The advice of a supervisor to a younger scribe (E-dubba C): composite text

¹dumu e₂-dub-ba-a ud ul-la ja₂-nu ki-ju₁₀-ce₃
²nij₂ um-mi-a-ju₁₀ mu-un-pad₃-da za-e ga-ra-pad₃-pad₃
³za-e-gin₇-nam nam-lu₂-tur i₃-ak cec-gal i₃-tuku-am₃
⁴um-mi-a lu₂-ta kij₂-ja₂-am₃ a₂-aj₂-ja₂ jic bi₂-in-jar
⁵gi al-gu₄-ud-da-gin₇ i₃-gu₄-ud-de₃-en kij-ja₂ bi₂-in-sig₁₀-ge-en
⁶inim um-mi-a-ju₁₀ nu-un-taka₄ nij₂ ni₂-ja₂ li-bi₂-ak
⁷cec-gal-ju₁₀ a₂ jic-jar-ra-ja₂ cag₄-ga-ni i-ni-in-dug₃
⁸i₃-sun₅-ne na-mu-da-ci-hul₂ silim-ja₂ i-ni-in-dug₄
⁹jic ma-an-hur-ra na-an-dim₂ ki-bi-ce₃ al-jar-jar
¹⁰na-rig₅-ga-ni-ta lu₂ hu-ru-um cu-bar dib-ba-e
¹¹im-ma cu-ju₁₀ si ba-ni-in-sa₂ us₂ zid mu-un-dab₅
¹²ka-ju₁₀ inim-ma jal₂ ba-ni-in-taka₄ ad-gi₄-gi₄ ma-an-pad₃
¹³jic-hur lu₂ a₂-aj₂-ja₂ si sa₂-e igi ma-ni-in-si-si
¹⁴gu₂ zi-zi-i ha-la a₂-aj₂-ja₂-kam ud zal-le nij₂-gig-ga
¹⁵lu₂ ki a₂-aj₂-ja₂-ni-ce₃ ud zal-la a₂-aj₂-ja₂-ni ab-taka₄
¹⁶nij₂-zu-a-ni pa nu-um-ed₂ KA.KA-ni ba-an-la₂
¹⁷tukum-bi nij₂-zu-a-ni pa ba-an-ed₂ igi mu-un-suh-suh-u₃-ne
¹⁸ud na-ab-zal-e-en ji₆ na-ab-sed₄-e-en a₂-bi-ce₃ jen-na
¹⁹cec-gal cec-ban₃-da hi-li-a-bi na-an-na-ni-ib-gi₄-gi₄
²⁰saj-ki gal-gal-la um-ma-tej₃ inim-zu ba-dugud-de₃-en
²¹2-kam-ma-ce₃ igi KEC₂-da-zu-ce₃ nu-ra-ni-ib-gi₄-gi₄
²²ki-za-za tec₂ lu₂-u₁₈-lu-ka mah-bi gu₂ he₂-ri-du₃
²³u₂ tec₂-a-ka cag₄ ab-sed₄-de₃ nam-tag-ga al-du₈-e
²⁴lu₂ cu sug₄-ga-ka kadra-ni ur₅-ce₃ nir mu-un-jal₂
²⁵lu₂ nij₂ nu-tuku mac₂ gur-ra-na gaba-na i-im-tab
²⁶lu₂ jarza₂-ra ki he₂-en-ne-za he₂-KEC₂ ba-sed₄-de₃
²⁷nij₂ um-mi-a-ju₁₀ mu-un-pad₃-de₃ e-ra-cid nu-mu-ra-ab-taka₄
²⁸jizzal he₂-bi₂-ak cag₄-ce₃ gid₂-i-de₃ sag₉-ge-zu mu-da-an-jal₂
²⁹dub-sar umun₂ ak sun₅-na-bi ugula-a-ni mu-un-na-ni-ib-gi₄-gi₄
³⁰ud mu₇-mu₇-gin₇ ab-cid-en-na-a ba-an-gi₄-bi a-ra-ab-ha-za-an
³¹mu gud-gin₇ i-lu dug₃-ga-zu-ce₃ jic i₃-la₂-a-bi
³²lu₂ nu-zu nam-mu-ni-ib-ku₄-ku₄ dic-am₃ ga-ra-ni-ib-gi₄ (1 ms. inserts ll. 60A and 60B here instead of after l. 60)
³³ur-gir₁₅ tur-gin₇ igi mu-e-bad-bad nam-lu₂-ulu₃ mu-e-ak
³⁴a-na-ac-am₃ lu₂ ja₂-la dag-ga-gin₇ jic ma-ab-hur-hur-re-en
³⁵lu₂ inim-zu jic ba-ni-in-tuku-a cu am₃-ma-kar₂-kar₂
³⁶nam-dub-sar-ra a-na mu-e-pad₃-da-zu cu-za ba-ni-in-cum₂
³⁷e₂-za he₂-bi₂-gub-be₂-en ud na-me nij₂-ja₂-la-dag-ga-ju₁₀-uc sa₂ ba-ra-am₃-mu-ri-ib-dug₄
³⁸geme₂ arad₂ jiri₃-sig₁₀-ga e₂-za kij₂-gi₄-a he₂-bi₂-ne-gi₄
³⁹kurum₆-bi tug₂-bi u₃ i₃-ba-bi cag₄-bi ha-ma-dug₃-ga
⁴⁰a-ra₂-bi-ce₃ kij-gi₄-a he₂-bi₂-in-ne-gi₄ e₂ lugal-ka arad₂ ba-ra-bi₂-in-us₂
⁴¹gaba ud-ja₂ he₂-bi₂-ak udu-gin₇ he₂-eb-us₂-u₃-nam
⁴²sizkur₂ sa gi₄-gi₄-da he₂-mu-e-dug₄ ud-bi sa₂ he₂-ri-ib-dug₄
⁴³udu-bi u₂-gu₇-bi ha-ma-sag₉-sag₉ dijir-zu he₂-hul₂
⁴⁴ud ma₂ dijir-za us₂-sa-bi giri₁₇ cu ha-ra-ab-tag-ge-ne
⁴⁵gaba a-cag₄-ga-ce₃ a₂ he₂-mu-e-da-a-a-aj₂ erin₂-e kij₂ he₂-bi₂-ak
⁴⁶kij₂ a-da-min₃-na ji₆ an-bar₇-ba u₃ ba-ra-bi₂-ku-am₃
⁴⁷us₂-a-du dumu engar-ra-ke₄-e-ne saj hu-mu-un-kal-le-ne
⁴⁸a-cag₄-za cu nam-sag₉-ga he₂-bi₂-gi₄ uj₃-e u₆-di he₂-ri-ib-dug₄
⁴⁹gud-de₃ a-na-am₃ gub-zu dirig he₂-em-tum₃ gu₂-un-bi ha-ra-ab-silim-ma-am₃
⁵⁰tur-ra-ju₁₀-ta he₂-em-ma-dim₄-e-en a-ra₂-ju₁₀ igi he₂-bi₂-du₈
⁵¹kug sag₉-ga-gin₇ gurum₂ he₂-bi₂-ak ki-cer₁₁ la-ba-an-tuku
⁵²gal-bi nu-di nij₂-gig-zu-gin₇ e-ra-da-tuc-u₃-nam
⁵³ni₂ tur-tur-re e-ra-da-zah₂-zah₂-na pa ga-ra-ab-ed₂ zu-a
⁵⁴ud-bi-ta lu₂-tur he₂-me-en-na i₃-ne-ce₃ saj-zu il₂
⁵⁵cu-zu lu₂-ra mu-da-an-gi₄-gi₄-in a-ra₂-bi-ce₃ DU-mu-un
⁵⁶cud₃ he₂-mu-e-ca₄ nam mu-tar-ra
⁵⁷na-rig₅-ga ga i₃ gu₇-a-gin₇ su-ja₂ i-ni-in-kur₉-ra
⁵⁸gub-bu ja₂-la nu-dag-ge pad₃-da-zu
⁵⁹ki sag₉-ga-bi sa₂ he₂-ri-ib-dug₄ nij₂-hul-bi li-bi₂-in-ak
⁶⁰um-mi-a lu₂ inim zu-u₃-ne saj hu-mu-un-kal-le-ne
(2 mss. add 3 lines:
^60Ae₂-bi-a ki saj-kal-la-ba DI DI hu-mu-un-e-ne
^60Bmu-zu dug₃-ge-ec pad₃-de₃-da-bi saj-ki-bi ma-jal₂
(1 of the 2 mss. has ll. 67 and 68 after line 60B instead of after l. 66)
^60Eum-mi-a cag₄ hul₂-la-ni-ta cud₃ mu-na-an-ca₄)
⁶¹lu₂-tur inim-ju₁₀-ce₃ ba-tuc-u₃-nam cag₄-ju₁₀ bi₂-dug₃-ga-am₃
⁶²^dnisaba dugud-da um-mi-a cu-za i-ni-in-jar-ra
⁶³nam i-ri-tar-ra mu-na-ra-kur₂-ru cu zid ha-ra-an-ja₂-ja₂
(1 ms. has instead the line: cu dug₄-ga ^dnisaba-me-en gu₂ an-ce₃ [...])
⁶⁴cag₄ hul₂-la nam-ce₃ he₂-bi₂-tar cag₄ sig₃ he₂-da-zig₃
⁶⁵e₂-dub-ba-a ki umum-ma a-na jal₂-la [...]
⁶⁶nam-mah ^dnisaba nij₂-me-jar pad₃-pad₃ di-da-/bi^?\
⁶⁷ gud-us₂ cir₃ dug₃-dug₃-ga-zu-ce₃ jic-la₂-bi mah
⁶⁸cir₃ dug₃-ga-zu-ce₃ jic ga-mu-ni-in-la₂ SAL-zu-gin₇ ga-mu-ni-tag-tag
⁶⁹nij₂-jectug₂-ga nu-u₁₈-lu-me-en hu-mu-un-pad₃-pad₃-de₃-ne
⁷⁰di₄-di₄-la₂ inim-inim-ma he₂-du₇ kac hu-mu-un-ku₇-ku₇-de₃-ne
⁷¹gacam ki ku₁₀-ku₁₀-ga ud ja₂-ja₂
⁷²sila saj-gi₄-a sila-a ba-an-ja₂-ja₂
⁷³us₂ tec₂-ba ri-a si sa₂-e in ki-bi sur-sur
⁷⁴nin me-ni-da me nu-sa₂-a ^dnisaba za₃-mi₂

Top | translation | bibliography

Revision history

17.iii.2000-27.iii.2000 : GC : standardisation
7.x.2000 : JAB : proofreading
14.xi.2000 : GZ : SGML tagging
25.xi.2000 : ER : proofreading SGML
25.xi.2000 : ER : converting to HTML 4.0
7.ix.2001 : ER : header and footer reformatted; substantive content of file not changed