A prayer to An for Rim-Sin (Rim-Sin C): composite text

¹sipad mu pad₃-da an kug-ge nam gal an-na tar
²^dri-im-^dsuen mu pad₃-da an kug-ge nam gal an-na tar
³nun cag₄ zid-ta nam-lugal-la mu-un-sa₂
⁴nam-men uj₃ car₂-ra-ce₃ gal-le-ec kij₂-kij₂-en
⁵larsa^ki-ma kur SA₄ me nam-nun-na de₂-a
⁶nam-sipad ki-en-gi ki-uri-ce₃ zid-de-ec pad₃-da-me-en
⁷an gal mah an ki-a en nij₂-nam gal-zu
⁸a-a dijir-re-e-ne nam tar-tar-re-de₃ ki-bi-ce₃ ci-jar
⁹dug₄-ga dugud inim-bi nu-silig-ge
¹⁰an-cag₄-ga sikil-la DU JAL₂
¹¹nun ^dri-im-^dsuen sipad cag₄-ge «UD» de₆-a-ne-me-en
¹²an gal-e cag₄ ki aj₂-ja₂-ni dalla hu-mu-ra-<ni>-in-ed₂
¹³nij₂-si-sa₂-zu-ce₃ gu₃ zid-de₃-ec hu-mu-ra-ab-di
¹⁴an cag₄-ge su₃-ra₂ ud nam-til₃-zu hu-mu-ra-ab-dirig-ga
¹⁵nam-lugal kur nij₂-dajal-la ud su₃-ra₂-ce₃ hu-mu-ra-ab-cum₂
¹⁶inim kug-ga-ne-ne-a nam nam-til₃-la hu-mu-ra-ab-tar
¹⁷dug₄-ga nij₂-nam nu-kur₂-da zi su₃-ra₂ hu-mu-ra-ab-tah
¹⁸aga kug-ge saj-za-a he₂-ne₂-eb-ge-en
¹⁹^jicgu-za nam-til₃-la-ka gal-bi hu-mu-ra-ab-tuc
²⁰u₃-luh nij₂-si-sa₂ cu-zu-ce₃ hu-mu-ra-ab-si
²¹sibir kalam ge-en-ge-en su-zu-a he₂-bi₂-la
²²ecgiri uj₃ lu-a hu-mu-ra-ab-dab₅
²³ubur an sud-aj₂ jal₂ hu-mu-ra-ab-taka₄ cej_x(IM.A) an-na hu-mu-ra-ab-cej₃
²⁴mu ma-da ud nam-he₂ an-cag₄-ta zag hu-mu-ra-ab-KEC₂
²⁵iti₆ nij₂ giri₁₇-zal cag₄ hul₂-la ud-zu-ce₃ hu-mu-ra-ab-jar
²⁶bal nij₂-dug₃ nij₂-si-su si-a cu-zu-ce₃ hu-mu-ra-ab-jar
²⁷an gal-e su₃-ra₂-ce₃ a₂-bad-jal₂ nam-lugal-la-zu he₂-a
²⁸^dri-im-^dsuen lugal-ju₁₀
²⁹28 mu-ni cud₃-de₂ an

Top | Home This composition: translation | bibliography

Revision history

4.vi.1999-7.vii.1999 : JAB : standardising
26.vii. 1999 : GZ : proofreading
26.vii. 1999 : GZ : SGML tagging
10.ix.1999 : ER : proofreading SGML
10.ix.1999 : ER : converting to HTML 4.0
7.ix.2001 : ER : header and footer reformatted; substantive content of file not changed