A hymn to Haia for Rim-Sin (Rim-Sin B): composite text

¹en jectug₂ mah cu du₇ sa₂ gal-e pad₃-da
²^dha-ia₃ dub gal-gal ha-ha-za jectug₂ jectug₂-ga pec-pec
³CID du₃ hal-an-kug igi zag-til galam-ma-ke₄ e₂ jectug₂ ^dnisaba-ke₄
⁴ca₁₃-dub-ba e₂-gal an ki-a kij₂ kilib-ba cid-cid
⁵gi kug-ga cu jal₂-le im nam-tar gal-gal mul-mul
⁶gal-an-zu inim jectug₂ rig₅-ge ud-bi-ce₃ an kug-ga-ra
⁷kicib-jal₂ a-a ^den-lil₂-la₂-ke₄ lu₂ tam-ma ed₂ erim₃ e₂-kur-ra
⁸he₂-du₇ ec₃-e abzu-a siki-bar-ra la₂-la₂ en ^dnu-dim₂-mud-ra
⁹^dha-ia₃ cag₄-gada-la₂ e₂-u₆-nir-ra uz-ga kug lu-lu
¹⁰umun₂ ak-ak ec₃ e₂-kic-nu-jal₂-la₂-ke₄ mu mah-bi gal-la
¹¹cag₄ inim-jal₂ ki-sikil ^dnin-gal-e unu₇ gal-e til₃-la
¹²muc₃-me sag₉ nitalam₂ ki aj₂ ^dnun-bar-ce-gu-nu
¹³lu₂ mu mah mi₂-us₂-sa kur gal a-a ^den-lil₂-la₂-kam
¹⁴sajja ban₃-da igi-jal₂ tuku pad₃-da an ki-bi-da-ke₄
¹⁵gu₂-un dijir-re-[e-ne] cu gid₂-i ma-dam kur ab su₃-ud-da inim-ma-ni bur₂-e
¹⁶gal-zu me mah /nam-nun-na\-ka u₅ tur₃^? zag KEC₂-da
¹⁷cag₄ dajal sur-ra jic-hur kug-ga e₂ eridug^ki-ga-ke₄ cu dab-be₂
¹⁸^dha-ia₃ lu₂ cu-luh sikil-la engur-ra-ke₄ ^tug₂ma₆ tug₂ la₂-la₂
¹⁹^dindagara sajja₂(GA.DUB₂) utah-he₂ kur-ta ka du₈-u₃ dijir-re-e-ne-ke₄
²⁰cag₄ dub-ba su₃-ud-da zu-a galam ak-ak dijir gal-gal-e-ne
²¹cu-nir-nir ^jicgag-a du₃-du₃ saj sig₉-ga ki galam hur kalam-ma
²²ki cu tag-tag unu₇ sig₇-ga an-car₂ kur gal-ra
²³saj il₂ mah ec₃-e abzu-ta dug₄-ga-ni ce-ga
²⁴lu₂ saj-KEC₂ ninda babbar sikil-la cu dab-be₂ e₂ dijir-re-e-ne
²⁵^dkug-sud ^dindagara e-ne-ne-da-nu an nu-sikil-la ki nu-dadag-ge
²⁶u₂ gal-gal sud-sud an ^den-lil₂-la₂ unu₇ mah-ne-ne-ke₄
²⁷lu₂ muc₃ kug-ga igi-du₈ en ^dnu-dim₂-mud-e
²⁸zabar kug-ga cu jal₂-le cag₄ hul₂-hul₂ bar sig₁₀-sig₁₀-ge₅
²⁹lugal-ju₁₀ nam-mah-zu cir₃-ra ga-am₃-i-i
³⁰^dha-ia₃ nam-gal-zu gi₁₆-sa-ce₃ ga-am₃-pad₃-pad₃-de₃-en
³¹a-ba za-a-gin₇ dijir-re-e-ne-ke₄ me kug-ga-ac tum₂-ma
³²nitalam ki aj₂-zu ki-sikil ^dnisaba nin gal nin-e-ne
³³u₃-tud-da cag₄-ga-ni ^dnin-lil₂-la₂ dam mah ^dnu-nam-nir-ra
³⁴barag e₂-kur-ra-ke₄ saj il₂-la an-ce₃ ci-in-da-til₃
³⁵nam-nin dijir-re-e-ne-ke₄ me-er-ga-bi al-ak-e dijir zag-cag₄ nu-tuku
³⁶za-e ninda₂ gal jalga zid pad₃-da en₃ tar-tar dijir-re-e-ne-ke₄
³⁷^dha-ia₃ me cum₂-cum₂-mu kij₂ aj₂-e ki cu-pec igi-zu-zu-me-en
³⁸^den-ki-ke₄ ec₃-e abzu-ta tu₆-tu₆ nam-til₃-la-ni mu-ra-rig₇
³⁹en ji₆-par₃-e mu-ni-ib-huj-en saj-sig₁₀ mu-ni-ib-jar-re-en
⁴⁰sipad kalam-ma-ra jidru mah ud su₃-ra₂ cu-ni-ce₃ bi₂-ib-dab₅-e-en
⁴¹^dha-ia₃ dijir kalam-ma a-ra-zu uj₃ car₂-ra jic tuku-me-en
⁴²za-e dijir gal-gal-e-ne uj₃ dajal-la cu-ni-ce₃ bi₂-ib-dab₅-e-en
⁴³a-a ^den-ki abzu-ta ed₂-da-ni-ta
⁴⁴^dha-ia₃ nam-gal-bi za-e ca-mu-re-da-an-aj₂
⁴⁵uj₃ cag₄-ba i₃-ni-me-a-ke₄ gu₂-bi an-ce₃ ci-bi₂-ib₂-zi-zi
⁴⁶nam-lu₂-ulu₃-bi ud asilal-la₂ mi-ni-ib-zal-zal-le-ne
⁴⁷uj₃ car₂-ra-bi cag₄ hul₂-la ud ul-li₂-a-ac bi₂-ib-ak-e-en
⁴⁸e₂ dijir gal-gal-e-ne ezen ab-jar-re-en giri₁₇-zal ci-bi₂-du₈-du₈-un
⁴⁹saj-kal saj-kal-e dijir-re-e-ne-ke₄ jic-cub gal-gal uj₃ til-la-ni
⁵⁰igi sag₉-ga-zu nam-til₃ si-a lugal-ra igi zid bar-mu-un-ci-ib
⁵¹nun ^dri-im-^dsuen bal hul₂-hul₂ ud su₃-ud-da cu zid jar-mu-na-ab
⁵²im nam-til₃-la-ke₄ du-ri₂-ce₃ nu-kur₂-ru mu-bi gub-i₃
⁵³sipad ^dri-im-^dsuen nam-en-bi an ^den-lil₂-la₂ ki he₂-aj₂-e-ne
⁵⁴lu₂ cir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
⁵⁵^dha-ia₃ lu₂-cir₃-ra-ke₄ za₃-mi₂-zu ka-bi-a mi-ni-ib-dug₃-ge-ne
⁵⁶en an ki lugal abzu-a za₃-mi₂-bi mah-a
⁵⁷a-a ^den-ki lugal abzu-a za₃-mi₂-zu dug₃-ga

⁵⁸u₁₈-ru₁₂-bi-im

⁵⁹^dha-ia₃ dijir kalam-ma ga-til₃-e ki aj₂ nun ^dri-im-^dsuen-e a₂ bad tal₂-ni he₂-me-en

⁶⁰jic-gi-jal₂-bi-im

Top | Home This composition: translation | bibliography

Revision history

4.vi.1999-7.vii.1999 : JAB : standardising
28.vii.1999 : GZ : proofreading
30.vii.1999 : GZ : SGML tagging
27.viii.1999 : ER : proofreading SGML
27.viii.1999 : ER : converting to HTML 4.0
7.ix.2001 : ER : header and footer reformatted; substantive content of file not changed