The Electronic Text Corpus of Sumerian Literature

ETCSLtransliteration : c.2.2.2

The lament for Urim

1.	tur₃-ra-na muc₃ mi-ni-in-ga amac-a-na lil₂-e (Cited in OB catalogue from Nibru, at Philadelphia, 0.2.01, line 32; OB catalogue in the Louvre, 0.2.02, line 26; OB catalogue from Urim (U2), 0.2.04, line 44)
2.	am-e tur₃-ra-na muc₃ mi-ni-in-ga amac-a-na lil₂-e
3.	u₃-mu-un kur-kur-ra-ke₄ muc₃ mi-ni-in-ga amac-a-na lil₂-e
4.	^dmu-ul-lil₂-le ec₃-e nibru^ki-a muc₃ mi-ni-in-ga amac-a-na lil₂-e
5.	dam-a-ni ^dnin-lil₂-le muc₃ mi-ni-in-ga amac-a-na lil₂-e
6.	^dnin-lil₂-le e₂-bi ki-ur₃-ra muc₃ mi-ni-in-ga amac-a-na lil₂-e
7.	nin kec₃^ki-a-ke₄ muc₃ mi-ni-in-ga amac-a-na lil₂-e
8.	ga-ca-an-mah-e e₂-bi kec₃^ki-a muc₃ mi-ni-in-ga amac-a-na lil₂-e
9.	mu-lu i₃-si-in^ki-na-ke₄ muc₃ mi-ni-in-ga amac-a-na lil₂-e
10.	ga-ca-an-i₃-si-in^ki-na-ke₄ ec₃ e₂-gal-mah-a muc₃ mi-ni-in-ga /amac\-a-na lil₂-e
11.	nin ki unug^ki-ga-ke₄ muc₃ mi-ni-in-ga [amac]-a-na lil₂-e
12.	ga-ca-an-an-na-ke₄ e₂-bi ki unug^ki-ga muc₃ mi-ni-in-ga amac-a-na [lil₂]-e
13.	^dnanna urim₂^ki-ma muc₃ mi-ni-in-ga amac-a-na [lil₂]-e
14.	^dsuen-e e₂-kic-nu-jal₂-la muc₃ mi-ni-in-ga amac-a-na lil₂-e
15.	dam-a-ni ga-ca-an-gal-e muc₃ mi-ni-in-ga amac-a-na lil₂-e
16.	ga-ca-an-gal-e agrun-kug-ga-na muc₃ mi-ni-in-ga amac-a-na lil₂-e
17.	am uru₂-ze₂-ba^ki-ke₄ muc₃ mi-ni-in-ga amac-a-na lil₂-e
18.	^dam-an-ki-ke₄ e₂-bi uru₂-ze₂-ba^ki-ke₄ muc₃ mi-ni-in-ga amac-a-na lil₂-e
	{
	(1 ms. adds 1 line:)
18A.	ga-ca-an-X-[...] e₂-ba la-ra-ag^ki-a muc₃ mi-ni-in-ga amac-a-na lil₂-e
	}
19.	^dcara e₂-mah-a muc₃ mi-ni-in-ga amac-a-na lil₂-e
20.	^dud-sahar-ra e₂-bi umma^ki-a muc₃ mi-ni-in-ga amac-a-na lil₂-e
21.	^dba-u₂ uru₂-kug-ga muc₃ mi-ni-in-ga amac-a-na lil₂-e
22.	a dug₄-ga ama₅-na muc₃ mi-ni-in-ga amac-a-na lil₂-e
23.	dumu-a-ni ^dab-ba-u₂ muc₃ mi-ni-in-ga amac-a-na lil₂-e
24.	^dab-ba-u₂ ma-gu₂-en-na-ke₄ muc₃ mi-ni-in-ga amac-a-na lil₂-e
25.	^dlamma e₂ kug-ke₄ muc₃ mi-ni-in-ga amac-a-na lil₂-e
26.	^dlamma-e e₂-tar-sir₂-sir₂-ra muc₃ mi-ni-in-ga amac-a-na lil₂-e
27.	um-ma lagac^ki-ke₄ muc₃ mi-ni-in-ga amac-a-na lil₂-e
28.	^dma-ze₂-ze₂-be₂ e₂-bi lagac^ki-ke₄ muc₃ mi-ni-in-ga amac-a-na lil₂-e
29.	mu-lu nijin₆^ki-ke₄ muc₃ mi-ni-in-ga amac-a-na lil₂-e
30.	ga-ca-an gu-la e₂-bi sirara₃^ki muc₃ mi-ni-in-ga amac-a-na lil₂-e
31.	mu-lu ki-nir-ca-ba^ki-ke₄ muc₃ mi-ni-in-ga amac-a-na lil₂-e
32.	^ddumu-zid-abzu e₂-bi ki-nir-ca-ba^ki-ke₄ muc₃ mi-ni-in-ga amac-a-na lil₂-e
33.	mu-lu gu₂-ab-ba^ki-ke₄ muc₃ mi-ni-in-ga amac-a-na lil₂-e
34.	ga-ca-an-mar-ki-ke₄ ec₃ gu₂-ab-ba^ki-ke₄ muc₃ mi-ni-in-ga amac-a-na lil₂-e
35.	ki-ru-gu₂ 1-kam-ma-am₃

36.	amac-a-na lil₂-e ba-ni-in-jar i-si-ic-bi mu-un-kuc₂-u₃
37.	ab₂ gu₃-zu ^e₂tur₃-ra nu-mu-un-jal₂ tur₃ nun nu-ul
38.	jic-gi₄-jal₂-bi-im

39.	uru₂ a-ce-er gig-ga a-ce-er-zu jar-ra
40.	a-ce-er-zu gig-ga-am₃ uru₂ a-ce-er-zu jar-ra
41.	uru₂ zid gul-la-na a-ce-er-bi gig-ga-am₃
42.	urim₂ zid gul-la-na a-ce-er gig-ga a-ce-er-zu jar-ra
43.	a-ce-er-zu gig-ga-am₃ uru₂ a-ce-er-zu jar-ra
44.	urim₂^ki gul-la-na a-ce-er-bi gig-ga
45.	a-ce-er-zu gig-ga ga-ca-an-zu mu-lu er₂-re en₃-ce₃ mu-un-kuc₂-u₃
46.	a-ce-er-zu gig-ga ^dnanna mu-lu er₂-re en₃-ce₃ mu-un-kuc₂-u₃
47.	ce-eb urim₂^ki-ma a-ce-er gig-ga-am₃ a-ce-er-zu jar-ra
48.	e₂-kic-nu-jal₂ a-ce-er-zu gig-ga-am₃ a-ce-er-zu jar-ra
49.	ec₃ agrun-kug a-ce-er gig-ga-am₃ a-ce-er-zu jar-ra
50.	ki-ur₃ ki gal a-ce-er gig-ga-am₃ a-ce-er-zu jar-ra
51.	ec₃ nibru^ki uru₂ a-ce-er gig-ga-am₃ a-ce-er-zu jar-ra
52.	ce-eb e₂-kur-ra a-ce-er gig-ga-am₃ a-ce-er-zu jar-ra
53.	ja₂-jic-cu₂-a a-ce-er gig-ga-am₃ a-ce-er-zu jar-ra
54.	ub-cu-unken-na a-ce-er gig-ga-am₃ a-ce-er-zu jar-ra
55.	ce-eb uru₂-kug-ga a-ce-er gig-ga-am₃ a-ce-er-zu jar-ra
56.	e₂-tar-sir₂-sir₂ a-ce-er gig-ga-am₃ a-ce-er-zu jar-ra
57.	ma-gu₂-en-na a-ce-er gig-ga-am₃ a-ce-er-zu jar-ra
58.	ce-eb i₃-si-in^ki-na a-ce-er gig-ga-am₃ a-ce-er-zu jar-ra
59.	ec₃ e₂-gal-mah a-ce-er gig-ga-am₃ a-ce-er-zu jar-ra
60.	ce-eb ki unug^ki-ga a-ce-er gig-ga-am₃ a-ce-er-zu jar-ra
61.	ce-eb uru₂-ze₂-ba^ki-ke₄ a-ce-er gig-ga-am₃ a-ce-er-zu jar-ra
62.	a-ce-er-zu gig-ga-am₃ ga-ca-an-zu mu-lu er₂-re en₃-ce₃ mu-un-kuc₂-u₃
63.	a-ce-er-zu gig-ga-am₃ ^dnanna mu-lu er₂-re en₃-ce₃ mu-un-kuc₂-u₃
64.	uru₂ mu-zu i₃-jal₂ za-e ba-e-da-gul-e
65.	uru₂ bad₃-zu i₃-il₂ kalam-zu ba-e-da-til
66.	uru₂-ju₁₀ u₈ zid-gin₇ sila₄-zu ba-e-da-tar
67.	urim₂^ki ud₅ zid-gin₇ mac₂-zu ba-e-da-til
68.	uru₂ jarza-zu im-me-de₃-kur₂-ra
69.	me-zu me kur₂-ra cu bal ba-ni-ib-ak
70.	a-ce-er-zu gig-ga-am₃ ga-ca-an-zu mu-lu er₂-re en₃-ce₃ mu-un-kuc₂-u₃
71.	a-ce-er-zu gig-ga-am₃ ^dnanna mu-lu er₂-re en₃-ce₃ mu-un-kuc₂-u₃
72.	ki-ru-gu₂ 2-kam-ma-am₃

73.	uru₂ zid gul-la-na a-ce-er-bi gig-ga-am₃
74.	urim₂^ki gul-la-na a-ce-er-bi gig-ga-am₃
75.	jic-gi₄-jal₂-bi-im

76.	nin lu₂ e₂ hul-a-ta uru₂-ni er₂-re ba-an-di-ni-ib-jar
77.	^dnanna lu₂ kalam ba-an-da-til-la
78.	urim₂^ki-e a-nir-ra bar ba-da-an-tab
79.	munus zid nin uru₂^ki-ni-ce₃ kuc₂-u₃-de₃
80.	^dnin-gal kalam-ma-ni-ce₃ u₃ nu-ku-ku-de₃
81.	e-ne-ra nam uru₂-na mu-na-te er₂ gig i₃-ce₈-ce₈
82.	nin-ra nam e₂-a-na mu-na-te er₂ gig i₃-ce₈-ce₈
83.	nam uru₂ hul-a-na mu-na-te er₂ gig i₃-ce₈-ce₈
84.	nam e₂ hul-a-na mu-na-te a-nir gig-ga-bi im-da-ra-da-ja₂-ja₂
85.	munus-e ad-a-ni balaj er₂-ra ki al-jar-ra-ba
86.	i-lu ma sig₉-ga tur-tur-bi ni₂-te-na mi-ni-ib-be₂
87.	ud-da ma-al-ma-al-la i-si-ic-bi ma-la₂-la₂
88.	ud-da na-aj₂-bi-ce₃ sumur-sumur-a-ju₁₀-ne
89.	lu₂ nu-nus-jen ud-da ma-al-ma-al-la
90.	ud-da ma-al-ma-al-la i-si-ic-bi ma-la₂-la₂
91.	ud-da ud gig-ga ma-ra-ma-al-ma-al-la
92.	me-e ud-bi-ce₃ zarah he₂-em-ci-ak
93.	ud-da a₂-bi-ce₃ ba-ra-ba-ra-e₃-en
94.	ud tur-bi-ce₃ bal-ju₁₀ ud sag₉-ga bal-ju₁₀ ud sag₉-ga i-bi₂ ba-ra-bi₂-in-du₈-a
95.	ji₆-ce₃ a-ce-er gig ma-ra-ma-al-ma-al-la
96.	me-e ji₆-bi-ce₃ zarah he₂-em-ci-ak
97.	ji₆ a₂-bi ba-ra-ba-ra-e₃-en
98.	ud uru₂-gin₇ gul-lu-ba ni₂-bi ha-ma-la₂-la₂
99.	na-aj₂-bi-ce₃ ki-nu₂ ji₆ u₃-na-ja₂ ki-nu₂ ji₆ u₃-na-ja₂ lib ba-ra-an-mar
100.	ud tur-bi-ce₃ ki-nu₂-ja₂ mu-uc-la₂-a-bi ki-nu₂-ja₂ jic-la₂-a-bi nu-ci-in-ga-mu-ni-ib-DU
	{
	(2 mss. add 1 line:)
100A.	ka-na-aj₂-ju₁₀-ta ni₂ cub me-e ba-ra-ba-da-ak
	}
101.	ka-na-aj₂-ju₁₀ aj₂-gig-ga ba-jal₂-la-ke₄-ec
102.	ab₂ amar-ra-gin₇-nam ki cu he₂-em-mi-ib-ak
103.	ka-na-aj₂-ju₁₀ ni₂ cu-a ba-ra-mu-da-ab-gi₄
104.	uru₂-ju₁₀ du-lum gig ba-jal₂-la-ke₄-ec
105.	mucen an-na-gin₇ a₂ dub₂ he₂-em-ci-ak
106.	me-e uru₂-ju₁₀-ce₃ he₂-em-ci-dal-dal-en
107.	uru₂-ju₁₀ ki-jal₂-ba he₂-en-ga-mu-de₃-gul
108.	urim₂^ki ki-nu₂-bi-a he₂-en-ga-mu-de₃-til
109.	cu ud-da an-ta ba-jal₂-la-ke₄-ec
110.	gu₃ hu-mu-dub₂ edin-na ud gi₄-a me-e he₂-em-ma-dug₄
111.	ud-da gaba-bi ba-ra-mu-da-zig₃
112.	nu-nus-jen agrun-kug e₂ na-aj₂-^dga-ca-an-na-ju₁₀
113.	bal-ba ud su₃-ra₂ na-ma-ni-in-jar-re-ec-am₃
114.	er₂ a-ce-er-ra ki ha-ma-ab-us₂-am₃
115.	e₂ ki ur₅ sag₉-ge saj gig₂-ga i₃-me-a-ke₄-ec
116.	ezen-bi-ta ib₂-ba su-mu-ug-ga he₂-en-ga-mu-da-tab-tab-be₂-ec
117.	ud tur-bi-ce₃ e₂-ju₁₀ ki sag₉-ga
118.	e₂ zid hul-a-ju₁₀ i-bi₂ ba-ra-bi₂-in-du₈-am₃
119.	ur₅ uc₂-a a-ce-er aj₂-gig-ga
120.	a-ce-er aj₂-gig-ga hu-mu-ni-tum₂-tum₂-mu-uc
121.	e₂ lu₂ zid-de₃ ba-ab-jar-ra-ju₁₀
122.	gi-sig kiri₆-gin₇ bar-ba he₂-bi₂-in-dub₂
123.	e₂-kic-nu-jal₂ e₂ nam-lugal-la-ju₁₀
124.	e₂ zid e₂ er₂-ra ba-an-di-ni-ib-jar-ra-ju₁₀
125.	lul-e-ec du₃-u₃-ba zid-de₃-ec gul-lu-ba
126.	ha-la ba-bi-a ha-ma-ni-in-jar-re-ec-am₃
127.	za-lam-jar e₂ ki-buru₁₄ bur₁₂-ra-gin₇
128.	e₂ ki-buru₁₄ bur₁₂-ra-gin₇ tum₉ cej₃-ja₂ ha-ba-an-jar
129.	urim₂^ki ama₅ nij₂ dirig-ju₁₀
130.	e₂ uru₂ sig₉-ga mu-un-bur₁₂-bur₁₂-bur₁₂
131.	amac ^lu₂sipad-da-gin₇ ha-ba-bur₁₂-bur₁₂
132.	nij₂-gur₁₁ uru₂ jal₂-jal₂-la-ju₁₀ sug-ge hu-mu-da-ab-gu₇
133.	ki-ru-gu₂ 3-kam-ma-am₃

134.	urim₂^ki er₂-re ba-an-di-ni-ib-jar
135.	jic-gi₄-jal₂-bi-im

136.	ud-ba ud ne-en ba-sag₃-sag₃-ga-ba
137.	nin-da uru₂-ni ba-an-da-gul-la-ba
138.	ud-ba ud ne-en ba-dim₂-dim₂-ma-ba
139.	uru₂-ju₁₀ gul-gul-da im-me-ne-ec-a-ba
140.	urim₂^ki gul-gul-da im-me-ne-ec-a-ba
141.	uj₃-bi ug₅-ge-de₃ a₂ mu-un-aj₂-ec-a-ba
142.	ud-ba me-e uru₂-ju₁₀-ce₃ ja₂-la ba-ra-ba-ra-dag
143.	ka-na-aj₂-ju₁₀-ta ni₂ cub me ba-ra-ba-da-ak
144.	an-ra a i-bi₂-ja₂ me-e he₂-em-ma-na-de₂
145.	^dmu-ul-lil₂-ra ni₂-ju₁₀ cag₄-ne-ca₄ he₂-em-ma-na-ak
146.	uru₂-ju₁₀ nam-ba-gul-lu he₂-em-me-ne-dug₄
147.	urim₂^ki nam-ba-gul-lu he₂-em-me-ne-dug₄
148.	uj₃-bi nam-ba-til-le he₂-em-me-ne-dug₄
149.	an-ne₂ e-ne-ej₃-bi ba-ra-mu-un-gur
150.	^dmu-ul-lil₂-le i₃-sag₉ he₂-am₃-bi cag₄-ju₁₀ ba-ra-bi₂-in-sed₄
151.	2-kam-ma-ce₃ pu-uh₂-rum ki saj-ki ba-da-ab-jal₂-la
152.	^da-nun-na e-ne-ej₃ zu₂ kece₂-da-bi ba-da-an-dur₂-ru-ne-ec-a
153.	ur₂ he₂-em-ma-sud-sud a₂ he₂-em-ma-la₂-la₂
154.	an-ra a i-bi₂-ja₂ me-e he₂-em-ma-na-dug₄
155.	^dmu-ul-lil₂-ra ni₂-ju₁₀ cag₄-ne-ca₄ he₂-em-ma-ak
156.	uru₂-ju₁₀ nam-ba-gul-lu he₂-em-me-ne-dug₄
157.	urim₂^ki nam-ba-gul-lu he₂-em-me-ne-dug₄
158.	uj₃-bi nam-ba-til-le he₂-em-me-ne-dug₄
159.	an-ne₂ e-ne-ej₃-bi ba-ra-mu-un-gur
160.	^dmu-ul-lil₂-le i₃-sag₉ he₂-am₃-bi cag₄-ju₁₀ ba-ra-bi₂-in-sed₄
161.	uru₂-ju₁₀ gul-gul-lu-ba a₂-bi he₂-em-ma-an-aj₂-ec
162.	urim₂^ki gul-gul-lu-ba a₂-bi he₂-em-ma-an-aj₂-ec
163.	uj₃-bi ug₅-ge-de₃ na-aj₂-bi ha-ba-an-tar-re-ec
164.	me-e nij₂-dug₄-ju₁₀ mu-ne-cum₂-ma-gin₇
165.	me-e uru₂-ju₁₀-da he₂-en-ga-mu-un-da-la₂-ec
166.	urim₂^ki-ju₁₀ ma-da he₂-en-ga-mu-da-la₂-e-ec
167.	an-ne₂ dug₄-ga-ni hur nu-kur₂-ru-dam
168.	^dmu-ul-lil₂-le ka-ta e₃-a-ni cu nu-bal-e-de₃
169.	ki-ru-gu₂ 4-kam-ma-am₃

170.	uru₂-ni ba-an-da-gul-la me-ni ba-an-da-kur₂-ra
171.	jic-gi₄-jal₂-bi-im

172.	^den-lil₂-le ud-de₃ gu₃ ba-an-de₂ uj₃-e ce am₃-ca₄
173.	ud he₂-jal₂-la kalam-da ba-da-an-kar uj₃-e ce am₃-ca₄
174.	ud dug₃ ki-en-gi-da ba-da-an-kar uj₃-e ce am₃-ca₄
175.	ud hul-jal₂-e a₂ ba-da-an-aj₂ uj₃-e ce am₃-ca₄
176.	kin-gal-ud-da ud-da gub-ba cu-na im-ma-an-cum₂
177.	ud kalam til-til-e gu₃ ba-an-de₂ uj₃-e ce am₃-ca₄
178.	im-hul-im-hul-e gu₃ ba-an-de₂ uj₃-e ce am₃-ca₄
179.	^den-lil₂-le ^dgibil a₂-tah-a-ni mu-na-ni-in-kur₉-re
180.	ud gal an-na-ke₄ gu₃ ba-an-de₂ uj₃-e ce am₃-ca₄
181.	ud gal-e an-ta gu₃ im-me uj₃-e ce am₃-ca₄
182.	ud kalam til-til-e ki-a mur im-ca₄ uj₃-e ce am₃-ca₄
183.	im-hul-e a mah e₃-a-gin₇ gu₂-bi nu-ja₂-ja₂
184.	^jictukul uru₂-ke₄ saj gaz i₃-ak-e tec₂-bi i₃-gu₇-e
185.	an-na ur₂-ba kana₆^? mu-un-ni₁₀-ni₁₀ uj₃-e ce am₃-ca₄
186.	ud-da igi-ba izi mu-un-bar₇-bar₇-e uj₃-e ce am₃-ca₄
187.	ud mir-mir-da izi-ji₆-edin-na bar ba-da-an-tab
188.	an-bar₇ bar-cej₃ il₂-il₂-la-gin₇ izi im-ma-an-bar₇-bar₇
189.	an-bar₇-gana₂ ud zalag e₃-a ud dug₃-da ba-da-an-tab
190.	kalam-ma ud zalag-ga la-ba-an-e₃ mul an-usan_x(DUR)-gin₇ ba-zal
191.	ji₆ giri₁₇-zal a₂ sed jar-ra-ba ^tum₉u₁₈-lu ba-da-an-tab
192.	cika bar₇-bar₇-re-da sahar im-da-tab-tab uj₃-e ce am₃-ca₄
193.	saj gig₂-ga tum₉-tum₉ ba-an-dal uj₃-e ce am₃-ca₄
194.	ki-en-gi jic-bur₂-ra i₃-bal-e uj₃-e ce am₃-ca₄
195.	kalam-e saj e₂-jar₈ du₃ i₃-ak-e tec₂-bi i₃-gu₇-e
196.	ud gig er₂-re nam nu-tar-re uj₃-e ce am₃-ca₄
197.	ud cu ur₄-ur₄-re kalam i₃-ur₃-ur₃-re
198.	ud a-ma-ru-gin₇ uru₂ i₃-gul-gul-e
199.	ud kalam til-til-e uru₂-a me bi₂-ib-jar
200.	ud nij₂ u₂-gu de₂-de₂ hul-jal₂-ec ba-e-DU
201.	ud izi-gin₇ bar₇-a uj₃-e cu bi₂-ib-jar
202.	ud hul gig dug₄-ga ^den-lil₂-la₂ ud kalam-ta be₄-be₄
203.	urim₂^ki-ma tug₂-gin₇ ba-e-dul gada-gin₇ ba-e-bur₂
204.	ki-ru-gu₂ 5-kam-ma-am₃

205.	ud ug-am₃ al-du₇-du₇ uj₃-e ce am₃-ca₄
206.	jic-gi₄-jal₂-bi-im

207.	ud-ba ud uru₂-da ba-da-an-jar uru₂-bi du₆-du₆-da
208.	a-a ^dnanna uru₂-ni du₆-du₆-da ba-da-an-jar uj₃-e ce am₃-ca₄
209.	ud-ba ud kalam-ta ba-da-an-kar uj₃-e ce am₃-ca₄
	{
	(2 mss. add 1 line:)
209A.	ud dug₃ ki-en-gi-da ba-da-an-kar uj₃-e ce am₃-ca₄
	}
210.	uj₃-bi cika kud-da nu-me-a bar-ba ba-e-si
211.	bad₃-bi gu₂-jiri₃ im-ma-an-jar-jar uj₃-e ce am₃-ca₄
212.	abula mah jiri₃ jal₂-la-ba ad₆ im-ma-an-jar-jar
213.	sila dajal ezem-ma du₃-a-ba saj bal-e-ec ba-ab-jar
214.	e-sir₂-e-sir₂ jiri₃ jal₂-la-ba ad₆ im-ma-an-jar-jar
215.	ecemen kalam-ma jal₂-la-ba uj₃ zar-re-ec ba-an-du₈
216.	u₃-mun kalam-ma-ke₄ urud nagga-gin₇ sur₃-sur₃ ba-ni-in-de₆-ec
217.	ad₆-bi ^uzui₃-udu ud-de₃ jal₂-la-gin₇ ni₂-bi-a mu-un-zal-ec
218.	lu₂ ^urudha-zi-in-e im-til-la-gin₇ saj tug₂ la-ba-ab-dul-ec
219.	mac-da₃ jic-bur₂-ra dab₅-ba-gin₇ ka sahar-ra bi₂-in-us₂
220.	lu₂ jic-gid₂-da mu-un-ra-bi nij₂-la₂ ba-ra-bi₂-in-la₂-ec
221.	i-gi₄-in-zu ki ha-ri-ic-ta ama-ba-ka uc₂-bi-a mu-un-nu₂(source: sa₄)-ec
222.	lu₂ ^jicmitum-e im-til-la-gin₇ tug₂ gibil ba-ra-bi₂-in-la₂-ec
223.	lu₂ kurun naj-a nu-me-ec-a gu₃ zag-ga bi₂-in-jal₂-ec
224.	^jictukul-e gub-ba ^jictukul-e in-gaz uj₃-e ce am₃-ca₄
225.	lu₂-kar-ra-bi ud im-ma-du-bu-ul uj₃-e ce am₃-ca₄
226.	urim₂^ki-ma sig₉-ga kalag-ga-bi cag₄-jar-ra im-til
227.	um-ma ab-ba e₂-ta nu-e₃ izi mu-ni-in-sig₁₀-sig₁₀-ge₅-ec
228.	di₄-di₄-la₂ ur₂ ama-ba-ka nu₂-a ku₆-gin₇ a ba-an-de₆
229.	emeda(UM.ME)^da lirum kalag-ga-bi lirum ba-an-da-du₈
230.	dim₂-ma kalam-ma u₂-gu im-ta-an-de₂ uj₃-e ce am₃-ca₄
231.	jalga kalam-ma sug-ge₄ ba-ab-gu₇ uj₃-e ce am₃-ca₄
232.	ama dumu-ni igi-ni ba-ra-e₃ uj₃-e ce am₃-ca₄
233.	ad-da dumu-ni-ta ba-da-an-kur₂ uj₃-e ce am₃-ca₄
234.	uru₂-a dam ba-cub dumu ba-cub nij₂-gur₁₁ ba-bir-bir-re
235.	saj gig₂ ki-saj-jal₂-la-ba im-me-de₃-re₇-ec
236.	nin-bi mucen ni₂ te-a-gin₇ uru₂-ni ba-ra-e₃
237.	nin-gal-e mucen ni₂ te-a-gin₇ uru₂-ni ba-ra-e₃
238.	nij₂-gur₁₁ kalam-ma jar-jar-ra-ba cu pe-el-la₂ ba-ab-dug₄
239.	ama₅ kalam-ma car₂-car₂-ra-ba izi im-ma-an-bar₇-bar₇
240.	a-nijin₂-ba ^dgibil lu₂ sikil-la kij₂ mu-un-tuku-tuku
241.	hur-saj suku_x(SUKUD)-ra₂ cu nu-tej₃-je₂₆ e₂-kic-nu-jal₂-la
242.	e₂ zid-ba ^urudha-zi-in gal-gal-e tec₂-bi i₃-gu₇-e
243.	cimacki^ki elam^ki lu₂ ha-lam-ma 30 gij₄ ba-an-ak-e-ec
244.	e₂ zid ^jical-a mi-ni-ib-bal-e-ne
245.	uru₂ du₆-du₆-dam mu-un-ja₂-ja₂-ne
246.	nin-bi a uru₂-ju₁₀ im-me a e₂-ju₁₀ im-me
247.	^dnin-gal-e a uru₂-ju₁₀ im-me a e₂-ju₁₀ im-me
248.	lu₂ nu-nus-e u₃ uru₂-ju₁₀ mu-da-gul u₃ e₂-ju₁₀ mu-da-gul
249.	^dnanna ec₃ urim₂^ki mu-da-gul mu-lu-bi ba-ug₅-ga-ec
250.	ki-ru-gu₂ 6-kam-ma-am₃

251.	tur₃-ra-na amac-a-na nu-nus-e inim gig mu-ni-ib-be₂
252.	uru₂ ud-de₃ am₃-gul-e
253.	jic-gi₄-jal₂-bi-im

254.	ama ^dnin-gal uru₂-ni lu₂-erim₂-gin₇ bar-ta ba-da-gub
255.	lu₂ nu-nus-e er₂ e₂ hul-a-na gig-ga-bi im-me
256.	egir₃-re ec₃ urim₂^ki hul-a-na gig-ga-bi im-me
257.	an-ne₂ uru₂-ju₁₀ na-aj₂ ha-ba-da-an-kud uru₂-ju₁₀ hu-mu-da-gul
258.	^dmu-ul-lil₂-le e₂-ju₁₀ cu he₂-bi₂-in-bal ^jical-e ha-ba-ra
259.	sig-ta di-ja₂ izi ha-ba-ni-in-cub a uru₂-ju₁₀ hu-mu-da-gul
260.	^dmu-ul-lil₂-e i-bi₂ nim-ta di-ja₂ u₃-bu-bu-ul ha-ba-ni-in-cub
261.	uru₂ bar-ra uru₂ bar hu-mu-da-an-gul a uru₂-ju₁₀ ga-am₃-dug₄
262.	uru₂ cag₄-ba uru₂ ca₃-ab hu-mu-da-an-gul a uru₂-ju₁₀ ga-am₃-dug₄
263.	e₂ uru₂ bar-ra-ju₁₀ ha-ba-gul-gul a e₂-ju₁₀ ga-am₃-dug₄
264.	e₂ uru₂ ca₃-ba-ju₁₀ ha-ba-gul-gul a e₂-ju₁₀ ga-am₃-dug₄
265.	uru₂-ju₁₀ u₈ zid-gin₇ ba-ra-ma-lu sipad zid-bi ba-ra-jen
266.	urim₂^ki u₈ zid-gin₇ ba-ra-ma-lu kab-bar-bi ba-ra-jen
267.	gud-ju₁₀ tur₃-bi-a ba-ra-mu-un-cub mu-lu-bi ba-ra-jen
268.	e-ze₂-ju₁₀ amac-bi-a ba-ra-mu-un-cub na-gada-bi ba-ra-jen
269.	id₂ uru₂-ja₂-ke₄ sahar ha-ba-nijin₂ e₂ ka₅-a ha-ba-an-du₃
270.	cag₄-ba a zal-le ba-ra-mu-un-de₆ mu-un-kud-bi ba-ra-jen
271.	gana₂ uru₂-ja₂-ke₄ ce ba-ra-ma-al mu-un-gar₃-bi ba-ra-jen
272.	gana₂-ju₁₀ gana₂ ^jical-e ri-a-gin₇ mul-gana₂ bil₂ ha-ba-mu₂
273.	pu₂-kiri₆ lal₃ gurun dirig-ju₁₀ ^jickici₁₆ kur-ra ha-ba-mu₂
274.	edin giri₁₇-zal-bi du₃-du₃-a-ju₁₀ gir₄-gin₇ ha-ba-hur-hur
275.	mu-un-gur₁₁-ju₁₀ buru₄^mucen-dugud zig₃-ga-gin₇ dal-dal-bi ha-ba-ab-in-zig₃ mu-un-gur₁₁-ju₁₀ ga-am₃-dug₄
276.	mu-un-gur₁₁-ju₁₀ sig-ta di-ja₂ sig-ce₃ ha-ba-ab-ir mu-un-gur₁₁-ju₁₀ ga-am₃-dug₄
277.	mu-un-gur₁₁-ju₁₀ i-bi₂ nim-ta di-ja₂ i-bi₂ nim-ce₃ ha-ba-ab-ir mu-un-gur₁₁-ju₁₀ ga-am₃-dug₄
278.	kug za ^na₄za-gin₃-ju₁₀ hu-mu-da-an-bir-bir-re mu-un-gur₁₁-ju₁₀ ga-am₃-dug₄
279.	gi₁₆-sa-ju₁₀ sug-ge₄ hu-mu-da-ab-gu₇ mu-un-gur₁₁-ju₁₀ ga-am₃-dug₄
280.	kug-ju₁₀ lu₂ kug nu-zu-u₃-ne cu-bi ha-ba-da-ab-si
281.	za-ju₁₀ lu₂ za nu-zu-u₃-ne gu₂-bi ha-ba-da-ab-si
282.	buru₅^mucen mucen-ju₁₀ hu-mu-dal-dal a uru₂-ju₁₀ ga-am₃-dug₄
283.	gi₄-in du₅-mu-ju₁₀ ma₂-e ha-ba-ab-lah₄-e-ec a uru₂-ju₁₀ ga-am₃-dug₄
284.	me-li-e-a gi₄-in-ju₁₀ uru₂ kur₂-ra cu-ce-er kur₂ ha-ba-an-dab₅
285.	cul-ju₁₀ edin ki nu-zu-na tug₂-mu-un-dur₇ ha-ba-an-ak
286.	[me-li-e-a uru₂-ju₁₀] nu-me-a me-e ga-ca-an-bi nu-jen
287.	[^dnanna] urim₂^ki nu-me-a me-e lu₂-bi nu-jen
288.	ar₂-mur-ra e₂-ju₁₀ ha-ba-du₃-a uru₂-ju₁₀ ha-ba-gul-la
289.	nu-nus zid-jen uru₂-ju₁₀-ta uru₂ kur₂ ha-ba-ra-du₃-du₃-a
290.	ar₂-mur-ra uru₂-ju₁₀ ha-ba-du₃-a e₂-ju₁₀ ha-ba-gul-la
291.	ga-ca-an-gal-jen uru₂-ju₁₀-ta e₂ kur₂ ha-ba-ra-du₃-du₃-a
292.	me-li-e-a uru₂ mu-da-gul u₃ e₂-ju₁₀ mu-da-gul
293.	^dnanna ec₃ urim₂^ki mu-da-gul mu-lu-bi ba-ug₅-ga-ec
294.	me-li-e-a me-a tuc-u₃-de₃ me-a gub-bu-de₃
295.	me-li-e-a uru₂-ju₁₀-ta e₂ kur₂ ma-ra-an-du₃-u₃-de₃
296.	nu-nus zid-jen e₂-ju₁₀-ta uru₂ kur₂ ma-ra-an-ja₂-ja₂-de₃
297.	ki-bi-ta edin-ta ba₉-ra₂-a-bi a mu-lu-ju₁₀ ga-am₃-dug₄
298.	uru₂-ju₁₀ urim₂^ki-ta ba₉-ra₂-a-bi a uru₂-ju₁₀ ga-am₃-dug₄
299.	lu₂ siki-ni numun₂-bur-gin₇ cu mu-ni-in-dub₂-dub₂
300.	gaba-ni ub₃ kug-ga-am₃ i₃-sag₃-ge a uru₂-ju₁₀ im-me
301.	igi-ni er₂-ra mi-ni-ib-zi-zi-i-zi er₂ gig i₃-ce₈-ce₈
302.	me-li-e-a uru₂-ju₁₀ nu-me-a me-e ga-ca-an-bi nu-jen
303.	^dnanna ec₃ urim₂^ki nu-me-a me-e mu-lu-bi nu-jen
304.	me-li-e-a ^e₂tur₃ bur₁₂-ra-jen ab₂ sag₂ dug₄-ga-jen
305.	^dga-ca-an-gal-jen na-gada pe-el-la₂-gin₇ ^jictukul ganam₄-ma bi₂-in-cub
306.	me-li-e-a uru₂-ta e₃-a-jen ni₂ nu-dub₂-bu-jen
307.	^dga-ca-an-gal-jen e₂-ta e₃-a-jen ki-tuc nu-pad₃-de₃-jen
308.	i-gi₄-in-zu gir₅ uru₂ kur₂-ra saj il₂ tuc-a-jen
309.	e₂ ur₅-ur₅-ra aj₂-gig-ga-am₃ saj-a tuc ma-ab-us₂-e
310.	e₂ ur₅-ra mu-lu tuc-bi tuc-tuc-a gu₃ e-ne-ej₃ nu-dirig-jen
311.	ki-ba nam uru₂-na mu-un-na-te er₂ gig i₃-ce₈-ce₈
312.	nin-ra nam e₂-a-na mu-un-na-te er₂ gig i₃-ce₈-ce₈
313.	nam e₂ hul-a-na mu-un-na-te er₂ gig i₃-ce₈-ce₈
314.	nam uru₂ hul-a-na mu-un-na-te er₂ gig i₃-ce₈-ce₈
315.	me-li-e-a na-aj₂ uru₂-ju₁₀ ga-am₃-dug₄ na-aj₂ uru₂-ju₁₀ gig-ga-am₃
316.	nin-jen e₂ gul-la-ju₁₀ ga-am₃-dug₄ na-aj₂ e₂-ju₁₀ gig-ga-am₃
317.	ce-eb urim₂^ki-ma a dug₄-ga-am₃ a bi₂-gi₄-a-ju₁₀
318.	e₂ zid-ju₁₀ uru₂-ju₁₀ du₆-du₆-da ba-mar-re-en-na-ju₁₀
319.	bur₂-ra e₂ zid gul-la-za-ka ba-e₃-de₃-nu₂-u₃-nam
320.	gud cub-ba-gin₇ in-jar-zu-ta ba-ra-mu-e-da-zig₃-ga
321.	me-li-e-a du₃-a-zu lul-la-am₃ gul-la-zu gig-ga-am₃
322.	nu-nus-jen ec₃ urim₂^ki nidba-bi i₃-ba-kur₂-ra-am₃
323.	agrun-kug e₂ gibil-gibil-la-ju₁₀ la-la-bi nu-gi₄-a-ju₁₀
324.	uru₂-ju₁₀ du₃-a la-ba-mar-ra-ju₁₀ ta-a-ac hul-a-ju₁₀
325.	ba-gul in-ga-ba-hul-a-ju₁₀ ta-a-ac hul-a-ju₁₀
326.	a-da-al ud hul gig dug₄-ga a₂-bi la-ba-ra-e₃
327.	urim₂^ki-ma e₂ ^dsuen-na-ju₁₀ gul-la-bi gig-ga-am₃
328.	ki-ru-gu₂ 7-kam-ma-am₃

329.	a uru₂-ju₁₀ a e₂-ju₁₀
330.	jic-gi-jal₂-bi-im

331.	nin cag₄-zu a-gin₇ du₃-mu-un za-e a-gin₇ i₃-til₃-le-en
332.	^dnin-gal cag₄-zu a-gin₇ du₃-mu-un za-e a-gin₇ i₃-til₃-le-en
333.	munus zid lu₂ uru₂ ba-e-da-gul-la i₃-ne-ec₂-gin₇ i₃-e-am₃-mu₂
334.	^dnin-gal lu₂ kalam ba-e-da-til-la cag₄-zu a-gin₇ du₃-mu-un
335.	ud uru₂-zu im-ma-gul-la-ba i₃-ne-ec₂-gin₇ i₃-e-am₃-mu₂
336.	ud e₂-zu im-ma-gul-la-ba cag₄-zu a-gin₇ du₃-mu-un
337.	uru₂-zu uru₂ kur₂-ra ba-ab-jar i₃-ne-ec₂-gin₇ i₃-e-am₃-mu₂
338.	e₂-zu er₂-re ba-an-di-ni-ib-jar cag₄-zu a-gin₇ du₃-mu-un
339.	uru₂ du₆-du₆-da ba-jar-ra-zu mucen-bi nu-jen
340.	e₂ zid ^jical-e ba-jar-ra-za tuc-bi-ce₃ la-ba-tuc-en
341.	uj₃ ki-lul-la ba-ab-re₇-a-za nin-bi-ce₃ la-ba-kur₉-re-en
342.	er₂-zu er₂ kur₂-ra ba-ab-jar ka-na-aj₂-zu nu-ce₈-ce₈
343.	er₂-cag₄-ne-ca₄ nu-tuku-am₃ kur-kur im-ma-an-tuc
344.	kalam-zu nij₂ KA dirig-gin₇ gu₃ cu ba-ni-ib-dab₅
345.	uru₂-zu du₆-du₆-da im-ma-an-jar i₃-ne-ec₂-gin₇ i₃-e-am₃-mu₂
346.	e₂-zu cag₄-sug₄-ga ba-an-du₃ cag₄-zu a-gin₇ du₃-mu-un
347.	urim₂^ki ec₃ lil₂-e im-ma-an-jar i₃-ne-ec₂-gin₇ i₃-e-am₃-mu₂
348.	gudug-bi hi-li-a ba-ra-mu-un-jen cag₄-zu a-gin₇ du₃-mu-un
349.	en-bi ji₆-par₃-ra ba-ra-mu-un-til i₃-ne-ec₂-gin₇ i₃-e-am₃-mu₂
350.	uz₃-ga lu₂ cu-luh-e ki aj₂-e cu-luh nu-mu-ra-an-ja₂-ja₂
351.	a-a ^dnanna icib-zu cita kug-ga cu nu-mu-ra-ni-in-du₇
352.	lu₂-mah-zu gi-gun₄-na kug-zu cag₄ gada la-ba-an-la₂
353.	en zid cag₄ hi-li-a pad₃-da-zu e₂-kic-nu-jal₂-la-am₃
354.	/ec₃^?\-da ji₆-par₃-ce₃ hul₂-la-na nu-mu-ni-in-dib-dib-be₂
355.	a-u₃-a e₂ ezem-ma-za ezen nu-mu-ni-in-dug₃-ge-ec
356.	cem₃ ^kuca₂-la₂-e nij₂ cag₄ hul₂-le-da tigi-a nu-mu-ra-an-du₁₂-uc
357.	uj₃ saj gig₂-ga ezen-zu-ce₃ a la-ba-an-tu₅-tu₅-ne
358.	gu-gin₇ mu-dur₇-ra nam ha-ba-ni-in-tar ulutim₂-bi ha-ba-an-kur₂
359.	en₃-du-zu er₂-ra ba-e-da-an-kur₉ en₃-tukum-ce₃ mu₂
360.	tigi-zu a-nir-ra ba-e-da-an-kur₉ en₃-tukum-ce₃ mu₂
361.	gud-zu tur₃-bi-a ba-ra-mu-un-de₆ i₃-bi nu-mu-ra-ak-e
362.	udu-zu amac-bi-a ba-ra-mu-un-dur₂-ru ga-bi nu-mu-ra-dulu-e
363.	i₃ gur₃-ru-zu tur₃-ta nu-mu-ra-de₆ en₃-tukum-ce₃ mu₂
364.	ga gur₃-ru-zu amac-ta nu-mu-ra-de₆ en₃-tukum-ce₃ mu₂
365.	cu-pec ku₆ gur₃-ru-zu hul-jal₂-e ba-an-dab₅ en₃-tukum-ce₃ mu₂
366.	mucen-du₃ mucen gur₃-ru-zu jir₂-jir₂-re im-DU
367.	id₂ ma₂-gur₈-ra ba-ab-du₇-a-zu cag₄-ba teme^sar ba-mu₂
368.	har-ra-an ^jicgigir-ra ba-ab-jar-ra-za ^jickici₁₆(source: U₂.JIC.JIR₂) kur-ra ba-mu₂
369.	nin-ju₁₀ uru₂-zu ama-bi-gin₇-nam er₂ mu-e-ci-ce₈-ce₈
370.	urim₂^ki-ma dumu sila ha-lam-ma-gin₇ ki mu-e-ci-kij₂-kij₂
371.	e₂-zu lu₂ nij₂ u₂-gu de₂-a-gin₇ cu mu-e-ci-ca-an-ca
372.	ceg₁₂ e₂ zid-da-zu lu₂-ulu₃-gin₇ me-a-zu im-me
373.	nin-ju₁₀ e₂-ta e₃-a he₂-me-en uru₂-ta ba-ra-e₃-me-en
374.	en₃-ce₃-am₃ uru₂-za lu₂-erim₂-gin₇ bar-ta ba-e-da-gub
375.	ama ^dnin-gal uru₂-zu lu₂-erim₂-gin₇ gaba-za ba-e-de₃-sa₂
376.	nin uru₂-ni ki aj₂ he₂-me-en-na amac-zu-ta ba-e-ni-tag
377.	kalam-ma-ni-ce₃ kuc₂-u₃ he₂-me-en-na za-e izi-ba mu-un-tag
378.	ama ^dnin-gal gud-gin₇ tur₃-zu-ce₃ udu-gin₇ amac-zu-ce₃
379.	gud-gin₇ tur₃ ud-bi-ta-ce₃ udu-gin₇ amac-zu-ce₃
380.	dumu ban₃-da-gin₇ ama₅-zu-ce₃ nin-ju₁₀ e₂-zu-ce₃
381.	an lugal dijir-re-e-ne-ke₄ muc₃-am₃-zu he₂-em-me
382.	^den-lil₂ lugal kur-kur-ra-ke₄ nam-zu he₂-eb-tar-re
383.	uru₂-zu ki-bi ha-ra-ab-gi₄-gi₄ nam-nin-bi ak-a
384.	nibru^ki ki-bi ha-ra-ab-gi₄-gi₄ nam-nin-bi ak-a
385.	urim₂^ki ki-bi ha-ra-ab-gi₄-gi₄ nam-nin-bi ak-a
386.	i₃-si-in^ki ki-bi ha-ra-ab-gi₄-gi₄ nam-nin-bi ak-a
387.	ki-ru-gu₂ 8-kam-ma-am₃

388.	me-ju₁₀ mu-da-kur₂-ra-am₃
389.	jic-gi₄-jal₂-bi-im

390.	e ud-de₃ ud-de₃ kalam tec₂-a mi-ni-ib-ra
391.	ud gal an-na-ke₄ ud gu₃ dub₂-dub₂-be₂
392.	ud gig-ga kalam-ma ba-e-zal-la re
393.	ud uru₂ gul-gul-e ud e₂ gul-gul-e
394.	ud tur₃ gul-gul-e ud amac tab-tab-be₂
395.	jarza kug-ga cu bi₂-ib₂-la₂-a re
396.	jalga nij₂ aratta^ki-ka cu pe-el-la₂ im-mi-ib-dug₄-ga re
397.	ud kalam-ma nij₂ dug₃ im-mi-ib-kud-da re
398.	ud saj gig₂-ga a₂ bi₂-ib-la₂-a re
399.	ki-ru-gu₂ 9-kam-ma-am₃

400.	ud re ud igi-ba tec₂ nu-jal₂-la re
401.	jic-gi₄-jal₂-bi-im

402.	ud ama nu-zu re ud a-a nu-zu re
403.	ud dam nu-zu re ud dumu nu-zu re
404.	ud nin₉ nu-zu re ud cec nu-zu re
405.	ud ucur nu-zu re ud ma-la nu-zu re
406.	ud dam im-cub-ba ud dumu im-cub-ba re
407.	ud-de₃ ud kalam-ma u₂-gu bi₂-ib-de₂-a re
408.	ud hul gig dug₄-ga ^den-lil₂-la₂-ta im-mi-in-zal-la re
409.	a-a ^dnanna ud-bi uru₂-zu-ta ki nam-ba-ja₂-ja₂
410.	uj₃ saj gig₂-zu igi-«zu» nam-bi₂-ib-du₈
411.	ud-bi im an-ta cej₃-je₂₆-gin₇ ki-tuc-bi nam-ba-gur-ru
412.	nij₂-zi-jal₂ an ki saj gig₂ im-ma-an-dub₂-ba re
413.	ud-ba du₃-a-bi he₂-em-ma-gul-lu
414.	abula ji₆ u₃-na-gin₇ ^jicig he₂-bi₂-in-kece₂-da
415.	ud-ba cudum-ma na-an-ni-ja₂-ja₂
416.	nij₂-kas₇-bi e₂ ^den-lil₂-la₂-ta ^jicgag-ta he₂-em-ta-si-ig
417.	ki-ru-gu₂ 10-kam-ma-am₃

418.	ud ul ud kur₂-ra ud-da ejer-bi-ce₃
419.	jic-gi₄-jal₂-bi-im

420.	ud ul kalam ki jar-ra-ce₃
421.	^dnanna lu₂ sun₅^!-na jiri₃-zu mu-un-dab₅-be₂
422.	er₂ e₂ sig₉-ga-bi mu-ra-an-de₆ igi-zu-ce₃ du₁₂-a-bi
423.	saj gig₂ ba-ra-cub-bu-uc-a-bi giri₁₇ cu ha-ra-ab-tag-ge-ne
424.	uru₂ du₆-du₆-da ba-an-jar-ra-za i-si-ic hu-mu-ra-an-ja₂-ja₂
425.	^dnanna uru₂^ki ki-bi gi₄-a-za pa e₃ ha-ra-ab-ak-e
426.	mul-an kug-gin₇ nam-mu-un-ha-lam-e igi-zu he₂-bi₂-ib-dib₂-be₂
427.	dijir lu₂-u₁₈-lu-ke₄ kadra mu-ra-an-de₆
428.	lu₂ sizkur₂-ra-ke₄ a-ra-zu mu-ra-ab-be₂
429.	^dnanna arhuc kalam-ma-me-en
430.	en ^dac-im₂-babbar cag₄-zu im-mi-ib-dug₄-ga re
431.	^dnanna lu₂-ulu₃-bi nam-tag-ga-ni u₃-mu-e-du₈
432.	lu₂ a-ra-zu im-me-a-bi cag₄ ha-ba-na-huj-e
	{
	(3 mss. add 1 line:)
432A.	dijir lu₂-ba-ke₄ kadra(source: JAR.CAG₄.JAR) mu-ra-an-de₆
	}
433.	lu₂ sizkur₂-ra mu-un-gub-ba-bi-ir igi zid mu-un-ci-in-bar
434.	^dnanna igi du₈-a bar-ra-zu cag₄ cu nijin sug₄-ga-am₃
435.	lu₂-ulu₃-bi ud hul du₃-a-ba he₂-em-ma-an-ci-kug-ge
436.	cag₄ kalam-ma jal₂-la-zu he₂-em-ma-an-ci-kug-ge
437.	^dnanna uru₂ ki-bi gi₄-a-za me-tec₂ he₂-i-i
438.	ki-ru-gu₂ 11-kam-ma-am₃

Print sources

Jacobsen 1987, p. 447-477: translation, commentary

Klein 1997a: commentary, translation (partial translation)

Kramer 1940, p. 16-71: translation, composite text, commentary

Rosengarten 1971, p. 39-132: translation, commentary

Witzel 1945: composite text, translation, commentary

Witzel 1946: commentary

Electronic sources

Civil 1989k: composite text

Krecher 1996b: composite text, translation

Vanstiphout 1998f: score transliteration

Cuneiform sources

AO 6446 (TCL 16 40)

Ash 1932,415 (OECT 5 12)

Ash 1932,522 (OECT 5 15)

Ash 1932,526j (OECT 5 13)

Ash 1932,526o (OECT 5 14)

CBS 2191

CBS 2204 + CBS 2270 + CBS 2302 + CBS 19751 (MBI 6) + N 3144

CBS 3878 (STVC 22) + CBS 3901 + CBS 3927 + CBS 9316 + CBS 11078

CBS 4584 (PBS 10/2 10)

CBS 6889 (STVC 19) + CBS 6905 (STVC 20) + CBS 8023

CBS 7975 (STVC 21) + CBS 14234 (PBS 13 20) + UM 29-16-246

CBS 7080 (PBS 10/4 11; photo MJ 9 157) + CBS 14110 (STVC 17) + N 3076

CBS 8079 (STVC 23)

CBS 8336

CBS 10227 (STVC 33) + N 2569

CBS 11555

CBS 12512

CBS 13593 + CBS 13605 + CBS 13624 + CBS 13630 + CBS 13631

CBS 13911 (STVC 24)

CBS 15091

CBS 15135

CBS 15179 + HS 1426 (TMH NF 4 18) + HS 1427 (TMH NF 4 19) + HS 1452 (TMH NF 4 21) + HS 1575 (TMH NF 4 20) + HS 1579 (TMH NF 4 22) + HS 2504 (WK 58; join photo WK pl. 5f.)

CBS 19827

CBS n/u (STVC 18)

HS 1487 (TMH NF 4 24)

HS 1510 (TMH NF 4 25)

HS 1553 (TMH NF 4 23)

MAH 15861 (photo JNES 29 pl. 1)

MAH 16015 (photo JNES 29 pl. 2)

N 1331

N 1810

N 3182 + N 3283 + N 3301

N 3267

N 3609

N 3621 = N 4253?

N 3752

N 6270 + Ni 4496 (ISET 1 100)

Ni 1162 (SLTN 97)

Ni 2401 (SLTN 95; AS 12 pl. 3)

Ni 2510 (SRT 32)

Ni 2518 (SRT 45)

Ni 2780 (SLTN 94; AS 12 pl. 1f.)

Ni 2911 (SLTN 99; AS 12 pl. 4)

Ni 3166 (SLTN 96; AS 12 pl. 4)

Ni 4024 (SLTN 98; AS 12 pl. 4)

Ni 4074 (TAD 8/2 pl. 35)

Ni 4116 (TAD 8/2 pl. 6)

Ni 4296

Ni 4383

Ni 4424 (ISET 1 95)

Ni 4429 (ISET 1 95)

Ni 4459 (ISET 1 81)

Ni 4474 (ISET 1 107)

Ni 4566

Ni 9586 (ISET 1 147)

Ni 9599 (ISET 1 115)

Ni 9623 (ISET 1 118)

Ni 9822 (ISET 1 139)

Ni 9969 (ISET 1 142)

PUL 550 (RA 63 5ff.)

U 16900N (var. with UET 6 137)

UET 6 135 = U 8840

UET 6 136 = U 16900J

UET 6 137 = U 16900K

UET 6 138 = U 16900L

UET 6 139 = U 16900M

UET 6 *290

UM 29-13-240

UM 29-16-153

UM 29-16-244

UM 29-16-397

UM 29-16-774 + UM 29-16-778

UM 29-16-786

UM 29-16-789

VAT 4595 (VAS 10 171)

3N-T357 = IM 58443

3N-T416 = IM 58468

3N-T458 = IM 58492

3N-T492 = IM 58517

3N-T519 = IM 58532

3N-T546 = IM 58544

3N-T553 = IM 58548

3N-T680 = IM 58615

3N-T901,41

3N-T901,46

3N-T902,88

3N-T904,151

3N-T906,233

3N-T906,241

3N-T918,414

3N-T918,420

3N-T921ii = A 33551

YBC 4661

YBC 7159

Revision history

23.vii.1998-21.viii.1998: GC, editor: standardisation
11.ix.1998: JAB, editor: proofreading
09.xi.1999: GC, editor: SGML tagging
15.xii.1999: ER, editor: proofreading SGML
14.xii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published