The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

An adab of Inana for Ur-Ninurta (Ur-Ninurta D): composite text

¹in-nin₉ zag dib ^da-nun-na-ke₄-ne me kilib₃-ba ur₄-/ur₄\
²igi-zu nir-jal₂ an ki-bi-da kur-kur-ra igi jal₂
^3dinana pirij an-na mul-mul-lu me-zu galam-galam-ma
⁴jarza-zu nij₂ nu-kur₂-ru-dam jic-hur-zu dugud-da

⁵bar-sud-am₃

⁶dim₂-ma-zu abzu su₃-ra₂-am₃ igi bar-re nu-um-zu
⁷a-ra₂ ak-a-zu nij₂ gal-gal-am₃ dijir nu-me-da-sa₂
⁸me-zu ud silim-ma-bi ba-e-de₆ nij₂-nam la-ba-e-da-cub
⁹nam-lugal ka-KEC₂-me nij₂-nam-ma cu-zu la-ba-ra-ed₂
¹⁰an lugal-da zag mu-un-de₃-gub nam mu-un-di-ni-ib-tar-re
^11den-lil₂-gin₇ ka-ta ed₂-a-zu ki-bi-ce₃ al-ja₂-ja₂
^12dinana mah di an ki-a gaba-ri nu-tuku-me-en
¹³lugal ki aj₂ dijir-re-e-ne a-la mu-un-ci-ak-/e\
^14dur-^dnin-urta cul igi il₂-la-zu me-te-zu-uc en-e
^15dnin-tu-re hi-li /mu\-[un-ci]-/in-tu\-ud-«de₃-en» u₆ [di-zu]-/ce₃\ ma-ra-an-gub
¹⁶jic-cub-ba-ni sag₉-ge mu-/un\-[ge]-/en\ igi-za im-mi-/in\-[X]
¹⁷ur₃^? ra ga cu-nir-e he₂-du₇-a nam-nun-ce₃ mu-un-il₂
¹⁸ir-sim dug₃-ga ku₇-ku₇-da-ke₄ cag₄ kug-zu he₂-em-tum₃
¹⁹jic-nu₂ gi₄-rin hi-li si-a-za gu₂ hu-mu-un-di-X-re
²⁰cul jic tuku nun za-a-ce₃ jal₂-la me ul-zu-uc ha-ba-gub
^21dur-^dnin-urta-ke₄ uj₃ car₂-re uc₂ zid he₂-bi₂-ib-dab₅-be₂

²²sa-gid₂-da-am₃

^23dinana ^dur-^dnin-urta-ke₄ ud ul da-ri₂-ce₃ muc₃ la-ba-da-tum₂-mu

²⁴jic-gi₄-jal₂-bi-im

^25d/inana\ nin an ki dajal-la u₁₈-ru KI UD-ta
²⁶X [...] X-ma saj mu₂-mu₂-mu₂ ji₆-u₃-na kar₂-kar₂
²⁷[...] /kur^?\ idim-ta ed₂-a an urac-a dajal bur₂
²⁸[...]-/da\ tec₂-bi-im ama-na hi-li-bi-im
²⁹[... he₂]-/mi\-ni-in-mah-en ur-^dnin-urta-ke₄
³⁰[...] /saj\ hu-mu-ni-in-il₂ am gal-bi he₂-a
³¹[...] /gam\-gam-mu-na-ab cu he₂-em-ri-ri-e
³²[a] /zid\-da-ta ri-a-na cu mah-a-ni si-bi₂-ib
³³/uj₃\ u₂-sal-la hu-mu-un-de₃-nu₂ na-gada-bi he₂-a
^34dur-^dnin-urta-ke₄ uj₃ car₂-re uc₂ zid he₂-bi₂-ib-dab₅-be₂

³⁵sa-jar-ra-am₃

^36dinana ur₂ kug nij₂-dug₃-za ^dur-^dnin-urta-ke₄ nam-til₃-la ud ha-ba-ni-ib-su₃-ud-de₃

³⁷jic-gi₄-jal₂-bi-im

³⁸nin me gal-gal-la nam-nir-ra cu du₇
^39dinana nin me gal-gal-la nam-nir-ra cu du₇
^40dur-^dnin-urta-ra he₂-jal₂ zi su₃-ud-jal₂ saj-e-ec mu-ni-rig₇

⁴¹u₁₈-ru_{1 2}-bi-im

⁴²a-dab₂ ^dinana-kam

Top | Home This composition: translation | bibliography

Revision history

24.v.1999-7.vii.1999 : JAB : standardising
09.viii.1999 : GZ : proofreading
09.viii.1999 : GZ : SGML tagging
03.ix.1999: ER : proofreading SGML
03.ix.1999: ER : converting to HTML 4.0
7.ix.2001 : ER : header and footer reformatted; substantive content of file not changed