The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

An adab of An for Lipit-Eshtar (Lipit-Eshtar C): composite text

¹[en] mah zag dib me galam u₁₈-ru
²/pa\-bil₂-ga en-en-e-ne

³bar-sud-am₃

⁴saj il₂ dirig ninda₂ numun i-i
⁵mu idim ni₂ gal-le-ec ri-a
⁶mah dug₄-ga-ni sag₂ di nu-zu
⁷kur me sikil-la ni₂ mu-ni-in-il₂
⁸barag gal-la dur₂ im-mi-in-jar
⁹an lugal dijir-re-e-ne-ke₄

¹⁰cag₄-ba-tuku-am₃

¹¹igi zid su₃-ra₂-ce₃ mu-un-ci-in-bar
¹²nun ^dli-pi₂-it-ec₄-tar₂-ra igi zid mu-ci-in-bar
¹³nam-til₃ su₃-ra₂-ce₃ mu-na-an-cum₂
¹⁴nun ^dli-pi₂-it-ec₄-tar₂-ra nam-til₃ <su₃-ra₂-ce₃ mu-na-an-cum₂>
¹⁵an-na dug₄-ga-ni inim ki-bi-ce₃ jar-ra
¹⁶dijir na-me saj la-ba-ab-cum₂-mu
^17da-nun-na dijir kilib₃-ba-bi
¹⁸ki nam tar-re-da gu₂ mu-na-si-si-ec

¹⁹cag₄-ba-tuku-am₃

²⁰me gal-gal-la pa mu-ni-in-ed₂
²¹dijir an-na mu-na-sug₂-ge-ec

²²bar-sud 2-kam-ma

²³jic-hur-bi si mu-ni-ib-sa₂-sa₂
²⁴dijir ki-a mu-na-gam-e-ec (1 ms. has instead: mu-/na\-dur₂-ru-/ne\-[ec])
²⁵me mah-a me saj-ki-a-ba
²⁶nam-lugal nij₂-kal-kal-la-am₃
^27dli-pi₂-it-ec₄-tar₂ dumu ^den-lil₂-la₂-ra
²⁸an gal-e saj-e-ec mu-ni-in-rig₇

²⁹sa-«bar»-gid₂-da-am ₃

³⁰an gal-am₃ dijir pa-ed₂ gal-am₃
³¹an u₁₈-ru (1 ms. has instead: mah-di) lugal ^dli-pi₂-it-ec₄-tar₂-ra jickim-til₃-la-ni na-nam

³²jic-gi₄-jal₂-bi-im (1 ms. has instead: jic-gi₄-jal₂ sa-gid₂-da-bi-im)

³³an-e cag₄ gu₂-bi gi₄-a-na lugal mu-ni-in-pad₃
³⁴cag₄-bal-bal nam-lugal-la-ra gu₃ zid mu-na-an-de₂
^35dli-pi₂-it-ec₄-tar₂ a₂ cum₂-ma-ju₁₀-me-en gu₂ an-ce₃ he₂-zig₃
³⁶ud gu₃ di saj-bi zi-zi-gin₇ su-zi he₂-me-da-ri
³⁷gu₂ erim₂-jal₂ kur nu-ce-ga-zu u₁₈-lu-zu he₂-em-dul
³⁸nij₂-si-sa₂ ki-en-gi ki-uri mu-ni-jar su kalam-ma mu-dug₃
^39dli-pi₂-it-ec₄-tar₂ dumu ^den-lil₂-la₂ ud-gin₇ dalla he₂-ni-ed₂
⁴⁰iri a₂-dam mac-gan₂ ki jar-ra ka tec₂ hu-mu-ra-ab-sig₁₀
⁴¹uj₃ saj gig₂-ga u₈-gin₇ lu-a us₂ zid hu-mu-ra-ab-sig₉-ge₅
^42dli-pi₂-<it-ec₄-tar₂> kur ki su₃-ra₂-ce₃ lugal-bi he₂-me-en
^43jicgu-za mah nam-nun-na he₂-du₇ gi₁₆-sa nam-lugal-la
^44den-lil₂-le zid-de₃-ec ma-ra-an-cum₂ suhuc-bi hu-mu-ra-ab-sig₁₀
^45dsuen aga saj-za mi-ni-in-ga-na muc₃ nam-ba-an-tum₂-mu
^46den-ki-ke₄ me nam-nun-na-ka ce-er-ka-an hu-mu-<ra>-ni-in-dug₄
^47dinana tug₂ nam-nun-na-ka za-e-da hu-mu-X-de₃-gub
^48dudug sag₉-ga ^dlama e₂-kur-ra he₂-me-da-sug₂-sug₂-ge-ec
⁴⁹nidba ^jicjectin /ga^?\ il₂-la-zu cu he₂-em-da-jal₂-jal₂
⁵⁰dumu nij₂-dim₂-ma [^d]en-lil₂-la₂-me-en nij₂ hu-<mu>-ra-ab-dug₃-dug₃
2 lines missing

⁵³sa-[jar-ra-am₃]

⁵⁴dijir ni₂ gur₃ /cag₄-ge pad₃-da dumu\ /^den\-[lil₂-la₂] nij₂ ha-ra-ab-gu-ul-[gu-ul]

⁵⁵jic-gi₄-jal₂-bi-/im\

⁵⁶an-e dug₄-ga-ni nam dug₃ tar-[ra-am₃]
⁵⁷an gal-e dug₄-ga-ni nam dug₃ [tar-ra-am₃]
^58dli-<pi₂-it-ec₄-tar₂> dumu ^den-lil₂-la₂-ra cu [...]

⁵⁹u₁₉-ru_{1 2}-bi-im

⁶⁰a-da-ab an-[na-kam]

Top | Home This composition: translation | bibliography

Revision history

26.v.1999 : GZ : standardization
29.vii.1999 : JAB : proof-reading
26.viii.1999 : GZ : SGML tagging
03.ix.1999 : ER : proofreading SGML
03.ix.1999 : ER : converting to HTML 4.0
7.ix.2001 : ER : header and footer reformatted; substantive content of file not changed