The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A Hymn to Nanshe (Nanshe A): composite text

¹iri^ki na-nam iri^ki na-nam me-bi na-pad₃-de₃
²nijin₆^ki iri^ki na-nam me-bi na-pad₃-de₃
³iri^ki kug-ga iri^ki na-nam me-bi na-pad₃-de₃
⁴kur a-ta il₂-la iri^ki na-nam me-bi na-pad₃-de₃
⁵e₂ zid-da ud-bi na-ed₂-e nam-bi na-tar-re
⁶iri^ki-a nij₂-du₇-e pa na-mu-un-ed₂-e
⁷jarza ama ^dnance-ke₄ si na-an-sa₂-sa₂-e
⁸nin-bi dumu eridug^ki-ga tud-da
^9dnance nin me kal-kal-la ki na-mu-un-gi₄-gi₄
¹⁰agarin₄ na-nam ama sa-hi-in na-nam
^11dnance ama nij₂ gal-gal-la na-nam
¹²ama₅ kalam-ma-ka dugud mu-un-de-jal₂ (1 ms. has instead: [mu]-/un\-da-lu-lu)
¹³erim₃-ma cim-gin₇ lal₃^! cu ta-hab₂ mu-un-da-ab-dug₄
¹⁴dug a nu-silig-ge mu-na-an-gub
^15gipisan nij₂-erim₃-ma kalam-ma-ka
^16dnance-er sahar-jar id₂-da-gin₇ ki mu-un-ci-ib₂-us₂
¹⁷nin dub-dim₄-dub-dim₄-ma-am₃
¹⁸jalga nij₂ aratta^ki-ka
^19dnance nin pa₅ TAR pa₅ an-ce₃ jal₂-la-am₃
²⁰nu-siki mu-un-zu nu-mu-un-su mu-un-zu
²¹lu₂ lu₂-ra a₂ jal₂-la mu-un-zu nu-siki-ka ama-a-ni
^22dnance nu-mu-un-su-a saj en₃ tar-ra-a-ni
²³e₂ ur₅-ur₅-ra sa₂ pad₃-pad₃-de₃
²⁴nin-e lu₂ kar-ra ur₂-ra bi₂-in-tum₂-mu
²⁵si-ga-ar ki mu-na-ab-kij₂-kij₂-e
²⁶gi-gur cu DU-ni mu-na-ab-buluj₃-e
^27dugcagan cu DU-ni ku-dun mu-na-tuku-tuku
²⁸geme₂ si sa₂ jiri₃-ni mu-un-dab₅-ba
^29dnance cul a₂ zid-da tuku-ni im-ma-ni-in-saj₅-e
³⁰nu-mu-un-su lu₂ dam nu-tuku-ni
^31dnance jic-ur₃-gin₇ e₂ zid-da im-ma-an-gur₃-ru-nam
³²nin-da nij₂-du₇-e pa na-mu-un-ed₂-e
^33dnance lagac^ki-a he₂-jal₂-la cu mu-un-da-an-pec-e
³⁴cennu cag₄ kug-ge nam-mi-in-pad₃
³⁵ur-^dnance en ki aj₂ lagac^ki barag-ge mu-da-ab-si
³⁶sipad-ra jidru mah mu-na-an-cum₂
³⁷gu₃-de₂-a me kal-kal-la-na cu mu-na-ab-du₇-du₇
³⁸sipad cag₄ kug-ge bi₂-in-pad₃-da-ni
³⁹gu₃-de₂-a ensi₂ lagac^ki-a-ke₄
⁴⁰ab₂ he-nun tigi-a mu-ni-gub
⁴¹balaj kug da-ba mu-ni-gub
⁴²cir₃ kug cir₃ ha-mun-na mu-un-na-du₁₂-a
^43urudkin-tur-re e₂ im-mi-i-i
⁴⁴a₂ tarah nar gal-e cu mu-na-ab-tag-ge
⁴⁵e₂ abzu-ta me nam-ta-ba
⁴⁶e₂ sirara^ki-ka cir₃ kug-ba me nun-ba mu-un-du₁₂
⁴⁷ensi-ke₄ ne-saj-ja₂ mu-na-an-jen
⁴⁸ec-de₂ kug mul-mul cu mu-na-ab-du₈
⁴⁹engiz CIM a mu-/na\-[...]
⁵⁰ninda kum₃ ninda te-en-na si mu-un-na-ab-sa₂-e
⁵¹SUR X /KA^?\ gir₄-ra-ka mu-na-an-DU
⁵²[...] X ^jicmar mah-e gu₃ nun mu-na-ab-be₂
⁵³nij₂-cum-ma utul₂ gal-la u₃-um-de₆
⁵⁴a ced₁₀-de₃ id₂-sirara^ki-ta u₃-um-de₆
⁵⁵nij₂-sil₆-la₂ lagac^ki-ta u₃-um-de₆
⁵⁶kurun a₂-dam-ta u₃-um-de₆
⁵⁷gir₄ gal unu₂ gal-da sa₂-a-ni
^58dnance ec₃ nidba-ka-ni ceg₁₁ an-da-gi₄-gi₄
⁵⁹nin bur-cu-ma ^den-lil₂-la₂-ke₄
^60dnance nin he₂-jal₂-la kalam-ma til₃-la-am
⁶¹IB₂.GAG.SAL dumu ^den-ki-ga-ke₄
⁶²munus zid e₂ zid-ce₃ lu₂ ci-in-ja₂-ja₂
⁶³munus zid e₂ zid-ce₃ lu₂ mu-un-jar-ra-ta
⁶⁴bur-saj-ta sa₂-dug₄ nij₂-ud-da e₂-a si ba-sa₂
⁶⁵bi-lu-da-ba ce nu-um-sig₉-ge
⁶⁶dug ba-a-sud a nu-um-de₂
⁶⁷lu₂ sa-dug₄-ba um-ma-gub-ba cu dirig la-ba-gid₂-i-de₃
⁶⁸u₂-ta ba-a a-ta ba-a
⁶⁹sa₂-dug₄-ge taka₄-a e₂-e muc₃ tum₂-ma
⁷⁰ku₆ zag-ga-ka saj-bi zig₃-ga
^71gien₃-bar iku 1-e saj-bi-ta gid₂-i-de₃
^72jicec_x(LAM) u₂ sig₇-sig₇ ^jickiri₆-ka cag₄-bi cu ti-a
⁷³u₃-um-dib ka-ge nu-tag-ge
⁷⁴ninda ec₃ dag-ge₄-a nidba-ce₃ nu-u₈-il₂-i
⁷⁵kac saj cum₂-ma lu₂ im-mi-in-DU a ced₁₂-de₃ cu nu-um-DU
⁷⁶ne-saj jar-ra-bi si im-sa₂-e muc₃ nu-tum₂-mu-da
⁷⁷i₃ gur₃-ru he₂-em e₂-e i₃ ba-an-dib-ba
⁷⁸ga gur₃-ru he₂-em e₂-e ga ba-an-dib-ba
⁷⁹ku₆-da kas₄ lu₂ a₂ ud-da-ka he₂-a
⁸⁰u₂-il₂ edin-na nij₂-tum₂-ni
⁸¹e₂ nin-a-na-ka um-ma-an-dib-ba
⁸²ub-da a-gub-gub da a-gub-gub
⁸³eme-ta jal₂-la inim gi inim kur₂ di
⁸⁴e₂ ^dnance-ka bar-ra ku₄-ku₄ cag₄-ga nu-ed₂-e
⁸⁵saj-en₃-tar e₂ ^dnance-ka dumu ^dutu tud-da
⁸⁶inim-bi-ta en ^dhendur-saj-ja₂-ke₄ us₂-am₃ im-da-ab-ra
⁸⁷lu gal-e zid dug₄-ga mu-un-zu erim₂ dug₄-ga mu-un-zu
^88dhendur-saj-ja₂-ke₄ zid dug₄-ga mu-un-zu erim₂ dug₄-ga mu-un-zu
⁸⁹[X (X)] dug₄-ga-bi erim₂-e im-gibib-a jic mu-na-an-du₃
^90dnin-[(X)] KA dumu ur-saj cul ^dsuen-na-ke₄
^91dnance-er i₅-jar hul-bi-a gi mu-na-an-du₃-e
⁹²nin dug₄-ga zid-da me-ni nu-kar₂-kar₂
^93dnance kur-kur-ra me-tec₂ he₂-i-i
⁹⁴zag mu ud biluda-ka
⁹⁵nin-e bar kug-ga a bi₂-in-de₂
⁹⁶ud bur cuku-ra₂ igi kar₂-kar₂-de₃
^97dnance-e saj-e kurum₂-ma igi ba-ni-ib-kar₂-kar₂
⁹⁸dub-sar mah-a-ni ^dnisaba-ke₄
⁹⁹dub kal-kal du₁₀-ba nam-mi-in-jar
¹⁰⁰gi dub-ba kug-sig₁₇ cu ba-ci-in-ti
^101dnance-er saj-e gu AC-a si mu-na-ab-sa₂-e
¹⁰²kuc la₂ kuc-ni-ta mu-na-da-an-ku₄-ku₄
¹⁰³gada la₂ gada-ni-ta mu-na-da-an-dib-be₂
¹⁰⁴kuc la₂ kuc-ni-ta nu-mu-na-da-an-ku₄-ku₄
¹⁰⁵gada la₂ gada-ni-ta nu-mu-na-da-an-dib-be₂
¹⁰⁶lu₂ dub gub-ba zag hun-ja₂-bi
¹⁰⁷igi-du₈ lu₂-inim-ma-be₂-e-ne
¹⁰⁸lu₂-inim-ma e₂ zah₃-a-na-ka gu₃ mu-ni-ib-de₂-a
¹⁰⁹saj balaj-ja₂ ki gub-ba-ni-ce₃ muc₃ ba-ci-in-tum₂-mu
¹¹⁰lugal saj zid-da en₃ tar-tar ^dha-ia₃ lu₂ dub-ba-ke₄
¹¹¹saj zid nin-a-na bi₂-in-dug₄-ga im-ma bi₂-in-gub-be₂
¹¹²geme₂ nin-a-na nu-um-mi-in-dug₄-ga im-ma bi₂-in-kid₂-kid₂
¹¹³dug-dug a nu-de₂-e jiri₃ si nu-sa₂-e
^114jicbunij nij₂-sila₁₁-ja₂ nu-luh-ha
¹¹⁵e₂ ji₆-u₃-na-ka izi dib-ba
¹¹⁶e₂ an-bar₇-ka tu₆-tu₆ jar-ra
¹¹⁷cita-ab-a bal gub-ba-ni
¹¹⁸ki-gub-ba-ni-ce₃ muc₃ ba-ci-in-tum₂-mu
¹¹⁹susbu lu₂ cuku-ra₂ bal-a-ri inim-jar mu-un-jar-ra
¹²⁰u₃ sajja e₂-a mu-un-til₃-la-ri
¹²¹cir₃ kug inim cag₄-ga jal₂-la-ni pa nu-um-mi-in-ed₂-a
¹²²mu-un-zu-a-ra nu-mu-un-zu-a-ra um-ma-na-ra-an-ba
¹²³biluda ama ^dnance-ke₄ pa ed₂ mu-da-ak-e
¹²⁴inim-inim-ma-bi dirig nu-ja₂-ja₂
¹²⁵biluda-bi-ce₃ la-ba-an-tah-e
¹²⁶me-bi me na-me lu₂ nu-dub-dub-e
¹²⁷ur₅ nij₂-nam-bi nu-dub-dub-e-a-ac
¹²⁸e₂ ^dnance-ka dub nu-um-ku₄-ku₄
¹²⁹kar-ra lu₂ mu-un-dib-be₂
¹³⁰e₂ ^dnance-ka id₂ lu₂-ru-gu₂ lu₂ mu-un-zalag-zalag
¹³¹ec-bar-kij₂ cir₃ kug KA abzu-ta um-ta-ed₂-a-ra
¹³²CIR₃.MUC₃-e cir₃ im-ta-zu-zu
¹³³enkum ninkum cu-luh im-da-pad₃-de₃
¹³⁴inim tur-bi dug₄-ga KAxX-a dirig jar-ra
¹³⁵inim-inim-ma-bi la-ba-an-tah-e
¹³⁶ka du₃-a nij₂-a₂-zig₃ dug₄-ga gu₂-bi nu-mu-un-ci-ib-zig₃
¹³⁷cu dirig DU-a cu mah gid₂-i-de₃
¹³⁸cu KA-ta sa₂-a nij₂-a₂-zig₃ dim₂-e
¹³⁹uc jar-ra cu i-ni-ib-bal-e-a in dub-ba kur₂-ra
¹⁴⁰ki nam-erim₂-ma-ce₃ saj gid₂-i
¹⁴¹saj nij₂-sig₃ KA nij₂-kud ak-a nij₂-cab-ta ba-a
¹⁴²na₄ tur-re na₄ gu-la-ar cu ba-an-zig₃-ga
^143jicba-an tur-re ^jicba-an gu-la-ar cu ba-an-zig₃-ga
¹⁴⁴nij₂ un-tuku nij₂ al ba-an-e-a
¹⁴⁵un-gu₇ i₃-gu₇-bi li-bi₂-in-dug₄-ga
¹⁴⁶un-naj i₃-naj-bi li-bi₂-in-dug₄-ga
¹⁴⁷utul₂ ga-mu-ra-ab-gub-ba kac ga-mu-ra-ab-sur-ra
¹⁴⁸geme₂ dijir-ra cu la₂-a-ri e₂-ta KA gi₄-a
¹⁴⁹nir nu-jal₂ e₂-a til₃-la-ri igi-tum₄ la₂ ak-a
¹⁵⁰KEC₂-ra₂ ga-gu₇ um-mi-in-dug₄-ga
¹⁵¹KEC₂-ra₂ ga-naj um-mi-in-dug₄-ga
^152dnance ninda i₃ nunuz dalla-ka
¹⁵³ki a₂ zig₃-ga-ka lu₂ la-ba-an-gu₇-e
¹⁵⁴lu₂ a₂ zig₃-ga um-mi-in-gu₇-a inim-bi la-ba-an-tum₃
¹⁵⁵igi TUM ka hum jir₃ ki te-te
¹⁵⁶nu-mu-e-sig₁₀-ge nu-mu-e-da-sa₂-e
¹⁵⁷a₂ jal₂-la lu₂-ra [...]
¹⁵⁸a₂ tuku e-sir₂-ra gi du₃-a
¹⁵⁹lu₂ dam tuku nu-mu-un-su-ra dam-a-ni mu-na-ra-X X
¹⁶⁰ud ib₂-ba-na zu₂ mu-un-li₉-a
¹⁶¹ud su-mu-ug-ga-na a-tar mu-un-da-ak-e
¹⁶²nin-ra KA X-a-ni nu-um-ma-an-zi-zi
¹⁶³nin saj en₃ tar kur-kur-ra-ke₄
¹⁶⁴in-nin ama ^dnance cag₄-ba igi mi-ni-in-jal₂
¹⁶⁵nu-siki ka saj-ja₂ ak nu-mu-su gib aj₂-ja₂-da
¹⁶⁶ki gul-la a₂ tuku-ur₂ ja₂-ja₂-da
¹⁶⁷a₂ tuku a₂ nu-tuku-ra ja₂-ja₂-da
¹⁶⁸ama dumu-ni gu₃ a₂-zig₃ de₂-a
¹⁶⁹dumu ama-a-ni-ir ka du₃-a dug₄-ga
¹⁷⁰cec ban₃-da cec gal-a-ni-ir inim gaba-na dug₄-ga a-a-ra inim gi₄-a
¹⁷¹nin uc gid₂-da lu₂ cu nu₂-a
^172dnance uc gid₂-da lu₂ cu jal₂-la-a
¹⁷³cag₄ kalam-ma gi hal-hal-la-gin₇ ^dnance igi mi-ni-in-jal₂
¹⁷⁴EC₂-bi zag lu₂-bi i₃-jal₂
¹⁷⁵nijir-a-ni en ^dhendur-saj-ja₂-ke₄ ka-KEC₂ mu-na-ab-ak
^176dlama-a-ni ^ddumu-tur-cu-gi₄ jic la₂-bi nu-mu-un-DU
^177dudug ka gi gub-ba ka gi en-nu-un ak-e
¹⁷⁸e₂ sirara^ki-a a su₃-a-ni
¹⁷⁹e₂ an-bar₇-ka e₂ sa la₂-a-ni
^180dnance inim-bi sa₂-e-bi mu-un-NE-[...]
¹⁸¹u₃-luh-ha su₃-su₃ abzu cag₄-ga nir-jal₂ X X
¹⁸²gi-gun₄-na e₂ ^dnance-ka en gaba-gi nu-tuku
¹⁸³a₂ aj₂-ja₂-bi e₂ ^dnance-ta
¹⁸⁴lugal-e en ^dhendur-saj-ja₂ nam-ma-da-ra-ed₂
¹⁸⁵i-bi₂ dugud-gin₇ ki am₃-u₂-/us₂\
¹⁸⁶inim-bi dungu sir₂-/sir₂\ an-da im-da-[la₂]
¹⁸⁷bulug nam-dam-ma tec₂-bi ba-dab₅
¹⁸⁸lugal-e en ^dhendur-saj-ja₂-ke₄ tec₂-bi ba-ra-si-il
¹⁸⁹zid-du zid-du-a bi₂-in-gub-be₂
¹⁹⁰erim₂-du ki-erim₂-e ba-ab-cum₂-mu
¹⁹¹di nu-siki-ka i-ni-in-kud-de₃
¹⁹²di nu-mu-un-su-ka ba-da-ab-us₂-e
¹⁹³di ama dumu-ka-kam si im-sa₂-e
¹⁹⁴tukum-bi ama dumu-ni-ir
¹⁹⁵in-tuku mu-da-an-gu₇ in-tuku mu-da-an-naj
¹⁹⁶in bu₅-bu₅-a-ni ka-na im-bu
¹⁹⁷zag-bi-a lu₂ sa₂ dug₄-ga-bi mu-un-da-an-tuc-a
¹⁹⁸u₂-il₂ edin-na nij₂-tum₂-a-ni ama-ni la-ba-ni-in-dib
¹⁹⁹ama iri gu-la mu-un-tud-da-ni-ir
²⁰⁰igi ca-ra gu₂ cub-bi-a inim la-ba-an-na-ni-in-dug₄
²⁰¹tukum-bi ama dumu-ni-ir
²⁰²ki a₂ zig₃-ga-ka gu₃ ba-da-an-de₂
²⁰³ama [...]-ni cu im-ma-ra-an-si-ig
²⁰⁴ubur ga jal₂-la-ni a ba-da-an-naj
²⁰⁵ama-ba inim kij₂-e inim i₃-kij₂-kij₂
²⁰⁶nin KA bulug-ga-ke₄ ki ed₂ X in X X
²⁰⁷lugal nij₂-si-sa₂-e ki aj₂ ^dhendur-saj-ja₂-ke₄
²⁰⁸inim-inim-ma-bi si um-mi-in-sa₂ di-bi igi u₃-[...]
²⁰⁹nam-tag-bi ugu ama dumu-ka-ka i-im-ja₂-ja₂-de₃
²¹⁰a₂ nam-tag dugud-da nu-mu-un-da-il₂-i-da
²¹¹lu₂-ulu₃-bi dijir a-ra-zu-a nu-um-ma-an-tuku-tuku
²¹²tukum-bi ama dumu-ni-ir
²¹³in-tuku nu-mu-da-an-gu₇ in-tuku nu-mu-da-an-naj
²¹⁴in bu₅-bu₅-a-ni ka-na nu-um-bu
²¹⁵zag-bi-a lu₂ sa₂-dug₄-ga-bi nu-[mu-da]-/an\-tuc-a
²¹⁶[u₂-il₂] /edin\-na nij₂-tum₂-a-ni ama-ni ba-ni-in-dib
²¹⁷ama iri gu-la mu-un-tud-da-ni-ir
²¹⁸igi ca-ra gu₂ cub-bi-a inim ba-na-ni-in-dug₄
²¹⁹lugal nij₂-a₂-zig₃-ga hul gig ^dhendur-saj-ja₂-ke₄
²²⁰lu₂-ulu₃-bi a-gin₇ ki lul-la im-mi-in-e
²²¹dumu-bi-ra ce-gin₇ sahar sis zag mu-na-an-tag-ge
²²²inim ama ugu-na mu-un-da-an-ba-a lu₂ im-ma-ab-cum₂-mu
²²³in-dub-ba inim gen₆-na-a-kam
²²⁴gal zu inim si sa₂-a-bi
²²⁵nin um-ma lagac^ki ki jar-ra
^226dja₂-tum₃-dug₃-da [...] KA-bi [...]
^227dnance-er inim si sa₂-bi KA [...] mu-na-ab-[...]
²²⁸nin mah-am₃ inim-ma-ni X [...]
²²⁹nin ^den-lil₂-gin₇ nam tar-[...]
²³⁰barag sirara^ki-ka [...] X X
²³¹me-ni cen-cen-na igi-ni i-ni-jal₂
²³²e₂ abzu-ta me nam-ta-ba
²³³sirara^ki-ce₃ dijir lagac^ki-a gu₂ mu-un-na-si-si
²³⁴na₄ gen₆-na kug la₂-e-de₃ gi-gur gen₆-na gub-bu-de₃
^235jicba-an inim gen₆-na kur-kur-ra [cu] ba-an-ja₂-ja₂-ne
²³⁶sipad mas-su kalam-ma X jal₂ kur-kur-ra
^237distaran /di\ si sa₂-a /kalam\-a til₃-la-am₃
²³⁸KA X X [...] ^dnin-jic-zid-da-ke₄ [...] /mi\-ni-in-dab₅
²³⁹[...] X si im-sa₂-e-de₃
²⁴⁰[...] X ib₂-ta-ba-ba-e
²⁴¹[na₄ gen₆-na kug] /la₂\-e-de₃ gi-gur gen₆-na gub-bu-de₃
²⁴²[^jicba-an inim gen₆-na] kur-kur-ra cu ba-ja₂-ja₂-ne
²⁴³[...] mah-a mar-za gal-[gal-la]-/kam\
²⁴⁴[...] X a cu^? CUL jic X ga
²⁴⁵[...]-ra erim₃ jar-jar-ra
²⁴⁶[...] dug a nu-silig-ge-dam
²⁴⁷[...] ^gipisan-a /muc₃\ nu-tum₂-mu-da
²⁴⁸[...] nin erim₃-ma-ke₄
²⁴⁹[...] mah-a-ni um-mi-in-jar /ku\-dun-bi tuku-tuku-da
²⁵⁰[nijir-a-ni] en ^dhendur-saj-ja₂ [a₂]-bi mu-da-an-aj₂ para24
²⁵¹[nin]-/ju₁₀\ me-zu me mah-am₃ [me-a] /dirig\-ga-am₃
^252dnance me-zu me na-me nu-un-ga-an-da-sa₂
²⁵³[an] lugal-e igi hul₂-la-ni mu-un-ci-bar-bar-re
^254den-lil₂-da barag nam tar-re-da mu-un-da-an-tuc-a
²⁵⁵a-a ^den-ki-ke₄ nam i-ri-in-tar
^256dnance dumu eridug^ki-ga tud-da za₃-mi₂-[zu] dug₃-ga-am₃

Top | translation | bibliography

Revision history

06.vii.1998 : GZ : standardisation
08.ix.1998 : JAB : proofreading
04.v.1999 : GZ : SGML tagging
06.v.1999 : ER : proofreading SGML
06.v.1999 : ER : converting to HTML 4.0
7.ix.2001 : ER : header and footer reformatted; substantive content of file not changed