A shir-gida to Nininsina (Nininsina A): composite text

¹[... barag] mah-a dur₂ jar-ra
²[... ni₂] /gur₃\-ru u₆ di-de₃ gub-ba
³[...] [^dnin-in]-/si\-na hu-ul-hu-le-ec₂ sig₇-ga
⁴[... me] ur₄-ur₄ jarza₂ im-pad₃-de₃
⁵[(X)] [^dnin-in-si]-na-ke₄ nam-galam-ma gu₂ nam-mi-in-KU
⁶[...] nam-galam-ma u₂-a me na-ur₄-ur₄-re
⁷[^d]nin-in-si-na-ke₄ nam-galam-ma u₂-a me na-ur₄-ur₄-re
⁸me mah cu-ce₃ na-ja₂-ja₂-ja₂
⁹tug₂ gal-e u-gun₃ im-ma-ak-e inim im-ma-ab-sag₉-ge
¹⁰bulug-KIN-gur₄-ra igi mu-un-sig₁₀-ge
¹¹^dnin-in-si-na-ke₄ jir₂-gag-e u₃-sar im-ma-ak-e
¹²me nam-a-zu cu im-du₇-du₇
¹³dumu-ni lugal jir₂-si-ra
¹⁴^dda-mu lu₂ sag₉-ga cu-ni ba-ab-cum₂-mu
¹⁵dumu-ju₁₀ nij₂ nam-a-zu-ka jizzal he₂-em-ma-ak
¹⁶^dda-mu nij₂ nam-a-zu-ka jizzal he₂-em-ma-ak
¹⁷^tug₂bar-sig₉-ge cu im-ma-an-tij₄ cu im-gur-gur-re
¹⁸^tug₂bar-sig₉ dig-dig-e im-ma-ak-e
¹⁹im al-dug₄-ga im-ku₇-ku₇-e
²⁰uc₂ lugud-e cu im-cu₂-ur-cu₂-ur-re
²¹sim_x(GIG)-sim_x-ma cu kum₂ mu-na-ak-e
²²nin-ju₁₀ cag₄-zu ama kalam-ma-ka
²³a-zu gal saj gig₂-ga-kam
²⁴^dnin-in-si-na dumu an-na-ke₄
²⁵dumu-ni lugal jir₂-si-ra
²⁶^dda-mu lu₂ sag₉-ga cu-ni ba-ab-cum₂-mu
²⁷dumu-ju₁₀ nij₂ nam-a-zu-ka jizzal he₂-em-ma-ak
²⁸^dda-mu nij₂ nam-a-zu-ka jizzal he₂-em-ma-ak
²⁹ec-bar-kij₂-ja₂ za₃-mi₂ mi-ri₂-in-dug₄
³⁰kug ^dnin-in-si-na nam-icib mu-na-ak-e
³¹^den-ki-ke₄ abzu nun-na-ta saj-e-ec mu-ni-in-rig₇
³²cag₄-gig lipic-gig lu₂-ulu₃-ra mu-na-kar-re
³³lu₂-ulu₃-bi muc KI.GIBIL-gin₇ i-im-bal-bal-e
³⁴muc ki-uc₂-a-gin₇ e-ne-par₃ i₃-si-il-e
³⁵cag₄-ju₁₀ lipic-ju₁₀ gibil-la-bi im-me
³⁶nin-ju₁₀ nam-icib-e cu gal mu-un-du₇-du₇
³⁷^dnin-in-si-na-ke₄ tu₆ bi₂-in-dug₄ ba-sag₉
³⁸i₃ nun-e nam-cub ba-an-cum₂
³⁹bur gal-la-na ba-ni-in-de₂
⁴⁰cu ced₇-da-na nam-ma-an-de₆
⁴¹lu₂-ulu₃-bi im-gin₇ kuc-a-na im-ma-an-di-ni-ib-ed₂-de₃
⁴²izi ^u₂numun₂^? zi-zi-da-gin₇ ni₂-ba mu-un-te-en-te-en
⁴³dijir nam-lu₂-ulu₃ sizkur a-ra-zu-a mu-na-an-sug₂-sug₂-ge-ec
⁴⁴inim-bi-da an-ra ^den-lil₂-ra
⁴⁵kug ^dnin-in-si-na ki-mah-a-na mu-un-ne-de₃-en-ku₄-ku₄
⁴⁶^dudug hul ^dlama hul lu₂-ra cub-ba
⁴⁷^ddim₃-me ^ddim₃-<me>-a-bi kur₉-ra ji₆-u₃-na
⁴⁸nam-tar a₂-sag₃-ga lu₂-ra nu-ed₃-de₃
⁴⁹lu₂-ra sug₂-ge-ec u₃ mu-ni-ib-kar
⁵⁰dijir nij₂ mu-un-ni-ra-a-ni
⁵¹saj-ju₁₀-a ba-an-di-ni-ib-cub-ba
⁵²lu₂-bi ensi-ra mu-un-pad₃-de₃ ejer-ra mu-un-zu-zu
⁵³lu₂-ulu₃ nam tar um-ma-an-dirig-ga
⁵⁴kug ^dnin-in-si-na sizkur mu-na-ab-be₂ a-ra-zu mu-na-ab-be₂
⁵⁵nin-ju₁₀ ka-tar DU-za-za im-DU.DU
⁵⁶tu₆-zu lu₂-ra mu-un-ta-ed₃-de₃
⁵⁷cul dijir tuku he₂-em-mu-un-ak
⁵⁸ejer-ba cu-si-zu u₃-mu-ne-ur₃
⁵⁹ni₂-zu me-tec₂-e ci-im-i-i
⁶⁰mu-zu dug₃-ge-ec-e im-pad₃-de₃
⁶¹nin-ju₁₀ ni₂-te-na ki mu-un-kij₂-kij₂-e
⁶²nij₂ nu-sig₉-ge en₃ nam-ci-in-tar
⁶³nij₂ nu-dim₂-me-de₃ jestug₂-ga-ni na-an-gub
⁶⁴nam-nu-u₈-gig-e hi-li im-ma-an-X
⁶⁵lu₂ nin-ju₁₀ me jar-jar-ra-ba cu ba-ra-an-tij₄
⁶⁶ud-ba unu₇ cuba nu-jal₂-la-am₃
⁶⁷unu₇ cuba gu₂-a nu-jal₂-la-am₃
⁶⁸^dnin-in-si-na-ke₄ inim-e bi₂-in-sig₁₀-ge
⁶⁹cuba na-uru₄ru numun-e-ec na-ja₂-ja₂
⁷⁰in-nin₉ nu-u₈-gig gal an-na-ke₄
⁷¹unu₇ cuba inim-e bi₂-ib-sig₁₀-ge
⁷²ce-er-zi ed₂-de₃ zag KEC₂-de₃-de₃
⁷³siasil₃-la₂ saj-ja₂ mu-ni-jal₂
⁷⁴car₂ ki-sikil li-li ja₂-ja₂-de₃
⁷⁵bahar₂^!-ra-ke₄ si sa₂-e-de₃ gi-dur kud-de₃ nam tar-re-de₃
⁷⁶^jicig nigin₃-jar-ra-ke₄ cu us₂-u₃-de₃ UM ki ra-ra-de₃
⁷⁷dumu lu₂ ur₂-ra da an-ri-ri gu₃ nun sud-sud-de₃
⁷⁸cag₄ ki-ce₃ ja₂-ja₂-de₃ saj cu bal ak-de₃
⁷⁹nam-nu-u₈-gig zi-ki-in-ne-en tukun di-de₃ IM.DI luh-e-de₃
⁸⁰me gal-gal-e pa ed₂ u₃-bi₂-ak
⁸¹nin-ju₁₀ me-te si na-an-ga-am₃-dug₄
⁸²^dnin-in-si-na-ke₄ silim zid-de₃-ec na-e
⁸³nin munus cul a₂ mah ^den-lil₂-la₂-me-en
⁸⁴munus sag₉-ga ^dnin-in-si-na-me-en dumu an kug-ga-me-en
⁸⁵a-a-ju₁₀ an lugal sipad dijir-re-e-ne
⁸⁶kalam-e barag kug-ga ba-e-tuc
⁸⁷ama-ju₁₀ ^durac nin dijir-re-e-ne
⁸⁸an-da ki-nu₂ kug-ga cag₄ kuc₂-u₃ e-ne su₃-ud gal ba-e-dug₄
⁸⁹ki-ulutim₂-ju₁₀ an kug ki sikil
⁹⁰e₂-ju₁₀ e₂ i₃-si-in^ki bulug an-ki
⁹¹tir cim ^jicerin-na ir-bi nu-gul-e
⁹²cag₄-bi kur he₂-jal₂-la ki us₂-sa
⁹³e₂-ju₁₀ kur dilmun^ki nu-me-a ^jicjicimmar-ta ba-an-tud
⁹⁴i₃-si-in^ki kur dilmun^ki nu-me-a ^jicjicimmar-ta ba-an-tud
⁹⁵zu₂-lum-bi gada-mah jic la₂-gin₇ gur₇-ce₃ ba-an-dub
⁹⁶^da-nun-na dijir gal-gal-e-ne mu-da-gu₇-u₃-ne
⁹⁷e₂-ju₁₀ ki silim-ma giri₁₇-zal ki-ulutim₂ kalam-ma
⁹⁸ji₆-u₃-na iti₆-gin₇ ma-ed₂
⁹⁹an-ne-gan₂ u₄-ud-gin₇ ma-ed₂
¹⁰⁰nitalam-ju₁₀ en ^dpa-bil-saj dumu ^den-lil₂-ke₄
¹⁰¹cag₄-ba e-ne ze₂-bi mu-da-an-nu₂ ki-nu₂ mu-ni-ib-dug₃-ge
¹⁰²id₂-ju₁₀ ^id₂kir₁₁-sig he₂-jal₂ gu₇-e gig-ce₃ ba-dul₅^!-la₂
¹⁰³cag₄-ba a zal-le ma-ra-il₂-il₂
¹⁰⁴gu₂ gu₂-bi lal₃ jectin ba-an-mu₂ mac₂-bi ma-sud-e
¹⁰⁵kur gal ^den-lil₂-le cag₄-ga-ni um-ma-an-hu-luh-ha-ta
¹⁰⁶kur-da saj-ki um-ma-da-an-gid₂
¹⁰⁷ki bal-da nam im-ma-da-an-kud
¹⁰⁸ki bal kur saj-ki gid₂-da-ni-ce₃
¹⁰⁹a-a-ju₁₀ ^den-lil₂-le im-ma-ci-in-gi₄-gi₄
¹¹⁰munus cul-me-en ur-saj kalag-ga-me-en je₂₆-e-me-en im-ci-du-un
¹¹¹sipad ki bal-ba jestug₂-ga-na im-ma-ni-ib-dab₅-be₂
¹¹²ka u₃-mu-da-an-tar ka u₃-mu-da-an-sig₉
¹¹³e-ne-ra jestug₂-ga u₃-mu-na-ni-in-u₁₈-lu
¹¹⁴iri-ba hul-a-ba lu₂ nu-mu-un-ci-zu-zu
¹¹⁵sipad-bi u₂-gu₇-a-na lu₂ nu-mu-ci-pad₃-de₃
¹¹⁶a-gin₇ u₃-mu-dab₅-dab₅ buru₁₄-gin₇ u₃-[mu-sud]-/sud\
¹¹⁷ce-gin₇ jic-ba₉-ra₂ cu um-ma-ni-/tij₄\
¹¹⁸izi-gin₇ ^u₂numun₂-bur-gin₇ e-ne um-ma-an-la₂
¹¹⁹^jictukul sig₃-ge saj jic ra-ra-ju₁₀
¹²⁰a-a-ju₁₀ ^den-lil₂-ra nibru^ki-ce₃ ka ga-mu-na-ab-de₆
¹²¹nin me huc-a dur₂ jar-ra-me-en
¹²²an kug-ta nam-icib cum₂-ma-me-en
¹²³e₂-gal-ta ni₃-saj zig₃-ga-me-en
¹²⁴barag mah-ta me cu tij₄-a-me-en
¹²⁵pec₁₀-jal₂ gaba-jal₂ an urac-a-me-en
¹²⁶nin gal dijir-re-e-ne-me-en
¹²⁷ni₂-ju₁₀ huc-am₃ kalam-ma mu-un-ri
¹²⁸su-zi-ju₁₀ kur-kur-ra ci-im-ri
¹²⁹a₂-aj₂-ja₂-ju₁₀ lu₂ nu-mu-un-ci-zu-zu
¹³⁰munus-me-en ur-saj-me-en cul-la-me-en a₂-jal₂ kalam-ma-me-en
¹³¹an mu-sir₂-ra^!-gin₇ mu-da-gur₂-e-en
¹³²ki-a a-ji₆-gin₇ mu-da-cub-cub
¹³³^jicrab kalam-ma uj₃ cu ri-ri-me-en
¹³⁴mir-gin₇ du uj₃-ce₃ cag₄ huj-e
¹³⁵cud₃ a-ra-zu jic tuku-me-en kug ^dnin-in-si-na za₃-mi₂
¹³⁶cir₃-gid₂-da ^dnin-in-si-na-kam

Top | translation | bibliography

Revision history

17.iii.1999-15.iv.1999 : JAB : standardising
01.v.2000: GZ : proofreading
01.v.2000: GZ : SGML tagging
05.v.2000 : ER : proofreading SGML
05.v.2000 : ER : converting to HTML 4.0
7.ix.2001 : ER : header and footer reformatted; substantive content of file not changed