An adab to Bau for Ishme-Dagan (Ishme-Dagan B): composite text

¹nin ni₂ gur₃ mah zu an ki nam-nir-ra cu du₇
²ama ^dba-u₂ gu₂-gal nin-e-[ne] ur-saj X X
³dijir er₉ me mah-a cu du₇ /saj\-il₂ umuc^? gal LU^?
⁴su₄-un-su₄-na munus zid nin gal-an-/zu\ cag₄-ta umun₂ ak
⁵dumu an-na mas-su₂ inim pad₃-de₃ nij₂-nam cu-ni si
⁶nin a-zu gal saj gig₂-ga lu₂ til₃-le lu₂ u₃-tud
⁷cu-hal-bi cim-mu₂ uj₃ lu-a X X X X X
⁸cag₄-la₂-tuku arhuc₂ sud kalam-ma nin nij₂-gen₆^?-[na]
⁹^den-lil₂ lugal kur-kur-ra-[ke₄]
¹⁰^dnu-nam-nir en nam tar-re-[de₃]
¹¹ec₃ nibru^ki dur-an-ki-a-ka gal-bi bi₂-in-[dug₄]
¹²e₂-kur za-gin₃-na mi-ni-im-mah-en IGI RA X
¹³sa-par₃ kalag-ga ^dnu-nam-nir-ra-[me-en]
¹⁴an-gub-ba e₂-kur-ra-ka kurum₆ cum₂-mu jectin za-a-[kam]
¹⁵^den-lil₂-la₂ e₂-gi₄-a mah-a-ni-me-en a gub-ba-ni-[me]-/en\
¹⁶su₄^?-na cita-ba ki la₂-a-zu-uc
¹⁷^dnu-nam-nir nun kur-kur-ra-ke₄
¹⁸nam-sa₁₂-du₅ mah an ki cu-zu im-mi-in-kur₉
¹⁹mu-un-il₂-en nam-nin ec₃ numun i za-ra mu-ra-an-cum₂
²⁰a-a ugu-zu an dijir mah-e tug₂ ^tug₂ma₆ tug₂ mi-ri-in-mu
²¹ur-saj ^den-lil₂-la₂ ^dnin-jir₂-/su\ /nitalam\-ce₃ ma-ra-an-cum₂
²²e₂-ninnu iri kug ec₃ numun-i saj-/e-ec\ mu-ri-rig₇
²³lagac^ki jir₂-su^ki /dim\-gal kalam-ma-ka
²⁴e₂-jalga-sud ki-tuc ki aj₂-za
²⁵tar-sir₂-sir₂ e₂ nam-nin-a-ka barag mah-zu mi-ni-ri
²⁶ki-tuc mah-zu-ce₃ dijir ki-lagac^ki-a im-ci-gurum-e-de₃-ec
²⁷nin zag-dib me-ni cu nu-tej₄-ja₂
²⁸dumu an-na nin gal nij₂-nam zu
²⁹cul me-dim₂ sag₉ nun ^dic-me-^dda-gan dumu ^den-lil₂-la₂-ke₄
³⁰ki-sikil ama ^dba-u₂ igi zid mu-ci-bar nam dug₃ mu-ni-tar ud til₃-la ed₂-a-ce₃

³¹sa-gid₂-da-am₃

³²ama ^dba-u₂ nun ^dic-me-^dda-gan dumu ^den-lil₂-la₂-ra nam til₃ ud su₃-ra₂ cum₂-mu-dam

³³jic-gi₄-jal₂ sa-gid₂-da-[bi-im]

³⁴e₂^?-nam-til₃-la e₂ ^den-lil₂-la₂-ce₃
³⁵sila₄ babbar udu i₅-jar sag₉-ga gaba-na im-mi-tab
³⁶nun ^dic-me-^dda-gan za-e im-me-ni-kur₉
³⁷KI.LUGAL.GUB nam-til₃-la-da im-da-e-gub
³⁸kur gal ^den-lil₂-ra KA ki mu-ne-jal₂
³⁹a-a ^dmu-ul-lil₂ u₃-mu-un gal kur-kur-ra
⁴⁰^dic-me-^dda-gan-na na-aj₂ de₃-eb₂-tar mu-ni de₃-eb₂-pad₃ e-ne-er mu-ne-dug₄
⁴¹^den-lil₂ lugal kur-kur-ra-ke₄ igi nam-til₃-la saj-ki zalag-ga-ni mu-un-ci-in-bar
⁴²^dic-me-^dda-gan-na nam mu-ni-ib₂-tar-re
⁴³^jicgu-za me ur₄-ur₄ aga zid ud su₃-ra₂-a jidru uj₃ gen₆-ne₂ us₂ ac-a lah₄^!-lah₄^!-e
⁴⁴nun ^dic-me-^dda-gan nam-e-ec he₂-tar
⁴⁵^id₂idigna ^id₂buranun-e he₂-jal₂ a ectub^ku₆ hu-mu-ra-ab-tum₃ gu₂-bi ha-ra-gid₂-e (1 ms. has instead: kun X [...])
⁴⁶gu₂-gu₂-bi u₂-cim hu-mu-ra-an-mu₂ asil ha-ra-ab-la₂
⁴⁷pu₂-^jickiri₆-ba lal₃-e jectin-e ki hu-mu-ra-ni-ib₂-us₂
⁴⁸a-gar₃ zid-bi ce gu-nu ha-ra-ab-mu₂ gur₇-bi ha-ra-dub-dub
⁴⁹tur₃ ha-ra-du₃-du₃ amac ha-ra-dajal-dajal
⁵⁰nam-lugal-la mu hu-mu-ni-mah
⁵¹nam-nun-na saj an-ce₃ he₂-ni-il₂
⁵²sig igi-nim kur zag-til-la-bi gu₂-un ha-mu-ra-ab-il₂
⁵³kisal mah nun ud-gin₇ dalla he₂-ni-in-ed₂
⁵⁴nidba-zu e₂-kur za-gin₃-na muc nam-ba-an-tum₃-mu
⁵⁵^den-lil₂-le nam-ce₃ mu-ni-in-tar
⁵⁶lugal-la e₂-kur-ta a₂ mah mu-na-cum₂
⁵⁷nir mu-un-jal₂ inim ^den-lil₂-la₂-ta gaba-cu-jar nu-mu-un-tuku
⁵⁸jiri₃ il₂-il₂-la im-gub-gub-be₂
⁵⁹e₂-gal mah ki-tuc nam-lugal-la-ka im-ma-da-an-ku₄-/ku₄\
⁶⁰barag kug za-gin₃-na dur₂ bi₂-in-jar e₂-gal mu-un-[...]

⁶¹sa-jar-[ra-am₃]

⁶²munus zid dumu an-na ^den-lil₂ gu₃ ma-[ra-de₆] barag kug za-[gin₃ ... -ab-be₂]
⁶³ki-sikil ama ^dba-u₂ dumu an-na ^den-lil₂ [gu₃] ma-ra-de₆ barag kug [za-gin₃ ...]-ab-be₂
⁶⁴^dic-me-^dda-gan dumu ^den-[lil₂-la₂]-ra nam-til₃ ud su₃-ra₂ saj-e-[ec] rig₇-a-ni-ib

⁶⁵u₁₉-ru₁₂-bi-im

⁶⁶[a-da]-ab ^dba-u₂-kam
(ll. 65 and 66 are written as one line in source)

Top | Home This composition: translation | bibliography

Revision history

03.iii.2000 : GZ : standardisation
16.vi.2000 : JAB : proofreading
16.vi.2000 : GC : tagging
30.vi.2000 : ER : proofreading SGML
30.vi.2000 : ER : converting to HTML 4.0
7.ix.2001 : ER : header and footer reformatted; substantive content of file not changed