The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A prayer for Rim-Sin (Rim-Sin G): composite text

¹nidba kug-ga si sa₂-zu
²cu kug-zu sizkur₂ kug sikil-e ma-ra-tag-ga-zu
³jic tag-ga cu tag-tag-ga-zu
⁴cag₄-ge dug₄-ga eme jar-ra-zu
⁵giri₁₇ cu jal₂-la-zu cu kug il₂-la-zu
^6dnanna lugal an ki en ^dlama sag₉-ga-zu he₂-me-ce-ce
^7dnin-gal nin mah nin jickim sag₉-ga-zu he₂-me-ce-ce
⁸lugal cag₄-jar du₈-du₈ ^dnanna ^dnin-gal-bi dijir gal-gal-e-ne-ke₄
^9dri-im-^dsuen lugal e₂ dijir-re-e-ne-ke₄
¹⁰he₂-jal₂ ma-ra-si-si
¹¹lugal mu pad₃-da ^den-lil₂-le nam bal-a-ni nam-he₂
¹²ud he₂-jal₂-la mu giri₁₇ zal-la
¹³nam nam-gub nam he₂-jal₂-la nam-zu-ce₃ he₂-PI-ci-jal₂
¹⁴lugal ud ji₆-a ji₆-u₃-na he₂-jal₂ nu-til-le-de₃
¹⁵ud ma-ra-ab-za-al ma-ra-<ab-dug₃>-ga ma-ra-ab-gen₆-ne₂
¹⁶lugal nidba-zu saj-bi cag₄ abzu-a du₃-du₃-ra-a ma-ra-du₃-du₃-ra
¹⁷lugal nidba-zu ejer-bi kisal mah-a <du₃-du₃-ra-a ma-ra-du₃-du₃-ra>
¹⁸he₂-jal₂ nu-til-le-de₃
¹⁹lugal su e₂-a ma-ra-si-sa₂
^20dri-im-^dsuen lugal urim^ki-ma me mah ki-ur₃-ra
²¹ki-bi cu bi₂-in-gi
^22dnanna lugal an ki-ke₄ aga zid mah nam-lugal-la cu du₇
²³saj-za he₂-ni-ib-gen₆-ne₂
^24dnin-gal nin mah cag₄-jar du₈-du₈-zu
²⁵cag₄ ce-ga-ni-ta ud-bi-ce₃ nam-til₃ dug₃
²⁶zi-zu he₂-eb-UD.DU₁₀
²⁷cu kug-ga-ni-ta me-lem₄ gal nam-lugal-la dab₅
²⁸[^jic]jidru mah an ki-a cu-zu-ce₃ ^tug₂ma₆-gin₇ he₂-/dib\
^29dri-im-^dsuen lugal ki-ur₃-ra he₂-jal₂ du₈-[(du₈)]
³⁰saj-us₂ nu-til₃-le-[de₃]
³¹lugal ^id₂idigna [he₂-jal₂]-la hu-mu-ra-ab-[tum₃]
³²id₂ nun NIM-na cag₄ si-ni-ta a zal-le hu-mu-/ra-si\
³³id₂ nun id₂ nun zid id₂ zi-jal₂ /kalam\-[ma]
³⁴ku₆ mucen hu-mu-ra-ab-tum₃
³⁵a-ab-ba ab su-su-da-ta kun al-gub-ba-[a]-ta
³⁶u₃-tud nu-til-le-da <nam>-lugal-zu-ce₃ hu-mu-ra-ab-tum₃
³⁷eden dajal ki dajal-ba nij₂-ur₂-4 nij₂-zi-jal₂ SU RA RA GA AL
³⁸eg₂ pa₅ PAP.SIG₇-e cu hu-mu-<ra>-ab-il₂-la
³⁹nam-til₃ ha-ra-ja₂-ja₂
⁴⁰cud₃ i₅-jar nij₂-sag₉-ga ha-ra-ja₂-ja₂
⁴¹cag₄ hul₂-la ha-ra-ja₂-ja₂
⁴²jickim sag₉-sag₉-ga ha-ra-ja₂-ja₂
⁴³cag₄-zu ha-ra-dug₃
⁴⁴su-zu ha-ra-dug₃
⁴⁵bar-zu jickim gen₆-na-a-zu ha-ra-dug₃
⁴⁶cag₄ ^dnanna ^dnin-gal-bi jickim sag₉-sag₉-ga
⁴⁷nam nam-til₃-la da-ri₂-ce₃ he₂-me-kar₂-kar₂
^48dri-im-^dsuen lugal me-te-jal₂ he₂-jal₂ cu du₈-du₈ dijir gal-gal-e-ne-ke₄
⁴⁹ma-da he₂-en-na-gen₆ suhuc ma-da he₂-en-na-ge-en
^50dnanna lugal an ki-ke₄ ka kalam-ma tec₂ hu-mu-ra-ab-sig₁₀-ge
^51dri-im-^dsuen lugal-ju₁₀

Top | Home This composition: translation | bibliography

Revision history

4.vi.1999-27.vi.1999 : JAB : standardising
28.vii.1999 : GZ : proofreading
06.viii.1999 : GZ : SGML tagging
10.ix.1999 : ER : proofreading SGML
10.ix.1999 : ER : converting to HTML 4.0
7.ix.2001 : ER : header and footer reformatted; substantive content of file not changed