The Electronic Text Corpus of Sumerian Literature
Catalogues: by date | by number | in full | Website info: navigation help | site description | display conventions | recent changes
Project info: consolidated bibliography | about the project | credits and copyright | links This composition: translation | bibliography

A hymn to Nungal: composite text

¹e₂ ud huc an ki uj₃ erim₂-ce₃ du₇-du₇
²e₂ kur e₂-ec₂ dijir-re-e-ne ^jicrab mah an ki-a
³cag₄ u₃-sa₁₁-an ud mud dajal tag-ga ni₂ su-a ru-ru-gu₂
⁴ab cur₂ zig₃-ga kur-ku il₂-la a-ra₂-bi lu₂ nu-zu
⁵e₂ ^jices₂-ad erim₂-du-ce₃ nu₂-a hul-jal₂-la su dub₂-bu
⁶e₂ sa-par₄ igi-te-en-bi galam kad₅ uj₃ nam-re-ec ur₄-ur₄-u₃
⁷e₂ zid-du erim₂-du igi jal₂ hul cu-bi nu-ed₂
⁸e₂ id₂-lu₂-ru-gu₂ si-sa₂ nu-ug₆-e erim₂-e bar-ak
⁹e₂ mu mah irigal kur ^dutu ed₂-a cag₄-bi lu₂ nu-zu
¹⁰e₂ gu-la en-nu-uj₃ e₂ nir-da lu₂ nam-tag-ga kij₂-kij₂
¹¹e₂ zid-du erim₂-du bar im-ak-de₃ an-ne₂ mu-bi mu-mah
¹²e₂ uc ki jar-ra-bi ni₂ gal im-da-ri
¹³ka₂-bi u₂-sa₁₁-an sig₇-ga su-zi il₂-la-am₃
¹⁴kun₄-bi ucumgal ka duh-a lu₂-ce₃ nu₂-a
¹⁵zag-du₈-bi jir₂ mah a₂ 2-bi lu₂-erim₂ sur-sur-ru-de₃
¹⁶a-sal bar-bi jir₂ sahar-ta im₂-ma ka ca-an-ca₅-ca₅-dam
¹⁷dub-la₂ zag-ed₂-bi pirij su-ba saj nu-ja₂-ja₂-dam
¹⁸nir-gam-ma-bi ^dtir-an-na-gin₇ ni₂ huc im-da-an-ri
^19jicnu-kuc₂-u₃-bi hu-ri₂-in^mucen umbin-bi nij₂ cu tij₄-a
^20jicig-bi hur-saj gal lu₂ erim₂-ra jal₂ nu-un-ta-da₁₃-da₁₃
²¹lu₂ zid cu-ba la-ba-ni-in-ku₄-ku₄ jal₂ mu-un-ta-da₁₃-da₁₃
^22jicsaj-kul-bi pirij huc nam-cul-ba gu₂-da la₂-a
^23jicsahab-bi muc saj-kal eme ed₂-de₃ e-ne-par₃ si-il-si-le-de₃
^24jicsi-jar-bi muc cag₄-tur ki cur₂-ra ni₂-bi ur₃-ur₃-ru-dam
²⁵e₂-e an ki-a igi mi-ni-in-jal₂ sa-par₄-ra al-la₂
²⁶a₂-bi erim₂-du la-ba-ra-ed₂ erim₂ al-ur₃-ur₃-re
²⁷nin-bi dijir er₉ an ki-a me-lem₄-ma-ni dul-la
^28dnun-gal barag gal mah-bi-a zag-ge mu-un-di-ni-ib-sig₉
²⁹e₂-a muc₃-bi dur₂ im-mi-in-jar kalam im-ta-gen₆-ne₂
³⁰lugal-ra cag₄ unken-na-ka igi mu-na-ni-jal₂
³¹erim₂-jal₂-la-ni ^jicrab mi-ni-gen₆-ne₂ en-nu-uj₃-ja₂-ni nu-til-e
³²e₂ gal jic-bur₂ erim₂-ce₃ nu₂-a kalam-e na-ri cum₂-mu
³³i-zi hu-luh-ha a-ji₆ gaba zig₃-ga pec₁₀ (1 ms. has instead: cur₂ nu-til-le gal) ed₂-de₃-da
³⁴saj um-de₆ lu₂-ulu₃ me-lem₄-ba saj nu-mu-un-de₃-ja₂-ja₂
³⁵ki di ku₅-ru-bi-ce₃ dijir an ki-a im-ci-gam-e-de₃-ec
^36dnin-e₂-gal-la-ke₄ barag za-gin₃-ba dur₂ an-ce₃ bi₂-ib-jar
³⁷di kud ka-ac bar-re-de₃ igi mi-ni-in-jal₂ lul zid-bi mu-zu
³⁸sa-par₄-ra-ni igi-te-en he₂-a kalam-ma mu-un-na-an-la₂
³⁹hul-du jiri₃-ni nu-mu-un-dab₅-be₂ a₂-ni la-ba-ra-ed₂
⁴⁰ka₂ e₂ gal-la ud huc saj zig₃-ga lu₂-ra sud-sud-da
⁴¹cul dijir-ra-na li-bi₂-in-dug₄-ga sa₂ um-ma-ni-dug₄
^42dnun-gal nin e₂ kur-ra-ra cu mah-a-ni im-si
⁴³lu₂-ulu₃-bi am cu si-il-la-gin₇ cu gig-ge₄ im-dab₅
⁴⁴jiri₃ mu-un-dab₅ e₂ a-nir-ra-ce₃
⁴⁵tug₂ igi-na mu-un-si cag₄ sug₄-ga mu-un-jen
⁴⁶kaskal jiri₃-na im-ha-al-ha-al-e sila dajal-la im-dab₅
⁴⁷lu₂-zu-a-ni gu₃ nu-mu-un-da-ab-be₂ bar-ta im-da-gub
^48jicig-bi jal₂-lu mah nu-um-zu tu₆-tu₆ nij₂-gig-bi
⁴⁹dul-dul-da jal₂ mu-un-da₁₃-da₁₃ jic-hur-bi i₃-kur₂
⁵⁰lu₂-be₂-e-ne buru₅^{mucen d}nin-ninna₂^mucen-ta cu-ta cub-ba-gin₇
⁵¹jal₂ da₁₃-da₁₃-bi-ce₃ ^dutu ed₂-a-gin₇ igi-bi im-ci-jal₂
⁵²cec cec-ra ud ha-lam mu-un-da-aj₂-e jalga-bi i₃-kur₂-kur₂
⁵³cul-e cul-zu-ne nu-mu-un-zu-zu lu₂ kur₂ jen-na-me-ec
⁵⁴lu₂ lu₂-zu-ne jickim nu-mu-un-ninni₂ ulutim₂-bi i₃-kur₂
⁵⁵e₂-a cag₄-bi er₂ a-nir-ra i-si-ic-bi im-gur₃-ru
⁵⁶sig₄-bi lu₂ hul-jal₂ ba-an-ma₅-ma₅ lu₂ zid mu-un-u₃-tud
⁵⁷cag₄ ib₂-ba-bi er₂ a-nir-ra ud mi-ni-ib-zal-zal-e
⁵⁸ud um-jen e₂ kur ezen-gin₇ ni₂-bi-a ba-an-du₃
⁵⁹ki en₃ tar-re ^did₂-lu₂-ru-gu₂-da dijir ba-sug₂-ge-ec
⁶⁰zid-du erim₂-du bar im-ak-de₃ si-sa₂ mu-un-u₃-tud
⁶¹erim₂-jal₂-la-ni cu im-ri-ri-e a₂-ni la-ba-ra-ed₂
⁶²ud-bi-a nin-e ni₂-te-a-ni mi₂ zid iri in-ga-am₃-me
⁶³dijir jiri₃ kug ^dnun-gal-la-ke₄ ni₂ silim-ce₃ al-e
⁶⁴nin-me-en an-ne₂ nam mu-un-tar je₂₆-e dumu an-na-me-en
^65den-lil₂-le nam gal ma-an-tah e₂-gi₄-a-ni-me-en
⁶⁶dijir-re-e-ne me an ki-a cu-ju₁₀-ce₃ mu-un-jar-re-ec
⁶⁷ama ugu-ju₁₀ kug ^derec-ki-gal-la-ke₄ me-ni ma-ra-an-ba
⁶⁸irigal kur ^dutu ed₂-a barag mah-ju₁₀ mi-ni-ri
⁶⁹e₂ gal ki-tuc kug nam-lugal-la-ka je₂₆-e dijir-bi-me-en
^70dinana-ra gal mu-un-da-ab-be₂ cag₄ giri₁₇-zal jal₂-la-ni-me-en
^71dnin-tud-e ki nam-dumu-zid-ka mu-da-an-gub-be₂
⁷²gi-dur kud-da nam tar-re-da inim sag₉-ge-bi mu-zu
⁷³nin agrig zid ^den-lil₂-la₂-me-en nij₂-gur₁₁ ma-jar-jar
⁷⁴erim₃ nij₂ nu-silig-ge ja₂-a-kam idim ma-da-tab
⁷⁵arhuc cag₄-ne-ca₄ ja₂-a-kam lu₂ la-ba-ra-an-ul₄-le-de₃-en
⁷⁶saj gig₂-ga igi-ja₂ mu-un-jal₂ en-nu-uj₃ im-ma-ak-e
⁷⁷im nam-til₃-la cu-ja₂ mu-un-jal₂ lu₂ zid bi₂-in-gub-be₂-en
⁷⁸erim₂-du a₂-ja₂ la-ba-ra-ed₂ nij₂-ak-bi mu-zu
⁷⁹kur-kur-re ama dijir-bi-gin₇ igi-bi im-ci-jal₂
⁸⁰nam-tag dugud cu-ta im-sig-ge-en ama arhuc-a-me-en
⁸¹cag₄ mir-mir-ra im-ced₁₀-ced₁₀-de₃ a ced₁₀ im-su₃-ud
⁸²cag₄ hul mu-ced₁₀ ka garac₂^!-ta lu₂ ba-ra-an-zi-zi-i
⁸³e₂-ju₁₀ cag₄-ne-ca₄ mu-un-du₃ nin lu₂ ti-ti-me-en
⁸⁴jissu-bi ^jicha-cu-ur₂-ra-gin₇ ki sikil-la bi₂-in-mu₂
⁸⁵nitalam-ju₁₀ ^dbi-ir-tum lu₂ ne₃ gal zag-ge mu-un-di-ni-ib-sig₉
⁸⁶barag gal mah-bi-a dur₂ im-mi-in-jar a₂ gal mu-da-aj₂-e
^87dudug e₂-ja₂ ^dlama igi sag₉-me-ec lu₂ ba-an-ul₄-ul₄-e-ne
⁸⁸nu-banda₃ mah-ju₁₀ ^dig-alim-ma ^jicrab cu-ja₂-kam
⁸⁹e₂-ju₁₀ saj en₃ tar-ce₃ /mu-un\-il₂ lu₂ la-ba-an-ul₄-le-ne
⁹⁰ra-gaba-ju₁₀ nij₂-nam nu-ha-lam e₂-gal me-te-bi
⁹¹iri ^den-lil₂-le mu sa₄-a lul zid-bi mu-zu
^92dnin-har-ra-an-na inim-bi ba-da-de₆ igi-ju₁₀-ce₃ bi₂-ib-dab₅-be₂
⁹³kindagal-ju₁₀ e₂ ni₂ gur₃-ru ki-nu₂-a ma-an-ja₂-ja₂
^94dne-zi-il-la₂ (1 ms. adds: nij₂-kal) cag₄ hul₂-la si ba-ab-sa₂-e
⁹⁵e₂-gal lugal-la-ke₄ saj um-de₆ lu₂ nir-da ba-cum₂-mu
⁹⁶gal₅-la₂ gal-ju₁₀ ^dnin-dimgul-e a₂-ni mu-un-sud-e
⁹⁷ka nir-da-ka lu₂ bi₂-in-cum₂-mu^?-e saj jic la-ba-ab-ra-ra
⁹⁸lu₂-u₁₈-lu-bi ka garac₂-ta im-ra-an-zi-zi
⁹⁹e₂ nam-til₃-la-ja₂ ba-ni-in-ku₄-ku₄ en-nu-uj₃ im-ma-ak-e
¹⁰⁰sahar e₂-ja₂ tug₂ tan₄-tan₄-na lu₂ la-ba-an-si-si
¹⁰¹e₂-ju₁₀ kurun₂-ta dab₅-ba-gin₇ lu₂-ra an-ed₃-de₃
¹⁰²muc jir₂ e₂ ku₁₀-ku₁₀-ga-ka me la₂-la₂
¹⁰³e₂-ju₁₀ lu₂ si-sa₂ mu-un-u₃-tud lu₂ lul mu-un-te-en-te
¹⁰⁴sig₄-bi arhuc er₂ mi-ni-in-jal₂ cag₄-ne-ca₄-a mu-un-du₃
¹⁰⁵lu₂-ulu₃-ba cag₄ mu-un-na-ab-huj-e bar mu-un-na-ab-ced₁₀-de₃
¹⁰⁶cag₄ dijir-ra-na u₃-mu-un-na-an-huj
¹⁰⁷kug sag₉-ga-gin₇ cu u₃-mu-ni-in-su-ub sahar u₃-mu-un-ta-zalag
¹⁰⁸kug saj bar kug-ge KA cu-a gub-ba-gin₇ sahar u₃-mu-un-ta-luh-luh
¹⁰⁹cu sag₉-ga dijir-ra-na-ce₃ im-ci-in-gi₄-gi₄
¹¹⁰dijir lu₂-ba-ke₄ su₃-u₄-ra₂-ce₃ me-tec₂ hu-mu-i-i
¹¹¹lu₂-ulu₃-bi ka-tar-ju₁₀ he₂-si-il-le nam-mah-ju₁₀ he₂-em-me
¹¹²ar₂-ju₁₀ kalam-ma ak-ak-da-bi nij₂-me-jar sug₄-ga-am₃
¹¹³i₃-li₂ tur₃ kug-ta mi₂ he₂-em-me nij₂-saj-bi ha-ma-an-tum₃
¹¹⁴udu i₃ amac kug-ta mi₂ he₂-em-me nij₂-saj-bi ha-ma-an-tum₃
¹¹⁵lu₂-ba ^dlama sag₉-ga-ni-me-en ja₂-la nu-mu-un-ta-dag-ge
¹¹⁶e₂-gal-la palil-ni je₂₆-me-en en-nu-uj₃ im-ma-ak-en
¹¹⁷nin-e nam-mah-a-ni pa ed₂ ak-a
¹¹⁸e₂ kur e₂-ec₂ ki-tuc ki aj₂-ja₂-ni ni₂ me-lem₄ cum₂-ma
¹¹⁹dijir er₉ ^jicrab ^da-nun-na-ke₄-ne nam-ma-ni lu₂ nu-zu
¹²⁰saj-kal me-a-na cu nu-TU.TU
^121dnun-gal-la za₃-mi₂

Top | translation | bibliography

Revision history

16.iii.1999 : GZ: standardization
29.vi.1999-30.vi.1999 : JAB : proofreading
07.vii.1999 : GZ : SGML tagging
23.vii.1999 : ER : proofreading SGML
24.vii.19999 : ER : converting to HTML 4.0
7.ix.2001 : ER : header and footer reformatted; substantive content of file not changed