The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography


A hymn of Inana for Ur-Ninurta (Ur-Ninurta A): composite text

1[...]-ru? mah?-a-ni zag nu-sa2
2[...] X X ji6-u3-na kar2-kar2
3[...]-a ni2 me-lem4 [gur3]-ru
4[X X]-ja2-ni-ce3 dijir gal-gal-e-ne hu-luh-ha im-du8-du8
5[X] X dug4-ga-ni an-gin7 mah den-lil2-gin7 u18-ru
6dinana saj-kal me nij2-nam-ma zag dib nin-e-ne
7jic-hur nam-lugal-la cu du7-du7 ki-bi gi4-gi4-de3
8[saj] gig2 si sa2-sa2-e-de3 us2 gen6-na dab5-be2-de3
9jectug2-ga-ni nam-gub cag4-ga-ni zid-de3-ec-e nam-de6
10[d]ur-dnin-urta nam-sipad zi-jal2-la-ce3 uj3 car2-ra mi-ni-in-pad3
11[X] nam tar-ra me zid hal-ha dijir gal-gal-e-ne-ce3
12e2-kur ki-tuc kug an den-lil2-la2 ni2 su-zi gur3-ru-ce3
13lugal-ra cu-ni im-ma-an-dab5 sun5-na-bi mi-ni-in-kur9
14in-nin e-ne-da-nu an ki-a nam nu-tar-re-de3
15an den-lil2-da barag-ge4 si-a-na ad mu-un-na-ni-ib-gi4-gi4

16ki-ru-gu2 1-a-kam


17an gal dug4-ga-zu nij2-mah-am3 a-ba-a cu mi-ni-ib-bal-e
18a-a den-lil2 nam gal tar-ra-zu sag2 di nu-zu-a
19dur-dnin-urta cul a2 aj2-ja2-<zu>-ne-ne DI.DI mu-un-zu-a-ar
20nam-sipad zi-jal2 uj3 car2-ra du-ri2-ce3 saj-e-ec rig7-ga-na-ab-ze2-en
21e2 iriki du3-du3 kalam gen6-ne2 cag4 kug-ta mu-u8-de6
22kur-kur-re a2 aj2-ja2-bi mu-un-zu a2 gal he2-aj2-e
23sibir-a-ni ki bal he2-en-gam-e us2 gen6 he2-bi2-ib-dab5-be2
24sig-ta igi nim-ce3 kalam-ma rab-gin7 cu he2-em-ri-ri-e
25ka-ta ed2-a-ni [...]
26udu-gin7 ka u2 gu7 ha-ba-kij2-kij2 GU2 a naj ha-ba-ja2-ja2

27ki-ru-gu2 2-kam-ma-am3


28dur-dnin-urta mu su3-ra2-ce3 uj3-ja2 dutu-gin7 dalla he2-ni-in-ed2

29jic-gi-jal2-bi-im


30dijir numun ed2 a-a nij2-nam car2-ra-ke4
31lugal-ra gu3 zid mu-na-an-de2 nam mu-ni-ib-tar-re
32jicerin suh me-te kisal e2-kur-ra
33dur-dnin-urta kalam-ma jissu-zu ni2 he2-eb-ci-te-en-te-en
34kur-kur-re sipad zid-bi he2-me-en
35dutu-gin7 di si sa2 ku5-ru-zu-uc igi-bi he2-em-ci-jal2-e
36barag nam-lugal-la suhuc gen6-na-ba
37dur-dnin-urta dur2 jar-ra-zu-ne saj an-ce3 he2-ni-in-il2
38aga zid-de3 me-te he2-em-mi-in-jal2
39ni2 su zig3 ur-mah nam-lugal-la tug2ma6-ce3 he2-em-mu4

40ki-ru-gu2 3-kam-ma-am3


41e2-an-ka me-bi ha-ba-gub-be2
42dur-dnin-urta bad gal-zu je26-e-me-en ud ul du-ri2-ce3

43jic-gi4-jal2-bi-im


44erim2-jal2-za ud-gin7 gu3 bi2-ra
45me-lem4-zu muru9 dugud-da-gin7 kur nu-ce-ga-zu he2-em-dul
46/barag\-barag gal-gal ni2-er9-e-ne
47[...] X X gi dili du3-a-gin7 kilib3-ba-bi saj he2-em-da-sig3-ge-ne
48[X X] X-ra LI NE [...]
49[tum9-u18]-lu-gin7 zi-zi-da-zu-ne
50kur ki bal-zu sig10-ge u3-mu-e-ak
51uj3-bi caga-a um-mu-lah5
52i3-si-inki iri me gal-gal-la-za
53dur-dnin-urta jiccudun gu2-ba jar-ni
54an gal a-[a] dijir-re-e-ne-ke4
55dur-dnin-urta sipad jic-tuku-ni-ir nam ul-ce3 nu-kur2-ru mu-ni-in-tar

56ki-ru-gu2 4-kam-ma-am3


57en ec-bar an ki cu-na jal2 kur gal den-lil2-le
58lugal-ra mu-ni an-zag3-ce3 pa ed2 im-ma-an-ak
59dur-dnin-urta nam-nir nam-cul-la am-gin7 gu2 he2-ni-pec
60der9-ra ur-saj-gin7 me X [X]-an-TUKU.TUKU
61dnin-urta en ud huc erim2-ma dumu cu jar gi4-ju10
62ki me3-ka ka-tab-zu he2-a jickim he2-mu-e-til3-le
63kur gu2 erim2 gu2-bi-da [X]-zu zar-re-ec ha-ma-ab-sal-e
64cu-luh kug e2-kur-ra ba-an-ci-/ib\-[...]-en ud cu2-uc-e gub-ba
65nidba-zu bancur mah unu2 gal-ja2 su3-ra2-ce3 he2-em-mi-in-jal2
66saj he2-e-il2 /gu2 an\-ce3 he2-e-zig3 til3 nu-kur2-ru za-a-am3

67ki-ru-gu2 5-kam-ma-am3


68nam-tar-ra an gal [d]nu-nam-nir en nij2-zi-jal2-la-ce3
69da-nun-na dijir gal-gal-e-ne he2-am3 ba-ni-in-ne-ec
70saj gig2 ki tuc-ba ge-en-gen6-ne2 kur-kur us2-a sig10-ge3
71uj3 [X] X [X] X ka tec2 ja2-ja2 jiri3-ni-ce3 gam-e
72dinana dumu gal dsuen-na nitalam ki aj2-ja2-ni
73saj-KEC2 me nij2-nam-ma mu-un-ur4-ur4 cu-ni-ce3 mu-u8-jar
742-na-ne-ne ki den-lil2-la2-ta hul2-la nam-[ta]-ed2
75e2?-gal? ki-tuc lal3 nij2-dug3-ba dur2 ki ba-ni-in-jal2-le-ec
76[X] X X-e lugal-la-ni nu-til-e zid-de3-ec na-mu-un-e

77ki-ru-gu2 6-[kam]-ma-am3


78cul me-dim2 sag9 sig7 X ce-er-[ce]-er-ra saj il2-e-de3
79hi-li ul gur3-ru me-te na-aj2-u3-mu-un-na barag kug-ge du7-re6
80dur-dnin-urta me kal-kal-la-zu ca3-ab-ju10 im-mi-ir
81i-bi2 zid il2-la-za mi-ni-in-pad3-de3 mu pad3-da-ju10-me-en
82an gal-e kur zag til-la-ba su3-ud-ce3 bi2-in-dirig-ge
83ur2 kug nam-til3-la SI.A-ju10 ud-zu sud-sud-de3
84cul den-lil2-le e2-kur-ta a2-bi mu-un-da-an-aj2
85X X /barag\ mi2 zid-de3-ec dug4-ga-ju10 muc3 nam-bi2-ga-ga-an
86dnanna an kug-ga pa ed2-a ka-na-aj2-e u6 di-gin7
87[d]/ur\-dnin-urta-ju10 kur-kur-re hi-li hu-mu-u8-ci-ak-e

88ki-ru-gu2 7-kam-ma-am3


89dur-dnin-urta-ju10 dmu-ul-lil2-le nam-sipad ka-na-aj2-ja2-kam zid-de3-ec mu-un-pad3-de3-en

90jic-gi4-jal2-bi-im


91[...] X KA kug ec-bar zid dug4-ga nu-kur2-ru-ju10-uc
92[...] a2 nun he2-em-te-jal2
93[...]-an-tuku-tuku

94[...]-bi-im


95[...] dinana-kam


Top | Home This composition: translation | bibliography


Revision history

24.v.1999-06.vii.1999 : JAB : standardisation
20.vii.1999 : GZ : proofreading
19.x.1999 : GC : tagging
22.x.1999 : ER : proofreading SGML
22.x.1999 : ER : converting to HTML 4.0
7.ix.2001 : ER : header and footer reformatted; substantive content of file not changed