A praise poem of Shulgi (Shulgi A): composite text

¹lugal-me-en cag₄-ta ur-saj-me-en
²^dcul-gi-me-en ba-tu-ud-de₃-en-na-ta nita kalag-ga-me-en
³pirij igi huc ucumgal-e tud-da-me-en
⁴lugal an ub-da 4-ba-me-en
⁵na-gada sipad saj gig₂-ga-me-en
⁶nir-jal₂ dijir kur-kur-ra-me-en
⁷dumu u₃-tud-da ^dnin-sun₂-kam-me-en
⁸cag₄-ge pad₃-da an kug-ga-me-en
⁹lu₂ nam tar-ra ^den-lil₂-la₂-me-en
¹⁰^dcul-gi ki aj₂ ^dnin-lil₂-la₂-me-en
¹¹mi₂ zid dug₄-ga ^dnin-tu-ra-me-en
¹²jectug₂ cum₂-ma ^den-ki-kam-me-en
¹³lugal kalag-ga ^dnanna-a-me-en
¹⁴pirij ka du₈-a ^dutu-u₃-me-en
¹⁵^dcul-gi hi-li-a pad₃-da ^dinana-me-en
¹⁶ance-jir₂-nun-na kaskal-e du₇-u₃-me-en
¹⁷sisi har-ra-an-na kun sud-sud-me-en
¹⁸dur₃ ^dcakkan-na kas₄-e kij₂-ja₂-me-en(1 ms. has instead the line: ance ^dcakkan kas₄^!(DU)-e ki ag₂-me-en)
¹⁹dub-sar gal zu ^dnisaba-kam-me-en
²⁰nam-ur-saj-ju₁₀-gin₇ nam-kalag-ga-ju₁₀-gin₇(1 ms. has instead: [nam]-/kal\-la-ju₁₀-gin₇)
²¹jectug₂-ja₂ cu hu-mu-ni-du₇-am₃
²²inim gen₆-na-bi ha-ma-da-sa₂-am₃
²³nij₂-si-sa₂-e ki ha-ba-aj₂-ja₂-am₃
²⁴nij₂-erim₂-e ki la-ba-ra-aj₂-ja₂-am₃
²⁵inim nij₂-erim₂ dug₄-ga hul ha-ba-ra-gig-ga-am₃
²⁶^dcul-gi-me-en lugal kalag-ga saj-bi-ce₃ ed₂-a-me-en
²⁷a₂ nun jal₂ za₃-ce-ni-ce₃ hul₂-la i₃-me-en-na-ke₄-ec
²⁸jiri₃ hu-mu-gur kaskal kalam-ma-ke₄ si he₂-mi-sa₂-sa₂
²⁹danna hu-mu-gen₆ e₂-gal-la he₂-bi₂-du₃
³⁰zag-ba ^jickiri₆ he₂-bi₂-gub(1 ms. has instead: he₂-bi₂-ib₂-du₃) ki ni₂ dub₂-bu he₂-bi₂-jar(1 ms. has instead the line: zag-ba UNU.SAR-bi ki-ri-ib-du he₂-bi-jal₂)
³¹ki-bi lu₂ zu-a he₂-em-mi-tuc
³²sig-ta du igi-nim-ta du-e
³³a₂ ced₁₀-bi-ce₃ ni₂ he₂-eb-ci-te-en-te-en
³⁴nita har-ra-an-na du kaskal-e ji₆ ba-an-da-sa₂-a
³⁵iri du₃-a-gin₇ zi-ni ha-ba-ci-in-tum₃
³⁶mu-ju₁₀ ud ul-li₂-a-ac ja₂-ja₂-de₃ ka-ta nu-cub-bu-de₃
³⁷ar₂-ju₁₀ kalam-ma ak-ak-de₃(1 ms. has instead: barag₂^!-barag₂-e-de₃)
³⁸ka-tar-ju₁₀ kur-kur-ra si-il-le-de₃
³⁹dug₃ tuku-me-en usu-ju₁₀ ib₂-zig₃-ge kas₄-e kab₂ di-de₃
⁴⁰nibru^ki-ta sig₄ urim₂^ki-ma-ce₃
⁴¹danna 1-gin₇ cu ninni₂-da cag₄-ju₁₀ ha-ma-ab-dug₄
⁴²pirij nam-cul-bi-ta nu-kuc₂-u₃ ne₃-ba gub-ba-me-en
⁴³^tug₂nij₂-lam₂ ban₃-da ib₂-ja₂ ba-du₃
⁴⁴tu^mucen nir-DU cur₂-bi dal-la-gin₇ a₂-ju₁₀ hu-mu-sud-sud
⁴⁵anzud^mucen kur-bi-ce₃ igi il₂-la-gin₇ dug₃-ju₁₀ hu-mu-bad-bad
⁴⁶iri ma-da ki jar-jar-ra-ju₁₀ ha-ma-sug₂-sug₂-ge-ec-am₃
⁴⁷uj₃ saj-gig₂-ga u₈-gin₇ lu-a u₆ dug₃ ha-ma-ab-dug₄
⁴⁸mac₂ hur-saj-ja₂ ki ur₃-bi-ce₃ hub₂ sar-sar-re-gin₇
⁴⁹^dutu a₂-dam-ma ud dajal-la
⁵⁰e₂-kic-nu-jal₂-ce₃ ha-ba-kur₉-re-en
⁵¹e₂ ^dsuen-na tur₃ i₃ gal-gal-la he₂-jal₂-la he₂-bi₂-du₈
⁵²gud ha-ba-ni-gaz udu ha-ba-ni-car₂(some mss. have instead: ha-ba-ni-cum)
⁵³cem₅ a₂-la₂-e sig₁₄ ha-ba-gi₄
⁵⁴tigi nij₂-dug₃-ge si ha-ba-ni-sa₂(1 ms. has instead the line: balaj di MU [...])
⁵⁵^dcul-gi lu₂ nij₂ lu-lu-me-en ninda jic ha-ba-ni-tag
⁵⁶pirij-gin₇ KI.LUGAL.GUB-ta ni₂ il₂-la-ju₁₀-ne
⁵⁷e₂-gal-mah ^dnin-e₂-gal-la-ka-kam
⁵⁸dug₃ he₂-ni-dub₂ a zal-le he₂-ni-tu₅
⁵⁹dug₃ he₂-ni-gam ninda hu-mu-ni-gu₇
⁶⁰^dnin-cara₂^mucen(2 mss. have instead: ^dnin-ninna₂)^mucen sur₂-du₃^mucen-gin₇ ha-ba-zig₃-ge-en
⁶¹nibru^ki-ce₃ a-la-ja₂ ha-ba-gur-re-en
⁶²ud-bi-a ud-de₃ gu₃ he₂-eb-be₂ mar-uru₅ he₂-ninni₂
⁶³^tum₉mir-mir-ra ^tum₉u₁₈-lu ur₅-bi ni₂-bi-a hu-mu-un-ca₄
⁶⁴nim jir₂-jir₂ im 7-bi-ta an-na tec₂ he₂-ni-gu₇
⁶⁵ud te-ec dug₄-ga ki he₂-em-tuku₄-tuku₄
⁶⁶^dickur-re an nij₂-dajal-la-ba gu₃ hu-mu-ni-dub₂-dub₂
⁶⁷ceg₇ an-na-ke₄ a ki-ta gu₂ he₂-em-ma-da-ab-la₂(1 ms. has instead the line: [ceg₇] an-na-da [a ki]-ke₄ saj he₂-[ma]-/da\-ab-sa₂)
⁶⁸na₄ tur-tur-bi na₄ gal-gal-bi
⁶⁹murgu-ja₂ dub-dab(1 ms. has instead: bu-/ud\-ba-ad) he₂-em-mi-ib-za
⁷⁰lugal-me-en ni₂ ba-ra-ba-da-te su ba-ra-ba-da-zig₃
⁷¹pirij ban₃-da-gin₇ gur₅-ru-uc hu-mu-bur₂-bur₂
⁷²ance edin-na-gin₇ hub₂-ja₂ hu-mu-cu₂-cu₂
⁷³cag₄ la-la jal₂-la-ju₁₀ kas₄ hu-mu-ni-gun₃-gun₃
⁷⁴dur₃ dili du-gin₇ im₂-ma-ju₁₀-ne
⁷⁵^dutu e₂-a-ni-ce₃ igi i₃-ja₂-ja₂-de₃
⁷⁶kaskal 15 danna-am₃ cu hu-mu-ninni₂
⁷⁷saj-ur-saj-ju₁₀-ne igi hu-mu-un-du₈-uc-am₃(instead of l. 77, 1 ms. has 2 lines: ^d[...] lu-a [...] a-lal₃ ^d/en\-[lil₂] [^d]nin-lil₂-/ka^?\ [cu^?] hi-mi-il₂)
⁷⁸ud 1-a nibru^ki urim₂^ki-ma ec₃-ec₃-bi hu-mu-ak
⁷⁹cec gu₅-li-ju₁₀ cul ^dutu-am₃
⁸⁰e₂-gal an-ne₂ ki jar-ra-am₃ kac hu-mu-un-di-ni-naj
⁸¹nar-ju₁₀ tigi 7-e cir₃-re-ec ha-ma-an-ne-ec
⁸²nitalam-ju₁₀ ki-sikil ^dinana nin hi-li an ki-a
⁸³gu₇ naj-bi-a hu-mu-da-an-tuc-am₃
⁸⁴ni₂-ju₁₀ silim-ce₃-am₃ ba-ra-ab-dug₄
⁸⁵igi il₂-la-ja₂ he₂-eb-jen-ne-en
⁸⁶cag₄-ge gur₇-ja₂ an-ta he₂-eb-gi₄
^86A(1 ms. adds at least 10 lines:inim-inim-ma im-sar-ra-ju₁₀
^86Bzi a-a-gu₁₀ kug ^dlugal-ban₃-da^!
^86C^dnanna lugal an-ki-ke₄

At least 4 lines missing or unclear

^86I/me\ [...] X /na^?\-e-a-ed₃-de₃
^86H[...] /ud\ ul-li-a-ce₃
^86Jlugal [ki-en-gi]-/ra^?\ je₂₆-gin₇-nam uj₃-e ba-ra-jal₂-la)
⁸⁷an-ne₂ aga zid mah(some mss. have instead: kug-sig₁₇)(1 ms. has instead: kug zi)(1 ms. has instead: kug) saj-ja₂ he₂-em-mi-in-gen₆
⁸⁸e₂-kur za-gin₃-na ^jicjidru ha-ba-dab₅-ba
⁸⁹barag babbar-ra ^jicgu-za suhuc gen₆-na saj an-ce₃ ha-ba-il₂
⁹⁰nam-lugal-la a₂ hu-mu-ni-mah
⁹¹kur hu-mu-gam-gam kalam hu-mu-ge-en-ge-en
⁹²an ub-da 4 uj₃ saj sig₁₀-ga-a-ba mu-ju₁₀ he₂-em-mi-sa₄
⁹³cir₃ kug-ja₂ hu-mu-un-e-ne
⁹⁴nam-mah-ju₁₀ hu-mu-ni-pad₃-de₃-ne
⁹⁵a₂ mah lugal-la-kam mi₂ dug₄-ga
⁹⁶^dsuen-e e₂-kic-nu-jal₂-ta
⁹⁷nam-ur-saj nam-kalag-ga nam-til₃ nij₂-dug₃ saj-e-ec rig₇-ga
⁹⁸a₂ mah cum₂-ma ^dnu-nam-nir-ra
⁹⁹^dcul-gi kur gul-gul kalam ge-en-ge-en
¹⁰⁰icib an ki-a gaba-ri nu-tuku
¹⁰¹^dcul-gi dumu nir-jal₂ an-na-ke₄ mi₂ dug₄-ga

¹⁰²^dnisaba za₃-mi₂(instead of ll. 101-102, 1 ms. has: [^d]cul^!-gi /dumu^?\ nir-/jal₂\ an-na za₃-mi₂)

Top | Home This Composition: translation | bibliography

Revision history

30.v.1998-01.vi.1998 : GZ : standardisation
24.vii.1998 : JAB : proofreading
11.xii.1998 : GZ : tagging
29.i.1999 : ER : proofreading of tagging
29.i.-5.ii.1999 : ER : converting to HTML
26.ii.1999 : ER : minor corrections
7.ix.2001 : ER : header and footer reformatted; substantive content of file not changed