The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A balbale to Ningishzida (Ningishzida A): composite text

¹[ur]-saj en cag₄-tum₂ a-gar₃ ur-mah kur sud-[da]
^2dnin-jic-zid-da muc-mah ucumgal-a-/da\ [tab-ba]
³am gal cen-cen-na gaba-hum-a-ba a-ji₆ X [...]
⁴ama-ni ki aj₂ ^dnin-jiri₁₆-<da>-a cag₄ hi-/li\-[a tud-da]
⁵[ubur] kug-ga-na ga zid gu₇-a uc₁₁ pirij sub-sub-ba
⁶abzu-a buluj₃-ja₂ icib mah-am₃ ec₂-da kug cu du₈
⁷saj₅-ja₂ dub kalag-ga-ba nij₂-zid ka KEC₂-da
⁸lugal am ur₅ un₃ eme si sa₂ nij₂-erim₂-e hul gig
⁹uru₂ idim hur nu-mu-un-gi₄-gi₄ cu suh₃-a di-de₃
^10dnin-jic-zid-da idim hur nu-mu-un-gi₄-gi₄ cu suh₃-a di-de₃
¹¹erim-erim-ma cu-zu ma-ra-ci-jal₂
¹²sipad saj gig₂-ga cid-bi mu-e-zu
¹³u₈ sila₄-bi kij₂-kij₂-de₃ ma-ra-ci-jen
¹⁴ud₅-de₃ mac₂-bi jidru ud su₃-ra₂ tum₂-tum₂-mu-bi mu-e-zu
^15dnin-jic-zid-da jidru ud su₃-ra₂ tum₂-tum₂-mu-bi mu-e-zu
¹⁶lugal cag₄-la₂-sud cag₄-ta ed₂-a inim cud₃-zu cu-a he₂-eb-gi₄
¹⁷nam-til₃ u₃-tud za-da ca-mu-un-jal₂
¹⁸nun hi-li su₃-su₃ ^dnin-jic-zid-da
¹⁹/barag\ ki-tuc mah-a tuc-a-ni en dijir cul a₂ zid-da
²⁰[X] X-zu-ur tug₂ mu₄ jidru za-gin₃ cu u₃-mu-e-tij₄
²¹[cir₃]-/nam\-cub ad mi-ri-ib-dug₄ ni₂-te-na mi-ni-/ib\-[be₂]
1 line missing
²³[...]-/bi\ inim lul-la bal-bal-[am₃ cag₄] mu-na-te-en-[te-en]
²⁴[X] X car₂-car₂-ra ca-mu-cub^ub-be₂-en izi-gin₇ ba-ra-ma₅-ma₅-an
²⁵lugal en cag₄ su₃-ra₂ barag mah-za nam dug₃ mu-ri-in-tar
²⁶dijir nij₂-si-sa₂-e ki-aj₂-e inim dug₃-bi mu-un-e
²⁷palil gal-zu unken-na PA.PA-a he₂-du₇
²⁸lugal ni₂ ri-a ildu₂ utu-bi saj-ba jen-a
²⁹an-bar an-ta a-ba-de-jen-ne₂ a-na-an-da-sa₂-a
³⁰ur-saj me₃ igi jal₂ taka₄-a kur un₃-na i₃-a-ed₂
^31dnin-jic-zid-da me₃ igi-jal₂ taka₄-a kur un₃-na i₃-a-ed₂
³²lugal ki gu-la a₂ aj₂-ja₂ tum₂ ki DU-bi tum₂-mu-de₃
³³cul dijir tuku ki a₂ aj₂-ja₂-ni igi-bi ma-ra-ci-jal₂
³⁴lugal ka lal₃ dijir-re-e-ne ^den-ki za₃-mi₂
^35dnin-jic-zid-da dumu ^dnin-a-zu
³⁶a-a ^den-ki za₃-mi₂
³⁷bal-bal-e ^dnin-jic-zid-da-kam

Top | translation | bibliography

Revision history

30.vii.1999-11.viii.1999 : JAB : standardisation
10.viii.2000 : GC : proofreading
11.viii.2000 : GC : tagging
28.x.2000 : ER : proofreading SGML
28.x.2000 : ER : converting to HTML 4.0
7.ix.2001 : ER : header and footer reformatted; substantive content of file not changed