The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

An adab to Enlil for Shulgi (Shulgi G): composite text

^1den-lil₂ gal di en me-te-na nij₂-dug₄-ga-ni zid
^2dnu-nam-nir sipad da-ri₂ kalam-ma kur gal-ta ed₂-a
³sa₂ gal pad₃-de₃ gu₂-gal an ki me ca-ra u₅-a
⁴en nam-nun-na-ni-ce₃ ni₂ gal im-gur₃ mul an cu du₇-a
⁵me ul me sag₅-e gal kij₂-ja₂ dili-ni dijir mah
⁶en ud til₃ kur zag-til-la-ce₃ uj₃ du₁₀-us ac-a tum₂
⁷sa-par₃ mah an ki cu₂-a ec₂ kur-kur-ra la₂-a
^8den-lil₂-da a-ba a₂ mu-da-an-aj₂ a-ba-ga-an-da-sa₂
⁹gal bi₂-dug₄ cag₄-ga-ni id₂ mah a-na-am₃ tum₂-a-bi
¹⁰inim kug-ga-na LIL₂ lal₃-jar-ra-bi e₂-ta nam-ta-ed₂
¹¹nij₂-bi nij₂-kug-ga-am₃ nij₂-cen-nam me e₂-kur-ra-kam
¹²sig₄ zid nam tar-ra abzu sa-dur₂-ra nij₂-kal-kal-la-am₃
¹³e₂-kur lu₂ zid-de₃ i₃-du₃-e mu da-ri₂-kam
¹⁴dumu lu₂ zid-da-ke₄ jidru mi-<ni>-ib₂-su₃-ra₂ ^jicgu-za-bi nu-kur₂
¹⁵nam-bi-ce₃ e₂-kur-ra sig₇ mi-ni-jar ^dac₂-im₂-babbar-re
¹⁶a-a-ni ^den-lil₂ inim-ma bi₂-sig₁₀ ama di-da mi-ni-in-de₆
¹⁷e₂-dug₃-ga ^dnanna dumu nun-ne₂ nij₂ al ba-ni-dug₄
¹⁸en-ne₂ <a> cag₄-tur-ce₃ jal₂-la-na lu₂ zid mi-ni-u₃-tu
^19den-lil₂ sipad a₂ kalag-ga-ke₄ mes-e pa bi₂-ed₂
²⁰dumu nam-lugal barag-ge₄ he₂-du₇ cul-gi lugal-am₃
²¹a pirij-ja₂ <e₂>-kur cu dajal-la dug₄-dug₄ ki aj₂ [^dnin]-lil₂-la₂
²²e₂-kur-ta nam-nir-jal₂ cum₂-ma lugal /urim\[^ki]-ma
²³cag₄ dadag sipad ^dlama kalam-ma mu-ni /bi₂-in^?\-dug₃
²⁴cul-gi ^den-lil₂-le cag₄ kug-ge bi₂-pad₃ kalam cu-ni bi₂-si
²⁵sibir ecgiri a₂-na mu-ni-la₂ sipad kur-kur-ra-kam
²⁶jidri ^dnanna cu nu-bal-e cu-ni-ce₃ mu-jar
²⁷dur₂ nam-lugal sag₂ nu-di-da gu₂ an-ce₃ mi-ni-zig₃
²⁸ud cud₃-dam ji₆ nam-cita-am₃ kalam u₂-sal-la-am₃
²⁹sipad he₂-jal₂-la cul-gi mu gi₁₆-sa lugal sil_x(EZEN)-li₂
³⁰kalag-ga a lu₂ zid-de₃ ri-a ^den-lil₂ mu-i-i

³¹sa-gid₂-da-am₃

³²/cul\-[gi] lugal uru₁₆ [...] ku^?-kur silim-e-ec₂ dug₄-ga
³³/lugal\ [(X)] aga₃-kar₂ ^dinana ki-bal-a bi₂-sig₁₀

³⁴jic-ki-jal₂ sa-gid₂-da-kam

^35den-lil₂ zid-da-am₃ inim-ma-ni mah-am₃
³⁶nam dug₃ tar-ra-ni saj-bi-ce₃ ed₂-a-am₃
³⁷gu nij₂-kalag mu₂-mu₂ ce nij₂-kalag mu₂-mu₂
³⁸cul-gi e₂-kur-ra u₂-a-bi na-nam
³⁹gu-bi gu na-nam ce-bi ce na-nam
⁴⁰nij₂-u₃-rum ^dnanna ama-tud e₂-kur-ra
⁴¹cag₄-ta mu /pad₃\-da ^dnin-lil₂-la₂ na-nam
⁴²cul-gi sipad kalam-ma saj ^den-lil₂-le zu
⁴³e₂-a lu₂-bi na-nam ud he₂-em-ma-ab-su₃-re₆
⁴⁴urim^ki iri^ki dug₃ nun-ne₂ ki jar-ra
⁴⁵cag₄-bi dub-cen kug abzu igi nu-bar
⁴⁶/nam\-icib dug₃-ga-kam cu-luh dadag-ga-kam
⁴⁷nidba gal-gal-bi e₂-kur hul₂-le-de₃
^48d/en\-lil₂-le gu₃ ba-an-de₂ /dug₄\-ga^!text: BI zid-zid-dam
⁴⁹sipad nam-lugal-la barag mah-ha tum₂-ma
⁵⁰cul-gi nam-en-na ^tug₂ma₆ sud-sud-am₃
⁵¹/bur^!\ an he-nun-na su₈-su₈^?-ga^?-ni-ce₃
⁵²unu₂ e₂-/kur\-ra-ka kij₂^?-sig^? /gub^?-ba^?-ni-ce₃\
^53den-lil₂ nam-nun-na [mu]-/ni^?\-in^?-tar^?-/e\
⁵⁴an-gin₇ sig₇-ga-ni X [...]-/e\
^55dnanna lugal-am₃ [...]-/am₃\
⁵⁶ki-ur₃ ki gal-/la^?\ [...] /dug₃\ /mu-na\-cum₂
^57den-lil₂-la₂ /KA^?\ [...] /mu\-ci-dajal^?-e
⁵⁸kur a-nu₆-gi₄-a /gu₂-un-gu₂-un\ mu-na-ab-za
⁵⁹ma-da mu-gi-/gi-in\ uj₃ jiri₃-ni-ce₃ mu-nu₂
⁶⁰cul-gi sipad lu₂-lal₃^! nibru^ki ki aj₂-am₃
⁶¹sig₄ ^den-lil₂-la₂ jissu-bi dug₃-ga-am₃
⁶²sipad zid cul-gi-re ni₂ he₂-em-ci-ib₂-te-te

⁶³sa-jar-ra-am₃

⁶⁴cul-gi bala-za ^den-lil₂-le ud dug₃ ma-ra-ni-in-ed₂

⁶⁵jic-ki-jal₂ sa-jar-ra-kam

⁶⁶an-na lugal-be₂-e ki-a kur gal-be₂-e
⁶⁷a-a ^den-lil₂ an-na lugal-be₂-e ki-a kur gal-be₂-e
⁶⁸gal bi₂-dug₄ cul-gi bala zid-da cag₄-ge-ec i-pad₃

⁶⁹u₁₈-ru_{1 2}-ne₂-bi-im a-da-ab ^den-lil₂-la₂-kam

Top | Home This composition: translation | bibliography
This composition: translation | bibliography

Revision history

11.v.1998-14.v.1998 : GZ : standardisation
23.vii.1998 : JAB : proofreading
05.v.1999. : GZ : SGML tagging
14.v.1999 : ER : proofreading SGML
14.v.1999 : ER : converting to HTML 4.0
7.ix.2001 : ER : header and footer reformatted; substantive content of file not changed