A tigi to Enlil for Ur-Namma (Ur-Namma B): composite text

¹^den-lil₂ mah [...] ar₂^?[...]
²en nam-nun gal-[la-ni ...]
³^dnu-nam-nir an ki lugal-[bi ...]
⁴uj₃-ja₂ igi mi-ni-in-il₂ sipad zid ur-^d/namma\
⁵kur gal ^den-lil₂-le uj₃ car₂-ra-ni-a im-ma-ni-in-pad₃^? [(X)]
⁶sipad he₂-a ^dnu-nam-nir-ra-ka ni₂ huc mu-un-da-ri
⁷sig₄ e₂-kur-ra-ke₄ me am₃-hur
⁸kur gal ^den-lil₂-le e₂-kur ec₃ mah-a-na ud-gin₇ kar₂-kar₂^!-da
⁹cag₄ inim-jal₂ kug zid-de₃ si-a-ni nam-de₆
¹⁰sipad ^dur-^dnamma-/da\ e₂-kur-ra saj an-ce₃ il₂-i-de₃ a₂-bi mu-u₈-da-aj₂
¹¹lugal-e kalam-[ma a₂] he₂-ni-in-mah uj₃-ja₂ saj he₂-ni-in-il₂
¹²sipad zid ur-[^dnamma] [...] ^dnu-nam-nir-da ud su₃-ra₂-ce₃ nir jal₂-la
¹³di zu en /jectug₂\ [dajal]-la-kam ^jicu₃-cub-ba si am₃-mi-in-sa₂
¹⁴^den-lil₂-le /sipad\ /^dur\-^dnamma-ra ki bal (1 ms. adds: gu₂-)erim₂-jal₂-la-ni si mu-na-an-sa₂
¹⁵ki-en-gi-re ud nam-he₂-a ak
¹⁶asilal gu₂ mu-un-di-ni-ib-mar-re
¹⁷uru₄ (1 ms. has instead: uc) mu-un-dug₃-ec temen kug mi-ni-in-si-ec
¹⁸enkum ninkum-e me-tec₂ am₃-i-i-ne
¹⁹nam-cub galam-ma-na ^den-ki-ke₄ e₂-e ul ba-ni-in-sig₇-ga
²⁰sipad ^dur-^dnamma-ke₄ e₂-kur mah dur-an-ki-a-ka an-ce₃ mi-ni-in-mu₂
²¹u₆ di-bi-ce₃ uj₃ car₂-ra-ba ci-im-ma-gub
²²ka₂ mah ka₂ gal ka₂ silim-ma hur-saj-galam-ma ka₂ ce nu-kud-da
²³su₃-ra₂-aj₂ kug me-a sig₇-igi-ba ce-er-ka-an mu-ni-in-dug₄
²⁴anzud₂^mucen-de₃ dug₃ am₃-ma-ni-in-bad
²⁵hu-ri₂-in <umbin>-ba lu₂-erim₂ dili mu-un-dab₅
²⁶^jicig-bi mah-am₃ ul-la mi-ni-in-si
²⁷e₂ mah-am₃ su-zi am₃-da-jal₂
²⁸dajal am₃-tag ni₂-bi gal ci-ri
²⁹hur-saj galam-ma gi-gun₄-na ki-tuc kug kur gal-la-ra
³⁰u₁₈-ru mah-gin₇ /cag₄\-bi-a ki am₃-ma-ni-in-us₂
³¹ja₂-jic-cu₂-a /e₂\-gal mah di gal ku₅-ru-da-ni
³²/ama\ gal ^dnin-lil₂-ra ul mu-na-ni-in-de₆
³³^den-lil₂ ^dnin-lil₂-bi dug₃ mi-ni-in-jal₂-le-ec
³⁴unu₂-gal-ba cul zid mu pad₃-da ^dnu-nam-nir-ra-ka (1 ms. adds the Akkadian gloss: ^{zi-kir cu-mi})
³⁵ninda mah am₃-mi-ni-dug₃ e₂-kur hul₂-la-am₃
³⁶igi zid mu-un-ci-in-bar-re-ec sipad ^dur-^dnamma-ra
³⁷kur gal-e sipad ^dur-^dnamma-ra nam gal ud su₃-ra₂-ce₃ mu-ni-in-tar
³⁸saj gig₂-ga-na a₂ mi-ni-in-mah

³⁹sa-gid₂-da-am₃

⁴⁰^dnu-nam-nir dug₄-ga ec-bar zid nij₂ nu-kur₂-ru je₂₆-me-en
⁴¹e₂-kur mah-ju₁₀ dalla mu-e-a-ed₂
⁴²suh₁₀ kar₂-kar₂-ka-da an-ce₃ gu₂ he₂-ni-in-us₂
⁴³cul zid kalam-ma dalla hu-mu-ni-in-ed₂
⁴⁴^dur-^dnamma en uru₁₆ nam-lugal-la gu₂ an-ta-bi he₂-em
⁴⁵mu-zu an-zag-ce₃ kur-ur₂-ce₃ he₂-jal₂
⁴⁶kur gal a-a ^den-lil₂ dug₄-ga ec-bar zid nij₂ nu-kur₂-ru je₂₆-me-en
⁴⁷e₂-kur mah-ju₁₀ dalla mu-e-a-ed₂
⁴⁸suh₁₀ kar₂-kar₂-ka-da an-ce₃ gu₂ he₂-ni-in-us₂
⁴⁹cul zid kalam-ma dalla hu-mu-ni-in-ed₂
⁵⁰^dur-^dnamma en uru₁₆ nam-lugal-la gu₂ an-ta-bi he₂-em
⁵¹mu-zu an-zag-ce₃ kur-ur₂-ce₃ he₂-jal₂
⁵²lugal-ju₁₀ udug₂ mah kur erim₂-jal₂-la saj sahar-re-ec dub-bu ki bal-a ca₅-ca₅
⁵³sipad ^dur-^dnamma-ke₄ udug₂ mah erim₂-jal₂-la saj sahar-[re]-ec dub-bu ki bal-a ca₅-ca₅
⁵⁴e-ne-er mu-na-an-cum₂ en ^dnu-nam-nir-re
⁵⁵kur am₃-tu₁₁-be₂ jiri₃ sag₁₁ am₃-me
⁵⁶sipad ^dur-^dnamma-ke₄ mu-na-an-cum₂ en ^dnu-nam-nir-re
⁵⁷kur am₃-tu₁₁-be₂ jiri₃ sag₁₁ am₃-me
⁵⁸hul-jal₂-la uru₂ am₃-mi-in-gul-gul
⁵⁹nam-gu₂ mah-am₃ lil₂ am₃-mi-ni-in-su-ub
⁶⁰sipad ^dur-^dnamma-ke₄ hul-jal₂-la uru₂ am₃-mi-in-gul-gul
⁶¹nam-gu₂ mah-am₃ lil₂ am₃-mi-ni-in-su-ub
⁶²ar₂-a-ni huc-am₃ e₂ ki bal
⁶³u₁₈-lu-ni lu₂ erim₂-jal₂ mu-ni-ib₂-DU
⁶⁴sipad ^dur-^dnamma ar₂-a-ni huc-am₃ e₂ ki bal
⁶⁵u₁₈-lu-ni lu₂ erim₂-jal₂ mu-ni-ib₂-DU
⁶⁶barag nam-lugal-la-ke₄ ki-a mu-ni-in-us₂
⁶⁷urim₂^ki-ma pa ed₂ hu-mu-ni-ib₂-ak
⁶⁸sipad ^dur-^dnamma-ke₄ ni₂ bi₂-in-gur₃-ru saj he₂-ni-in-il₂ lugal kalam-ma-[kam]
⁶⁹ki lugal-a-ni ^den-lil₂-la₂-ka saj-e-ec he₂-[ni-rig₇]
⁷⁰nam am₃-tar-re cu zid am₃-[mi-in-jar]
⁷¹/giri₁₇\-zal urim₂^ki-ma ^dur-^d[namma] [nam-he₂-a^? ...]

⁷²[sa]-jar-ra-am₃ tigi ^den-[lil₂-la₂-kam]

Top | Home This composition: translation | bibliography

Revision history

21.ix.1998-23.ix.1998 : GZ : standardisation
28.xi.1998 : JAB : proofreading
12.ii.1999 : GZ : minor ../changes
12.ii.1999 : GZ : SGML tagging
19.iii.1999 : ER : Proofreading SGML
19.iii.1999 : ER : Converting to HTML 4.0
7.ix.2001 : ER : header and footer reformatted; substantive content of file not changed