The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A hymn of Inana for Ur-Ninurta (Ur-Ninurta A): composite text

¹[...]-ru^? mah^?-a-ni zag nu-sa₂
²[...] X X ji₆-u₃-na kar₂-kar₂
³[...]-a ni₂ me-lem₄ [gur₃]-ru
⁴[X X]-ja₂-ni-ce₃ dijir gal-gal-e-ne hu-luh-ha im-du₈-du₈
⁵[X] X dug₄-ga-ni an-gin₇ mah ^den-lil₂-gin₇ u₁₈-ru
^6dinana saj-kal me nij₂-nam-ma zag dib nin-e-ne
⁷jic-hur nam-lugal-la cu du₇-du₇ ki-bi gi₄-gi₄-de₃
⁸[saj] gig₂ si sa₂-sa₂-e-de₃ us₂ gen₆-na dab₅-be₂-de₃
⁹jectug₂-ga-ni nam-gub cag₄-ga-ni zid-de₃-ec-e nam-de₆
¹⁰[^d]ur-^dnin-urta nam-sipad zi-jal₂-la-ce₃ uj₃ car₂-ra mi-ni-in-pad₃
¹¹[X] nam tar-ra me zid hal-ha dijir gal-gal-e-ne-ce₃
¹²e₂-kur ki-tuc kug an ^den-lil₂-la₂ ni₂ su-zi gur₃-ru-ce₃
¹³lugal-ra cu-ni im-ma-an-dab₅ sun₅-na-bi mi-ni-in-kur₉
¹⁴in-nin e-ne-da-nu an ki-a nam nu-tar-re-de₃
¹⁵an ^den-lil₂-da barag-ge₄ si-a-na ad mu-un-na-ni-ib-gi₄-gi₄

¹⁶ki-ru-gu₂ 1-a-kam

¹⁷an gal dug₄-ga-zu nij₂-mah-am₃ a-ba-a cu mi-ni-ib-bal-e
¹⁸a-a ^den-lil₂ nam gal tar-ra-zu sag₂ di nu-zu-a
^19dur-^dnin-urta cul a₂ aj₂-ja₂-<zu>-ne-ne DI.DI mu-un-zu-a-ar
²⁰nam-sipad zi-jal₂ uj₃ car₂-ra du-ri₂-ce₃ saj-e-ec rig₇-ga-na-ab-ze₂-en
²¹e₂ iri^ki du₃-du₃ kalam gen₆-ne₂ cag₄ kug-ta mu-u₈-de₆
²²kur-kur-re a₂ aj₂-ja₂-bi mu-un-zu a₂ gal he₂-aj₂-e
²³sibir-a-ni ki bal he₂-en-gam-e us₂ gen₆ he₂-bi₂-ib-dab₅-be₂
²⁴sig-ta igi nim-ce₃ kalam-ma rab-gin₇ cu he₂-em-ri-ri-e
²⁵ka-ta ed₂-a-ni [...]
²⁶udu-gin₇ ka u₂ gu₇ ha-ba-kij₂-kij₂ GU₂ a naj ha-ba-ja₂-ja₂

²⁷ki-ru-gu₂ 2-kam-ma-am₃

^28dur-^dnin-urta mu su₃-ra₂-ce₃ uj₃-ja₂ ^dutu-gin₇ dalla he₂-ni-in-ed₂

²⁹jic-gi-jal₂-bi-im

³⁰dijir numun ed₂ a-a nij₂-nam car₂-ra-ke₄
³¹lugal-ra gu₃ zid mu-na-an-de₂ nam mu-ni-ib-tar-re
^32jicerin suh me-te kisal e₂-kur-ra
^33dur-^dnin-urta kalam-ma jissu-zu ni₂ he₂-eb-ci-te-en-te-en
³⁴kur-kur-re sipad zid-bi he₂-me-en
^35dutu-gin₇ di si sa₂ ku₅-ru-zu-uc igi-bi he₂-em-ci-jal₂-e
³⁶barag nam-lugal-la suhuc gen₆-na-ba
^37dur-^dnin-urta dur₂ jar-ra-zu-ne saj an-ce₃ he₂-ni-in-il₂
³⁸aga zid-de₃ me-te he₂-em-mi-in-jal₂
³⁹ni₂ su zig₃ ur-mah nam-lugal-la ^tug₂ma₆-ce₃ he₂-em-mu₄

⁴⁰ki-ru-gu₂ 3-kam-ma-am₃

⁴¹e₂-an-ka me-bi ha-ba-gub-be₂
^42dur-^dnin-urta bad gal-zu je₂₆-e-me-en ud ul du-ri₂-ce₃

⁴³jic-gi₄-jal₂-bi-im

⁴⁴erim₂-jal₂-za ud-gin₇ gu₃ bi₂-ra
⁴⁵me-lem₄-zu muru₉ dugud-da-gin₇ kur nu-ce-ga-zu he₂-em-dul
⁴⁶/barag\-barag gal-gal ni₂-er₉-e-ne
⁴⁷[...] X X gi dili du₃-a-gin₇ kilib₃-ba-bi saj he₂-em-da-sig₃-ge-ne
⁴⁸[X X] X-ra LI NE [...]
⁴⁹[tum₉-u₁₈]-lu-gin₇ zi-zi-da-zu-ne
⁵⁰kur ki bal-zu sig₁₀-ge u₃-mu-e-ak
⁵¹uj₃-bi caga-a um-mu-lah₅
⁵²i₃-si-in^ki iri me gal-gal-la-za
^53dur-^dnin-urta ^jiccudun gu₂-ba jar-ni
⁵⁴an gal a-[a] dijir-re-e-ne-ke₄
^55dur-^dnin-urta sipad jic-tuku-ni-ir nam ul-ce₃ nu-kur₂-ru mu-ni-in-tar

⁵⁶ki-ru-gu₂ 4-kam-ma-am₃

⁵⁷en ec-bar an ki cu-na jal₂ kur gal ^den-lil₂-le
⁵⁸lugal-ra mu-ni an-zag₃-ce₃ pa ed₂ im-ma-an-ak
^59dur-^dnin-urta nam-nir nam-cul-la am-gin₇ gu₂ he₂-ni-pec
^60der₉-ra ur-saj-gin₇ me X [X]-an-TUKU.TUKU
^61dnin-urta en ud huc erim₂-ma dumu cu jar gi₄-ju₁₀
⁶²ki me₃-ka ka-tab-zu he₂-a jickim he₂-mu-e-til₃-le
⁶³kur gu₂ erim₂ gu₂-bi-da [X]-zu zar-re-ec ha-ma-ab-sal-e
⁶⁴cu-luh kug e₂-kur-ra ba-an-ci-/ib\-[...]-en ud cu₂-uc-e gub-ba
⁶⁵nidba-zu bancur mah unu₂ gal-ja₂ su₃-ra₂-ce₃ he₂-em-mi-in-jal₂
⁶⁶saj he₂-e-il₂ /gu₂ an\-ce₃ he₂-e-zig₃ til₃ nu-kur₂-ru za-a-am₃

⁶⁷ki-ru-gu₂ 5-kam-ma-am₃

⁶⁸nam-tar-ra an gal [^d]nu-nam-nir en nij₂-zi-jal₂-la-ce₃
^69da-nun-na dijir gal-gal-e-ne he₂-am₃ ba-ni-in-ne-ec
⁷⁰saj gig₂ ki tuc-ba ge-en-gen₆-ne₂ kur-kur us₂-a sig₁₀-ge₃
⁷¹uj₃ [X] X [X] X ka tec₂ ja₂-ja₂ jiri₃-ni-ce₃ gam-e
^72dinana dumu gal ^dsuen-na nitalam ki aj₂-ja₂-ni
⁷³saj-KEC₂ me nij₂-nam-ma mu-un-ur₄-ur₄ cu-ni-ce₃ mu-u₈-jar
⁷⁴2-na-ne-ne ki ^den-lil₂-la₂-ta hul₂-la nam-[ta]-ed₂
⁷⁵e₂^?-gal^? ki-tuc lal₃ nij₂-dug₃-ba dur₂ ki ba-ni-in-jal₂-le-ec
⁷⁶[X] X X-e lugal-la-ni nu-til-e zid-de₃-ec na-mu-un-e

⁷⁷ki-ru-gu₂ 6-[kam]-ma-am₃

⁷⁸cul me-dim₂ sag₉ sig₇ X ce-er-[ce]-er-ra saj il₂-e-de₃
⁷⁹hi-li ul gur₃-ru me-te na-aj₂-u₃-mu-un-na barag kug-ge du₇-re₆
^80dur-^dnin-urta me kal-kal-la-zu ca₃-ab-ju₁₀ im-mi-ir
⁸¹i-bi₂ zid il₂-la-za mi-ni-in-pad₃-de₃ mu pad₃-da-ju₁₀-me-en
⁸²an gal-e kur zag til-la-ba su₃-ud-ce₃ bi₂-in-dirig-ge
⁸³ur₂ kug nam-til₃-la SI.A-ju₁₀ ud-zu sud-sud-de₃
⁸⁴cul ^den-lil₂-le e₂-kur-ta a₂-bi mu-un-da-an-aj₂
⁸⁵X X /barag\ mi₂ zid-de₃-ec dug₄-ga-ju₁₀ muc₃ nam-bi₂-ga-ga-an
^86dnanna an kug-ga pa ed₂-a ka-na-aj₂-e u₆ di-gin₇
⁸⁷[^d]/ur\-^dnin-urta-ju₁₀ kur-kur-re hi-li hu-mu-u₈-ci-ak-e

⁸⁸ki-ru-gu₂ 7-kam-ma-am₃

^89dur-^dnin-urta-ju₁₀ ^dmu-ul-lil₂-le nam-sipad ka-na-aj₂-ja₂-kam zid-de₃-ec mu-un-pad₃-de₃-en

⁹⁰jic-gi₄-jal₂-bi-im

⁹¹[...] X KA kug ec-bar zid dug₄-ga nu-kur₂-ru-ju₁₀-uc
⁹²[...] a₂ nun he₂-em-te-jal₂
⁹³[...]-an-tuku-tuku

⁹⁴[...]-bi-im

⁹⁵[...] ^dinana-kam

Top | Home This composition: translation | bibliography

Revision history

24.v.1999-06.vii.1999 : JAB : standardisation
20.vii.1999 : GZ : proofreading
19.x.1999 : GC : tagging
22.x.1999 : ER : proofreading SGML
22.x.1999 : ER : converting to HTML 4.0
7.ix.2001 : ER : header and footer reformatted; substantive content of file not changed