A hymn to Nanna (Nanna E): composite text

¹dumu nun-e ABxA kug-ta /ed₂\-a ba-zal-zal si i₃-[...]
²kur me sikil ec₃ abzu cag₄ X X dajal kur /me^?\ [...]
³ki-ur₃ mah /dur₂^?\ [X X] /dajal^?\-la [...]
⁴ambar-ta me-/lem₄ huc tum₃ muc₃ ni₂\ [X X]-ge-en
⁵nam-dug₃-zu-ce₃ nam-gal nam-mah-zu-ce₃ saj im-/ma\-il₂-la₂
⁶nam tar-re-de₃-ec a₂ mah mi-ni-in-su₁₃-un
⁷nam-lugal an ki-zu an gal-e cu dajal mu-ri-in-dug₄
⁸nam-dumu nun gal-zu ^den-lil₂-le nam-men^! cu mi-ri-in-du₇
⁹nam-dijir mah ^den-lil₂ pa ed₂ ma-ra-ni-in-ed₂
¹⁰a DU-a a sig mah-zu-ce₃ nam tar-re ki dug₃ ama dug₃
¹¹^den-ki ABxA-cag₄ kug-ta jiri₃-zu-ce₃ im-mi-in-jar
¹²^den-lil₂ nam-mah nam-en-na mi-ni-in-tud-de₃-en
¹³^dnanna ud sakar-zu ud sakar 7-bi mu pad₃-da
¹⁴^den-lil₂ an ki-ka mu-zu mu kug-ga mu mi-ri-in-pad₃
¹⁵dumu nun-e nam-gal-zu an ki-a pa ed₂ im-mi-in-ed₂
¹⁶unken mah nam ^den-lil₂-la₂-na saj-e-ec mu-ra-an-rig₇
¹⁷^den-ki-ke₄ ki ec₃ eridug^ki-ta nam-men^! nam-mah-zu mu-ri-in-tar
¹⁸abzu mah ki ec₃ eridug^ki-ta nam-en gal-zu-ce₃
¹⁹lugal an ki-ke₄ /an^? ki^?\ gun₃-a nam-gal-zu-ce₃ ba-an-dug₄
²⁰^dnanna saj-zu il₂ ^da-nun-na-ke₄-ne-er ha-la ba-an-pad₃
²¹me sikil cag₄ hul₂-la-ka-ne-ne /ki\-tuc /kug\ im-mi-ni-in-tuc-un
²²dijir gal-gal-e-ne nidba-ec /gal\ [ba]-an-pad₃
²³zag-gu-la₂ cag₄ hi-li mah si-a /im^?\-[mi-ni]-in-durun-uc
²⁴dijir-re-e-ne sizkur₂ cag₄ hul₂-la-/ne^?\-[ne im]-/mi\-ni-in-cum₂-cum₂
²⁵ki mah ki kug-ga mi-ni-/in\-[tuc]-un
²⁶^dnanna ki kug-ga ki-tuc kug mi-ni-in-[tuc]-/un\
²⁷^den-ki-ke₄ ki-tuc ma-ra-ab-/sikil-e ki-tuc^? ma^?-ra^?\-ab-cen-e
²⁸an mu-ra-ab-kug-ge ki mu-/ra-ab\-[cen-e]
²⁹e₂-kic-nu-jal₂ e₂ tir ^jicerin-na an-/ce₃ si ma-ra\-an-sa₂
³⁰dur₂ mah-zu ki kug-ga ma-ra-ab-ak ur₂ nij₂ an ki-a
³¹/jic\-hur cu-luh mah-zu si ma-ra-/an\-sa₂-e
³²[...] /gir₄^?\ X-zu bancur ki kug-ga ma-ra-ab-cen
³³[...] kij₂-sig-bi kij₂-sig kij₂-nim-zu
³⁴[...] X X si ma-ra-an-sa₂
³⁵[cu-luh]-ha ma-ra-ab-ku₃-ug ma-ra-ab-cen
³⁶[X X] X DU sa /u₃-du₈\ X UZ KA /la\ ba-an-sig₇
³⁷X [X] X mi-ni-in-pad₃
³⁸^d/en-ki\ abzu-ni u₃-tud /cu-luh\ mu-ra-an-ja₂-ja₂
³⁹^dku₃-su₁₃-e cu-luh-ha ba-ni-gub e₂ ni₂-bi u₃-tud
⁴⁰ABxA-cag₄ bar-ba gir₄ gud udu ninda ec₃ bar-ba cu-luh kug-bi
⁴¹e₂-e i₃ im-sikil-e saj ba-ab-ha-za a₂-cu-jiri₃ ba-an-KU-uc
⁴²cu-luh kug nu-cub-bu-ce₃ ambar mah
⁴³ABxA dajal kug-ga-ta nam-bi im-ta-ed₂
⁴⁴e₂-kic-nu-jal₂ barag mah kug-ga me gal mah an ki-a cu du₇
⁴⁵ABxA kug-ta pec₁₀ mah a tu₅-a-zu
⁴⁶i₃ hur-saj su kug jal₂-la-zu
⁴⁷^dnanna barag mah-zu /ba\-jar-ra
⁴⁸gada mah KEC₂ saj il₂ si mul suh₁₀-gir₁₁ nam-men^!-na
⁴⁹i₃ mah i₃ nam-men^! i₃ erim₃ gal-zu su-bar kug-ga-ka
⁵⁰kar za-gin₃ kar mah kar kug-ga-na
⁵¹^dnin-gublaga-ke₄ en cu im-ma-an-kug-ga
⁵²^dtarah abzu eridug^ki-ta cu-bi i₃ im-sikil-e
⁵³u₂-a-zu bancur unu₂ ki gal-zu-ce₃ cu kug ja₂-ja₂-zu-ce₃
⁵⁴^dku₃-su₃-e cu sikil cu dadag ak cu im-ma-an-kug-ge
⁵⁵^dtarah abzu eridug^ki-ta cu-bi i₃ im-sikil-e
⁵⁶ec₃ abzu barag mah urim₂^ki-ma nam dug₃ gal tar-re
⁵⁷/e₂-kic\-nu-jal₂ ki-tuc kug dug₃-ga-am₃ ^dnin-gal nin^! mah-bi
⁵⁸[ki-tuc] kug ki nam-nin-za ^dnanna lugal-bi-ir
⁵⁹/e₂-kic\-nu-jal₂ agrun-kug-ga e₂ nam-lugal-zu
⁶⁰^dnanna ^dnin-gal ki-tuc mi-ni-ib₂-hul₂-ne
⁶¹^d/suen\-[e] /en\ zu mah an ki aga-zu aga mah-am₃
⁶²me-lem₄ /huc\ an ki-a /sig₉-ge ^dac-im₂-babbar-e cu he₂\-en-na-kug-ge
⁶³an-gin₇ he₂-en-na-kug-[ge ki]-/gin₇\ he₂-en-na-cen-e
⁶⁴cag₄ an-/na\-gin₇ [he₂]-en-na-dadag-ge
⁶⁵/aga^?\ an ki-a aga kug /saj\ [he₂]-em-ma-il₂-e
⁶⁶[^d]/suen\-e en zu mah /an ki\ barag sikil-la cu du₇
⁶⁷[^d]/ac\-im₂-babbar-e saj-men /aga zid\-da si mul mah X-[(X)]
⁶⁸⁶⁸saj im-ma-il₂-/e\
⁶⁹ i₃ kug i₃ sikil i₃ dadag-ge
(This line is written on the left edge of the tablet and may represent an accidentally omitted line, or else the catchline to another composition, possibly an incantation.)

Top | translation | bibliography

Revision history

21.viii.2000-24.viii.2000 : GC : standardisation
30.ix.2000 : JAB : proofreading
05.x.2000 : GC : tagging
20.x.2000 : ER : proofreading SGML
20.x.2000 : ER : converting to HTML 4.0
7.ix.2001 : ER : header and footer reformatted; substantive content of file not changed