The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A prayer for Rim-Sin (Rim-Sin E): composite text

¹[...] X X [...] cu luh kug-ga tum₂-ma
²[^d]ri-im-^dsuen icib an-na sizkur sikil-la tum₂-ma
³[X cag₄] kug-ta bi₂-pad₃-da-zu nam-en kalam-ma-ce₃ i-ni-il₂-la
⁴nam-sipad saj gig₂-ga i-ni-in-jar-ra
⁵ecgiri kalam ge-en-ge-en cu-ni bi₂-in-si-a
⁶sibir uj₃ zi-jal₂ lah₅-lah₅-e zag-ga-na bi₂-in-la₂
⁷ca-ra-da-gub cu sikil-la ak-a-ni nij₂-nam mi-ni-in-dug₃-dug₃
⁸ga ^dacnan-na (ms: ^dacnan-ma) ir dug₃-ga ma-dam kalam-ma-ka
⁹he-nun cag₄-tum₂-ma he₂-jal₂ nu-silig-ge
¹⁰kurun jectin pa ed₂-a
¹¹ ulucin₃ ku₇-ku₇-da a₂ sikil-da car₂-ra
¹²kac er₉ ki sikil /jectin\ tab-ba a naj nam-en-na-zu
¹³kac tab-ba kac mah cu kug-zu tum₂-ma
¹⁴lal₃ babbar mu pad₃-da-zu hur-saj-ta ed₂-a
¹⁵i₃ ab₂ kug-ga i₃-nun me-te nam-nun-na-zu
¹⁶i₃-jic barag-ga i₃-li saj sig₉-ga
¹⁷gara₂ sig₇-a me-te e₂ tur₃-re unu₇ kug nam-dijir-zu
¹⁸cul jic-tuku-zu lugal ki aj₂-zu
¹⁹sipad zid ^dri-im-^dsuen nam-til₃-la-ni-ce₃ tum₂-ma-da ge-ne₂-de₃
²⁰KI.LUGAL.GUB kug cita-ce₃ ba-ab-du₇-a sizkur cag₄ hul₂-la ca-ra-«ra»-de₂-de₂-e
²¹u₂ sikil-la u₂-bi gu₇ a sikil-la a-bi naj-a
²²ne-saj dug₄-ga-zu /cag₄\ hul₂-la-zu-ta cu te-en-ci-ib
²³a-ra-zu-ni ce-ga-an za-e nir he₂-jal₂
²⁴sun₅-na-bi inim mu-ra-ab-sag₉-ge nam-til₃-bi dug₄-ga-ab
²⁵KI.EN.GUB kug ki en gub mah-e zid-de₃-ec lah₅-ab
²⁶ki gub-ba-ni-ta silim-ma jar-mu-na-ab
²⁷nam-lugal-la-ni igi-zu-ce₃ da-ri₂-ce₃ he₂-<jal₂>-le
²⁸saj-/kal^?\ [kalam-ma] en nun /pa\-de₃ he₂-a
²⁹/dug₄\-[ga]-zu-ta an ki-gin₇ sag₂ nu-di
³⁰X X uj₃ car₂-ra-ka he₂-en-<nam>
³¹/ka ba\-a-ni-ce₃ dijir ama dijir-re-e-ne jizzal he₂-em-<ci-ak>
³²dug₄-ga-ni-ce₃ ha-ba-dur₂-/ru\-ne-ec
³³nam-til₃ cu gi₄-a he₂-ni-tum₂-tum₂-mu
³⁴nam-lu₂-u₁₈-lu-bi cag₄ hul₂-la he₂-eb-ak-e
³⁵ud-bi-ce₃ u₂-a zid-bi he₂-em
³⁶me-lem₄ gur₃-a-ni im dugud-da-gin₇ lugal gu₂ du₃-a-ni he₂-em-dul
³⁷nij₂-nam sag₉-ga-ni mac₂-da-ri-a-bi he₂-ni-in-ku₄-ku₄
³⁸sipad zid ^dri-im-^dsuen za-ra dijir-bi-gin₇ igi-bi ma-ra-ci-jal₂
³⁹nam-til₃ ki aj₂-ja₂-ni JIC JAR-ba-ni jar-i₃
⁴⁰cag₄ hul₂-la rig₇-bi₂-ib ud-gin₇ ha-ba-mu₂-mu₂
⁴¹[cu] mu-ra-mu₂-mu₂ ed₃^!-da-ni jic tuku-bi₂-ib
⁴²[inim] sag₉-sag₉-ge-da-ni zi-ni til₃-mu-na-ab
⁴³[X] X nir he₂-jal₂ zag-du na-an-tuku-tuku
⁴⁴[giri₁₇ cu] mu-ra-an-jal₂ ud-bi su₃-ud-ba-ni-ib
⁴⁵[X nam]-til₃-la-ka nam-lugal-la a₂-bi JA₂^? [X]-ge
⁴⁶[inim] si sa₂-a-ni AN [X] /gi₁₆\-sa he₂-em
⁴⁷[X] NI cag₄ hul₂-la [he₂]-eb-ak-e
⁴⁸[X] /UD\ cu gi₄-a ur-mah nam-en-[na]-bi-ce₃ he₂-da-ab-ri-ec
⁴⁹u₃-gul ja₂-ja₂-ni-ce₃ /bar\ [X he₂]-en-na-zalag
⁵⁰X-zu nam-til₃-la X [...] cum₂-mu-na-ab
⁵¹inim kug-zu nam-til₃-/la\-[ni-ce₃ X he₂]-em-tum₂-me
⁵²cu il₂-la-ni-ce₃ /ce\-[ga-mu-un-ci]-ib nam dug₃ tar-mu-na-ab
⁵³nam-til₃-bi-gin₇ [...] su ma-da-na he₂-eb-dug₄
⁵⁴ub-da 4 jiri₃-ni-ce₃ gur₂-mu-[na] e-ne barag-bi he₂-em
⁵⁵ma-da-na u₂-sal-la nu₂-a
⁵⁶[X X] cag₄ hul₂-la ud hu-mu-di-ni-ib-zal-e
⁵⁷e₂-gal-la lugal ce-ga-zu za-a-ce₃ jal₂-la
^58dri-im-^dsuen en ^dac-im₂-babbar mu-ni bi₂-in-sa₄-a
⁵⁹ud bal-ni sud-[ba]-ni-ib zi [...] X [...]
⁶⁰aga zid mah [...] X X X
⁶¹nam-til₃-la-ni-ce₃ [me-tec₂ ...]-/i\-i
^62jicgu-za ba-an-X [...] ma-[da] he₂-ge-en
⁶³ur₅ cag₄-ge cag₄ «UD» /hul₂-la-bi\ cag₄ he₂-eb-si
⁶⁴igi-bi-ce₃ nam [...]-bi-ce₃ silim-ma he₂-em
⁶⁵u₃-luh nij₂-/si\-[sa₂] /cu\-ni-ce₃ si-bi₂-ib uj₃ car₂-ra he₂-eb-/sa\
⁶⁶dadag-ga saj-us₂ [...] X za-e mu-na taka₄-ab
⁶⁷iti giri₁₇-zal asilal_x(EZEN)-la₂-/bi\ nij₂-ba-ac ba-mu-na-ab
⁶⁸mu car₂-a mul an za-gin₃-gin₇ cid-bi nu-til-le saj-e-ec rig₇-mu-na-ab
⁶⁹nam-lugal-la bal cag₄ hul₂-la du-ri-ce₃ he₂-eb-ak-e
⁷⁰lugal u₂-a zid he₂-til₃-le
^71dri-im-^dsuen u₂-a zid he₂-til₃-le
⁷²nam-lugal-la-ni su-za-a he₂-eb-dug₃
⁷³ud nam-til₃-la-ka-ni su₃-ud-ba-ni-ib
⁷⁴ma-da ki-bi gi₄-a nam-lugal-bi cum₂-mu-na-ab
⁷⁵cag₄ ma-da dug₃-ga-na-ab jiri₃ ma-da si sa₂-<mu>-na-ab
⁷⁶ka kalam-ma tec₂-a sig₁₀-ge₅-mu-na-ab
^77dri-im-^dsuen sipad cag₄ ce-ga-zu he₂-til₃-le
⁷⁸id₂-bi a hu-mu-na-ab-tum₃
⁷⁹a-cag₄-ga ce hu-mu-na-ab-mu₂-mu₂
⁸⁰pu₂-kiri₆ lal₃ jectin hu-mu-na-ab-tum₃
⁸¹ambar ku₆ mucen ul-e-ec hu-mu-na-ab-jar-jar
⁸²e₂ tur₂-e amac-a-bi-de₃ ha-ba-lu-lu
⁸³cej_x(IM.A) an-ta a-bi bad-ta he₂-en-na-ge-en
⁸⁴e₂-gal zi su₃-ud-jal₂ he₂-en-da-ab-si
^85dri-im-^dsuen lugal-ju₁₀

Top | Home This composition: translation | bibliography

Revision history

4.vi.1999-7.vii.1999 : JAB : standardising
28.vii.1999 : GZ : proofreading
03.viii.1999 : GZ : SGML tagging
10.ix.1999 : ER : proofreading SGML
10.ix.1999 : ER : converting to HTML 4.0
7.ix.2001 : ER : header and footer reformatted; substantive content of file not changed