da-ni-ta
150.	har kug-sig₁₇ cu-na lu₂ ba-da-an-ze₂-er
151.	ta-am₃ ne-e
152.	si-a ^dinana me kur-ra-ke₄ cu al-du₇-du₇
153.	^dinana jarza kur-ra-ke₄ ka-zu na-an-ba-e
154.	abula 6-kam-ma ku₄-ku₄-da-ni-ta
155.	gi-dic-nindan ec₂-gana₂ za-gin₃ cu-[na] lu₂ ba-da-an-ze₂-er
156.	ta-am₃ ne-e
157.	si-a ^dinana me kur-ra-ke₄ cu al-du₇-du₇
158.	^dinana jarza kur-ra-ke₄ ka-zu na-an-ba-e
159.	abula 7-kam-ma ku₄-ku₄-da-ni-ta
160.	[^tug₂pala₃] tug₂ nam-nin-a bar-ra-na lu₂ ba-da-an-ze₂-er
161.	ta-am₃ ne-e
162.	si-a ^dinana me kur-ra-ke₄ cu al-du₇-du₇
163.	^dinana jarza kur-ra-ke₄ ka-zu na-an-ba-e
164.	gam-gam-ma-ni tug₂ zil-zil-la-ni-ta lu₂ ma-an-de₆
165.	nin₉-a-ni ^jicgu-za-ni-ta im-ma-da-an-zig₃
166.	e-ne ^jicgu-za-ni-ta dur₂ im-mi-in-jar
167.	^da-nun-na di-kud 7-bi igi-ni-ce₃ di mu-un-da-ku₅-ru-ne
168.	igi mu-ci-in-bar i-bi₂ uc₂-a-kam
169.	inim i-ne-ne inim lipic gig-ga-am₃
170.	gu₃ i-ne-de₂ gu₃ nam-tag-tag-ga-am₃
171.	munus tur₅-ra uzu nij₂ sag₃-ga-ce₃ ba-an-kur₉
172.	uzu nij₂ sag₃-ga ^jicgag-ta lu₂ ba-da-an-la₂
173.	[ud 3] ji₆ 3-am₃ um-ta-zal-la-ta
174.	sukkal-a-ni ^dnin-cubur-ra-ke₄
	{
	(2 mss. add 2 lines:)
174A.	sukkal inim sag₉-sag₉-ga-ni
174B.	ra-gaba inim ge-en-ge-en-na-ni
	}
	{
175.	inim nin-a-na-ce₃ jectug₂ ba-ci-in-gub
	}
	{
	(1 ms. has instead 2 lines:)
175A.	[na] de₅-[ga]-ni cu nu-bar-re
175B.	[inim] dug₄-ga-ni gu₂-ni la-ba-ci-cub
	}
176.	er₂ du₆-du₆-dam mu-un-na-ja₂-ja₂
177.	[cem₃] gu₂-en-na mu-un-du₁₂-a
178.	e₂ dijir-re-e-ne-ke₄ mu-un-na-nijin₂-nijin₂
179.	igi-ni mu-un-[na]-hur giri₁₇-ni mu-un-hur
180.	ki lu₂-da nu-«u₆»-di hac₄-gal-a-ni mu-un-na-hur
181.	mu-lu nu-tuku-gin₇ tug₂ dili-a /im\-[ma]-an-mur₁₀
182.	[e₂-kur] e₂ ^den-lil₂-la₂-ce₃ jiri₃-ni dili mu-un-gub
183.	[e₂-kur] e₂ ^den-lil₂-la₂-ce₃ ku₄-ku₄-da-ni-ta
184.	[igi] [^den-lil₂-la₂]-ce₃ er₂ im-ma-ce₈-ce₈
185.	[a-a] [^dmu-ul-lil₂] du₅-mu-zu mu-lu kur-ra nam-ba-da-an-gam-e
186.	[kug] sag₉-ga-zu [sahar kur]-/ra\-ka nam-ba-[da-ab-car₂]-e
187.	[^na₄za-gin₃] sag₉-ga-zu za zadim-ka nam-[ba-da-an]-si-il-si-il
188.	[^jictackarin-zu] jic nagar-ra-ka nam-ba-[dar]-/dar\-re
189.	[ki-sikil] /^d\ga-ca-an-na kur-ra nam-ba-da-[an]-gam-e
190.	[a-a] [^d]en-lil₂ lipic bal-a-ni ^dnin-cubur-ra-ke₄ mu-na-ni-ib-gi₄-gi₄
191.	[dumu-ju₁₀] an gal al bi₂-in-dug₄ ki gal al bi₂-in-dug₄
192.	[^dinana] an gal al bi₂-in-dug₄ ki gal al bi₂-in-dug₄
193.	me kur-ra me al nu-di-da sa₂ bi₂-in-dug₄-[ga-bi kur]-/re\ he₂-eb-us₂
194.	a-ba-am₃ ki-bi sa₂ in-na-an-dug₄ [ed₃-de₃] al mu-ni-in-dug₄
195.	a-a ^den-lil₂ inim-bi nu-mu-na-gub urim₂^ki-[ce₃] ba-jen
196.	urim₂^ki [e₂-mud]-kur-ra-ka
197.	e₂-kic-nu-jal₂ [e₂ ^dnanna-ce₃ ku₄-ku₄-da-ni]-ta
198.	igi ^dnanna-ce₃ er₂ [im-ma]-ce₈-ce₈
199.	a-a ^dnanna du₅-mu-zu mu-lu kur-ra nam-[ba]-da-an-gam-e
200.	kug sag₉-ga-zu sahar kur-ra-ka nam-ba-[da-ab]-car₂-re
201.	^na₄za-gin₃ sag₉-ga-zu za zadim-ka nam-ba-[da-an]-si-il-si-il-i
202.	^jictackarin-zu jic nagar-ra-ka [nam-ba]-da-[an-dar-dar]-re
203.	ki-sikil ^dga-ca-an-na kur-ra nam-ba-da-[an]-gam-e
204.	a-a ^dnanna lipic bal-a-ni [^dnin-cubur-ra-ke₄ mu-na-ni]-ib-gi₄-gi₄
205.	dumu-ju₁₀ an gal al bi₂-in-dug₄ [ki gal] al bi₂-in-dug₄
206.	^dinana an gal al bi₂-in-dug₄ [ki gal] al [bi₂]-in-dug₄
207.	me kur-ra me al nu-di-da /sa₂\ [bi₂-in-dug₄-ga-bi kur]-/re\ he₂-eb-us₂
208.	a-ba-am₃ ki-bi [sa₂ in-na-an-dug₄ ed₃-de₃ al mu-ni-ib-dug₄ ]
209.	a-a ^dnanna inim-bi nu-/mu\-[na-gub uru₂-ze₂-eb^ki-ce₃] /ba\-jen
210.	uru₂-ze₂-eb^ki e₂ ^den-ki-ka₃-ce₃ [ku₄-ku₄]-da-ni-ta
211.	igi ^den-ki-ka₃-ce₃ [er₂ im]-/ma\-ce₈-ce₈
212.	a-a ^den-ki du₅-mu-zu mu-lu [kur-ra nam-ba]-/da\-an-gam-e
213.	kug sag₉-ga-zu sahar kur-ra-ka nam-[ba-da-ab-car₂]-re
214.	^na₄za-gin₃ sag₉-ga-zu za zadim-ka nam-ba-da-an-[si-il-si]-il-i
215.	^jictackarin-zu jic nagar-ra-ka nam-ba-an-dar-dar-re
216.	ki-sikil ^dga-ca-an-na kur-ra nam-ba-da-an-gam-e
217.	a-a ^den-ki ^dnin-cubur-ra-ke₄ mu-un-na-ni-ib-gi₄-gi₄
218.	dumu-ju₁₀ a-na bi₂-in-ak je₂₆-e mu-un-kuc₂-u
219.	^dinana [a-na] bi₂-in-ak je₂₆-e mu-un-kuc₂-u
220.	nin kur-kur-/ra\-[ke₄] a-na bi₂-in-ak je₂₆-e mu-un-kuc₂-u
221.	nu-u₈-/gig\ /an\-na-ke₄ a-na bi₂-in-ak je₂₆-e mu-un-kuc₂-u
	{
	(1 ms. adds 1 line:)
221A.	a-a ^den-ki inim-bi ba-e-de₃-gub
	}
222.	umbin-si-ni mu-dur₇ ba-ra-an-de₆ kur-jar-ra-ac ba-an-dim₂
223.	umbin-si 2-kam-ma mu-dur₇ ba-ra-an-de₆ gala-tur-ra-ac ba-an-dim₂
224.	kur-jar-ra u₂ nam-til₃-la ba-an-cum₂
225.	gala-tur-ra a nam-til₃-la ba-an-cum₂
	{
226.	[a-a] ^den-ki gala-tur-ra kur-jar-ra gu₃ mu-na-[de₂-e]
	}
	{
	(1 ms. has instead the line:)
226A.	1-am₃ u₂ nam-til₃-la 1-am₃ a nam-til₃-la ugu-ni-a cub-ba-ab-ze₂-en
	}
227.	jen-na-an-ze₂-en jiri₃ kur-ce₃ nu₂-ba-an-ze₂-en
228.	^jicig nim-gin₇ dal-dal-e-de₃-en-ze₂-en
229.	za-ra lil₂-gin₇ gur-gur-re-de₃-en-ze₂-en
230.	ama gan-e nam dumu-ne-ne-ce₃
231.	^derec-ki-gal-la-ke₄ i-nu₂-nu₂-ra-am₃
232.	mur kug-ga-na gada nu-um-bur₂
233.	gaba-ni bur cajan-gin₇ nu-um-gid₂
234.	/cu^?\-si-ni ^urudlub-bi-gin₇ am₃-da-jal₂
235.	siki-ni ga-rac^sar-gin₇ saj-ja₂-na mu-un-ur₄-ur₄-re
236.	u-u₈-a cag₄-ju₁₀ dug₄-ga-ni
237.	kuc₂-u₃-me-en nin-me a cag₄-zu [dug₄]-ga-<zu>-ne-[ne]
238.	[u-u₈]-a bar-ju₁₀ dug₄-ga-ni
239.	kuc₂-u₃-me-en nin-me a bar-zu [dug₄]-ga-<zu>-ne-[ne]
240.	a-ba-am₃ za-e-me-en-ze₂-en
241.	cag₄-ju₁₀-[ta] cag₄-zu-ce₃ bar-ju₁₀-ta bar-<zu>-ce₃ dug₄-ga-na-ab-ze₂-en
242.	dijir he₂-me-en-ze₂-en inim ga-mu-ra-an-dug₄
243.	lu₂-ulu₃ he₂-me-en-ze₂-en nam-zu-ne he₂-eb-tar-re
244.	zi an-na zi ki-a pad₃-de₃-ne-ze₂-na-am₃
245.	ed₃^?-[...]-ab-ze₂-en
246.	a id₂-bi ma-ra-ba-e-ne cu nam-[ba]-gid₂-i-en-ze₂-en
247.	a-cag₄ ce-ba ma-ra-ba-e-ne cu nam-ba-gid₂-i-en-ze₂-en
248.	uzu nij₂ sag₃-ga ^jicgag-ta la₂ cum₂-me-ab {dug₄-ga-na-ab-ze₂-en} {(1 ms. has instead:) dug₄-ga-ma-ab-jen-ze₂-en }
249.	uzu nij₂ sag₃-ga ga-ca-an-<zu>-ne-ne
250.	nij₂ lugal-me «en» he₂-a nij₂ nin-me(source: bi) he₂-a cum₂-ma-ze₂-en dug₄-ga-na-ab-ze₂-en(source: dug₄-ga-ma-ab-jen-ze₂-en)
251.	uzu nij₂ sag₃-ga ^jicgag-ta la₂-a im-ma-da-ab-cum₂-mu-ze₂-en
252.	1-am₃ u₂ nam-til₃-la 1-am₃ a nam-til₃-la ugu-na cub-bu-de₃-en-ze₂-en
253.	^dinana ha-ba-gub
254.	gala-tur kur-jar-ra inim ^den-ki-ka₃-ce₃ saj kece₂ ba-[ci-in]-ak-ec
255.	^jicig nim-gin₇ mu-un-dal-dal
256.	za-ra lil₂-gin₇ mu-un-gur-gur
257.	[ama gan-e] nam dumu-ne-ne-ce₃
258.	[^derec-ki]-gal-la-ke₄ i-nu₂-nu₂-ra-am₃
259.	[mur] kug-[ga]-na gada nu-un-bur₂
260.	[gaba-ni] bur cajan-na nu-un-gid₂
261.	[cu-si]-ni ^urudlub-bi-gin₇ /an\-[da-jal₂]
262.	[siki]-ni ga-rac^sar-gin₇ saj-[ja₂-na mu-un-ur₄-ur₄]
263.	[u₃-u₈-a] /cag₄\-ju₁₀ dug₄-ga-ni
264.	[kuc₂-u₃-me]-en nin-me a cag₄-zu in-na-[ne]-ec
265.	[u₃-u₈-a] bar-ju₁₀ dug₄-ga-ni
266.	[kuc₂-u₃-me]-en nin-me a bar-zu in-na-ne-ec
267.	[a-ba-am₃] za-e-me-en-ze₂-en
268.	[cag₄-ju₁₀-ta] cag₄-zu-ce₃ bar-ju₁₀-ta bar-zu-ce₃ ba-e-de₃-en-ze₂-en
269.	[dijir he₂-me-en]-ze₂-en inim ga-mu-ra-an-dug₄
270.	[lu₂-ulu₃ he₂-me]-/en\-ze₂-en nam-zu-ne ga-mu-ri-ib-tar
271.	[zi an-na zi ki-a] mu-ni-in-pad₃-de₃-ec
272.	[...]-/ed₃\-de₃-de₃-ec
273.	id₂ a-ba mu-ne-ba-e cu nu-um-ma-gid₂-de₃
274.	a-cag₄ ce-ba mu-ne-ba-e cu nu-um-ma-gid₂-de₃
275.	uzu nij₂ sag₃-ga ^jicgag-ta la₂ cum₂-me-eb in-na-an-ne-ec
276.	kug ^derec-ki-gal-la-ke₄ /gala\-[tur kur-jar-ra] mu-na-ni-ib-gi₄-gi₄
277.	uzu {nij₂} {(1 ms. has instead:) aj₂ } sag₃-ga {nij₂} {(1 ms. has instead:) aj₂ } ga-ca-an-zu-ne-ne-kam
278.	[nij₂] /lugal\-me {nij₂} {(1 ms. has instead:) aj₂ } nin-me he₂-a cum₂-me-eb in-na-an-ne-ec
279.	uzu nij₂ sag₃-ga ^jicgag-ta la₂ im-me-ne-cum₂-uc
280.	1-am₃ u₂ nam-til₃-la 1-am₃ a nam-til₃-la ugu-a bi₂-in-cub-bu-uc
281.	^dinana ba-gub
282.	^derec-ki-gal-la gala-<tur> kur-jar-ra gu₃ [mu-na-de₂]-e
283.	tum₂-mu-un-ze₂-en ga-ca-an-<zu>-ne-[ne] [...]-zu^?-ne-ne ba-dab₅
284.	^dinana inim ^den-ki-[ka₃-ta] /kur\-ta ed₃
285.	^dinana kur-ta ed₃-da-ni
286.	^da-nun-na-ke₄-e-ne ba-ab-ha-za-ac
287.	a-ba-am₃ lu₂ kur-ta im-[ta]-ed₃-de₃ kur-ta silim-ma-ni bi₂-in-ed₃-de₃
288.	ud-da ^dinana kur-ta ba-ed₃-de₃
289.	saj-dili saj-ja₂-na ha-ba-ab-cum₂-mu
290.	^dinana kur-ta ba-ed₃-de₃
291.	lu₂ igi-na sukkal nu-me-a ^jicjidru cu bi₂-in-du₈
292.	bar-ra-na ra-gaba nu-me-a ^jictukul ur₂-ra bi₂-in-la₂
293.	gal₅-la₂ tur-tur gi-cukur-gin₇
294.	gal₅-la₂ gal-gal gi dub-ba-an-na-gin₇ zag-ga-na ba-an-dab₅-be-ec
295.	lu₂ e-ne-ra in-ci-re₇-ec-am₃
296.	lu₂ ^dinana-ra in-ci-re₇-ec-am₃
297.	u₂ nu-zu-me-ec a nu-zu-me-ec
298.	zid₂ dub-dub-ba nu-gu₇-me-ec
299.	a bal-bal-a nu-na₈-na₈-me-ec
	{
300.	kadra nij₂ dug₃-ge cu nu-gid₂-me-ec
301.	ur₂ dam nij₂ dug₃-ge-ec nu-sig₉-ge-me-ec
302.	dumu nij₂ ku₇-ku₇-da ne nu-su-ub-ba-me-ec
303.	dam ur₂ lu₂-ka ba-ra-an-si-il-si-il-le-ec
304.	dumu lu₂ du₁₀-ub-ta ba-ra-an-zig₃-ge-ec
305.	e₂-gi₄-a e₂ ucbar-ra-ka im-ta-an-e₃-ec-am₃
	}
	{
	(instead of lines 300-305, 1 ms. has 2 lines:)
300A.	/ur₂\ lu₂-ka dam cu ti-a-me-ec
301A.	/ubur\ emeda(UM.ME)^da la₂-ka dumu cu ti-a-me-ec
	}
	{
	(1 ms. adds 3 lines:)
305A.	cum₂^sar nij₂ sis-a nu-gum-e-me-ec
305B.	lu₂ ku₆ nu-gu₇-me-ec lu₂ ga-rac^sar nu-gu₇-[me-ec]
305C.	lu₂ ^dinana mu-un-ci-re₇-[ec-am₃]
	}
306.	^dinana kur-ta ed₃-da-ni
307.	^dnin-cubur-ra-ke₄ kan₄ ganzer-[ra-ka] jiri₃-ni-ce₃ ba-an-cub
308.	sahar-ra ba-da-an-tuc tug₂-mu-dur₇-ra ba-an-mur₁₀
309.	gal₅-la₂-e-ne kug ^dinana-ra gu₃ mu-un-na-de₂-e
310.	^dinana iri-zu-ce₃ jen-ba e-ne ga-ba-ab-tum₂-mu-de₃-en
311.	kug ^dinana-ke₄ gal₅-la₂-e-ne mu-un-ne-ni-gi₄-gi₄
312.	sukkal e-ne-ej₃ sag₉-sag₉-ga-ju₁₀
313.	ra-gaba e-ne-ej₃ ge-en-gen₆-na-ju₁₀
314.	[na] de₅-ga-ju₁₀ cu nu-un-bar-re
315.	[e-ne]-ej₃ ma-ra-[ab-dug₄]-ga-ju₁₀-uc gu₂-ni [la]-ba-da-[an-ci-cub]
316.	er₂ du₆-du₆-dam ma-an-ja₂-ja₂
317.	cem₃ gu₂-en-na ma-an-du₁₂-am₃
318.	e₂ dijir-re-e-ne ma-an-nijin₂-nijin₂
319.	i-bi₂-ni ma-an-hur giri₁₇-ni ma-an-hur
	{
	(1 ms. adds 1 line:)
319A.	/jectug₂\-[ga]-ni ki u₆ di ma-hur
	}
320.	ki mu-lu-da nu-di hac₄-gal-a-ni ma-an-hur
321.	mu-lu nu-tuku-gin₇ tug₂ dili-a im-ma-an-mur₁₀
322.	e₂-kur-re e₂ ^dmu-ul-lil₂-la₂-ce₃
323.	urim₂^ki-ma e₂ ^dnanna-ce₃
324.	uru₂-ze₂-eb^ki e₂ ^dam-an-ki-ka₃-ce₃
325.	jiri₃-ni dili mu-un-gub
	{
	(1 ms. adds 1 line:)
325A.	igi ^dam-an-ki-ka₃ er₂ bi₂-ce₈-ce₈
	}
326.	e-ne ma-a-ra mu-un-til₃-le-en
327.	e-ne ta-gin₇ nam-ma-ra-ab-ze₂-ej₃-/en\-[ze₂-en]
328.	ga-an-ci-re₇-de₃-en umma^ki-a ceg₁₂-kur-cag₄-ga-ce₃ ga-am₃-ci-re₇-de₃-en
329.	/umma\[^ki-a] ceg₁₂-kur-cag₄-ga-ta
330.	^dcara iri-ni-a jiri₃-ni-ce₃ ba-an-cub
331.	sahar-ra ba-da-an-tuc tug₂-mu-dur₇-ra ba-an-mur₁₀
332.	gal₅-la₂-e-ne kug ^dinana-ra gu₃ mu-na-de₂-e
333.	^dinana iri-zu-ce₃ jen-ba e-ne ga-ba-ab-tum₂-mu-de₃
334.	kug ^dinana-ke₄ gal₅-la₂-e-ne mu-na-ni-ib-gi₄-gi₄
335.	en₃-du /du\ ^dcara-ju₁₀
336.	umbin kud-ku₅-ra-ju₁₀ gu₂-tar la₂-ju₁₀
337.	en₃ ta-gin₇ nam-ma-ra-ni-ib-ze₂-ej₃-jen
338.	ga-e-re₇-en-de₃-en bad₃-tibira^ki-a e₂-muc₃-kalam-ma-ce₃ ga-an-ci-re₇-en-de₃-en
339.	bad₃-tibira^ki-a e₂-muc₃-kalam-ma-ta
340.	^dlu₂-lal₃-e iri-ni-a jiri₃-ni-ce₃ ba-an-cub
341.	sahar-a im-da-an-tuc tug₂-mu-dur₇-ra ba-an-mur₁₀
342.	gal₅-la₂-e-ne kug ^dinana-ra gu₃ mu-na-de₂-e
343.	^dinana iri-zu-ce₃ jen-ba e-ne ga-ba-ab-tum₂-mu-un-de₃-en
344.	kug ^dinana-ke₄ gal₅-la₂-e-ne mu-na-ni-ib-gi₄-gi₄
345.	^dlu₂-lal₃ zag e₃-a a₂ zid-da gab₂-bu-ju₁₀ us₂-sa
346.	e-ne ta-gin₇ nam-ma-ra-ab-ze₂-ej₃-en-ze₂-en
347.	ga-e-re₇-de₃-en ^jichachur gul-la edin kul-aba₄^ki-ce₃ [ga-an-ci-re₇-en-de₃-en]
348.	^jichachur gul-la edin kul-aba₄^ki-ce₃ jiri₃-ni-ce₃ ba-e-re₇^re-ec
349.	^ddumu-zid tug₂ mah-a i-im-mur₁₀ mah-a dur₂-a dur₂ im-ma-jar
350.	gal₅-la₂-e-ne hac₄-a-na i-im-dab₅-be₂-ec
351.	^dugcakir 7-e ga mu-un-de₂-ec-am₃
352.	7-am₃ X-TU-ra-gin₇ saj mu-un-da-sag₃-ge-ne
353.	sipad-de₃ gi-gid₂ gi-di-da igi-ni cu /nu\-mu-un-tag-ge-ne
354.	igi mu-un-ci-in-bar igi uc₂-a-ka
355.	inim i-ne-ne inim lipic gig-ga
356.	gu₃ i-ne-de₂ gu₃ nam-tag-tag-ga
357.	en₃-ce₃ tum₃-mu-an-ze₂-en
358.	kug ^dinana-ke₄ su₈-ba ^ddumu-zid-da cu-ne-ne-a in-na-cum₂
359.	lu₂ e-ne lu₂ mu-un-ne-re₇-ec-am₃
360.	lu₂ ^ddumu-zid mu-un-ci-re₇-ec-am₃
361.	u₂ nu-zu-me-ec a nu-zu-me-ec
362.	zid₂ dub-dub-ba nu-gu₇-me-ec
363.	a bal-bal-a nu-na₈-na₈-me-ec
364.	ur₂ dam nij₂ dug₃-ge-ec₂ nu-sig₉-ge-ec
365.	dumu nij₂ ku₇-ku₇-da ne nu-su-ub-me-ec
366.	dumu lu₂ du₁₀-ub-ta ba-ra-an-zig₃-ge-ec
367.	e₂-gi₄-a e₂ ucbar-ra-ka um-ta-an-e₃-ec
368.	^ddumu-zid-de₃ er₂ im-da-pad₃ ce_x(SIG₇)-ce_x(SIG₇) i₃-ja₂-ja₂
369.	juruc-e ^dutu-ra an-ce₃ cu-ni ba-an-na-zig₃
370.	^dutu murum₅-ju₁₀-me-en je₂₆-e mussa-zu-me-en
371.	e₂ ama-zu-ce₃ i₃ gur₃-ru-me-en
372.	e₂ ^dnin-gal-ce₃ ga gur₃-ru-me-en
373.	cu-ju₁₀ cu muc-a u₃-mu-ni-in-cum₂
374.	jiri₃-ju₁₀ jiri₃ muc-a u₃-mu-ni-in-cum₂
375.	gal₅-la₂-ju₁₀ ga-ba-da-kar nam-mu-un-ha-za-ne
376.	[^dutu er₂-na] cu ba-an-ci-in-ti
	{
	(1 ms. adds 1 line:)
376A.	[gal₅-la₂-e-ne] nu-ha-[ha-ne]
	}
377.	[cu-ni cu] muc-a mu-e-ni-cum₂
378.	[jiri₃-ni] jiri₃ muc-a mu-e-ni-cum₂
379.	[gal₅-la₂]-e-ne ba-ni-kar
	{
	(1 ms. adds 1 line:)
379A.	[... muc]-saj-kal 1-gin₇
	}
380.	[... ba-ni]-in-dab₅-be₂-ec-a
381.	[...]-/be₂^?\
382.	[...]-/ec\
383.	kug ^dinana-/ke₄^?\ [...]-ni cag₄-ga-ni nam-DU
384.	kug ^dinana-ke₄ mu-ud-na-ni er₂ gig i₃-ce₈-ce₈
385.	[kug ^dinana-ke₄ ...] [^d]/dumu-zid-de₃\ [(X)] cag₄-ga-ni nam-[DU (...)]
386.	[...] dam-ni [(X X)] a₂-na [...]
387.	[...] NI [(X X)] X [...]
388.	[...]-gin₇ im-mi-[...] /im\-mi-X-[...]
389.	^u₂numun₂ i₃-bur₁₂-re ^u₂numun₂ i₃-ze₂-e
390.	dam lu₂ ur₂-zu-ne-ne [nu₂]-a me dam kal-la-ju₁₀
391.	dumu lu₂ ur₂-zu-ne-ne nu₂-a me dumu kal-la-ju₁₀
392.	[me-am₃] [mu-lu]-/ju₁₀\ me-am₃ mu-un-KAxX-e
393.	[me-am₃] [mu-lu]-/ju₁₀\ me-am₃ mu-un-TAG-TAG X-e
394.	[nim-e kug] ^dinana-ra gu₃ mu-/na\-de₂-e
395.	[je₂₆-e ki] /lu₂^?\-zu ga-mu-re-[pad₃] a-na-am₃ nij₂-ba-ju₁₀-um
396.	[kug] [^dinana]-ke₄ nim-e mu-na-ni-ib-gi₄-gi₄
397.	[za-e ki mu-lu-ju₁₀] ba-ab-pad₃-de₃-en nij₂-ba a-ra-ba-e
398.	[...] /ga\-mu-un-dul-dul
399.	nim-e /kug\ ^dinana-ke₄ im-ma-an-[...]
400.	ki-sikil ^dinana-ke₄ nim-e nam mu-ni-/ib₂\-tar-re
401.	e₂ kac-a-/ka\ zabar JIRI₃^? naj^?-a-ke₄ hu-mu-ra-[X X]-a-ze₂-[(X)]
402.	du₅-mu /lu₂\ kug-zu-ke₄-ne-gin₇ nam X [...]
403.	[i₃-ne-ec₂ nam]-tar-ra ^dinana-ke₄ ur₅ he₂-/en\-na-[nam-ma-am₃]
404.	[...] er₂ im-/ce₈\-ce₈
405.	nin₉^? im-ma-jen cu-ce₃ mu-da-ab-si
406.	i₃-ne-ec₂ me-le-e-a (X) X-/ju₁₀\
407.	/za-e\ mu MAC-am₃ nin₉-zu mu MAC-am₃
408.	ud za-e al di-di-e ud-bi he₂-tuc-[e]
409.	ud nin₉-zu al di-di-e ud-bi he₂-bur₂-[e]
410.	kug ^dinana-ke₄ ^ddumu-zid saj-bi-ce₃ X X bi₂-in-cum₂-/cum₂\-[mu]
411.	kug ^derec-ki-gal-la-ke₄
412.	za₃-mi₂-zu dug₃-ga-am₃

Print sources

Alster 1983: translation, commentary (ll. 230, 231=257, 258, ll. 233-234=258-260)

Alster 1996a: commentary, translation, score transliteration

Bottéro and Kramer 1989, p. 276-290: translation

Jacobsen 1987, p. 205-232: translation

Kramer 1980, p. 299-310: commentary, photograph, translation, composite text

Römer 1993a, p. 458-495: translation, commentary

Sladek 1974: translation, composite text, score transliteration, handcopy, commentary

Electronic sources

Alster 1999: score transliteration

Black 1997d: translation

Civil 1989h: composite text

Krecher 1996a: composite text, translation

Cuneiform sources

BM 17427 (CT 42 2)

BM 67932

BM 69737 (CT 58 50)

BM 80054 (+) BM 80094 (CT 53 49) ***

BM 96680

CBS 9800 (photo RA 34 94f.; PAPS 85 pl. 5)

Ni 368 (BE 31 33; SRT 53; photo RA 36 75)

CBS 11064 + CBS 11088 (r. PBS 5 23; both photo PAPS 85 pl. 6)

CBS n/u (PBS 5 24) ***

CBS 12638 + CBS 12702 + CBS 12752 (all SEM 50)

CBS 12684

CBS 12757 (fig. 2)

CBS 13902 (PBS 5 22)

CBS 13908 (r. SEM 48; photo PAPS 85 pl. 5)

CBS 13932 (SEM 49; photo PAPS 85 pl. 3)

CBS 15162 (PAPS 85 pl. 10)

CBS 15212 (BASOR 79 22f.)

HS 1480 + HS 1580 (both TMH NF 3 2; photo PAPS 107 526f.) + HS 2505 (WK* 13)

N 953 (fig. 8)

N 983 (fig. 5)

N 2523 (fig. 1)

N 2986 (fig. 9)

N 3200

Ni 2279 (BE 31 34)

Ni 2762 (SLTN 29; RA 36 78) + Ni 9838 (ISET 2 17)

Ni 4034 (SLTN 30)

Ni 4187 (ISET 2 11; PAPS 107 525) + Ni 4200 (SLTN 28; RA 36 78)

Ni 9776 (ISET 1 125)

Ni 9685 (JCS 4 124)

UET 6 8

UET 6 9 = U 16873

UET 6 10

UET 6 *269

?UET 6 *306

UET 6 *320

YBC 4621 (JCS 4 212f.)

3N-T211 = IM 58380

3N-T400 = IM 58460

3N-T499 = IM 58522

Revision history

19.iii.1998-10.iv.1998: GC, editor: standardisation
26.iv.1998: JAB, editor: proofreading
27.x.1998: JAB, editor: minor corrections
29.xi.1999: GC, editor: SGML tagging
21.i.2000: ER, editor: prrofreading SGML
21.i.2000: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published