Letter from Aba-indasa to Shulgi about his neglect: composite text

¹lugal-ju₁₀-ra u₃-na-dug₄
²mac₂ hur-saj-ja₂ a₂ sag₉-sag₉-ju₁₀
³ance-kur hur-saj-ja₂ umbin hu-ri₂-in^mucen-na
⁴^jicjicimmar ki sikil-e mu₂-a zu₂-lum ^na₄za-gin₃ la₂-ju₁₀-ur₂
⁵u₃-ne-de₃-tah
⁶^ma-ba-in-da-sa₂ ugula erin₂ (2 mss. have instead: aga-us₂) zu₂-KEC₂
⁷cud_x(KA.CU)^ud lugal-la-na-ta cag₄ lugal-la-na dug₃-dug₃-ge-ra
⁸arad₂-zu na-ab-be₂-a
⁹kalag-ga-me-en lugal-ju₁₀ ga-ab-us₂ (1 ms. has instead: aga-us₂-zu he₂-me-en)
¹⁰inim-ma-zu ra-gaba-zu he₂-me-en (1 ms. has instead: igi tuku igi-ni-ce₃ ga-gub)
¹¹^jicma₂ gub-ba ^jicjisal mu-un-sig₁₀-ge
¹²a gub-ba (1 ms. has instead: a-a gub-ba) a mu-un-da-ak-e
(2 mss. add 1 line:
^12Adumu /gub^?\-ba ce mu-un-sig₁₀-ge)
(1 ms. adds instead 1 line:
^12B[...] (X) X mu-un-zalag-ge)
¹³tum₉ gub-ba ce mu-un-da-la₂-e (1 ms. has instead: IM mu-da-ak-e)
¹⁴dub-sar-me-en na-ru₂-a ab-sar-re-en
(2 mss. add 1 line:^14Ainim ugnim-ma /mu\-[...])
¹⁵inim pu-uh₂-ru-um-ma cub-ba ed₃^?-de₃^!-bi mu-un-da-sig₁₀-ge
(1 ms. adds 1 line:^15Ainim sag₉-ge gaba-ri X [...])
¹⁶jic-gin₇ ^jictir-ja₂ mu-un-du₃-nam mu-sir₂-re im-gam-e
¹⁷^jicgu-za-ja₂ lu₂ mu-un-da-la₂-a cu-ju₁₀ ec₂ im-ma-an-la₂
¹⁸iri-ja₂ tug₂^! tan₆-na-a mu-ni-mur₁₀-ra ^tug₂mu-sir₂-ra ba-an-mur₁₀
¹⁹lag-e a mi-ni-in-tu₅-a sahar igi-ja₂ ba-e-DU
²⁰ur-e ad₆ ib₂-gu₇ gaba-bi ib₂-zi-zi
²¹ucumgal-e saj jic ib₂-ra-ra ka-ta ab-taka₄ i₃-ib₂-taka₄
²²jic-gi izi ib₂-gu₇ id₂^? i₃-tuku-tuku
²³^dutu i₃ un-gu₇ gara₉ un-gu₇ ^jicbancur uku₂-ra-ce₃ cu-ni ib₂-ci-tum₃
(1 ms. adds 2 lines:^23Azi-ju₁₀ ba-e-i^! cu-ju₁₀ ha-za-a-ab
^23Bdumu nu-mu-un-su-me-en lu₂ en₃ tar-re la-ba-an-tuku)
²⁴ja₂-a me-na-am₃ cag₄ ^dcul-gi lugal-ja₂ ki-bi ha-ma-gi₄-gi₄
(1 ms. adds 1 line:
^24Alugal-ju₁₀ en₃-ju₁₀ he₂-tar-re ki ama-ju₁₀-ce₃ he₂-em-mi-ib-gi₄-gi₄)

| Top | bibliography | translation

Revision history

2.iv.2001-5.iv.2001 : EFH : standardisation
9.viii.2001 : JAB : proofreading
12.viii.2001 : GZ : SGML tagging
21.ix.2001 : ER : Proofreading SGML
21.ix.2001 : ER : converting to HTML 4.0