The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


Enki and Ninhursanga: composite text

1iriki kug-kug-ga-am3 e-ne ba-am3-me-en-ze2-en kur dilmunki kug-ga-am3
2ki-en-gi kug-ga e-ne ba-am3-me-en-ze2-en kur dilmunki kug-ga-am3
3kur dilmunki kug-ga-am3 kur dilmun sikil-am3
4kur dilmunki sikil-am3 kur dilmunki dadag-ga-am3
5dili-ni-ne dilmunki-a u3-bi2-in-nu2
6ki den-ki dam-a-ni-da ba-an-da-nu2-a-ba
7ki-bi sikil-am3 ki-bi dadag-ga-am3
8dili-ni-ne dilmunki-a u3-bi2-in-nu2
9ki den-ki dnin-sikil-la ba-an-da-nu2-a-ba
10ki-bi sikil-am3 ki-bi dadag-ga-am3
11dilmunki-a ugamucen gu3 gu3 nu-mu-ni-be2
12darmucen-e gu3 darmucen-re nu-mu-ni-ib-be2
13ur-gu-la saj jic nu-ub-ra-ra
14ur-bar-ra-ke4 sila4 nu-ub-kar-re
15ur-gi7 mac2 gam-gam nu-ub-zu
16cah2 ce gu7-gu7-e nu-ub-zu
17nu-mu-un-su2 munu4 ur3-ra barag2-ga-ba
18mucen-e an-na munu4-bi na-an-gu7-e
19tumucen-e saj nu-mu-un-da-ru-e
20igi-gig-e igi-gig-me-en nu-mu-ni-be2
21saj-gig-e saj-gig-me-en nu-mu-ni-be2
22um-ma-bi um-ma-me-en nu-mu-ni-be2
23ab-ba-bi ab-ba-me-en nu-mu-ni-be2
24ki-sikil a nu-tu5-a-ni iri-a nu-mu-ni-ib-sig10-ge
25lu2 id2-da bal-e ji6-de3 nu-mu-ni-be2
26nijir-e zag-ga-na nu-um-nijin
27nar-e e-lu-lam nu-mu-ni-be2
28zag iri-ka i-lu nu-mu-ni-be2
29dnin-sikil-la a-a-ni den-ki-ra gu3 mu-na-de2-e
30iri mu-e-cum2 iri mu-e-cum2 nam-ju10 cum2-ma-zu
31dilmun iri mu-e-cum2 iri <mu-e-cum2 nam-ju10 cum2-ma-zu>
32[X X] mu-e-cum2 iri <mu-e-cum2 nam-ju10 cum2-ma-zu>
33[iri kar] id2-da nu-un-tuku-a
34[X X] mu-e-cum2 iri <mu-e-cum2 nam-ju10 cum2-ma-zu>
35[...] X [...] X
36[iri a-cag4] a-gar3 [ab-sin2 nu-un-tuku]-a
3 lines missing
40[dutu an-na gub-be2-e]
41[giri16 DU-a gaba EZENki-na-ta]
42[e2-suhur si dnanna-a-ta]
43[ka a ki-a DU-DU-ta a dug3 ki-ta ... DU]
44jiri3-ma-an gal-la-za a he2-em-ta-ed3-de3
45iri-zu a he2-jal2-la hu-mu-ra-na8-na8
46dilmunki a he2-<jal2-la hu-mu-ra-na8-na8>
47pu2 a sis-a-zu pu2 a dug3-ga he2-em
48iri-zu e2-gu2 kar-ra kalam-ma-ka he2-a
49dilmunki e2-<gu2 kar-ra kalam-ma-ka he2-a>
(Possible insertion point for additional lines in a ms. from Ur:
49Akur tu-/uk-ri-ic\ki kug-sig17 ha-ra-li
49Bna4za-gin3 [X X] X-ga hu-mu-ra-bal-bal-[e]
49Ckur me-luh-haki na4gug nij2-al-di kal-la
49Djicmec3-cag4-gan jicab-ba sig5-ga
49Ema2 gal-gal hu-mu-ra-ab-sa2
49Fkur mar-ha-ciki na4 kal-la na4/duh\-[ci]
49Ggaba hu-mu-ra-ab-[X]
49Hkur ma2-ganki urudu nij2-kalag-ga lirum4-[(ma)]
49Ina4esi na4U na4cu-min3 hu-mu-[X]
49Kkur ab-baki-ke4 jicesi me-te-/bi\ [X] lugal-la hu-mu-ra-ab-[X (X)]
49Lkur za-lam-jarki siki gun3 (ms: SAHAR) sag9-ga [X] hu-mu-ra-ab-[X]
49Mkur elamki-ma siki igi-saj5 gu2-/un\-[gu2-un] hu-mu-ra-ab-bal-[bal-e]
49Nec3 urim2ki barag nam-lugal-la iri/ki\ [...]
49Oce i3-jic tug2 mah tug2 sig5 ma2 gal-[gal] hu-mu-ra-ab-[sa2]
49Pa-ab-ba dajal-la he2-jal2-bi hu-/mu\-[...]
49Qiriki «tuc» ki-tuc-bi ki-tuc dug3-/ga\-[am3]
49Rdilmunki ki-tuc-bi ki-tuc dug3-/ga\-[am3?]
49Sce-bi ce di4-di4-la2-[am3]
49Tzu2-lum-bi zu2-lum gu-ul-/gu\-[la]
49Uburu14-bi 3-am3 [...]
49Vjic-bi jic X X [...] )
50i3-ne-ce3 dutu ud ne-a
51dutu an-na gub-be2-e
52giri16 DU-a gaba EZENki-na-ta
53/e2\-suhur si dnanna-a-ta
54ka a ki-a DU-DU-ta a dug3 ki-ta mu-na-ra-DU
55jiri3-[ma-an] gal-la-na a im-ta-ed3-de3
56iri-ni a he2-jal2-la im-ta-na8-na8
57dilmunki a he2-<jal2-la im-ta-na8-na8>
58pu2 a sis-a-ni <pu2> a dug3-ga na-nam
59a-cag4 a-gar3 ab-sin2-a-ni ce mu-na-ab-/X-cum2?\
60iri-ni e2-gu2 kar-ra kalam-ma-ka na-nam
61dilmunki e2-gu2 <kar-ra kalam-ma-ka na-nam>
62i3-ne-ce3 dutu ud ne-a ur5 he2-na-nam-ma
63dili-niTAR jectug2-ge tuku-a dnin-tud ama kalam-ma-ce3
64den-ki-ke4 jectug2-ge tuku-a dnin-tud <ama kalam-ma-ce3>
65jic3-a-ni e-a ba-an-ci-in-dun-e
66jic3-a-ni gi-a gir5-gir5-e ba-an-ci-gir5-gir5-e
67jic3-a-ni bar-ce3 mah-he ca-ba-ra-an-zi-zi
68gu3 bi2-in-de2 ambar-ra lu2 nu-mu-un-dab-be2
69den-ki-ke4 gu3 bi2-in-de2
70zi an-na i3-pad3
71nu2-a ambar-ra nu2-a ambar-ra giri17-zal
72den-ki-ke4 a ddam-gal-nun-na-ka-ni mi-ni-in-dug4
73dnin-hur-saj-ja2-ke4 a cag4-ga ba-ni-in-ri
74a cag4-ga cu ba-ni-in-ti a den-ki-ka3-ka
75ud 1-am3 iti 1-a-ni
76ud 2-am3 iti 2-a-ni
77ud 3-am3 iti 3-a-ni
78ud 4-am3 iti 4-a-ni
79ud 5-am3 iti 5-a-ni
80ud 6-am3 iti 6-a-ni
81[ud] 7-am3 iti 7-a-ni
82[ud] 8-am3 <iti 8-a-ni>
83[ud] 9-am3 iti 9-a-ni iti nam-munus-a-ka
84[i3 li-gin7 i3] li?-gin7 i3 he-nun-na-gin7
85[dnin-tud] ama kalam-ma-ka
86[i3 li-gin7]
87[dnin-SAR] in-tu-ud
88dnin-SAR gu2 id2-da-ke4 ce3-mi-ni-ib-ed2?
89den-ki-ke4 ambar-ra im-da-la2 e-ne im-da-la2 e-ne
90sukkal-a-ni disimu4-de3 gu3 mu-na-de2-e
91lu2-tur sag9-ga-e ne nu-mu-un-su-ub-be2
92dnin-SAR sag9-ga-e ne nu-mu-un-su-ub-be2
93sukkal-a-ni disimu4-de3 mu-na-ni-ib-gi4-gi4
94lu2-tur sag9-ga-e ne nu-mu-un-su-ub-be2
95dnin-SAR sag9-<ga-e ne nu-mu-un-su-ub-be2>
96lugal-ju10 im-dirig ga-ri im-dirig ga-ri
97jiri3-ni 1-a jicma2-a bi2-in-gub
982-kam-ma par2-rim4-ma nam-mi-in-gub
99gaba im-ma-an-tab ne im-ma-an-su-ub
100den-ki-ke4 a cag4-ga ba-ni-in-ri
101a cag4-ga cu ba-ni-in-ti a den-ki-ga-ka
102ud 1-am3 iti 1-am3
103ud 2-am3 iti 2-am3
104ud 9-am3 iti 9-am3 iti nam-munus-a-ka
105i3 li?-[gin7 i3] li?-gin7 i3 he-nun-na-gin7
106[dnin-SAR i3] /li?\-<gin7 i3 li-gin7 i3 he-nun-na-gin7>
107dnin-[kur-ra] in-tu-ud
108dnin-kur-/ra\ [gu2 id2-da-ke4 ce3-mi-ni-ib-ed2]
109den-ki-ke4 ambar-ra im-[da-la2 e-ne im-da-la2 e-ne]
110sukkal-a-ni disimu4-de3 [gu3 mu-na-de2-e]
111lu2-tur sag9-ga-e ne nu-mu-un-[su-ub-be2]
112dnin-kur-ra sag9-ga-e ne nu-mu-un-su-ub-be2
113sukkal-a-ni disimu4-de3 mu-na-ni-ib-gi4-gi4
114lu2-tur sag9-ga-e ne su-ub-bu-ma-ni
115dnin-kur-ra sag9-ga-e ne su-ub-bu-ma-ni
116lugal-ju10 im-dirig ga-ri im-dirig ga-ri
117jiri3-ni 1-a jicma2-a bi2-in-gub
1182-kam-ma par2-rim4-ma nam-mi-in-gub
119gaba im-ma-an-tab ne im-ma-an-su-ub
120den-ki-ke4 a cag4 ba-ni-in-ri
121a cag4-ga cu ba-ni-in-ti a den-ki-ga-ka
122ud 1-am3 iti 1-a-ni
123ud 9-am3 iti 9-a-ni iti nam-munus-a-[ka]
124i3 li?-gin7 i3 li?-gin7 i3 he-nun-[na-gin7]
125dnin-kur-ra i3 li?-<gin7 i3 li-gin7 i3 he-nun-na>
126duttu munus NI-buluj3 in-[tu-ud]
(Insertion point for additional lines in a ms. of unknown origin:
126Adnin-kur-ra dnin-imma3 ci-im-/ma\-[an-tu-ud]
126Blu2-tur i3-buluj3-e ul im-ma-an-[ti]
126Cdnin-imma3 gu2 id2-da-kam /ce3\-em-mi-[...]
126Dden-ki-ke4 ma2-ta im-ta-gid2-de3 im-da-la2 X [...]
126Ednin-imma3 gu2 id2-da-kam igi <im>-ma-ni-in-X-[...]
126Fsukkal-a-ni disimudx(ENKUM)-ra gu3 mu-na-/de2\-[e]
126Glu2-tur sag9-ga-gin7 je26-e ne nam-in-su-ub
126Hdnin-imma3 sag9-ga-gin7 je26-e jic3 nam-in-du3
126Isukkal-a-ni disimudx(ENKUM)-e mu-na-ni-ib-gi4-gi4
126Klugal-ju10 i-im-dirig ga-ri i-im-dirig ga-ri
126Ljiri3-ni 1-am3 ma2-a bi2-gub
126M2-kam-ma-am3 par2-rim4-ma u3-bi2-gub
126Ngaba cu im-mi-in-dab5 ur2-ra-na nu2-a
126Olu2-tur jic3 im-mi-in-dug4 ne im-ma-ni-in-su-[ub]
126Pden-ki-ke4 dnin-imma3 a cag4 mu-ni-in-ri
126Qa cag4-ga cu ba-ni-in-ti a den-ki-ga-kam
126Rmunus-e ud 1-bi iti 1-bi na-nam
126Sud 2-bi iti 2-/bi\ na-nam
126Tud 3-bi iti 3-/bi\ na-nam
126Uud 4-bi iti 4-[bi] na-nam
126Vud 5-bi iti 5-/bi\ na-nam
126Wud 6-bi iti 6-/bi\ na-nam
126X[ud 7]-/bi\ iti 7-bi na-nam
126Y[ud 8-bi] iti 8-bi [na]-nam
126Z[ud 9-bi] iti nam-munus-a-ni /na-nam\
126AA[i3 li-gin7 i3 li]-gin7 i3 he-nun-na-gin7
126BB[dnin-imma3 i3 li-gin7] i3 he-nun-na-/gin7\
126CC[duttu munus NI-buluj3 in-tu-ud] )

127dnin-tu-re duttu-[ra] gu3 mu-na-de2-[e]
128na ga-e-ri na-ri-ju10 [he2-e-dab5]
129inim ga-ra-ab-dug4 inim-ju10-[ce3 jectug2-zu]
130lu2 1-am3 ambar-ra im-da-la2 [e-ne <im-da-la2 e-ne>]
131den-ki-ke4 ambar-ra im-[da-la2 e-ne <im-da-la2 e-ne>]
132igi im-X-X-[...]
9 lines fragmentary
142[...] X [...]
143[... duttu] munus NI-buluj3 X X [...]
144[...] X X [...]
145[...] X X X a-na X [...]
146[...] X X X cag4?-za [...]
147[ukuc2 sur-ra-X] de6-um
148/jichachur\ [gu ul-ul]-ba de6-um
149jicjectin ga-ra-an-ba de6-um
150e2?-a saman2-ju10 he2-dab5
151den-ki-ke4 saman2-ju10 he2-bi2-in-dab5
1522-kam-ma a si-si-da-ni
153e a bi2-in-si
154pa5 a bi2-in-si
155kislah a bi2-in-si
156nu-jickiri6 sahar?-ra hul2-a-na bi2-[...]
157gu2-ni gu2-da im-ci-in-la2-[e-de3]
158a-ba-me-en jickiri6 [...]
159den-ki-ke4 nu-jickiri6-[...]
4 lines missing
164[ukuc2 sur-ra-na] im-ma-/na\-[an-de6]
165jichachur gu ul-ul-ba im-ma-na-an-de6
166jicjectin ga-ra-an-ba im-ma-na-an-de6 ur2-ra-ni bi2-in-si-si
167den-ki-ke4 igi-ni im-ma-an-sig7-sig7 jidru cu bi2-in-du8
168den-ki-ke4 duttu-ra jiri3 im-ma-an-gub
169e2-na al-dub2-dub2-e jal2-u3 [jal2-u3]
170a-ba-me-en za-e-me-en
171je26-e nu-jickiri6 ukuc2 jichachur [jicjectin] he2-am3-ce3 ga-mu-ra-ab-cum2
172duttu cag4 hul2-la-ni-ta e2-e jal2 ba-an-tag4
173den-ki-ke4 duttu-ra munus NI-buluj3
174ukuc2 sur-ra-na ba-na-ab-cum2-mu
175jichachur gu ul-ul-ba ba-na-ab-cum2-mu
176jicjectin ga-ra-an-ba ba-na-ab-cum2-mu
(1 line not in the ms. from Nippur:
177kac giba-an gu-la im-ma-ab-[...])

178duttu munus NI-buluj3 gub3 mu-na-ab-sig10-ge cu mu-na-sig3-ge
179den-ki-ke4 duttu-ra ul im-ma-ni-in-ti
180gaba cu im-mi-in-dab ur2-ra-na nu2-a
181hac2 mu-un-tag-tag-ge cu mu-un-tag-tag-ge
182gaba? cu im-mi-in-dab5? ur2-ra-na nu2-a
183lu2-tur jic3 im-in-du3 ne im-ma-ni-in-su-ub
184den-ki-ke4 duttu a cag4 mu-ni-in-ri
185a cag4-ga cu ba-ci-in-ti a den-ki-ga-kam
186duttu munus sag9-ga a2? hac2-ju10 im-me a2? bar-ju10 a2? cag4?-ba-ju10 im-[me]
187dnin-hur-saj-ja2 a hac2-ta ba-an-tag-tag
2 lines fragmentary
190[u2jic im-ma-an-mu2]
191[u2lal3 im-ma]-an-mu2
192[u2sar-ra im-ma]-an-mu2
193[u2A.NUMUN2 im]-ma-an-mu2
194[u2a-tu-tu im]-ma-an-mu2
195[u2ac-tal2-tal2] /im\-ma-an-mu2
196[u2...] /im\-ma-an-mu2
197[u2am-ha-ru] im-ma-an-mu2
198den-ki-ke4 ambar-ra im-da-la2 e-ne im-da-la2 e-ne
199sukkal-a-ni disimu4-de3 gu3 mu-na-de2-e
200u2 je26-e nam-bi /li\-bi2-tar-re
201a-na-am3 ne-e a-na-am3 ne-e
202sukkal-a-ni disimu4-de3 mu-na-ni-ib2-gi4-gi4
203[lugal]-ju10 u2jic mu-na-ab-be2
204mu-na-kud-de3 ba-/gu7\-[e]
205lugal-ju10 u2lal3 mu-na-ab-be2
206mu-na-bur12-re ba-gu7-e
207lugal-ju10 /u2sar-ra\ mu-<na-ab-be2>
208mu-na-kud-de3 ba-<gu7-e>
209lugal-ju10 u2A.NUMUN2 mu-<na-ab-be2>
210mu-na-bur12-re ba-<gu7-e>
211[lugal-ju10 u2a]-tu-tu mu-<na-ab-be2>
212[mu-na-kud-de3] ba-<gu7-e>
213[lugal-ju10 u2ac-tal2]-tal2 mu-<na-ab-be2>
214[mu-na-bur12-re ba-gu7-e]
215[lugal-ju10 u2... mu-na-ab-be2]
216[mu-na-kud-de3] /ba\-<gu7-e>
217[lugal-ju10 u2]am-ha-ru mu-na-ab-be2
218[mu-na-bu]-re ba-gu7-e
219[den-ki]-/ke4\ u2 nam-bi bi2-in-tar cag4-ba ba-ni-in-zu
220dnin-hur-saj-ja2-ke4 mu den-ki nam-erim2 ba-an-kud
221i-bi2 na-aj2-til3-la en-na ba-ug5-ge-a i-bi2 ba-ra-an-bar-re-en
222da-nun-na-ke4-ne sahar-ta im-mi-in-dur2-dur2-ne-ec
223ka5-a den-lil2-ra mu-na-da-ab-be2
224je26-e dnin-hur-saj-ja2 mu-e-ci-tum2-mu-un a-na-am3 nij2-ba-ju10
225den-lil2-le ka5-a mu-na-ni-ib2-gi4-gi4
226za-e dnin-hur-saj-ja2 mu-e-tum2-mu-un-nam
227iri-ja2 2 jic-gan2 ga-ri-du3 mu-zu he2-pad3-de3
228ka5-a su-ni 1-am3 im-ma-an-kad4-kad4
229siki?-ni 1-am3 im-ma-an-bur2-bur2
230igi-ni 1-am3 cim bi2-in-jar
4 lines fragmentary
235[nibruki-ce3 mu]-jen-ne-en den-lil2 [...]
236[urim2ki]-/ce3\ mu-jen-ne-en dnanna [...]
237[larsaki]-ce3 mu-jen-ne-en dutu? [...]
238[unugki]-ce3 mu-jen-ne-en dinana X [...]
239[...] X i3-me-a zi?-ju10 mu-X-tum2-mu [...]
240X X X [...]
241dnin-hur-saj-ja2 X [...]
3 lines fragmentary
245[...]-de3-[...]
246[...] ba de3? DU
247dnin-hur-saj-ja2-ke4 e2? kas4 im-ma-an-dug4
248da-nun-/na\-[ke4]-/ne\ tug2-ga-ni ba-an-dab5-be2-ec
249li? im-ma-an-ak-ec
250nam im-ma-an-tar-ec
251cu li? im-ma-an-bur2-ru-uc
252dnin-hur-saj-ja2-ke4 den-ki gal4-la-na ba-ni-in-tuc
(1 line not in the ms. from Nippur:
253cu muc3-/ba\ [...] bar-ba NE X [...])

254cec-ju10 a-na-zu a-ra-gig
255ugu-dili2-ju10 ma-gig
256dab-u2 im-ma-ra-an-tu-ud
257cec-ju10 a-na-zu a-ra-gig
258pa siki-ju10 ma-gig
259dnin-siki-la2 im-ma-ra-an-tu-ud
260cec-ju10 a-na-zu a-ra-gig giri17-ju10 ma-gig
261dnin-giri17-u3-du2 im-ma-ra-an-tu-ud
262cec-ju10 a-na-zu a-ra-gig ka-ju10 ma-gig
263dnin-ka-si im-ma-ra-an-tu-[ud]
264cec-ju10 a-na-zu a-ra-gig zi-ju10 ma-gig
265dna-zi im-ma-ra-an-/tu\-[ud]
266cec-ju10 a-na-zu a-ra-gig a2-ju10 ma-/gig\
267da2-zi-mu2-a im-ma-ra-an-/tu\-[ud]
268cec-ju10 a-na-zu a-ra-gig ti-ju10 ma-[gig]
269dnin-ti im-ma-ra-an-[tu-ud]
270cec-ju10 a-na-zu a-ra-gig zag-ju10 [ma-gig]
271den-sa6-ag im-ma-ra-an-[tu-ud]
272di4-di4-la2-la 2 ba-tud-de3-en-na-ac nij2-/ba nam\-[la2]
273dab-u2 lugal u2 he2-a
274dnin-siki-la2 en ma2-gan-na he2-a
275dnin-giri17-u3-du2 dnin-a-zu ha-ba-an-du12-du12
276dnin-ka-si nij2-cag4 si he2-a
277dna-zi u3-mu-un-dar-a ha-ba-an-du12-du12
278da2-zi-[mu2-a] [dnin]-jic-zid-da ha-ba-an-du12-du12
279d/nin\-[ti] /nin\ iti-e he2-a
280[den-sa6]-/ag\ en dilmun-na he2-a
281[den-ki] za3-mi2


Top | Home This composition: translation | bibliography


Revision history

06.iii.1998-19.iii.1998 : GC : standardisation
27.iii.1998 : JAB : proofreading
22.ii.1999 : JAB : minor corrections
09.vi.1999 : GC : SGML tagging
25.vi.1999 : ER : proofreading SGML
25.vi.1999 : ER : converting to HTML 4.0
7.ix.2001 : ER : header and footer reformatted; substantive content of file not changed