ETCSLtransliteration : c.1.4.1.1 ETCSL homepage

Dumuzid and Ĝeštin-ana

1. gal5-la2 tur ka ba-a-ci-ba9-re6 gal5-la2 gu-la-ra gu3 mu-na-de2-e
2. ja2-nam-ma-an-ze2-en ur2 kug dinana-ka-ce3 ga-da-re7-en-de3-en
3. gal5-la2 unugki-ce3 ba-ni-in-kur9-re-ec kug dinana-ke4 mu-ni-in-dab5-be2-ne
4. ja2-nu dinana kaskal-zu-ce3 ni-ba jen-na kur-ce3 ed3-de3
5. ki cag4-ge de6-a-zu-ce3 jen-na kur-ce3 ed3-de3
6. ki derec-ki-gal-la-ce3 jen-na kur-ce3 ed3-de3
7. tug2-ba13 kug tug2pala3-a tug2 nam-nin-zu nam-ba-mu4-mu4-un kur-ce3 ed3-de3
8. men kug me-te ka silim-ma saj-zu-a um-ta-ja2-ar kur-ce3 ed3-de3
9. hi-li-a igi-zu la-ba-ni-in-du7 kur-ce3 ed3-de3
10. UR NU TUR jiri3-zu [...]-du8-du8 kur-ce3 ed3-de3
11. ud za-e ed3-[de3-da ...] nu-BU-BU
12. kug dinana-ke4 mu-un-bur2-bur2-re-ec [...]-ga-de3-ec
13. dinana ni2-te-na ddumu-zid cu-ce3 ba-an-cum2
14. juruc-e jic<rab3> mah jiri3-ni im-ma-an-jar-re-en-de3-en
15. juruc-e jices2-ad <cu-ni> cub-bu-de3-en-de3-en jic-gu2 gu2-ni jar-re-en-de3-en
16. urud-henzer urudkibir2 urudcukur mah-e igi-ni-ce3 ba-an-ci-ib2-il2-il2
17. urudha-zi-in gal-gal-la u3-sar i3-ak-e-ne
18. juruc-e mu-ni-in-gub-bu-de3-ec mu-ni-in-dur2-de3-ec
19. tug2-gun5-na-ni cub-bu-de3-en-de3-en UC KUM gub-bu-de3-en-de3-en
20. juruc-e a2-na mu-un-la2-e-de3-ec tug2-ec huhul mu-un-ci-ak-ec
21. tug2 ni2-te-na igi-na mu-ni-in-dul-u3-de3-ec
22. juruc-e dutu-ra an-ce3 cu-ni ba-an-ci-zig3(source: mu)
23. dutu gu5-li-zu je26-e-me-en cul-me-en za-e mu-zu
24. nin9-zu nam-dam-ce3 ba-an-tuku-a
25. e-ne kur-ce3 ed3-de3
26. mu e-ne kur-ce3 ed3-de3
27. je26-e ki-jar-ra-bi-ce3 kur-ce3 ba-ab-cum2-mu-de3
28. dutu di-kud nij2-si-sa2 za-e-me-en nam-ba-lul-de3
29. cu-ja2 u3-mu-e-kur2 ulutim2-ju10 u3-mu-e-bal
30. cu gal5-la2-ju10-ne ga-ba-e-da-an-ze-er nam-mu-ha-a-za-ac
31. muc-saj-kal-gin7 cag4-tum2 hur-saj-ja2 mu-ni-in-bal-bal
32. ki nin9 djectin-an-na-ce3 zi-ju10 ga-ba-an-ci-in-de6
33. dutu er2-na cu ba-an-ci-in-ti
34. cu-ni mu-ni-in-kur2-kur2 ulutim2-ma-ni mu-ni-in-bal-bal
35. muc-saj-kal-gin7 cag4-tum2 hur-saj-ja2 mu-ni-in-bal-bal
36. ddumu-zid-de3 mucen-ce3 sur2-du3mucen dal-a-gin7 zi-ni ur5-da i3-cub-ba
37. ki djectin-an-na-ce3 zi-ni ba-ci-in-de6
38. [d]jectin-an-na cec-a-ni igi ba-ni-in-du8-am3
39. te-na mu-ni-in-hur-hur giri17-na mu-ni-in-hur-hur
40. igi-ni zag-ga-na mi-ni-in-du8 tug2-ni mi-ni-in-da-da-ra
41. juruc aj2-gig-ra i-lu aj2-gig-ga hu-mu-ni-ib2-be2
42. a cec-ju10 a cec-ju10 juruc ud-bi nu-um-[si]
43. a cec-ju10 su8-ba dama-ucumgal-an-na juruc ud-bi mu!-bi nu-um-si
44. a cec-ju10 juruc dam nu-tuku dumu nu-tuku
45. a cec-ju10 juruc gu5-li nu-tuku dub3-us2-sa nu-tuku
46. a cec-ju10 juruc ama-ni sag9-ga-ni nu-du8
47. gal5-la2 ddumu-zid-de3 mu-ni-in-kin-kin-ne mu-ni-in-nijin2-nijin2-na-ec
48. gal5-la2 tur gal5-la2 gu-la-ra gu3 mu-na-de2-e-ne
49. gal5-la2 ama nu-tuku ad-da ama nin9 cec dam dumu nu-tuku-me-ec
50. ud me-da gal? uj3 UC jar-ra an ki-ta ri-a-bi
51. za-e-ne-ne gal5-la2-ze2-en lu2 zag-ga-ni gi-cukur-gin7
52. cu jar sag9-ga nu-tuku-me-ec sag9-ga hul nu-zu-me-ec
53. lu2-u3 e2 nu ni2-te-na zi-ni silim-ma a-ba-a igi mi-ni-in-du8
54. ki gu5-li-bi nu-um-ci-du!-de3-en ki mussa-bi nu-um-ci-du-de3-en
55. su8-ba-ra ki djectin-an-na-ka-ce3 ga-an-ci-re7-en-de3-en
56. gal5-la2-e-e-ne cu-ta ba-ab-sag3-sag3-ge-me-ec mu-ni-in-kin-kin-ne-ec
57. i-lu-bi ka-ga14-na nu-mu-un-til-la-am3
58. gal5-la2 ki djectin-an-na-ce3 ba-e-ci-re7re-ec
59. ki cec-zu la2-ma-ra-ab e-ne mu-ni-ib2-be2-e-ne inim-bi nu-mu-na-ab-be2
60. hab ni2-te ki ur2-ra ba-ni-in-ze2-ej3 inim-bi nu-mu-na-ab-be2
61. X ni2-te ki igi-na ba-ni-in-hur-hur inim-bi nu-mu-na-ab-be2
62. kuc ni2-te ki dur2-na ba-ni-in-kar2-kar2 inim-bi nu-mu-na-ab-be2
63. esir2 ur2-ra-na ba-ni-in-de2-de2 inim-bi nu-mu-na-ab-be2
64. ddumu-zid-de3 e2 djectin-an-na-ke4 nu-um-me-ni-in-pad3-de3
65. gal5-la2 [tur gal5]-la2 gu-la-ra gu3 mu-na-de2-e-ne
66. ja2-/nam\-[ma-an-ze2]-/en\ amac kug-ga-ce3 ga-an-ci-re7-de3-en
67. ddumu-zid-de3 amac [kug-ga]-/ta\ mu-ni-in-dab5-be2-de3-ec
68. mu-ni-in-nijin2-nijin2-ne-ec [mu-ni-in]-dab5-be2-de3-ec
69. mu-ni-in-kin-ne-ec igi ba-ni-in-du8-am3
70. juruc-ra e2 nu-nam-ma urudha-zi-in cu jal2 ba-ci-in-ti
71. jiri2-ur3-ra mu-ni-in-sar-sar-re-ec ki-sig9-ga mu-ni-in-dub2-ec
72. nin9-e na-aj2 cec-na-ce3 iri-a mucen-gin7 im-ma-an-nijin2-nijin2
73. cec-ju10 aj2-gig-ga gal cu ga-de6 ja2-na me ga-an-te

Print sources

Sladek 1974, p. 225-239: composite text, translation, commentary

Electronic sources

Black 1997a: translation

Krecher 1996a: composite text, translation

Cuneiform sources

UET 6 11

UET 6 *29 + UET 6 *73 + UET 6 *89


Revision history

15.i.1998-16.i.1998: JAB, editor: standardisation
29.i.1998: GZ, editor: proofreading
20.vii.1999: GZ, editor: minor corrections
20.vii.1999: GZ, editor: SGML tagging
31.vii.1999: ER, editor: proofreading SGML
31.vii.1999: ER, editor: web publication
01.vi.2003: GC/JE, editor/technical developer: XML/TEI conversion
30.iii.2005: GC/JE, senior editor/technical developer: lemmatised version published

ETCSL homepage

© Copyright 2003, 2004, 2005, 2006 The ETCSL project, Faculty of Oriental Studies, University of Oxford
Updated 2006-12-19 by JE

University of Oxford