The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A tigi of Enki for Ur-Ninurta (Ur-Ninurta B): composite text

¹en me galam-ma umuc ki jar-ra cag₄ su₃-ud nij₂-nam zu
^2den-ki jectug₂ dajal mas-su mah ^da-nun-na-ke₄-ne
³gal-an-zu tu₆ jar inim-ma sig₁₀-ga ec-bar-ra igi jal₂
⁴sa₂ pad₃-de₃ ud ed₂-ta ud cu₂-uc-ce₃ jalga cum₂-mu
^5den-ki en dug₄-ga zid-zid-da me-tec₂-e ga-a-i-i
⁶a-a-zu an lugal en numun i-i uj₃ ki jar-jar-ra
⁷me an ki saj-KEC₂-bi-ce₃ ma-ra-an-sig₁₀ nun-bi-ce₃ mu-un-il₂-en
^8id₂idigna ^id₂buranun ka kug-bi du₈-u₃ nij₂-giri₁₇-zal si-si
⁹dungu sir₂-re a he₂-jal₂-la cum₂-mu a-gar₃-ra cej₃-cej₃
^10dacnan ab-sin₂-na saj il₂-il₂-i u₂-cim edin-na TAR [...] X
¹¹pu₂-^jickiri₆ lal₃ jectin ki tag-ga tir-gin₇ sud-sud-e
¹²an lugal dijir-re-e-ne-ke₄ a₂-bi mu-e-da-a-aj₂
^13den-lil₂-le mu mah saj-kug-jal₂ ni₂ gal gur₃-ru-ni
¹⁴cu^? ma-ra-an-ba en nij₂-nam u₃-tud ^den-lil₂ ban₃-da-me-en
¹⁵an ki-a dili-ni dijir-ra-am₃ dub-us₂-a-ni za-e-me-en
¹⁶e-ne-gin₇ nam sig igi-nim-ma tar-tar-re cu-zu-ce₃ ca-mu-u₈-jar
¹⁷ec-bar zid ka-ta ed₂-a-zu uru₂^ru dib-ba-am₃
^18dsa₂-bar-a kur zag-til-la-ac uj₃ dajal dur₂-ru-na-ba
¹⁹gu₇ naj-bi-ce₃ im-da-kuc₂-u₃-de₃-en a-a zid-bi za-e
²⁰en dijir-bi-gin₇ nam-mah-zu me-tec₂ im-mi-i-i-ne

²¹sa-gid₂-da-am₃

^22dnu-dim₂-mud ^dur-^dnin-urta-ra inim kug dug₄-ga mah-zu
²³nir he₂-jal₂ gaba-gi₄ na-an-tuku-tuku

²⁴jic-gi₄-jal₂-bi-im

²⁵en mah an ki-a zag bi₂-dib mu-zu pa bi₂-ed₂
^26den-ki me a-na jal₂-la mu-u₈-ur₄-ur₄ abzu-ce₃ mu-u₈-jar
²⁷ki-tuc kug cag₄-ge bi₂-pad₃-da-zu abzu ec₃ mah-a X X
²⁸me-bi me-a dirig jic-hur-bi a-re-ec gub-ba-me-en
²⁹jissu-bi ud ed₂-ta ud cu-uc kur-kur-ra ci-im-dul
³⁰ni₂ me-lem₄ muru₉ dugud-da-gin₇ an kug-ge ib₂-us₂
³¹e₂-kur ki-tuc kug an ^den-lil₂-la₂ su-zi im-du₈-du₈
³²cag₄-ba jidru cum₂-mu me hal-hal-la dijir gal-gal-e-ne-ce₃
³³X numun^? car₂-ra im-dim₂-e nam-lu₂-ulu₃ u₃-tud til₃-le i₃-jal₂
³⁴a-a ^den-ki barag nam-tar-ra-za dur₂ jar-ra-zu-ne

³⁵sa-jar-ra-am₃

³⁶lugal ^den-lil₂-le nir cum₂-ma ^dur-^dnin-urta-ke₄
³⁷e₂ jectug₂-ga nam-gal-an-zu dirig-ce₃ nijin jal₂-la-za
³⁸jal₂ u₃-bi₂-in-taka₄ saj gig₂-ga mas-su gal-bi he₂-em
³⁹su-zi me-te nam-dijir-ra ur-mah nam-lugal-la
⁴⁰nij₂ cu dug₄-ga /ud\ saj-ja₂-na til₃-la-ce₃ pa ed₂-ni-ib
⁴¹gu₂-un dugud a-ab-ba sig igi-nim-ma saj-e-ec u₃-mu-e-ni-rig₇
^42dur-^dnin-urta-ke₄ he₂-ni-ib-ku₄-ku₄ e₂-kur za-gin₃-ce₃
^43den-lil₂-le igi hul₂-hul₂-la-ni e-ne-ra u₃-mu-un-ci-in-bar
⁴⁴bal-a-na ud dug₃ mu giri₁₇-zal nam-til₃-la ha-ma-ab-tah-e
⁴⁵a-a ^den-ki nam-gal ni₂ ri-a ka-ge dib-ba-zu-uc
^46da-nun-na dijir /cec\-zu-ne he₂-me-da-hul₂-hul₂-le-ec
⁴⁷dumu an-na mah nir-jal₂-bi tuku za₃-mi₂-zu dug₃-ga-am₃

⁴⁸tigi ^den-ki-ka₃-kam

Top | Home This composition: translation | bibliography

Revision history

24.v.1999-07.vii.1999 : JAB : standardisation
15.ix.1999 : GZ : proofreading
20.x.1999 : GC : tagging
22.x.1999 : ER : proofreading SGML
22.x.1999 : ER : converting to HTML 4.0
7.ix.2001 : ER : header and footer reformatted; substantive content of file not changed